མགོན་པོའི་ལས་མཐའི་སྐོར་གབ་རྒྱ།
མགོན་པོའི་ལས་མཐའི་སྐོར་གབ་རྒྱ།
ན་མ་ཤྲཱི་མ་ཧཱ་ཀཱ་ལ་ཡེ། ཡེ་ཤེས་མགོན་པོའི་ལས་ཚོགས་སྙན་བརྒྱུད་ནི། །སྔོན་ཆད་ཡི་གེ་མེད་པའི་ཡི་གེའི་སྐོར། །མགོན་པོ་འཁོར་བཅས་བཀའ་ཡི་གནང་བ་སྩོལ། །ས་གནས་བྱང་ཆུབ་སེམས་དཔའ་ཆེན་པོ་དང་། །རྟོགས་པ་མཆོག་དང་ལྡན་པའི་རྣལ་འབྱོར་ལ། །མི་ངན་ཕལ་གྱིས་བརྙས་ཤིང་དོ་བསྡོས་ལ། །དེ་ཡི་སྟོབས་དང་བསོད་ནམས་ཉམས་པའི་ཐབས། །རང་ཉིད་སྐད་ཅིག་འཕགས་པ་སྤྱན་རས་གཟིགས། །ཕྱག་སྟོང་སྤྱན་སྟོང་སྐུ་རུ་དྲན་རྫོགས་སྒོམ། །དེ་ཡི་གནས་ལྔ་རྒྱལ་བ་རིགས་ལྔ་བསྒོམ། །བ་སྤུའི་བུ་གར་བསྐལ་བཟང་སངས་རྒྱས་སྟོང་། །ཐམས་
ཅད་བཞེངས་ཏེ་ཐལ་མོ་སྦྱར་བར་བསྒོམ། །དངོས་སམ་ཡང་ན་ས་ཐག་རིང་སམ་ནས། །རང་ཉིད་སྐུ་ཆེ་ནམ་མཁའ་གང་བ་དེས། །དགྲ་དེ་ཁོ་རང་ས་ཆ་གར་ཡོད་དེར། །རང་གི་མདུན་དུ་མངོན་སུམ་ཡོད་པར་དམིགས། །རང་ལུས་ལྷར་གསལ་ཁོ་ལ་ཕྱག་དགུ་འཚལ། །ཁོ་ཡི་མིང་ནས་བརྗོད་ཅིང་བརྒྱ་ཕྱག་འཚལ། །དེ་ནས་དུས་བཟང་དུས་སུ་ལན་འགའ་བྱ། །གལ་ཏེ་རང་ཉིད་ས་ཐོབ་མིན་པ་ཡི། །རྟོགས་པ་མཆོག་དང་ལྡན་པ་མ་ཡིན་ན། །ཐུབ་དབང་གསེར་སྐུ་བྱིན་རླབས་ལྡན་པ་གཅིག །རང་གི་སྣམ་ཕྲག་གཅིག་ཏུ་བཅུག་པར་བྱ། །སྡུད་པ་ལ་སོགས་བཀའ་ཡི་གླེགས་
བམ་ཞིག །རང་གིས་ཁུར་རམ་རང་གིས་སྣམ་ཕྲག་བཅུག །དེ་ནས་བརྒྱ་ཕྱག་ལ་སོགས་ཅི་མང་མཚལ། །དེ་བྱས་ཁོ་ཡི་ཕོ་ལྷ་དགྲ་ལྷ་དང་། །མགོན་སྐྱབས་བྱེད་པའི་ལྷ་ཀུན་དཔག་ཚད་བྲོས། །ཁོ་ཡི་བསོད་ནམས་དབང་ཐང་ཁ་རྗེ་ཟད། །དཔེར་ན་ཆུ་བཅད་པ་ཡི་ཉ་བཞིན་དུ། །ཇེ་ཆུང་ཇེ་མེད་ཇེ་ངན་རྗེས་མེད་འགྲོ། །གཏད་མནན་རྫས་ངན་བརྒྱ་བས་དེ་ཉིད་ཟབ། །བདེན་པའི་སྟོབས་ཡིན་དེ་ལ་བཟློག་རྒྱུ་མེད། །བསྟན་ལ་གནོད་དང་བླ་མའི་སྐུ་དགྲ་དང་། །རང་གི་སྲོག་ལ་བསྡོ་བ་མ་གཏོགས་པ། །འདི་བྱས་མཚམས་མེད་ལྔ་ཡི་སྡིག་དང་མཉམ། །ཅི་ཕྱིར་སེམས་ཅན་བློས་བཏང་བྱང་སྡོམ་འཆོར། །སེམས་ཅན་དེ་ལ་གནོད་པ་ཆེར་གྲགས་པས། །ཆོས་ལ་སྐྱབས་སུ་སོང་བའི་སྡོམ་པ་འཆོར། །བོན་ཀྱང་སངས་རྒྱས་བསྟན་ལ་གནོད་ངེས་དང་། །དམ་ཆོས་སྒྲུབ་ལ་བར་ཆད་བྱེད་ངེས་ན། །བསྒྲལ་ཞིང་ཚང་ན་ངའི་ཉིད་བྱ་རུང་ཞིང་། །ཚེ་འདིར་ཁོ་ཡི་ཁ་རྗེ་སྐམ་པ་དེ། །ཁོ་ཡི་སྡིག་འཕྲོ་གཅོད་ཅིང་བསྟན་ལ་ཕན་པ་དང་། །མ་འོངས་སྐྱེ་བ་གཞན་དང་གཞན་དག་ཏུ། །ཁོ་ཉིད་རང་གི་རྗེས་སུ་བཟུང་བྱས་ཏེ། །རིམ་གྱིས་བྱང་ཆུབ་ལམ་ལ་འགོད་པ་ཡིས། །ཐོག་མར་སེམས་བསྐྱེད་
རྗེས་སུ་སྨོན་ལམ་བཏབ། །དེ་བྱས་རང་ལ་ལྟུང་བ་མི་འབྱུང་ཞིང་། །སྐྱེ་བ་གཞན་དུ་ཁོ་ལ་ཕན་ཐོགས་ངེས། །འདི་འདྲ་གདམས་ངག་སྔོན་ཆད་ཡི་གེ་མེད། །སློབ་དཔོན་མཁས་པའི་སྙན་བརྒྱུད་ཁོ་ན་སྟེ། །ཐུབ་པས་གསུངས་པ་མདོ་རྒྱུད་ཀུན་གྱི་དོན། །ཤིན་ཏུ་ཟབ་ཅིང་རྟགས་མཚན་ཆེ་བ་ནི། །རྡོ་རྗེ་འཆང་དངོས་བླ་མའི་གསུང་ཐོས་པས། །གནམ་ལོ་རྒྱལ་པོ་གླེན་པ་ལུག་གི་ལོ། །སྒྲ་རྒྱལ་འབྲུག་གི་ཟླ་བ་རྫོགས་མཚམས་སུ། །ཞེ་སྡང་སྦྲུལ་གྱི་དུས་ཚོད་ཉི་དྲོས་ལ། །སྔགས་ནག་རཱ་ག་ཨ་སྱས་སྨྲས་པ་ལྟར། །ཡི་གེ་པ་ཡང་ཞེ་སྡང་སྦྲུལ་ལོ་པ། །གུ་ཎའི་མིང་ཅན་པ་དེས་མགྱོགས་པར་བྲིས། །འདི་བྲིས་བརྩེ་བྲལ་བསྟན་བཅོས་ཀྱི། །ཉེས་པ་གང་མཆིས་མགོན་པོའི་ཚོགས་ལ་བཤགས། །དགེ་བས་དཀོན་མཆོག་དབུ་འཕང་མཐོ་བར་ཤོག། མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།