དཔལ་མགོན་མ་ནིང་གི་ལོ་རྒྱུས་དང་འབྲས་བུའི་ཡིག་སྣ།
དཔལ་མགོན་མ་ནིང་གི་ལོ་རྒྱུས་དང་འབྲས་བུའི་ཡིག་སྣ་ལགས་སོ༔ ༈ སྔོན་བཅོམ་ལྡན་འདས་ཀུན་བཟང་ཧེ་རུ་ཀ་ལ་ཡུམ་ཀུན་ཏུ་བཟང་མོ་དབྱིངས་ཕྱུག་མས་སྦྱོར་སྒྲོལ་གྱི་སྤྲུལ་པ་སྟོན་པར་ཞུས་པས༔ བཅོམ་ལྡན་འདས་ཀྱི་སྐུ་ལས་འོད་ཟེར་བྱེ་བ་ཕྲག་བརྒྱ་སྤྲོས་པས་ས་རྣམ་པ་དྲུག་ཏུ་གཡོས་ཤིང་༔ སྦྱོར་མཚམས་ནས་འཆོལ་བའི་ཁྲོ་བོ་བརྒྱད༔ སྐུ་གསུང་ཐུགས་ལས་ཁྲོ་བོ་ཆོལ་པ་གསུམ་སྐུའི་གནས་ལྔ་ནས་སྐུའི་མགོན་པོ་སྤྲུལ་ལོ༔ དེའི་ཚེ་རུ་ཊ་སྡེ་གསུམ་དང་སྡེ་བརྒྱད་བྱེ་བ་ཕྲག་མང་པོ་འཚོགས་ནས༔ སེམས་ཅན་རྣམས་ལ་འཚེ་བར་གྱུར་ཏོ༔ དེར་ཡུམ་གྱིས་བདུད་འདུལ་བར་ཞུས་པས་དཔལ་ཆེན་པོའི་སྤྲུལ་པ་ཞལ་གསུམ་ཕྱག་དྲུག་པ་དང་༔ དབུ་དགུ་ཕྱག་བཅོ་བརྒྱད་པ་དང་དབུ་ཉི་ཤུ་རྩ་གཅིག་ཕྱག་བཞི་བཅུ་རྩ་གཉིས་སོགས་སྤྲུལ་ནས་བདུད་རྣམས་དང་སྟོབས་འདྲེན་ནོ༔ དེ་ནས་དཔལ་ཆེན་པོ་སྙིང་རྗེས་བསྒྲལ་བའི་ཏིང་ངེ་འཛིན་ལ་ཞུགས་པས་བདུད་རྣམས་ཕྱོགས་ཀུན་ཏུ་བྲོས་ཀྱང་མ་ཐར་ནས༔ སྲིན་ཡུལ་གནམ་ལྕགས་མ་ལ་ཡའི་རྩེར་འདུས་ནས་ད་རུང་རྩོད་པར་བྱེད་དོ༔ དེ་ནས་བཅོམ་ལྡན་འདས་ཀྱིས་རུ་ཊ་ཉིད་དུ་སྤྲུལ་ནས་རུ་ཊའི་ཆུང་མ་རོལ་བས་བུ་ཁྲོ་བོ་ལྗང་ནག་ཞལ་གསུམ་ཕྱག་དྲུག་
པ་གཅིག་བྱུང་བ་རུ་ཊའི་བུར་བརྫུས་ཏེ་རུ་ཊའི་མགོ་ལ་བེང་བརྒྱབས་ནས་བསྒྲལ་ཏེ་ཁོག་པ་གཞལ་ཡས་སེམས་གདན་དུ་བྱས་བདུད་ཀྱི་འཁོར་རྣམས་རང་གི་འཁོར་དུ་བསྐོར་རོ༔ དེར་སྐུ་གསུམ་མགོན་པོས་རུ་ཏྲ་སྡེ་གསུམ་དང་ཡོན་ཏན་དང་ཕྲིན་ལས་ཀྱི་མགོན་པོས་ཕོ་རྒྱུད་མོ་རྒྱུད་ཀྱི་རུ་ཏྲ་བཏུལ་ལོ༔ དེ་ནས་ཏུ་ཊ་སྡེ་བརྒྱད་དང་བདུད་བྱེ་བ་དུང་ཕྱུར་དེ་དག་བསྒྲལ་ནས་རྩིག་པ་དང་ཐོག་དང་ཀ་གདུང་བྱས་ནས༔ ངོ་བོ་རུ་ཊའི་ཁོག་པ་ཐོད་མཁར་མེ་རླུང་འཚུབ་པའི་ནང་པད་ཉི་རུ་ཊའི་གདན་ལ༔ ཆེ་མཆོག་ཧེ་རུ་ཀ་ཉིད་མགོན་པོ་མ་ནིང་ནག་པོར་སྤྲུལ་ནས་སྔགས་བརྗོད་པས་རུ་ཊ་ཐུལ་ནས་སྲོག་སྙིང་ཕུལ་བསྟན་པ་སྲུང་བར་ཁས་བླངས་ལས་མགོན་སྲོག་བདུད་དུ་དབང་བསྐུར་རོ༔ དེ་ནས་མ་ནིང་ནག་པོ་སྲོག་བདུད་དུ་སྤྲུལ་ནས་རི་མ་ལ་ཡའི་རྩེར་ཐོད་པའི་མཁར་ན་འཁོར་དུ་མས་བསྐོར་ཏེ་བཞུགས་སོ༔ དེ་ནས་ལྷ་དང་ལྷ་མ་ཡིན་འཐབ་པའི་ཚེ་བརྒྱ་བྱིན་གྱིས་ལྷ་མོ་ཨུ་མ་ཕོ་ཉར་བཏང་སྟེ༔ ཡེ་ཤེས་མགོན་པོའི་སྤྲུལ་པ་སྲོག་བདུད་དེ་ལྷ་ཡུལ་དུ་སྤྱན་དྲངས་ནས་ལྷ་ཐམས་ཅད་ཀྱིས་མཆོད་ཅིང་དམག་དཔོན་དུ་མངའ་གསོལ༔ དཔལ་མགོན་བདུན་ཅུས་བྲན་བྱེད་པར་ཁས་བླངས་སོ༔ དེར་ནག་པོ་ཨུ་མ་དང་རོལ་བས་བུ་
ལེགས་ལྡན་དང་བུ་མོ་ལྷ་མོ་རེ་མ་ཏི་བྱུང་ངོ་༔ དེར་མ་ནིང་སྲོག་བདུད་ནག་པོ་དམག་ཆས་སུ་ཞུགས་ཏེ་ཡན་ལག་བཞི་ལ་པྲ་མ་རཱ་༔ ཡ་མ་རཱ་ཏ༔ ནཱ་ག་རཱ་༔ ཨ་སེ་རྒྱལ་བ་བཞིར་སྤྲུལ༔ འཁོར་གྱི་ལྷ་བརྒྱད་ཁྱེའུ་ཆུང་བརྒྱད་གནོད་སྦྱིན་བརྒྱད་བྱ་ཁྲ་གཤིན་རྗེ་བརྒྱད་སྟག་གཟིག་ཀླུ་བརྒྱད་འབྲུག་བརྒྱད་སོགས་སུ་སྤྲུལ་ཞིང་བདུད་འདུལ་ཉི་ཁྲི་ཆིག་སྟོང་གི་དམག་དང་བཅས་ནས་ལྷ་མ་ཡིན་གྱི་གཡུལ་བཟློག་སྟེ་རྒྱ་མཚོའི་གཏིང་དུ་བྲོས་ཏེ་ཕུང་བར་བྱས་སོ༔ དེ་ནས་བདུད་དང་ལྷ་མིན་ཐུལ་བའི་འོག་མིན་ལྕང་ལོ་ཅན་ན༔ ལག་ན་རྡོ་རྗེ་རྡོ་རྗེ་ཆོས་སུ་སྤྲུལ་ནས་ཕྱི་ནང་གསང་བའི་མཆོད་པ་དང་ཚོགས་ཀྱི་འཁོར་ལོས་བཅོམ་ལྡན་འདས་ཆེ་མཆོག་ཧེ་རུ་ཀ་ལ་མཆོད་ཅིང་ཞུས་པའི་ངོར་མ་ནིང་གི་ལས་རྒྱུད་ཆེན་པོ་གསུངས༔ འདི་ལ་ལེའུ་བཅུ་བཞི་ཡོད༔ མགོན་པོ་མ་ནིང་འདིའི༔ སྐུའི་སྤྲུལ་པ་སྟག་ཞོན༔ གསུང་སྤྲུལ་བེང 
་ཆེན༔ ཐུགས་སྤྲུལ་གྲི་གུག༔ ཡོན་ཏན་སྤྲུལ་པ་སེང་ཞོན། ཕྲིན་ལས་ཀྱི་སྤྲུལ་པ་ཏྲཀྴད་དུ་གསུངས། མགོན་པོ་དང་། གཟའ་བདུད་དང་། ཀླུ་དང་། སྲོག་བདུད་མ་ནིང་སྟེ་བཞི་དང་། དེ་རྣམས་དོན་གྱི་ངོ་བོ་སྡེ་བརྒྱད་ཡང་གཅིག་ལ། ཡེ་ཤེས་དང་། ལས་
དང་། དམ་ཚིག་དང་། སྤྲུལ་པ་དང་། རུ་ཊ་རང་རྒྱུད་གནས་བསྒྱུར་བ་དང་། ཤ་ཟ་མགོན་པོ་སྡེ་ལྔ་དང་། སྤྱིར་མགོན་པོ་ཉི་ཤུ་རྩ་ལྔ་ཡོད་པར་བཤད་དོ། །འཁོར་ནི་དཔལ་མགོན་བདུན་ཅུ་དང་བདུད་འདུལ་ཉི་ཁྲི་གཅིག་སྟོང་ཡོད་ལ། གོང་གི་མགོན་པོ་ཉེར་ལྔ་པོ་དེ་ངོ་བོ་ནི་ཆེ་མཆོག་གི་སྤྲུལ་པ་ཡིན་ཏེ། ལས་རྒྱུད་ནས་བརྒྱ་བྱིན་གྱི་བསྟོད་པ་ལས། ཆོས་སྐུ་སྐྱེ་མེད་ཀུན་ཏུ་བཟང་། །ལོངས་སྐུ་ཆེ་མཆོག་ཧེ་རུ་ཀ །སྤྲུལ་སྐུ་མ་ནིང་ཁྲོ་བོའི་རྒྱལ། །ཅེས་གསུངས་སོ། །ལས་མགོན་སོགས། འཁོར་རྣམས་འཇིག་རྟེན་དབང་ཆོག་ནས་གསུངས་སོ། །འཛམ་གླིང་བྱེ་བ་ཕྲག་བརྒྱ་ན་ཨོ་རྒྱན་བྱེ་བ་ཕྲག་བརྒྱ་བཞུགས་པའི་གཏེར་སྲུང་ཡིན་ཅིང་ཞིང་འདིར་ཡང་། རང་བྱུང་གི་མཆོད་རྟེན་བརྒྱད་དང་དཔལ་ལྡན་འབྲས་སྤྱང་གི་མཆོད་རྟེན་དང་།་ན་ལེནྡྲ་སོགས་གནས་ཆེན་བརྒྱ་རྩ་བརྒྱད་དང་བསམ་ཡས་སོགས་བོད་ཀྱི་གཙུག་ལག་ཁང་ཐམས་ཅད་ཀྱི་སྲུང་མ་ཡིན་པར་བསྟོད་པ་ལས་གསུངས་ཤིང་སྟག་གི་ལོ་ལ་རཏྣ་གླིང་པས་བསམ་ཡས་ལྷུན་གྲུབ་བདེ་ཆེན་གཙུག་ལག་ཁང་དུ་དུས་མཆོད་བསྐང་གསོལ་བྱེད་དུས་མ་ནིང་འཁོར་བཅས་ཞལ་གཟིགས་ཤིང་བསྟོད་པ་ཡང་མཛད་ཅིང་ལྷག་པར་ཐུགས་སྒྲུབ་
ཉམས་སུ་ལེན་པ་ལ་བུ་ལྟར་སྐྱོང་ལ། བརྒྱུད་པ་འདི་ལ་ཤིན་ཏུ་འགོ་བ་ཡིན་ནོ༔ ཨྠྀི༔ ཞེས་པ་འདི་ཨ་རཱ་གས་སྦྱར་བའོ། །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།