དཔལ་ལྡན་ལྷ་མོ་དུད་སོལ་མའི་གཏོར་དབང་བདུད་རྩི་སྨན་གྱི་ཆར་འབེབས།
དཔལ་ལྡན་ལྷ་མོ་དུད་སོལ་མའི་གཏོར་དབང་བདུད་རྩི་སྨན་གྱི་ཆར་འབེབས་ཞེས་བྱ་བ་བཞུགས་སོ།།
ན་མོ་ཧེ་བཛྲ་ཡེ། འདིར་ལྷ་མོའི་གཏོར་དབང་སངས་རྒྱས་ཡེལ་པའི་ལུགས་གབ་སྦས་འཁྲུགས་བསལ་ཏེ། བཀོད་པ་ལ་མ་གཅིག་གི་ཐུགས་ཀྱི་བརྩེ་བས་གནང་ཞིང་རྗེས་བྱིན་གྱིས་བརླབ་ཏུ་གསོལ། སྟེགས་གཞིའི་སྟེང་དུ་དར་རས་ནག་པོ་ཁྲུ་གསུམ་དུ་བཏིང་བར་འབྲུ་ཡི་ཚོམ་བུ་ལྷ་གྲངས་དགུ་བཀོད་པའི་སྟེང་དུ་མཉྫི་བཞག་པར་ལྷ་མོའི་གཏོར་མ་ཟུར་གསུམ་ཧ་ཅང་མི་རིང་བར་རལ་གྲི་ཁཊུ་ཧཱུྃ་ཡིག་གིས་མཚན་པའི་མར་རྒྱན། གཏོར་མར་ནག་རྩི་བྱུག་པར་བྱས། རྩེ་ལ་ཡོད་ན་ཙཀ་ལི་དར་ནག་གདུགས་བཙུགས་པའི་མཐར་སྨན་རཀ་རྣམ་ལྔ་སོགས་སྤྱི་ལྟར་གང་འཛོམ་དང་། དམར་གཏོར་བཟང་བ་གཅིག་ཀྱང་བཤམས་ཏེ། འབྱོར་ན་ཚོགས་རྫས་གང་འཛོམས་བཤམས། ཕུགས་གཏོར་ཡོད་ན་གསོ་བྲན་བྱེད། མེད་ན་ལྷ་མོའི་སྨད་མཆོད་
པར་དམིགས་ལ། ཡི་དམ་གདན་བཞི། ཀྱི་རྡོར། ཕྱག་རྡོར། རྟ་མགྲིན་རྣམས་གང་རུང་བསྒོམ་པ་ཡིན་ན་འབྲེལ་ཆེ་བས་ལེགས་ལ། ཡང་ན་ཡི་དམ་གང་རུང་གི་བདག་བསྐྱེད་སྔོན་དུ་སོང་ན་དེས་ཆོག །ལྷ་མོའི་མངོན་རྟོགས་ནས་བསྟོད་པ་ཡན་གཏོར་ཆོག་ལྟར་རྒྱས་བསྡུས་སྐབས་དང་བསྟུན། བསྙེན་པ་བརྒྱ་རྩ་ལས་མི་ཉུང་བར་བྱ། གྲྭ་པ་མང་ན་སྔགས་འུར་འདོན་སྟོང་ཕྲག་ཙམ་བྱས་ལ། དེ་ནས་སློབ་མ་རྣམས་འདུས་ལ། ཁྲུས་ཆབ་དང་མེ་ཏོག་བཀྱེ། སྔོན་དུ་མ་སོང་ན་བགེགས་གཏོར་བཏང་། མཚམས་བཅད་སྲུང་འཁོར་བསྒོམ་པ་དང་རྒྱས་བསྡུས་སྐབས་དང་བསྟུན་ཏེ་བྱས་ལ། འོ་ན་ད་ལམ་ཁྱེད་རྣམས་ལ་མ་གཅིག་དཔལ་ལྡན་ལྷ་མོ་དུད་པའི་སོལ་བ་མའི་དབང་གཏོར་མ་ལ་བརྟེན་ཏེ་རྫོགས་
པར་བསྐུར་བ་ཡིན་པས། དེ་ལ་ཐོག་མར་ལོ་རྒྱུས་ཟུར་ཙམ་ཞིག་ཞུ་ན། ལྷ་མོ་འདིའི་ངོ་བོ་ནི་མེ་ལྕེ་འབར་བའི་རྒྱུད་ལས། དབྱིངས་ཀྱི་དབྱིངས་སུ་དབྱེར་མེད་པའི་སྟོང་ཉིད་ཆོས་སྐུ་རྣམ་དག་ཡེ་ཤེས་ལྔ། སྤྲུལ་པའི་མཚན་མ་སྟོང་། ཞེས་དང་། རྒྱུད་ལས་བསྐལ་པ་དུ་མའི་སྔོན་རོལ་ནས། དུས་གསུམ་སངས་རྒྱས་ཞལ་མཐོང་ཞིང་། །བླ་མེད་བྱང་ཆུབ་གོ་འཕང་ཐོབ། །པདྨའི་ཞིང་འདིར་སྤྲུལ་པའི་སྐུ། །ལྷ་མོའི་ཚུལ་དུ་རབ་བརྟེན་ནས། །འགྲོ་བའི་དོན་ལ་རབ་ཏུ་བརྩོན། །ཞེས་གསུངས་པས། ལྷ་མོ་འདི་བསྐལ་པ་གྲངས་མེད་པ་ནས་སངས་རྒྱས་ཚར་ནའང་སྤྲུལ་པའི་བཀོད་པ་གྲངས་མེད་པས་འགྲོ་བའི་དོན་མཛད་དེ། སྤྲུལ་པ་རེ་རེ་ལའང་སྐྱེ་རྒྱུད་དང་ལོ་རྒྱུས་མི་འདྲ་བའི་རྒྱུད་གཞུང་རེ་རེ་ཡོད་པས། དེ་དག་ཐམས་ཅད་རྫུ་འཕྲུལ་གྱི་བཀོད་པ་ཡིན་པས། རྒྱུད་གཞུང་གི་ལོ་རྒྱུས་དེ་དག་ཐམས་ཅད་བདེན་གྱིས་འགལ་བ་དང་མ་དག་གི་ཁྱད་ནི་མ་ཡིན་ནོ། །དེའི་ཕྱིར་གྲུབ་ཆེན་ནཱ་རོ་པའི་གསུངས་རྒྱུད། བུ་ཆུང་དུ་གྲགས་པའི་ལོ་རྒྱུས་ལས་དཔལ་ལྡན་ལྷ་མོ་འདི་ནི། ཕྱག་རྡོར་གྱི་སྤྱན་དབུས་མ་ལས་བྱུང་བའི་ལྷ་མོ་ཨུ་མ་དང་། ཚངས་པའི་ཡུམ་དཔལ་འབར་མ་
དང་། དབང་ཕྱུག་གི་ཡུམ་འདོད་ཁམས་དབང་ཕྱུག་མ་དང་། བརྒྱ་བྱིན་གྱི་ཡུམ་ལྷ་མོ་དབང་ཕྱུག་མ་དང་། ལྷ་མིན་གྱི་ཡུམ་ལྷ་མོ་མེ་འབར་མཚོ་སྐེམ་མ་དང་།། གཤིན་རྗེའི་གོ་རི་ལ་སོགས་པ་དགྱེས་རྡོར་གྱི་ཕྱོགས་བཞིའི་ལྷ་མོ་བཞི་རྣམས་ངོ་བོ་གཅིག་ཡིན་ཀྱང་། སྤྲུལ་པ་དང་སྐུའི་བཀོད་པ་སོ་སོ་ཡིན་པར་བཤད། སློབ་དཔོན་པདྨས། ཕྱི་ལྟར་ཨེ་ཀ་ཙ་ཏི། ནང་ལྟར་རེ་མ་ཏི། གསང་བ་སྲོག་སྒྲུབ་ནག་མོ། ཡང་གསང་ཀུན་ཏུ་བཟང་མོ་རྣམས་ངོ་བོ་གཅིག་པར་གསུངས། ས་གུར་དང་རྒྱུད་གུར་ལས་སྦྱར་བའི་འདོད་ཁམས་མ་འདི་ཡིན་ཏེ། བསྟོད་པ་ལ་ངོ་བོ་གཅིག །རྐང་བརྒྱད་འདི་རང་བྱེད། རང་བྱུང་རྒྱལ་མོ་དང་ངོ་བོ་གཅིག་སྟེ། དྲེལ་ཞོན་མ་དང་བོང་ཞོན་མ་གཉིས་རྣམ་པ་ན༔ དཔོན་གཡོག་ཏུ་སྣང་ཡང་ངོ་བོ་གཅིག་ཚུལ་རྒྱུད་རྣམས་སུ་གསལ། སངས་རྒྱས་ཡེལ་པའི་ལུགས་ལ་ནི། གྲུབ་ཆེན་བིར་ཝ་པས་བདག་མེད་མ་མཇལ་ནས་དབང་བསྐུར་བས་ས་དྲུག་པ་ཐོབ་པ་བདག་མེད་མ་དེ་ནི། ལྷ་མོ་འདི་ཉིད་ཡིན་པར་གསུངས་པར་གདའ། དེ་བཞིན་དུ་རྒྱ་གར་གྱི་གྲུབ་ཆེན་མཚོ་སྐྱེས་པས་མཛད་པའི་གཞུང་ལས། ཕྱི་སྒྲུབ་དབྱངས་ཅན་
མ། ནང་སྒྲུབ་རྡོ་རྗེ་ཕག་མོ། གསང་སྒྲུབ་ལྷ་མོ་འདི་ཉིད་ཡིན་པར་གསུངས། རྒྱ་བོད་མཁས་གྲུབ་ཕལ་ཆེར་ནས་གསེར་འོད་དམ་པ་ནས་གསུངས་པའི་དབྱངས་ཅན་མ་དང་། །ལྷ་མོ་དཔལ་དང་དོན་གཅིག་ཏུ་བཞེད་དེ། དེ་ཐམས་ཅད་ཅི་ལྟར་ཞིག་སྙམ་ན། གསང་སྔགས་སྔ་འགྱུར་ལྷ་མོའི་རྒྱུད་ལས། མི་མངོན་ནམ་མཁའི་དབྱིངས་ཤེད་ནས། །དཔལ་ལྡན་ལྷ་མོ་རེ་མ་ཏི། །སྐུ་ལུས་གཅིག་ལ་སྤྲུལ་པ་སྟོང་། །སྤྲུལ་པ་རེ་ལ་ཕྱག་བརྙན་འབུམ། །སྐུ་ཡང་མི་གཅིག་སོ་སོར་བསྒོམས། །སྔགས་ཀྱང་མི་གཅིག་སོ་སོར་བཟླས། །མཚན་ཀྱང་མི་གཅིག་སོ་སོར་འབོད། །ཇི་ལྟར་བྱས་ཀྱང་ངོ་བོ་གཅིག །ཇི་ལྟར་སྒྲུབ་ཀྱང་དངོས་གྲུབ་འབྱུང་། །ཞེས་གསུངས་སོ། །དེ་ལྟར་ངོ་བོ་གཅིག་ལ་སྤྲུལ་པའི་ལྷ་མོ་སྟོང་རྩ་བརྒྱད། དེ་རེ་རེ་ལའང་ལོ་རྒྱུས་དང་སྐྱེ་རྒྱུད་སྒྲུབ་ཐབས་མི་འདྲ་བ་རེ་རེ་ཡོད་ནའང་། འདིར་མེ་ལྕེ་འབར་མ་དང་། ཤན་པ་ནག་མོའི་རྒྱུད་དང་། དངོས་གྲུབ་བསྟན་གཟིགས་གསུམ་གཙོ་བོར་བྱས་ཏེ་ལོ་རྒྱུས་བཤད་ནའང་། ལྷ་མོ་འདི་ཉིད་ཆོས་སྐུ་ཡུམ་ཆེན་མོ་སངས་རྒྱས་ཐམས་ཅད་བསྐྱེད་པའི་ཡུམ་ཆེན་ནམ་མཁའ་ལྟར་ཀུན་ལ་ཁྱབ་པའི་ངང་
ལས། ལོངས་སྐུ་འཇའ་ཚོན་ལྟ་བུར་རྡོ་རྗེ་རོ་ལངས་མ་དང་། བདག་མེད་མ་དང་། རྡོ་རྗེ་ཕག་མོ་དང་། པདྨ་གཟི་ལྡན་མ་དང་། ཀྲོ་ཏི་ཤྭ་རི་མ་ལ་སོགས་སུ་སྣང་བས། ཡི་དམ་ཐམས་ཅད་ཀྱི་ཡུམ་དུ་གྱུར་པ་ལས། བསྐལ་པ་སྔོན་གྱི་དུས་ཞིག་ལ། །སྤྲུལ་པས་འགྲོ་བ་འདུལ་ཕྱིར། བྱང་ཆུབ་སེམས་དཔའ་ས་བརྒྱད་ལ་གནས་པ་སྨོན་ལམ་ཏིང་ངེ་འཛིན་མི་གཡོ་བ་བྱ་བ་གཅིག་ཏུ་སྤྲུལ་ནས་བཞུགས་པ་ལ། སངས་རྒྱས་རྣམས་ཀྱི་སྤྱན་གྱི་དབང་བསྐུར་བས། དེ་ཉིད་ཁྲོ་བོ་རྣམ་པར་སྣང་མཛད་ཅེས་བྱ་བ་ལྗང་ཁུ་དབུ་བཅུ་ཕྱག་སྟོང་ཞབས་སོ་གཉིས་དང་ལྡན་པ། སྐུ་ཚད་ནམ་མཁའ་དང་མཉམ་པར་སྤྲུལ་ནས་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ཞབས་ཀྱིས་མནན་པའི་ཆོ་འཕྲུལ་རྒྱུ༔ བསྟན་ནས་སླར་སྤྲུལ་པ་བསྡུས་ཏེ་རི་རབ་ཀྱི་རྩེར་བཞུགས་པ་དང་། རྒྱལ་བ་རིགས་ལྔ་དང་། སྤྱན་རས་གཟིགས་ལྷ་སྲིན་སྡེ་བརྒྱད་ཐམས་ཅད་འདུས་སོ། །དེར་བྱང་ཆུབ་སེམས་དཔའ་དེས་བདག་ནི་གདུག་པ་ཅན་གྱི་ལུས་སུ་གྱུར་ནས་འདུལ་དཀའ་བ་འདུལ་ཞིང་བསྟན་པ་སྐྱོང་བར་གྱུར་ཅིག །ཅེས་སྨོན་ལམ་བཏབ་མ་ཐག །བྱང་ཆུབ་སེམས་དཔའ་དེ་ཉིད་
ལྷ་མོ་དཔོན་གཡོག་གཉིས་སུ་བསྒྱུར་ཏེ། དྲེལ་དང་བོང་བུ་ཆིབས་ནས་འཇིག་རྟེན་ཁམས་སུ་རྒྱུག་གོ །དེར་ལྷ་ལ་སོགས་པའི་འཁོར་ལ་ལ་སྐྲག་ཤིང་དངང་ལ་ལས་འཕྱ་ཞིང་བགད། པ་ན། འཕགས་པ་སྤྱན་རས་གཟིགས་ཀྱི་ཞལ་ནས། འདི་ནི་བྱང་ཆུབ་སེམས་དཔའི་སྨོན་ལམ་ཡིན། མ་གཤེ་སྐྱབས་དང་གླིང་དུ་ཤེས་པར་གྱིས་ལ་མ་སྐྲག་པར་མཆོད་ཅིག་གསུངས་པས་ལྷ་སྲིན་སྡེ་བརྒྱད་ཀྱིས་མཆོད་ཅིང་བསྟོད་དོ། །དེ་ནས་དམྱལ་བ་ཡི་དྭགས་དང་དུད་འགྲོ་དང་ལྷ་མ་ཡིན་གྱི་ཡུལ་དུ་བྱོན་ནས་ཆོས་བསྟན་ནས་བར་ཆད་ཐམས་ཅད་གྲོལ་བའི་ལམ་ལ་བཀོད་པས་དམྱལ་བ་སྟོང་བྱེད་མ། ཡི་དྭགས་ཚིམ་བྱེད་མ། བྱོལ་སོང་གི་ལྷ་མོ་གཡང་ཤམ་མ་ཞེས་གྲགས། དེ་ནས་རི་རབ་ཀྱི་རྩེར་བྱོན་ནས་ལྷ་རྣམས་ལ་ཆོས་བསྟན་ནས་ཕྱག་ན་རྡོ་རྗེས་ལྷ་རྣམས་ལ་མཆོད་པ་གྱིས་ཤིག་གསུངས་ནས། ལྷ་སྲིན་སྡེ་བརྒྱད་ཀྱིས་མཆོད་དོ་ཕྱག་ན་རྡོ་རྗེའི་ལེགས་སོ་གསུངས། དེ་རྣམས་ནི་བྱང་ཆུབ་སེམས་དཔའི་རྫུ་འཕྲུལ་གྱི་བཀོད་པ་སྐད་ཅིག་ལ་བསྟན་པར་སྣང་ལ། དེ་ནས་ལྷ་མོ་དཔོན་གཡོག་དེ་འཇིག་རྟེན་ལྷ་དང་མི་ལ་ཕན་ཕྱིར་སྐྱེ་བ་བརྒྱུད་ཚུལ་ནི། དེ་ཡང་ལྷ་མོ་འདི་སྔོན་སངས་
རྒྱས་གསེར་ཐུབ་ཀྱི་བསྟན་པ་ལ། ལྷ་མོ་འོད་ཟེར་ཅན་དུ་གྱུར་ནས་བཅོམ་ལྡན་འདས་དེའི་དྲུང་དུ་ལམ་ལ་བསླབ་བོ། །དེ་བཞིན་དུ་འོད་སྲུང་གི་བསྟན་པ་ལ། ནམ་མཁའི་དཔལ་མོ་བྱ་བར་གྱུར། མར་མེ་མཛད་ཀྱི་བསྟན་པ་ལ་ལྷ་མོ་མཉྫ་ཞེས་བྱ་བར་གྱུར་ནས། དེའི་དུས་ཤཱཀྱ་ཐུབ་པ་དགེ་སློང་དབང་ཕྱུག་དཔའ་བོ་ཞེས་བྱ་བར་གྱུར་པ་བླ་མར་བསྟེན་ཏེ་ས་བརྒྱད་ཐོབ་ཚུལ་བསྟན། དེ་ནས་འདས་པའི་སངས་རྒྱས་རྣམས་ཀྱི་བསྟན་པ་ནི་རྫོགས་སོ། །ཐུབ་པ་དེའི་བསྟན་པ་མ་བྱུང་སྐབས་ཡུན་རིང་བའི་ཚེ། ལྷ་མ་ཡིན་རྒྱལ། ལྷ་ཕམ་པའི་ཚེ། ལྷ་དབང་ཕྱུག་ཆེན་པོ་དང་ལྷ་མོ་ཨུ་མ་གཉིས་ཀྱི་སྲས་མོར་ལྷ་མོ་འདི་འཁྲུངས། ལྷ་མ་ཡིན་གྱི་གཡུལ་ཟློག །ལྷ་རྒྱལ་བར་བྱས་ཏེ་མཚན་ཙ་མུན་ཏྲར་ཞེས་གྲགས་སོ། །དེ་ནས་རི་ཁྲོད་མདངས་དགའ་ན་རི་ཁྲོད་ཅན་གྱི་ལོ་མ་མནབས་ནས་འཕགས་པ་མི་ཕམ་པའི་གཟུངས་བཟླས་པས། ལྷ་མོ་པཎ་ཤ་བ་རི་རི་ཁྲོད་ལོ་མ་ཅན་ཞེས་གྲགས་སོ། །དེ་ནས་ཀླུ་དུང་གི་མཛེར་པ་ཅན་ལ་ཁྱུང་གི་འཚེ་བ་ལས། ཁྱུང་བཏུལ་ནས་ཀླུའི་སྐྱབས་མཛད་པས་དཀར་མོ་དུང་སྐྱོང་ཞེས་གྲགས་སོ། །དེ་ནས་རི་རབ་ཀྱི་རྩེར་བྱང་
ཤར་ཤིང་དྲུང་ནས་རིན་པོ་ཆེ་གཞལ་ཡས་ཁང་ནས་རྒྱན་ཐམས་ཅད་ཀྱིས་བརྒྱན་ནས་བཞུགས་ཤིང་ལྷ་རྣམས་ཀྱིས་མཆོད་དོ། །དེའི་ཚེ་སྲིན་པོའི་ཡུལ་དུ་ལྷས་སྐྱོན་ཕབ་ནས། སྲིན་པོ་དྷ་ཤ་གྷི་ཝ་དང་རྣ་ལ་རྩེ་གཉིས་མ་གཏོགས་ཕལ་ཆེར་ཤི་ནས། དེར་ཟླ་ཤེས་ལྷ་དང་མི་འདུལ་བའི་ཕྱིར་སྲིང་མོ་མ་ཧཱ་དྷེ་ཝར་ཕུལ་བས། རེ་མ་ཏི་འཁྲུངས་པ་དང་། ཕྱག་ན་རྡོ་རྗེ་དང་ལྷ་སྲིན་ཐམས་ཅད་ཀྱིས་བསྟན་པ་སྲུང་བའི་དམོད་བོར་ནས་རེ་མ་ཏི་མིང་བཏགས། ཡབ་ཀྱིས་སྦས་པའི་བུ་མོ་ཐལ་མདོག་མ། ཡུམ་གྱིས་མི་ཕམ་ཁྲོ་གཉེར་རོ་ལངས་མ། དུང་སྐྱོང་མས་སྲིན་མོ་དམར་འདབ་ཕུར་བའི་ལྷ་ཞེས་མིང་བཏགས། དེར་དུང་སྐྱོང་མའི་གཡོག་མོར་ཕུལ་བས་བསླུས་ཏེ་དུང་སྐྱོང་མ་དྷ་ཤ་གྷི་ཝའི་ཁབས་སུ་བྱོན་པ་ལ། ཡུམ་གྱིས་དམོད་བོར་བས་སྲིན་མོའི་གཟུགས་སུ་སོང་། སྲིན་ཕྲུག་ལྔ་བརྒྱ་སྐྱེས་ནས་སྲིན་པོ་ཤི་སྟེ། རལ་གྲི་ནེའུ་ལ་དང་ནོར་བུ་རྣམས་ཁྱེར། སྲིན་གྱི་བོང་བུ་ལ་ཆིབས་ནས་དུར་ཁྲོད་དུ་བྲོས་ཏེ་ཤ་ཁྲག་ལ་ལོངས་སྤྱོད། གཤིན་རྗེའི་རླུང་གི་འཁོར་ལོ་སྒོམ་པས་རླུང་ནག་འཚུབ་མ་གྲུབ་སྟེ། བསྟན་པ་སྲུང་བའི་འདོད་ཁམས་ལ་དབང་བསྒྱུར་བའི་སྨོན་ལམ་བཏབ་
ནས། རླུང་ལྷར་བོས་རླུང་ནག་གི་དཔོན་གཡོག་གཉིས་རྒྱ་མཚོར་བསྐུར་བས་ལྷ་མོ་ནི་རྒྱ་མཚོའི་འགྲམ་གྱི་དུར་ཁྲོད་དུ་གཤིན་རྗེ་ལྷག་པའི་མཐུ་ཆེན་གྱི་བུ་མོར་སྐྱེས། གཡོག་མོ་ཀླུ་མོ་ཆུ་སྲིན་གདོང་དུ་སྐྱེས་པ་ནི་ཀླུ་མོ་རེ་མ་ཏི་གྲགས། དེ་ཡང་མྱུར་བར་ཚེ་འཕོས་ནས་བདུད་རེ་ཏི་མགོ་ཉག་དང་བདུད་མོ་དྲན་པ་དབང་མེད་མ་གཉིས་ཀྱི་བུ་མོར་སྐྱེས་པ་ལ། ཕས་སྲིད་གསུམ་བློ་འཕྲོག་མ་དང་། མས་ཡ་མཚན་འཕྲུལ་གྱི་གཤོག་པ་ཅན་དུ་བཏགས། རིན་པོ་ཆེའི་རྒྱན་གྱིས་བརྒྱན་ཅིང་བདུད་མཁར་རྩེར་འདུག་པ་ལས། རྗེ་མོས་སྔགས་ཀྱི་བཀུག་པས། ཁོལ་མོའི་སྐྱེ་བ་དྲན་ཏེ། བདུད་ཀྱི་ཁྲམ་ཤིང་མཚོན་གྱི་དྲུ་གུ་དྲུག་ཁྱེར་ནས་འོང་། སྲིན་པོ་བུམ་སྣ་ཤི་བའི་ནད་ཁྲག་གི་རྫིང་བུ་འཐུངས་བས་ཁ་རླངས་ནད་སྤྲིན་བྱུང་། བཙན་སྐྱ་རྡོ་རྗེ་ཟླ་བ་དང་འགྲོགས་པས་བཙན་གྱི་ཤྭ་རྡེལ་བྱིན། སྲིན་གྱི་བོང་བུ་དང་། རྒོད་མ་ཟངས་ཀྱི་སོ་ཅན་མ་གཉིས་ལ་དྲེལ་སྔོན་རླུང་གི་གཤོག་པ་ཅན་བྱུང་བ་གཡོག་མོས་ཆིབས། སྲིན་གྱི་བོང་བུ་གྲྭ་དམར་དཔོན་མོས་ཆིབས། རྗེ་མོས་མི་ལྤགས་གྱོན་རལ་གྲི་ཐོད་པ། གཡོག་མོས་ཁྲམ་ཤིང་ཤྭ་རྡེལ་ཐོགས་ཏེ་ཤིན་ཏུ་མཐུ་རྩལ་ཆེ་བས་སྐྱེ་
བ་རྣམ་བཞིའི་སེམས་ཅན་རྣམས་ཟད་ལ་ཁད་དུ་ཟོས་སོ། །འཇིག་རྟེན་གྱི་མ་མོ་མཁའ་འགྲོ་ཐམས་ཅད་བྲན་དུ་གྱུར་ཏོ། །རཱ་ཧུ་ལ་དང་སྲིན་པོ་སྒྲ་ལྡན་དང་། གཤིན་རྗེ་མེ་རུ་རྩེ་དང་བདུད་འཆར་ཁ་ནག་པོ་དང་། ཀླུ་ཀུན་ལི་དང་ལྔ་དཔོན་མོ་ཡིས་དང་། འབྱུང་པོ་དགེ་བ། བགེགས་བི་ན་ཡ་ཀ །གནོད་སྦྱིན་ཡག་ཤ་ཀ་ལ། རླུང་ལྷ་བ་ཡ་བེའི་གདོང་ནི་གཡོག་མོའི་མཛའ་གྲོགས་སུ་གྱུར་ནས་དུར་ཁྲོད་ལ་སོགས་པ་ཐམས་ཅད་དུ་རྒྱུ་བའི་ཚེ། བྱང་ཆུབ་ཤིང་མཆོག་དྲུང་དུ་སྟོན་པ་ཤཱཀྱ་ཐུབ་པ་དང་མཇལ་ནས། དཔོན་གཡོག་གཉིས་ཀ་བྱང་ཆུབ་ཏུ་སེམས་བསྐྱེད། སྲོག་སྙིང་ཕུལ། དེ་ནས་ཨ་སུ་རིའི་བྲག་ཕུག་ཏུ་བྲམ་ཟེ་མཆོག་སྲེད་དང་གསུམ་གྱི་ཡུམ་ཆེན་ཨེ་ཀ་ཙ་ཏི་བསྒྲུབ་པས་ཞལ་མཐོང་བས། རྗེ་མོ་ལ་མ་ཧཱ་ཀཱ་ལིར་ཁོལ་མོར་རཀཱ་རེ་མ་ཏི་བཏགས། འདོད་ཁམས་མཐུ་མོ་ཆེར་དབང་བསྐུར། དགེ་སློང་གཅིག་དང་དགེ་སློང་མ་གཉིས་བལ་པོས་རྒྱལ་པོས་ཁྲིམས་བཅད་ནས་བསད་པ་བདུད་དུ་སྐྱེས་ནས་ མི་ཐམས་ཅད་རེས་མོས་ཟ་བའི་བདུད་དེ་ཉིད་བསྒྲལ་ལོ། །ས་ཡི་ལྷ་མོས་ནམ་གྲུ་མཆེད་བརྒྱད་འབངས 
་སུ་ཕུལ། དཔལ་རྟ་མགྲིན་དང་ཡུམ་ཨུ་མས་དབང་
བསྐུར། ཕྱག་ན་རྡོ་རྗེའི་གསང་བའི་དབང་ཆེན་དཔག་ཏུ་མེད་པ་བསྐུར་བས་ས་རྣམ་པ་དྲུག་ཏུ་གཡོས་སོ། །མཐུ་རྩལ་བསམ་མི་ཁྱབ་པར་གྱུར་པས། འཁོར་ལོས་སྒྱུར་རྒྱལ་ལྷ་སྲིན་སྡེ་བརྒྱད་ཐམས་ཅད་ཀྱིས་རང་རང་གི་བསྟན་པ་ཕྱག་རྒྱ་རེ་ཕུལ་ཞིང་བསྟོད་དོ། །སྲིད་པ་གསུམ་ན་འགྲན་ཟླ་དང་བྲལ་བར་གྱུར་ཅིག །དེ་ལྟར་མ་རུངས་པའི་ཚུལ་སྟོན་པ་ཡང་འདུལ་དཀའ་བའི་རིགས་རྣམས་འདུལ་བ་སྟེ། མེ་ལྕེ་འབར་མའི་རྒྱུད་ལས། སྙིང་རྗེའི་དབང་གིས་འགྲོ་དོན་བྱེད་པས་ན། །མདོར་ན་སངས་རྒྱས་སྤྲུལ་པ་ཡིན་པ་སྟེ། །ཁོ་མོ་བྱང་ཆུབ་སེམས་དཔའི་རྫུ་འཕྲུལ་ལོ། །མཚན་མོ་བདུད་མོ་སྲིན་མོར་ལྟ་མི་བྱ། །ཞེས་གསུངས་སོ། །བསྐལ་པ་འདི་ལ་སངས་རྒྱས་སྟོང་གི་བསྟན་པ་བསྲུངས་ནས་མཐར་སངས་རྒྱས་ཚུལ་མེ་ལྕེ་འབར་མ་ལས། བཅོམ་ལྡན་འདས་ཀྱིས་ཕྱག་ན་རྡོ་རྗེར་བཀའ་སྩལ་པ། མཁའ་འགྲོ་ལྷ་མོ་ནག་མོ་འདིས། །བསྐལ་པ་མང་པོས་སྔོན་རོལ་ནས། །དུས་གསུམ་རྒྱལ་བའི་ཞལ་མཐོང་ནས། །དམན་པའི་ཞིང་འདིར་སྤྲུལ་པའི་སྐུ། །ལྷ་མོས་ཚུལ་དུ་བསྟན་ནས་ཀྱང་། །འགྲོ་བའི་དོན་ལ་རབ་ཏུ་བརྩོན། །ཉོན་མོངས་
སྒྲིབ་པ་རབ་ཏུ་སྤང་། །དེ་ལྟར་ཤེས་བྱའི་སྒྲིབ་པ་སྦྱངས། །དེ་ཡི་ཁོལ་མོ་རེ་མ་ཏི། །སྨོན་ལམ་དག་པའི་འགྲོ་དོན་བྱེད། །བསྒོམ་པའི་དོན་ལ་རབ་གནས་ནས། །དེ་ལྟར་ཉོན་མོངས་སྒྲིབ་པ་སྦྱངས། །འདི་ལ་དུས་ནི་ཕྱི་མི་དུས་ཀྱི་ཚེ། །མཁའ་འགྲོ་ལྷ་མོ་ནག་མོ་འདི། །བྱང་ཤར་མཚམས་ཀྱི་འཇིག་རྟེན་ཁམས། །པདྨ་རྣམ་པར་རོལ་པ་འདིར། །དག་རྫོགས་པའི་སངས་རྒྱས་ནི། །པདྨོ་དམ་པའི་དཔལ་ཞེས་བྱ། །ངས་ནི་ལྷ་མོ་ལུང་བསྟན་ཏོ། །དེ་ཡི་གཡོག་མོ་རེ་མ་ཏི། །པདྨ་ཅན་གྱི་ཞིང་ཁམས་དེར། །བདེ་བའི་བྱང་ཆུབ་སེམས་དཔའ་ནི། །བློ་གྲོས་བཤེས་གཉེན་ཞེས་བྱ་བར། །དེང་འདིར་ངས་ནི་ལུང་བསྟན་ཏོ། །ཞེས་གསུངས། དེ་ལྟ་བུའི་ལྷ་མོ་འདི་ལ་བཀའ་གསར་རྙིང་གི་རྒྱུད་སྡེ་མཐའ་ཡས་པ་གཅིག་ཡོད་པའི་ནང་ནས། དངོས་གྲུབ་འབྱུང་རྒྱུད་ཀྱི་རྗེས་སུ་འབྲང་དུད་སོལ་མ་འདི་གང་ལས་བརྒྱུད་པ་ནི། རྒྱ་གར་རྡོ་རྗེ་གདན་གྱི་མཁན་པོ་པཎྜི་ཏ་དཔལ་ལྡན་ཆོས་སྐྱོང་དེས་ས་ག་ཟླ་བའི་བཅོ་ལྔར་ལྷ་མོ་འདི་འཁོར་ནག་མོ་འབུམ་དང་བཅས་པ་ཞལ་མཐོང་ནས་དབང་བསྐུར་བྱིན་གྱིས་བརླབས་པས་ས་དྲུག་པ་ཐོབ་པའི་གཡས་སྤྲུལ་མའི་བསྟོད་པ་
མཛད། ལྷ་མོ་ཉིད་ཀྱིས་གསང་སྒྲུབ་འདི་ཡང་དངོས་སུ་གནང་། ཁོང་གྲུབ་པ་ཐོབ་ཅིང་ཉི་མ་སྟོད་ལ་མནན། ཆུ་བོ་གངྒ་གྱེན་ལ་ཟློག་པ་སོགས་མཛད་པས། །གྲུབ་ཆེན་བིར་ཝ་པར་མཚན་ཐོགས། མུ་སྟེགས་པ་མང་པོ་ནང་པ་ལ་བསྒྱུར་ནས་གཅིག་གྲུབ་པ་ཐོབ་པ་ནག་པོ་པ་ཞེས་གྲགས་པ་དེ་ལ་གནང་། དེ་ལྟར་དཔོན་སློབ་གཉིས་ཀར་ཏེ་ལོ་པས་ཞུས་སོ། །ཡང་ལྷ་མོ་འདི་ཉིད་ཀྱི་མཁའ་འགྲོ་མ་བསྐལ་པ་བཟང་མོ་ལ་དབང་ལུང་མན་ངག་གནང་ངོ། །ཡང་རྡོ་རྗེ་འཆང་དང་བསྐལ་པ་བཟང་མོ་གཉིས་ཀ་ལ་ཏེ་ལོ་པས་ཞུས་སོ། །དེ་ནས་ནཱ་རོ་པས་དཀའ་བ་བཅུ་གཉིས་སྤྱད་པའི་རྗེས་ལ་གསེར་ཕྱེ་བྲེ་གང་ཕུལ་ནས་ཏེ་ལོ་ལ་ཞུས་སོ། །དེ་ནས་ནཱ་རོའི་དྲུང་དུ་མར་པ་ལོ་ཙཱས་གསེར་གྱི་མཎྜལ་ལ། གཡུ་ཡི་ཚོམ་བུ་བཀོད་དེ་ཕུལ། དུས་ངན་བསྟན་པ་རྒུད་པའི་དུས་སུ། ལྷ་མོ་ཐམས་ཅད་ཀྱི་ཡང་སྙིང་སྒྲུབ་སླ་ལ། བྱིན་རླབས་ཆེ་བ་རྦད་ན་ལས་ལ་མྱུར་བ་གཅིག་ཞུས་པས་ནཱ་རོ་པའི་ཞལ་ནས་སུས་ཀྱང་བཟློག་ཏུ་མེད་པ་ཡེ་ཤེས་ཀྱི་ལྷ་མོ་དུད་སོལ་མ་འདི་དེ་སྔ་ཆུ་བོ་གངྒཱ་ཕན་ཆོད་ལ་མེད་པའི་ཆོས་སྐྱོང་ཡིན། ཁྲག་འཐུང་ནག་མོ་འབུམ་སྡེའི་ཡང་སྙིང་། ལྷ་མོའི་
སྲོག་གི་སྒྲུབ་པ་སྤུ་གྲི་ཀ་མ་ལྟ་བུ། མེ་བས་ཚ་བ། གློག་བས་མྱུར་བ། རླུང་བས་མགྱོགས་པ་འདི་ཁྱོད་ཀྱི་ལྔ་བརྒྱའི་དུས་སུ་སྒྲུབ་པ་བྱེད་པའི་གང་ཟག་གིས་ཆོས་སྐྱོང་བའི་སྲུང་མ་དམ་པ་མཛོད་ཅིག་གསུངས་ནས་གནང་ངོ། །བལ་པོ་སྤྱི་ཐིལ་བ་ལ་ཡང་མར་པས་དབང་ལུང་མན་ངག་དང་བཅས་པ་ཞུས་སོ། །རྒྱ་གར་ནས་ཆོས་སྐྱོང་བརྒྱ་རྩ་བརྒྱད་གདན་དྲངས་ན་ཡང་འདི་ནཱ་རོ་པའི་ཆོས་སྐྱོང་གཙོ་བོ་སྟེ། གཏོར་མ་རེ་ཆག་མེད་རེ་འབུལ་བར་འདུག་པས། ཆོས་སྐྱོང་བརྒྱ་རྩ་བརྒྱད་ནང་ནས་ཀྱང་མར་པས་འདི་མཆོག་དམ་པར་མཛད་དོ། །དེ་ནས་རྔོག་སྟོན་ཆོས་རྡོར་གྱིས་འབྲི་ལྔ་བརྒྱ་དང་སྤོང་དག་ལན་གསུམ་གྱི་འབུལ་བ་བྱས་རྗེས། ཆོས་སྐྱོང་གསུམ་གྱི་ནང་ནས་འདོམ་གསུངས་ནས། ལྷ་མོ་འདི་འདོམ་པས་རྟེན་འབྲེལ་ལེགས་གསུངས། ནཱ་རོ་པས་ལུང་བསྟན་ཡོད་གསུངས་ནས་བླ་མ་རྔོག་པ་དང་། སྲས་དར་མ་མདོ་སྡེ་དང་། མཚུར་སྟོན་དབང་ངེ་གསུམ་ལ་ལྷ་མོའི་ཞལ་དངོས་སུ་བསྟན་ནས་རྗེས་གནང་མཛད། རྒྱུད་སྒྲུབ་ཐབས་དང་བཅས་པ་གནང་ངོ། །རྔོག་ཆོས་སྐུ་རྡོ་རྗེ་ལ་ཞེ་སྡང་རྡོ་རྗེས་ཞུས། རྔོག་ཞེ་སྡང་རྡོ་རྗེས་དྲུང་ནས་འགྲོ་མགོན་ཡེལ་པས་གནང་བར་
ལན་གསུམ་ཞུས་པས་ཅི་ཡང་མ་གསུངས། འབྱོན་རིན་པ་དང་ཐང་ཀོང་ནས་ཐང་ཀ་དང་། དཔེ་བརྩེགས་ནས་དཔེ་ཆ་གང་ཟིན་ཁྱེར་ཤོག་དང་གསུངས་ཕྱག་ཏུ་བཏང་བས་ཐང་ཀ་དང་དཔེ་ཆ་གཉིས་ཀ་ལྷ་མོ་འདི་ལ་བབས་པས། ཁྱོད་ཀྱི་སྐྱེ་བ་སྔོན་གྱི་ལས་ལྷར་འདུག་གསུངས་ནས། དུས་གསུམ་དུ་གཏོར་མ་མ་ཆག་པར་བྱིན་དང་མིས་མ་ནུས་ཀྱང་ཡེ་ཤེས་པ་འདི་རང་རྒྱུག་འགྲོ་བར་འདུག་གསུངས། མི་རབས་བདུན་དུ་མ་སྒྲུབ་པར་རང་རྒྱུག་བྱེད་པར་འདུག་གསུངས་སངས་རྒྱས་ཡེལ་པས་ནི་རྟག་ཏུ་ལྷ་མོ་ཞལ་གཟིགས་ཤིང་། གསེར་མིན་རྒྱལ་པོའི་དམག་བྱུང་དུས། ལྷ་མོའི་རྒྱལ་པོ་དེས་སྙིང་དངོས་སུ་བཏོན་ནས་ཕུལ་བ་ད་ལྟ་ཡང་རྟ་རྣའི་གཙུག་ལག་ཁང་དུ་ཡོད་པ་སོགས་ལོ་རྒྱུས་མང་བར་སྣང་ཡང་ལྷ་མོ་འདི་རྫོག་པའི་གདན་རབས་བདུན་པ་ནས་འབྲུག་ལུགས་སུ་བརྒྱུད་པ་དང་། དེནས་ཡན་ཙམ་ནས་འབའ་སྒྲོམ་བཀའ་བརྒྱུད་ལ་བརྒྱུད་པའི་དབང་ལུང་ཅི་རིགས་པ་ཐོབ་པ་དང་། དེང་སང་གནམ་ཆོས་ནས་བྱུང་བ་སོགས་བརྒྱུད་པ་འགའ་རེ་ཡོད་ཀྱང་། འདི་སངས་རྒྱས་ཡེལ་པ་ནས་བརྒྱུད་པའི་ལུགས་སོར་བཞག་གོ །དེ་ནས་ལྷ་མོ་འདིའི་ཕན་ཡོན་
ནི། མེ་ལྕེ་འབར་མའི་རྒྱུད་ལས། འདིའི་འདོན་སྒོམ་རྩེ་གཅིག་ཡིད་ཀྱིས་བཟླས་ན། །འདིས་ནི་མི་ནུབ་པའི་རྒྱལ་མཚན་དམ་པ་ཐོབ། །འདིས་ནི་ཆོས་ཀྱི་དབང་ཕྱུག་གོ་འཕང་ཐོབ་། །འདིས་ནི་ཡིད་བཞིན་རིན་ཆེན་འབར་བ་ཐོབ། །འདིས་ནི་ཅི་འདོད་ཐོགས་མེད་དངོས་གྲུབ་ཐོབ། །ཅེས་དང་། ལྷ་མོའི་བསྟོད་པའི་རྒྱུད་ཆེན་པོ་ལས། བཅོམ་ལྡན་འདས་ཕྱག་ན་རྡོ་རྗེའི་བཀའ་སྩལ་པ། ལྷ་མོ་འདི་ལ་བསྟོད་པ་ནི་ང་ལ་བསྟོད་པ་ཡིན་ནོ། །སངས་རྒྱས་ཐམས་ཅད་ལ་བསྟོད་པ་ཡིན་ནོ། །ལྷ་མོས་ཀྱང་མི་དེ་སྲུང་བར་བྱེད་དོ། །སྐྱོབ་པར་བྱེད་དོ། །ཅི་འདོད་པའི་དངོས་གྲུབ་སྟེར་རོ། །ཞེས་དང་། གསེར་འོད་དམ་པ་ལས། གལ་ཏེ་གཡུལ་འགྱེད་འཇིགས་པའི་གནས་དག་ན། །མེ་དོང་ལྟུང་བ་དག་ནི་མཐོང་གྱུར་ན། །ཆུ་བོ་ཉམ་ང་ཆོམ་རྐུན་འཇིགས་པའི་ཚེ། །འཇིགས་པ་དེ་དག་ཐམས་ཅད་སེལ་བར་ནུས། །གལ་ཏེ་རྒྱལ་པོའི་ཁྲིམས་ཀྱི་བཅིངས་སྒྲོས་གམ། །གལ་ཏེ་ཤ་ཆང་གསོད་པར་བྱེད་པའི་ཚེ། །སེམས་ནི་རྩེ་གཅིག་མི་གཡོ་གནས་གྱུར་ན། །ངེས་པར་མྱ་ངན་སྡུག་བསྔལ་ཀུན་ལས་ཐར། །ཞེས་དང་། དངོས་གྲུབ་འབྱུང་རྒྱུད་དང་། ལྷ་མོའི་
གཟུངས་མི་འདྲ་བ་གསུམ་ཙམ་ཞིག་དོན་མཐུན་པར་ལྷ་མོའི་སྙིང་པོ་བཟླས་པས་ནད་རིམས་དང་ཡམས་དང་གདོན་དང་འབྱུང་པོའི་གནོད་པ་ཐམས་ཅད་ལས་སྐྱོབ་ཅིང་། དཔག་ཚད་གཅིག་ཚུན་ཆད་དུ་བསྲུང་བར་གསུངས་ཤིང་། མི་ནད་གང་ཡིན་ཁྱོད་མིང་ཤེས། །དེ་ལ་འཇིགས་པ་མེད་པར་འགྱུར། །ཞེས་དང་། བཞི་བརྒྱ་རྩ་བཞིའི་ནད་རྣམས་རྩད་གཅོད་མ། །བདུད་རྩི་སྨན་གྱི་རྒྱལ་མོ་ཞེས་གསུངས་པས། །ནད་པ་སྲིའུ་གསོ་བ་དང་། །མི་ནད་ཕྱུགས་ནད་ཡམས་ནད་རྣམས་བསྲུང་བ་དང་གཅོད་པའི་མཆོག་དམ་པ་ཡིན་ནོ། །ཡེ་ཤེས་པ་ཡིན་ངེས་ཀྱང་འདི་རྣོ་མྱུར་དང་ཀོ་ལོང་ནི་འཇིག་རྟེན་གྱི་ལྷ་འདྲེ་བས་ཀྱང་ཆེ་བས་བཀའ་ཤིན་ཏུ་གཉན་པས། འཕགས་པ་དུར་ཁྲོད་ནག་མོའི་རང་རྒྱུད་ལས་། སྔགས་པས་བོས་ན་འོང་བའི་ཀུན་གསན་མ། །འགྲོ་བ་དབུགས་དང་བྲལ་ཁ་མི་སླེབ་མི་སྲིད་པས་དབུགས་བདག་ཆེན་མོ། ཕྲག་དོག་ཆེ་བས་བསྟེན་ཚུལ་དཀའ་མ། བཅོས་ན་ཐུབ་པས་ཟློག་སླ་མ། ཐ་མ་ལྷག་མར་བསྡུས་པས་ལྷག་དགྱེས་མ། ཕུད་ལ་དགའ་བས་ཕུད་བདག་ཆེན་མོ་ཞེས་སོ། །དེ་ལྟར་བྱིན་རླབས་ཆེ་བས། བཀའ་ཧ་ཀྱང་
གཉེན་གྲགས་པའི་དབང་ཞུ་བའི་ཕྱིར་དུ་མཎྜལ་ཕུལ། ཞེས་སོ། །ད་ནི་བླ་མ་ཀྱེའི་རྡོ་རྗེ་དང་རྣལ་འབྱོར་ནམ་མཁའི་ངོ་བོ་ལ། རྣམ་པ་བཅོམ་ལྡན་འདས་ཕྱག་ན་རྡོ་རྗེ་གསལ་བ་ལ་གསོལ་བ་འདེབས་པ་འདིའི་རྗེས་ཟློས་མཛོད། སྲིད་པའི་འཆིང་བ་ཀུན་གཅོད་ནས། །བླ་མེད་གོ་འཕང་མཆོག་ཐོབ་པའི། །བླ་མ་ཧེ་རུ་ཀ་དཔལ་ཆེ། །ཆེ་བའི་ཆེ་མཆོག་དགོངས་སུ་གསོལ། །ཐོག་མར་དཔལ་ལྡན་ཧེ་རུ་ཀས། །སྲིད་པའི་རྒྱལ་མོར་དབང་བསྐུར་བས། །ཡང་དག་རྫོགས་པའི་དཀྱིལ་འཁོར་དུ། །འདོད་པ་ཁམས་ཀྱི་དབང་མོར་གྱུར་། །དེ་བཞིན་གཙོ་བོ་བདག་ཉིད་ལ། །བདག་ལ་ཡང་དག་མངོན་གྱུར་མཛོད། །ལན་གསུམ་མམ་གཅིག །ད་ནི་དཀོན་མཆོག་གསུམ་ལ་སྐྱབས་སུ་འགྲོ་བ་དང་བྱང་ཆུབ་མཆོག་ཏུ་སེམས་བསྐྱེད་པ་སོགས་མཁའ་འགྲོ་མ་རྡོ་རྗེ་གུར་གྱི་རྒྱུད་ལས་གསུངས་པ་འདིའི་རྗེས་ཟློས་མཛོད། དཀོན་མཆོག་གསུམ་ལ་བདག་སྐྱབས་མཆི། སོགས་དང་གསུམ་མམ་ཚིག་རྗེས་མ་ལ་གསུམ་བྱའོ། །དེ་ཡང་ཁྱེད་རང་རྣམས་དམིགས་པ་འདི་བཞིན་དུ་མཛོད་ཅིག །མདུན་གྱི་གཏོར་མ་འདི་ཉིད་ཧཱུཾ་འོད་དུ་ཞུ་བ་ལས་བྱུང་བའི་རིན་པོ་ཆེ་སྣ་ཚོགས་པའི་གཞལ་ཡས་ཀྱི་
ཁང་པ་ཡངས་ཤིང་རྒྱ་ཆེ་བ་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ། དཔལ་ལྡན་ལྷ་མོ་སྐུ་མདོག་ཆར་སྤྲིན་དང་བོང་བ་ལྟར་ནག་པ། ཞལ་གཅིག་སྤྱན་གསུམ་དབུ་སྐྲ་གྱེན་དུ་བརྗེ་ས་པ། མཆེ་བ་བཞི་གཙིགས་ཤིང་མི་རོ་རིངས་པར་ཁར་བཅུག་པ། སྙན་གཡས་སྦྲུལ་དང་གཡོན་སེང་གེའི་བརྒྱན་པ། ཕྱག་གཡས་གཉིས་ན་རལ་གྲི་དང་བྷནྡྷ། གཡོན་གཉིས་ཤཀི་དང་རྩེ་གསུམ་ཐོགས་པ་དུར་ཁྲོད་ཆས་བརྒྱད་དང་། ཀླུའི་དབང་པོའི་སྐུ་རེགས་ཅན། ཞབས་གཉིས་ལྕགས་སྒྲོག་གིས་བརྒྱན་པ། བོང་བུ་དམར་གཱའི་སྟེང་ན་བཙན་དཀྱིལ་གྱིས་བཞུགས་པ། ཟུར་གསུམ་སྟེང་དུ་སྙིང་འཕྲོག་མ་གསུམ། ཕྱོགས་བཞིར་རིགས་བཞིའི་མཁའ་འགྲོ་མ་བཞི་ཕྱོགས་མཚམས་བརྒྱད་དུ་དུར་ཁྲོད་ཀྱི་མ་མོ་བརྒྱད། ཕྲ་མེན་མ་བརྒྱད། སྒོ་བཞིར་སྒོ་མ་བཞི་དང་། དེ་རྒྱབ་སྐུ་སྤྲུལ་དཀར་མོ་འབུམ་སྡེ། གསུང་སྤྲུལ་དམར་མོ་འབུམ་སྡེ། ཐུགས་སྤྲུལ་ནག་མོ་འབུམ་སྡེ། ཡོན་ཏན་གྱི་སྤྲུལ་པ་སེར་མོ་འབུམ་སྡེ། ཕྲིན་ལས་ཀྱི་སྤྲུལ་པ་ལྗང་མོ་འབུམ་སྡེ། སྤྲུལ་པ་ཡང་སྤྲུལ་ཉིད་ཀྱིས་ཚོགས་དཔག་ཏུ་མེད་པས་བསྐོར་བར་བསྒོམ། སྟེང་གི་ཆ་
ལ་རྡོ་རྗེ་འཆང་ལ་བཀའ་བརྒྱུད་ཀྱི་བླ་མ་རྣམས་དང་། བར་གྱི་ཆ་ལ་དགྱེས་པ་རྡོ་རྗེ་རྡོ་རྗེ་གདན་བཞི་ལ་སོགས་པ་ཡི་དམ་ལྷ་ཚོགས་སངས་རྒྱས་བྱང་སེམས་དཔའ་བོ་མཁའ་འགྲོ་ལྷ་ཚོགས་འཁོར་བཅས་ཀྱི་མཐའ་བསྐོར་དུ་ཆོས་སྐྱོང་སྲུང་མའི་ཚོགས་སྤྲིན་ལྟར་འཁྲིགས་པ་རྩེ་གཅིག་ཏུ་དམིགས་ཤིག །ཡེ་ཤེས་ཀྱི་ལྷ་མོ་སྤྱན་དྲངས་ནས་མདུན་བསྐྱེད་ལ་སིབ་སིབ་ཐིམ་པར་བསྒོམས། རྔ་རོལ་མོ་སྤོས་དུད་དང་བཅས་དབྱངས་དང་ཌཱ་དྲིལ་ཙམ་གྱིས་ཀྱང་ཆོག་སྟེ། བྷྱོཿ རི་རབ་ཆེན་པོས་བྱང་ཤར་མཚམས། །གཡུ་མཚོ་མུ་ལེ་མཐིང་གི་དབུས། །རིན་ཆེན་ལྔ་ལྡན་གཞལ་ཡས་ཁང་། །དེ་དབུས་སྲིད་གསུམ་ཐོད་མཁར་ནས། །གྲུ་གསུམ་འབར་བའི་ཀློང་དཀྱིལ་ནས། །དཔལ་ལྡན་ལྷ་མོ་དུད་སོལ་མ། །འཁོར་ཡང་ནག་མོ་འབུམ་དང་བཅས་། །གནས་འདིར་ཉིད་དུ་གཤེགས་སུ་གསོལ། །ཨོཾ་ཧཱུཾ་ཤི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོརཿ ཨེ་ཨ་ར་ལི་ཧྲི་ཧཱུྃ་ཛཛཛཿཧཱུྃ་བཾ་ཧོ་རོལ་མོ་དྲག་ཏུ་བྱ། །པདྨ་ཀ་མ་མྱུ་ཧཱུཾ། ཨནྡྷཾ་སོགས་རོལ་མོ། མ་ཧཱ་ཀཱ་ལི་ཨ་མྲྀ་ཏ་རཀྟ་བྷ་ལིཾ་ཏ་ཁཱ་ཧི་ཁཱ་ཧི། བྷྱོཿ དགའ་བ་ཚལ་གྱི་དུར་ཁྲོད་ནས། །འདས་དང་མ་བྱོན་ད་ལྟར་གྱིས། །བསྟན་པ་སྲུང་བར་
མངའ་གསོལ་བའི། །དུད་སོལ་ལྷ་མོར་འཁོར་བཅས་བསྟོད། །དེ་ལྟར་བླ་མ་ཕྱག་ན་རྡོ་རྗེ་དང་། །གཏོར་མ་ལྷ་མོའི་ལྷ་ཚོགས་སུ་གསལ་བའི་དྲུང་དུ་གསོལ་བ་འདེབས་པ་འདིའི་རྗེས་ཟློས་མཛོད། །བླ་མ་ཡི་དམ་མཁའ་འགྲོ་དང་། །དཔལ་ལྡན་ལྷ་མོའི་ཚོགས་རྣམས་ཀྱིས། །བདག་གི་ལུས་ངག་ཡིད་གསུམ་ལ། །དབང་བསྐུར་བྱིན་གྱིས་བརླབ་ཏུ་གསོལ། །ལན་གསུམ་བྱའོ། དེ་ལྟར་གསོལ་བ་བཏབ་པས་དང་པོ་བླ་མའི་ཐུགས་ཀ་ནས་འོད་ཟེར་འཕྲོས་ནས་ཁྱེད་རང་རྣམས་ལ་ཐིམ་པས། སྡིག་སྒྲིབ་ཐ་མལ་གྱི་ལུས་གདོས་བཅས་དག་ནས་ཡེ་ཤེས་ཀྱི་ལུས་གསང་བདག་ཕྱག་ན་རྡོ་རྗེ་མཐིང་ནག་ཞལ་གཅིག་ཕྱག་གཉིས་པ། རྡོ་རྗེ་དང་སྡིགས་མཛུབ་མཛད་པ་དུར་ཁྲོད་ཀྱི་ཚེས་བརྒྱད་གོས་སྔོན་པོའི་སྟོད་གཡོགས་ཅན། ཡེ་ཤེས་ཀྱི་མེ་འབར་བའི་ཀློང་ནས་པད་ཉིའི་སྟེང་ན་འདོར་སྟབས་སུ་འགྱིངས་བ། ཡེ་ཤེས་པ་དང་དམ་ཚིག་པ་དབྱེར་མེད་པའི་ཐུགས་ཀར་ཧཱུྃ་མཐིང་གིས་མཚན་པ་གསལ་ཐོབ། འོ་ད་སྐུ་གསུང་ཐུགས་ཡོན་ཏན་གྱི་དབང་བཞི། ཕྲིན་ལས་ཀྱི་སྒོ་ནས་བཀའ་བསྒོ་བ་དང་ལྔ་ལས། དེ་ལ་ཐོག་མར་སྐུའི་དབང་ཞུ་བའི་དོན་དུ་དམིགས་པ་
འདི་བཞིན་དུ་མཛོད་ཅིག །མདུན་གྱི་གཏོར་མ་འདིའི་དབུས་ན་བཞུགས་པའི་བཀའ་བརྒྱུད་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་དང་། ཁྱད་པར་དུ་དུད་སོལ་ལྷ་མོ་གཙོ་འཁོར་ཐམས་ཅད་ཀྱི་སྤྱི་བོར་ཨོཾ་ཡིག་དཀར་པོ་ལས་འོད་ཟེར་དཀར་པོ་ཨོ་ཡིག་གིས་མཚན་པ་ཅན། དཔག་ཏུ་མེད་པ་བྱུང་ཁྱེད་རང་རྣམས་ཀྱི་སྤྱི་བོར་ཞུགས་པས་ལུས་ཀྱི་སྡིག་སྒྲིབ་དག་ནས་ལུས་སྤྲུལ་སྐུ་འགྲུབ་པའི་མོས་པ་མཛོད་ཅིག །གཏོར་མ་ལག་ཏུ་ཐོགས་ལ་དྲིལ་བུ་བསིལ་ཞིང་། ཨོ། དཔལ་ལྡན་ལྷ་མོ་མི་ཕམ་སྲིད་གསུམ་བདག །རང་དོན་བསྒྲུབ་ཕྱིར་རྣམ་ཐར་ལས་གཞོལ་ཀྱང་། །སྙིང་རྗེའི་དབང་གིས་རྗེས་ལ་ཐོབ་པ་ཡི། །ཤེས་རབ་སྣ་ཚོགས་དག་གི་འགྲོ་དོན་མཛད། །ལྷ་མོ་སྐུ་མདོག་ནག་མོ་ཆར་སྤྲིན་མདོག །མཚན་མོ་ནག་མོ་ཤིན་ཏུ་འཇིགས་པའི་སྐུ། །ཤིན་ཏུ་སྒེག་ཅིང་ཀེང་རུས་ལུས་ཅན་མ། །ཞལ་གཅིག་ཕྱག་བཞི་ཞབས་གཉིས་བརྗིད་པའི་སྐུ། །རལ་པ་གྱེན་བརྫེས་ལེན་བུ་གཡོན་དུ་འཁྱིལ། །སྒྲ་སྐད་སྦྲུལ་དང་ཐོད་པའི་ཕྲེང་ཐོད་ཅན། །རྣ་ལྟག་དར་ནག་མེ་ཏོག་ཅོད་པན་འཕུར། །ཁྲག་དང་ཆང་གི་ར་རོ་སྤྱན་རྩ་དམར། །མི་
རོ་རེང་པ་ཁར་བཅུག་མཆེ་བ་བཞི། །རྣམ་པར་གཙིགས་ནས་ཁྲག་ལ་ཤིན་ཏུ་དགྱེས། །དཔལ་ལྡན་ལྷ་མོའི་སྐུ་ཡི་དབང་བསྐུར་རོ། །སྤྱི་བོར་བཞག་ལ། ཨོ་དེ་ཝི་པི་ཙུ་བཛྲ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ༔ ཀཱ་ཡ་ཨ་བྷི་ཥིཉྩ་ཧཱུྃ། ཧཱུྃ། དཔལ་ལྡན་ལྷ་མོ་མི་ཕམ་སྲིད་གསུམ་བདག །ཟབ་མོ་རྒྱུད་ཀྱི་སྲུང་མ་མོ་ནི། །ཞལ་གཅིག་ཕྱག་བཞིས་ཕྲིན་ལས་རྣམ་བཞི་སྒྲུབས། །རྫུ་འཕྲུལ་མྱུར་མགྱོགས་དགྲ་བགེགས་ཚར་གཅོད་མཆོག །དུད་སོལ་ལྷ་མོའི་སྐུ་ཡི་བཀྲ་ཤིས་ཤོག །ཅེས་མེ་ཏོག་འཐོར་རོ། །འོ་དེས་སྐུ་ཡི་དབང་ཐོབ། ཡང་གཏོར་མ་འདིའི་དབུས་ན་བཞུགས་པའི་བཀའ་བརྒྱུད་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་དང་། ཁྱད་པར་དུ་དུད་སོལ་ལྷ་མོ་འཁོར་ཐམས་ཅད་ཀྱི་མགྲིན་པའི་ཨཱཿཡིག་དམར་པོ་ལས་འོད་ཟེར་ཨཱཡིག་གིས་མཚན་པ་ཅན་དཔག་ཏུ་མེད་པ་བྱུང་ཁྱེད་རང་རྣམས་ཀྱི་མགྲིན་པར་ཞུགས་པས་ངག་གི་སྡིག་སྒྲིབ་དག་ནས་ངག་ལོངས་སྤྱོད་རྫོགས་པའི་སྐུ་འགྲུབ་པའི་མོས་པ་མཛོད་ཅིག །གཏོར་མ་ལག་ཏུ་ཐོགས་ལ་དྲིལ་བུ་བསིལ་ཞིང་། ཨཱཿ སྙན་གཡས་
སྦྲུལ་གྱི་མགུལ་ནས་དྲིལ་བསིལ་ཞིང་། །གདུག་པ་གཏོར་ནས་ཚངས་པའི་སྒྲ་སྒྲོག་མ། །སྙན་ཆ་གཡོན་ན་སེང་གེའི་རལ་པ་དམར། །དཔའ་མོ་ཁམས་གསུམ་སེང་གེའི་སྒྲ་སྒྲོག་མ། །ཕྱག་བཞི་གཡས་ཀྱི་དང་པོས་རལ་གྲི་འཛིན། །འོག་མས་བྷན་རཀྟ་དམར་དཀྱིལ་འཛིན། །གཡོན་གྱི་དང་པོས་ཤཀྟའི་མཚོན་ཆ་འཛིན། །འོག་མས་ཏྲི་ཤུལ་མགུལ་ནས་དར་དཔྱངས་འཕྱང་། །ཤཀྟའི་རལ་གྲི་མཚོན་གྱི་བཅད་པ་ཡིས། །ལྷ་མ་ཡིན་གྱི་ཐོད་སོགས་དོ་ཤལ་བྱས། །གླང་པོ་ཆེ་ཡི་ཀོ་བས་སྟོད་གཡོགས་ལ། །སྨད་ན་བ་གླང་ཀོ་རློན་བྱས་པ་ལ། །ཕྱེད་ནི་རེ་ལྡེ་སེར་པོའི་ཤམ་བུ་དཀྲིས། །ཀླུ་ཡི་དབང་པོ་གཤིབ་པའི་སྐུ་རེགས་བྱས། ཞབས་གཉིས་ལྕགས་སྒྲོག་དག་གིས་མཛེས་པར་བརྒྱན། །ཁྲག་ཞག་མང་པོའི་ཐིག་ལེའི་ཚོམ་བུ་བྲིས། །བོང་བུ་གྲྭ་ཞོན་མཚན་མོ་དུར་ཁྲོད་ཉུལ། །བོང་བུའི་རྨིག་པས་གློག་གི་ཤུགས་ཅན་མ། །སྟོང་གསུམ་སྐད་ཅིག་ཙམ་གྱིས་སྐོར་བར་བྱེད། །སྐད་ནི་དུང་དང་འབྲུག་གི་སྒྲ་ལྟ་བུས། །མ་མོ་མཁའ་འགྲོ་ཤ་ཟ་དབང་དུ་སྡུད། །དཔལ་ལྡན་ལྷ་མོའི་གསུང་གི་དབང་བསྐུར་རོ། །མགྲིན་པར་བཞག་ལ། ཝཱཀྐ་ཨ་བྷི་ཥིཉྩ་ཧཱུཾ།
ཧཱུྃ། དཔལ་ལྡན་ལྷ་མོ་མི་ཕམ་སྲིད་གསུམ་བདག །ཟབ་མོ་རྒྱུད་ཀྱི་སྲུང་མ་མ་མོ་ནི། །ཞལ་གཅིག་ཕྱག་བཞིས་ཕྲིན་ལས་རྣམ་བཞི་སྒྲུབས། །རྫུ་འཕྲུལ་མྱུར་མགྱོགས་དགྲ་བགེགས་ཚར་གཅོད་མཆོག །དུད་སོལ་ལྷ་མོའི་གསུང་གི་བཀྲ་ཤིས་ཤོག །ཅེས་མེ་ཏོག་འཐོར། འོ་དེས་གསུང་གི་དབང་ཐོབ་པ་ཡིན། ཡང་གཏོར་མ་འདིའི་དབུས་ན་བཞུགས་པའི་བཀའ་བརྒྱུད་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་དང་། ཁྱད་པར་དུ་དུད་སོལ་ལྷ་མོ་འཁོར་ཐམས་ཅད་ཀྱི་ཐུགས་ཀའི་ཧཱུཾ་ཡིག་སྔོན་པོ་ལས་འོད་ཟེར་ཧཱུཾ་ཡིག་གིས་མཚན་པ་ཅན་དཔག་ཏུ་མེད་པ་བྱུང་ཁྱེད་རང་རྣམས་ཀྱི་སྙིང་གར་ཞུགས་པས་ཡིད་ཀྱི་སྡིག་སྒྲིབ་དག་ནས་སེམས་ཆོས་སྐུ་འགྲུབ་ལྷཔའི་མོས་པ་མཛོད་ཅིག །གཏོར་མ་ལག་ཏུ་ཐོགས་ལ་དྲིལ་བུ་བསིལ་ཞིང་། བྷྱོཿ ལྷོ་ཕྱོགས་གཤིན་རྗེའི་ཕོ་བྲང་རྟག་ཏུ་གནས། །དམ་པའི་སར་གནས་གཟུགས་སྐུ་གཉིས་གཟིགས་མ། །ཏིང་འཛིན་དབང་ཐོབ་གཟུགས་ཁམས་གནས་སུ་བྱོན། །ཚངས་པའི་རྒྱལ་པོ་ལ་སོགས་ཕྱག་བྱས་ལ། །གཞན་ལ་དབང་བསྒྱུར་འདོད་ཁམས་ཡངས་མཐར་ཕྱིན། །དབང་ཕྱུག་
ཆེན་པོའི་སྐུ་ལ་དགྱེས་འཁྲིལ་མ། །སུམ་ཅུ་རྩ་གསུམ་ཚལ་བཞི་བྱོན་པའི་ཚེ། །ལྷ་རྣམས་དབུགས་དབྱུང་བརྒྱ་བྱིན་ཕྱག་བྱས་མ། །ལྷ་མ་ཡིན་རྣམས་ཕམ་པར་བྱ་བའི་ཕྱིར། །ལྷ་མིན་དབང་པོ་ཀུན་གྱིས་ཕྱག་བྱས་མ། །སྐུ་མཆོག་རི་རབ་ཆེ་དང་འདྲེན་པའི་ཚེ། །ལྟེ་བའི་ཐད་ཀྱི་ཕྱོགས་ནས་ཉི་ཟླ་འཆར། །རྒྱལ་ཆེན་བཞི་ལ་སོགས་པས་ཕྱག་བྱས་མ། །རྒྱ་མཚོའི་ཀློང་ནས་མེ་འབར་མཚོ་སྐེམ་ནུས། །ས་འོག་ཀླུ་ཡི་དབང་པོའི་ཕྱག་བྱས་མ། །ལྷ་མོ་ཁྱོད་ཀྱི་ཆོ་འཕྲུལ་འདི་བསྟན་པས། །བདུད་དང་གཤིན་རྗེའི་རྒྱལ་པོ་འདར་ཞིང་འདུད། །མ་མོ་སྲིན་མོའི་ཚོགས་རྣམས་རྔམ་ཞིང་རྒོད། །དཔལ་ལྡན་ལྷ་མོའི་ཐུགས་ཀྱི་དབང་བསྐུར་རོ། །ཞེས་སྙིང་གར་བཞག་ལ། ཙིཏྟ་ཨ་བྷི་ཥིཉྩཧཱུྃ། ཧཱུྃ། དཔལ་ལྡན་ལྷ་མོ་མི་ཕམ་སྲིད་གསུམ་བདག །ཟབ་མོ་རྒྱུད་ཀྱི་སྲུང་མ་མ་མོ་ནི། །ཞལ་གཅིག་ཕྱག་བཞིས་ཕྲིན་ལས་རྣམ་བཞི་སྒྲུབས། །རྫུ་འཕྲུལ་མྱུར་མགྱོགས་དགྲ་བགེགས་ཚར་གཅོད་མཆོག །དུད་སོལ་ལྷ་མོའི་ཐུགས་ཀྱི་བཀྲ་ཤིས་ཤོག །ཅེས་མེ་ཏོག་འཐོར། འོ་དེས་ཐུགས་ཀྱི་དབང་ཐོབ་པ་ཡིན། ཡང་གཏོར་མ་འདིའི་དབུས་ན་བཞུགས་པའི་བཀའ་
བརྒྱུད་བླ་མ་ཡི་དམ་སངས་རྒྱས་བྱང་སེམས་དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་དང་། ཁྱད་པར་དུ་དུད་སོལ་ལྷ་མོ་གཙོ་འཁོར་ཐམས་ཅད་ཀྱི་གནས་གསུམ་གྱི་ཡིག་འབྲུ་གསུམ་ལས་འོད་ཟེར་དཀར་དམར་མཐིང་གསུམ་དང་ལྟེ་བའི་ཧོ༔ཡིག་སེར་པོ་ལས་འོད་ཟེར་སེར་པོ་ཧོཡིས་མཚན་པ་ཅན་དཔག་ཏུ་མེད་པ་བྱུང་ཁྱེད་རང་རྣམས་ཀྱི་ལྟེ་བར་ཞུགས་པས་ལུས་ངག་ཡིད་གསུམ་ཆ་སྙོམས་སྡིག་སྒྲིབ་ཐམས་ཅད་དག་ནས། སྐུ་གསུམ་དབྱེར་མེད་ཡེ་ཤེས་རྡོ་རྗེའི་སྐུ་འགྲུབ་པའི་མོས་པ་མཛོད་ཅིག །གཏོར་མ་ལག་ཏུ་ཐོགས་ལ་དྲིལ་བུ་བསིལ་ཞིང་། ཧཱུྃ། ཙིཏྟ་རིན་ཆེན་གུར་ཕུབ་གཞལ་ཡས་ན། །ཉི་ཟླའི་དཀྱིལ་འཁོར་བརྩེགས་པའི་འོད་ཟེར་འབར། །ཕྱོགས་བཅུའི་འཇིག་རྟེན་དུག་གི་བཅུད་བསྡུས་ནས། །ཉི་མའི་དཀྱིལ་འཁོར་དག་ལ་ཐིམ་པར་མཛོད། །དུག་གི་རླངས་པ་ནག་པོའི་ཕྱོགས་རྣམས་ཀྱི། །བཞི་བརྒྱ་རྩ་བཞིའི་ནད་རྣམས་སློང་བྱེད་མ། །བདུད་རྩི་སྨན་གྱི་རྒྱལ་མོས་དམ་ལ་འདུད། །ཕྱོགས་བཅུའི་འཇིག་རྟེན་བདུད་རྩིའི་བཅུད་བསྡུས་ནས། །ཟླ་བའི་དཀྱིལ་འཁོར་དག་ལ་ཐིམ་པར་མཛོད། །བདུད་རྩིའི་རླངས་པ་དཀར་པོའི་ཕྱོགས་
རྣམས་ཀྱིས། །བཞི་བརྒྱ་རྩ་བཞིའི་ནད་རྣམས་ཚར་གཅོད་མ། །དེ་ཕྱིར་སྨན་གྱི་རྒྱལ་མོས་དམ་ལ་འདུད། །གང་ཞིག་ཁྱོད་ལ་དད་ན་མ་བས་བྱམས། །དེ་ཕྱིར་མ་གཅིག་ནད་བདག་སྨན་གྱི་གཙོ། །དཔལ་ལྡན་ལྷ་མོའི་ཡོན་ཏན་གྱི་དབང་བསྐུར་རོ། །ལྟེ་བ་དང་ལག་ཏུ་བཞག །ༀ་དེ་ཝི་པི་ཙུ་བཛྲ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུཾ་བྷྱོཿ གུ་ཎ་ཨ་བྷི་ཥིཉྩ་ཧཱུྃ། འོ་དེས་ཡོན་ཏན་གྱི་དབང་ཐོབ་པ་ཡིན། ལྔ་པ་ཕྲིན་ལས་གཏོར་མའི་བཀའ་བསྒོ་བ་ནི། གཏོར་མ་འདི་ཉིད་ཁྲག་འཐུང་དུད་སོལ་ལྷ་མོ་གཙོ་འཁོར་གྱི་སྐུ་སྔར་སྨོས་མ་ཐག་པའི་མཚན་ཉིད་ཅན་དུ་གསལ་ཐོབ་ལ། དེའི་སྟེང་གི་ཆ་ལ་བཀའ་བརྒྱུད་ཀྱི་བླ་མ། བར་གྱི་ཆ་ལ་ཡི་དམ་ལྷ་ཚོགས། འོག་གི་ཆ་ལ་ཆོས་སྐྱོང་སྲུང་མའི་ཚོགས་དང་བཅས་པ་སྤྲིན་འཁྲིགས་པ་ལྟར་ཁྱེད་རང་གི་སྤྱི་བོར་བྱོན་ནས་ངེད་ཀྱིས་གསོལ་བ་ཇི་ལྟར་བཏབ་པ་ལྟར་བྱིན་རླབས་དངོས་གྲུབ་ཐམས་ཅད་གནང་ཞིང་ཐོབ་བྱུང་སྙམ་པའི་མོས་འདུན་རྩེ་གཅིག་ཏུ་མཛོད་ཅིག །གཏོར་མ་ལག་ཏུ་ཐོགས་ལ། དུས་གསུམ་སངས་རྒྱས་ཐམས་ཅད་ཀྱིས། །སྐུ་གསུང་ཐུགས་ཀྱིས་བྱིན་བརླབས་ཤིང་། །དངོས་གྲུབ་རྣམ་གཉིས་
འབྱུང་བའི་གནས། །གཏོར་མའི་དབང་བསྐུར་ཆེན་པོ་སྦྱིན། །ཛཿཧཱུྃ་བཾ་ཧོ༔ གཏོར་མ་མགོར་བཞག་ལ། ཆོས་སྐུ་རྡོ་རྗེ་འཆང་ཆེན་པོ། མཁའ་འགྲོ་མ་སྐལ་པ་བཟང་པོ། བྲམ་ཟེ་མཆོག་སྲེད། རྗེ་བཙུན་ཏེ་ལོ། མཁས་མཆོག་ནཱ་རོ་པ། སྒྲ་བསྒྱུར་མར་པ་ལོ་ཙཱ། རྔོག་སྟོན་ཆོས་ཀྱི་རྡོ་རྗེ། རྔོག་ཞེ་སྡང་རྡོ་རྗེ། ཆོས་རྗེ་སངས་རྒྱས་ཡེལ་པ། ནང་པ་ཡང་དགོན་པ། རྒྱལ་དབང་པ། རྒྱལ་ཚུལ་པ། གྲགས་འོད་པ། བསོད་རིན་པ། རྡོ་རྗེ་རྒྱལ་མཚན། ཤཱཀྱའི་རྒྱལ་མཚན། རཏྣའི་རྒྱལ་མཚན། མངྒ་ལཀྵ། འགྲོ་མགོན་ཀརྨ་ཆགས་མེད་ནས་བདག་ཅག་གི་རྩ་བའི་བླ་མ་དམ་པའི་བར་དུ་བརྒྱུད་པའི་དཔལ་ལྡན་བླ་མ་དམ་པ་རྣམས་དང་། ཡི་དམ་བདེ་དགྱེས་གསང་གསུམ་རྒྱུ་ཐོད་གདན་བཞི་དགྲ་གདོང་འཇིགས་གསུམ་ལ་སོགས་པ་རྒྱུད་སྡེ་བཞི་དྲུག་གི་ཡི་དམ་ལྷ་ཚོགས་རྣམས་དང་། ཤྲཱི་མ་ཧཱ་ཀཱ་ལི་ཁྲག་འཐུང་གི་རྒྱལ་མོ་དུད་པའི་སོལ་བ་མ། འཁོར་ནག་མོ་འབུམ་སྡེ་དང་བཅས་པའི་ལྷ་ཚོགས་མ་ལུས་ཤིང་ལུས་པ་མེད་པ་ཐམས་ཅད་ཀྱིས། རྡོ་རྗེའི་སློབ་མ་འདི་རྣམས་ལ་སྐུ་གསུང་ཐུགས་ཀྱིས་སྒོ་ནས་བྱིན་གྱིས་བརླབས་པ་དང་།
དབང་བསྐུར་བར་མཛད་དུ་གསོལ། འདི་རྣམས་ལ་གནོད་ཅིང་འཚེ་བར་བྱེད་པའི་ནད་རིགས་བཞི་བརྒྱ་རྩ་བཞི་བགེགས་རིགས་སྟོང་ཕྲག་བརྒྱད་ཅུ་གདོན་རིགས་སུམ་བརྒྱ་དྲུག་ཅུ། །སྟེང་གདོན་གཟའ་དང་རྒྱུ་སྐར། འོག་གདོན་ཀླུ་གཉན་ས་བདག །བར་གདོན་བཙན་བདུད་ཐེའུ་རང་གི་གནོད་པ་ཐམས་ཅད་ད་ལྟ་ཉིད་དུ་ཞི་བར་བྱིན་གྱིས་རློབས་ཤིག །ཚེ་དང་བསོད་ནམས་དཔལ་དང་འབྱོར་པ་ཡེ་ཤེས་ཡོན་ཏན་ཐམས་ཅད་རྒྱས་པར་བྱིན་གྱིས་རློབས་ཤིག །བདུད་བགེགས་ལོག་འདྲེན་གདུག་པ་ཅན་ཐམས་ཅད་དྲག་པོའི་སྒོ་ནས་ཚར་གཅོད་པར་བྱིན་གྱིས་རློབས་ཤིག །སྐྱེ་བ་འདི་ནས་ཚེ་རབས་ཐམས་ཅད་དུ་རྡོ་རྗེའི་སློབ་མ་འདི་རྣམས་ཀྱི་ལྷག་པའི་ལྷར་མཛོད་ཅིག །ཉིན་གསུམ་གྱི་བྱ་ར་མཛོད། མཚན་གསུམ་གྱི་མེལ་ཚེ་མཛོད། འཁོར་བ་དང་ངན་སོང་གི་སྡུག་བསྔལ་ཐམས་ཅད་ལས་བསྐྱབ་ཏུ་གསོལ། ཨོཾ་དེ་ཝི་པི་ཙུ་བཛྲ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོཿ ཅེས་བརྗོད། རྒྱལ་བ་སྲས་བཅས་བདེན་པའི་བྱིན་རླབས་དང་། །ལྷག་པའི་ལྷ་མཆོག་རྣམས་ཀྱི་བདེན་ཚིག་གི །འགྲོ་བ་འདི་དག་བདག་གི་བསྲུངས་ཟིན་གྱིས། །འདི་ལ་
སུས་ཀྱང་གནོད་པ་མ་བྱེད་ཅིག །ཨོཾ་བཛྲ་རཀྵ་རཀྵ་ཧཱུྃ། ཞེས་མེ་ཏོག་འཐོར། གཏོར་མ་ལྷར་གསལ་བ་འོད་དུ་ཞུ་ནས་ཁྱེད་རང་རྣམས་ལ་ཐིམ་པས་ཁྱེད་རང་རྣམས་ཀྱི་ལུས་ངག་ཡིད་གསུམ་དང་། ལྷག་པའི་ལྷ་མཆོག་གི་སྐུ་གསུང་ཐུགས་དང་དབྱེར་མེད་དུ་འདྲེས་པར་གྱུར་སྙམ་དུ་བསྒོམས། མེ་ཏོག་འཐོར་ཞིང་། རྡོ་རྗེ་འཆང་ཆེན་ཏེ་ལོ་ནཱ་རོ་དང་། །མར་པ་མི་ལ་དྭགས་པོ་རིན་པོ་ཆེ། །ཕག་མོ་གྲུ་པ་སངས་རྒྱས་ཡེལ་པ་སོགས། །བཀའ་བརྒྱུད་བླ་མ་རྣམས་ཀྱི་བཀྲ་ཤིས་ཤོག །འཁོར་ལོ་བདེ་མཆོག །སྔོན་ཚེ་དཔག་བསམ་བྱང་ཆུབ་ཤིང་དྲུང་དུ། །རྒྱལ་བ་ཐུབ་པ་ཆེན་པོའི་སྤྱན་སྔ་རུ། །བསྟན་པ་གཉན་པོ་བསྲུང་བར་དམ་བཅས་པ། །ཁྲག་འཐུང་དུད་སོལ་ལྷ་མོའི་བཀྲ་ཤིས་ཤོག །གནས་འདིར་ཉིན་མོ་བདེ་ལེགས་མཚན་བདེ་ལེགས། །ཉི་མའི་གུང་ཡང་བདེ་ལེགས་ཤིང་། །ཉིན་མཚན་རྟག་ཏུ་བདེ་ལེགས་པ། །དཀོན་མཆོག་གསུམ་གྱི་བཀྲ་ཤིས་ཤོག། རྗེས་རིམ་ནི། དེ་ལྟར་བསྟན་སྲུང་ལྷ་མོ་དུད་སོལ་མའི་བྱིན་རླབས་གཏོར་མའི་དབང་བསྐུར་རྗེས་གནང་གི་རིམ་པ་ཟབ་མོ་སྒྲུབ་བརྒྱུད་རིན་པོ་ཆེའི་བཀའ་སྲོལ་དཔལ་ལྡན་ཡེལ་པ་ལུགས་
ཀྱི་ཕྱག་ལེན་རིམ་བཞིན་བརྒྱུད་དེ་འགྲོ་མགོན་ཀརྨ་ཆགས་མེད་ནས་མཛད་པའི་གཏོར་དབང་བདུད་རྩི་སྨན་གྱི་ཆར་འབེབས་ལྟར་ལེགས་པར་ཕུལ་གྲུབ་པ་ལགས་པས་འདི་དག་གི་སྒོ་ནས་ཐོབ་པའི་རྩ་བ་དང་ཡན་ལག་གི་དམ་ཚིག་རྣམས་ཚུལ་བཞིན་དུ་སྲུང་སྙམ་པའི་བློས་འདིའི་རྗེས་ཟློས་མཛོད། གཙོ་བོའི་ཇི་ལྟར་སོགས་གསུམ། དེ་ནས་གཏང་རག་གི་མཎྜལ་དང་ལུས་འབུལ་དགེ་བསྔོ་སོགས་ཅི་ལྟར་ཞེས་སློབ་མ་རྣམས་གྲོལ་ལོ། །སློབ་དཔོན་གྱིས་ལྷ་མོའི་སོགས་བསྐང་བ་མངའ་གསོལ་རྗེས་ཆོག་སོགས་ལས་གཞུང་ལྟར་དགྱེས་པས་འགྲུབ་བོ། །ཞེས་པ་འདི་ནི་འགྲོ་མགོན་ཀརྨ་ཆགས་མེད་ཀྱིས་མཛད་པའི་དབང་ཆོག་གཞུང་གསལ་དུས་དབང་གིས་སྨད་ཆ་ཅུང་ཟད་མ་ཚང་བ་ཁ་སྐོང་གི་ཚུལ་དུ་མ་ཏི་རཏྟས་པུཎྱ་ཀིརྟིས་འདོད་ངུར་བཞིན་སྦྱར་བ་དགེ་ལེགས་འཕེལ།། དེས་སྐུ་ཡི་དབང་ཐོབ་ཡིན་ཆགས་མེད་རིན་པོ་ཆེས་མཛད། དེས་ཕྱིན་མ་ཚང་བ་ཁ་སྐོང་གི་ཚུལ་དུ་བློ་གྲོས་རིན་ཆེན་གྱིས་མཛད་པའོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།