དཔལ་ལྡན་ལྷ་མོ་དུད་སོལ་མའི་དམག་བསྐུལ།
དཔལ་ལྡན་ལྷ་མོ་དུད་སོལ་མའི་དམག་བསྐུལ་ནི། བྷྱོ༔ ད་ནི་གཏོར་མདོས་བསྐྱོད་རེ་རན། །ད་ནི་སྐུ་བསྐྱོད་བསྐྱོད་རེ་རན། །ལྷ་མོ་ནག་མོ་སྐུ་བསྐྱོད་འཚལ། །དགྲ་བོའི་ཡུལ་དུ་སྐུ་སྐྱོད་ཅིག །ཆིབས་ཁ་དགྲ་བོའི་ཡུལ་དུ་སྒྱུར། །ཕོ་བྲང་དགྲ་བོའི་ཡུལ་དུ་ཐོབ། །སྡང་བའི་དགྲ་ལ་ཞལ་ཁ་སྟོན། །བཀའ་ཆད་སྡོང་བའི་དགྲ་ལ་ཆོད། །ཐུན་ཟོར་སྡང་བའི་དགྲ་ལ་རྒྱོབ། །ཐུགས་ཀྱི་མནག་པ་དགྲ་ལ་གྱིས། །མ་མོ་འཁོར་བཅས་དམག་ལ་ཆོས། །དམག་དཔུང་བསྐྱེད་ལ་རུ་མཚོན་ཕྱོར། །དམག་ཚོགས་སྡང་བའི་དགྲ་ལ་ཡ། །སྡང་བའི་དགྲ་ལ་མདོས་ཟོར་ཡ། །གནོད་པའི་བགེགས་ལ་མདོས་ཟོར་ཡ། །བར་ཆད་རྐྱེན་ལ་མདོས་ཟོར་ཡ། །ཆག་ཆེན་ཉམ་ང་བཟློག་ཕྱིར་ཆོས། །བན་བྱད་བོན་བྱད་བཟློག་ཕྱིར་ཆོས། །རྒྱ་འདྲེ་སྟོང་འདྲེ་བཟློག་ཕྱིར་ཆོས། །མ་མོའི་ནད་ཡམས་བཟློག་ཕྱིར་ཆོས། །སྡེ་བརྒྱད་ཆད་པ་བཟློག་ཕྱིར་ཆོས། །འབྱུང་པོའི་བར་ཆད་བཟློག་ཕྱིར་ཆོས། །ལྟས་ངན་མཚན་ངན་བཟློག་ཕྱིར་ཆོས། །དུས་མིན་འཆི་བ་བཟློག་ཕྱིར་ཆོས། །དུས་ཀྱི་འཆི་བ་བཟློག་ཕྱིར་ཆོས། །དགྲ་བོའི་མི་ནོར་ཆམ་
ལ་ཕོབ། །དགྲ་བོའི་ཡུལ་ཁམས་བརླག་པར་གྱིས། །དགྲ་བོ་རྡུལ་དུ་བརླག་པར་ཐེ་ཚོམ་མེད། །བསྐུལ་ནི། བྷྱོཿ མ་གཡེལ་མ་གཡེལ་དམ་ཅན་ཚོགས། །བོས་པའི་ཚེ་ན་སྙན་མ་སྲ། །བསྟེན་པའི་ཚེ་ན་རྒྱང་མ་རིང་། །བསྒྲུབ་པའི་ཚེ་ན་གོང་མ་གཡེལ། །རྦད་པའི་ཚེ་ན་མཐུ་མ་ཆུང་། །ཤ་ཁྲག་ཟན་དུ་བོར་ནས་ལྷ་མོ་ཁྱོད་བསྒྲུབ་བོ། །ལུས་སྲོག་ འབེན 
་དུ་བཙུགས་ནས་ལྷ་མོ་ཁྱོད་བསྒྲུབ་བོ། །དམ་རྫས་རྟེན་དུ་བཙུགས་ནས་ལྷ་མོ་ཁྱོད་བསྒྲུབ་བོ། །ཕུག་པ་ཞ་ལྟར་གྱོན་ནས་ལྷ་མོ་ཁྱོད་བསྒྲུབ་བོ། །རྣལ་འབྱོར་པ་ནི་རྩང་ཤོད་ཉ་བཞིན་རུལ། །དམ་ཉམས་དགྲ་ནི་གངས་ཀྱི་སེང་བཞིན་རྒྱུག །ས་སྟེང་འདི་ན་བདག་ལ་མགོན་མེད་པས། །མ་ཅིག་དམ་ཅན་ཐུགས་རྗེས་མི་དགོངས་སམ། །འཁོར་གྱི་ཚོགས་ལ་བཀའ་ཉན་མི་མཛད་དམ། །དམ་ཉམས་དགྲ་ལ་ཕྲིན་ལས་མི་མཛད་དམ། །ལྷ་མོ་མི་ཕམ་ཡི་དམ་སྲོག་གི་ལྷ། །རྣལ་འབྱོར་ཀུན་གྱི་དགྲ་བླ་མོ། །ནག་མོ་ཆེན་མོ་ཆར་སྤྲིན་མདོག །དཔལ་ལྡན་ལྷ་མོ་ཐུགས་དམ་ཅན། །རྡོ་རྗེ་ལྕམ་གཅིག་ལས་མཁན་མ། །སྲོག་གཅོད་ནད་གཏོང་བོང་བུ་ཞོན། །རྣལ་འབྱོར་བདག་གིས་སྡོང་གྲོགས་
མཛོད། །དམ་ཉམས་ཀུན་གྱི་རྒྱུན་གཅོད་མ། །དམ་ཚིག་ཅན་གྱི་ཚེ་འཛིན་མ། །ལེགས་ཉེས་ཀུན་གྱི་སྟང་གཅོད་མ། །འཁོར་རྣམས་ཕོ་ཉར་ད་ཐོངས་ལ། །བསྟན་པ་འཇིགས་པའི་དམ་ཉམས་འདི། །བདུན་རྒྱུད་རྩད་ནས་ཆོད་ལ་ཤོག །ལོ་དང་ཟླ་བར་མ་བཞག་པར། །ཞག་དང་ཟ་མ་ཉིད་དུ་སྒྲོལ། །བརྒྱན་པའི་གཏོར་མ་འདི་བཞེས་ལ། །བཅོལ་བའི་ཕྲིན་ལས་འགྲུབ་པར་མཛོད། །ཀརྨ་ཨ་རཱ་གས་མཛད་པའོ།། དགེའོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།