དམ་ཅན་མགར་བ་ནག་པོའི་དམོད་བཅོལ་དགྲ་བགེགས་དཔུང་འཇོམས།
དམ་ཅན་མགར་བ་ནག་པོའི་དམོད་བཅོལ་དགྲ་བགེགས་དཔུང་འཇོམས་བཞུགས་སོ། །
དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །དམ་ཅན་མགར་བ་ནག་པོའི་དམོད་བཅོལ་བྱ་བ་ནི། སྒྲུབ་པ་བྱེད་པའི་གང་ཟག་གིས། སྔགས་ཆས་སུ་ཞུགས་ནས་ཇ་ཕུད་ཆང་ཕུད་གསེར་སྐྱེམས་མཆོད་ལ་འདི་སྐད་དོ། །ཧོ། དགོངས་སུ་གསོལ་ལོ། །ལན་གསུམ། གསན་དུ་གསོལ་ལོ། །ཁྱབ་བདག་རྡོ་རྗེ་འཆང་། བྲམ་ཟེ་ཆེན་པོ། བྲམ་ཟེ་བྲ་སེ། བྲམ་ཟེ་རྒྱལ་པོ། ས་ར་ཧ། ཤ་ཝ་རི་དབང་ཕྱུག །བླ་མ་ར་ཧུ། བཙུན་པ་གྲོལ་སྡེ། མཆོག་གི་སྡེ། ཀུ་ས་ལི་ཆེ་ཆུང་ལ་སོགས་པའི་དྲིན་ཅན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་དགོངས་སུ་གསོལ། རྡོ་རྗེ་
འཆང་། ཏེ་ལོ། ནཱ་རོ། ཌོ་བྷི་པ། ཇོ་བོ་རྗེ། ཟླ་འོད་གཞོན་ནུ། རྗེ་དུས་གསུམ་མཁྱེན་པ། ཞང་ཚལ་པ་ལ་སོགས་པའི་རྩ་བརྒྱུད་ཀྱི་བླ་མ་རྣམས་དགོངས་སུ་གསོལ་ལོ། །གྲུབ་ཆེན་ཀརྨ་པ། སཾ་གྷ་ལཀྵ། རང་བྱུང་རྡོ་རྗེ། རྒྱལ་བ་གཡུང་སྟོན་པ། །རྟོགས་ལྡན་མཁའ་སྤྱོད་དབང་པོ། རིན་ཆེན་བཟང་པོ། འཇམ་དཔལ་བཟང་པོ། དཔལ་འབྱོར་དོན་གྲུབ། ཆོས་རྗེ་བདུན་པ། འདན་མ་རྣལ་འབྱོར། མི་བསྐྱོད་རྡོ་རྗེ། སློབ་དཔོན་པདྨ་འབྱུང་གནས། རྒྱལ་བ་མཆོག་དབྱངས། ཡེ་ཤེས་མཚོ་རྒྱལ། མངའ་བདག་ཆེན་པོ།
ཉང་གཏེར་སྟོན། ཡི་དམ་ཆེན་པོ་བྱ་རྒྱུད། སྤྱོད་རྒྱུད། རྣལ་འབྱོར་རྒྱུད། རྣལ་འབྱོར་བླ་ན་མེད་པའི་ཡི་དམ་དཀྱིལ་འཁོར་གྱི་ལྷ་ཚོགས་དགོངས་སུ་གསོལ། གསང་སྔགས་མ་མོ་མཁའ་འགྲོ་དགོངས་སུ་གསོལ་ལོ། །དཔལ་མགོན་དམ་པ་ཆོས་སྐྱོང་སྲུང་མ་དགོངས་སུ་གསོལ་ལོ། ༈ །དམ་ཅན་སྐྱེས་བུ་མགར་བ་ནག་པོ་དགོངས་སུ་གསོལ་ལོ། །ཨ་ཇོ་ཆེན་པོ། ཆོས་སྐྱོང་ཆེན་པོ། ཞིང་བཅུའི་ཤན་པ། བནྡེ་ནག་པོ། ཡབ་མོན་པ་ནག་པོ། ཡུམ་མོན་པ་ནག་མོ། བུ་དམ་ཅན་མགར་བ་སྐུ་མཆེད་སུམ་བརྒྱ་དྲུག་ཅུ། དཀར་པོ་བརྒྱ་དང་ཉི་ཤུ། ནག་པོ་བརྒྱ་དང་ཉི་ཤུ། ཁྲ་བོ་བརྒྱ་དང་ཉི་ཤུ། གསང་ཡུམ་བརྟན་མ་བཅུ་གཉིས། སྐྱོང་མ་ཡ་མ་དཔུང་དང་བཅས་པ། གིང་ཆེན་ཕོ་ཉ་བཞི་བཅུ་རྩ་གཉིས། ལྷ་ཚངས་པ། བཙན་ཡམ་ཤུད་དམར་པོ། གཤིན་རྗེ་མེ་རུ་རྩེ། བདུད་ཡབ་རྗེ། ས་བྱེད་ཨ་ཙ་ར་དཀར་པོ། ཕུང་བྱེད་ཀྱི་ཨ་ཙ་ར་དམར་པོ། འགུགས་བྱེད་ཨ་ཙ་ར་ནག་པོ། སྒྲོལ་བྱེད་ནག་པོ། མོན་པ་རྟ་ནག་ཅན་ཕོ་དྲུག་མོ་དྲུག །ཕུང་བྱེད་ཀྱི་བདུད་ཕོ་གསུམ། ཟ་བྱེད་ཀྱི་སྟག་སྤྱང་སེང་གསུམ། དམ་ཅན་མགར་བ་ནག་པོ་ར་
ཞོན། སེང་ཞོན་འཁོར་དང་བཅས་པ་དགོངས་སུ་གསོལ། ཧོ། དམ་ཉམས་པའི་ཡིད་ལ་མནག་པའི་དགྲ་བོ། སངས་རྒྱས་བསྟན་པའི་སྤྱི་དགྲ། དཔལ་ལྡན་བླ་མའི་སྐུ་དགྲ། ཞིང་བཅུ་ཚང་བའི་བསྟན་དགྲ་འདི་བཞེས་སུ་གསོལ་ལོ། །ཁྱད་པར་དུ་མཉམ་མེད་དྭགས་པོ་བཀའ་བརྒྱུད། ལྷག་པར་དུ་སྒྲུབ་བརྒྱུད་ཀརྨ་ཀཾ་ཚང་གི་བསྟན་འཛིན་བརྒྱུད་པར་བཅས་པ་ལ་གནོད་ཅིང་འཚེ་བར་བྱེད་པའི་བསྟན་དགྲ། སྒོས་དགྲ་སྒེ་མོའི་འདོད་དོན་སྦྱར་ལ། ལ་ཕོད་བཙུགས་པ། དོ་བསྡོ་བ། སྔ་དགྲ་ལག་གིས་བརྡར་བ། ཕྱི་དགྲ་ཡིད་ལ་བསམ་པ། ད་དགྲ་ཐད་དུ་ལང་བའི་དགྲ་བོ། མི་ང་ལ་ལྷ་མེད་ཟེར་བ། ལྷ་ཁྱེད་ལ་མཐུ་མེད་ཟེར་བ། མཐུ་བུ་ལོན་བཞིན་དུ་བསྙག་པ། མིག་ངན་དུ་ལྟ་བ། ཁ་ངན་དུ་སྨྲ་བ། ཕྱི་དགྲ་ནང་རྐུན། ཆེ་ནོན་མཐོ་ནོན་བྱེད་པའི་དགྲ་བོ་ཀུན་ཁས་ཤོམ་པ། ཇག་ལག་གིས་བཤམས་པ། ཕུ་ལ་ཁ་ནས་ཇག་པ་རྟ་ཞོན། །མདའ་ལུང་ཁུང་ནས་རྐུན་མ་ཞགས་ཐོགས། ཕུ་གསུམ་རི་དྭགས་རྔོན་རྒྱ་བཤིགས་མི། མདའ་གསུམ་ཆུ་མའི་མུ་ཁ་བཤིག་མི། དོན་མེད་པ་ལ་སྙད་ཚོལ་བ། མ་ཟོས་པའི་བུ་ལོན་
བསྙགས་པ། མ་ཉེས་པའི་ཁ་ཡོག་འཕེན་པ། །ལེན་པ་མེད་པའི་སྲོག་ལ་རྒོལ་བ། བསྡོས་པ་མེད་པའི་ནོར་འཕྲོག་པ། ཟ་ལམ་དུ་དུག་འདེབས་པ་ལྟ་བུ། འགྲོ་ལམ་ལ་རྩང་བཙུགསཔ་ལྟ་བུ། ཕན་བཏགསན་གནོད་སྐྱེལ། བཟང་བྱས་ན་ངོན་འཇལ། ཁ་དཀར་ཞེ་ནག །ཁ་འཇམ་སྙིང་རྩུབ། མདུན་ནས་ཁྱི་བཞིན་བསྒྲིག་པ། ཟུར་ནས་བཅད་དགོས་ཟེར་བ་སྡང་བའི་དགྲ་བོ། དགྲ་ཡ། གྱོད་ཡ། འཛིང་ཡ། བསླབ་པའི་སློབ་བུ་དམ་ལོག །བརྟེན་པའི་ལེའུ་ལྷ་ལོག །གཏམ་པའི་ཤག་རོག་མནའ་ཟན། འཁོར་གྱི་བྲན་གཡོག་ངོ་ལོག །ཉོས་པའི་ཆུང་མ་སྙིང་ངན། ཐད་དུ་ལང་བའི་དགྲ་བོ་མིང་བྱང་བུ་ལ་བྲིས་པ། གཟུགས་ལིང་ག་ལ་བཏབ་པ་འདི་བཞེས་སུ་གསོལ། འོ། དམ་ཉམས་པ་ཡིད་ལ་མནག་པའི་དགྲ་བོ་བུ་སྤུན་ཕ་དང་བཅས་པ། བུ་མོ་སྲིང་མོ་མ་དང་བཅས་པ། ཤ་སྤུན་ཉེ་བ་དང་བཅས་པ། གྲོང་མི་ཁྱིམ་མཚེས་དང་བཅས། མི་ནོར་ཟས་གསུམ། འོག་རྟ་ཆུང་མ་སྒོ་ཁྱི་དང་བཅས་པ་འདི་བཞེས་སུ་གསོལ་ལོ། །ལན་གསུམ་བརྗོད། ད་ལྟ་ཉིད་དུ་བཞེས་སུ་གསོལ། ཧོ། ཆོས་སྐྱོང་བའི་སྲུང་མ་ཁྱོད་ནི་སྔོན་ཚེ་ཕྱག་ན་
རྡོ་རྗེ། པདྨ་བཛྲ་གྱིས་བཀའ་བསྒོ་དམ་བཞག་ཆོས་ཀྱི་སྲུང་མར་བསྐོས་པ་ཡིན་ནམ། རིག་འཛིན་རྣལ་འབྱོར་སྐྱོངས་བར་ཁས་བླང་ངམ། ཞིང་བཅུའི་ཤན་པ་སྒྲོལ་ལམ། དམ་ལས་འདའ་འམ་བཀའ་ལ་མི་བརྩིའམ། བདག་རིག་འཛིན་དེ་ཡི་བརྒྱུད་འཛིན་ཤེས་སམ། དམ་ཉམས་པའི་དགྲ་བོ་འཁོར་དང་བཅས་པ་འདི་བཞེས་སུ་གསོལ་ལོ། །དགྲ་བོའི་ཤ་ཟོ་ཁྲག་འཐུང་། མིང་རྗེས་མེད་ལྷག་མ་མེད་པར་མཛོད། དེ་ནས་གཡབ་དར་རྡེབས་ལ། འོ། དམ་ཉམས་པའི་དགྲ་བོ་འདི་མིང་དང་མིང་འདྲ་འདྲའི་ནང་ནས་མ་ནོར། རུས་དང་རུས་འདྲ་འདྲའི་ནང་ནས་མ་ནོར། ཡུལ་ལུང་དང་ཡུལ་ལུང་ནང་ནས་མ་ནོར། ཕ་ཚོ་དང་ཕ་ཚོའི་ནང་ནས་མ་ནོར། ཕུ་ནུ་དང་ཕུ་ནུའི་ནང་ནས་མ་ནོར། སྤྱང་དར་མའི་ལུ་གུབཙལ་བ་ལྟར་ཐོངས་ཤིག །ཤིང་སྡོང་པོ་ཁོག་རུལ་བ་ལྟར་འཕར་སྦས་མེད་པར་གྱིས་ཤིག །བུ་ཕོ་རྒྱུད་ལ་བབ་ནི་བྲག་རི་ཐོག་གིས་སྟོར་བ་ལྟར་ཐོངས་ཤིག །བུ་མོ་མོ་རྒྱུད་ལ་བབས་ན་ནག་ལ་མེ་མཆེད་པ་ལྟར་ཐོངས་ཤིག །བྱིས་པ་ལ་བབ་ན་མཆིལ་པས་རྒུམ་བུ་ཐུ་བ་ལྟར་ཐོངས་ཤིག །ཆེ་རྒྱུད་ལ་བབ་ན་རམ་ནག་སེར་བས་བརྡུང་བ་ལྟར་
ཐོངས་ཤིག །ནོར་ལུག་ལ་བབ་ན་རྩྭ་སྐྱ་ལ་མེ་ཤོར་བ་ལྟར་ཐོངས་ཤིག །འོག་རྟ་ལ་བབ་ན་རི་གཟར་གྱི་རྦབ་འདྲིལ་བ་ལྟར་ཐོངས་ཤིག །ཁ་རྗེ་དབང་ཐང་ཉི་མ་ནུབ་པ་ལྟར་ཐོངས་ཤིག །མིང་མེད་རྗེས་མེད་ཤུག་ཐལ་རླུང་གིས་ཁྱེར་བ་ལྟར་ཐོངས་ཤིག །བྱ་སྤུ་རླུང་གིས་ཁྱེར་བ་ལྟར་ཐོངས་ཤིག །སྤང་ཐོག་རི་བོང་རྗེས་ལྟར་ཐོངས་ཤིག །བྱ་སྒོ་མེ་ལ་བསྲེགས་པ་ལྟར་ཐོངས་ཤིག །མེ་ཏོག་སད་ཀྱིས་ཁྱེར་བ་ལྟར་ཐོངས་ཤིག །འོ། དགྲ་བོ་འདི་ལ་སྲུང་བའི་སྔགས་ཡོད་ན་རང་གསོད་པའི་མཐུར་གྱུར་ཅིག །ཆད་པའི་ཕོ་ཉ་ཡོད་ན་ཕུང་འདྲེར་གྱུར་ཅིག །གསོ་བའི་སྨན་ཡོད་ན་རང་ལུས་འཇིགས་པའི་དུག་ཏུ་གྱུར་ཅིག །རྣོ་བའི་མཚོན་ཡོད་ན་རང་སྲོག་གཅོད་པའི་སྤུ་གྲིར་གྱུར་ཅིག །འོ། དམ་ཉམས་པའི་དགྲ་བོ་ལ་རང་མཐུ་རང་ལ་ཕོབ་ཅིག །རང་སྲོག་རང་གིས་ཆོད་ཅིག །རང་མཚོན་རང་ལ་རྒྱོབས་ཤིག །རང་ཤ་རང་གིས་ཟོ་ཤིག །རང་ཁྲག་རང་གིས་འཐུངས་ཤིག་ཕ་སྤུན་ནང་དམེ་ཐོངས་ཤིག །བཟའ་རོག་བྱེ་ཐན་ཐོངས་ཤིག །དགྲ་བོ་འདི་ལ་ཅི་མི་འདོད་པ་སྣ་ཚོགས་ཐོངས་ཤིག །དམ་ཉམས་པ་ཡིད་ལ་མནག་པའི་དགྲ་བོ་འདི་ལ་གནམ་
ལྕགས་ཐོག་གི་ཆར་པ་ཕོབ་ཅིག །ལྟས་ངན་ཐན་གྱི་ཆར་པ་ཕོབ་ཅིག །སྣ་ཚོགས་ཐན་གྱི་རྩེད་མོ་རྩེས་ཤིག །སྤྲེལ་ཅ་ཝ་ཞོན་གྱིས་སྒོ་རྡུངས་ཤིག །ཨ་ཙ་རའི་མིང་ནས་བོས་ཤིག །མོན་པ་ཕོ་མོས་ནམ་མཁའ་སྟོན་ཅིག །སྤྲེལ་དང་གླ་བ་གྲོང་ལ་འགྲིམ་ཞིག །མོན་པ་ནག་པོས་རྩེ་སྐད་ཐོངས་ཤིག །གཅན་གཟན་སྣ་ཚོགས་ཁྱིམ་དུ་ཐོངས་ཤིག །བྱ་ཐན་འུག་པ་རྣ་ཉན་གྱིས་ཤིག །སྲིད་ལ་བྱ་རོག་ཨག་སྒྲ་ཐོངས་ཤིག །ཇག་དཔོན་རྐུ་དཔོན་ཁྲག་ཏུ་སྐྱུགས་ཤིག །ཆུང་མ་སྨྱོ་རུ་ཆུག་ཅིག །ཧུར་ཐུ་ནད་ཀྱིས་ཟློག་ཅིག །ཧོ༔ དགྲ་བོའི་མི་ནོར་ལ་གཟའ་བདུད་ཆེན་པོས་ཟ་ཁ་ལྟོས་ཤིག །སྡེ་བརྒྱད་ཚོགས་ཀྱིས་ཟ་ཁ་ཕོབ་ཅིག །བགེགས་རིགས་སྟོང་ཕྲག་བརྒྱད་ཅུས་ཟ་ཁ་ལྟོས་ཤིག །བདུད་དང་བཙན་གྱིས་ཟ་ཁ་ལྟོས་ཤིག །ཕུང་བྱེད་ཨ་ཙ་རས་ཟ་ཁ་ལྟོས་ཤིག །ཟ་བྱེད་བདུད་པོ་སྤུན་གསུམ་གྱིས་ཟ་ཁ་ལྟོས་ཤིག །ཕུང་གསུམ་གཡབ་ཀྱིས་ཐོངས་ཤིག །སྲོག་གི་སྐེ་ཁྲག་ཐང་ལ་ཕོས་ཤིག །སྙིང་ཁྲག་ལས་མཁན་རྣམས་ཀྱི་དཔའ་ཟས་གྱིས་ཤིག །མིང་རྗེས་ཤུལ་ཙམ་ཡང་མེད་པར་གསེར་གྱི་ཕ་ཝང་ཆུར་བསྒྱུར་བ་ལྟར་
ཐོངས་ཤིག །རྟ་དཀར་པོ་ལ་སྟན་ནག་པོ་བསྟོད་པ་ལྟར་ཐོངས་ཤིག །ཧོ༔ དགོངས་སུ་གསོལ་ལོ། ཁྱད་པར་དབེན་རི་གཉེན་པོ་ལ་ཚད་བཙུགས། རྒྱབ་རི་རྔོན་རྒྱ་བཤིགས་པའི་དགྲ་བོ་འདིའི་མི་སྙིང་ཕྱུངས་ཤིག །ཁ་ནས་ཁྲག་ཏུ་སྐྱུགས་ཤིག །ཀླད་ཁྲག་ས་ལ་རྒྱོབ་ཅིག །སྲོག་སྙིང་ཕོ་ཉ་རྣམས་ཀྱིས་བྱ་རྒོད་ཐེད་ལ་རུབ་པ་ལྟར་ཐོངས་ཤིག །འཻ། དམ་ཉམས་པ་ཡིད་ལ་མནག་པའི། དགྲ་བོ་འདི་དམ་ཅན་སྐྱེས་བུ་འཁོར་དང་བཅས་པ་ལ་དགྲ་སྐལ་དུ་གཏད་དོ། །ལས་སྐལ་དུ་གཏད་དོ། །འཆོར་བ་མེད་པར་ད་ལྟ་ཉིད་དུ་བཞེས་ཐུབ་པར་གྱིས། ཁྱེད་ལ་མཐུ་རྩལ་ཅི་འདུག་ལྟའོ། །སྡང་བའི་དགྲ་བོ་མི་ནོར་ཟོག་གསུམ་མི་རབས་མི་བརྒྱུད་དང་བཅས་པ་ཁྱོད་ལ་གཏད་པས་མ་ཤོར་ལ། མིང་མེད་རྗེས་མེད་ཐལ་བའི་རྡུལ་དུ་བརླག་པར་མཛོད་ཅིག །ཅེས་འཁོར་དང་བཅས་པ་ལ་མཚང་ཆེན་གནད་ལ་ཕོག་པ་ལྟར་རང་དབང་མེད་པར་དགྲ་ཡུལ་དུ་བྱོན་པར་བསྒོམ། གར་ཐོད་ཐོད་བྱ་བ་མ་ཡིན་ནོ། །ལས་ཉེ་དམ་གཙང་། ཀོ་ལོང་དམ་པའོ། །དམོད་བཅོལ་བཞེས་འབོད་འདི་ནི་རིག་འཛིན་སྔགས་འཆང་ཐུགས་གཏེར་ལས་ཀརྨ་ཨ་རཱ་གས་བསྡུས་པའོ།། །།