གནམ་ཆོས་ཐུགས་ཀྱི་གཏེར་ཁ་ལས་དམ་ཅན་མགར་བ་དམར་ནག་གི་མཆོད་ཕྲེང་།
གནམ་ཆོས་ཐུགས་ཀྱི་གཏེར་ཁ་ལས༔ དམ་ཅན་མགར་བ་དམར་ནག་གི་མཆོད་ཕྲེང་བཞུགས་སོ།།
གཏོར་མ་བདུད་རྩིའི་རྒྱ་མཚོ་དཔག་ཏུ་མེད་པར་གྱུར། ཨོཾ་ཨ་ཀཱ་རོས་བྱིན་གྱིས་བརླབས་ལ། རང་གི་མདུན་དུ་མགར་ནག་སྐུ་མདོག་ནག་པོ་ཞལ་གཅིག་ཕྱག་གཉིས་ཐོ་བ་དང་སྐྱུད་པ་འཛིན་ཅིང་བེར་ནག་གྱོན་ནས་ར་སྐྱེས་ལ་ཞོན་པ༔ མགར་དམར་སྐུ་མདོག་དམར་པོ་ཞལ་གཅིག་ཕྱག་གཉིས་གཡས་རྡོ་རྗེ་གཡོན་དགྲ་སྙིང་། །དར་དམར་གྱི་བེར་དང་ལ་ཐོད་ཅན་སེང་གེ་ལ་ཆིབས་པ༔ དེ་གཉིས་ཀྱི་ཐུགས་སྲོག་ལ་སྔགས་ཀྱིས་གཡས་སུ་བསྐོར་བ་ལས་འོད་ཟེར་དཔག་མེད་འཕྲོས་ནས་རྡོ་རྗེ་ལེགས་པ་སྤྱན་དྲངས་པར་གྱུར། །རང་རང་གི་གནས་ནས་སྤྱན་དྲངས་སོ། །ཞེས་སོ།
ཧཱུྃ༔ འོག་མིན་རྣམ་སྣང་ཞིང་ཁམས་ནས༔ ཡེ་ཤེས་རྡོར་ལེགས་གཤེགས་སུ་གསོལ༔ མ་ལ་ཡ་ཡི་གནས་མཆོག་ནས༔ དམ་ཚིག་རྡོར་ལེགས་གཤེགས་སུ་གསོལ༔ ནུབ་ཕྱོགས་ཕ་ཝང་ལོང་བུ་ནས༔ སྐྱེས་བུ་རྡོར་ལེགས་གཤེགས་སུ་གསོལ་འོ་ཡུག་ཤང་གི་བྲེ་མོ་ནས༔ གཙང་བཙན་རྡོར་ལེགས་གཤེགས་སུ་གསོལ༔ རྒྱ་བོད་མདོ་གཙང་གནས་རྣམས་ནས༔ སྤྲུལ་པའི་རྡོར་ལེགས་གཤེགས་སུ་གསོལ༔ བདག་གིས་དགྱེས་པའི་གདན་བཏིང་ན༔ དམ་ཅན་མགར་བ་བཞུགས་སུ་གསོལ༔ ཧཱུྃ༔ སྐྱེས་བུ་ཆེན་པོ་འཁོར་བཅས་ལ༔ ཕུད་རྒོད་ར་ཡི་
ཤ་ཁྲག་གསུར༔ ར་སྐྱེས་མདའ་དར་རྔ་ཁྲབ་དང་༔ བཤོས་བུ་མཁར་ཐབ་མཆོད་པ་འབུལ༔ དངོས་འབྱོར་ཡིད་སྤྲུལ་མཐུན་རྫས་འབུལ༔ རྡོ་རྗེ་ལེགས་པའི་ཐུགས་དམ་བསྐང་༔ བདག་གིས་ཕྲིན་ལས་མ་ལུས་ཀུན༔ ཁྱོད་ཀྱིས་མྱུར་དུ་བསྒྲུབ་ཏུ་གསོལ༔ དབུ་རྒྱན་པདྨ་འབྱུང་གནས་དཀར༔ གཡས་པས་རྡོ་རྗེ་གཡོན་བྷནྡྷ༔ ཁ་ཊཾ་གྲུ་མོར་བརྟེན་པ་ནི༔ པད་ཞྭ་སྒོ་དར་མེ་ལོང་བརྒྱན༔ ཆོས་གོས་རྣམ་གསུམ་སྐུ་ལ་གསོལ༔ པདྨ་ཉི་སྟེང་གསལ་བར་བཞུགས༔ འོད་ཟེར་དཔག་མེད་འཕྲོ་བ་སྟེ༔ དམ་ཅན་སྐྱེས་བུའི་གཙུག་དུམ་ལ༔ ཕྱག་འཚལ་མཆོད་པ་སྣ་ཚོགས་འབུལ༔ དེ་ཡི་བཀའ་ཉན་ཕོ་ཉ་བ༔ དམ་ཅན་གཡས་པས་རྡོ་རྗེ་ལེགས༔ གཡོན་པས་ནེའུ་ལེས་དངོས་གྲུབ་སྩོལ༔ ཞབས་གཉིས་ཕྱེད་པའི་སྐྱིལ་ཀྲུང་གིས༔ སེང་གེ་དཀར་མོའི་སྟེང་ན་བཞུགས༔ དབུ་སྐྲ་ཁམ་པ་སྟོང་གསུམ་ཁྱབ༔ ལྕེ་ནི་གློག་དམར་འཁྱུགས་པ་སྟེ༔ རྣལ་འབྱོར་པ་ལ་སྡང་བྱེད་རྣམས༔ ལྕེ་ཡིས་ཉུལ་ནས་ཟ་བར་བྱེད༔ མིག་གཉིས་ཉི་ཟླ་ལྟ་བུ་དེས༔ ཁམས་གསུམ་སྲིད་གསུམ་རྩིས་ལ་འདེབས༔ སེན་མོ་ལྕགས་ཀྱུ་རྣོན་པོ་དེས༔ མི་རྣམས་
ཐམས་ཅད་དབང་དུ་བསྡུས༔ ཅི་བཅོལ་ལས་རྣམས་སྒྲུབ་པར་བྱེད༔ དམ་ཅན་ཆེན་པོར་ཕྱག་འཚལ་བསྟོད༔ གསོལ་ལོ་མཆོད་དོ་མཉེས་གྱུར་ཅིག༔ རྡོ་རྗེ་ལེགས་པ་སྐུ་མདོག་ནག༔ ཞལ་གཅིག་ཕྱག་གཉིས་འོབ་ཞུ་གསོལ༔ གཡས་པས་ཐོ་བ་གཡོན་པ་ཡིས༔ ར་ཡི་སྦྱད་པ་ཐོགས་ནས་ཀྱང་༔ ཞལ་གདངས་ལྗགས་འདྲིལ་ཁྲོ་བོའི་ཆས༔ སྐུ་ལ་བེར་གསོལ་རྭ་སྐྱེས་ཆིབས༔ མགར་བ་ནག་པོར་ཕྱག་འཚལ་བསྟོད༔ གསོལ་ལོ་མཆོད་དོ་མཉེས་གྱུར་ཅིག༔ སྐྱེས་བུ་དམ་པ་སྐུ་མདོག་ནག༔ དབུ་སྐྲ་ཐོར་ཅོག་མཛད་ནས་ནི༔ གཡས་པས་ར་ཡི་ཐོད་ནས་བཟུང་༔ གཡོན་པས་ནེའུ་ལེས་དངོས་གྲུབ་སྟེར༔ འདོར་ཐབས་རིན་ཆེན་རྒྱན་གྱིས་བརྒྱན༔ དཀོར་བདག་ཆེན་པོར་ཕྱག་འཚལ་བསྟོད༔ གསོལ་ལོ་མཆོད་དོ་མཉེས་གྱུར་ཅིག༔ ལོངས་སྤྱོད་ནོར་གྱི་དངོས་གྲུབ་སྩོལ༔ ཕོ་ནད་མཁྲིས་ནད་ཞི་བ་དང་༔ མི་ནད་ཕྱུགས་ནད་ཞི་བ་དང་༔ རྟ་ལུག་ནོར་གྱི་གོད་ཁ་ཆོད༔ དཀོར་རྣམས་སྲུངས་ལ་ཇག་རྐུན་ཆིངས་ཕོ་ལྷོག་གླང་ཐབས་མཁྲིས་བཤལ་དང་༔ ཆོ་འཕྲུལ་སྣ་ཚོགས་དགྲ་ལ་ཐོངས༔ བཅོལ་བའི་ཕྲིན་ལས་འགྲུབ་པར་
མཛོད༔ ཨོཾ་ཨཱཿཧཱུྃ་རཀྟ་ཨ་པ་སྐ་ར་སརྦ་སིདྡྷི་སྭཱ་ཧཱ༔ ཨི་དཾ་བ་ལིཾ་ཏ་ཁཱ་ཧྲཱི༔ ཨོཾ་བཛྲ་སཱ་དྷུ་ས་མ་ཡ་ཧཱུྃ་ཧཱུྃ་ཕཊ༔ ཨི་དཾ་བ་ལི་ཏ་ཁཱ་ཧྲཱི༔ ཨོཾ་བཛྲ་སཱ་དྷུ་ས་མ་ཡ་ཛཿཛཿ ཨི་དཾ་བ་ལི་ཏ་ཁཱ་ཧྲཱི༔ ཨོཾ་པ་ཀ་ར་ཀ་ལ་ལོ་ཀ་པ་ལ་སིདྡྷི་ཧཱུྃ༔ ཨི་དཾ་བ་ལིཾ་ཏ་ཁཱ་ཧྲཱི༔ བསྐུལ་བ་བསྲུང་འཛིན་མཇུག་ལྟར་རོ༔ ཞེས་གནམ་ཆོས་གཞུང་ནས་འདོན་འགྲིགས་སྒྱུར༔ རཱ་ག་ཨ་སྱས་བྲིས་པ་ལ་འགལ་བ་མཆིས་ན་སྐྱེས་བུ་འཁོར་དང་བཅས་ལ་བཤགས༔ དགེ་བས་ཟབ་གཏེར་བསྟན་པ་དར་ཞིང་སྤྲུལ་སྐུ་རིན་པོ་ཆེ་སྐུ་ཚེ་རིང་ཞིང་ཕྲིན་ལས་དར་ཞིང་རྒྱས་པར་གྱུར་ཅིག །སརྦ་མངྒ་ལཾ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།