དམ་ཅན་རྡོ་རྗེ་ལེགས་པའི་སྒབ་འདྲེ་དམ་སྲི་མནན་ཐབས་མན་ངག
དམ་ཅན་རྡོ་རྗེ་ལེགས་པའི་སྒབ་འདྲེ་དམ་སྲི་མནན་ཐབས་མན་ངག་བཞུགས་སོ། །
དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །དམ་ཅན་འདི་ལྷ་བཟང་སྟེ་འཁོར་ངན་པས། རིགས་གང་བསྒྲུབས་ཀྱང་དམ་སྲི་གསུམ་མནན་པ་གལ་ཆེའོ། །གསུམ་གང་ཞེ་ན། བདུད་བསྙབ་པ་ལག་རིང་། བཙན་ཡམ་ཤུད་དམར་པོ། ཐེའུ་རང་སྟོང་འཁྲུགས་དང་གསུམ་མོ།། དེ་ལ་དང་པོ་བདུད་བསྙབ་པ་ལག་རིང་། བནྡེ་ཆེན་པོའམ། བོན་པོའམ། སྟག་ལ་སོགས་པའི་གཅན་གཟན་དུ་སྤྲུལ་ནས། བདག་སྒྲུབ་པ་པོའི་སྲོག་ལ་རྒོལ་ལོ།། བཙན་ཡམ་ཤུད་དམར་པོ་ནི། རྟ་དམར་པོ། བོང་བུ། ཁྱི་ལ་སྤྲུལ་ནས་རྟ་དང་ནོར་ལ་གནོད། ཐེའུ་རང་སྟོང་འཁྲུགས་ནི། དམག་དང་ཟང་ཟིང་དང་། བྱིས་པར་སྤྲུལ་ནས་འཁོར་དང་སྲི་ལ་གནོད་དོ། །འདི་གསུམ་མནན་པ་དང་བཅིང་མ་ཤེས་ན། རྣལ་འབྱོར་པ་ཚེ་ཐུང་བ་
དང་། ནོར་ཕྱུགས་ལ་ཤི་གོད་འོང་བ་དང་། འཁོར་དང་ཟས་ནོར་ལ་གནོད་པ་བྱེད་པས། འདི་རྣམས་མནན་པ་ཤིན་ཏུ་གལ་ཆེའོ། །ཁོ་རང་གིས་ཕྱག་ན་རྡོ་རྗེའི་ཞལ་མཐོང་ཞིང་དགེ་བསྙེན་ཀྱི་སྡོམ་པ་བླངས་ནས་སེམས་ཅན་ལ་གནོད་མི་བསྐྱེལ་བར་ངེས་སོ། །སྔོན་དུས་འདི་གསུམ་གྱིས་ཕྱག་ན་རྡོ་རྗེ་ཞལ་མ་མཐོང་བས་གནོད་པར་འོང་། དེའང་བར་དུ་རིག་འཛིན་པདྨ་བཛྲ་གྱིས་བོད་ཁ་བ་ཅན་དུ་ཕེབས་ནས་བོད་ཀྱི་ལྷ་འདྲེ་འདུལ་དུས་སུ། རིག་འཛིན་པདྨ་བཛྲ་གྱིས་བཀའ་བསྒོས་དམ་ལ་བཞག །སངས་རྒྱས་ཀྱི་བསྟན་པ་སྲུང་བར་ཁས་བླངས། གསུམ་པོ་ནི་འོང་མ་ཉན་ནས་སློབ་དཔོན་ལ་བར་ཆད་བྱས་པས་སློབ་དཔོན་གྱི་རྡོ་རྗེ་ཕུར་པས་གཟེར་བས་ཕྱི་རབས་སྒྲུབ་པ་པོ་ལ་བར་ཆད་མི་བྱེད་པར་ཁས་བླངས་ནས་བར་ཆད་མི་བྱེད་པ་འདྲའོ། །འདི་
གསུམ་མ་མནན་ན་མི་རུང་། སློབ་དཔོན་གྱིས་གསུངས། དེའི་ཕྱིར་མནན་པ་བཞིར་ཤེས་དགོས། བཞི་གང་ཞེ་ན། འགུགས་བསྟིམ་བྱེད་པ་དང་གཅིག །གནད་འབོད་པ་དང་གཉིས། སྤྱིར་མནན་པ་དང་གསུམ། སྒོས་སུ་མནན་པ་དང་བཞིའོ། །སྤྱིར་མནན་པ་ནི། ཁམ་སའི་ས་སྤྱིན་ལ་ཚིག་རྨེ་དང་། བྲག་ནག་པོའི་དྲེག་པ་དང་། རམ་གྱི་ཕྱེ་མ་དང་ཐལ་ཆེན་དང་། ལྕི་བ་དང་། རམ་བུ་རྣམས་བསྲེས་པ་ནི་རྫས་སོ། ༧ །དེ་ནས་གཉིས་པ་ནི་ལིངྒ་དཔེའུ་རིས་ནི། དུག་ཤོག་ལ་དུག་ཁྲག་གི་སྣག་ཚས་གྲུ་བཞི་གྲུ་གང་་་མི་གཟུགས་ཁྱུ་གང་མགོ་བོ་གསུམ་ལ་སྔགས་མཚན་སོ་སོར་བྲིས་ལ་བཅུག་མཆན། བ་གཅིག་ལ་དབུས་སུ་མིའི་མགོ་ལ་སྙིང་ཁར་རས་ལ་མི་ཁྲག་གིས་སྔགས་འདི་བྲིས། ཨོ་པག་ཤུད་མུ་ཐ་ཧཱུྃ་ཛཿཛཿ བསྙབ་པ་ལག་རིང་མཱ་ར་ཡ་ཏྲི་ཛ་ཁུག་ཙཾ་བྷ་ཡ་ནན། ཞེས་བྲིས་ལ་བཅུག །གཡས་རྟ་མགོ་བྱས་ལ། དེའི་སྙིང་ཁར་གྲོ་ག་ལ་རྟ་ཁྲག་གི །ཨོ་ཤཱ་ན་ཏ་ཏྲི་ཛ་ཛ་ཡཾ་ཤུད་དམར་པོ་མཱ་ར་ཡ་ཏྲི་ཛ་ཁུག་སྟེ་བྷ་ཡ་ནན། བྱ་བ་བྲིས་ལ་བཙུག །གཡོན་སྤྲེལ་མགོ་བྱས་ལ། དེའི་སྙིང་ཁར་ཤོག་བུ་ལ་ཁྱི་ཁྲག་གིས་བྲིས། ཨོ་བྷ་ར་མུ་ཏྲི་ཁས་ཛ་ཛ་ཐེའུ་རང་སྟོང་འཁྲུགས་མཱ་ར་ཡ་ཏྲི་ཛ་ཁུག་སྟེ་བྷ་ཡ་ནན། བྱ་བ་བྲིས་ལ་བཅུག །གཟུགས་གསུམ་གྱི་སྙིང་ཁར་ཧྲི་ཏྲི་རེ་རེ་བྲིས། ཡང་ལུགས་གཅིག་ལ། སྔོན་གྱི་རྫས་རྣམས་བསྲེས་ལ་གཟུགས་གྲུ་བཞི་གྲུ་གང་བ་གཅིག་བྱས་ལ་དབུས་མི་མགོ །གཡས་རྟ་མགོ །གཡོན་སྤྲེལ་
མགོ་བྱ། རས་སམ་གྲོ་གའམ་དུག་ཤོག་སོགས་ལ། ཁྲག་སྣ་གསུམ་སོགས་སྔགས་དང་བཅས་པ་གོང་ལྟར་རོ། །དེ་ནས་བཅའ་གཞི་བྲུབ་ཁུང་ལ་སོགས་ལེགས་པར་བྱས་ལ། གཞུང་གི་ཡི་དམ་མཆོད་པ་སོགས་གཞུང་ལྟར་གསལ། རང་ཡི་དམ་དུ་གསལ་བའི་ངང་ནས། སྲུང་འཁོར་གྱི་འགུགས་ལྟར་ལས། ལིངྒ་རྫས་དང་མིང་ཡིག་མཚན་པའི་བྲུབ་ཁུང་ནང་གི་ལིངྒ་ལ། ཁུག་ཅིག་བཛྲ་སོགས། ཛཿཧཱུྃ་བཾ་ཧོཿ འགུགས་བསྟིམ་ལན་གསུམ་བྱ། དམ་ཅན་གྱི་རིམ་མནན་ཐབས་ལ། ལིངྒ་རྫས་བསགས་ལ་རྫོང་ངོ་། །དེ་ནས་དམ་སྲི་སྒབ་འདྲེ་མནན་པའི་ཆོ་ག་ནི། དང་པོ་ཡི་དམ་བསྒོམས་ལ་འདི་སྐད་དོ། །ཨོཾ་ལས་མི་དམིགས་སྟོང་པར་གྱུར་པའི་ངང་། །ཨཱལས་པདྨ་ཟླ་བའི་གདན་སྟེང་དུ། །ཧཱུྃ་ལས་སྣོད་བཅུད་འོད་ཟེར་སྤྲོ་བསྡུ་ལས། །ཧྲིལས་བདག་ཉིད་པདྨ་བཛྲ་རྩལ། །བཅུ་དྲུག་ལང་ཚོ་དཀར་དམར་ཞི་མ། པད་ཞྭ་ཆོས་གོས་ཟབ་བེར་བརྒྱན་དང་ལྡན། །རྡོ་རྗེ་བྷནྡྲ་ཁ་ཊོ་ཕྱག་ན་བསྣམས། །པདྨའི་གདན་ལ་མཚན་དཔེ་འབར་བར་བཞུགས། །།པདྨ་འོད་ནས་སྤྱན་དྲངས་རང་ལ་བསྟིམ། །རང་འདྲའི་སེམས་དཔའ་ཐུགས་ཀར་ཧྲཱི༔ཡིག་མཐར། །སྔགས་ཀྱི་ཡིག་འབྲུ་གཡས་སུ་འཁོར་བར་གྱུར། །ཨོཾ་ཨཱཿཧཱུྃ་བཛྲ་གུ་རུ་པདྨ་སིདྡྷི་ཧཱུྃ། བཟླས་པ་བྱ། གང་འགྲུབ་བྱས་
ལ། དེ་ནས་བསྟོད་པ་ནི། ཧྲཱི༔ ཨོ་རྒྱན་དྷ་ན་ཀོ་ཤའི་མཚོ་གླིང་དུ། །མངལ་སྐྱེས་མ་ཡིན་རྫུས་སྐྱེས་སྤྲུལ་པའི་སྐུ། །སྐྱེ་འཆི་མི་མངའ་རྡོ་རྗེའི་སྐུ་གཅིག་པོ། །པདྨ་བཛྲ་རྩལ་ལ་ཕྱག་འཚལ་བསྟོད། །ཅེས་བྲུབ་ཁུང་ནང་དུ་ལིངྒ་བཅུག་ལ། འགུགས་གཞུག་ནི། ན་མོ། དཀོན་མཆོག་གསུམ་དང་ཡི་དམ་ཆོས་སྐྱོང་དང་། །དཔལ་ཆེན་རྟ་མགྲིན་དཔལ་ལྡན་ནག་པོ་ཆེ། །མཆེད་འཁོར་གིང་དང་ཕོ་ཉའི་བདེན་པ་དང་། །ཁྱད་པར་སྔགས་འཆང་བདག་གི་ལྷ་སྔགས་དང་། །ཕྱག་རྒྱ་ཏིང་ངེ་འཛིན་གྱི་མཐུ་རྩལ་དང་། །བདེན་སྟོབས་ཆེན་པོ་བརྗོད་པའི་བྱིན་རླབས་ཀྱིས། །སངས་རྒྱས་བསྟན་དགྲ་བླ་མའི་བསྟན་དགྲ་དང་། །ཀཾ་ཚང་བསྟན་དགྲ་དགེ་འདུན་སྡེ་རྣམས་བཤིགས། །དབེན་རི་ཉེས་མེད་སེམས་ཅན་ཡོངས་ལ་འཚེ། །དགེ་སྤངས་སྡིག་སྒྲུབ་དམ་ལོག་ཤན་པའི་ཚོགས། །ཁྱད་པར་རྣལ་འབྱོར་བདག་ཅག་འཁོར་བཅས་ལ། །དུས་གསུམ་འཚེ་བར་བྱེད་པ་དམིགས་པའི་དགྲ། །ཁམས་གསུམ་རིགས་དྲུག་སྐྱེས་པའི་གནས་གཞི་སོགས། །རང་གི་ནང་ཆོས་བོན་དང་སྲུང་མ་ཡི། །སྐྱབས་འོག་གནམ་ས་ཉི་ཟླའི་གོ་བོར་དང་། །གང་ན་ཡོད་དང་གང་ན་གནས་གྱུར་
ཀྱང་། །གཟུགས་དང་ལིངྒ་རྫས་དང་མིང་རུས་ཀྱིས། བཏབ་པའི་བྲུབ་ཁུང་ནང་གི་ལིང་ལ། །ཁུག་ཅིག་བཛྲ་ཨངྐུ་ཤ་ཡ་ཛཿ །སྐེ་ནས་ཆིངས་ཤིག་བཛྲ་པཱ་ཤ་ཧཱུྃ། །ཡན་ལག་སྒྲོག་ཅིག་བཛྲ་སྤོ་ཊ་བི། །རྣམ་ཤེས་མྱོས་ཤིག་བཛྲ་གཥྛ་ཧོ། །བར་རོ། དེ་ནས་འགུགས་གཞུག་ལན་གསུམ་སོང་ནས། དམ་སྲི་གསུམ་གྱི་སྙིང་པོ་ཁྲི་སྟོང་བཟླ། ཨོ་པག་ཤུ་མུ་ཏ་ཧཱུྃ་ཛ་ཤོ་ན་ཏ་ཀྲི་ཧཱུྃ་ཛཿ བྷ་ར་མུ་ཏྲི་ཁས་ཧཱུྃ་ཛཿ ཞེས་སོ། །དེ་ནས་རང་བདུད་ཆས་སུ་ཞུགས་ཤིང་། རང་ཉིད་ལྷའི་ང་རྒྱལ་དང་ལྡན་པ་ལ། ཧྲཱི༔ ཞི་བ་འོད་དུ་ཞུ་ནས་དྲག་པོའི་སྐུ། །བདག་ཉིད་པདྨ་ཐོད་ཕྲེང་རྩལ། །དམར་ནག་མེ་ཕྲེང་རྡོ་རྗེ་སྡིག་པ་བསྣམས། །སྐུ་ལས་ཁྲོ་ཚོགས་དཔག་མེད་གྲངས་མེད་འཕྲོ། །འཕྲོས་པའི་ཁྲོ་བོའི་སྐུ་ལས་མེ་དཔུང་འབར། གཞན་ཡང་ཕྱོགས་བཅུའི་ཞིང་ནས་ཁྲོ་བོའི་ཚོགས། །མཚོན་ཆའི་ཚོགས་རྣམས་སྐར་མདའ་སེར་ལྟར་འཁྲུགས། །དམ་ལོག་སྒབ་འདྲེ་གནོད་བྱེད་ཚོགས་རྣམས་ཀུན། །འགྲོ་གབ་བྲོས་པའི་དབང་མེད་བསྐོར་བར་གྱུར། །ཨོཾ་ཨཱཧཱུྃ་ཨ་ཙིག་ནེརྩིག་ན་མོ་བྷ་ག་ཝ་ཏེ་ཧཱུྃ་ཧཱུྃ་ཕཊ༔ ཨ་ཧཱུྃ་ཧཱུྃ་ཕཊ༔ ཅི་ནུས་བཟླ། དེ་ནས་དཀོན་མཆོག་གཟུ་དཔང་དང་གསེར་སྐྱེམས་མཆོད། དེ་
ནས་ལྷ་དབྱེ་ནི། བྱ་རོག་འུག་སྒྲོ་གཉིས་སློབ་དཔོན་གྱིས་བཟུང་སྟེ། ཨོ་པག་ཤུ་མུ་ཏ་ཤོ་ན་ཏ་ཀྲིཏ་བྷ་ར་མུ་ཏྲི་ཁ་ཀྲུག་ཏ་ཡ་ཀུག་ཏ་ཡ་ཏྲཀཱ་མཱ་ར་ཡ་ཕྱེ་ཕྱེ། ཨོ་ཕྱེ། ཨ་ཕྱི། ཧཱུྃ་ཕྱེ། མ་ཕྱེ། ར་ཕྱི། ཡ་ཕྱེ། ཕཊ་ཕྱེ། ཤ་ཀུ་ན་ཤ་ཏུན་དྷེ་བ་དྷེ་བ་ཕྱེ་མཱ་ར་ཡ་ཕཊ༔ ཅེས་དར་རས་དང་ཁྱི་ལྤགས་དཀར་པོས་རྡེབ་ཅིང་། རྡེལ་བུ་ནག་པོ་དང་། ཡུངས་ཀར་ནག །བྲ་བོ། སྲན་མ། ཚིལ་ཕྱེ་རྣམས་གཟུགས་ལ་བྲབ་ཅིང་འདི་སྐད་དོ། །ཧཱུྃ། རིག་འཛིན་པདྨ་བཛྲ་གྱི། །སྐུ་ལས་པདྨ་དྲག་པོ་རྩལ། །གསུང་སྤྲུལ་ཁྲོ་བོ་ཧཱུྃ་ཀཱ་ར། །ཐུགས་ལས་སྤྲུལ་པ་བདུད་རྩི་འཁྱིལ། །ཡོན་ཏན་སྤྲུལ་པ་སྟོབས་པོ་ཆེ། །ཕྲིན་ལས་རྡོ་རྗེ་གཞོན་ནུ་པ། །གནས་ལྔ་སྤྲུལ་པའི་ཁྲོ་བོ་ལྔར། །སྐུ་ལས་མཚོན་ཆའི་ཆར་བབས་པས། །དམ་སྲི་མ་བུ་སིལ་བུར་གཏུབ། །རམ་ནག་སེར་བས་བཏོར་བ་བཞིན། །ཐལ་བའི་རྡུལ་དུ་བརླག་པར་གྱུར། །ཨོཾ་ཨཱཿཧཱུྃ་ཨ་ཅིག་ནེརྩིག་སོགས། ཁྲོ་བཅུའི་སྔགས་མཐར། ཤམ་བུ་ལ། ༀ་པག་ཤུ་མུ་ཐ་ཤོ་ན་ཏྲི་བྷ་ཏ་མུད་ཏྲི་ཁས་མཱ་ར་ཡ་ཚལ་པ་ཚལ་པ་ཆད་སྲོག་ལ་བྱེར་རྦད། དབུགས་ལ་རྦད། སྲོག་ཆོད། དོན་སྙིང་དྲོངས། ཐལ་བའི་རྡུལ་དུ་རློགས་ཤིག་མཱ་ར་ཡ། གནད་ལ་དབབ་པའི་སྔགས་འདི་
བཟླས་འོ། །གྷ་ཏྲེ་ཨ་ནན། བག་ཏྲེ་ཨ་ནན། སྙིང་ཏྲེ་ཨ་ནན། སྲོག་ཏྲེ་ཨ་ནན། སྲོག་ཏྲི་དུ་མཱ་ར་ཡ་གུར་ནན། ས་མ་ཡ་ཁུག །སྔགས་དེ་མཐའ་དང་བཅས་པ་གཟུགས་ཀྱི་སྙིང་ཁ་ལའང་བཅུག །དེ་ལྟར་རབ་ཞག་བདུན། འབྲིང་ལྔ། ཐ་མའང་གསུམ་དུ་སྒྲུབ་རྟགས་མ་བྱུང་བར་དུ་དགོས་གསུངས། ཁུག་པའི་རྟགས་ལ། གླག་འཆོལ་བ་དང་། སྐྱིད་བུན་བུན་པ་དང་། མཆི་མ་ཤམ་པ་སོགས་བྱེད། །རྟགས་ནི། བྱ་དང་། བདུད་ནག་དང་། མི་རིང་དམར་པོ་དང་། སྤྲེའུ་དང་། ཐེའུ་རང་བརྡུང་བ་དང་། བཅིག་པ་དང་། མནན་པ་དང་། ཁ་བསྡོམས་པ་དང་། བསད་པ་སོགས་རྨི་ལྟས་འབྱུང་། དེ་ལྟར་ཁུག་རྟགས་བྱུང་ནས་སེང་ལྡེང་དང་། སྐྱེར་པ། ཤུག་པ་གསུམ་ལ་ཕུར་པ་སོར་བཞི་པ་བྱས་ལ། ཧཱུྃ༔ སྤྲུལ་པའི་ཁྲོ་བོ་ཆེན་པོ་ནི། །ཧཱུྃ་ཀཱ་ར་དང་བདུད་རྩི་འཁྱིལ། །སྟོབས་པོ་ཆེ་དང་ཁྲོ་བོ་གསུམ། །སྐུ་མདོག་ཞལ་གཅིག་ཕྱག་གཉིས་པ། །སྐུ་སྨད་ཕུར་པའི་དབལ་དང་ལྡན། །ཕྱག་གཉིས་རི་རབ་ཕུར་པ་འཛིན། །དམ་སྲིའི་སྙིང་ལ་ཀཱི་ལ་ཡ། །སྲོག་དང་དབུགས་ལ་ཀཱི་ལ་ཡ། །མིག་དང་སྣ་ལ་ཀཱི་ལ་ཡ། །སྣ་དང་ལྕེ་ལ་ཀཱི་ལ་ཡ། །ལུས་དང་ངག་ལ་ཀཱི་ལ་ཡ། །ཡིད་དང་གཟུགས་ལ་ཀཱི་ལ་ཡ། །མིང་དང་རུས་ལ་ཀཱི་ལཱ་ཡ། །རྣམ་ཤེས་སྲོག་
དབུགས་འཆི་ཁའི་མར་མེ་བཞིན། །ཞག་དང་ཟ་མ་དུས་ཚོད་མ་བཞག་པར། །ད་ལྟ་ཉིད་དུ་ཚེ་སྲོག་ལ་ཀཱི་ལ་ཡ། །མཱ་ར་ཡ་ཕཊ༔ སེང་ལྡེང་ཤུག་པའི་ཕུར་བུ་སྟོབས་པོ་ཆེའི་སྔགས་ཀྱིས་སྙིང་ཁར་བཏབ། ཧཱུྃ་ཀཱ་རི་སྔགས་ཀྱིས་སྤྱི་བོར་བཏབ། སྐྱེར་ཕུར་བདུད་རྩི་འཁྱིལ་བའི་སྔགས་ཀྱིས་མགྲིན་པར་བཏབ། ཤུག་པའི་ཕུར་བུ་སྟོབས་པོ་ཆེའི་སྔགས་ཀྱིས་འཕོངས་སུ་བཏབ། དེ་ལྟར་མནན་པར་བྱ་བ་ནི། ཁྲི་ལམ་གཞི་མདོའམ། མལ་འོག་གམ། མཆོད་རྟེན་ནམ། དེར་དོང་གྲུ་གསུམ་ཁྲུ་གང་བ་གཅིག་བྱས། དང་པོ་དཀར་གཏོར་སོགས་གསེར་སྐྱེམས་འབྲུ་སྣ་འབུལ། ༧ དེ་ནས་ཕུར་པ་ལ་གཏུག་གཏུག་བདུན་བྱས་ལ། ཧཱུྃ། ང་ནི་དབང་དྲག་ཐོད་ཕྲེང་རྩལ། །སྲིད་གསུམ་ཕྱུང་བྱེད་ཕུར་པ་ཕྱག་ན་བསྣམས། །ས་ལ་བརྒྱབས་པས་རིམ་པ་བདུན་དུ་གས། །དེ་འོག་ཐོད་པ་ལྕགས་ཀྱི་གྲོང་ཁྱེར་ནས། །འཆི་བདག་ལས་ཀྱི་གཤིན་རྗེའི་ཞལ་གདངས་གྱུར། །གནམ་ས་ཙམ་གྱི་ཞལ་གདངས་བར་དུ་ཡང་། །དམ་སྲི་བདུད་པོ་བསྙབ་པ་ལག་རིང་རྫོ་ང་། །དམ་ཉམས་བཙན་འཁོར་ཡམ་ཤུད་དམར་པོ་རྫོང་། །སྒབ་འདྲེ་རྗེས་ཁྱི་ཐེའུ་རང་སྟོང་འཁྲུགས་རྫོང་། །འཁོར་བ་མ་སྟོང་བར་དུ་མ་ཤོར་ཅིག །ཤོར་ན་དབང་དྲག་བཀའ་ཡིས་སྡིག་པར་གྱུར། །དེ་ཕྱིར་དམ་ལ་མ་འདའ་
ཕྲིན་ལས་མཛོད། །ཅེས་ལིངྒ་མགོ་རྟིང་བསྣོལ་མར་མནན། བཀུག་གཞུག་ལན་གསུམ། མནན་སྔགས་བརྒྱ་རྩ་བཟླས་ནས་མནན་ནོ། །དེ་སྟེང་འབྱུང་བཞི་མནན་པ་སྤྱི་དང་མཚུངས། དེ་སྟེང་རོ་གཡམ་རྡོ་རྗེ་རྒྱ་གྲམ་བྲིས། ཕྱི་རོ་སོལ་གྱིས་རི་རབ་གླིང་བཞི་བྲིས་པས་ཁ་བཅད། བུ་ཤ་ཨ་ན་ཀ་དུ་ནན། ཨ་དུ་པ་ཎ་ནི་ནན། པུ་ཤ་ཨ་ཀ་ནན། དུ་ན་ཨ་ཀ་ནན། དུམ་ན་པ་ཏྲི་ནན། དམ་སྲི་སྤུན་གསུམ་ནྟཾ་བྷ་ཡ་ནན། སྒྲུབ་པའི་བར་ཆད་མ་བྱེད་ཅིག །མནན་པ་ཡིན་པས་ལོ་བརྒྱའི་བར་དུ་མ་བཏང་ཞིག །ཇི་སྲིད་ཐུབ་པའི་བསྟན་པ་མ་རྫོགས་བར་མ་ལངས་ཤིག །རྒྱལ་བ་བྱམས་པའི་བསྟན་པ་ལ། ལངས་ནས་ཆོས་ཉན་པར་གྱུར་ཅིག །ཅེས་བྲོ་བརྡུང་རྡོ་རྗེ་སློབ་དཔོན་གྱིས་དྲིལ་བུ་བསྣམས་ནས། རྐང་པ་རྡོ་རྗེའི་འགྲོས་སྟབས་དང་བཅས་པས། ཧཱུྃ། དམ་སྲི་ལོག་འདྲེན་བྱ་བ་ནི། །མནན་པས་མི་ཆོག་རྒྱ་ཡང་འདེབས། །ཕྱག་རྒྱ་དགུ་ཡིས་རྒྱ་ཡང་འདེབས། །ཕུང་ཁམས་མནན་གཟིར་བཅིངས་པར་གྱུར། །ཧཱུྃ། ཡེ་ཤེས་ལྔ་ཡི་བྲོ་འཁྲབས་པས། །དུག་ལྔ་ཐལ་བར་བརླག་པར་གྱུར། །སྐུ་གསུང་ཐུགས་ཀྱི་བྲོ་འཁྲིབས་པས། །དུག་གསུམ་ཐལ་བར་བརླག་པར་གྱུར། །དམ་སྲི་གདུག་པ་ལས་ངན་འདི། །
ཕུང་ཁམས་པདྨ་འབྱུང་གནས་བྲོ། །ལས་ཉོན་ཀུན་རྟོགས་ཞི་གྱུར་ཅིག །གནས་ལྔར་ཁྲོ་བོ་ལྔ་ཡི་བྲོ། །ཉོན་མོངས་གཏན་ནས་བརླག་གྱུར་ཅིག །བྲོ་ཡང་རྒྱལ་བ་རིགས་ལྔའི་བྲོ། །གླུ་ཡང་སྣང་སྲིད་ཟིལ་གནོན་གླུ། །རྒྱ་ཡང་འབྱུང་བ་བཞི་ཡི་རྒྱུ། །སྲིད་གསུམ་མ་རྫོགས་བར་དུ་མ་ལང་ཞིག །ཨ་ལཾ་ཧཱུྃ་ལཾ་སུཾ་བྷ་ཡ་ནན། །ཞེས་ཚེར་མ་དང་རེ་དར་༈ བཙུགས། ནང་དུ་ལོགས་ནས་ཚེར་ནག་གིས་ཕྱི་ནང་བྲབ། ཁྲོ་བཅུའི་སྔགས་ཀྱིས་མཚམས་བཅད། ཅེས་པ་སྤྱི་མནན་རྫོགས་སོ།། ༈ སྒོས་མནན་ནི། བསྙབ་པ་ལག་རིང་རབས་ཆད་ལ་སོགས་གཅན་གཟན་གང་རུང་གི་ཐོད་པའི་ནང་དུ་གོང་བཞིན་བསྡུ་བའི་གཟུགས་སོགས་རྨི་ལམ་གང་བྱུང་གི་གཟུགས་བྱེད་ལ། སྙིང་ཁར་ལིངྒ་དང་སྔགས་བཅུག་གོ །མཆོད་རྟེན་ནམ་ལྷ་ཁང་ཐེམ་པའི་འོག་ཏུ་མནན་ནོ།། ༧ ཡམ་ཤུད་དམར་པོ་རྟ་དང་བོང་བུ་དེ་གཟུགས་བྱས། །ལིངྒ་མིང་དང་བཅས་པ་རྟ་ཐོད་བོང་བུའི་ཐོད་པར་བཅུག་ལ་སྐྱེད་འོག་ཏུ་མནན་ནོ།། ༧ ཐེའུ་རང་སྟོང་འཁྲུགས་ནི་ཚིགས་མ་དང་བག་ཕྱེ་ལ་སྤྲེའུའི་གཟུགས་བྱས་སྙིང་ཀར་མིང་རུས་བཅུག་ལ་ཁྱིའམ། ཡང་ན་བྱི་ལི་ཐོད་པར་བཅུག་ལ་རོ་རྡུལ་རྙིང་པའམ། སྣ་ལྔ་འཕང་དུ་མནན། སྤྱི་དང་བྱེ་བྲག་གང་བྱེད་ཀྱང་རུང་། གཟུགས་དང་ཐོད་པ་གང་ཡིན་དེ་རེ་བས་གཏུམ། ཚོན་སྐུད་སྣ་ལྔས་རྒྱ་གྲམ་བྱས་ལ་བཅིངས། གཟིར་མནན་བྲོ་བརྡུང་འདོན་བྱ་གོང་དང་འདྲའོ། སྤྱི་སྒོས་
གཉིས་ཀ་དགུ་སྟོང་དག་ལ་མནན། མཚམས་བཅད་ཁྲོ་བཅུའི་བསྲུང་བ་གོང་དང་འདྲའོ། །དམ་ཅན་རྡོ་རྗེ་ལེགས་པའི་སྒབ་འདྲེ་དམ་སྲི་མནན་པའི་སྤེལ་ཆོག་ཨ་རཱ་གས་སྨྲས་པས་འགྲོ་ཀུན་བདེ་ལེགས་སུ་གྱུར་ཅིག །མངྒ་ལཾ།། །། ༈ དབུས་མི་སྙིང་ཁར་སྔགས་ནི་ཏྲ་ཛའི་མཐར་གནོད་བྱེད་བསྙབ་པ་ལག་རིང་རུ་ཏུ་རུ་ཏྲི་ཧུར་ཐུ་ཛཏྲི་མཱ་ར་ཡ་ཛཿ ནྟཾ་བྷ་ཡ་ནན། ༧ རྟ་མགོའི་སྙིང་ཁར་ཏྲི་ཛའི་མཐར། གནོད་བྱེད་བཙན་ཡམ་ཤུད་དམར་པོ་རུ་ཏཱི་རུ་ཏྲི་ཧུར་ཐུ་ཏྲི་མཱ་ར་ཡ་ཛ། སྟམྦྷ་ཡ་ནན། ༧ སྤྲེའུའི་སྙིང་ཁར་ཏྲི་ཛ་མཐར་གནོད་བྱེད་ཐེའུ་རང་སྟོང་འཁྲུགས་རུ་ཏྲི་ཧུར་ཐུ་ཛཿ ཏྲི་མཱ་ར་ཡ་ཛཿ བདུད་བཙན་ཐེའུ་རང་སྟོང་འཁྲུག་སྟམྦྷ་ཡ་ནན་ཆིངས་ཤིག་སྭཱ་ཧཱ། ཡི་དམ་རྩ་སྔགས་ཤམ་བུ་ལ་བཏགས་བཟླས་ཟེར་བ་འདྲ་མན། ༧ ཡང་སོ་སོར་མནན་པ་ལ་རྨི་ལམ་གང་བྱུང་གཟུགས་ཀྱི་སྙིང་ཁར། ཏྲི་ཛའི་མཐར། གནོད་བྱེད་སྲོག་བདག་བདུད་མོ་ལྟེ་ཕུར་རུ་ཏྲི་ཧུར་ཐུ་ཛཿ མཱ་ར་ཡ་རཾ་སྟམྦྷ་ཡ་ནཾ། ཕག་ཤུ་མུ་ཏ་ཧཱུྃ་ཛཿཛཿ ཤོ་ན་དམ་སྲི་ཛཿ བྷ་ར་མི་ཏྲི་ཁོས་ཅེས་བྲིས། དེ་བས་ཛ་ནས་ཁྲི་གསུམ་བྲིས་ལ་གཞུང་ལྟར་མནན། གསུམ་ཀ་སྔགས་བྲི་རྒྱུ་དེ་འདྲ་མན། ཡི་དམ་སྔགས་ཤམ་ལའང་ཞག་གསུམ་བཏགས་ལ་བཟླས་ཟེར་བ་འདུག་གོ། མངྒ་ལཾ། །༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།