དམ་ཅན་རྡོ་རྗེ་ལེགས་པའི་སྲོག་སྒྲུབ་སྲུང་བའི་འཁོར་ལོ།
དམ་ཅན་རྡོ་རྗེ་ལེགས་པའི་སྲོག་སྒྲུབ་སྲུང་བའི་འཁོར་ལོ་བཞུགས་སོ། །
ན་མོ་བཛྲ་སཱ་དྷ་ཡེ། དང་པོ་ཡི་དམ་སྔོན་དུ་སོང་ནས། རང་ཉིད་དཔལ་རྟ་མགྲིན་ནག་པོ་ཞལ་གཅིག་ཕྱག་གཉིས་ཕྱག་གཡས་ན་རལ་གྲི་གཡོན་ལྕགས་ཀྱུ་འཛིན་པར་དམིགས་ལ། ཨོཾ་སྭ་བྷ་ཝ་སོགས། སྟོང་པའི་ངང་ལས་ཧཱུྃནག་ཡོངས་གྱུར་ལས། །རང་ཉིད་སྐད་ཅིག་ཁྲོ་བོ་རྟ་མགྲིན་ནི། །སྐུ་མདོག་ནག་པོ་ཞལ་གཅིག་ཕྱག་གཉིས་པ། །ཕྱག་གཡས་རལ་གྲི་མེ་རི་འབར་བ་བསྣམས། །གཡོན་པས་ལྕགས་ཀྱུ་དར་ནག་སྐུ་ལ་གསོལ། །སྟག་ལྤགས་ལ་སོགས་དུར་ཁྲོད་ཆས་བརྒྱད་གསོལ། །ཞབས་གཡས་བསྐུམ་ཞིང་གཡོན་བརྐྱང་ཚུལ། །དྲེགས་པའི་གདན་སྟེང་རྒྱན་རྫོགས་གསལ་བར་གྱུར། །
གནས་གསུམ་འབྲུ་གསུམ་ཐུགས་ཀའི་ཧཱུྃནག་ལས། །འོད་འཕྲོས་རང་བཞིན་གནས་ནས་སྤྱན་དྲངས་གྱུར། །ཛཿཧཱུྃ་བཾ་ཧོ་གཉིས་སུ་མེད་པར་གྱུར། །རྩ་སྔགས་བཟླ། རང་གི་མདུན་དུ་འཁོར་ལོ་རྩིབས་བརྒྱད་པ། །དེའི་ཕྱི་རིམ་རྩིབས་བཞི་པ། དེའི་ཕྱི་རོལ་རྡོ་རྗེའི་ར་བ། ནང་གི་འཁོར་ལོའི་དབུས་སུ། ར་སྐྱེས་གདན་གྱི་སྟེང་དུ་སྐྱེས་བུ་ཆེན་པོ། སྐུ་མདོག་ནག་པོ་ཞལ་གཅིག་ཕྱག་གཉིས། གཡས་ཀྱི་ཐོ་བ་གཡོན་ན་སྤུད་པ་བསྣམས་པ། རྩིབས་བརྒྱད་རང་འདྲ་བརྒྱད་བསྐྱེད། རང་མདུན་བྷཾ་ཡིག་ཡོངས་སུ་གྱུར་པ་ལས། །གསེར་གྱི་འཁོར་ལོ་རྩིབ་བརྒྱད་པ། །དེ་དབུས་པདྨ་ཉི་མ་དང་། །ར་སྐྱེས་སྟེང་དུ་ཏྲིཿནག་ལས། །
དམ་ཅན་སྐྱེས་བུ་ཆེན་པོ་ནི། །སྐུ་མདོག་མཐིང་ནག་ཆར་སྤྲིན་མདོག །ཕྱག་གཡས་ཐོ་བ་གཡོན་སྦུད་པ། །ཞལ་གདངས་ལྗགས་དྲིལ་མཆེ་བ་གཙིགས། །ཞལ་ནས་རྒྱོབ་སོད་སྒྲ་སྒྲོག་ཅིང་། །སྐུ་ལ་དར་ནག་བེར་ཆེན་གསོལ། །སྟག་རལ་གཡས་ལ་གཟིག་ཤུབས་གཡོན། །རིན་ཆེན་རྒྱན་སྤྲས་ཁྲོ་ཆས་རྫོགས། །རྩིབ་བརྒྱད་ཏྲི་ལས་རང་འདྲ་བརྒྱད། །ཡེ་ཤེས་མེ་དཔུང་དབུས་ན་བཞུགས། །གཙོ་འཁོར་ཀུན་གྱི་ཐུགས་ཀར་ཧྲཱིཿ །དཔལ་ཆེན་ཡི་དམ་ཐུགས་ཀར་ཧཱུྃ། །དེ་ལས་འོད་ཟེར་འཕྲོས་པ་ཡིས། །འོག་མིན་གནས་དང་མ་ལ་ཡ། །ཕ་ཝང་ལོང་བུ་འོ་ཡུག་ཤང་། །གཙུག་ལག་ཆོས་འཁོར་གར་གནས་ཀྱང་། །འཁོར་བཅས་སྤྱན་དྲངས་འདིར་བྱོན་ནོ། །ཛཧཱུྃ་བཾ་ཧོ༔ སྙིང་པོ་རྩ་སྔགས་བཟླ༔ དེའི་ཕྱི་རོལ་རྩིབས་བཞིའི་ནང་རང་གི་མི་ནོར་བསྲུང་བྱ་སོགས། གནོད་བྱེད་གང་གིས་འཚེ་མི་ནུས་པར་བསམ། དེ་ཕྱིར་རྩིབས་བཞིའི་ནང་བར་དུ། །རང་དང་བསྲུང་བྱ་མི་ནོར་དང་། །བསྲུང་དགོས་མི་ནོར་ཐམས་ཅད་ཀྱང་། །གནོད་བྱེད་ལོག་འདྲེན་ཀུན་གྱིས་ཀྱང་། །སུས་ཀྱང་འཚེ་བར་མ་གྱུར་ཅིག །ཨོཾ་བཛྲ་སཱ་དྷུ་རཀྵ༔ ཀཱ་ཝཱ་ཙི་རཀྟ༔ ཨོཾ་བཛྲ་ཙཀྲ་རཀྵ༔ ཞེས་
བཟླ། དེ་ཕྱིར་རྡོ་རྗེའི་རྭ་གུར་དང་བླ་བྲེ་བསམཾ། དེའི་ཕྱི་རོལ་མཚོན་ཆའི་འཁོར་ལོ་རྩེ་མོ་ཕྱིར་བསྟན་པ། མཚོན་ཆའི་རྩེ་ལ་གནོད་བྱེད་དུ་མ་བཏུབ། གཙོ་འཁོར་ཀུན་གྱིས་ཧབ་ཐོབ་གསོལ་བར་དམིགས། ཕྱི་རོལ་རྩིབས་རྩེར་མཚོན་ཆའི་འཁོར་ལོར་གྱུར། །རྩ་གསུམ་ཡི་དམ་མཁའ་འགྲོ་ཆོས་སྐྱོང་ཚོགས། །དཔལ་ཆེན་རྟ་མགྲིན་ནག་པོའི་བདེན་སྟོབས་ཀྱིས། །གནོད་པར་བྱེད་པའི་སྒབ་འདྲེ་སྒབ་སྲི་དང་། །སངས་རྒྱས་བསྟན་དགྲ་བླ་མའི་སྐུ་དགྲ་དང་། །ཁྱད་པར་སྔགས་འཆང་རྣལ་འབྱོར་གྱིས། །ཡིད་ལ་མནག་པའི་མི་མཐུན་ཕྱོགས་རིས་ཅན། །འཁོར་ལོའི་རྩེ་མོ་མཚོན་ཆའི་རྩེ་མོ་ལ། །ཁུག་ཅིག་བཛྲ་ཨཾ་ཀུ་ཤ་ཡ་ཛ། །སྐེ་ནས་ཆིངས་ཤིག་བཛྲ་པཱ་ཤ་ཧཱུྃ། །ཡན་ལག་སྡོམས་ཤིག་བཛྲ་སྤོ་ཊ་པཾ། །མྱོས་པར་གྱིས་ཤིག་བཛྲ་གྷཎེ་ཧོ། །དབྱེར་མེད་སྙིམས་ཤིག་ཨ་ཝེ་ཤ་ཡ་ཕཊ། །ལྷ་དང་ཕྱེས་ཤིག་བཛྲ་ཧཱུྃ་ཧཱུྃ་ཕྱེ། །མྱུར་བར་སྒོལ་ཤིག་བཛྲ་མཱ་ར་ཡ་ཕཊ༔ ཨོ་རྒྱ་གྷི་ཝ་བཛྲ་སཱ་དྷུ་གནོད་བྱེད་དགྲ་བགེགས་སྲོག་ལ་རྦད། ཙིཏྟ་ལ་རྦད་དབུགས་ལ་རྦད། ཤ་རུས་ཁྲག་ལ་རྦད། ཨོཾ་བཛྲ་སཱ་དྷུ་ས་མ་ཡ་ཝག་ཏུཾ་ཏུཾ་ཏྲི་ཛཿ གནོད་བྱེད་དགྲ་བོའི་མ་ཧཱ་ནཱཾ་ས་ལ་ཁཱ་ཧི། མ་ཧཱ་རཀྟ་ཁཱ་ཧི། །
མ་ཧཱ་ཙིཏྟ་ཁཱ་ཧི། བ་སུ་ཏ་ཁཱ་ཧི། བ་ལིཾ་ཏ་ཁཱ་ཧི། དེ་ནས་བ་ལི་ཤ་ཁྲག་གིས་བརྒྱན་ལ་ཐུན་ཕུལ། ཧཱུྃ། ཉི་མ་ནུབ་ཕྱོགས་ཕ་ཀི་ན། །ལྕགས་རི་ནག་པོའི་ནང་རོལ་ན། །ཕ་ཝང་ལོང་བུའི་སྐུ་མཁར་ནས། །འཇའ་ཚོན་སྣ་ལྔའི་འོད་ཟེར་འཕྲོ། །།སྟེང་ན་དུག་གི་སྤྲིན་འཁྲིགས་ཤིང་། །ཕྱི་རོལ་ཁྲག་གི་རྒྱ་མཚོ་ཁོལ། །ཞེ་སྡང་གདུག་པའི་རླུང་ནག་འཚུབ། །འབྱུང་བ་ཚ་གྲང་འཐབ་པའི་སྒྲ། །གནམ་ལྕགས་ཐོག་གི་བུ་ཡུག་འཚུབ། །དེ་ལྟ་བུ་ཡི་སྐུ་མཁར་ནས། །ཆོས་སྐྱོང་རྒྱལ་པོ་བཞུགས་པ་སྟེ། །སྐྱེས་བུ་བཛྲ་སཱ་དྷུ་སྟེ། །རྒྱལ་བ་ཀུན་གྱི་བསྟན་བསྲུང་ཞིང་། །དཀྱིལ་འཁོར་ཀུན་གྱི་ཤུལ་མ་སྟེ། །རྣལ་འབྱོར་ཀུན་གྱི་ཆོས་སྐྱོང་ཁྱོད། །འདིར་བྱོན་དམ་བསྐང་ཕྲིན་ལས་མཛོད། ། ཧཱུྃ། ནུབ་ཕྱོགས་ཕ་ཝང་ལོང་བུ་ནས། །དམ་ཅན་རྡོ་རྗེ་ལེགས་པ་སྐྱོངས། །རྫུ་འཕྲུལ་མྱུར་མགྱོགས་ར་ལ་ཞོན། །འཁོར་དུ་རང་འདྲ་བརྒྱད་ཀྱིས་བསྐོར། །བརྒྱན་པའི་གཏོར་མ་འདི་བཞེས་ལ། །སངས་རྒྱས་བསྟན་པའི་སྤྱི་དགྲ་དང་། །ཁྱད་པར་ཀརྨ་ཀཾ་ཚང་གི །བསྟན་པ་བསྟན་འཛིན་བརྒྱུད་པར་བཅས། །འཁོར་དང་བཅས་པ་ཐམས་ཅད་ལ། །གནོད་ཅིང་
འཚེ་བར་བྱེད་པ་ཡི། །སྡང་བའི་དགྲ་དང་གནོད་པའི་བགེགས། །གཏོར་མ་འདི་དང་མཉམ་དུ་བཞེས། །དགྲ་བོ་འཁོར་དང་བཅས་པ་ཡང་། །རྗེས་ཤུལ་་ཙམ་ཡང་མེད་པར་མཛོད། །བཅོལ་བའི་ལས་འདི་མ་གཡེལ་ཞིག །དུས་ལ་བབ་བོ་ས་མ་ཡཱ། །ཞེས་རྦད་སྔགས་བཟླ། གཏོར་མ་གཙང་སར་ཕུལ། ཟློག་པ་བྱའོ། །ཞེས་རྒྱལ་བའི་དབང་པོ་བཛྲ་ཨི་ཤྭ་རེས་མཛད་པ་ལྟར་ཨ་རཱ་གས་ཉུང་བསྡུས་སུ་སྦྱར་བའོ། །མངྒ་ལཾ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།