དཔལ་ལྡན་དུར་ཁྲོད་བདག་པོ་ཡབ་ཡུམ་གྱི་མཆོད་ཕྲེང་།
དཔལ་ལྡན་དུར་ཁྲོད་བདག་པོ་ཡབ་ཡུམ་གྱི་མཆོད་ཕྲེང་བཞུགས་པའི་དབུ་ཕྱོགས་ལགས་སོ།།
ན་མོ་ཤྲཱི་ཙཀྲ་སམ་བྷ་ར་ཡེ། བླ་མ་དང་འཁོར་ལོ་སྡོམ་པའི་ཞབས་ལ་ཕྱག་འཚལ་ལོ། །འདིར་གང་གིས་དཔལ་ལྡན་དུར་ཁྲོད་ཀྱི་བདག་པོ་མཆོད་པར་འདོད་པས། དེ་ཉིད་ཀྱི་དབང་ཐོབ་ཅིང་ཡི་དམ་གྱི་བསྙེན་པ་ཐེམ་པ་དམ་ཚིག་དང་ལྡན་པའི་རྣལ་འབྱོར་པས་བྷནྡྷ་ལ་སོགས་པའི་སྣོད་དུ་ཡབ་ཡུམ་གྱི་གཏོར་མ་ལུག་དང་རི་བོང་གཡག་རྒོད་ཀྱི་ཤས་བརྒྱན་ཅིང་། ཆངས་བུ་བདུན་གྱིས་བསྐོར་བ་དང་དར་དཀར་པོའི་ཕོད་དང་བཅས་པ་བཤམས། ནང་མཆོད་ཀྱིས་བྲན། རང་ཉིད་བདེ་མཆོག་ལ་སོགས་པ་ཡི་དམ་གྱི་བདག་བསྐྱེད་ལེགས་པར་བྱས་ལ། མདུན་གྱི་རྟེན་ལ་དམིགས་ནས། ཨོཾ་སྭ་བྷཱ་ཝས་སྦྱངས། སྟོང་པའི་ངང་ལས་མདུན་གྱི་ནམ་མཁར་ཧཱུྃ་ལས་ཨེ་ཆད་པ་ལས་ཆོས་ཀྱི་འབྱུང་
གནས་དེའི་དབུས་སུ་ཡཾ་ལས་རླུང་གི་དལ། ར་ལས་རཀྟའི་རྒྱ་མཚོ། སུཾ་ལས་ཞིང་ཆེན་གྱི་ས་གཞི། ཀེང་ལས་ཀེང་རུས་ཀྱི་རི་རབ། རཾ་ལས་ཉི་མའི་དཀྱིལ་འཁོར། དེའི་སྟེང་དུ་ཧཱུྃ་ལས་ཐོད་མཁར་གྱི་གཞལ་ཡས་ཁང་། མི་མགོ་སྐམ་པོ་ལས་གྲུབ་པའི་ར་བ་གྲུ་བཞི་པ། མི་རུས་ཀྱི་རྐང་དང་རྩིབ་རུས་སྣ་ཚོགས་ཀྱི་སྟེང་ཐོག་ཕུབ་པ། ཐོད་སྐམ་གྱི་མདའ་ཡབ་དང་སྤུ་ཤུས་བརྒྱན་པ། རྒྱུ་རློན་གྱི་དྲྭ་བ་དང་དྲ་ཕྱེད་འཕྱང་བ། འོག་ཏུ་ཤ་ཁྲག་སྣ་ཚོགས་གཅལ་དུ་བཀྲམ་པ། དེའི་དབུས་སུ་པཾ་ལས་པདྨ་དང་རཾ་ལས་ཉི་མ། ཨ་ལས་ཟླ་བའི་དལ་གྱི་སྟེང་
དུ། ཧཱུྃ་དང་ཨོཾ་ལས་དུང་དང་མགྲོན་བུ་ཧཱུྃ་དང་ཨོཾ་གིས་མཚན་པ་ལས་འོད་ཟེར་འཕྲོས། ཚུར་འདུས་ཡོངས་སུ་གྱུར་པ་ལས་དཔལ་ལྡན་དུར་ཁྲོད་བདག་པོ་ཡབ་ཡུམ་གཉིས་སྐུ་མདོག་དཀར་ཞིང་འོད་ཟེར་འཕྲོ་བ་ཀེང་རུས་ཤིན་ཏུ་བརྗིད་པའི་གཟུགས་ཅན། ཞལ་གཅིག་ཕྱག་གཉིས་པ། སྤྱན་བསྒྲད་པ། ཞལ་གདངས་ཤིང་ལྗགས་འདྲིལ་བ། མཆེ་བ་གཙིགས་པ། ཕྱག་གཡས་ཐོད་སྐམ་གྱི་དབྱུག་པ་ནམ་མཁར་ཕྱར་ཞིང་གཡོན་པས་ཐོད་པ་ཁྲག་གིས་བཀང་བ་ཞལ་དུ་གསོལ་བ། རིན་པོ་ཆེའི་དབུ་རྒྱན་དང་སྙན་ཆས་བརྒྱན་པ། དར་སྣ་ཚོགས་ཀྱི་ཤམ་ཐབས་ཅན། ཞབས་གཡས་བསྐུམས་པའི་སོར་མོ་གཡོན་པའི་བླ་ལ་བརྟེན་ནས་སྐྱིལ་ཀྲུང་ཕྱེད་པའི་གར་གྱིས་ཡེ་ཤེས་ཀྱི་མེ་འབར་བའི་དབུས་ན་བཞུགས་པའོ། །ཡབ་ཡུམ་དེ་གཉིས་ཀྱི་འཁོར་འཇིག་རྟེན་དང་འཇིག་རྟེན་ལས་འདས་པའི་ཁྲོ་མོ་དཔག་ཏུ་མེད་པས་བསྐོར་བར་གྱུར། དེ་གཉིས་ཀྱི་དཔྲལ་བར་ཨོ་མགྲིན་པར་ཨཱཿཐུགས་ཀར་ཧཱུྃ་ལས་འོད་ཟེར་འཕྲོས་པས་རང་བཞིན་གྱི་གནས་དང་ཨོ་རྒྱན་མཁའ་འགྲོའི་ཕོ་བྲང་ནས་དཔལ་ལྡན་དུར་ཁྲོད་བདག་པོ་ཡབ་ཡུམ་འཁོར་རྡོ་རྗེ་ངན་ནེ་མ་ལ་སོགས་པ་འཇིག་རྟེན་དང་
འཇིག་རྟེན་འདས་པའི་མཁའ་འགྲོ་མ་དཔག་ཏུ་མེད་པ་འཁོར་དང་བཅས་པས་བསྐོར་བ་བཛྲ་ས་མཱ་ཛཿ དེ་ནས་ཏིང་ངེ་འཛིན་གསལ་ཞིང་སྤོས་དཀར་རོལ་མོ་དང་བཅས་པས་སྤྱན་དྲངས་པའོ། །ཧཱུྃ། དཔལ་ལྡན་མཐུ་སྟོབས་དབང་ཕྱུག་ཆེ། །ཕྲིན་ལས་རྣམ་བཞིའི་དོན་མཛད་པ། །དད་ལྡན་དམ་ཚིག་ཆེན་པོའི་གནས། །འདི་ཉིད་དུ་ནི་གཤེགས་སུ་གསོལ། །ང་ཁྲོད་ཆེན་པོའི་གནས་མཆོག་ནས། །ཆོས་སྐྱོང་ཡབ་ཡུམ་གཤེགས་སུ་གསོལ། །ཀེང་རུས་ཐོད་པའི་གུར་ཁང་ནས། །ཆོས་སྐྱོང་ཡབ་ཡུམ་གཤེགས་སུ་གསོལ། །རཀྟའི་རྦ་ཀློང་ད་ལ་ནས། །ཆོས་སྐྱོང་ཡབ་ཡུམ་གཤེགས་སུ་གསོལ། །མི་རོ་བསྣོལ་བའི་གདན་སྟེང་ནས། །ཆོས་སྐྱོང་ཡབ་ཡུམ་གཤེགས་སུ་གསོལ། །དཔལ་ལྡན་དུར་ཁྲོད་བདག་པོ་ནི། །གནས་འདིར་སྤྱན་འདྲེན་གཤེགས་སུ་གསོལ། །སངས་རྒྱས་བསྟན་པ་བསྲུང་བའི་ཕྱིར། །དུར་ཁྲོད་བདག་པོ་ངེ་ནེ་མ། །བཀའ་ཡི་ལས་མཁན་གཤེགས་སུ་གསོལ། །ཧེ་རུ་ཀ་ཡི་སྤྱན་སྔ་རུ། །ཇི་ལྟར་ཁས་བླངས་དམ་བཅས་པའི། །དམ་ཚིག་ཚུལ་བཞིན་དྲན་མཛོད་ལ། །གནས་འདིར་སྤྱན་འདྲེན་གཤེགས་སུ་གསོལ། །འཁོར་ནི་དུར་ཁྲོད་ཤ་
ཟའི་ཚོགས། །སྤྲུལ་པ་ཡང་སྤྲུལ་ཕོ་ཉ་དང་། །འཁོར་བཅས་མ་ལུས་གཤེགས་སུ་གསོལ། །བྲི་ཤ་མ་ཤ་ན་ཨ་དྷི་པ་ཏ་ཡེ་ཨེ་ཧྱ་ཧི་ས་མཱ་ཡ་ཛ། ཛཿཧཱུྃ་བཾ་ཧོཿ བཞུགས་གསོལ་གདན་བཞུགས་ནི། ཧཱུྃ། དུར་ཁྲོད་ཆེན་པོའི་གནས་མཆོག་འདིར། །ཀེང་རུས་ཐོད་པའི་གུར་ཁང་དུ། །རཀྟའི་རྦ་ཀློང་ད་ལ་ནས། །མི་རོ་བསྣོལ་བའི་གདན་སྟེང་དུ། །དུར་ཁྲོད་བདག་པོ་ཡབ་ཡུམ་སྐུ། །དམ་ཚིག་དབང་གིས་བརྟན་པར་བཞུགས། །བྲི་ཤ་མ་ཤ་ན་ཨ་དྷི་པ་ཏ་ཡེ་ས་མ་ཡ་ཧཱུྃ། སླར་ཡང་ཧཱུྃ་གི་འོད་ཟེར་གྱིས། །དབང་ལྷ་རིགས་ལྔ་སྤྱན་དྲངས་ནས། །དབང་བསྐུར་སྐུ་གང་དྲི་མ་དག །ཆུ་ལྷག་སྤྱི་བོར་འཁྱིལ་བ་ལ། །བདེ་མཆོག་ལྷན་སྐྱེས་དབུ་བརྒྱན་གྱུར། །མཆོད་འབུལ་གྱི་རིམ་པ་ནི། ཧཱུྃ། དཔལ་ལྡན་དུར་ཁྲོད་བདག་པོ་ནི། །ཞལ་གཅིག་ཕྱག་གཉིས་སྐུ་མདོག་དཀར། །ཡབ་ཡུམ་འཁོར་དང་བཅས་པ་ལ། །མཆོད་པའི་ཁྱད་པར་འབུལ་བ་ནི། །དམར་ཆེན་ཨགྷོ་རྒྱ་མཚོ་དང་། །དུར་ཁྲོད་ཚིལ་ཆེན་བདུག་སྤོས་དང་། །དྲི་ལྡན་མཛེས་པའི་མེ་ཏོག་དང་། །ཞུ་ཆེན་འབར་བའི་སྣང་གསལ་དང་། །ཁྲག་ཆེན་དྲི་ཡི་མཆོད་པ་དང་། །འབྲུ་མཆོག་འབར་བའི་དཔལ་
བཤོས་དང་། །སྙན་པའི་རོལ་མོ་སྣ་ཚོགས་སྒྲ། །དཔལ་ལྡན་ཡབ་ཡུམ་རྣམས་ལ་འབུལ། །བསྟན་པ་བསྲུང་ཕྱིར་བཞེས་སུ་གསོལ། །ཤི་ཤ་མ་ཤ་ན་ཨ་དྷི་པ་ཏ་ཡེ་ཨནྡྷུ་སོགས་ཀྱིས་མཆོད། ཨོཾ་སྟོང་པ་ཉིད་དུ་གྱུར། ཨཱཐོད་པ་ཡངས་ཤིང་རྒྱ་ཆེ་བ། ཧཱུྃ་དགྲ་བགེགས་ཀྱི་ཤ་ཁྲག་དང་ཤ་ལྔ་བདུད་རྩི་ལྔ། ཧོཟག་པ་མེད་པའི་ཡེ་ཤེས་ཀྱི་བདུད་རྩིའི་རྒྱུ་མཚོ་ཆེན་པོར་གྱུར། ལྗགས་རྡོ་རྗེ་སྦུ་གུས་གཏོར་མ་དྲངས་ཤིང་གསོལ་བར་གྱུར། ཨོཾ་གྷི་རཱ་ཛ་གྷི་རཱཛ་ཀུ་མ་ཀུ་མ་ཁུམ་ཐིས་སྭཱ་ཧཱ། བྲི་ཤ་མ་ཤ་ནཨ་དྷི་པ་ཏ་མ་ཧཱ་པི་ཤ་ཙི་བྷ་ལི་ཏ་ཁ་ཁ་ཁཱ་ཧི་ཁཱ་ཧི། ཨོ་རཱ་ལི་པྲ་མ་ཡ་ཛཿ ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཞེས་གསུམ་མམ་ལྔ་བདུན་འབུལ། ཨོཾ་ཤྲཱི་རཱ་ཛ་སོགས། ཨོཾ་ཨཱཿཧཱུྃ། ནང་མཆོད་འབུལ། དམ་བཞག་ལས་བཅོལ་ལོ། །ཨོཾ་བཛྲ་ས་མ་ཡ་སྟི་ས་མ་ཡ་ཧོཿ དཔལ་ལྡན་དུར་ཁྲོད་བདག་པོ་ཡབ་ཡུམ་འཁོར་དང་བཅས་པས་མཆོད་སྦྱིན་གྱི་གཏོར་མ་འདི་བཞེས་ལ་དཔལ་ལྡན་བླ་མ་དམ་པ་རྣམས་དང་། འཁོར་ལོ་སྡོམ་པའི་བཀའ་དང་དམ་ལས་མ་འདའ་བར་སངས་རྒྱས་ཀྱི་བསྟན་པ་དར་ཞིང་རྒྱས་པ་དང་རྣལ་འབྱོར་པ་བདག་ཅག་དཔོན་སློབ་འཁོར་དང་བཅས་པ་ཚེ་
རིང་ཞིང་ལོངས་སྤྱོད་འཕེལ་བ་དང་། ཁྱད་པར་དུ་བདག་ཅག་ལ་སྡང་བའི་དགྲ་ཇག་ཆོམ་རྐུན་གཅན་གཟན་ཐམས་ཅད་འཆིང་བའི་ཕྲིན་ལས་མཛད་དུ་གསོལ། ཧཱུྃ། དཔལ་ལྡན་དུར་ཁྲོད་བདག་པོ་ནི། །ཞལ་གཅིག་ཕྱག་གཉིས་སྐུ་མདོག་དཀར། །གཡས་ན་ཐོད་དབྱུག་འབར་བ་བསྣམས། །སྡང་བ་དགྲ་ཡི་ཀླད་པ་འགེམ། །ཙིཏྟ་ཕྱུངས་ནས་ཞལ་དུ་གསོལ། །གཡོན་ན་བྷནྡྷ་ཁྲག་བསྐང་བསྣམས། །དགྲ་དང་བགེགས་ཀྱི་སྙིང་ཁྲག་འཐུང་། །ཀེང་རུས་མཆེ་བ་གཙིགས་པ་ཡིས། །དུག་གསུམ་རྩད་ནས་གཅོད་པར་བྱེད། །དབུ་ལ་རིན་ཆེན་སྲོག་ཞུ་གསོལ། །དངོས་གྲུབ་ཀུན་གྱི་གཏེར་དང་ལྡན། །མི་མགོ་ལྔ་བཅུས་དོ་ཤལ་བྱས། །དུས་གསུམ་སངས་རྒྱས་མཆོད་པ་ཡིན། །རིན་ཆེན་སྣ་ཚོགས་རྒྱན་དང་ལྡན། །སྒྲུབ་པ་པོ་ལ་དངོས་གྲུབ་སྟེར། །སྐུ་ལ་འཁྲིལ་བའི་ཡུམ་ཆེན་ནི། །དཔལ་ལྡན་དུར་ཁྲོད་བདག་མོ་སྟེ། །ཨེ་ཀ་པ་ར་མཐུ་མོ་ཆེ། །ཞལ་གཅིག་ཕྱག་གཉིས་སྐུ་མདོག་དཀར། །གཡས་པས་ཐོད་དབྱུག་གཡོན་ཐོད་ཁྲག །ཀེང་རུས་གར་བྱེད་མཆེ་བ་གཙིགས། །བརྐྱང་བསྐུམ་གར་གྱིས་གདུག་པ་འདུལ། །འཇིགས་སུ་རུང་བའི་ཡབ་ཡུམ་
སྐུ། །ཐམས་ཅད་མ་ལུས་སྐྲག་པར་བྱེད། །དགྲ་རྣམས་འཇོམས་ལ་ཕྱག་འཚལ་བསྟོད། །མཐུན་རྐྱེན་བསྒྲུབ་ཅིང་ནག་པོ་ཆེ། །འགལ་རྐྱེན་རྡུལ་དུ་རླག་བྱེད་ཅིང་། །སངས་རྒྱས་བསྟན་པ་སྲུང་བྱེད་ཅིང་། །མི་མཐུན་བཟློག་ལ་ཕྱག་འཚལ་བསྟོད། ། ཧཱུྃ། རྒྱལ་བའི་ཐུགས་རྗེའི་ཕྲིན་ལས་སྐུ། །མ་ལུས་གདུག་པ་འདུལ་བའི་ཕྱིར། །འཇིགས་པའི་སྐུར་སྟོན་འདོད་ཡོན་སྟེར། །དུར་ཁྲོད་གནས་ཀྱི་བདག་པོར་བསྟོད། །རྣམ་དཀར་ཀེང་རུས་དག་པའི་གཟུགས། །ཕྲིན་ལས་རྣམ་བཞི་ཐོག་མེད་པར། །གང་ལ་ཅི་འདོད་དངོས་གྲུབ་ཀུན། །ཉེ་བར་སྩོལ་མཛད་ཁྱོད་ལ་བསྟོད། །ཡང་དག་ལམ་ལ་ཉེར་གནས་ཏེ། །ལུས་ཅན་བདེ་ལ་འགོད་མཛད་ཅིང་། །སྲིད་པའི་འཆིང་བ་ཀུན་ལས་སྐྱོབས། །ཕན་བདེ་ཀུན་སྩོལ་ཁྱོད་ལ་བསྟོད། །གང་གིས་ཁྱོད་མཆོད་ཁྱོད་བསྒྲུབས་ན། །དམ་བཅོས་ཇི་བཞིན་ཉེར་དགོངས་ཏེ། །ཇི་ལྟར་གསོལ་བ་བཏབ་པ་བཞིན། །བདག་ལ་དངོས་གྲུབ་མ་ལུས་སྩོལ། །མཆོད་སྦྱིན་གཏོར་མ་རྒྱ་མཚོ་དང་། །དངོས་གྲུབ་ཀུན་འབྱུང་དམ་རྫས་ཀྱིས། །དཔལ་ལྡན་བསྟན་སྲུང་འཁོར་བཅས་མཆོད། །ཕྲིན་ལས་
གང་བཅོལ་འགྲུབ་པར་མཛོད། ། ཧཱུྃ། མ་མོ་ནག་མོ་མཐུ་རྩལ་ཅན། །མུ་སྟེགས་ལྷ་མོ་རྫུ་འཕྲུལ་བདག །ནོར་སྲང་གཅིག་གི་རྗེས་གཅོད་མ། །ནས་བྲེ་གང་གི་ཕྱི་འབྲང་མ། །དཀོར་བདག་ཆེན་མོ་མཆོད་ཅིང་བསྟོད། །དཔལ་ལྡན་དུར་ཁྲོད་བདག་པོའི་གསོལ་ཁ་ཡིན། ཧཱུྃ། དཔལ་ལྡན་དུར་ཁྲོད་བདག་པོ་ཆེ། །དཔལ་ལྡན་དུར་ཁྲོད་བདག་མོ་དང་། །སྤྲུལ་པ་འབུམ་སྡེར་བཅས་པ་ལ། །མཆོད་པའི་བྱེ་བྲག་འབུལ་བ་ནི། །དུར་ཁྲོད་འབར་བའི་གནས་མཆོག་འདིར། །རཀྟའི་རྦ་ཀློང་འཁྱིལ་བའི་དབུས། །ཀེང་རུས་ཐོད་པའི་གཞལ་ཡས་སུ། །མི་རོ་བསྣོལ་བའི་གདན་བཤམས་པ། །བཞུགས་པའི་གནས་སུ་མཆོད་པ་འབུལ། །གསོལ་ལོ་མཆོད་དོ་དགྱེས་པར་མཛོད། །ཕྱི་རྟེན་ནང་རྟེན་གསང་བའི་རྟེན། །འདོད་དགུ་འབྱུང་བར་བྱིན་གྱིས་རློབས། །ཆགས་པའི་རྟེན་དུ་མཆོད་པ་འབུལ། །གསོལ་ལོ་མཆོད་དོ་དགྱེས་པར་མཛོད། །ཤིན་ཏུ་མཉེས་པའི་དམ་རྫས་དང་། །ཤ་ལྔ་བདུད་རྩི་ཨ་མྲྀ་ཏ། །ཤ་ཁྲག་ཆང་དང་སྣ་ཚོགས་ཟས། །རོ་བཅུད་ལྡན་པའི་བཟའ་བཏུང་ཚོགས། །ཚིམ་པར་བྱེད་པའི་མཆོད་པ་འབུལ། །གསོལ་ལོ་མཆོད་དོ་དགྱེས་
པར་མཛོད། །ཤ་ཁྲག་གཏོར་མ་རི་རབ་ཙམ། །རཀྟའི་རྒྱ་མཚོ་འཁྱིལ་བ་དང་། །དམ་རྫས་ཆེན་པོའི་མཆོད་མཆོག་འདི། །དམ་ཚིག་རྗེ་ས་སུ་མཆོད་པ་འབུལ། །གསོལ་ལོ་མཆོད་དོ་དགྱེས་པར་མཛོད། །རིན་ཆེན་སྣ་ལྔ་འབྲུ་སྨན་དང་། །སྟག་གཟིག་ལ་སོགས་གཅན་གཟན་ཚོགས། །བཞེད་པའི་དཀོར་དུ་མཆོད་པ་འབུལ། །གསོལ་ལོ་མཆོད་དོ་དགྱེས་པར་མཛོད། །དཀར་གསུམ་མངར་གསུམ་གཙང་མའི་ཟས། །ཤ་ཁྲག་རྐང་ཚིལ་དཔའ་བོའི་ཟས། །སྦྱར་སྤོས་སྣ་ཚོགས་ཞིམ་པའི་རོ། །འབྲས་ཆང་རྒུན་ཆང་མྱོས་བྱེད་བཅུད། །ཁུར་བ་ལ་སོགས་ཟས་ཚོགས་རྣམས། །སྤྱན་གཟིགས་རྟེན་དུ་མཆོད་པ་འབུལ། །གསོལ་ལོ་མཆོད་དོ་དགྱེས་པར་མཛོད། །སྔར་བྱས་ལས་ཀྱི་གཏང་རག་དང་། །ཕྱི་བྱེད་ལས་ཀྱི་ཞུ་སྐྱེམས་དང་། །ད་ལྟའི་གཉེར་ཟས་འདི་བཞེས་ལ། །དགྲ་དང་ཇག་པ་ཆོམ་རྐུན་རྣམས། །མྱུར་དུ་ཆིངས་ལ་རྡུལ་དུ་རློགས། །བཅོལ་བའི་ཕྲིན་ལས་འགྲུབ་པར་མཛོད། །དེ་ནས་བསྐང་བ་བྱེད་ན། བསྐང་རྫས་ཕུན་སུམ་ཚོགས་པར་ཡིད་ཀྱིས་དམིགས་ལ། ཧཱུྃ། དཔལ་ལྡན་དུར་ཁྲོད་བདག་པོ་ཁྱོད། །སྔོན་ཚེ་
བཅོམ་ལྡན་སྤྱན་སྔ་རུ། །གདུག་པ་འདུལ་མཛད་བཅོམ་ལྡན་འདས། །ཧེ་རུ་ཀ་དཔལ་བདག་ཉིད་ཆེ། །སྙིགས་མ་ལྔ་པོ་དར་བའི་དུས། །ལུས་ཀྱི་གདུག་པ་ཀུན་འཁྲུགས་ནས། །ས་བདག་ཀླུ་ཡི་ནད་རྣམས་དར། །མ་མོ་མཁའ་འགྲོ་ཀུན་ནས་འཁྲུགས་པའི་ཚེ། །མི་རྣམས་བསོད་ནམས་ལོངས་སྤྱོད་ཆུང་བ་ཡིས། །བསགས་པའི་ནོར་རྣམས་རང་གིས་སྤྱད་དབང་མེད། །ཕ་དང་བུ་འབྲལ་ནོར་དང་ལོངས་སྤྱོད་ཉམས། །དེ་དུས་བཅོམ་ལྡན་བསྟན་པ་ནི། །དཔའ་བོ་བདག་གིས་བསྲུང་བར་བགྱི། །ཞེས་པའི་ཁས་བླངས་དམ་བཅས་ནས། །བཅོམ་ལྡན་འདས་ཀྱིས་བཀའ་སྩལ་པ། །ལེགས་སོ་དུར་ཁྲོད་བདག་པོ་ཁྱོད། །སྲོག་གི་སྙིང་པོ་བདག་ལ་ཕུལ། །ཅེས་གསུངས་དུར་ཁྲོད་བདག་པོ་ཡིས། །སྲོག་གི་སྙིང་པོ་ཕུལ་ནས་ནི། །ཇི་ལྟར་ཁས་བླངས་དམ་བཅས་པ། །དམ་ལས་མ་འདའ་ད་ཚུར་བྱོན། །བསྐང་ངོ་ཁྱོད་ཀྱི་ཐུགས་དམ་བསྐང་། །བཞུགས་པའི་གནས་དང་མཆོད་པའི་རྫས། །ཆགས་པའི་རྟེན་དང་མྱོས་པའི་རྫས། །དམ་ཚིག་རྫ་ས་མཆོག་མྱོས་པའི་དཀོར། །སྣ་ཚོགས་སྤྱན་གཟིགས་མཆོད་པ་འདིས། །དུར་ཁྲོད་བདག་
པོའི་ཐུགས་དམ་བསྐང་། །དུར་ཁྲོད་བདག་མོའི་ཐུགས་དམ་བསྐང་། །འཁོར་གྱི་ཤ་ཟའི་ཐུགས་དམ་བསྐང་། །དབུགས་ལེན་ཤན་པའི་ཐུགས་དམ་བསྐང་། །སྐུ་ཡི་སྤྲུལ་པས་ནམ་མཁའ་གང་། །སྤྲུལ་པ་འབུམ་སྡེའི་ཐུགས་དམ་བསྐང་། །ལྷ་སྲིན་སྡེ་བརྒྱད་འཁོར་གྱིས་བསྐོར། །སྟོང་ཕྲག་བརྒྱད་ཅུ་ཁྱོད་ཀྱི་འཁོར། འཁོར་དང་བཅས་པའི་ཐུགས་དམ་བསྐང་། །ཁྱོད་ཀྱི་ཐུགས་དམ་བསྐང་གྱུར་ཅིག །ཉམས་ཆག་ཐམས་ཅད་བཤགས་ཤིང་བསྐང་། །སྐུ་ཡི་དམ་ཚིག་ཉམས་པ་བཤགས། །གསུང་གི་དམ་ཚིག་ཉམས་པ་བཤགས། །ཐུགས་ཀྱི་དམ་ཚིག་ཉམས་པ་བཤགས། །རྩ་བའི་དམ་ཚིག་ཉམས་པ་བཤགས། །ཡན་ལག་དམ་ཚིག་ཉམས་པ་བཤགས། །བཟའ་བའི་དམ་ཚིག་ཉམས་པ་བཤགས། །སྲུང་བའི་དམ་ཚིག་ཉམས་པ་བཤགས། །མཆོད་པའི་དམ་ཚིག་ཉམས་པ་བཤགས། །བཟོད་པར་བཞེས་ལ་དངོས་གྲུབ་སྩོལ། །ཅེས་མན་ངག་ལྟར་ཡིག་བརྒྱ་བཟླ། དེ་ནས་ཐུན་གཏོར་ལ་བཀུག་གཞུག་བྱས་ལ། རྒྱས་པར་རྒྱུད་ནས་གསུངས་པའི་བསྟོད་བསྐུལ་རྣམས་བྱ། བསྟོད་བསྐུལ་ནི། ཧཱུྃ། དུར་ཁྲོད་ཆེན་པོའི་གནས་མཆོག་ནས། །ཀེང་
རུས་ཐོད་པའི་སྐུ་མཁར་ནས། །རཀྟའི་དྲ་ཀློང་ད་ལ་ནས། །མི་རོ་བསྣོལ་བའི་གདན་སྟེང་དུ། །དཔལ་ལྡན་དུར་ཁྲོད་བདག་པོ་ནི། །གཏི་མུག་སྤང་ཕྱིར་ཀེང་རུས་སྐུ། །ཞལ་གཅིག་ཕྱག་གཉིས་སྐུ་མདོག་དཀར། །ཞེ་སྡང་འཇོམས་ཕྱིར་ཐོད་དབྱུག་ཕྱིར། །འདོད་ཆགས་སྐེམ་ཕྱིར་ཐོད་ཁྲག་འཐུང་། །གཡས་པའི་ཐོད་དབྱུག་འབར་བ་ཡིས། །དམ་ཉམས་དགྲ་བོའི་ཀླད་པ་བཅོམ། །གཡོན་པས་ཐོད་པ་ཁྲག་བཀང་གིས། །དགྲ་དང་བགེགས་ཀྱི་སྙིང་ཁྲག་འཐུང་། །འབར་བའི་ཀེང་རུས་མཆེ་བ་གཙིགས། །དུག་གསུམ་རྩད་ནས་གཅོད་པར་བྱེད། །དབུ་ལ་རིན་ཆེན་སྲོག་ཞུ་གསོལ། །དངོས་གྲུབ་ཀུན་གྱི་གཏེར་དང་ལྡན། །མི་མགོ་ལྔ་བཅུས་དོ་ཤལ་བྱས། །དུས་གསུམ་སངས་རྒྱས་མཆོད་པ་ཡིན། །སྐུ་ལ་རིན་ཆེན་སྣ་ཚོགས་བརྒྱན། །སྒྲུབ་པ་པོ་ལ་དངོས་གྲུབ་སྟེར། །གཉིས་མེད་ཤེས་རབ་ཡུམ་ཆེན་མོ། །རྒྱན་དང་ཆ་ལུགས་ཡབ་དང་མཐུན། །འཇིགས་སུ་རུང་བའི་ཡབ་ཡུམ་སྐུ། །བསྐྱང་བརྐུམ་གར་གྱིས་གདུག་པ་འདུལ། །སྒེག་མོ་སྒྲོག་ཅིང་འདོར་སྟབས་ཚུལ། །གདུག་པའི་དགྲ་བགེགས་ཚར་གཅོད་ཅིང་། །དམ་ཚིག་ཅན་ལ་དངོས་གྲུབ་
སྟེར། །ཤེས་རབ་འཕེལ་བའི་དབང་ཕྱུག་སྟེ། །རིག་སྔགས་ཟློག་པའི་མཐུ་བོ་ཆེ། །རང་རྟགས་སྲོག་སྙིང་སྒྲ་སྒྲོགས་པ། །དཔལ་ལྡན་ཡབ་ཡུམ་ཐུགས་རྗེ་ཅན། །ཁྱེད་ཀྱི་སྤྲུལ་པས་གར་ཡང་ཁྱབ། །རྩ་གསུམ་ལྷ་གནས་མན་ཆད་ནས། །ན་རག་དམྱལ་ཁམས་ཡན་ཆད་དུ། །སྤྲུལ་པ་བྱེ་བ་དཔག་མེད་འགྱེད། །ལྷ་སྲིན་སྡེ་བརྒྱད་ཁྱོད་ཀྱི་འཁོར། །སྟོང་ཕྲག་བརྒྱད་ཅུ་ཁྱོད་ཀྱི་བྲན། །འདིར་གཤེགས་བརྒྱན་པའི་གཏོར་མ་འདི། །ཁྲོས་རྔམས་བསླབས་ཀྱིས་བཞེས་སུ་གསོལ། །དགྲ་བགེགས་འདུལ་ཕྱིར་་མཐུ་མ་ཆུང་། །རྣལ་འབྱོར་སྐྱོང་ཕྱིར་ཐུགས་མ་རིང་། །གདུག་པ་འདུལ་ཕྱིར་བང་མ་ཞེན། །འབོད་པའི་ཕྱིར་ན་སྙན་མ་སྲ། །གཡབ་པའི་ཚེ་ན་སྤྱན་མ་རྟུལ། །རྦད་པའི་ཚེ་ན་མཐུ་མ་ཆུང་། །བསྐུལ་བའི་ཚེ་ན་ལས་མ་འགྱང་། །དགྲ་བགེགས་སྟེང་དུ་རྩལ་མ་ཞན། །ཐུགས་དམ་དབང་གིས་གཤེགས་སུ་གསོལ། །བསྲུང་བའི་འཁོར་ལོ་སྐྱབས་མ་ཆུང་། །འགྲོ་བ་སྲུངས་ཤིག་ཐུགས་རྗེ་ཅན། །བདག་གིས་མཆོད་ཅིང་བསྟོད་པའི་ཚེ། །ནོར་ཕྱུགས་རྐང་བཞི་སྐྱོང་ཞིང་སྤེལ། །དཀོར་ཁང་སྲུངས་ཤིག་བར་ཆད་སོལ། །
ཡོན་བདག་སྲུང་ཞིང་སྐྱབས་པ་དང་། །རྣལ་འབྱོར་བསམ་པ་བསྒྲུབ་པ་དང་། །ཆོས་སྐྱོང་ཐུགས་དམ་བསྐང་བ་དང་། །བསོད་ནམས་རྒྱ་ཆེན་བསྐྱེད་པ་དང་། །སངས་རྒྱས་བསྟན་པ་སྲུང་བའི་ཕྱིར། །བཀའ་ཡི་གཏོར་མ་འདི་ལོངས་ལ། །ཐུགས་དམ་བཞིན་དུ་ཕྲིན་ལས་མཛོད། །བསྡུ་ན། ཧཱུྃ། རབ་འཇིགས་དུར་ཁྲོད་ཀུན་གྱི་བདག་མོ་སྟེ། །ཁྱད་པར་སོ་ས་གླིང་གི་ཞིང་སྐྱོང་བ། །ཀེང་རུས་ཆེན་པོ་གར་བྱེད་མཆེ་བ་གཙིགས། །རང་འདྲའི་ཡབ་བཅས་ཁྲོ་བོ་ཁྲོ་མོའི་ཚོགས། །རབ་གཏུམ་དབྱུག་ཐོ་ཕྱར་ཞིང་ཐོད་ཁྲག་བསྣམས། །དར་དང་རིན་ཆེན་རྒྱན་གྱིས་ལེགས་པར་བརྒྱན། །ཤ་ཟ་ཕོ་མོའི་ཁྲོམ་གྱིས་ལེགས་པར་བསྐོར། །མཚན་བཞིན་དུར་ཁྲོད་ཉུལ་ལ་ཕྱག་འཚལ་བསྟོད། །དམ་རྫས་བཀའ་ཡི་གཏོར་མ་འདི་བཞེས་ལ། །གནོད་བྱེད་བསྟན་དགྲ་ཐལ་བར་བརླག་པ་དང་། །དགྲ་རྐུན་ཇག་གསུམ་འཆིང་བའི་ཕྲིན་ལས་མཛོད། །ཅེས་བསྐུལ་ལོ། །ཞེས་གསོལ་ཁ་བསྐང་བ་གཉིས་པོ་བསྐང་གསོ་ཆེན་པོ་ནས་བཅོས་བསླད་མེད་པར་ཀརྨ་ཨ་རཱ་གས་བསྒྲིགས་ནས་ཁྱེར་བདེ་བར་བཀོད་པའོ། །མངྒ་ལཾ།། །།