དུར་ཁྲོད་བདག་པོའི་བསྐང་བ།
དུར་ཁྲོད་བདག་པོའི་བསྐང་བ་བྱ་བ་འདི་ལྟར་རོ། །བསྐང་བ་བྱེད་ན་བསྐང་རྫས་ཕུན་སུམ་ཚོགས་པ་ཡིད་ཀྱིས་དམིགས་ལ། ཧཱུྃ། དཔལ་ལྡན་དུར་ཁྲོད་བདག་པོ་ཁྱོད། །སྔོན་ཚེ་བཅོམ་ལྡན་སྤྱན་སྔ་རུ། །ཀྱེ། གདུག་པ་འདུལ་མཛད་བཅོམ་ལྡན་འདས། །ཧེ་རུ་ཀ་དཔལ་བདག་ཉིད་ཆེ། །སྙིགས་མ་ལྔ་པོ་དར་བའི་དུས། །ལུས་ཀྱི་གདུག་པ་ཀུན་འཁྲུགས་ནས། །ས་བདག་ཀླུ་ཡི་ནད་རྣམས་དར། །མ་མོ་མཁའ་འགྲོ་ཀུན་ནས་འཁྲུགས་པའི་ཚེ། །མི་རྣམས་བསོད་ནམས་ལོངས་སྤྱོད་ཆུང་བ་ཡིས། །བསགས་པའི་ནོར་རྣམས་རང་གིས་སྤྱད་དབང་མེད། །ཕ་དང་བུ་བྲལ་ནོར་དང་ལོངས་སྤྱོད་ཉམས། །དེ་དུས་བཅོམ་ལྡན་བསྟན་པ་ནི། །དཔའ་བོ་བདག་གིས་བསྲུང་བར་བགྱི། །ཞེས་པའི་ཁས་བླང་དམ་བཅས་ནས། །བཅོམ་ལྡན་འདས་ཀྱིས་བཀའ་སྩལ་པ། །ལེགས་སོ་དུར་ཁྲོད་བདག་པོ་ཁྱོད། །སྲོག་གི་སྙིང་པོ་བདག་ལ་ཕུལ། །ཅེས་གསུངས་དུར་ཁྲོད་བདག་པོ་ཡིས། །སྲོག་གི་སྙིང་པོ་ཕུལ་ནས་ནི། །ཇི་ལྟར་ཁས་བླངས་དམ་བཅས་པ། །དམ་ལས་མ་འདའ་ད་ཚུར་བྱོན། །བསྐང་ངོ་ཁྱོད་ཀྱི་ཐུགས་དམ་བསྐང་། །བཞུགས་པའི་གནས་དང་མཐུན་པའི་
རྫས། །ཆགས་པའི་རྟེན་དང་མྱོས་པའི་རྫས། །དམ་ཚིག་རྫས་མཆོག་མཉེས་པའི་དཀོར། །སྣ་ཚོགས་སྤྱན་གཟིགས་མཆོད་པ་འདིས། དུར་ཁྲོད་བདག་པོའི་ཐུགས་དམ་ཞབསྐང་། །དུར་ཁྲོད་བདག་མོའི་ཐུགས་དམ་བསྐང་། །འཁོར་གྱི་ཤ་ཟའི་ཐུགས་དམ་བསྐང་། །དབུགས་ལེན་ཤན་པའི་ཐུགས་དམ་བསྐང་། །སྐུ་ཡི་སྤྲུལ་པས་ནམ་མཁའ་གང་། །སྤྲུལ་པ་འབུམ་སྡེའི་ཐུགས་དམ་བསྐང་། །ལྷ་སྲིན་སྡེ་བརྒྱད་འཁོར་གྱིས་བསྐོར། །སྟོང་ཕྲག་བརྒྱད་ཅུ་ཁྱོད་ཀྱི་འཁོར། །འཁོར་དང་བཅས་པའི་ཐུགས་དམ་བསྐང་། །ཁྱོད་ཀྱི་ཐུགས་དམ་བསྐང་གྱུར་ཅིག །ཉམས་ཆག་ཐམས་ཅད་བཤགས་ཤིང་བསྐང་། །སྐུ་ཡི་དམ་ཚིག་ཉམས་པ་བཤགས། །གསུང་གི་དམ་ཚིག་ཉམས་པ་བཤགས། །ཐུགས་ཀྱི་དམ་ཚིག་ཉམས་པ་བཤགས། །རྩ་བའི་དམ་ཚིག་ཉམས་པ་བཤགས། །ཡན་ལག་དམ་ཚིག་ཉམས་པ་བཤགས། །བཟའ་བའི་དམ་ཚིག་ཉམས་པ་བཤགས། །བསྲུང་བའི་དམ་ཚིག་ཉམས་པ་བཤགས། །བཟོད་པར་བཞེས་ལ་དངོས་གྲུབ་སྩོལ། །བཛྲ་ས་ཏྭ་ས་མ་ཡ། སོགས། ཡིག་བརྒྱ་མན་ངག་ལྟར་བཟླ། དེ་ནས་ཐུན་གཏོར་ལ་འགུག་གཞུག་བྱས་ནས། རྒྱས་པར་
རྒྱུད་ནས་གསུངས་པའི་བསྟོད་བསྐུལ་བྱ། རྒྱུད་དང་སྒྲུབ་ཐབས་ནས་བྱུང་བ་ལྟར། ཨ་རཱ་གས་བསྒྲིགས་པའོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།