མགོན་དཀར་དུར་ཁྲོད་བདག་པོ་ཡབ་ཡུམ་གྱི་དབང་བསྐུར་དངོས་གྲུབ་ཀུན་འབྱུང་།
མགོན་དཀར་དུར་ཁྲོད་བདག་པོ་ཡབ་ཡུམ་གྱི་དབང་བསྐུར་དངོས་གྲུབ་ཀུན་འབྱུང་ཞེས་བྱ་བ་བཞུགས་སོ། །
ན་མོ་གུ་རུ་ཙཀྲ་སཾ་བྷ་ཡེ། དཔལ་དུར་ཁྲོད་བདག་པོ་ཡབ་ཡུམ་གྱི་དབང་བསྐུར་འདོད་པས། ཚེས་བཅུ་བཞིའམ་ཉེར་དགུ་ལ་འཛོམས་ན་ལེགས་ཡིན་ཀྱང་རུང་། རྡུལ་ཚོན་པདྨ་འདབ་བརྒྱད་དབུས་སུ་རིན་པོ་ཆེའི་སྟན་སྤྲོད་བྲིས་པའམ། འབྲུའི་ཚོམ་བུ་འདབ་བརྒྱད་ཀྱི་དབུས་སུ་ཚོམ་བུ་ཆེ་ཆུང་གཉིས་བཀོད་པའི་སྟེང་དུ། མིའི་རྐང་གི་ཁྲིའུ་འམ་མཉྫིའི་སྟེང་དུ། རིན་པོ་ཆེའི་སྣོད་དུ་གཏོར་མ་སྟོད་ཟུར་གསུམ་སྨད་ཟླུམ་པོ། གཡོན་དུ་ཡུམ་གཏོར་ཟུར་གསུམ་སྦྱར་ལ་མཐེབ་སྐྱུས་བསྐོར། མར་རྒྱན་ཧཱུྃ་ཛའི་དབྱུག་པ་མེ་འབར་སོགས་བྱ། ཡོད་ན་ཙཀ་ལི་དང་དར་དཀར་གྱི་གཏོར་གདུགས་བཙུགས། མཐར་རྣམ་ལྔ་སོགས་མཆོད་པ་བཤམས། འཛོམས་ན་ནང་མཆོད་ཚོགས་དང་དམར་གཏོར་ཡང་བཤམས། དེ་ནས་བདེ་མཆོག་གི་བདག་བསྐྱེད་
འགྲུབ་ན་ལེགས། ཡང་ན་ཡི་དམ་བློ་ལ་གང་རུང་གི་བདག་བསྐྱེད་བྱས་ལ། སྐད་ཅིག་གིས་བདེ་མཆོག་ལྷན་སྐྱེས་སུ་གནས་འགྱུར་བར་བསྒོམས་པས་ཀྱང་འཐུས། དེ་ནས་དུར་ཁྲོད་བདག་པོའི་མངོན་རྟོགས་གཏོར་ཆོག་འདོན་ཏེ། གཏོར་མའི་སྟོད་ལྷར་བསྐྱེད་སྨད་མཆོད་པར་དམིགས་ལ་བསྔོ། བསྟོད་པ་ཚར་ནས་བསྙེན་པ་བརྒྱ་རྩ་དང་། གྲྭ་པ་མང་ན་སྔགས་འུར་འདོན་བྱ། སྔོན་དུ་སློབ་མ་རྣམས་ཀྱིས་བླ་མེད་གང་རུང་དབང་ཐོབ་མྱོང་བ་ཞིག་མེད་ན་ནི་བསྐུར་མི་རུང་། བགེགས་གཏོར་མཚམས་གཅོད་སྲུང་འཁོར་བསྒོམ་པ་རྒྱས་བསྡུས་སྐབས་དང་བསྟུན། །ཁྲུས་དང་མཎྜལ་ཕུལ་ནས། །འོ་ན་རང་རེ་རྣམས་འཁོར་བ་སྡུག་བསྔལ་གྱི་རྒྱ་མཚོ་འཇིགས་སུ་རུང་བ་འདི་དང་ད་རེས་རྒྱབ་གྱེས་བྱེད་དེ། སེམས་ཅན་
ཐམས་ཅད་ཀྱི་དོན་དུ་ཚེ་གཅིག་ལ་མཆོག་གི་དངོས་གྲུབ་ཐོབ་པ་ཅིག་འདོད་པ་ཡིན། དེ་དབང་བསྐུར་རྒྱུད་བཤད་མན་ངག་བྱིན། རྒྱུད་བྱིན་གྱིས་རློབས་པའི་བླ་མ་ཞིག་དང་མཆོག་གི་དངོས་གྲུབ་སྟེར་བའི་བླ་མེད་ལུགས་ཀྱི་ཡི་དམ་ཞིག་དགོས། ས་ལམ་གྱི་བར་ཆད་སེལ་བའི་ཡེ་ཤེས་ཀྱི་ཆོས་སྐྱོང་སྲུང་མ་ཞིག །ཆོས་སྒྲུབ་པའི་མཐུན་རྐྱེན་སྦྱོར་བའི་ནོར་ལྷ་ཅིག །དེ་རྣམས་མེད་ཁ་མེད་དུ་འདུག་པ་ལས། ད་ལམ་ཆོས་སྐྱོང་དང་ནོར་ལྷ་གཉིས་ཀ་གཅིག་གིས་ཆོག་པ། ངོ་བོ་ཡེ་ཤེས་པ་ཡིན་པས་ས་ལམ་གྱི་བར་ཆད་སེལ་བ་རྣམ་པ་འཇིག་རྟེན་པའི་ཚུལ་དུ་བཞུགས་པས་རྣོ་མྱུར་ཆེ་བ་མགོན་དཀར་དུར་ཁྲོད་བདག་པོ་ཡབ་ཡུམ་གྱི་དབང་བསྐུར་བ་ཡིན། དེ་ལ་འདིའི་ངོ་བོ་ནི་བཅོམ་ལྡན་འདས་འཁོར་ལོ་སྡོམ་པའི་སྤྲུལ་པ་རྣམས་ཀྱི་ནང་ནས་དངོས་གྲུབ་དང་ནུས་པ་ཆེ་བའི་མཆོག་ཏུ་གྱུར་པ་གཅིག་ཡིན་པར་བཤད། སྐྱེ་རྒྱུད་ནི་སྔོན་རྒྱ་གར་གྱི་ཡུལ་དུ་བྲམ་ཟེ་རྒན་རྒོག་གཉིས་ལ་བུ་མིང་སྲིང་གཉིས་ཡོད་པ་ལས། ཡུལ་དེར་མུ་གེ་ཆེན་པོ་བྱུང་ནས་མི་ཕལ་ཆེར་ཤི་བ་དང་། བུ་མིང་སྲིང་གཉིས་ཀྱིས་ཕ་མ་གཉིས་ཤི་དོགས་ནས། རང་གི་ཤ་བཅད་ཅིང་བུས་ཕ་དང་བུ་མོས་མ་
གསོས་པས། མུ་གེ་ཡོལ་ནས་ཕ་མ་གཉིས་མ་ཤི་བ་བྱུང་བ་དང་། མིང་སྲིང་གཉིས་ཀྱི་ཤ་ཁྲག་ཟད་ནས་ཀེང་རུས་རེད་པ་དུས་མཚུངས། དེ་ཤ་ཁྲག་གིས་གསོས་ཤིང་ལུས་བློས་ཐོངས་པ་དང་། ན་ཚ་མ་བཟོད་པ་དེ་ཙམ་བསྒོམ་པའི་བྱིན་རླབས་ཀྱིས་དཔལ་འཁོར་ལོ་སྡོམ་པ་ཡབ་ཡུམ་ཞལ་མཐོང་ངོ་། །དེར་བདག་མིང་སྲིང་གཉིས་ཀྱིས་སངས་རྒྱས་ཀྱི་བསྟན་པ་སྲུང་བ་དང་། ཆོས་བསྒྲུབ་པའི་མཐུན་རྐྱེན་ལོངས་སྤྱོད་སྟེར་བ་དང་། དེ་ལ་གནོད་པའི་ཆོམ་རྐུན་དང་བཙན་གྱི་གནོད་པ་སྲུང་བར་གྱུར་ཅིག་ཅེས་སྨོན་ལམ་བཏབ་པས། དེ་མ་ཐག་ཏུ་མིང་སྲིང་གཉིས་ཀེང་རུས་ཀྱི་ཁྲོ་བོ་ཁྲོ་མོ་གཉིས་སུ་གྱུར་ཅིང་། འཁོར་ལོ་སྡོམ་པས་དབང་བསྐུར་བྱིན་གྱིས་བརླབས། བདེ་མཆོག་ཡབ་ཡུམ་དང་ལྷ་སྲིན་སྡེ་བརྒྱད་ཀྱིས་ཀྱང་སྨོན་ལམ་དེ་འགྲུབ་པའི་སྨོན་ལམ་དང་དམོད་བོར་བས། ས་རྣམ་པ་དྲུག་ཏུ་གཡོས་ཤིང་མཐུ་སྟོབས་བསམ་གྱིས་མི་ཁྱབ་པར་གྱུར་ཏེ། སོ་སའི་གླིང་ལ་སོགས་དུར་ཁྲོད་ཆེན་པོ་བརྒྱད་དང་། རྟོག་པ་དང་རེ་འགའི་དུར་ཁྲོད་ཐམས་ཅད་ཀྱི་བདག་པོར་གྱུར་པས་དུར་ཁྲོད་བདག་པོར་ཞེས་གྲགས་སོ། །དེ་ནས་སྤྲུལ་པ་བྱེ་བ་བསམ་གྱིས་
མི་ཁྱབ་པར་ལྷའི་གནས་ནས་དམྱལ་བ་ཡན་དུ་ཁྱབ་པས། རོ་སྟོད་ཚངས་པའི་དུར་ཁྲོད་ཐམས་ཅད་དུ་འདིའི་སྤྲུལ་པ་ཀེང་རུས་རེ་རེ་ཡོད་པར་སྣང་ངོ་། །དེར་མ་ཟད་བགེགས་རིགས་སྟོང་ཕྲག་བརྒྱད་ཅུ་ནི་འདིའི་འཁོར་དང་ལྷ་སྲིན་སྡེ་བརྒྱད་ཐམས་ཅད་འདིའི་བྲན་དང་། ཕོ་ཉ་ཡིན་པས། མགོན་དཀར་ཞེས་གྲགས་སོ། །ལྷའི་ངོ་བོ་དེ་ལྟར་ན་རྒྱུད་ཇི་ལྟར་གསུངས་ཞེ་ན། སྤྱིར་ནི་བླ་མེད་གསར་རྙིང་གི་རྒྱུ་སྡེ་ཕལ་ཆེ་བ་ན། དཀྱིལ་འཁོར་གྱི་མཐའ་ལ་དུར་ཁྲོད་བརྒྱད་བཤད་ཅིང་། དུར་ཁྲོད་དེ་དག་ཏུ་ཤ་ཟ་དང་རོ་ལངས་དང་ཀེང་རུས་བཤད་ཅིང་། འདི་པི་ཤ་ཙི་ཞེས་པ་ཤ་ཟའི་རིགས་སུ་གཏོགས་ཤིང་། ཀེང་རུས་ཀྱི་གཟུགས་སུ་སྣང་བ་སྟེ། །དུར་ཁྲོད་ཆེན་པོ་དེ་རྣམས་སུ། །རྣམ་པ་ཆ་ལུགས་ཇི་ལྟར་སྣང་ཡང་། །སྤྲུལ་པའི་སྐུ་མཆོག་ངོ་མཚར་ཆེ། །ཞེས་གསུངས་པ་དང་། འདུས་ཤིང་འཚོགས་པ་ཐམས་ཅད་ཀྱང་། །ལོག་པར་མི་ལྟུང་ཆོས་ཉིད་དེ། །ཞེས་པས་དུར་ཁྲོད་དེ་གསུམ་གནས་པའི་བྱ་རིགས་བཙན་འབུ་སྲིན་ཐམས་ཅད་དང་། དེར་སླེབས་པའི་རོ་ཐམས་ཅད་ཀྱི་རྣམ་ཤེས་ཀྱང་དཔའ་བོ་མཁའ་འགྲོས་འདྲེན་པ་ནི། གནས་དང་དུར་ཁྲོད་དེ་
རྣམས་ཀྱི་འགྲོ་དོན་ཡིན་པར་བཤད་པའོ། །དེ་ཕྱིར་རྒྱ་གར་གྱི་རོ་བདག་ཡོད་ཐམས་ཅད་བསིལ་བའི་ཚལ་ལམ་དུར་ཁྲོད་བརྒྱད་པོ་གང་ཉེ་ཞིག་ཏུ་སྐྱེལ་བ་ཆོས་ཀ་ཆེན་པོར་རྩི་བ་ཡིན་སྐད་དོ། །ཁྱད་པར་དུ་འདིའི་རྒྱུད་ཇི་ལྟར་གསུངས་ཚུལ་ནི། དུར་ཁྲོད་ཆེན་པོའི་གནས་ན་བཅོམ་ལྡན་འདས་ཧེ་རུ་ཀ་ཡབ་ཡུམ་རྡོ་རྗེ་རྣལ་འབྱོར་མ་དང་གཉིས་སུ་མེད་པར་སྤྲུལ་པའི་འཁོར་དང་བཅས་ཏེ་བཞུགས་པའི་ཚེ། བཅོམ་ལྡན་འདས་དངོས་གྲུབ་འབྱུང་བའི་ཏིང་ངེ་འཛིན་ལ་བཞུགས་ནས། ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུྃ་ཧཱུྃ་ཕཊ༔ ཨོཾ་ཀི་ནི་ཧཱུྃ། ཞེས་གསུངས་པས་འཇིག་རྟེན་པའི་སྡེ་བརྒྱད་ཐམས་ཅད་བརྒྱལ་བར་གྱུར་ཏེ། བརྒྱལ་སངས་ནས་འཁོར་གྱི་ནང་ནས་དཔལ་དུར་ཁྲོད་བདག་པོ་སྟན་ལས་ལངས་ཏེ། ཀྱེ། གདུག་པ་འདུལ་མཛད་ཧེ་རུ་ཀ །བསྐལ་པ་སྙིགས་མ་ལྔ་ཡི་དུས། །གདུག་པ་ཅན་རྣམས་འཁྲུག་པ་དང་། །ས་བདག་ཀླུ་ཡི་ནད་ཡམས་དར། །མ་མོ་མཁའ་འགྲོ་འཁྲུག་པའི་ཚེ། །མི་རྣམས་བསོད་ནམས་ལོངས་སྤྱོད་ཆུང་། །རང་བསགས་དངོས་པོ་སྤྱད་དབང་མེད། །ཕ་དང་བུ་བྲལ་ལོངས་སྤྱོད་ཉམས། །དེ་དུས་བཅོམ་ལྡན་བསྟན་
པ་ནི། །དཔའ་བོ་བདག་གིས་བསྲུང་བར་བྱ། །ཞེས་གསོལ་པ་དང་། དཔལ་ཧེ་རུ་ཀས། ལེགས་སོ་དུར་ཁྲོད་བདག་པོ་ཁྱོད། །སྲོག་གི་སྙིང་པོ་བདག་ལ་ཕུལ། །ཞེས་གསུངས་པས། ཏདྱ་ཐཱ། ཨོཾ་གྷི་རཱ་ཛ་གྷི་རཱ་ཛ་ཀུ་མ་ཀུ་མ་ཁུམ་ཐིས་སྭཱ་ཧཱ། ཞེས་མདངས་གསོལ་དུ་ཕུལ་བས། དཔལ་དུར་ཁྲོད་བདག་པོ་གསང་བ་སྙིང་གི་འཁོར་ལོའི་རྒྱུད་ལེའུ་བརྒྱད་བཀའ་སྩལ་ཞིང་། གསང་བ་སྙིང་གའི་རྒྱུད་འདི་ནི། །དུར་ཁྲོད་བདག་པོ་ཁྱོད་ལ་གཏད། །དུས་གསུམ་སངས་རྒྱས་བསྟན་པ་སྲུང་། །དམ་ཉམས་རྣམས་ལ་ཆད་པ་ཆོད། །དམ་ཚིག་ཅན་ལ་བྱིན་གྱིས་རློབས། །ཞེས་བཀའ་བསྒོས་པས། ཐམས་ཅད་ཡིད་རང་ཞིང་ཧེ་རུ་ཀ་ཡབ་ཡུམ་ཆོས་སྐུ་སྐྱེ་བ་མེད་པའི་ངང་ལ་བཞུགས་སོ། །དེ་ནས་ཡུམ་༈ རྡོ་རྗེ་རྣལ་འབྱོར་མས་གྲུབ་ཆེན་པདྨ་བཛྲ་ལ་འདི་རྒྱུད་མན་ངག་དབང་ལུང་གནང་། དེས་རྒྱ་གར་གྱི་པཎྜི་ཏ་ར་ཧུ་ལ་གནང་། དེས་གྲུབ་ཆེན་སྒེག་པའི་རྡོ་རྗེ་ལ། དེས་གྲུབ་ཆེན་ཛྷཱ་ན་སིདྡྷི་ལ། དེས་གྲུབ་ཆེན་དམ་ཚིག་རྡོ་རྗེ་ལ། དེས་པཎྜི་ཏ་འཆི་མེད་བློ་གྲོས་བཟང་པོ་ལ། འདི་གཉིས་གཅིག་ཡིན་པར་འདོད་པའང་སྣང་། དེས་པཎྜི་ཏ་བེ་རོ་ཙ་ན་རཀྴི་ཏ་
ཞེས་ཀྱང་བྱ། དངུལ་ཆུའི་བཅུད་ལེན་མཛད་པས་སྐུ་ཚེ་རིང་པོ་ཐུབ་པས་དངུལ་ཆུ་བེ་རོ་ཡང་ཟེར་བ་དེ་ལ་གནང་། དེས་འདིའི་སྒྲུབ་ཐབས་རྒྱ་གཞུང་དང་འགྲེལ་པ་ལས་ཚོགས་རྣམས་མཛད་ཅིང་གཏན་ལ་ཕབ། ཕྱིས་བོད་དུ་ཕེབས་པ་ན་རྗེ་དུས་མཁྱེན་ལ་སོགས་པ་མཁས་གྲུབ་མང་པོས་བླ་མར་བསྟེན་པའོ། །དེས་མཁས་ལོ་ཙཱ་ཡང་ཟེར། ཁམས་པ་སྒ་ལོ་ཡང་ཟེར། འཇིམ་ལོ་ཙཱ་དང་། ལོ་རྩྭ་འཇམ་དཔལ་ཡང་ཟེར། སྒ་ལོ་ཆུང་བ་ཡང་ཟེར་བ་འདི་ལ་གནང་ངོ་། །དེས་ས་ཆེན་ཀུན་དགའ་སྙིང་པོ་དང་ཆོས་ཕར་གསན་ཚུར་གསན་གྱི་ཐུགས་མཐུན་པར་གྱུར་པས་ས་ཆེན་ལ་གནང་། དེས་སློབ་དཔོན་རིན་པོ་ཆེ་བསོད་ནམས་རྩེ་མོ་ལ། དེས་རྗེ་བཙུན་རིན་ཆེན་གྲགས་པ་རྒྱལ་མཚན་ལ་གནང་། དེ་ནས་རིམ་པར་བརྒྱུད་པ་མང་དུ་གྱེས་ཤིང་། འདིའི་གདམས་པ་ལ་འཇམ་དབྱངས་བདུན་རྒྱུད་རྣམས་ཀྱི་ཐུགས་རྩིས་བླ་ན་མེད་པ་མཛད་པས་ས་པཎ་གྱི་ལམ་སྲུང་ཞེས་ཁྱད་ཆོས་ཟབ་མོར་རྩི་བར་སྣང་། གཞན་ཡང་སློབ་དཔོན་པདྨ་དང་། དམ་པ་རྒྱ་གར། མ་གཅིག་སོགས་ཀྱིས་ཀྱང་ཇག་རྐུན་འཆིང་བའི་མན་ངག་ཟབ་མོ་ཐམས་ཅད་ལྷ་འདི་དང་སྔགས་
འདིའི་སྒོ་ནས་གསུངས་པ་མང་སྟེ། ལྷ་འདི་སྨོན་ལམ་གྱི་སྟོབས་ཀྱི་གཞན་བས་ཟབ་སྟེ། ཇག་རྐུན་འཆིང་བ་ལ་ནི་འདི་བས་ཟབ་པ་མེད་པ་ཡིན་ནོ། །ནོར་ལྷ་གང་ཡང་དངོས་གྲུབ་འབྱུང་བར་འདྲ་ཡང་། ལྷ་འདིའི་མུ་གེའི་སྡུག་བསྔལ་དེ་ལྟ་བུ་རང་གི་ཤ་ཁྲག་གིས་ཕ་མ་གསོ་དགོས་བྱུང་བས། དེ་ལ་རྗེས་སུ་དཔག་ནས་ཆོས་བྱེད་པ་ལ་ཡང་ལོངས་སྤྱོད་མཐུན་རྐྱེན་མེད་ཐབས་མེད་པར་དགོངས་ཏེ། སྨོན་ལམ་རྒྱ་ཆེན་པོ་བཏབ་པ་དངོས་གྲུབ་དང་ལོངས་སྤྱོད་འདུ་བ་ལ་འདི་བས་མྱུར་བ་དང་ཟབ་པ་མེད་པ་སྨོན་ལམ་གྱི་གནད་ཡིན་པའོ། །འདི་མ་ཆག་པར་བཏོན་ན་ཚུལ་ཁྲིམས་གཙང་བར་འགྱུར་ཏེ། ཆགས་པའི་གཉེན་པོར་མི་སྡུག་པ་དང་ཀེང་རུས་བསྒོམ་པར་མདོ་ནས་གསུངས་སོ། །དེ་ཡང་གསང་བ་སྙིང་གི་འཁོར་ལོའི་རྒྱུད་དང་པཎྜི་ཏ་བེ་རོ་ཙཱ་ནའི་རྒྱ་གཞུང་རྣམས་ཚིག་ཕལ་ཆེར་མཐུན་པ། རྟགས་དང་ཕན་ཡོན་མཉམ་དུ་གསུངས་པ་ནི། དེའི་རྟགས་མཚན་ལྷ་ཡིས་སྟོན། །མགོན་པོ་དངོས་སུ་བྱུང་གྱུར་ན། །གང་འདོད་དངོས་གྲུབ་ཐམས་ཅད་འགྲུབ། །རཏྣའི་ཚངས་པ་བྱུང་གྱུར་ན། །ནོར་གྱི་དངོས་གྲུབ་ཐོབ་པར་འགྱུར། །ཤིང་ཐོག་བྱུང་ན་ཟས་ཚོགས་འདུ། །བ་
དང་མ་ཧེ་བྱུང་གྱུར་ན། །དཀར་ཐོག་ཐམས་ཅད་འཕེལ་བར་བྱེད། །ཏིལ་དང་འབྲས་ལ་སྤྱོད་གྱུར་ན། །ཞིང་ཐོག་ཐམས་ཅད་འཕེལ་བར་འགྱུར། །ཞེས་དང་། བདག་ཉིད་སྲུང་དང་གཞན་དག་བསྲུང་། །ཡུལ་ཁམས་གྲོང་ཁྱེར་སྲུང་བ་དང་། །ཤེས་རབ་འཕེལ་བ་ལ་སོགས་པ། །ཞེས་གསུངས་པའི་འགྲེལ་པ་ལས། ཚར་གཅིག་བཟླས་ན་བདག་སྲུང་། ཚར་གཉིས་ཀྱིས་གཞན་སྲུང་། གསུམ་གྱིས་གྲོང་ཁྱེར་དང་། ཚར་བདུན་བརྗོད་པས་ཤེས་རབ་འཕེལ། སྟོང་གི་ཡོན་བདག་སྲུང་བར་དོ། །ཞེས་གསུངས་སོ། །དེ་ལྟར་ཇག་རྐུན་སྲུང་བ་དང་ལོངས་སྤྱོད་སྤེལ་བའི་མཆོག་ཡིན་པས། བྱང་བདག་བཀྲ་ཤིས་སྟོབས་རྒྱལ་བས་གཏེར་ཁ་བརྒྱ་རྩ་བརྒྱད་ཀྱི་དབང་ལུང་གསན་པས། ནོར་ལྷ་བརྒྱ་སྟོང་ཡོད་མོད་ཀྱི། ཁོང་རང་གི་ནོར་ལྷའི་གཙོ་བོ་འདི་ལ་མཛད་ནས་ལྡེར་སོའི་སྐུ་བཞེངས་པ་དང་འདིའི་རྟེན་རྫས་དང་འབྲལ་མེད་དུ་སྒར་དུས་ཀྱང་བསྣམས་ནས། རྒྱུན་དུ་མཆོད་བསྟོད་བསྐང་བ་སོགས། སྲས་རིག་འཛིན་ངག་གི་དབང་པོ་དང་བཅས་པས་མཛད་པ་དང་། འགྲོ་མགོན་འཕགས་པ་སངས་རྒྱས་དེས་དགོན་བརྒྱ་རྩ་
བརྒྱད་ཀྱི་ཆགས་བཅགས་པ་སོགས་འགྲོ་དོན་བསམ་ལས་འདས་ཏེ། ཁོང་གི་ཆོས་སྐྱོང་གཙོ་བོ་གཅིག་ཏུ་འདི་ལ་མཛད་པའི་རྒྱུན་དེང་སང་ཡང་སྣང་བ་དང་། སྟག་ལུང་ཞབས་དྲུང་བཀྲ་ཤིས་དཔལ་གྲུབ་པས་གསར་མའི་དབང་ལུང་ཁོང་ལས་རྒྱ་ཆེ་བ་མེད་པར་འདུག་ཅིང་། ཆོས་སྡེ་རྙིང་པ་རྣམས་སུ་སྔར་མེད་པ་ཅུང་ཟད་ཅིག་བཙུགས་ན་ཡང་ཁ་ཟེར་བས་ལྟབ་དཀའ་བར་ཡོད་ཀྱང་དུར་ཁྲོད་བདག་པོ་འདིའི་སྐུ་རེ་ཡོད་ནའང་། བཀྲ་ཤིས་པར་བཤད་གསུངས་ནས། སྟག་ལུང་ཡར་ཐང་དུ་འདིའི་འཆམ་གྱི་སྲོལ་གསར་དུ་བཙུགས་པ་རྣམས་ལ་ལེགས་པར་དཔྱད་ན། གསར་རྙིང་གང་ལ་ཡང་འདི་བས་རྣོ་བ་དང་ཟབ་པའི་ཆོས་སྐྱོང་ཞིག་མེད་པར་ཤེས་པར་བྱའོ། །དེ་ལྟ་བུའི་ཆོས་སྐྱོང་གི་དབང་ཞུ་བའི་ཆེད་དུ་བླ་མ་བདེ་མཆོག་ལྷན་སྐྱེས་སུ་གསལ་བ་ལ་གསོལ་བ་འདེབས་པའི་རྗེས་ཟློས་མཛོད། དཀོན་མཆོག་གསུམ་དང་དབྱེར་མེད་ཅིང་། །ཡི་དམ་ལྷ་ཡི་ངོ་བོ་ཉིད། །བླ་མ་དམ་པ་ཐུགས་རྗེ་ཡིས། །དབང་དང་བྱིན་རླབས་བསྩལ་དུ་གསོལ། །ལན་གསུམ། བླ་མ་དང་མདུན་གྱི་གཏོར་མ་ཆོས་སྐྱོང་ཡབ་ཡུམ་གསལ་བའི་དྲུང་དུ། རྒྱུན་བཤགས་འདིའི་དོན་དྲན་བཞིན་རྗེས་
ཟློས་མཛོད། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་མི་དགེ་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་བཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་མཆོག་གི་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །ལན་གསུམ་མམ་ཚིག་ཐ་མ་གསུམ་བྱ། ད་དབང་གི་གཞི་འགོད་པའི་དོན་དམིགས་པ་འདི་བཞིན་མཛོད། ཨོཾ་ཁཎྜ་རོ་ཧེ་ཧཱུྃ་ཧཱུྃ་ཕཊ། ཨོཾ་སྭ་བྷ་ཝ་སོགས། སྟོང་པའི་ངང་ལས་འབྱུང་བ་རིམ་བརྩེགས་ཀྱི་སྟེང་དུ་ཧཱུྃ་ལས་ཐོད་མཁར་གྲུ་བཞི་པའི་དབུས་སུ། པད་ཉི་ཟླ་བའི་སྟེང་དུ། ཁྱེད་རང་རྣམས་ཀྱི་རྣམ་པར་ཤེས་པ་ཧཱུྃ་དང་ཨ་ལས་དུང་དང་མགྲོན་བུ་ཧཱུྃ་དང་ཨཾ་གིས་མཚན་པ་ལས་འོད་འཕྲོས་དོན་གཉིས་བྱས་ཚུར་འདུས་ཡོངས་སུ་གྱུར་པ་ལས། དུར་ཁྲོད་ཀྱི་བདག་པོ་ཡབ་ཡུམ་གཉིས་སྐུ་མདོག་དཀར་པོ་ཀེང་
རུས་འཇིགས་པའི་གཟུགས་ཅན་ཞལ་གཅིག་ཕྱག་གཉིས་དབྱུག་ཐོ་ཐོད་ཁྲག་བསྣམས་པ། སྤྱན་གསུམ་མཆེ་བ་བཞི་གཙིགས་ཤིང་ལྗགས་འདྲིལ་བ། དར་སྣ་ཚོགས་ཀྱི་ཤམ་ཐབས་དང་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་ཅིང་། མེ་དཔུང་གི་དབུས་ན་གར་སྟབས་ཀྱིས་བཞུགས་པའི་དཔྲལ་བར་ཨོཾ། མགྲིན་པར་ཨཱཿ ཐུགས་ཀར་ཧཱུྃ་གིས་མཚན་པར་བསྒོམ་ཞིང་། ད་དངོས་གཞི་ལ་སྐུ་གསུང་ཐུགས་ཀྱི་རྗེས་གནང་བཀའ་བསྒོ་བ་དང་བཞི་ལས། སྐུའི་རྗེས་གནང་གི་དོན་དུ་སློབ་དཔོན་བདེ་མཆོག་ཡབ་ཡུམ་དུ་གསལ་བའི་ཐུགས་ཀ་ནས་འོད་ཟེར་འཕྲོས། ཨོ་རྒྱན་མཁའ་འགྲོའི་ཕོ་བྲང་དང་རང་བཞིན་གྱི་གནས་ནས་ཆོས་སྐྱོང་ཡབ་ཡུམ་གྱི་སྐུ་དཔག་ཏུ་མེད་པ་སྤྱན་དྲངས། སློབ་དཔོན་བདེ་མཆོག་ཡབ་ཡུམ་གྱི་ཞལ་དུ་ཞུགས་ནས། རྗེས་ཆགས་ཀྱི་མེས་ཞུ། ཡུམ་གྱི་མཁར་བབས་པས། ཆོས་སྐྱོང་ཡབ་ཡུམ་གྱི་སྐུ་དཔག་ཏུ་མེད་པར་གྱུར་ནས། ཁྱེད་རང་རྣམས་ཀྱི་ལུས་ལ་ཐིམ་པའི་མོས་པ་མཛོད། ཅེས་གུ་གུལ་ལམ་སྤོས་བཏང་། དྲིལ་བསིལ་ཞིང་གཏོར་མ་ལག་ཏུ་བཟུང་ལ་དབྱངས་བཅས། ཧཱུྃ། དཔལ་ལྡན་མཐུ་སྟོབས་དབང་ཕྱུག་ཆེ། །འཕྲིན་ལས་རྣམ་བཞིའི་དོན་མཛད་པ། །དད་
ལྡན་དམ་ཚིག་ཆེན་པོ་ཡིས། །གནས་འདི་ཉིད་དུ་གཤེགས་སུ་གསོལ། །གནས་འདི་ཉིད་དུ་གཤེགས་ནས་ཀྱང་། །དབང་བསྐུར་བྱིན་གྱིས་བརླབ་ཏུ་གསོལ། །སྲུང་བའི་འཁོར་ལོ་སྐྱབས་མ་ཞེན། །སློབ་མ་སྲུང་ཞིང་ཐུགས་དམ་ཅན། །གཏོར་མ་མགོར་བཞག་ལ། ཨོ་གྷི་རཱ་ཛ་གྷི་རཱ་ཛ་ཀུ་མ་ཀུ་མ་ཁུམ་ཐིས་སྭཱ་ཧཱ། ཨོཾ་གྷི་རཱ་ཛ་གྷི་རཱ་ཛ་ཁུ་མ་ཁུ་མ་ཁུམ་ཐིས་སྭཱ་ཧཱ། པྲ་ཝེ་ཤ་ཡ་ཧཱུྃ། པྲ་ཝེ་ཤ་ཧཱུྃ་ཨཱ༔ ཏིཥྛ་བཛྲ་ཨཾ། ཏིཥྛ་བཛྲ། མེ་ཏོག་འཐོར། ཧཱུྃ། རྣམ་དཀར་ཀེང་རུས་དག་པའི་གཟུགས། །ཕྲིན་ལས་རྣམ་བཞི་ཐོགས་མེད་པར། གང་ལ་ཅི་བཅོལ་དངོས་གྲུབ་ཀུན། །ཉེ་བར་བཅོལ་མཛད་བཀྲ་ཤིས་ཤོག །དེས་སྐུའི་དབང་ཐོབ། འདིའི་སྐུ་བསྒོམ་པར་དབང་། རང་གཞན་སྲུང་ཞིང་ལས་རྣམས་འགྲུབ་པའོ། །ད་གསུང་གི་དོན་དུ་སློབ་དཔོན་བདེ་མཆོག་ཡབ་ཡུམ་དུ་གསལ་བའི་ཐུགས་ཀ་ནས་འོད་ཟེར་འཕྲོས། ཨོ་རྒྱན་མཁའ་འགྲོའི་ཕོ་བྲང་རང་བཞིན་གྱི་གནས་ནས་ཆོས་སྐྱོང་ཡབ་ཡུམ་དཔག་ཏུ་མེད་པ་སྤྱན་དྲངས། སློབ་དཔོན་བདེ་མཆོག་ཏུ་གསལ་བའི་ཞལ་དུ་ཞུགས། རྗེས་ཆགས་ཀྱི་མེས་འོད་དུ་ཞུ། ཡུམ་གྱི་མཁར་བབས་པས།
ཡི་གེ་ཨཱ་ལི་ཀཱ་ལི་དང་ཡུམ་གྱི་སྔགས་ཕྲེང་དུ་གྱུར་ནས་ཁྱེད་རང་རྣམས་ཀྱི་མགྲིན་པར་ཐིམ་པའི་མོས་པ་མཛོད། གཏོར་མ་ཐོགས། ཧཱུྃ། དཔལ་ལྡན་མཐུ་སྟོབས་དབང་ཕྱུག་ཆེ། །ཕྲིན་ལས་རྣམ་བཞིའི་དོན་མཛད་པ། །དད་ལྡན་དམ་ཚིག་ཆེན་པོ་ཡིས། །གནས་འདི་ཉིད་དུ་གཤེགས་སུ་གསོལ། །གནས་འདི་ཉིད་དུ་གཤེགས་ནས་ཀྱང་། །དབང་བསྐུར་བྱིན་གྱིས་བརླབ་ཏུ་གསོལ། །འདུ་བ་བསྡུ་ཕྱིར་དམ་མ་ཞེན། །གང་བཅོལ་ཕྲིན་ལས་འགྲུབ་པར་མཛོད། །ཨོཾ་གྷི་རཱ་ཛ་གྷི་རཱ་ཛ་ཀུ་མ་ཀུ་མ་ཁུམ་ཐིས་སྭཱ་ཧཱ། ཨོཾ་གྷི་རཱ་ཛ་གྷི་རཱ་ཛ་ཁུ་མ་ཁུ་མ་ཁུམ་ཐིས་སྭཱ་ཧཱ། པྲ་ཝེ་ཤ་ཡ་ཧཱུྃ། པྲ་ཝེ་ཤ་ཡ་ཨཱ༔ ཏིཥྛ་བཛྲཨཱ༔ ཏིཥྛ་བཛྲ༔ སྔགས་གཉིས་པོ་འདི་ལན་གསུམ་རྗེས་ཟློས་བྱེད་བཅུག །མདུན་གྱི་ཡབ་ཡུམ་གྱི་ཐུགས་ཀ་ནས་སྔགས་ཕྲེང་བྱུང་ནས་ཁྱེད་རང་ལ་ཐིམ་པར་སྒོམས་ཤིག །ད་མེ་ཏོག་དཀར་པོའི་ཕྲེང་བ་གཅིག་ཕུལ་བའི་མོས་པས་རྗེས་ཟློས་མཛོད། མགོན་དཀར་ཡབ་ཡུམ་བདག་ལ་བསྩལ་ལགས་ཀྱིས། །བདག་ལ་འགོ་བར་མཛད་དུ་གསོལ། །དེ་ནས་མེ་ཏོག་དེ་སྔགས་ཕྲེང་དཀར་པོར་གྱུར་ནས། ཁྱེད་རང་གི་མགོ་ལ་བཅིང་བར་སྒོམས་ཤིག །ཙམ་པ་ཀའམ་ནས་འབྲུ་
བཞག །མགོན་དཀར་ཡབ་ཡུམ་འདི་ལ་བསྩལ་ལགས་ཀྱིས། །འདི་ལ་འགོ་བར་མཛད་དུ་གསོལ། །གང་གི་ཁྱོད་མཆོད་ཁྱོད་སྒྲུབ་ན། །དམ་བཅས་ཅི་བཞིན་ཉེར་དགོངས་ཏེ། །ཇི་ལྟར་གསོལ་བ་བཏབ་པ་བཞིན། །དངོས་གྲུབ་ཀུན་སྩོལ་བཀྲ་ཤིས་ཤོག །དེས་གསུང་གི་དབང་ཐོབ། ངག་ནུས་པ་དང་ལྡན། ཡབ་ཡུམ་གྱི་སྔགས་བཟླ་རུང་ཞིང་ལས་ཚོགས་གང་བསྒྲུབ་ཐམས་ཅད་འགྲུབ་པའོ། །ད་ཐུགས་ཀྱི་དོན་དུ་སློབ་དཔོན་བདེ་མཆོག་ཡབ་ཡུམ་དུ་གསལ་བའི་ཐུགས་ཀ་ནས་འོད་ཟེར་འཕྲོས། ཨོ་རྒྱན་མཁའ་འགྲོའི་ཕོ་བྲང་དང་རང་བཞིན་གྱི་གནས་ནས་ཆོས་སྐྱོང་ཡབ་ཡུམ་དཔག་ཏུ་མེད་པ་སྤྱན་དྲངས། སློབ་དཔོན་བདེ་མཆོག་གི་ཞལ་དུ་ཞུགས། རྗེས་ཆགས་ཀྱི་མེས་འོད་དུ་ཞུ་ཡུམ་གྱི་མཁར་བབས་པས། ཕྱག་མཚན་གྱི་གྲི་གུག་དང་རྡོ་རྗེ་དང་དབྱུག་ཐོ་དགྲ་སྟུ་སོགས་དཔག་ཏུ་མེད་པར་གྱུར་ནས། ཁྱེད་རང་གི་ནམ་མཁར་ཅུང་ཟད་གནས་ཏེ་འོད་ཟེར་གྱི་རྣམ་པར་ཞུ་ནས་ཁྱེད་རང་རྣམས་ཀྱི་སྙིང་གར་ཐིམ་པའི་མོས་པ་མཛོད། རྡོ་རྗེ་དང་བཅས་པས་གཏོར་མ་བཟུང་། དྲིལ་བུ་བསིལ་ཞིང་། ཧཱུྃ། དཔལ་ལྡན་མཐུ་སྟོབས་དབང་ཕྱུག་ཆེ། །ཕྲིན་ལས་རྣམ་
བཞིའི་དོན་མཛད་པ། །དད་ལྡན་དམ་ཚིག་ཆེན་པོ་ཡིས། །གནས་འདི་ཉིད་དུ་གཤེགས་སུ་གསོལ། །གནས་འདི་ཉིད་དུ་གཤེགས་ནས་ཀྱང་། །དབང་བསྐུར་བྱིན་གྱིས་བརླབ་ཟླཏུ་གསོལ། །རྣལ་འབྱོར་སྐྱོང་ཕྱིར་ཐུགས་མ་རིང་། །སློབ་མའི་བསམ་པ་འགྲུབ་པར་མཛོད། ཨོ་གྷི་རཱ་ཛ་གྷི་རཱ་ཛ་ཀུ་མ་ཀུ་མ་ཁུམ་ཐིས་སྭཱ་ཧཱ། ༀ་ཤྲཱི་རཱ་ཛ་བྷི་རཱ་ཛ་ཁུ་མ་ཁུ་མ་ཁུམ་ཐིས་སྭཱ་ཧཱ། པྲ་ཝེ་ཤ་ཡ་ཧཱུྃ། པྲ་ཝེ་ཤ་ཡ་ཨཱ༔ ཏིཥྛ་བཛྲ་ཧཱུྃ། ཏིཥྛ་བཛྲ། ད་དལ་ཙམ་གཅིག་སེམས་མ་བཅོས་པར་ཞོག །ཧཱུྃ། རྒྱལ་བའི་ཐུགས་ཀྱི་ཕྲིན་ལས་ཀུན། །།མ་ལུས་གདུག་པ་ཀུན་འདུལ་ཕྱིར། །འཇིགས་པའི་སྐུར་སྟོན་འདོད་དོན་སྟེར། །དུར་ཁྲོད་བདག་པོའི་བཀྲ་ཤིས་ཤོག །དེས་ཐུགས་ཀྱི་དབང་ཐོབ། འདིའི་དམིགས་པ་རྣམ་བསྒོམ་པར་དབང་། ཉམས་རྟོགས་ཀྱི་བར་ཆད་ཞི་བ་ཡིན་ནོ། །དེ་ནས་གཏོར་མ་གསོ་བྲན་གཅིག་བྱས་ལ། ཨོཾ་ཨཱཿཧཱུྃ་ཧ་ཧོ་ཧྲཱི༔ བྱིན་གྱིས་བརླབས་ལ་རྩ་སྔགས་ལ་ཁཱ་ཧི་བཏགས་ལ་ཕུལ་ནས་གཏོར་མ་བཟུང་སྟེ་དམ་བཞག་ལན་གསུམ་བྱ་གསུངས་པའི་དོན་ནི། ཧཱུྃ། དཔལ་ལྡན་དུར་ཁྲོད་བདག་པོ་ཁྱོད། །སྔོན་ཚེ་བཅོམ་ལྡན་སྤྱན་སྔ་རུ། །ཀྱེ། གདུག་པ་འདུལ་མཛད་བཅོམ་ལྡན་འདས། ཧེ་རུ་ཀ་
དཔལ་བདག་ཉིད་ཆེ། །སྙིགས་མ་ལྔ་པོ་དར་བའི་ཚེ། །ལུས་ཀྱི་གདུག་པ་ཀུན་འཁྲུགས་པ། །ས་བདག་ཀླུ་ཡི་ནད་རྣམས་དར། །མ་མོ་མཁའ་འགྲོ་ཀུན་ནས་འཁྲུགས་པའི་ཚེ། །མི་རྣམས་བསོད་ནམས་ལོངས་སྤྱོད་ཆུང་བ་ཡིས། །བསགས་པའི་ནོར་རྣམས་རང་གིས་སྤྱད་དབང་མེད། །ཕ་དང་བུ་བྲན་ནོར་དང་ལོངས་སྤྱོད་ཉམས། །དེ་དུས་བཅོམ་ལྡན་བསྟན་པ་ནི། །དཔའ་བོ་བདག་གིས་སྲུང་བར་བགྱི། །ཞེས་པའི་ཁས་བླངས་དམ་བཅས་ནས། །བཅོམ་ལྡན་འདས་ཀྱིས་བཀའ་སྩལ་པ། །ལེགས་སོ་དུར་ཁྲོད་བདག་པོ་ཁྱོད། །སྲོག་གི་སྙིང་པོ་བདག་ལ་ཕུལ། །ཅེས་གསུངས་དུར་ཁྲོད་བདག་པོ་ཡིས། །སྲོག་གི་སྙིང་པོ་ཕུལ་ནས་ནི། །ཇི་ལྟར་ཁས་བླངས་དམ་བཅས་པ། །དམ་ལས་མ་འདའ་ད་ཚུར་བྱོན། །དམ་ལྡན་སློབ་མ་འདི་རྣམས་ཀྱིས། །བོས་པའི་ཚེ་ན་སྙན་མ་སྲ། །གཡབ་པའི་ཚེ་ན་སྤྱན་མ་རྟུལ། །ཆད་པའི་ཚེ་ན་མཐུ་མ་ཆུང་། །བསྟེན་པའི་ཚེ་ན་རྒྱང་མ་རིང་། །མཆོད་པའི་ཚེ་ན་མགུ་མ་དཀའ། །དམ་བཅས་བཞིན་དུ་ཕྲིན་ལས་མཛོད། །ཧོཿ དུར་ཁྲོད་ཀྱི་བདག་པོ་ཡབ་ཡུམ་འཁོར་དང་བཅས་པ་ཁྱེད་རྣམས་
ཀྱིས། བཅོམ་ལྡན་འདས་འཁོར་ལོ་སྡོམ་པ་ཡབ་ཡུམ། ཨོ་རྒྱན་པདྨ་འབྱུང་གནས། དམ་པ་རྒྱ་གར། ནག་པོ་སྤྱོད་པ་ལ་སོགས་དུར་ཁྲོད་ཉུལ་བའི་རྣལ་འབྱོར་གྱི་དབང་ཕྱུག་རྣམས་དང་། ཁྱད་པར་དུ་ཡང་། རྡོ་རྗེ་འཆང་། རྡོ་རྗེ་རྣལ་འབྱོར་མ། པདྨ་བཛྲ། ར་ཧུ་ལ། སྒེག་པའི་རྡོ་རྗེ། ཛྙཱ་ན་སིདྡྷི། དམ་ཚིག་རྡོ་རྗེ། འཆི་མེད་བློ་གྲོས། བེ་རོ་ཙ་ན་རཀྴི་ཏ། མཁས་པ་སྒ་ལོ་ཙཱ་བ། ས་ཆེན་ཀུན་དགའ་སྙིང་པོ། སློབ་དཔོན་རིན་པོ་ཆེ་བསོད་ནམས་རྩེ་མོ། རྗེ་བཙུན་གྲགས་པ་རྒྱལ་མཚན་ལ་སོགས་པ་རྩ་བ་དང་བརྒྱུད་པའི་བླ་མ་རྣམས་དང་། དཔལ་ཧེ་རུ་ཀའི་བཀའ་དང་དམ་ལ་མ་འདའ་བར་དཔལ་ལྡན་དུར་ཁྲོད་བདག་པོ་ཡབ་ཡུམ་འཁོར་དང་སློབ་མ་འདི་རྣམས་ལ་འགོ་བར་མཛད་དུ་གསོལ། སངས་རྒྱས་མ་ཐོབ་ཀྱི་བར་དུ་ཞི་བ་དང་། རྒྱས་པ་དང་། དབང་གི་ལས་དང་། བསད་བསྐྲད་དབྱེ་རྨོངས་རེང་ལ་སོགས། ཇི་ལྟར་བསྒོ་བའི་ལས་རྣམས་བསྒྲུབ། སངས་རྒྱས་དམ་ཚིག་རྗེས་དྲན་མཛོད། ཨོཾ་གྷི་རཱ་ཛ་གྷི་རཱ་ཛ་ཀུ་མ་ཀུ་མ་ཁུམ་ཐིས་སཱ་ཧཱ། ༀ་ཤྲཱི་རཱ་ཛ་གྷི་རཱ་ཛ་ཁུ་མ་ཁུ་མ་ཁུམ་ཐིས་སྭཱ་ཧཱ། དེ་ལྟར་དམ་བཞག་བྱས་
པས་ཕྲིན་ལས་བསྒྲུབ་པར་ཞལ་གྱིས་བཞེས་པར་སྒོམས་ཤིག །དེ་ལྟར་བཀའ་བསྒོས་པས་སྐྱེ་བ་ནས་ཚེ་རབས་ཐམས་ཅད་དུ་སྲུང་སྐྱོབ་བྱེད་པའོ། །དེ་ལྟར་དབང་ཐོབ་ནས་རྒྱུན་དུ་ཆོས་སྐྱོང་ལ་བསྟེན་པ་དང་། འདིའི་བསྙེན་སྒྲུབ་བྱེད་ཚེ་མཚམས་ཁུང་དུ་བུད་མེད་དང་ཁྱི་དང་སྨེ་ཅན་དང་བྱི་ལ་ཡན་ལ་འཛེམ་པ་སོགས་སྲུང་སྙམ་པས་རྗེས་ཟློས་མཛོད། གཙོ་བོས་ཇི་ལྟར་སོགས་བྱའོ། །དེ་ནས་ཚོགས་ཡོད་ན་ཡི་དམ་གང་ཡིན་ལྟར་བྱས་ལ་དུར་ཁྲོད་བདག་པོ་ཡབ་ཡུམ་ལ་ཡང་རྩ་སྔགས་ལ། ག་ཎ་ཙཀྲ་ཁཱ་ཧིས་བསྔོ། དམར་གཏོར་ཡོད་ན་བཀུག་གཞུག་བྱས་ཡབ་ཡུམ་གྱི་བསྐུལ་གང་རུང་བྱས་ལ་འབུལ། དབང་གཏོར་དངོས་གྲུབ་ཏུ་རོལ་ལོ། །རྗེས་སྤྱི་ལྟར་རོ། །འདི་འབྲུག་ལུགས་ནས་བརྒྱུད་པ་གནམ་ཆོས་ལུགས་སོགས་ཐོབ་མོད་ཀྱི། ས་ལུགས་ཀྱི་འདི་རྒྱུད་དང་རྒྱ་གཞུང་ཕུག་ཆེ་བ་དང་། བརྒྱུད་པའི་བླ་མ་རྣམས་ཀྱིས་ཀྱང་བསྙེན་སྒྲུབ་རྟགས་ཐོན་མཛད་པའི་རྒྱུན་མ་ཆད་པར་སྣང་བས་བྱིན་རླབས་ཆེ་བར་སེམས་ཏེ། གྲགས་པ་རྒྱལ་མཚན་ཡན་གོང་ལྟར་ལས། བླ་ཆེན་ཡར་སྒོམ། རྒྱལ་ཚབ་ལུང་མང་པོ། མཁས་ཡོན་ཏན་ཁྲིད། སེང་གེ་བཟང་པོ། ཡར་ལུང་སེང་གེ་རྒྱལ་མཚན། བསོད་ནམས་རྒྱལ་མཆོག །ནམ་མཁའ་རྒྱལ་མཚན། བདག་ཉིད་ཆེན་པོ་བློ་གྲོས་རྒྱལ་མཚན། དཔལ་ལྡན་རྒྱལ་པོ། སངས་རྒྱས་རིན་ཆེན། ལོ་ངད་སྤྱན་སྔ་བ།
ངག་གི་མཚན་ཅན། བསྟན་པ་རབ་དཀར། བསྟན་འཛིན་ཕུན་ཚོགས། བླ་མ་རིན་འཛིན་ཀརྨ་འོད་འཕྲོ། རཱ་ག་ཨ་སྱའོ། །ཞེས་པ་བླ་མ་ཀུན་དགའ་ཉི་མས་བསྐུལ་ནས། དཔལ་ལྡན་རྒྱ་མཚོའི་གསུང་བཞིན་སངས་རྒྱས་རིན་ཆེན་གྱི་བཀོད་པའི་དབང་ཆོག་རྙིང་པ་ལས། ལོ་རྒྱུས་དང་ཕྱག་ལེན་ཅུང་ཟད་གསལ་ཞིང་རྒྱས་པར་རཱ་ག་ཨ་སྱས་སྦྱར་བ་ལ་ཉེས་པ་མཆིས་ན་བཤགས་ཤིང་དགེ་བས་བྱང་ཆུབ་བསྒྲུབ་པའི་གང་ཟག་ཐམས་ཅད་ཀྱི་མཐུན་རྐྱེན་འགྲུབ་ཅིང་འགལ་རྐྱེན་དགྲ་ཇག་ཆོམ་རྐུན་ལ་སོགས་པའི་བར་ཆད་ཐམས་ཅད་ཞི་བར་གྱུར་ཅིག །འདི་མན་ངག་གི་ཆོས་ཡིན་པས་ཐུགས་དམ་བྱེད་ངེས་མ་གཏོགས་ལ་དབང་སོགས་མི་བྱ་ཞིང་། སྒྲུབ་པ་སྙོམས་ཆུང་འཚོ་བ་དཀོན་པ་དང་ཆོམ་རྐུན་འཚེ་བ་མང་པོ་ལ་ནི་གང་འཕེལ་བྱའོ། །གཞན་ཡང་རྟ་ཕྱུགས་སོགས་མང་དུ་འཚག་དགོས་པའི་བླ་མ་སོགས་ཀྱི་ཐུགས་དམ་བྱེད་ངེས་རེད་ན་སྤེལ་ན་ཕན་ཆེའོ། །མངྒ་ལཾ། རྐྱེན་ཟློག་གི་དབང་ཡོན་བདག་སོགས་ལ་ནི་མི་བྱའོ།། །།