གནམ་ཆོས་ཀྱི་ལྷན་ཐབས་གསང་བ་ཡང་སྙིང་གི་འཁོར་ལོའི་རྒྱུད་ནས་བསྒྲིགས་པ་མགོན་དཀར་ཡབ་ཡུམ་གྱི་བསྟོད་བསྐུལ།
གནམ་ཆོས་ཀྱི་ལྷན་ཐབས་གསང་བ་ཡང་སྙིང་གི་འཁོར་ལོའི་རྒྱུད་ནས་བསྒྲིགས་པ་མགོན་དཀར་ཡབ་ཡུམ་གྱི་བསྟོད་བསྐུལ་བཞུགས་སོ༔
རང་གི་མདུན་དུ་དུར་ཁྲོད་བདག་ཀེང་རུས་ལུས་ཅན་ཞལ་གཅིག་པ༔ ཕྱག་གཉིས་ཐོད་དབྱུག་བྷནྡྷ་འཛིན༔ དེ་ཡི་གཡོན་དུ་དུར་ཁྲོད་ཀྱི་བདག་མོ་ཀེང་རུས་ལུས་ཅན་མ༔ ཞལ་གཅིག་ཕྱག་གཉིས་ཐོད་དབྱུག་བྷན༔ ཞབས་གཉིས་གར་སྟབས་འཇིགས་པའི་གཟུགས༔ རང་རང་གནས་ནས་སྤྱན་དྲངས་གྱུར༔ ཧཱུྃ༔ དུར་ཁྲོད་ཆེན་པོའི་གནས་མཆོག་ནས་ཀེང་རུས་ཐོད་པའི་སྐུ་མཁར་ནས༔ རཀྟའི་རྦ་ཀློང་ད་ལ་ནས༔ དུར་ཁྲོད་བདག་པོ་ཡབ་དང་ཡུམ༔ བོས་པའི་ཚེ་ན་སྙན་མ་སྲ༔ གཡབ་པའི་ཚེ་ན་སྤྱན་མ་རྟུལ༔ ཐུགས་དམ་
དབང་གིས་གཤེགས་སུ་གསོལ༔ མི་རོ་བསྣོལ་བའི་གདན་ལ་བཞུགས༔ དགྲ་བགེགས་འདུལ་ཕྱིར་མཐུ་མ་ཆུང༔ རྣལ་འབྱོར་སྐྱོང་ཕྱིར་ཐུགས་མ་རིང་༔ གདུག་པ་འདུལ་ཕྱིར་བང་མ་ཞན༔ སྲུང་བའི་འཁོར་ལོ་སྐྱབས་མ་ཆུང་༔ འགྲོ་བ་སྲུངས་ཤིག་ཐུགས་རྗེ་ཅན༔ བདག་གིས་མཆོད་ཅིང་བསྟོད་པའི་ཚེ་དཀོར་ཁང་སྲུང་ཞིང་བར་ཆད་སོལ༔ ཡོན་བདག་སྲུངས་ཤིང་སྐྱབས་པ་དང་༔ རྣལ་འབྱོར་བསམ་པ་བསྒྲུབ་པ་དང་༔ ཆོས་སྐྱོང་ཐུགས་དམ་བསྐང་བ་དང་༔ བསོད་ནམས་རྒྱ་ཆེན་བསྐྱེད་པ་དང་༔ སངས་རྒྱས་བསྟན་པ་བསྲུང་བའི་
ཕྱིར༔ བཀའ་ཡི་གཏོར་མ་འདི་ལོངས་ལ༔ ཐུགས་དམ་བཞིན་དུ་ཕྲིན་ལས་མཛོད༔ ཨོ་གྷི་རཱ་ཛ་གྷི་རཱ་ཛ་ཀུ་མ་ཀུ་མ་ཁུམ་ཐིས་སྭཱ་ཧཱ༔ ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧྲཱི༔ སརྦ་པུ་ཙ་ཧོཿ ཧཱུྃ༔ དཔལ་ལྡན་དུར་ཁྲོད་བདག་པོ་ནི༔ གཏི་མུག་སྤང་ཕྱིར་ཀེང་རུའི་སྐུ༔ ཞལ་གཅིག་ཕྱག་གཉིས་སྐུ་མདོག་དཀར༔ ཞེ་སྡང་འཇོམས་ཕྱིར་ཐོད་དབྱུག་ཕྱར༔ འདོད་ཆགས་སྐེམ་ཕྱིར་ཐོད་ཁྲག་འཐུང་༔ གཡས་པས་ཐོད་དབྱུག་འབར་བ་ཡིས༔ དམ་ཉམས་དགྲ་བོའི་ཀླད་པ་བཅོམ༔ གཡོན་པས་ཐོད་པ་ཁྲག་བཀང་གིས༔ དགྲ་དང་བགེགས་ཀྱི་སྙིང་ཁྲག་འཐུང་༔ འབར་བའི་ཀེང་རུས་མཆེ་བ་གཙིགས༔ དུག་གསུམ་རྩད་ནས་གཅོད་པར་བྱེད༔ དབུ་ལ་རིན་ཆེན་པྲོག་ཞུ་གསོལ༔ དངོས་གྲུབ་ཀུན་གྱི་གཏེར་དང་ལྡན༔ མི་མགོ་ལྔ་བཅུས་དོ་ཤལ་བྱས༔ དུས་གསུམ་སངས་རྒྱས་མཆོད་པ་ཡིན༔ སྐུ་ལ་རིན་ཆེན་སྣ་ཚོགས་བརྒྱན༔ སྒྲུབ་པ་པོ་ལ་དངོས་གྲུབ་སྟེར༔ གཉིས་མེད་ཤེས་རབ་ཡུམ་ཆེན་མོ༔ རྒྱན་དང་ཆ་ལུགས་ཡབ་དང་མཐུན༔ འཇིགས་སུ་རུང་བའི་ཡབ་ཡུམ་སྐུ༔ བརྐྱང་བསྐུམ་གར་གྱིས་གདུག་པ་འདུལ༔ གད་མོ་སྒྲོག་ཅིང་འདོར་ཐབས་
ཚུལ༔ གདུག་པའི་དགྲ་བགེགས་ཚར་གཅོད་ཅིང་༔ དམ་ཚིག་ཅན་ལ་དངོས་གྲུབ་སྟེར༔ ཤེས་རབ་འཕེལ་བའི་དབང་ཕྱུག་སྟེ༔ རིག་སྔགས་ཟློག་པའི་མཐུ་ཟབོ་ཆེ༔ རང་རྟགས་སྲོག་སྙིང་སྒྲ་སྒྲོག་ཅིང་༔ དཔལ་ལྡན་ཡབ་ཡུམ་མཐུ་སྟོབས་ཅན༔ ཁྱེད་ཀྱི་སྤྲུལ་པས་གར་ཡང་ཁྱབ༔ རྩ་གསུམ་ལྷ་གནས་མན་ཆད་ནས༔ ན་རཀ་དམྱལ་ཁམས་ཡན་ཆད་དུ༔ སྤྲུལ་པ་བྱེ་བ་བསམ་ཡས་འགྱེད༔ ལྷ་སྲིན་སྡེ་བརྒྱད་ཁྱེད་ཀྱི་འཁོར༔ སྟོང་ཕྲག་བརྒྱད་ཅུ་ཁྱོད་ཀྱི་བྲན༔ འདིར་གཤེགས་བརྒྱན་པའི་གཏོར་མ་འདི༔ ཁྲོ་རྔམ་སྟབས་ཀྱིས་བཞེས་སུ་གསོལ༔ དམ་རྫས་མཆོད་གཏོར་འདི་བཞེས་ལ༔ ཀེང་རུས་གཟུགས་ཅན་ཁྲོ་བོ་ཡི༔ ཕྱག་གཡས་ཐོད་དབྱུག་གཡོན་ཞགས་པ༔ བསྣམས་ཤིང་ཤིན་ཏུ་འཇིགས་པ་ཡི༔ ཆ་བྱད་ཅན་གྱི་སྟོང་གསུམ་གང་༔ ཐམས་ཅད་ཟིལ་གྱིས་གནོན་བྱེད་ཅིང་༔ དགྲ་ཇག་ཆོམ་རྐུན་གཅན་སྤྱང་གི༔ དབང་པོ་ཡན་ལག་བཅིངས་བར་མཛོད༔ བཀྲ་ཤིས་འདོད་དགུའི་དངོས་གྲུབ་སྩོལ༔ བཅོལ་བའི་ཕྲིན་ལས་འགྲུབ་པར་མཛོད༔ ཨོ་གྷི་རཱ་ཛ་བྷི་རཱ་ཛ་ཀུ་མ་ཀུ་མ་ཊུ་ཐིས་མ་ཧྭ་ཐ་ནུ་དགྲ་རྐུན་ཇག་གསུམ་བྷན་དྷ་
བྷན་དྷ་སྭཱ་ཧཱ། ཞེས་གནམ་ཆོས་ཀྱི་ལྷན་ཐབས་སུ་རྒྱུད་ནས་གསུངས་པའི་བསྟོད་བསྐུལ་གྱི་རིག་བསྒྲིགས་པ་ཡིན་པས་རྒྱུད་ཚིག་བྱིན་རླབས་ཆེ་སྟེ༔ ནུབ་གཅིག་སྤྲུལ་སྐུས་རྐུན་ཆིང་གཅིག་དགོས་སོ་གསུངས་པ་རྨིས་པ་ལ་བརྟེན་ནས་བསྒྲིགས་པའོ༔ ཞེས་སྔགས་འཆང་རཱ་ག་ཨ་སྱས་བྲིས་པའོ༔ ༧ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།