དམ་པ་རྒྱ་གར་གྱིས་མཛད་པའི་དུར་ཁྲོད་བདག་མོ་མགོན་དཀར་གྱི་ལས་ཚོགས།
དམ་པ་རྒྱ་གར་གྱིས་མཛད་པའི་དུར་ཁྲོད་བདག་མོ་མགོན་དཀར་གྱི་ལས་ཚོགས་བཞུགས་སོ། །
ན་མཤི་ཙཀྲ་སཾ་བ་ར་ཡ། མགོན་དཀར་དུར་ཁྲོད་བདག་མོའི་ལས་ཚོགས་དམ་པ་རྒྱ་གར་གྱིས་མཛད་པའི་དགྲ་རྐུན་འཆིང་ཐབས་ལ། འཁོར་ལོའི་རྟེན་གྱི་མདུན་དུ་དུར་ཁྲོད་བདག་མོའི་གཏོར་མ་མཆོད་པ་བཤམས་ལ། རང་ཉིད་དམ་པ་རྒྱ་གར་སྐུ་མདོག་སྨུག་ནག་རུས་རྒྱན་ཅན། ཕྱག་གཡས་འཁར་བསིལ་དང་། གཡོན་ལྕགས་ཀྱི་མདའ་གཞུ་བསྣམས་པ། འཁོར་གྲུབ་ཆེན་བརྒྱད་ཅུའི་ཚོགས་གཅེར་བུ་རུས་ཅན་གྱིས་བསྐོར་བར་བསམ། མདུན་དུ་དུར་ཁྲོད་བདག་མོ་ཤིན་ཏུ་ཁྲོས་པ་ཀེང་རུས་གར་བྱེད་པའི་གཟུགས་ཅན། ཕྱག་གཡས་དབྱུག་ཐོ་འཕྱར་ཞིང་གཡོན་བྷནྡྷ་དམར་པོ་ཁྲག་གིས་གང་བ་ཐུགས་
ཀར་འཛིན་པ། དར་གྱི་ཤམ་ཐབས་ཅན། རང་འདྲ་བའི་ཡབ་གཡས་སུ་གནས་པ། གཞན་ཡང་གནས་གསུམ་དང་། ཕོ་ཉ་དང་འཇིག་རྟེན་དང། དམ་ཚིག་དང་། ཤ་ཟའི་མཁའ་འགྲོ་མ་རྗེ་མོ་བཅུ་བཞི། སྲིད་པའི་སྨན་མོ་བཅུ་བཞི། སྲིད་པའི་སྨན་མོ་ལྔ་བཅུ་རྩ་བརྒྱད་ལ་སོགས་འཇིགས་བྱེད་མ་མོའི་ཚོགས་ཆར་སྤྲིན་ལྟར་དུ་འཁྲིགས་པའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུྃ་ལས་འོད་ཟེར་འཕྲོས་པས་རང་བཞིན་གྱི་གནས་ནས་སྤྱན་དྲངས། ནས་མདུན་བསྐྱེད་ལ་བསྟིམ། ཧཱུྃ་ཛཿ བདེ་མཆོག་རྣམ་སྤྲུལ་མགོན་དཀར་ཡབ་ཡུམ་ནི། །ཀེང་རུས་ཆེན་
པོ་དབྱུག་ཐོ་ཐོད་ཁྲག་བསྣམས། །དུར་ཁྲོད་ཀུན་ནས་འདིར་གཤེགས་མདུན་དུ་བཞུགས། །རང་འདྲའི་སྤྲུལ་པས་འཇིག་རྟེན་ཐམས་ཅད་ཁེངས། །གནོད་བྱེད་དགྲ་ཇག་ཆོམ་རྐུན་གཅན་གཟན་རྣམས། །དབྱུག་ཐོས་བརྡུང་ཞིང་སྦྲུལ་གྱི་ཞགས་པས་བཅིངས། །ཐོད་ཁྲག་རླངས་པས་གདུག་པ་མྱོས་ཤིང་རྨོངས། །ཐམས་ཅད་ཚུར་འདུས་བདག་ཅག་མི་ནོར་གྱི། །མཐའ་ནས་བསྐོར་ཞིང་ཉིན་མཚན་རྒྱུན་དུ་སྲུངས། །གནོད་བྱེད་དཔག་ཚད་ཙམ་དུ་བསྐྲད་པར་གྱུར། །ཨོ་གྷི་རཱ་ཛ་གྷི་རཱ་ཛ་ཀུ་མ་ཀུ་མ་ཁུམ་ཐིས་སྭཱ་ཧཱ། །ཞེས་བཟླ། གལ་ཏེ་རྟ་ནོར་རྣམས་ལ་དགྲ་རྐུན་གྱི་གནོད་པ་བསྲུངས་ན་ནོར་ཕྱུགས་ཤི་བའི་རུས་པ་སྐམ་པོ་མང་པོ་ལ་སྔགས་འདི་ཚེག་མེད་པ་དབུ་ཅན་བྲིས། ཨོགྷིརཛགྷིརཛཀུམཀུམཁཾཐིསམཧཱཐརནིདགྲརྐུན་ཇགགསུམབྷནྡྷབྷནསྭཱཧཱ། །ཞེས་བྲིས་པ་རྟ་ནོར་གྱི་མཐའ་ནས་བསྐོར་ལ་དེ་ལ་དུར་ཁྲོད་བདག་མོ་བཀུག་ཅིང་བསྟིམ་ལ། སྔགས་འདི་མང་བཞིན་བརྗོད་ན་དེ་ནུབ་དགྲ་རྐུན་ཇག་རྣམས་ཀྱི་མིག་ཡུལ་དུ། ཀེང་རུས་མེ་འབར་བ་འུར་རྡོ་བཟུང་བ་མང་པོས་རྟ་ནོར་གྱི་མཐའ་ནས་བསྐོར་ཞིང་བསོ་སྒྲ་དང་བཤུགས་གླུ་དྲག་པོ་ལེན་ཅིང་དགྲ་རྐུན་རྣམས་ཀྱིས་མ་ཐོབ་པ་སྡུག་པ་བཤད་དོ། །ཡང་གཅིག་ལ་མིས་མ་མཐོང་བ་མ་འགོང་བའི་ས་ནས་བྱེ་མ་བླངས་ལ་གོང་གི་སྔགས་དེ་གྲངས་མང་བཏབ་ལ་རྟ་ནོར་གྱི་མཐའ་ནས་
བསྐོར་ལ་གཏོར་བ་དེས་ཆོག་པར་བཤད་དོ། །མཐར་མཆོད་བསྟོད་ནི། ཨོཾ་བཛྲ་ཨརྒྷཾ་པྲ་ཏཱིཙྪ་ཧཱུྃ་སྭཱ་ཧཱ། པཱདྱེ་པུཥྛ་དྷ་པེ་ཨཱ་ལོ་ཀེ་གནྡྷེ་ནེཝི་དྱ་ཤཔྟ་པྲ་ཏཱིཙྪ་ཧཱུྃ་སྭཱ་ཧཱ། མ་ཧཱ་པཉྩ་ཨ་མྲྀ་ཏ་རཀྟ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧྲཱི༔ ཧཱུྃ༔ རབ་འཇིགས་དུར་ཁྲོད་ཀུན་གྱི་བདག་མོ་སྟེ། །ཁྱད་པར་སོ་ས་གླིང་གི་ཞིང་སྐྱོང་བ། །ཀེང་རུས་ཆེན་པོ་གར་བྱེད་མཆེ་བ་གཙིགས། །རང་འདྲའི་ཡབ་བཅས་ཁྲོ་བོ་ཁྲོ་མོའི་སྐུ། །རབ་གཏུམ་དབྱུག་ཐོ་འཕྱར་ཞིང་ཐོད་ཁྲག་འཛིན། །དར་དང་རིན་ཆེན་རྒྱན་གྱིས་ལེགས་པར་བརྒྱན། །ཤ་ཟ་ཕོ་མོའི་ཁྲོམ་གྱིས་ལེགས་བསྐོར་ནས། །མཚན་བཞིན་དུར་ཁྲོད་ཉུལ་ལ་ཕྱག་འཚལ་བསྟོད། །དམ་རྫས་བརྒྱན་པའི་གཏོར་མ་འདི་བཞེས་ལ། །རྒྱ་གར་ཡུལ་གྱི་དུར་ཁྲོད་གནས་བརྒྱད་དུ། །ཕ་གཅིག་དམ་པས་ཇི་ལྟར་བཀའ་བསྒོས་བཞིན། །བདག་ཅག་མི་ནོར་གཞི་བྱེས་ཐམས་ཅད་ལ། །དགྲ་རྐུན་གཅན་གཟན་གནོད་པ་ཐུབ་པར་སྲུངས། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཅེས་ཕུད་རྒོད་མཆོད་ལ་སརྦ་གཙྪས་རང་གནས་གཤེགས་པའམ། དགོན་པ། གྲོང་ཡུལ། མགྲོན་པོ་སོགས་གང་བསྲུང་བའི་ཕྱོགས་སུ་ཀེང་རུས་དུར་བདག་ཆོས་སྐྱོང་ཚོགས་ཀྱིས་
བསྐོར་ནས་བསྲུང་བ་ཡང་ཡང་བསྒོམ་ལ། ཨོཾ་གྷི་རཱ་ཛ་གྷི་རཱ་ཛ་ཀུ་མ་ཀུ་མ་ཁུམ་ཐིས་མ་ཧཱ་ཐར་ནི་དགྲ་རྐུན་ཇག་གསུམ་བྷནྡྷ་བྷནྡྷ་སྭཱ་ཧཱ། ཞེས་འདོན་མི་མང་པོས་འུར་འདོན་བྱས་ན་ལེགས། རང་ཉིད་གཅིག་པུ་ཡིན་ན་བརྒྱ་སྟོང་ཁྲི་སོགས་འདོན། ཨོ་ན་མསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཛྭ་ལ་ཡ་ཛྭ་ལ་ཡ་ཧཱུྃ་ཕཊ༔ དགྲ་ཇག་གཅན་གཟན་ཆོམ་རྐུན་ཐམས་ཅད་ཆིངས་ཤིག །ཅེས་གང་མང་བཟླའོ། །དུར་ཁྲོད་བདག་མོ་ཡབ་ཡུམ་ཀེང་རུས་གར་བྱེད་པའི་གཟུགས་ཅན་གཡས་དབྱུག་ཐོ་དང་གཡོན་ཐོད་ཁྲག་སྦྲུལ་ཞགས་བསྣམས་པ་བྱེ་བ་དུང་ཕྱུར་མང་པོ་འཕྲོས་ནས། གནོད་བྱེད་དགྲ་རྐུན་ཇག་གསུམ་གཅན་སྤྱང་ཐམས་ཅད་ཀྱི་མགོ་དབྱུག་ཐོས་རྡུངས། ཡན་ལག་སྦྲུལ་ཞགས་ཀྱིས་བཅིངས། ཐོད་ཁྲག་གི་རླངས་པ་སྤྲིན་དམར་ལྟ་བུར་དཔག་ཏུ་མེད་པ་འཁྲིགས་པས་གནོད་བྱེད་ཐམས་ཅད་ཀྱི་དབང་པོ་མྱོས་ཤིང་འཐིབ་པར་བསྒོམ། བཀའ་བསྒོ་རྒྱུན་དུ་བྱ་ཞིང་གཏོར་མ་འབུལ་བར་ཟབྱའོ། འདི་ནི་བདེ་མཆོག་ཡི་དམ་དང་། དུར་བདག་ཆོས་སྐྱོང་བྱེད་མཁན་རྣམས་ཀྱིས་འདི་ཉིད་བརྩོན་ན་མྱུར། ཞེས་པ་འདི་ནི་གསར་རྙིང་གཅོད་སོགས་ཀྱི་དོན་ཏེ་ལག་ཏུ་བླང་བདེ་བ་བཀོད་པ་འདི་ནི་རཱ་ག་ཨ་སྱས་སོ།། ། །༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།