དུར་བདག་ཞལ་གདམས།
ན་མོ་ལོ་ཀི་ཤྭ་ར་ཡེ། བཅོམ་ལྡན་འདས་ཐུགས་རྗེ་ཆེན་པོ་ལ་ཕྱག་འཚལ་ལོ། །སྒྲུབ་པ་པོའི་གནས་དང་ཡོ་བྱད་བསྲུང་ཐབ་ཆེ་ཕྲ་དུ་མ་གསུངས་མོད་ཀྱི། མཆོག་ཏུ་གྱུར་པ་འདི་ལྟ་སྟེ། གནས་ཁང་གི་སྒོ་དང་རྟ་ཕྱུགས་ལ་རི་སྤུ་མའི་ཙཀྲ་བཏགས་ཐུབ་ན་རབ། རྟ་ཕྱུགས་ལ་བཟླ་བྱའི་སྔགས་འདིའི་ཤོག་དྲིལ་དང་ཡུངས་ཀར་སྔགས་པའི་རས་ཐུམ་དཀར་པོ་བཏགས་པ་འབྲིང་། ཐ་ཀླུམ་སྲུང་སྐུད་དཀར་པོ་ལ་མདུད་ནས་སྔགས་ཏེ་བཏགས། ས་གཙང་མ་ལ་མང་དུ་བཟླས་ནས་ནུབ་མོ་རང་དང་མཚམས་གཡོག་གཉིས་ལས་གཞན་གྱིས་མ་ཚོར་བར་གནས་ཁང་གི་མཐའ་ལ་སས་བསྐོར་རོ། །ནོར་ཕྱུགས་ཀ་ཆ་ལ་ཡང་གཏོར། དེ་རོགས་ཀྱིས་མ་ཚོར་བ་རྟེན་འབྲེལ་གྱི་དམ་ཚིག་ཡིན་ནོ། དུར་ཁྲོད་བདག་པོའི་གཏོར་མ་ཞིག་གསོས་ནས། སྲོད་ལ་དེའི་གཏོར་ཆོག་འདོན་ཐུབ་ན་རབ། མ་ཐུབ་ན་སྤྱན་འདྲེན་ཤོ་ལོ་ཀས་སྐད་ཅིག་ལ་སྤྱན་དྲངས་ལ་སྔགས་ཀྱིས་གཏོར་མ་བསྔོས། ཆོམ་རྐུན་བསྲུང་བར་འདོད་གསོལ་བྱས། བསྟོད་པ་ཤོ་ལོ་ཀ་གཅིག་གིས་བསྟོད་ལ་འབྲིང་། ཐ་མ་སྔགས་བརྗོད་པ་ཙམ་གྱིས་མདུན་དུ་སྐད་ཅིག་ལ་དམ་ཡེ་དབྱེར་མེད་དུ་བསྐྱེད་ལ། སྔགས་ལ་ཁཱ་ཧི་བཏགས་པས་གཏོར་མ་བསྔོས། རང་ཡི་དམ་གྱི་ཐུགས་ཀ་ནས་འོད་ཟེར་འཕྲོས་དུར་ཁྲོད་བདག་
པོ་ཡབ་ཡུམ་ལ་ཕོག་པས། དེ་གཉིས་ལས་རང་འདྲ་བ་བྱེ་བ་དུང་ཕྱུར་འཕྲོས། གནོད་བྱེད་ཆོམ་རྐུན་རིང་ལ་གནོད་པར་སེམས་པ་ཐམས་ཅད་དབྱུག་ཐོས་བརྒྱབས་པས་དྲན་མེད་དུ་སོང་བས་གནོད་སེམས་དང་བྲལ་ཕྱག་གཡོན་སྦྲུལ་ཞགས་ཀྱིས་རྐང་ལག་བཅིངས་ཏེ་ནུས་པ་མེད་པར་བྱས། སླར་སྤྲུལ་པ་ཐམས་ཅད་ཚུར་འདུས་པས་རང་དང་བསྲུང་བྱའི་གནས་ཁང་གི་ཐ་མ་ནས་ཐམས་ཅད་ཞལ་ཕྱིར་གྱུ་ཏེ་སྔགས་སྒྲ་དང་ཀུ་སྒྲ་བཤུད་གླུ་དང་བཅས་ཉིན་མཚན་དུ་སྲུང་བར་བསྒོམ་ལ། ཨོཾ་གྷི་རཱ་ཛ་གྷི་རཱ་ཛ་ཀུ་མ་ཀུ་མ་ཁུམ་ཐིས་སཱ་ཧཱ། མ་ཧཱ་ཐ་ནུ་གནོད་བྱེད་དགྲ་ཇག་ཆོམ་རྐུན་ཐམས་ཅད་བྷན་བྷན་སཱ་ཧཱ༔ ཞེས་བརྒྱ་རྩ་བརྒྱད་སོགས་གལ་ཆེ་ན་དེ་ལྷག་གམ་སྐབས་དང་སྦྱར་ལ་ནུབ་མོ་རྒྱུན་དུ་མ་ཆག་པར་བྱས་པས་ཤིན་ཏུ་ཟབ་བོ། །གཞན་སྲུང་ན་ཡང་གདམས་པ་འདི་ཕྲད་ན་རབ། མ་འཕྲད་ཀྱང་ཏིང་ངེ་འཛིན་གྱིས་སྲུང། གནས་སུ་འགྲོ་བ་ལ་ཡང་ཀེང་རུས་ཡབ་ཡུམ་མང་པོ་སྤྲོས་པས་ཕྱོགས་དེའི་དགྲ་ཇག་བཅིང་བ་དང་བསྐྲད་པར་བསྒོམ། དགྲ་བྲུབ་བརྒྱབ། གཏོར་བསྔོས་ཞོར་སོགས་ཡབ་ཡུམ་གཏོར་འབུལ་བསྐུལ་སོགས་བྱ། འདི་ནི་དང་པོའི་ཐུགས་བསྐྱེད་སྨོན་ལམ་གྱི་གནད་ཀྱིས་གཞན་ལས་ཟབ་བོ༔ ལྕེ་ཞེས་ཨ་རཱ་གས་སོ།།