མགོན་དཀར་དུར་ཁྲོད་བདག་པོ་ཡབ་ཡུམ་དང་དཀོར་བདག་ངེ་ནུས་མ་བཅས་ཀྱི་རྒྱུན་གསོལ་རྐུན་སྲུང་།
མགོན་དཀར་དུར་ཁྲོད་བདག་པོ་ཡབ་ཡུམ་དང་། དཀོར་བདག་ངེ་ནུས་མ་བཅས་ཀྱི་རྒྱུན་གསོལ་རྐུན་སྲུང་ནི། གསེར་སྐྱེམས་སོགས་ཕུད་མཆོད་བཤམས་ལ། རང་སྤྱན་རས་གཟིགས་དངོས་སུ་ཡིན་པར་བསམ། མདུན་དུ་དུར་ཁྲོད་བདག་པོ་ཡབ་ཡུམ་གཉིས་ཀེང་རུས་ཆེན་པོ་ཐོད་དབྱུག་དང་ཐོད་ཁྲག་འཛིན་པ་ཁྲ་སྤུང་ངེ་བ་ཤིན་ཏུ་ཆེ་ལ་འཇིགས་པ་བྱོན་པར་བསམ། ངེས་ནུས་མའང་། ལྷ་མོ་དཀར་མོ་དྲེའུ་ལ་ཞོན་པ་ལག་ན་ལྕགས་ཀྱུ་དང་ལྕགས་སྒྲོག་གི་དྲ་བ་ཁུག་མའི་རྣམ་པ་ཅན་བཟུང་བ་དེ་འདྲ་བ་མང་པོར་བྱུང་བར་བསམ་ལ། རཾ་ཡཾ་ཁཾ། ཨོཾ་ཨཱཿཧཱུྃ། གསུམ། ཧཱུྃ་ཛཿ བདེ་མཆོག་རྣམ་འཕྲུལ་མགོན་དཀར་ཡབ་ཡུམ་ནི། །ཀེང་རུས་ཆེན་པོ་དབྱུག་ཏོ་ཐོད་ཁྲག་འཛིན། །དུར་ཁྲོད་ཀུན་ནས་འདིར་གཤེགས་མདུན་འདིར་བཞུགས། །དམ་རྫས་བདུད་རྩིའི་གསེར་སྐྱེམས་འདི་བཞེས་ལ། །རང་འདྲའི་སྤྲུལ་པས་འཇིག་རྟེན་ཐམས་ཅད་གང་། །གནོད་བྱེད་དགྲ་ཇག་ཆོམ་ཀུན་གཅན་གཟན་རྣམས། །དབྱུག་ཏོས་བརྡུངས་ཤིང་སྦྲུལ་གྱི་ཞགས་པས་ཆིངས། །ཐོད་ཁྲག་རླངས་པས་གདུག་པ་མྱོས་ཤིང་རེངས། །ཐམས་ཅད་ཚུར་འདུས་བདག་ཅག་མི་ནོར་གྱི། །མཐའ་ནས་བསྐོར་ཞིང་ཉིན་མཚན་རྒྱུན་དུ་སྲུངས། །གནོད་བྱེད་དཔག་ཚད་ཙམ་དུ་བསྐྲད་པར་གྱུར། །བྷྱོ། བདེན་བྲལ་མུན་
པ་ཅན་གྱི་དུར་ཁྲོད་ནས། །སྐོར་གྱི་བདག་པོ་རྡོ་རྗེ་ངེ་ནུས་མ། །འདིར་གཤེགས་དམ་རྫས་བདུད་རྩིའི་གསེར་སྐྱེམས་བཞེས། །དཀོར་རྣམས་སྲུང་ཞིང་སྐྱོབ་པའི་ལས་མཛོད་ལ། །གནོད་བྱེད་དགྲ་རྐུན་ལག་ཏུ་མ་ཤོར་ཅིག །ཅེས་ཕུད་ནམ་མཁར་མཆོད་ལ་གོང་ལྟར་བསྒོམ་ལ་ཉིན་མཚན་རྒྱུན་དུ་མི་འབྲལ་བར་རྒྱུ་ནོར་ཐམས་ཅད་བསྲུངས་ནས། དགྲ་རྐུན་ཇག་པ་གཅན་གཟན་གནོད་པ་བྱེད་པ་ཐམས་ཅད་ཡུལ་གཞན་དུ་བསྐལ་བར་བསམ། འགའ་ཞིག་གྲུ་གུ་བཞིན་དུ་བསྡོམས་ཏེ་བཅིངས་ནས། མགོ་ལ་རྨུ་གབ་ནག་པོས་གཡོག་པར་བསམ་ལ་སྔགས་འདི་དག་ནངས་ནུབ་བརྒྱ་རེ་མ་ཆག་པར་བཟླའོ། །ཨོ་གྷི་རཱ་ཛ་གྷི་རཱ་ཛ་ཀུ་མ་ཀུ་མ་ཁུམ་ཐིས་སྭཱ་ཧཱ། ཨོ་ར་ལི་པྲ་མ་ཡེ་ས་མ་ཡེ་ཛཿཛཿ གནོད་བྱེད་ཐམས་ཅད་བྷན་བྷནྡྷ་ཨུ་ཙ་ཏ་ཡ་ཕཊ༔ ཅེས་སྔགས་འདི་དག་ནངས་ནུབ་བརྒྱ་རྩ་རེ་མ་ཆག་པར་བྱ། དེ་ཡན་རྒྱུན་དུ་ཇག་རྐུན་གཅན་གཟན་སོགས་ཀྱིས་གནོད་བྱེད་མི་ནུས། དེ་ནི་གསེར་སྐྱེམས་སམ་མཆོད་པ་ཚར་རེ་མ་ཆག་པར་བྱ་དགོས། གལ་ཏེ་དོ་གལ་ཆེ་ཞིང་གནོད་པའི་སར་འགྲོ་སྡོད་བྱ་དགོས་བྱུང་ན་གསེར་སྐྱེམས་ཉིན་རེ་དུས་གསུམ་འདོན། ཡང་ན་ཚར་དགུ་ཙམ་འདོན་ལ་ཕུད་ལན་དགུ་མཆོད། སྔགས་དེ་སྟོང་ཕྲག་ཙམ་བཟླས་པའམ་བྱེ་མ་ལ་སྔགས་ནས་དོ་ནུབ་སྒར་གྱི་མཐའ་ནས་བསྐོར་བར་བྱས་ལ་བྱེ་མ་གཏོར། སྐུད་པ་དཀར་པོ་ལ་སྔགས་ནས་མདུད་པ་བོར་ཏེ། རྟ་ནོར་སོགས་ལ་
བཏགས་སོ། །དེ་ལྟར་བྱས་ན་ཇག་རྐུན་སོགས་ལ་ཤོར་མི་སྲིད་དོ། །འདི་གཅན་གཟན་གྱི་འཚེ་བ་ལའང་ཤིན་ཏུ་ཕན་པ་ཡིན། འདི་ནི་སྒྲུབ་ཐབས་རྒྱས་བསྡུས་འགའ་ཡི་ནང་ནས་ཉེར་མཁོ་ཉམས་ཆུང་ལ་ཕན་ཕྱིར་ཁོལ་དུ་ཟཕྱུང་སྟེ་བྲིས་པའོ། །ཨ་རཱ་གས་སོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།