མགོན་དཀར་དུར་ཁྲོད་ཀྱི་བདག་པོ་རྒྱུན་ཁྱེར་ཉམས་ལེན་ཟིན་བྲིས་འཇིགས་པ་ཀུན་སྐྱོབས།
མགོན་དཀར་དུར་ཁྲོད་ཀྱི་བདག་པོ་རྒྱུན་ཁྱེར་ཉམས་ལེན་ཟིན་བྲིས་འཇིགས་པ་ཀུན་སྐྱོབས་ཞེས་བྱ་བ་བཞུགས་སོ། །སྣོད་མིན་ལ་གསང་རྒྱ་ཁ་ཐཾ༔
ཧཱུྃ་ཛཿ བདེ་མཆོག་རྣམ་འཕྲུལ་མགོན་དཀར་ཡབ་ཡུམ་ནི། །ཀེང་རུས་ཆེན་པོས་དབྱུག་ཏོ་ཐོད་ཁྲག་འཛིན། །དུར་ཁྲོད་གནས་ནས་འདིར་གཤེགས་མདུན་འདིར་བཞུགས། །དཀར་གསུམ་མངར་གསུམ་མཆོད་པ་འདི་བཞེས་ལ། །རང་འདྲའི་སྤྲུལ་པས་འཇིག་རྟེན་ཐམས་ཅད་གང་། །གནོད་བྱེད་དགྲ་བགེགས་ཆོམ་རྐུན་མ་ལུས་རྣམས། །ངན་སྨྲས་ཕྲ་མ་བྱེད་པ་ཐམས་ཅད་ཀུན། །དབྱུག་ཐོས་རྡུངས་ཤིང་སྦྲུལ་གྱི་ཞགས་པས་བཅིངས། །ཐོད་ཁྲག་རླངས་པས་གདུག་པ་མྱོས་ཤིང་རེངས། །ཐམས་ཅད་ཚུར་འདུས་བདག་ཅག་མི་ནོར་གྱི། །མཐའ་
ནས་བསྐོར་ཞིང་ཉིན་མཚན་རྒྱུན་དུ་སྲུང་། །གནོད་བྱེད་དཔག་ཚད་ཙམ་དུ་བསྐྲད་པར་གྱུར། །ཨོ་གྷི་རཱ་ཛ་གྷི་རཱ་ཛི་ཀུ་མ་ཀུ་མ་ཁུམ་ཐིས་སྭཱ་ཧཱ། ཞེས་བསྙེན་པ་འབྲུ་བཅོ་ལྔའོ། །ཨོ་གྷི་རཱ་ཛ་གྷི་རཱ་ཛ་ཀུ་མ་ཀུ་མ་ཁུམ་ཐིས་མ་ཧཱ་ཐ་ནུ་དགྲ་རྐུན་ཇག་གསུམ་བྷན་དྷ་བྷན་དྷ་སྭཱ་ཧཱ༔ དུར་ཁྲོད་བདག་པོ་མགོན་དཀར་ཡབ་ཡུམ་འདི། །ངོ་བོ་བདེ་མཆོག་རྣམ་འཕྲུལ་ཡིན་པའི་ཕྱིར། །ཕྱི་མའི་ས་ལམ་བར་ཆད་སེལ་བར་ནུས། །སྔོན་ཚེ་མུ་གེ་ཆེན་པོ་བྱུང་བའི་ཚེ། །ལྕམ་དྲལ་གཉིས་ཀྱིས་ཤ་ཁྲག་ཕ་མ་གསོས། །མུ་གེ་མེད་དང་ཤ་ཁྲག་ཟད་པ་མཉམ། །དེ་དུས་བདེ་མཆོག་ཞལ་གཟིགས་སྨོན་ལམ་བཏབ། །མ་འོངས་བཀྲེས་སྐོམ་དབུལ་ཕོངས་སེལ་བ་དང་། །
དགྲ་ཇག་གཅན་སྤྱང་དུད་འགྲོ་འཕེལ་བ་དང་། །ཡབ་ཡུམ་བདེ་མཆོག་ལྷ་སྲིན་སྡེ་བརྒྱད་བཅས། །སྨོན་ལམ་མགྲིན་གཅིག་བཏབ་པ་དེ་ཡི་མཐུས། །ནོར་ལྷའི་མཆོག་ཡིན་ཇག་རྐུན་འཆིང་བར་རྣོ། །རྒྱུད་ནི་འཁོར་ལོ་སྡོམ་པས་གསུངས་པ་སྟེ། །རྒྱ་གཞུང་པཎ་ཆེན་བཻ་རོ་ཙཱ་ནས་མཛད། །སྒྲུབ་ཐབས་རྒྱས་བསྡུས་མང་པོ་ལོགས་སུ་གསལ། །འདི་ནི་རྒྱུན་ཁྱེར་ལམ་སྲུང་ཉེར་མཁོ་སྟེ། །བདག་བསྐྱེད་ཡི་དམ་བདེ་མཆོག་ཡིན་ན་བཟང་། །མིན་ཀྱང་ཡི་དམ་གང་རུང་གསལ་བར་བསྒོམ། །དེ་ཡི་ཐུགས་ལས་འོད་ཟེར་འཕྲོས་པ་ཡིས། །རྒྱ་གར་ཡུལ་གྱི་དུར་ཁྲོད་གནས་བརྒྱད་དང་། །ནུབ་ཕྱོགས་ཨོ་རྒྱན་ཡུལ་གྱི་དུར་ཁྲོད་བརྒྱད། །ཁྱད་པར་སོ་ས་གླིང་གི་དུར་ཁྲོད་ནས། །མགོན་དཀར་ཡབ་ཡུམ་སྤྱན་དྲངས་མདུན་དུ་བཞུགས། །ཡབ་ཀྱི་ཐུགས་ཀར་ཟླ་སྟེང་ཧཱུྃ་ཡིག་དཀར། །དེ་མཐར་ཡབ་ཀྱི་སྔགས་ཕྲེང་གཡས་སུ་འཁོར། །ཡུམ་གྱི་ཐུགས་ཀར་ཉི་སྟེང་ཛ་དམར་པོ། །དེ་མཐར་ཡུམ་གྱི་སྔགས་ཕྲེང་གཡོན་དུ་འཁོར། །ཡུམ་སྔགས་ཛ་ཡི་ཚབ་ཏུ་ཟ་ཡིན་ཏེ། །འདོན་ནི་མི་དགོས་བསྒོམས་པས་ཆོག་པ་ཡིན། །རང་གི་ཐུགས་ལས་འོད་འཕྲོས་ཡབ་ཡུམ་ལ། །ཕོག་པས་སྔགས་ཕྲེང་དྲག་འཁོར་དམ་ཚིག་དྲན། །རང་འདྲའི་སྤྲུལ་པ་གཅིག་འཕྲོས་གཅིག་ལས་གཉིས། །གཉིས་ལས་བཞི་དང་བཞི་ལས་བརྒྱད་དུ་གྱུར། །བརྒྱད་ལས་བཅུ་དྲུག་དེ་ལས་གྲངས་མེད་གྱུར། །ཕྱོགས་བཅུ་ཀུན་ཏུ་རྒྱུག་ཅིང་རླུང་ལྟར་འཚུབ། །རང་ལ་གནོད་པར་གྱུར་ཞིང་གནོད་སེམས་ཅན། །དགྲ་ཇག་ཆོམ་རྐུན་གཅན་གཟན་ཐམས་ཅད་
ཀྱིས། །མགོ་དང་སྙིང་ཁར་དབྱུག་ཏོས་དྲག་ཏུ་བརྡུང་། །མགོ་འཁོར་དྲན་པ་གཏོར་ཞིང་ནག་ཐོམ་སོང་། །སྦྲུལ་ཞགས་མང་པོས་རྐང་ལག་བསྡམས་ཏེ་བཞག །ཐོད་ཁྲག་རླངས་པ་ན་བུན་ལྟ་བུ་ཡི། །གདུག་པས་མྱོས་ཤིང་རྐང་ལག་ཤིང་ལྟར་རེངས། །དེ་ནས་སྤྲུལ་པ་ཐམས་ཅད་ཚུར་འདུས་ཏེ། །བདག་ཅག་མི་ནོར་འཁོར་དང་བཅས་པ་ཡི། །མཐའ་ནས་བསྐོར་ཞིང་གྲལ་ནི་རིམ་པ་གསུམ། །དབྱུག་ཐོ་ཕྱར་ཞིང་མིག་ནི་དམར་ཧ་རེ། །བཤུད་པ་ཙེར་ཙེར་ཀུ་སྒྲ་ལྷང་ལྷང་སྒྲོག །ཉིན་མཚན་མེད་པར་རྒྱུན་དུ་དེ་ལྟར་བསྲུང་། །གནོད་བྱེད་དཔག་ཚད་མི་གནས་འབྲོས་པར་བསྒོམ། །གལ་ཏེ་བསྲུང་བྱའི་ཕྱོགས་ན་ཕར་དམིགས་ན། །།སྒར་དང་རི་ཁྲོད་རུ་བ་ལ་སོགས་པའི། །ཐག་རིང་སོ་སོར་ཡོད་པར་གྱུར་ན་ཡང་། །སྤྲུལ་པ་མ་འདུས་སོ་སོར་བསྐོར་བར་བསྒོམ། །སང་ཉིན་འཇིགས་སྐྲག་ཡོད་པའི་ཕྱོགས་འགྲོ་ན། །དེར་དགོངས་གོང་ལྟར་སྤྲུལ་པའི་མགོན་པོ་རྣམས། །ལམ་དགྲ་བརྡུང་དང་བཅིང་དང་མྱོས་དང་རེངས། །གོང་ལྟར་དྲག་ཏུ་བསྒོམ་ཞིང་སྔགས་བཟླས་ལ། །སྤྲུལ་པ་མི་བསྡུ་དེ་གར་སྤྲོ་ལ་བཞག །གཏོར་མ་འབུལ་ཞིང་བཀའ་བསྒོ་གྲུབ་ན་ལེགས། །མ་གྲུབ་ཟས་ཀྱི་ཕུད་ལ་ཆངས་བུ་བྱ། །ཡབ་ཡུམ་སྔགས་ལ་བ་ལིང་ཏ་ཁཱ་ཧི་བཏགས། །གཅིག་དེ་མདུན་དང་གཅིག་དེ་རྒྱབ་ཏུ་འཕང་། །ཤིན་ཏུ་གལ་ཆེ་དོ་དམ་དགོས་པ་ན། །བྱེ་མའམ་ནི་ས་ཕྱེ་གཙང་མ་ལོ། །མང་དུ་བསྔགས་ལ་གཞན་གྱིས་མ་མཐོང་བར། །སྲོད་དང་ཐོ་རངས་ནོར་དང་ཀ་ཆར་བཏབ། །དེ་
ནི་གདམས་ངག་ཆེན་པོ་ཡིན་པར་བཤད། །སྒར་དང་བྲང་ང་ཡུན་རིང་འདུག་པ་ལ། །ཤ་མེད་སྔར་གྱི་རུས་པ་སྐམ་པོ་ལ། །མང་དུ་བསྔགས་ལ་རྟ་ནོར་མཐའ་བསྐོར་གཏོར། །རི་ཡི་རྐུན་མ་འོང་བའི་ལམ་འཕྲང་དུ། །གཏོར་ནས་རྐུན་མས་མི་འཐོབ་སྡུག་པར་བཤད། །ཐག་རིང་གལ་ཆེན་འགྲིམ་པར་གཏོང་དགོས་ན། །སྔགས་ཐུང་མཇུག་ཏུ་འཆང་བ་པོ་ལ་ནི། །རཀྵ་རཀྵ་ཞེས་པ་བཏགས་པ་དང་། །སྔགས་རིང་དེ་ཉིད་ཤོག་དྲིལ་ཕྲེང་གཅིག་བྲིས། །སྲུང་སྐུད་དཀར་པོར་མདུད་པ་གཉིས་རྒྱབ་ཏེ། །མདུད་པའི་བར་དུ་ཤོག་དྲིལ་མཇུག་ནས་དྲིལ། །དེ་གསེབ་ཡུངས་དཀར་འབྲུ་བདུན་སྔགས་ལ་བཅུག །སྔགས་རིང་དེ་ཡིས་ཅི་ནུས་སྔགས་བྱས་ཏེ། །དེ་ཉིད་མི་དང་རྟ་དྲེལ་ཀ་ཆ་སོགས། །གལ་ཆེན་རྣམས་ལ་བཏགས་པས་ལམ་སྲུང་མཆོག །ཡང་ན་སྲུང་མདུད་དཀར་པོ་རིང་བ་ལ། མདུད་པ་ཉེར་གཅིག་ཡབ་ཡུམ་བསྒོམ་ཞིང་བརྒྱབ། །སྤྲུལ་པས་ཐོད་དབྱུག་གོད་འདྲེ་བརྡུངས་ཤིང་བསྐྲད། །སྔགས་ཐུང་སྭཱ་ཧཱའི་གོང་དུ་འདི་ཉིད་སྦྱར། །འཆང་བ་པོ་ལ་གོད་ཁའི་གནོད་པ་རཀྵ་རཀྵ། །དེ་བཏགས་གོད་ཁ་འཆད་པར་བྱ་བ་སྟེ། །ཡང་ན་སྭཱ་ཧཱའི་བར་དུ་འདི་ཉིད་སྦྱར། །འཆང་བ་པོའི་སྒབ་འཕེལ་བར་གྱུར་ཅིག །སྔགས་དེས་བསྔགས་ནས་བཏགས་པས་སྒབ་འཕེལ་ལོ། །འཕྲལ་དེར་གཏོར་མ་འབུལ་བར་མ་གྲུབ་ཀྱང་། །རྗེས་སོར་གཏོར་བསྔོས་བསྐང་བ་གཏོང་སྐབས་སུ། །འདོད་དོན་གང་ཡོད་བརྗོད་ལ་བཀའ་བསྒོ་བྱ། །རྒྱུན་དུ་འཇིགས་སྐྲག་མེད་ཅིང་ནོར་སྒྲུབ་ཏུ། །ཀུ་མ་ཁུམ་ཐིས་མཇུག་ཏུ་
སྔགས་འདི་བཏགས། །གྷ་ན་ཙཀྲ་རཏྣ་པུཊྛི་བ་ཤང་སིདྡྷི་སིདྡྷི་སྭཱ་ཧཱ། རྒྱུན་དུ་རང་གི་བར་ཆད་སྲུང་བ་ལ། མ་མ་རཀྵ་རཀྵ་སྭཱ་ཧཱ་བརྗོད། མི་ནོར་ཕྱུགས་ལ་ནད་ཡམས་གདོན་བགེགས་སོགས། །གནོད་ན་གོང་ལྟར་ཆོས་སྐྱོང་སྤྲུལ་པ་ཡིས། །སྤྲིན་ནག་རླུང་གིས་གཏོར་བཞིན་བསྐྲད་པར་བསྒོམ། །སྔགས་ཐུང་ཁུམ་ཐིས་མཇུག་ཏུ་འདི་ཉིད་བཏགས། །གནོད་བྱེད་སརྦ་ཨུ་ཙ་ཏ་ཡ་ཕཊ་སྭཱ་ཧཱ། །འདི་ཡི་ལས་ཚོགས་དཔག་ཏུ་མེད་ན་ཡང་། །སྟབས་བདེ་ཉེར་མཁོའི་སྐོར་ནི་དེ་ཙམ་མོ། །མདོར་ན་འདི་ནི་ཚོགས་ཀྱི་བདག་པོ་སྟེ། །ལོངས་སྤྱོད་ཚོགས་ཀྱི་འདུ་བ་འཕེལ་བ་དང་། །རྒྱུན་དུ་ཡབ་ཡུམ་གསལ་བར་བསྒོམ་ན་ནི། །འདོད་ཆགས་ངང་གིས་ཞི་ཞིང་ཚུལ་ཁྲིམས་གཙང་། །འདི་ཉིད་བྲིས་སམ་བསྒོམ་པ་ཙམ་གྱིས་ཀྱང་། །བཀྲ་ཤིས་བདེ་ལེགས་ཐམས་ཅད་འབྱུང་བར་བཤད། །བཀའ་མ་གཏེར་མ་གཅོད་དང་གནམ་ཆོས་ལུགས། །ཀུན་གྱི་བཅུད་བསྡུས་ཉམས་སུ་ལེན་བདེ་འདི། །གྲྭ་པ་ཉམ་ཆུང་ཕྱོགས་སུ་འགྲོ་རྣམས་ཀྱི། །ལམ་སྲུང་ཕྱིར་དུ་རཱ་ག་ཨ་སྱས་ཡིས། །ཐུན་མཚམས་གཅིག་ཏུ་རྫོགས་པར་སྨྲས་པ་སྟེ། །སློབ་བུ་པདྨ་ཐབས་མཁས་ཞེས་བྱས་བྲིས། །སྦ་འོས་གསལ་བཀོད་ཉེས་པ་ལྷ་ལ་བཤགས། །དགེ་བས་ཉམས་ཆུང་འགའ་ལ་ཕན་ཐོགས་ཤོག །མངྒ་ལཾ།། །།