ཞིང་སྐྱོང་གི་ཀ་བསྟོད།
ཞིང་སྐྱོང་གི་ཀ་བསྟོད་བཞུགས་སོ། །ཀ་ཝུ་མ་ཧཱ་ཀཱ་ལ་སེང་གེའི་གདོང་། །ཁ་དོག་མཐིང་ནག་ཆར་སྤྲིན་ལྟར་མནག་ཅིང་། །ག་ཤལ་དྲག་ཤུལ་ཆེར་ལྡན་ནག་པོ་ཆེ། །ང་ཡི་ཕྲིན་ལས་སྒྲུབ་པའི་མྱུར་མགྱོགས་ཅན། །ཅ་ཅོ་མང་བའི་མཚོན་ཆས་དགྲ་བགེགས་སྒྲོལ། །ཆ་ལུགས་རྣམ་འཕྲུལ་དུ་མས་ཞིང་རྣམས་སྐྱོང་། །ཇ་ཆང་པཉྩ་ཕུད་ཀྱིས་ཁྱོད་མཆོད་ན། །ཉ་རྒྱས་ལྟ་བུར་སངས་རྒྱས་བསྟན་པ་སྲུངས། །ཏ་ལོག་འགོང་པོ་བདུད་ཀྱི་སྤྲུལ་པ་རྣམས། །ཐ་དད་མ་ངེས་སྤྲུལ་པས་དེ་རྣམས་སྒྲོལ། །ད་དུས་བསྐལ་པ་སྙིགས་མ་འདི་སྒྱུ་ཙམ་ལ། །ནཱ་ག་སྡེ་བརྒྱད་དྲེགས་པའི་འཁོར་དང་བཅས། །པ་སངས་ལྟར་དཀར་བུ་རམ་ཤིང་པའི་བསྟན། །ཕ་རོལ་ཕྱིན་དྲུག་ས་བཅུ་ལམ་ལྔ་ལ། །བ་གླང་ལྟ་བུའི་བསྟན་བཤིག་དམ་ཉམས་རྣམས། །མ་གཡེལ་སྒྲོལ་ལ་མིང་ཙམ་མེད་པར་མཛོད། །ཙཱ་རི་ལ་སོགས་གནས་ཆེན་བརྒྱ་རྩ་བརྒྱད། །ཚ་བ་སྒྲོ་བྲག་བན་རི་པདྨ་འོད། །ཛ་རཾ་སྨྲས་པོ་གནས་ཀྱི་བདག་པོ་ཁྱེད། །ཝ་ཡུལ་མྱུར་བའི་རླུང་རྟ་ཤུགས་ལྡན་ཆིབས། །ཞྭ་ནག་ཅན་གྱི་བསྟན་པ་བསྲུང་དུ་གསོལ། །ཟ་བྱེད་སྲིན་པོ་བམ་རོ་ཕོ་མོ་ཡིས། །འ་འུར་འཁྲུག་
སྒྲོག་སྡེ་བརྒྱད་དྲེགས་པའི་ཚོགས། །ཡ་མཚན་དུ་མས་སྤྲས་པའི་ཆོས་སྐྱོང་རྣམས། །ར་མདའ་མ་གཡེལ་བསྟན་དགྲ་རྡུལ་དུ་རློགས། །ལ་ལོག་དགྲ་ལ་ཐོངས་ཤིག་ཆོས་སྐྱོང་སྲུང་མའི་ཚོགས། །ཤ་ཁྲག་དམར་གྱི་གཏོར་མ་འདི་བཞེས་ལ། །ས་འདིའི་སྒྲུབ་པའི་སྡེ་ལ་དར་རྒྱས་མཛོད། །ཧ་ཡ་གྷི་ཝ་པདྨ་དབང་ཆེན་དང་། །ཨ་ཙར་ཡ་མཆོག་པདྨ་ཐོད་ཕྲེང་དང་། །སེང་གེ་སྒྲ་སྒྲོག་བདུད་འདུལ་རྡོ་རྗེ་ཡི། །ཁས་བླངས་དམ་བཅས་ཐ་ཚིག་མ་གཡེལ་བར། །གསང་སྔགས་རྙིང་མའི་བསྟན་པ་མཐའ་རྒྱས་མཛོད། །སྐྱེ་འགྲོ་སེམས་ཅན་བདེ་ལ་འགོད་པ་དང་། །རྣལ་འབྱོར་ཡོན་མཆོད་ཕྲིན་ལས་འགྲུབ་པར་མཛོད། །ཅེས་རཱ་ག་ཨ་སྱས་སྦྱར་བ་བདེ་ལེགས་སུ་གྱུར་ཅིག །སརྦ་མངྒ་ལཾ།། །།