ཞིང་སྐྱོང་ཆེན་པོ་ཀུན་དགའ་གཞོན་ནུའི་ཆོ་ག་དཔའ་བོ་རྣམ་རོལ་གྱི་ཟིན་བྲིས་འདོད་དགུ་ལྷུན་གྲུབ་བསྟན་དགྲ་ཚར་གཅོད།
ཞིང་སྐྱོང་ཆེན་པོ་ཀུན་དགའ་གཞོན་ནུའི་ཆོ་ག་དཔའ་བོ་རྣམ་རོལ་གྱི་ཟིན་བྲིས་འདོད་དགུ་ལྷུན་གྲུབ་བསྟན་དགྲ་ཚར་གཅོད་ཞེས་བྱ་བ་བཞུགས་སོ། །
ན་མོ་གུ་རུ་བཛྲ་པཱ་ཎི་ཡེ། ཞིང་སྐྱོང་ཆོ་ག་དཔའ་བོ་རྣམ་རོལ་གྱི། །ཟིན་བྲིས་ཅུང་ཟད་བྲི་བ་ལ། ཞིང་སྐྱོང་འཁོར་བཅས་བཀའ་ཡི་གནང་བ་སྩོལ་ཞིང་བྱིན་གྱིས་བརླབ་ཏུ་གསོལ། ཐོག་མར་ཡིད་ཆེས་ལོ་རྒྱུས་ཟུར་ཙམ་ནི། ཞི་བ་རྡོ་རྗེ་འཆང་དྲག་པོ་འཁོར་ལོ་སྡོམ་པ། དེ་ཉིད་མགོན་པོར་བཞེངས་པ་ཕྱག་བཞི་པ་སྟེ། དེ་གསུམ་ཐ་དད་མེད་པར་རྒྱུད་སྡེ་རྣམས་ནས་གསལ་ཞིང་། མཁས་གྲུབ་ཀུན་ཞལ་འཆམས། ཞིང་སྐྱོང་འདི་ཕྱག་བཞི་པའི་གསུང་གི་སྤྲུལ་པ་ཡིན་ཏེ། ཕྱག་བཞི་པའི་རྒྱུད་ཆེན་ཉི་ཤུ་རྩ་ལྔའི་ནང་ནས་སེང་གདོང་དུར་ཁྲོད་འབར་བའི་རྒྱུད་ཅེས་བྱ་བ་ཡོད་
དོ། །དེ་ཡི་རྒྱ་གཞུང་རྡོ་རྗེ་གདན་པས་མཛད་པ་གཉིས་ཡོད་དེ་ཞིང་སྐྱོང་གཅེར་བུ་རྐང་ཐང་གི་གྲི་ཐོད་ཅན། །ཡུམ་སྲིན་མོ་སྟག་གདོང་མ། འཁོར་བམ་རོ་གཉིས་དང་བཅས་པ་གསུངས་ཏེ། དེ་ནི་གསར་མའི་ལུགས་སོ། །ཞིང་སྐྱོང་གི་སྲོག་རྒྱུད་མཁར་ཆུ་ལྕགས་ཕུར་ཅན་གྱི་གཏེར་མ་དང་། རྒྱུད་ལེའུ་བཅུ་བདུན་པ། ཙཱ་རི་ཟིལ་ཆེན་ཕུག་གི་གཏེར་མ་སོགས་ནས་ཡབ་ཡུམ་སྐུ་ཕ་བེར་ཆེན་འདི་གསུངས་སོ། །དེ་དག་གི་ལོ་རྒྱུས་ནི། སྔོན་ལྷ་དང་ལྷ་མིན་འཐབ་པའི་ཚེ། ལྷ་མ་ཡིན་གྱི་དམག་སྣ་བཟློག་པའི་ཕྱིར། ལྷ་དབང་ཕྱུག་ཆེན་པོ། དྲག་པོ་འཇིགས་བྱེད་ཅེས་ཀྱང་
བྱ། མགོན་པོ་ལེགས་ལྡན་དང་དྲག་མོ་འཇིགས་བྱེད་ཅེས་ཀྱང་བྱ། དཔལ་ལྡན་ལྷ་མོ་གཉིས་ལྷ་སྲིན་སྡེ་བརྒྱད་ཐམས་ཅད་ཀྱི་དམག་བསྡུ་རུ་བཏང་བས། ལྷ་སྲིན་གྱི་དམག་བསྡུས་ཤིང་མ་མགོན་གཉིས་སྦྱོར་བས། སྲས་སེང་གདོང་ཡབ་ཡུམ་གཉིས་འཁྲུངས། འཁོར་གཉིས་ཤིན་ཏུ་གདུག་རྩུབ་ཆེ་དྲག་ལྷ་ཀླུ་རྣམས་ལ་འཚེ་བ་ལ། ཕྱག་ན་རྡོ་རྗེས་འདུལ་བར་བརྩམས་པས་ཁོང་རྣམ་གཉིས་ཀྱིས་རི་རབ་རྨིང་ནས་བསྡིག །རྒྱ་མཚོའི་སྟེང་ནས་གློག་འཁྱུགས། རི་རབ་རྩེ་ནས་ཐོག་སེར་ཕབས་པས་མ་ཐུལ་ནས། འོག་མིན་དུ་དཔལ་ཧེ་རུ་ཀ་ཡབ་ཡུམ་ལ་ཞུས་པས་དེ་ཡི་ཐུགས་ཀ་ནས་སེང་གདོང་ཡབ་ཡུམ་གཉིས་སྤྲུལ་ནས། ཁོང་མིང་སྲིང་གི་སྤྱི་བོར་བབས་པས་དབྱེར་མེད་དུ་བྱིན་གྱིས་བརླབས། ཕྱག་ན་རྡོ་རྗེའི་དབང་བསྐུར། ཐེག་པ་རིམ་དགུའི་ས་ཐོབ་པས་ཡེ་ཤེས་ཀྱི་མགོན་པོ་ཡབ་ཡུམ་དུ་གྱུར། འོག་མིན་མངོན་དགའི་བདེ་བ་ཅན། ལྕང་ལོ་ཅན་སོགས་སངས་རྒྱས་ཀྱི་ཞིང་ཁམས་ཀུན་ལ་དབང་བསྒྱུར་བ་མཚན་ཞིང་སྐྱོང་དབང་པོར་བཏང་། འདིའི་ལོ་རྒྱུས་རྣམས་ཨུ་ཙ་ལ་ཡི་དུར་ཁྲོད་དུ་གཏེར་དུ་ཞུགས་པ། སློབ་དཔོན་དྷ་ན་སཾ་སྐྲྀ་ཏས་གཏེར་ནས་བཏོན། དེ་ལ་ཨོ་རྒྱན་རིན་པོ་ཆེས་གསེར་ཕྱེ་བྲེ་
གང་ཕུལ་ནས་ཞུས། ཨོ་རྒྱན་རིན་པོ་ཆེས་བྲག་ཕུག་མ་ར་ཏི་ཀར་སྒྲུབ་པ་མཛད་པའི་ཚེ་སེང་གདོང་ཡབ་ཡུམ་གྱི་ཐུགས་དམ་དྲོད་ཚད་ཉུལ་བས་ཆོ་འཕྲུལ་ཆེན་པོ་བསྟན་གུ་རུ་སེང་གེ་སྒྲ་སྒྲོག་གི་སྐུ་རུ་བཞེངས་ནས་དམ་ལ་བཏགས། སྲོག་སྙིང་ཕུལ་ནས་གསང་མཚན་སེང་ཧ་གཎྜལ་བཏགས་སོ། །དེ་ནས་ཨོ་རྒྱན་རིན་པོ་ཆེ་བོད་ལ་ཕེབས་དུས་མངའ་རིས་མང་མཁརེ་ལ་ཐོག་ཏུ་དྲོད་ཚད་ཉུལ་བས་ཐོ་འཚམས་པ་ན། སྔོན་གྱི་དམ་བརྡར་དམ་ལ་བཏགས། བོད་ཡུལ་གྱི་སྲུང་མར་གཉེར་གཏད། དེ་ནས་བསམ་ཡས་བཞེངས་པའི་ཚེ་ཕུང་སྟག་འུར་བ་མི་ཟན་གྱིས་མི་རྣམས་གསོན་པོར་ཟ་བ་ལ། གུ་རུ་རྡོ་རྗེ་གྲོ་ལོད་ཀྱི་སྐུར་བཞེངས་ནས་སེང་གདོང་ཡབ་ཡུམ་ལས་ལ་བསྐུལ་བས་སེང་ཆེན་ཕོ་མོ་གཉིས་སུ་སྤྲུལ་ནས་ཕུང་སྟག་ཕོ་མོ་གཉིས་བཏུལ། འཁོར་ཕྲ་མེན་གཡོས་པ་ནས་སེང་ཕྲུག་མང་པོ་སྤྲོས་ཏེ་ཚར་བཅད། སེང་གེ་ཆད་པས་ཕུང་སྟག་ཐུལ་དེ་ཕྱིར་སྟག་ཚང་སེང་གེ་བསམ་འགྲུབ་ལུགས་སུ་གྲགས་སོ། །ཡེ་ཤེས་པའི་མཆོག་ཏུ་གྱུར་ཀྱང་འཇིག་རྟེན་པའི་ཚུལ་དུ་བཞུགས་ཏེ། ཏི་སེ་ན་བཞུགས་ཚེ་ལྷ་བཙན་དཀར་པོ། ལ་ཕྱི་ན་བཙན་རྒོད་རོལ་པ། ལྷོ་བྲག་སྟོད་དུ་མཁར་རི་གངས་བཙན། །
སྨད་དུ་སྨྱོ་ཁ་ཨུ་ཙ་ལ་ཏྲཀ་ཤད། ཙ་རི་བཀྲ་ཤིས་ལྗོང་དང་དྭགས་ལ་སྒམ་པོ་ན་སྒམ་པོ་ལྷ་རྩེ། ཙཱ་རི་རོང་ན་ལྷ་བཙན་ནག་པོ། ཀང་པོ་རོང་ན་མགར་བ་ནག་པོ། རྒྱ་ན་ཇོ་བོ་ཨ་གྲགས། ལྷོ་ན་རོང་ལྷ་རྒྱལ་མཚན། སྲིན་ཡུལ་ན་སྲིན་མགོན་ཐོད་ཕྲེང་ཅན། བསིལ་བ་ཚལ་དང་ངར་ལུང་ན་ཞལ་བཞི་པ། འདི་རྣམས་ཐམས་ཅད་ཐུགས་རྒྱུད་གཅིག་པར་རྒྱུད་རྣམས་ནས་བཤད། མདོར་ན་སངས་རྒྱས་ཀྱི་ཞིང་ཁམས་ཐམས་ཅད་སྐྱོང་བས་ཞིང་སྐྱོང་ཀུན་དགའ་གཞོན་ནུའམ། གྷ་ཡ་དྷཱ་ར་ཞེས་གྲགས། གནས་ཕྲན་ཐམས་ཅད་ཀྱི་བདག་པོ་ཡིན་པས་མཚན་མེ་རླུང་སེང་ཕྲུག་ཅེས་བྱ། བླ་མ་ཨོ་རྒྱན་བསྒྲུབ་པའི་བཀའ་སྲུང་ཐུན་མོང་མ་ཡིན་པ་ཡིན་ཕྱིར། མངའ་བདག་ཉང་དང་། གུ་རུ་ཆོས་དབང་། རིན་ཆེན་གླིང་པ། རཏྣ་གླིང་པ། བདེ་ཆེན་གླིང་པ། ལས་འབྲེལ་རྩལ་རྣམས་ཀྱིས་གཏེར་ནས་བྱོན་པ། ཐམས་ཅད་རྒྱ་མཚོ་ལས་ཆུ་བོ་ལྟར་བརྒྱུད་པ་འདི་ལ་འདུས་སྣང་ཞིང་། ཁྱད་པར་གྲུབ་ཆེན་ཀརྨ་པཀིས་འོག་མིན་མཚུར་ཕུའི་དགོན་པ་ན་སྒྱུ་མ་ལྟ་བུའི་ཏིང་ངེ་འཛིན་ལ་བཞུགས་སྐབས། ཞིང་སྐྱོང་ཡབ་ཡུམ་འཁོར་བཅས་བྱོན་ནས་སྲོག་སྙིང་ཕུལ་ནས་བསྟན་པ་བསྲུང་བར་ཁས་བླངས་
པས་དེ་ཕྱིར་སྲུང་མར་བསྟེན་ཅིང་། བརྒྱུད་པ་ཡང་འདི་དེ་ཡིན་མི་འདེད་པར་སྣང་། ད་ལྟར་བར་གྱི་ན་རིམ་ཐམས་ཅད་ཀྱིས་རྩྭ་རིའི་གནས་སྒོ་འབྱེད་པ་དང་། སྒྲུབ་པ་གནས་གཟིགས་མཛད་དུས་མགོན་པོ་འདི་ཉིད་ཞལ་གཟིགས་པ་དང་ཕྲིན་ལས་བསྒྲུབ་པ་ལུང་བསྟན་བྱུང་ཚུལ་སོགས་སོ་སོའི་རྣམ་ཐར་ལས་གསལ་ཞིང་། ལྷག་པར་དུ་ཡང་དཔལ་ལྡན་མཁའ་སྤྱོད་དབང་པོས་ཙཱ་རིར་ལོ་གསུམ་སྒྲུབ་པ་མཛད་སྐབས་ཞིང་སྐྱོང་དབང་པོ་འཁོར་བཅས་ཡང་ཡང་དུ་ཞལ་གཟིགས་ཤིང་། བསྟན་པ་བསྲུང་བར་དམ་བཅས་པས། མཆོག་གི་སྤྲུལ་སྐུ་ན་རིམ་བྱོན་པ་ཐམས་ཅད་ཀྱི་ཐུན་མོང་མ་ཡིན་པའི་སྲུང་མར་གྱུར་ནས། གྲྭ་རིགས་བན་རྐྱང་རེ་ཡིའང་རྗེས་སུ་འབྲང་ཞིང་ཆུ་ལ་ཁ་ཧུབ་བྱེད་ཚེ་ཡང་ཆུས་སུབ་དོགས་པས་ཡུམ་སེང་གདོང་། མས་སྟག་ཁུང་ནས་འཇུས་འདུག་པས་དབུས་གཙང་གི་ལྷ་པ་རྣམས་ཀྱིས་མཐོང་སྐད། སྒར་པ་དང་གདན་ས་རྣམས་སུ་བམ་རོ་ཕོ་མོ་སྤྲེའུ་གཟུགས་ཅན་འཇུ་བ་དང་། སྨུག་པ་སོགས་ཕལ་ཆེར་རྣམས་ཀྱིས་མཐོང་བར་ཡོད་པས། དཀོར་བདག་སུ་བརྩི་བ་ཡིན། དེས་ན་བླ་མ་མཆོག་གི་སྤྲུལ་སྐུ། ཡི་དམ་སྒྲོལ་མ་དཀར་མོ། ཆོས་སྐྱོང་མགོན་པོ་སེང་གདོང་གསུམ་བཀའ་
བབས་ཀྱི་ལྷར་བརྩི་བ་ཡིན་ནོ། །འདི་ཡི་ཕན་ཡོན་ཡང་། ཞིང་སྐྱོང་སྲོག་རྒྱུད་ལས། ཐེག་པ་རིམ་དགུའི་ས་ནོན་ཀྱང་། །ཡེ་ཤེས་མགོན་པོ་དངོས་བྱུང་བས། །དཔལ་མགོན་གཞན་ལས་ཁྱད་དུ་འཕགས། །འདི་སྒྲུབ་སྐལ་ལྡན་མ་ལུས་ཀུན། །འོག་མིན་གནས་དང་མངོན་པར་དགའ། །བདེ་བ་ཅན་དང་པོ་ཊ་ལ། །ལས་རབ་རྫོགས་དང་ལྕང་ལོ་ཅན། །མཁའ་སྤྱོད་དག་པའི་གནས་མཆོག་ཏུ། །དག་པ་མངོན་གྱུར་ཀུན་བཟང་ཐུགས་ཀར་ཐིམ། །ཡེ་ཤེས་མགོན་པོ་དངོས་གྱུར་ནས། །འདི་རྣམས་ཞིང་ཁམས་ཀུན་ལ་དབང་བསྒྱུར་ཞིང་། །དེ་ཕྱིར་ཞིང་སྐྱོང་གཟི་ལྡན་རྩལ་དུ་བཏགས། །ཀུན་བཟང་འོག་མིན་འགྱུར་བ་ཐོབ་པར་འགྱུར། །ཞེས་དང་། དེ་ནས་བསྟན་པ་བསྲུང་ཚུལ་ནི། བཀའ་གཏེར་རྒྱུད་ཀྱི་བསྟན་པ་གཉན་པོ་བསྲུང་། །རིགས་རྒྱུད་ཀྱི་བསྟན་པ་གཉན་པོ་བསྲུང་། །གསང་སྔགས་ཕྱི་ནང་ཀུན་གྱི་བསྟན་པ་བསྲུང་། །སྔགས་འཆང་རིག་འཛིན་བརྒྱུད་པའི་ཚེ་སྲོག་བསྲིངས། །བཀྲ་ཤིས་བུ་ནོར་ལོངས་སྤྱོད་མངའ་ཐང་སྤེལ། །སྙན་པའི་དུང་འབུད་གྲགས་པའི་བ་དན་ཕྱར། །འཁོར་རྣམས་སྲུང་ཞིང་སྐྱོང་བ་དང་། །ནད་པ་སྲིའུ་གསོ་བ་དང་། །མཆོད་ཅིང་
བརྟེན་ན་བསྲུང་བར་འགྱུར། །ཞེས་གསུངས་པ་སློབ་དཔོན་པདྨས་གསུངས་པའི་བསྟོད་སྙིང་གི་དོན་བསྡུ་ན། དུར་ཁྲོད་བདག་པོ་ཞིང་སྐྱོང་སེང་གེའི་གདོང་། །དེ་ཡི་ཡུམ་ཆེན་སྲིན་མོ་སེང་གདོང་མ། །བཀྲ་ཤིས་དཔལ་འབར་ནོར་གྱི་དངོས་གྲུབ་སྟེར། །སྟོབས་ཆེན་ལྷ་མོ་ཡིད་འགུགས་དབང་ཕྱུག་མ། །དངོས་གྲུབ་བདག་མོ་སེང་གདོང་ཡབ་ཡུམ་མ། །བཀྲ་ཤིས་དཔལ་འབར་མཐུ་སྟོབས་རྣོ་ལ་མྱུར། །བཟློག་པས་མི་བཟློག་དགྲ་བགེགས་ཀུན་གྱི་གཤེད། །རྗོད་གཏོང་ཨར་ཟློག་ནུས་པ་རང་གཤེད་འབེབས། །དྲག་པོ་འདུལ་ཕྱིར་དགྲ་བགེགས་སྒྲོལ་བའི་མཆོག །ལྟས་དང་ཆོ་འཕྲུལ་སྡུག་པའི་འཁོར་ལ་འབེབས། །དམ་ཉམས་ཚེ་སྲོག་གློ་བུར་སྡུད་མཛད་པ། །ནང་དུ་ཞི་ཞིང་བཀྲ་ཤིས་བུ་ནོར་འཕེལ། །ཕྱི་རུ་རྩུབ་འགྱུར་འཁྲོས་པས་འཇིག་རྟེན་གཡོ། །བ་དན་ཕྱུར་བས་སངས་རྒྱས་བསྟན་པ་དར། །སྤྱན་དམར་འཁྲུགས་པས་སྲིད་གསུམ་འོད་ཀྱིས་གང་། །ལྗགས་དམར་བརྡབས་པས་ས་གཞི་ཡོ་འགུལ་འཁྲུགས། །དམར་གཏོར་གདེང་བས་ནད་ཡམས་ཆར་ལྟར་འབེབས། །བདུད་རྟ་རྒྱུག་པས་ལྷ་སྲིན་རྡུད་པས་འགྱེད། །བསྟན་པ་བསྲུང་ཞིང་བཀའ་ཡི་བྱ་ར་བྱེད། །ཕྱི་
རྒྱུད་རྣལ་འབྱོར་མགོ་འདོན་སྔགས་འཆང་ཚེ་སྲོག་བསྲིང་། །ནང་དུ་ཞི་བས་ཡིད་བཞིན་ལྷ་མོ་འདྲ། །ཕྱི་རུ་ཁྲོས་པས་ཕྲ་མེན་སེང་ལྟར་འཁྲུགས། །དམ་ཉམས་དྲུག་ཁྲི་ཉིན་བཞིན། གསོད་པར་བྱེད། །གུང་གཉིས་རྒྱུག་པས་དཀོར་རྐུན་རྩད་ནས་གཅོད། །བཟློག་པས་མི་བཟློག་གཞན་གྱིས་མི་ཆུན་ཞིང་། །བཀའ་སྲུང་དགྲ་ལ་རང་གཤེད་རྟག་ཏུ་འབེབས། །བདག་ལ་བྱམས་ཞིང་ནང་དུ་ཡོན་ཏན་ཆེ། །བཀྲ་ཤིས་སྙིང་ཉེ་གྲོགས་ལྟར་རྟག་ཏུ་ཁུར། །བུ་ལྟར་བྱམས་ཞིང་ཁྱོ་ལྟར་སྐྱོང་བའི་ལྷ། །བསྟན་པའི་བཀའ་སྲུང་རྣལ་འབྱོར་དགྲ་བླ་ཚེ། །བདུད་ཀྱི་གཡུལ་འཇོམས་མ་རུངས་དགྲ་བགེགས་སྒྲོལ། །རྫུ་འཕྲུལ་མཐུ་ཡིས་སྲིད་གསུམ་དབང་དུ་སྡུས། །སངས་རྒྱས་བསྟན་པ་བསྲུང་བའི་ལས་ལ་བརྩོན། །སྲིན་པོའི་གཟུགས་ཀྱིས་དགྲ་ལ་ནད་ཡམས་འབེབས། །ཞིང་སྐྱོང་ཀུན་དགའ་གཞོན་ནུ་ཞེས་གསུངས་སོ། །སྤྲུལ་སྐུ་ལས་ལྡན་པ་ཡི་གཏེར་མ་ལས། །རིང་དུ་མི་འགྱང་ལས་ཀུན་སྒྲུབ། །སེང་གདོང་ཡབ་ཡུམ་དྲག་མྱུར་བས། །གར་རྦད་དགྲ་བགེགས་མ་ལུས་པོ། །བདུན་རྒྱུད་རྩད་བཅད་རྡུལ་དུ་བརླག །ཁ་བསྟན་ཙམ་གྱིས་ངེས་མེད་སྒྲོལ། །ལིང་ཀ་ངེས་མེད་འབུམ་ཕྲག་
ཚུད། །དུས་ལ་ངེས་མེད་གློ་བུར་ཕེབས། །འདི་ཉིད་བསྟན་པའི་རྣལ་འབྱོར་པས། །ཁྲོས་པ་ཙམ་གྱིས་དགྲ་བགེགས་འཇོམས། །ལོག་རྡུགས་འཇམ་གསུམ་འདི་ལ་མེད། །བཟློག་པས་མི་བཟློག་སྟོབས་ཀྱང་ཆེ། །འཁུ་ལྡོག་མི་འབྱུང་བཀྲ་ཡང་ཤིས། །གོང་ནོན་མི་དགོས་གསོལ་བས་ཆོག །སྒྲུབ་པ་ཚུལ་བཞིན་བྱེད་པ་ལ། །མ་བསྒྲུབས་ཀྱང་ནི་དམ་ལ་འདུས། །སྙན་པ་སྒྲོགས་ཤིང་བསོད་ནམས་སྤེལ། །འདུ་ལོང་སྐྱོང་ཞིང་ཆོས་སྡེ་འཛུགས། །གཞན་གྱི་ཕུར་ཁས་ཚུགས་མི་འགྱུར། །སྔགས་པ་བཟློག་མཁན་རང་གཤེད་འབེབས། །བསྡུ་ན་མཆོག་ཏུ་ཞི་བར་འགྱུར། །བདུན་ནམ་བཅུ་བཞི་ཉེར་གཅིག་ཏུ། །ཐེ་ཚོམ་སྤངས་ལ་བསྒྲུབ་པ་གྱིས། །མ་སྒྲུབ་ལན་གསུམ་བསྐྱལ་ལ་བསྒྲུབ། །གཏོར་ཚོགས་བསྐང་བཤགས་རྒྱས་པར་མཛོད། །སྒྲུབ་པ་བྱམས་ཤིང་སྙིང་ཡང་ཉེ། །རང་མིན་གཞན་དོན་བསྒྲུབ་པ་ན། །གདོང་ཅན་ཡབ་ཡུམ་ཐུགས་ཁྲོས་ནས། །འགལ་རྐྱེན་རང་ཐོག་འབེབས་པར་བྱེད། །དེས་ན་སེང་གདོང་སྒྲུབ་ཐབས་འདི། །གཞན་གྱི་དོན་ལ་ངས་མ་བཤད། །མགོན་པོ་སྤུ་གྲི་ལྟ་བུ་འདི། །སྐལ་ལྡན་སྔགས་འཆང་མ་གཏོགས་པ། །སྐྱེ་བོ་ཀུན་
གྱི་སྤྱོད་ཡུལ་མིན། །མི་ནག་དམ་མེད་སྔགས་རྫུན་མཁན། །རིམ་གཉིས་མི་ལྡན་དབང་མ་ཐོབ། །དེ་འདྲའི་འདི་སྒྲུབ་ཕུང་བར་འགྱུར། །མགོན་པོའི་ནང་ནས་ཡང་གསང་བ། །བསིལ་བ་ཚལ་གྱི་དུར་ཁྲོད་དུ། །ཡེ་ཤེས་མགོན་པོ་ཉིད་ཀྱིས་ནི། །པདྨ་འབྱུང་གནས་བདག་ལ་གདམས། །ད་ནི་མཚོ་རྒྱལ་ཉིད་ལ་གཏད། །ཀུན་ལ་མ་སྤེལ་གཏེར་དུ་སྦོས། །རྒྱལ་བའི་བསྟན་པ་བསྲུང་ནུས་པའི། །ལས་ཅན་གཅིག་དང་འཕྲད་པར་ཤོག །མངའ་བདག་ཉང་གི་གཏེར་ཁ་ནས། །གཏོར་ཟོར་འཕང་ཞིང་དྲག་ཏུ་རྦད། །སེང་གེའི་གདོང་ཅན་དྲག་མྱུར་གྱིས། །རྡོ་རྗེ་ཕ་ལམ་སྐུ་ཡང་འཇིག །འཇིག་རྟེན་དགྲ་ལ་སྨོས་མ་དགོས། །ལོ་གཅིག་ཁོངས་སུ་ཕུང་ངེས་སོ། །འདི་ནི་མགོན་པོ་མི་བསྲུན་པས། །དཔའ་གཏུམ་སེང་གེའི་གདོང་ཅན་འདི། །དུར་ཁྲོད་རྣལ་འབྱོར་རྟོགས་པ་ཅན། །སྒྲུབ་པའི་རྟགས་ཕྱིར་སྒྲུབ་བརྩོན་པས། །བསམ་པ་ཡིད་བཞིན་སྨོན་པ་འགྲུབ། །མཐུ་དང་གྲགས་པའི་མངའ་ཐང་རྒྱས། །ཐུགས་ཁྲོས་ཙམ་གྱིས་ལྷ་སྲིན་འཁྲུགས། །ཐལ་མོ་བརྡབས་པས་དགྲ་རྣམས་ཤི། །ཐེ་ཚོམ་སྤོངས་ལ་སྒྲུབ་པ་བྱོས། །ཞེས་དང་། རིན་ཆེན་གླིང་པའི་གཏེར་ཁ་ལས།
འདི་ནི་སུ་ཡིན་གྱི་སྤྱོད་ཡུལ་མིན་པས། དམ་ཚིག་ཉམས་ན་རྐྱེན་དང་གནོད་པ་རང་ལ་འབྱུང་བས་ཤིན་ཏུ་གསང་ཞིང་གསང་བར་བྱའོ། །སེང་གེའི་གདོང་ཅན་ཡུམ་འཁོར་བཅས་གར་རྦད་དགྲ་བོ་ཐམས་ཅད་རླག་པར་བྱེད་པས་གནམ་ལྕགས་ཐོག་ལྟ་བུའོ། །རྒྱུན་དུ་བརྟེན་ན་རྐྱེན་རྣམས་བཟློག་ཅིང་བར་ཆད་སེལ་བ་དང་། དགྲ་བོ་བསྒྲལ་བ་འདི་བས་ལྷག་མེད་དོ། །འདིར་རང་བཞིན་གྱིས་རྦད་ཅིང་བསྐུལ་ན་དགྲ་བོ་ཐམས་ཅད་འཆིའོ། །དགྲ་བོ་ཟླ་བ་གཅིག་ལས་མི་འགྱང་ངོ་། །ཞེས་གསུངས། བདུད་འདུལ་རྡོ་རྗེའི་ཞལ་ནས། །བན་བོན་གཉིས་ལ་འདི་ལས་ལྷག་པའི་སྲུང་མ་མེད་གསུངས། ཁོ་རང་གི་གཏེར་ཁ་ནས་ཀྱང་དེ་ལྟར་གསུངས་སྣང་ཞིང་། མཐའ་ཡི་དམག་ཚོགས་བཟློག་པའི་མཆོག་ཏུ་གསུང་སྣང་ཞིང་། མདོར་ན་ཤིན་ཏུ་མི་བསྲུན་པ་བདུད་པོ་རྐང་རྗེ་དྲང་དཀར་ཞེས་ཀྱང་བྱ། བདུད་ནག་པོ་རྡོ་རྗེ་རལ་པ་ཅན། བདུད་པོ་གསེར་མིག་འཁྱིལ་པ་དཔའ་གཏུམ་སེང་གེའི་གདོང་ཅན། མཐུ་བཟློག་པས་མི་ཟློག་ཤིང་། བྱད་མ་ཁོ་རང་གི་ནུས་པ་ཁོ་རང་གི་གཤེད་དུ་བབ་པར་བྱེད་པས་ཆོས་སྐྱོང་གཞན་ལས་ཁྱད་དུ་འཕགས་པ་ཡིན་པས། རྡོ་རྗེ་གདན་པའི་རྒྱ་
གཞུང་ལས་ཀྱང་། སྨྱོ་འབོག་དང་གླང་ཐབས་དང་། །གྲི་རྒོད་དང་ནི་གཞོགས་བསྐམས་ནས། །འཆི་བར་འགྱུར་བར་ཐེ་ཚོམ་མེད། །ཅེས་དང་། རིན་ཆེན་གླིང་པའི་གཏེར་ཁ་ལས། བླ་མ་སྒྲུབ་པའི་བཀའ་སྲུང་བ། རྣོ་ངར་རྩལ་དང་ལྡན་པ་ཞེས་གསུངས། བདག་གིས་ཀྱང་རཏྣའི་ལུགས་དང་ཀཾ་ཚང་གཞུང་གི་ལུགས་དང་། དཔའ་བོ་རྣམ་རོལ་གྱི་ལུགས་དང་། གཏེར་གསར་གནམ་ཆོས་བདུད་འདུལ་རྡོ་རྗེའི་ལུགས་སོགས་ཅི་རིགས་པ་ཐོབ་ཅིང་། བསྙེན་སྒྲུབ་ལན་འགའ་ཟུང་བྱས་པས། རྨི་ལམ་དུའང་ཞལ་མཐོང་བ་སོགས་རྟགས་མཚན་འགའ་མཐོང་བའི་ཕྱིར། སྙིང་གི་ཆོས་སྐྱོང་དུ་འཆང་ན། རྒྱུན་དུ་གཏོར་བསྔོས་ཆག་མེད་དང་། ཉ་སྟོང་བརྒྱད་གསུམ་དུ་དཔའ་བོ་རྣམ་རོལ་ཆག་མེད་བཏང་བ་ཡིན་པས། །དབང་བསྐུར་གྱི་རྒྱུན་ཙམ་པོ་མ་ཡིན་པར་བྱིན་རླབས་བརྒྱུད་པ་ཅུང་ཟད་ཡོད་པར་སེམས་སོ། །ཡིད་ཆེས་ལུང་གི་ལེའུ་སྟེ་དང་པོའོ།། །།སྤྱན་སྔ་དང་ནི་དཀོན་མཆོག་འབངས་ཡབ་སྲས་རྣམས་ཀྱིས་མཛད་པ་དང་། རཏྣ་གླིང་དང་ཀུན་སྐྱོང་གླིང་དང་། གཏེར་ཁ་རྣམས་ནས་བྱུང་བ་དང་། སློབ་དཔོན་རྣམས་ཀྱི་ངག་ཁྲིད་དང་། རང་གི་མྱོང་བ་དང་བསྟུན་ནས།
དཔའ་བོ་རྣམ་རོལ་བསྙེན་པ་དང་། ཕན་བྱའི་ལས་ཚོགས་ཅུང་ཟད་བརྗོད། སློབ་དཔོན་ནུས་པ་ལྡན་པ་ཡིས། །སྒབ་འདྲེ་ལེགས་པར་མནན་པ་ན། །སློབ་བརྒྱུད་མི་རབས་བཅུ་གསུམ་མམ། །བདུན་ནམ་ཐ་ན་གསུམ་གྱི་བར། །མ་མནན་ན་ཡང་སྐྱོན་མེད་ཟེར། །ཁོ་བོས་ལན་གསུམ་མནན་ན་ཡང་། །མནན་པ་གྲུབ་ན་བཀྲ་ཤིས་དགེ །མནན་ཚུལ་རྒྱས་བསྡུས་མང་ན་ཡང་། །སྒྲུབ་པ་རྟགས་ཐོན་དགོས་ཕྱིར་དཀའ། །སྒྲུབ་མི་དགོས་པར་མནན་ཆོག་པ། །མ་ཧཱ་བ་ལ་འདི་ཉིད་ཟབ། །དེ་ལ་གསར་རྙིང་རིགས་མང་ཡང་། །གནམ་ཆོས་ཉིད་ནི་ཟབ་ཅིང་རྣོ། །ཞིང་སྐྱོང་དམ་ཅན་གཉིས་ཀ་ཡི། །སྒྲུབ་པའི་བར་ཆད་སྒབ་འདྲེ་ནི། །ཤོག་གུར་སྣག་ཚ་གཙང་མ་ཡིས། །ལིང་ག་གཅིག་ལ་མགོ་གསུམ་པ། །དབུས་མི་གཡས་བྱ་གཡོན་སྤྲེའུ། །ལག་པ་མི་ལ་རྐང་པ་བྱ། །སྤྲེའུ་མཇུག་མ་ཡོད་པར་བྲི། །སྙིང་ཁར་ཛ་གཉིས་ཁ་སྤྲོད་བར། །ཏྲི་ཡིག་གསུམ་ནི་གཅིག་མར་བྲི། །དེ་མཐར་ཡིག་མགོ་ཕྱིར་བསྟན་པ། །སྒྲུབ་པ་ལ་བར་དུ་གཅོད་པར་བྱེད་པའི་བདུད་སྙབ་པ་ལག་རིང་། བཙན་ཡམ་ཤུད་དམར་པོ། འབྱུང་པོ་ཐེའུ་རང་སྟོང་འཁྲུགས་གསུམ་ཁུག་
ཅིག །མཱ་ར་ཡ་ཛ་ཛ་རྦད་ནན། སྤྱི་བོར་ནན་དང་རྐང་ཞབས་ཡམ། །ཡན་ལག་ཛཿཧཱུྃ་བཾ་ཧོ་བྲིས། །ཐ་མར་ཛདང་ཁྲོམ་གྱིས་བསྐོར། །དེ་ལ་འགུགས་གཞུག་བརྒྱ་རྩ་བྱ། །མ་ཧཱ་བ་ལིའི་སྐུ་གཟུགས་ནི། །གནམ་ཆོས་བཞིན་དུ་བྲིས་པ་ལ། །བསྐྱེད་བསྟིམ་རང་སྔགས་བརྒྱ་རྩ་བཏབ། །རོ་གཡམ་རྡོ་རྗེ་རྒྱ་གྲམ་དང་། །རི་རབ་གླིང་བཞི་བཅས་པ་བྲི། །མཆོད་རྟེན་འོག་གམ་ལམ་རྒྱ་གྲམ། །ལྷ་ཁང་ངམ་ནི་སྒྲུབ་ཁང་གི །ཐེམ་འོག་གྲུ་གསུམ་དོང་བྲུས་ལ། །དམ་སྲི་ལིངྐ་མགོ་ཕྱིར་བསྟན། །གན་རྐྱལ་བྱས་ལ་འགུགས་གཞུག་བྱ། །དེ་སྟེང་མ་ཧཱ་བ་ལ་སྦྱབས། །ས་ཁོད་རེ་ལ་རྒྱ་གྲམ་རེ། །དགུ་བྲིས་རོ་ཡམ་རྒྱ་གྲམ་མནན། །དེ་སྟེང་མེ་ཁྲོལ་ཆུ་ཐིག་བླུག །ལེགས་པར་བཅགས་ལ་མི་མངོན་བྱ། །དེ་སྟེང་རྟ་བྲོ་གང་རུང་བརྡུང་། །རྐང་པ་གཡོན་པས་རྒྱ་གྲམ་མནན། །དེ་ལྟར་བྱ་བ་གལ་ཆེ་ཞིང་། །ལོ་འགའ་སོང་ན་སྐྱར་ཀྱང་ལེགས། །སྤྱི། སྲོག་འཁོར་རཏྣའི་གཏེར་ཁ་ཟབ། །དར་དམར་དར་ནག་མ་འཛོམས་ཀྱང་། །ཤོག་གུ་རྒྱ་སྣག་གིས་བྲིས་ཆོག །སྐྱ་ཕ་མདའ་དར་ལ་བཏགས་ཤིང་། །རྐང་ཐང་རང་གི་ལུས་ལ་འཆང་། །དར་ནག་དར་དམར་གཡོགས་བྱའོ། །
རྒོད་སྒྲོ་མེ་ཡིས་མ་བཤུལ་བའི། །མདེལ་ལ་གྲི་ལྕགས་བདར་ཕྱེ་བྱུག །དར་རམ་གོས་ཆེན་ནག་པོ་ལ། །གསེར་དངུལ་མཚལ་གྱིས་བསྙེན་སྔགས་བྲི། །མདའ་དར་ལ་བཏགས་རྟེན་རྫས་ཡིན། །རབ་ལ་གྲི་སྙིང་དོམ་ནག་སྙིང་། །མ་རྙེད་གཡག་ལུག་ནག་པོའི་སྙིང་། །གསེར་དངུལ་མཚལ་ལམ་གྲི་ཁྲག་གམ། །བསྙེན་སྔགས་བྲིས་ལ་རྩ་སྒྲུབ་བཅུག །སྲོག་འཁོར་དང་བཅས་མདའ་ལ་བཏགས། །བླ་རྡོ་བསྡུས་པ་དེ་ཡིས་ཆོག །སྤྱི། གཞི་སྟེང་ནས་ནག་བྲ་སྲན་གྱིས། །ཚོམ་བུ་ལྷ་གྲངས་བཀོད་པའི་སྟེང་། །ཟངས་ལྕགས་སམ་ནི་ཐོད་པའི་ནང་། །ལྷ་གྲངས་གཏོར་མ་ནག་པོ་བྱ། །རྩེ་ལ་ཡབ་ཡུམ་ཙཀ་ལི་བཙུགས། །མེད་ན་ཞལ་ཐང་དར་ནག་སྐུ། །རྒྱབ་ནས་ཚུར་ལ་བཤམས་པས་འཐུས། །གཏོར་མ་དེ་ནི་ལྷར་བསྐྱེད་དེ། །དང་པོ་བྲན་ནས་གསོ་མི་དགོས། །དེ་མདུན་ཀ་ཊོ་ར་ལ་སོགས། །སྣོད་གཙང་ནང་དུ་གཏོར་མ་ནི། །ལྷ་གྲངས་ཤ་ཁྲག་དམར་གྱིས་བརྒྱན། །དེ་ལ་ནམ་འདོན་གསོ་བྲན་བྱ། །གཡས་སུ་བདུད་རྩི་གཡོན་རཀྟ། །དེ་མདུན་མཆོད་པ་བསྐོར་བཤམ་བྱ། །གཏོར་ཆུང་ཤ་དུམ་མཐེབ་སྐྱུ་སོགས། །རྒྱུན་དུ་འབུལ་ཞིང་གསོ་རྒྱུ་
དང་། །ཕུགས་གཏོར་ཆ་ཚང་ལོགས་སུ་བཤམས། ཞིང་སྐྱོང་བསྐང་གཏོར་བཅའ་བ་ལ། །རི་རབ་སྟེང་དུ་ཟུར་གསུམ་བཞག །བཀྲ་ཤིས་རྟགས་བརྒྱད་རྒྱལ་སྲིད་བདུན། །བྱ་ནག་གཡག་ནག་རྟ་ནག་དང་། །ལུག་ནག་ཁྱི་ནག་རྟ་དམར་སོགས། །བསྐང་འབྲས་རྒྱས་པར་བཙུགས་པ་བཤམས། །མེད་ན་གཏོར་ཆོག་གསོ་ལ་འདོན། །སྟ་གོན་གྱི་ལེའུ་སྟེ་གཉིས་པའོ།། །།སྤྱི། ཡི་དམ་བདེ་མཆོག་ཕག་མོ་དང་། །རྒྱལ་བ་རྒྱ་མཚོ་སྒྲོལ་དཀར་སོགས། །རྩ་བའི་ཡི་དམ་བདག་བསྐྱེད་འདོན། །དེ་ནས་དེ་ཡི་ཐུན་བསྡུ་འམ། །གནས་འགྱུར་ཕྱག་རྡོར་རྟ་མགྲིན་དང་། །གུ་དྲག་གང་རུང་བསྒོམ་ཡང་རུང་། །སྤྲོ་ན་གང་ཡིན་མངོན་རྟོགས་འདོན། །བསྙེན་པ་ཕྲེང་སྐོར་ཙམ་བྱས་ལ། །དཔའ་བོ་རྣམ་རོལ་གཞུང་ལྟར་དུ། །བསྙེན་པའི་སྐབས་ཀྱི་བར་དུ་འདོན། །རང་ཉིད་ཡི་དམ་གང་ཡིན་གྱི། །ཐུགས་སྲོག་ཧཱུྃ་འམ་ཧྲི༔ཡིག་མཐར། །གང་ཡིན་སྔགས་ཕྲེང་གཡས་སུ་འཁོར། །ཞིང་སྐྱོང་ཐུགས་ཀར་ཉི་མའི་སྟེང་། །ཐུགས་སྲོག་ཧཱུྃ་མཐིང་གྱེན་དུ་འགྲེང་། །དེ་མཐར་ཡབ་སྔགས་གཡས་སུ་འཁོར། །ཡུམ་གྱི་ཐུགས་ཀར་བྷྱོ་དམར་པོ། །དེ་མཐར་ཡུམ་སྔགས་གཡོན་དུ་
འཁོར། །བམ་རོ་གཉིས་ཀྱི་སྙིང་ཁ་རུ། །ཏྲི་ཧྲིང་ཛགསུམ་བརྩེགས་མ་སྟེང་། །སྐུ་ལྟར་སྔགས་ཀྱང་མགོ་ཐུར་རོ། །སྡེ་བརྒྱད་སྙིང་དཀྱིལ་སོ་སོ་ཡི། །ས་བོན་སྲོག་ཡིག་འབྲུ་རེ་བསམ། །རང་གི་ཐུགས་ཀའི་སྔགས་ཕྲེང་ལས། །འོད་ཟེར་མཐིང་ནག་དམར་མདངས་ཅན། །ཁ་དོག་སྣ་ལྔའི་ཟེར་འཕྲོས་ཏེ། །རང་གི་ཞལ་ནས་ཕར་འཕྲོས་ཏེ། །དམ་བུ་གཉིས་གྱུར་ཡབ་ཡུམ་གྱི། །ཞལ་ཞུགས་ཐུགས་ཀའི་སྔགས་ལ་ཐིམ། །སྔགས་ཕྲེང་གཡས་གཡོན་དྲག་ཏུ་འཁོར། །སྔོན་གྱི་ཐུགས་དམ་ཞལ་བཞེས་དྲན། །ཐུགས་ལ་ཀའི་སྔགས་དང་ས་བོན་ལས། །འོད་ཟེར་སྔོན་ལྟར་ཚུར་བྱོན་ལས། །ཡབ་ཡུམ་ཐུགས་ཀའི་འོད་ཟེར་གཉིས། །གཅིག་འདྲེས་རང་གི་སྙིང་ཀར་ཐིམ། །ཕར་ལ་འཕྲོས་པས་མཆོད་པའི་ཚུལ། །ཡབ་ཡུམ་ཤིན་ཏུ་མཉེས་པར་བསམ། །ཚུར་ལ་བྱུང་བ་དངོས་གྲུབ་ཚུལ། །མཆོག་ཐུན་དངོས་གྲུབ་ཐོབ་པར་བསམ། །ཡབ་ཡུམ་སྔགས་ནི་མི་འབྲེལ་ཚེ། །ཡུམ་ལ་དམིགས་པ་མི་དགོས་སོ། །འདི་ནི་བསྙེན་པའི་དམིགས་པའོ། །གོང་ལྟར་འོད་ཟེར་འཕྲོས་པ་ཡིས། །ཡབ་ཡུམ་སྔགས་འཁོར་འཁོར་བཞིན་ལས། །འོད་ཟེར་གཙོ་འཁོར་ཁྱབ་པར་
འཕྲོས། །གཙོ་འཁོར་ཀུན་གྱི་རང་རང་གི །ཐུགས་སྲོག་ས་བོན་རྣམས་ལས་ནི། །འོད་ཟེར་དམར་པོ་ལྕགས་ཀྱུའི་དབྱིབས། །ཕྱོགས་བཅུའི་འཇིག་རྟེན་ཁྱབ་པར་འཕྲོས། །རང་རང་གནས་པའི་ཕོ་བྲང་དང་། །ཡུལ་ཆེན་ཉེར་བཞི་དུར་ཁྲོད་བརྒྱད། །བསིལ་བ་ཚལ་དང་རྡོ་རྗེ་གདན། །ཏི་སེ་ལ་ཕྱི་ཙཱ་རི་ཏྲ། །རྔམས་པ་སྒྲ་སྒྲོགས་ཤིང་ཆེན་གྱི། །ཞིང་སྐྱོང་འཁོར་བཅས་ཐུགས་ཀར་ཕོག །འོད་ཟེར་ལྕགས་ཀྱུས་ས་བོན་བཟུང་། །རང་དབང་མེད་པར་སྐད་ཅིག་ལ། །སྤྲིན་ནག་རླུང་གིས་བསྐྱོད་པ་བཞིན། །འུར་སྒྲ་ཐུག་ཆོམ་དང་བཅས་བྱོན། མདུན་བསྐྱེད་རྟེན་རྫས་བཅས་པ་ལ། །མཚོ་ལ་ཆར་ཆེན་འབབ་བཞིན་ཐིམ། །དེ་ལྟར་རྩེ་གཅིག་ཡང་ཡང་དུ། །བསྒོམ་ཞིང་བཟླ་བ་ཉེ་བསྙེན་ཡིན། །དེ་ནས་རང་གི་ཐུགས་ཀ་ཡི། །འོད་ཟེར་དེ་ཉིད་སྔགས་ཕྲེང་གྱུར། །སྔ་དྲོ་སྔགས་ཕྲེང་དཀར་པོ་སྟེ། །དུང་ངམ་མུ་ཏིག་ཕྲེང་བ་བཞིན། །རང་གི་ཞལ་ནས་ཡབ་ཡུམ་གྱི། །ཞལ་ཞུགས་ཞི་བའི་མཆོད་པར་གྱུར། །ཐུགས་ཀར་ཐིམ་པས་ཞི་བ་ཡི། །ཕྲིན་ལས་སྒྲུབ་པའི་དགོངས་པ་གཏད། །སྔགས་ཕྲེང་དཀར་པོ་ཚུར་བྱུང་ནས། །རང་གི་ཐུགས་ཀར་ཐིམ་པ་ཡིས། །བདག་
ལུས་འོད་ཟེར་དཀར་པོས་གང་། །ནད་གདོན་སྡིག་སྒྲིབ་ཞི་བར་མཛོད། །སྔགས་ཕྲེང་བར་དུ་འཁོར་བའི་ཚེ། །འོད་ཟེར་ཟླ་བའི་འོད་བཞིན་འཕྲོས། །བདག་དང་བསྲུང་བྱ་ཐམས་ཅད་ཀྱི། །ནད་གདོན་བར་དུ་གཅོད་པ་ཀུན། །མུན་པར་ཟླ་བ་ཤར་བཞིན་ཞི། །ཉིན་ཕྱེད་སྔགས་ཕྲེང་གསེར་གྱི་མདོག །གོང་བཞིན་འཁོར་བའི་འོད་ཟེར་ལས།། ཉི་མ་ཤར་འདྲའི་འོད་ཟེར་འཕྲོས། །བདག་དང་བསྲུང་བྱ་ཐམས་ཅད་ཀྱི། །ཚེ་དང་བསོད་ནམས་དཔལ་འབྱོར་རྒྱས། །པད་མོར་ཉི་ཟེར་ཕོག་བཞིན་རྒྱས། །སྔགས་ཕྲེང་སེར་པོ་རང་ཐིམ་པས། །ཚེ་བསོད་ཉམས་རྟོགས་འཕེལ་རྒྱས་བསམ། །དགོང་མོ་རང་གི་ཐུགས་ཀ་ནས། །སྔགས་ཕྲེང་བྱི་རུའི་ཕྲེང་བ་ལྟར། །རང་གི་ཐུགས་ཀ་ནས་ཕར་འཕྲོས། །མགོན་པོའི་ཐུགས་ཐིམ་མགོན་པོ་ཡི། །ཞལ་ནས་ཚུར་བྱུང་རང་ཞལ་ཞུགས། །མགལ་མེའི་འཁོར་ལོ་བཞིན་དུ་འཁོར། །དེ་ཡི་འོད་དམར་ལྕགས་ཀྱུའི་དབྱིབས། །གློག་འཁྱུག་ལྟ་བུར་ཕྱོགས་བཅུར་འཕྲོས། །ཡིད་ལ་འདོད་པའི་དངོས་གྲུབ་ཀུན། །ཤ་རུལ་སྦྲང་མ་བཞིན་བསྡུས་ནས། །བཅུད་རྣམས་རང་ལ་ཐིམ་པར་བསམ། །མུན་རུབ་རང་གི་སྔགས་ཕྲེང་ལས། །
སྔགས་ཕྲེང་ནག་པོ་ཐོག་འཁྱུགས་ལྟར། །རང་གི་ཐུགས་ནས་མགོན་པོའི་ཐུགས། །མགོན་པོའི་ཞལ་ནས་རང་ཞལ་འཁོར། །བར་དུ་འཁོར་ཚེ་སྔགས་ཕྲེང་ལས། །འོད་མཐིང་ཚ་བའི་རེག་བྱ་ཅན། །འཕྲོས་པས་གནོད་བྱེད་དགྲ་བགེགས་ཀུན། །བྱ་སྤུ་མེ་ལ་བསྲེགས་བཞིན་བཅོམ། །སྔགས་ཕྲེང་རང་ལ་ཐིམ་པའི་ཚེ། །།དྲག་པོ་མཐུ་ཡི་དངོས་གྲུབ་ཐོབ། །དེ་ལྟར་བསྒོམ་ཞིང་བཟླས་པ་ནི། །འདི་ཡི་ལུགས་ཀྱི་སྒྲུབ་པ་ཡིན། །སྔགས་ཕྲེང་ཁ་དོག་ལྔ་ལྡན་པ། །བདག་གི་ཞལ་ནས་མགོན་པོའི་ཞལ། །མགོན་པོའི་ཐུགས་ནས་རང་གི་ཐུགས། །དྲག་ཏུ་འཁོར་བས་ཐུགས་རྒྱུད་བསྐུལ། །མགོན་པོའི་ཐུགས་ཀྱི་འོད་ཟེར་གྱིས། །འཁོར་ཚོགས་རྣམས་ཀྱང་ལས་ལ་བསྐུལ། །གཙོ་འཁོར་ཀུན་ལས་རང་འདྲ་བའི། །སྤྲུལ་པ་ཡང་སྤྲུལ་གྲངས་མེད་སྤྲོས། །སྟོང་གསུམ་འཇིག་རྟེན་ཐམས་ཅད་གང་། །དྲག་སྔགས་ང་རོ་འབྲུག་བཞིན་སྒྲོག །གནོད་ཅིང་འཚེ་བའི་དགྲ་བགེགས་རྣམས། །བཟུང་དང་། བཅིངས་དང་བརྡུང་བ་དང་། །བསད་གཏུབ་ཤ་ཁྲག་ཧབ་ཐོབ་ཟོས། །མཐར་ནི་ཚུར་འདུས་མདུན་བསྐྱེད་བསྟིམ། །སྒྲུབ་པ་ཆེན་པོའི་དམིགས་པའོ། །ཡབ་སྔགས་ཡི་གེ་བཅུ་པོ་
ལ། །འབུམ་ཕྲག་གཅིག་ནི་བསྙེན་པའི་ཚད། །ཡུམ་སྔགས་བམ་རོ་གཉིས་སྦྱར་བ། །ཁྲི་ཕྲག་གསུམ་ནི་ཚད་ཡིན་ལ། །སྡེ་བརྒྱད་སྦྱར་བ་སྟོང་ཕྲག་གསུམ། །དེ་ནི་གྲངས་ཀྱི་བསྙེན་པ་སྟེ། །བསྙེན་ཆེ་ཕཊ་ཡིག་ཛརུ་བསྒྱུར། །གྲངས་ནི་རབ་བདུན་འབྲིང་བཅུ་བཞི། །ཐ་མ་ཉེར་གཅིག་ཞག་གིས་འགྲུབ། །རྟགས་ནི་རབ་དངོས་འབྲིང་ནི་ཉམས། །ཐ་མ་རྨི་ལམ་གསལ་གྱུར་ཏེ། །ཡབ་ཡུམ་དངོས་སུ་བྱོན་པ་དང་། །རྟ་ནག་ཞོན་པའི་སྐྱ་ཕ་དམག །དཔོན་རིགས་བུད་མེད་ཆས་བཟང་དང་། །རྟ་ནག་གཡག་ནག་བྱ་ནག་དང་། །སེང་གེ་སྟག་སོགས་གཅན་གཟན་ཚོགས། །འབྲུག་སྒྲ་ཐུག་ཆོམ་གློག་ཞགས་འཁྱུག །སེར་བ་རླུང་ཐོགས་འོད་ཞགས་འཁྱུགས་པ་དང་། །འཇིགས་སྐྲག་བ་སྤུ་ལྡང་བ་དང་། །བུད་མེད་སྔགས་པ་ཨ་ཙ་ར། །ཆས་བཟང་དཔོན་རིགས་སྐྱེས་ཕྲན་གྱིས། །གུས་ཚུལ་མཚོན་ཆ་འཆང་ཞིང་ཐོགས། །གོ་ཁྲབ་དར་ཟབ་འབུལ་བར་འབྱུང་། །ཕལ་ཆེར་རིགས་པས་དཔྱད་པས་ཤེས། །ལེགས་ཉེས་བརྡ་ཡིས་སྟོན་པ་འབྱུང་། །གཞུང་ནས་བཤད་པ་མི་སྣང་ཡང་། །སྤྲེའུ་བྱུང་ན་བམ་རོ་རྟགས། །དུས་རྟགས་གྲངས་གསུམ་བསྙེན་ཐེམས་
ན། །དེ་ནས་རྒྱུན་བསྙེན་བྱ་བ་དང་། །ལས་ཚོགས་རྣམས་ཀྱང་སྒྲུབ་པས་འགྲུབ། །སྔགས་ཐུན་བསྙེན་པ་ཚར་བའི་རྗེས། །གཞུང་ལྟར་བསྐང་བ་འདོན་པ་དང་། །དེ་ནས་དམར་གཏོར་གཅིག་བཤམས་ལ། །།འགུག་གཞུག་བྱས་ལ་བསྐུལ་པ་འདོན། །བསྙེན་ཚེ་ཕྱི་རུ་མི་འབུལ་བ། །དཀྱིལ་འཁོར་འགྲམ་དུ་ཕུལ་ལ་བཞག །ལས་སྦྱོར་བསད་ལས་དུས་ཡིན་ན། །ཟོར་དུ་འཕང་ངམ་དགྲ་ཕྱོགས་ཕུལ། །དེ་ནས་ཐུན་བཞིར་དཔལ་རོལ་བཏང་། །སྔ་དྲོ་ཉིན་གུང་དགོང་མོ་དང་། །མཚན་གྱི་ཐུན་དང་བཞི་ཡིན་ཏེ། །ཐུན་མགོར་དཔལ་རོལ་བཏང་བ་དང་། །ཐུན་གྱི་དངོས་གཞི་བསྙེན་པ་སྟེ། །ཐུན་མཇུག་བསྐང་བ་གཏོར་འབུལ་ལོ། །དེ་ལྟར་ཞག་བདུན་ཡིན་ཆད་ཀྱིས། །ཞག་ནི་དུ་ཙམ་བསྒྲུབས་ཀྱང་རུང་། །གྲོལ་ཁ་ནུབ་མོ་དམར་གཏོར་ནི། །ཆེ་བ་གཅིག་དང་ཟན་ལིང་བཤམས། །རང་ལ་དམིགས་ཡུལ་དགྲ་མེད་ཀྱང་། །བསྟན་པའི་སྤྱི་དགྲ་དགྲ་བགེགས་ཀུན། །འགུགས་གཞུག་བྱས་ལ་བསྐུལ་ཀུན་གྱེར། །ཟོར་དུ་འཕང་ངམ་གཙང་སར་ཕུལ། །ཡང་ན་དྲག་པོའི་སྦྱིན་སྲེག་བྱ། །མགོན་པོའི་རིགས་ཀུན་བསྒྲུབ་པའི་མཇུག །དྲག་ལས་བརྡ་ཙམ་མ་བྱས་ན། །རང་གི་
ཚེ་ལ་གནོད་དོ་ཞེས། །མགོན་པོ་སྤྱི་རྒྱུད་ཀུན་ནས་གསུངས། །དེ་ཕྱིར་ཡང་ན་དགྲ་ཆོས་སམ། །གཏོར་ཟློག་གཏོར་འཕེན་དེ་ཙམ་བྱ། །ཕྱི་ནང་དཔལ་རོལ་ཚང་བར་འདོན། །སྒྲུབ་རྟེན་གཏོར་མ་ལྷ་བསྐྱེད་དེ། །གནས་གསུམ་འོད་ཟེར་དཀར་དམར་མཐིང་། །རང་གི་གནས་གསུམ་ཐིམ་པ་ཡིས། །དབང་དང་དངོས་གྲུབ་ཐོབ་བསྒོམ་ཞིང་། །ཡབ་ཡུམ་རྩ་སྔགས་སྙིང་པོའི་མཇུག །ཀཱ་ཡ་སིདྡྷི་ཨོ། ཝཱཀྐ་སིདྡྷི་ཨཱ༔ ཙིཏྟ་སིདྡྷི་ཧཱུྃ། ཞེས་བརྗོད་རང་གི་གནས་གསུམ་གཏུགས། །དེ་ནས་གཏོར་ལྷ་ནམ་མཁར་བཏེག །གཏོར་མ་དེ་ཉིད་གསོ་བྲན་བྱ། །དཔལ་རོལ་གཞུང་གི་གཏོར་བསྔོས་དང་། །མཆོད་བསྟོད་རྗེས་ཆོག་ཚུལ་དུ་བྱ། །བཤགས་པ་བཏོན་ལ་ཡིག་བརྒྱ་བཟླས། །དེ་ནས་གཤེགས་གསོལ་མི་བྱ་བར། །རྟེན་རྗེས་སྲོག་འཁོར་རྣམས་ལ་བསྟིམ། །བརྟན་བཞུགས་རབ་གནས་བཀྲ་ཤིས་བྱ། །མཚམས་གྲོལ་དེ་ནས་རྒྱུན་དུ་བྱ། །མངོན་རྟོགས་འདོན་པ་མ་གྲུབ་ཀྱང་། །སྐད་ཅིག་སྤྱན་འདྲེན་མཆོད་བསྟོད་རྣམས། །མ་ཆག་བྱ་ཞིང་རྒྱུན་དུ་བསྙེན། །སྔགས་གྲངས་མང་བར་ཐོན་འདོད་ན། །རྒྱུན་གྱི་དགོངས་པ་ཡིག་བདུན་བཟླ། །ཨོ་སེང་ཧ་མུ་ཁ་ཧཱུྃ་ཕཊ། །
ཕཊ་དང་ཛགཉིས་སྐབས་དང་བསྟུན། །འདི་ནི་ཤིན་ཏུ་རྣོ་བར་བཤད། །ཡིག་བཅུ་ཅན་ཏེ་སྟོབས་ཆེན་གསུངོས། །སྒྲུབ་པ་དངོས་གཞིའི་ལེའུ་སྟེ་གསུམ་པའོ།། །།སྤྱི། ན་མོ་མ་ཧཱ་ཀཱ་ལ་ཡེ། །ཞིང་སྐྱོང་སྒྲུབ་པའི་སྐར་མ་ནི། །སྣར་མ་དང་ནི་ས་ག་དང་། །ནབས་སོ་དང་ནི་ནམ་གྲུ་བཞིན། །ཞིང་སྐྱོང་སྒྲུབ་པའི་སྐར་མ་སྟེ། །དེ་དག་རྒྱུད་ནས་གསུངས་པ་ཡིན། །མགོན་པོ་སེང་གདོང་ཡབ་ཡུམ་རྒྱུན་དུ་བསྟེན་པ་ནི། །ལོ་གཅིག་རྒྱུ་བ་དཔྱིད་ར་བའི། ཚེས་དགུ་དང་གནམ་གང་བྱང་ནས་ལྷོ་རུ་རྒྱུ། ཟླ་བ་བྱུང་ངོ་ཅོག་གི་ཚེས་བརྒྱད་སྲོད་ལ་ནུབ་ནས་ཤར་དུ་རྒྱུ། ཉེར་གཉིས་ཉེར་གསུམ་ཉི་མ་ནུབ་པ་དང་། ནུབ་ནས་ཤར་དུ་རྒྱུ། གནམ་གང་ཉིན་པར་ལན་གསུམ་རྒྱུ་བ་སྟེ། །ཉི་ཤར་ཐལ་ཀ་ནམ་གུང་གསུམ་ཡིན་ནོ། །རྒྱུན་དུ་ཉིན་གུང་མཚན་གུང་སྲིད་གསུམ་ཉུལ། །ལར་ནི་ལོ་གཅིག་སྒྲུབ་པ་བྱས་པ་བས། །རྒྱུ་དུས་དུས་གཅིག་མཆོད་པ་བྱས་ན་འཐད་ཆེ་གསུངས། །མགོན་པོའི་སྤོས་སྦྱོར་འདི་ལྟ་སྟེ། །རྒྱ་སྤོས་གུ་གུལ་གླ་རྩི་རྩ་བ་དང་། །ཤ་ཆེན་རྒྱ་ཤུག་ཏང་ཀུ་ཛཱ་ཏི་ཡི། །ཁ་ཚར་བཏབ་པའི་རིལ་བུ་སྲན་མ་ཙམ། །སྤྱན་འདྲེན་དུས་སུ་མཆོད་པ་ན། །ཞིང་སྐྱོང་མགོན་པོ་
ཤུགས་ཀྱིས་འགྲུབ། །སྤྱི། དེ་ལྟར་ཟིན་བྲིས་ཉུང་བསྡུས་འདི། །གླིང་གི་ཡུལ་ནས་བྱོན་པ་ཡི། །ཀརྨ་ཕྲིན་ལས་དཔལ་བཟང་པོ། །ཞེས་བྱའི་བླ་མ་དེས་བསྐུལ་ནས། །སྔགས་འཆང་རཱ་ག་ཨ་སྱ་ཡིས། །ངག་ནས་ཇི་ལྟར་སྨོད་པ་བཞིན། །དགེ་སློང་ཨོ་རྒྱན་ཐབས་མཁས་ཀྱིས། །ཤིན་ཏུ་མགྱོགས་པར་རིག་ཟིན་བྱས། །འགལ་འཁྲུལ་ཉེས་པ་ཅི་མཆིས་ན། །མགོན་པོ་འཁོར་དང་བཅས་ལ་བཤགས། །དགེ་བས་བསྟན་དང་བསྟན་འཛིན་གྱི། །དབུ་འཕང་དགུང་བས་མཐོ་བར་ཤོག །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།