མཁས་གྲུབ་ཀརྨ་རྒྱ་མཚོའི་དྲིས་ལེན།
མཁས་གྲུབ་ཀརྨ་རྒྱ་མཚོའི་དྲིས་ལེན་བན་རྒན་རཱ་ག་ཨ་སྱའི་བཅོས་གཏམ་འགའ་རེ་གདའ་ཧེ་ཧེ།
ན་མོ་གུ་རུ་བཛྲ་པཱ་ཎི་ཡེ། །ཡེ་ཤེས་ལས་དང་འཇིག་རྟེན་ཆོས་སྐྱོང་ཚོགས། །ངོ་བོ་སྟོང་པའི་དབྱིངས་སུ་བཞུགས་པ་དེ། །རྫས་སྔགས་ཏིང་འཛིན་གསུམ་འཛོམ་རྟེན་འབྲེལ་གྱིས། །མངོན་དུ་ཕྱུང་ནས་ཕྲིན་ལས་འགྲུབ་པར་བྱེད། །དཔེར་ན་ཤིང་དང་པགས་པ་དབྱུག་གུ་གསུམ། །ལག་པའི་རྟེན་འབྲེལ་འཛོམས་ལས་རྔ་སྐད་འབྱུང་། །ཞིང་དང་རྨོན་པ་ས་བོན་སོ་ནམ་ཚོགས། །ཀུན་ལ་ཚང་བའི་མཐུ་ལས་ལོ་ཐོག་སྨིན། །མེ་ཆ་མེ་རྡོ་སྤུ་བ་རྩུབ་ཤིང་དང་། །ལག་པས་སོ་སོར་བསྲེགས་པའི་ནུས་མེད་ཀྱང་། །རྟེན་འབྲེལ་འཛོམ་ལས་མེ་བྱུང་ནགས་ཚལ་བསྲེགས། །དེ་བཞིན་ལིང་
ག་ཐུན་རྫས་ཕུར་པ་སོགས། །སོ་སོར་དཔྱད་ན་འབྲེལ་མེད་རྩེད་མོ་འདྲ། །འོན་ཀྱང་རྟེན་འབྲེལ་ཀུན་འཛོམས་མཐུ་རྩལ་གྱིས། །དམིགས་ཡུལ་དགྲ་བགེགས་རྣམས་ནི་འཇོམས་པར་ནུས། །དེ་དོན་མེ་ལྕེ་འབར་བའི་རྒྱུད་ཆེན་ལས། །རྫས་རྣམས་མེད་ན་དངོས་གྲུབ་མི་ཐོབ་སྟེ། རྨོངས་པས་ས་བོན་ཙུབ་ཤིང་རྩུབ་རྟེན་འདྲ། །ཀུན་ཀ་ཚང་ལ་དངོས་གྲུབ་མཚན་མ་སྟེར། །ཅེས་གསུངས་ཤན་པ་ནག་པོའི་རྒྱུད་ལས་ཀྱང་། །རྡོ་རྗེ་མཁའ་འགྲོའི་དངོས་གྲུབ་འདོད་པའི་མིས། །རྫས་རྣམས་མེད་ན་དངོས་གྲུབ་མི་ཐོབ་སྟེ། །དཔེར་ན་རྨོན་པ་དང་ནི་ས་བོན་འདྲ། །ཀུན་ཀ་ཚང་བའི་
མཐུ་ལས་དངོས་གྲུབ་འབྱུང་། །ཞེས་གསུངས་རྫས་རྣམས་ཚང་ན་ལྷ་མོ་མཉེས། །དཔེར་ན་བྱིས་སྦས་མེ་ཏོག་མཐོང་བ་འདྲ། །རྫས་ལ་དགའ་བའི་རྫས་དགའ་མ་ཞེས་བྱ། །སྲིད་པ་མ་མོ་འབུམ་གྱི་རྒྱུད་ལས་ཀྱང་། །ཤིང་ལོ་རླུང་ཁྱེར་ས་ལ་མ་ཕོག་ང་ལ་ཡོད། །ཅེས་གསུངས་ལྷ་མོ་ཕག་མོའི་རང་རྒྱུད་ལས། །ཤིང་ལོ་རླུང་གིས་ཁྱེར་བ་ཡི། །ས་ལ་མ་ལྷུང་བ་དེ་ལ། །མིང་རུས་རྡོ་ཡི་སོལ་བ་ཡིས། །བྲིས་ཏེ་གཏོར་མ་བཞག་པར་བྱ། །ཞེས་གསུངས། མེ་ལྕེ་འབར་བའི་རྒྱུད་ཀྱི་དོན། །སློབ་དཔོན་པདྨས་མཛད་པའི་རྒྱ་གཞུང་ནི། །འོ་བྲན་དཔལ་གྱི་དབང་ཕྱུག་ལ་གནང་ཞིང་། །བསྒྲུབས་པས་ཞལ་གཟིགས་གཏོར་མ་བཤམས་ཙམ་གྱིས། །རྒྱུད་ཀུན་མཐུ་ཡིས་མཁའ་འགྲོའི་དངོས་གྲུབ་གནང་། །བླ་བརྒྱུད་མན་ཆད་བདག་གི་བླ་མ་ནི། །ནུས་མཐུའི་གཡེར་ཐོབ་བླ་མ་ཝ་རྒན་གྱི། །གསུང་རྒྱུན་བདག་ལ་ཡོད་ཕྱིར་འོལ་ཚོད་མིན། །སྐྱེར་པ་དབྱར་པ་ལྕང་ནག་ལྕང་དཀར་གྱི། །བྱང་ཆུབ་ཤིང་རྣམས་ཤིང་རིགས་གཅིག་པའི་ཕྱིར། །ལྕང་ལོ་འབྲུལ་སྐབས་ལྕང་རྒན་དྲུང་དུ་དགུགས། །ས་ལ་མ་འབྲུལ་བར་སྣང་ཁམས་ནས་བཟུང་། །དེ་ཕྱིར་ས་ལྡན་སྟེང་དུ་མི་བཞག་སྟེ། །མཚོན་གྱི་
སྐེད་པར་དུམ་གཉིས་བྱས་ཏེ་བཅད། །རྡོ་སོལ་སྣག་ཚས་སྟོད་ལ་ལྷ་མོའི་སྐུ། །སྨད་ལ་ལྷ་མོའི་བསྙེན་སྔགས་བྲིས་བྱས་ཏེ། །སྤྱན་དབྱེ་ལྷ་མོའི་སྐུ་དང་བརྟན་བཞུགས་དང་། །གཏོར་མ་འབུལ་ཞིང་བཀྲ་ཤིས་བརྗོད་བྱས་ཏེ། །སྔགས་དང་ལྷ་གཉིས་ཞལ་སྦྱོར་ཚོན་སྐུད་བཅིང་། །ཤིང་ལོ་མི་ཆག་ཤོག་གུའི་འཐུགས་པོས་བཏུམ། །བྲི་དང་རབ་གནས་ལྷ་མོ་རྒྱུ་བའི་ཉིན། །སྟན་ལས་མ་ལངས་དུས་གཅིག་ཚང་བར་བྱས། །དེ་ནི་ལྷ་མོའི་སྒྲུབ་རྫས་མཆོག་ཡིན་ཏེ། །བསྒྲུབ་དུས་གཏོར་མའི་རྩེར་འཛུགས་ལྷ་མོར་བསྒོམ། །ཚར་ནས་ལུས་ལ་འབྲལ་མེད་འཆང་ན་རབ། །རྟེན་སྒམ་ནང་ངམ་མདའ་དར་ལ་བཏགས་འཆང་། །མཆོད་རྫས་ཟླ་རྒྱས་ཟླ་ཕྲོམ་གལ་ཕྱེ་དང་། །འཇམ་འདས་ཚེ་གལ་ཐུན་སོགས་དཔེའུ་རིས། །གཏོར་མ་སྣ་ཚོགས་དབུས་ལུགས་ཕྱག་ལེན་མཐོང་། །དེ་བཞིན་ཚེ་དང་གལ་དང་ཐུན་བསྡེབ་གསུམ། །ཀཿཐོག་ལུགས་ལ་དཔེ་རིས་གཞན་ཞིག་སྣང་། །གཏོར་མ་དེ་༧དག་མཛེས་ཆོས་ཕྱག་ལེན་ཙམ། །ཕྱེ་ཞེས་བྱ་བ་རོ་བཅུད་ལྡན་པའི་ཟས། །གལ་ཞེས་བྱ་བ་བུར་ཆང་བཟང་པོ་སྟེ། །གཏོར་སྣོད་ནང་གི་གཡས་གཡོན་གཉིས་སུ་བཞག །གཏོར་མ་
དང་ནི་གསུམ་ཀས་ཐུན་སྡེབ་ཚང་། །ཡང་ན་གཏོར་མ་ཆང་གིས་སྦྲུས་པས་ཚང་། །དེ་ཕྱིར་ཟན་ཆང་བསྲེས་པའི་ཕྱག་ལེན་འཇགས། །ཞེས་ཀྱང་ཐུན་སྡེབ་གཏོར་མ་བཅའ་འདོད་ན། །གཏོར་སྣོད་ནང་དུ་ཟན་ལ་ཧོམ་ཁུང་དབྱིབས། །དེ་ནང་འབྲི་མོག་བྱུག་ཅིང་ཆང་གིས་བཀང་། །དེ་སྟེང་མར་ལ་ཚེས་བརྒྱད་ཟླ་བའི་གཟུགས། །ཁ་ནི་གྱེན་དུ་བསྟན་པ་གཅིག་བཙུགས་ཏེ། །དེ་སྟེང་བུ་རམ་བསྲེས་པའི་ཟན་གྲུ་བཞི། །དེ་སྟེང་མར་གྱི་ཉི་མ་ནོར་བུའི་ཏོག །དེ་ནི་ཀཿཐོག་ལུགས་ཀྱི་ཕྱག་ལེན་ནོ། །དབུས་གཙང་ལུགས་དང་རཏྣ་ལུགས་ལ་ནི། །ཚེ་ནི་ཚེ་རིལ་གལ་ནི་ཚེ་ཆང་སྟེ། །སྣོད་གཅིག་ནང་དུ་བཤམས་པ་ཐུན་སྡེབ་ཟེར། །འབྲི་གུང་ལུགས་ལ་གཏོར་མ་ཟོ་བ་འདྲ། །ནང་ནི་ཆང་བཀང་ཁ་ལེབ་ནོར་བུའི་ཏོག །པད་ཀོར་དུང་ཕྲེང་ལ་སོགས་མར་རྒྱན་གཟབ། །གཏོར་མའི་ལོགས་གཅིག་ཏེབ་རུའི་མཆུ་འདྲ་ནས། །ཆང་ནི་ཐིགས་རེ་བཀྱེ་སོགས་བྱེད་སྲོལ་སྣང་། །མ་མགོན་འདི་ལ་དེ་ཚོ་མི་དགོས་སོ། །གྲུབ་ཆེན་ཀརྨ་པཀྵིའི་གསུངས་ལས་ནི། །མདོས་དང་བསྐང་བ་མཎྜལ་དོན་གཅིག་གསུངས། །དེ་ཕྱིར་རྫས་སྣ་ཐམས་ཅད་བསྐང་རྫས་ཡིན། །སྣང་སྲིད་སྐྱེ་འགྲོ་ཐམས་ཅད་ཡིན་མོད་
ཀྱང་། །དུག་ལྔའི་སྒོ་ནས་ཉམས་ཆག་བྱུང་བ་རྣམས། །བསྐང་ཕྱིར་དུག་ལྔའི་རང་གཟུགས་གཟུགས་འགྲོས་ལྔ། །འདོད་ཆགས་ཞེ་སྡང་གཏི་མུག་བྱ་སྦྲུལ་ཕག །ང་རྒྱལ་མི་དང་ཕྲག་དོག་ཁྱི་ཡིན་ཏེ། །གསང་སྔགས་དམ་མེད་རྣམས་ལ་གསང་བའི་ཕྱིར། །རྒྱ་སྐད་དམ་ནི་བརྡ་ཡི་སྐད་ཀྱིས་གསུངས། །འོན་ཀྱང་སྔགས་པ་གསར་བུ་མི་གོ་དགོས། རྒྱ་སྐད་བརྡ་སྐད་བོད་སྐད་སྤེལ་མར་གསུངས། །དེ་དག་རྒྱས་པར་བསྐང་ཡིག་རྣམས་ནས་ཤེས། །མཆོག་ཆེན་མི་དང་རྐང་དུང་གཉིས་ཀར་འཇུག །མཆོག་ཕྲན་རྐང་དུང་རྐང་གླིང་གཉིས་ཀར་འཇུག །གྲི་རྒོད་རྐང་དུང་གཡས་བུས་མགོན་པོ་འདུ། །གདོན་ཕྲན་འབྱུང་པོ་རྣམས་ནི་འགྲོས་པར་བྱེད། །བུད་མེད་རྣམ་པར་གྲིར་ཤི་ཞེས་བྱ་བ། །བྱིས་སྦ་སྐྱེས་ནི་མ་ཐུབ་ཤི་བ་ཡི། །རྐང་དུང་གཡོན་གྱི་ལྷ་མོའི་འབོད་རྫ་ས་མཆོག །དར་ནག་ཁ་གང་མགོན་པོའི་སྤྱན་འདྲེན་སྔགས། །མཚལ་དང་གྲི་ཁྲག་བསྲེས་པས་བྲིས་པ་ཡི། །དར་ནག་ལྕགས་ཀྱི་རྡོ་༈ རྗེའི་རྩེ་ལ་བཏགས། །སྤྱན་འདྲེན་དུས་སུ་ལག་གཡུག་ཚུལ་དུ་གཡབ། །མིང་སྲིང་བྱིས་སྦ་ཐོན་པའི་ལག་གཡོན་ལ། །དར་ནག་ལྷ་མོའི་སྤྱན་འདྲེན་སྔགས་བྲིས་བཏགས། །སྤྱན་
འདྲེན་དུས་སུ་ཚུར་ལ་ལག་གཡུག་ཚུལ། །ཧ་ཏ་གཡབ་ཅེས་གསུངས་པའི་དེ་དོན་ཡིན། །སྐྱེས་པ་གཟུགས་མཛེས་བྱང་སེམས་མ་ཉམས་པ། །བཙན་ཐབ་ཤི་བའི་གསང་རྡོར་འབྲས་བུ་བཅས། །ལེགས་པར་སྐམ་སྟེ་ག་པུར་ཆུས་བྱུག་པ། །དར་སྣ་ལྔས་རྒྱན་རྒྱལ་མཚན་རྩེར་བཏགས་པ། །མི་དབང་འབྲས་བུའི་རྒྱལ་མཚན་ཞེས་བྱའོ། །པདྨ་རིཀྟ་ཟན་བསྲེས་རིལ་བུ་བྱ། །མཚལ་བྱུག་མཚལ་གྱི་ཤིང་ཐོག་སྐམ་པོ་ཡིན། །བྲག་ཞུན་ལི་ཁྲི་སིནྡྷ་ར་བསྲེས་པའི། །རིལ་བུ་མཚལ་བྱུག་དེ་ཡི་གོ་ཆོད་དོ། །མཚན་ལྡན་བུད་མེད་མཁའ་འགྲོའི་མཚན་རྟགས་ཅན། །དཔྱི་དཀར་མཁལ་དཀར་ཞེས་བྱ་ལུག་ནག་དེ། །སྤྱི་བོ་མ་ཡིན་དཔྱི་མགོ་དཀར་ཐིག་ཡིན། །སྲོག་མེད་དབུགས་ནི་མར་མེ་ཡིན་པ་དང་། །དེ་བཞིན་དབུགས་མེད་སྲོག་འདི་སྒོ་ང་དང་། །ཟླ་རྒྱས་ཞོ་དང་ཟླ་ཕྲོམ་ཐུད་ལ་ཟེར། །འཇམ་འདས་ཐུག་པ་ཁུར་བ་གྲོ་ཟན་ལགས། །འབྲི་ལ་ཟ་ལེ་ལུག་ལ་ཤེལ་སྒོང་དང་། །ར་ལ་ཙ་ར་ལ་སོགས་གཞུང་དུ་གསལ། །དེ་དག་འཇིག་རྟེན་ཁམས་ན་ཡོད་པ་རྣམས། །བློ་ཡིས་བླངས་དང་ཡིད་ཀྱིས་སྤྲུལ་པ་དང་། །དམིགས་རྟེན་བསྐང་རྫས་ཐང་སྐུ་བཤམས་པའམ། །མེད་ན་ཟན་ལ་བཅའ་བའི་ཕྱག་ལེན་
ནི། །རྣལ་འབྱོར་རྒྱུད་ཀྱི་ཕྱག་རྒྱའི་ཚབ་ཡིན་ཏེ། །རི་རབ་གྲུ་བཞི་བང་རིམ་བཞི་ཡི་སྟེགས། །ཞི་བའི་ལས་དང་སྲུང་བ་བྱེད་པ་ནི། །གཏོར་མ་ཟླུམ་པོ་མེ་ཏོག་བརྒྱན་པ་བཞག །ཚེ་བསོད་ཉམས་རྟོགས་བསྟན་པ་རྒྱས་འདོད་ན། །གཏོར་མ་ཟུར་བཞི་ནོར་བུས་བརྒྱན་པ་བཞག །རླུང་སེམས་སྣང་སྲིད་དབང་དུ་སྡུད་པ་ལ། །གཏོར་མ་ཟུར་གཉིས་མེ་ཏོག་དམར་པོས་བརྒྱན། །བཟློག་བསད་ཆོ་འཕྲུལ་ལ་སོགས་དྲག་པོ་ལ། །གཏོར་མ་ཟུར་གསུམ་མེ་རིས་བརྒྱན་པར་བྱ། །དེ་སྟེང་བསྐང་འབྲས་པར་བཏབ་བཙུགས་པ་ནི། །རྩེ་ལ་བཀྲ་ཤིས་རྟགས་བརྒྱད་རྒྱལ་སྲིད་བདུན། །མཆོད་པའི་ལྷ་མོ་རྣམས་ནི་རང་ཞལ་བསྟན། །དེ་འོག་བྱ་རིགས་དེ་འོག་རི་དྭགས་དང། །དེ་འོག་གཅན་གཟན་དེ་འོག་གཡུང་དྭགས་དང་། །དེ་འོག་ཆུ་གནས་སྣ་ཚོགས་ཚང་བར་བཙུགས། །ཁྱད་པར་བྱ་ནག་གཡག་ནག་ལུག་ནག་དང་། །ཁྱི་ནག་རྟ་ནག་རྣམས་ནི་རེ་རེ་ལ། །བཅུ་གསུམ་བདུན་ལྔ་ལ་སོགས་ཟན་ནག་བྱ། །སྲུང་བ་བྱེད་ན་ཐམས་ཅད་ཁ་ནང་བསྟན། །ཟློག་པ་བྱེད་ན་ཕྱོགས་མཚམས་ཁ་ཕྱིར་བསྟན། །དེ་ནི་དམག་ཐབ་བྱ་བ་ཀུན་ལ་དྲག །བསད་པའི་ལས་ལ་
ཕྱོགས་གཅིག་ཁ་བསྟན་ཏེ། །དགྲ་བོའི་ལིང་ག་ཕྱོགས་བསྟན་ཇག་ཐབ་ཡིན། །མར་ཐུད་རིལ་བུ་ཤ་ཁྲག་སོགས་ཀྱིས་བརྒྱན། །འབྲུ་སྣ་ཤིང་ཐོག་ཟས་ཕུད་ནང་དུ་བཏབ། །འདི་ནི་གསར་རྙིང་ཀུན་གྱི་ཕྱག་ལེན་ཡིན། །མར་ཐང་ཆོས་རྗེ་མཁར་དྲུང་ཕྱག་ལེན་ནི། །བསྐང་གཏོར་ལོགས་སུ་བཅའ་བར་མི་བྱེད་པར། །ཕུགས་གཏོར་ཉིད་ལ་བསྐང་འབྲས་བགོས་ནས་བཙུགས། །བླ་མར་རྟགས་བརྒྱད་ཡི་དམ་རྒྱལ་སྲིད་བདུན། །མཁའ་འགྲོའི་ཕྱག་མཚན་མཆོད་པའི་ལྷ་མོ་སོགས། །ཆོས་སྐྱོང་སོ་སོར་སོ་སོའི་མཐུན་རྫ་ས་བཙུགས།། །སྒར་ཆེན་ལུགས་ལ་བསྐང་གཏོར་ཟུར་གསུམ་པ། །དཀར་རྒྱན་མེ་རི་ཤིན་ཏུ་གཟབ་པར་བྱ། །བསྐང་འབྲས་མི་བཙུགས་ཐང་སྐུ་མེད་ན་ཡང་། །ཡོལ་བ་བླ་བྲེ་གོས་ཡུག་མང་པོ་ལ། །གཟུགས་བརྙན་སྣ་ཚོགས་ཡོད་པའི་གོ་སྤྱད་ནས། །གདན་ས་སོ་སོའི་རྟེན་གཏོར་སྒྲུབ་རྫས་སོགས། །སྔར་ནས་ཚང་བར་ཡོད་ལ་ཐུགས་གཏད་མཛད། །དེ་བཞིན་གོ་མཚོན་རྟ་ཕྱུགས་སྒོ་ཁྱི་ཡན། བསྐང་བའི་རྫས་སུ་དམིགས་ནས་རྒྱུན་ཁྱེར་དུ། །བསྐང་ཐུང་བཏོན་པས་ཚོགས་རྫོགས་དཀོར་སྒྲིབ་ཆུང་། །རྒྱུད་ལུང་རྣམས་ནས་ཇི་སྐད་གསུངས་བཞིན་དུ། །སྒྲུབ་པའི་བྲེ་ཁ་
གང་བ་ཐུགས་དམ་སྟེ། །གཞུང་བཞིན་མ་གྲུབ་བྲེ་ཁ་མ་གང་པས། །བསྐང་བའི་ཆོ་ག་དེ་ཉིད་བསྐངས་བྱས་པས། །ལྷ་ཡི་ཐུགས་དམ་མཆོག་ཐུན་དངོས་གྲུབ་རྣམས། །གསོལ་བ་གང་བཏབ་སྩོལ་བ་ཡིན་ཕྱིར་གནང་། །ཆོ་ག་འདི་ཡིས་དམ་ཚིག་ཉམས་ཆག་སོས། །དེ་ཕྱིར་བསྐང་བའམ་བསྐང་གསོ་ཞེས་གྲགས་སོ། །རྟེན་རྫས་ཕལ་ཆེར་སྒྲུབ་རྫས་གཙོ་བོ་སྟེ། །ཕྱི་རྟེན་མགོན་པོ་རྟ་ནག་གཡག་ནག་དང་། །ལྷ་མོ་ལ་ནི་ལུག་ནག་དཔྱི་དཀར་དང་། །ནོར་ལྷའི་རིགས་ལ་རྟ་སྔོན་ཆུ་རིས་ཅན། །སྐྱེས་བུ་ལ་ནི་ར་དཀར་གཉའ་ནག་བཙན། །སྔགས་ཀྱི་ཤོག་དྲིལ་བཏགས་སམ་མ་འཛོམས་ཀྱང་། །སྔགས་མདུད་དར་སྣ་རྔ་ཚོན་དཀར་དམར་རྒྱན། །ཁྲུས་ཀྱི་ཚུལ་དུ་གཟུངས་ཆུས་བྲན་བྱས་ལ། །ནང་མཆོད་བྲན་ནས་གཏོར་རྒྱན་བསྲུང་བཀུས་ཏེ། །འདི་ལ་རྟེན་ཆོས་བཞུགས་ཞེས་བཀའ་བསྒོ་བྱ། །སྤུ་རྩིད་མི་བྲེག་ལུད་སོགས་འགེལ་མི་རུང་། །ནང་རྟེན་མགོན་པོར་བྱ་ནག་གཡག་ནག་གསོབ། །ལྷ་མོར་ནལ་བུའི་པགས་པའི་ལུག་ནག་གསོབ། །དེ་དག་གསོབ་ཏུ་བརྒྱང་ངམ་རྒྱལ་མཚན་བྱ། །སྐྱེ་ལ་སྲོག་འཁོར་བཏགས་ཏེ་ཕུགས་སུ་སྦ། །གསང་རྟེན་མགོན་པོའི་
རིགས་ལ་གྲི་སྙིང་མཆོག །མེད་ན་རྟ་ནག་གཡག་ནག་བྱ་ནག་དང་། །དོམ་ནག་ཁྱི་ནག་སྙིང་ལ་རུང་བ་ཙམ། །ལྷ་མོར་རྣ་གྲིར་ཤིའམ་ནལ་བུའི་སྙིང་། །མེད་ན་ལུག་ནག་གམ་ནི་བྱ་མོ་ནག་མོའི་སྙིང་། །རྩ་སྦུབས་ནང་དུ་བསྙེན་སྒྲུབ་སྔགས་དང་ནི། །འབྲུ་སྣ་སྨན་སྣ་རིན་ཆེན་ཕྱེ་མ་བླུག །ལུས་ལ་འཆང་ངམ་རྟེན་སྒམ་ནང་དུ་སྦ། །གྲི་ལྕགས་གྲི་གུག་རལ་གྲི་སོར་བཅུ་གཉིས། །ཕུར་པ་བྷན་ཞྭ་ནག་གོས་ནག་སོགས། །ལྷར་བསྐྱེད་འོད་ཞུ་བསྟིམ་ལ་རྟེན་དུ་བཟུང་། །དེ་དག་ཡོན་ཏན་ཕྲིན་ལས་རྟེན་དུ་འགྱུར། །སྐུ་རྟེན་སྐུ་གཟུགས་གསུང་རྟེན་སྔགས་བྱང་རྣམས། །གསེར་དང་དངུལ་གྱིས་བྲིས་པའི་ཤོག་དྲིལ་དང་། །རྒྱུད་དང་རྒྱ་གཞུང་བསྒྲུབ་ཡིག་དཔེ་ཆ་འཆང་། །ཐུགས་རྟེན་རྡོ་རྗེ་རྩེ་ལྔ་གྲི་གུག་གམ། །སྒྲུབ་པའི་གཞུང་ནས་བྱུང་བའི་བླ་རྡོ་ཡིན། །ཡང་ན་རི་རྒྱལ་གྲགས་པ་ཅན་གྱི་རྩེར། །རྡོ་ནག་ཟུར་གསུམ་ཤ་བའི་རིལ་མ་ཙམ། །ལག་པས་མ་རེག་གྲི་གུག་རྩེ་ཡིས་བླངས། །དར་ནག་བཏུམ་ལ་གསེར་གྱིས་ཧཱུྃ་བྲིས་པ། །མགོན་པོའི་བླ་རྡོར་དམིགས་ལ་མགོན་པོ་བསྟིམ། །མཚོ་རྡེལ་སྔོན་པོ་ལག་པས་མ་རེག་པ། །དར་སྔོན་སྟེང་ལ་མ་དང་བྷྱོ་བྲིས་པ། །ལྷ་མོ་བསྐྱེད་བསྟིམ་ལྷ་
མོའི་རྟེན་ཡིན་ནོ། །རྒྱས་པར་དེ་དག་ཅི་བཞིན་མ་འབྱོར་ནི། །མ་མགོན་རྒྱུ་དུས་ཚེས་གྲངས་བཟང་པོ་ལ། །དར་རས་ནག་པོར་མ་མགོན་ཙཀ་ལི་བྲི། །རྒྱབ་ཏུ་ས་བོན་དང་ནི་བསྙེན་སྔགས་བྲི། །སྤྱན་འབྱེད་རབ་གནས་བརྡ་ཙམ་དེ་ཉིད་ཚར། །དེ་ནི་རྟེན་གྱི་མཆོག་ཏུ་རྒྱུད་ནས་གསུངས། །མདའ་དར་ནག་པོར་རྟ་ནག་གཡག་ནག་དང་། །གྲི་གུག་རལ་གྲི་ལ་སོགས་སྒྲུབ་རྫས་ཀུན། །ཤོག་བུར་བྲིས་བཏགས་རྟེན་ཀུན་ཡོངས་རྫོགས་འགྱུར། །རང་ཉིད་སྐྱེ་བ་དཔག་ཏུ་མེད་པ་ནས། །གྲི་རྒོད་ཤི་དང་རྨིར་གྲིར་ཤི་བ་མང་། །དེ་ཀུན་རང་གི་སྙིང་ལ་ཚང་བར་དམིགས། །རང་ཉིད་རྩ་སྦུབ་དབུས་མར་ཡེ་ཤེས་མགོན། །གཡས་སུ་ལས་མགོན་གཡོན་དུ་ལྷ་མོ་བསྒོམ། །སྤྱན་དྲངས་བསྟིམ་ཞིང་བསྙེན་པ་ཅུང་ཟད་བཟླས། །འོད་ཞུ་རང་གི་སྙིང་ལ་ལྷ་གསུམ་བསྟིམ། །དེ་ཡི་གསང་བསྙེན་གོ་ཆོད་བཀའ་བརྒྱུད་ལུགས། །རང་ལུས་རྩ་འཁོར་རྣམས་སུ་ཡིག་འབྲུ་གནས། །དེ་ཉིད་ཤེས་བྱས་སྲོག་འཁོར་གོ་ཆོད་ཡིན། །སྤྱི་བོ་དང་ནི་ལྟེ་འོག་གྲུ་གསུམ་དབུས། །ཐིག་ལེ་དཀར་དམར་མ་མགོན་ཡབ་ཡུམ་གྱི། །ངོ་བོ་ཤེས་པས་བླ་རྡོའི་གོ་ཡང་ཆོད། །དེ་དག་སྒྲུབ་རྫས་གཙོ་བོར་རྟེན་
རྫས་སོ། །མཆོད་རྫས་དྲག་པོའི་མཆོད་པ་སྣ་བདུན་དང་། །དབང་པོའི་མེ་ཏོག་ལ་སོགས་འདོད་ཡོན་ལྔ། །འདི་དག་དངོས་སམ་ཡང་ན་གཟུགས་བརྙན་བཅའ། །མཆོད་རྫ་ས་གཙོ་བོ་སྨན་རཀ་གཏོར་གསུམ་གྱི། །སྨན་རཀ་གཉིས་པོ་བྷནྡཱར་བཤམས་པའམ། །བུམ་པ་དམ་འབེ་སོགས་སུ་བཤམོ་བྱ་སྟེ། །ཚང་བུམ་ཁྲག་བུམ་མ་སྐམ་པར་མཆོད་ནས། །དངོས་གྲུབ་མྱུར་ཞེས་གཏེར་ཁྱིམ་སོགས་ནས་བཤད། །སྒྲུབ་རྫས་གཙོ་བོ་གཏོར་མ་ཡིན་པའི་ཕྱིར། །གཏོར་མ་ཁོ་ན་ལ་བརྟེན་སྒྲུབ་ཆོག་པས། །གཏོར་སྒྲུབ་ཅེས་བྱ་གསར་རྙིང་ཀུན་ལ་གྲགས། །རྟེན་གཏོར་ལ་ཡང་རྣམ་པ་གཉིས་རེ་ཡོད། །ཟངས་སམ་རྗེ་མ་ལ་ནི་བཟོས་པ་ཡི། །གཞོང་པ་ཚེས་བརྒྱད་ཟླ་བའི་དབྱིབས་འདྲ་བ། །དེ་ནང་ཟླུམ་གཏོར་དབུས་སུ་གྲུ་གསུམ་བྲིས། །གྲུ་གསུམ་དབུས་སུ་ཧཱུྃ་དང་བྷྱོ་ཡིག་བྲི། །གྲུ་གསུམ་ནག་པོ་ཟླ་གམ་གསུམ་ནི་དམར། །གཞོང་པ་རྣམ་དག་ཟླ་བའི་དཀྱིལ་འཁོར་ཟེར། །ནས་ནག་ནས་འབྲུ་རེ་རེ་ཧཱུྃ་དུ་བསྒོམ། །མི་དམིགས་ངང་ནས་རྗེན་འཐག་ལེགས་པར་བྱས། །ཁྲག་དང་ཆང་དང་མར་ཁུ་གསུམ་གྱིས་སྦྲུས། །གཏོར་མ་ཟུར་གསུམ་ཟུར་ནི་མི་རྣོ་བར། །ལྷུན་འཐུག་དཀར་རྒྱན་
ཤིན་ཏུ་ལེགས་པར་བྱ། །འཁོར་དུ་གྲུ་བཞི་རྩེ་རྒྱལ་གསང་ཕྱི་དང་། །སྨན་ཏིང་ཟུར་གསུམ་སྙིང་གཟུགས་ར་མགོ་བཞག །གཙོ་བོའི་གཏོར་མ་མར་སྣག་ནག་པོ་བྱ། །སྲོག་ཤིང་ལྕགས་སྦུབ་བམ་ནི་སྨྱུག་སྦུབ་ནང་། །རྩེ་ལ་བླ་བརྒྱུད་མཐོ་ཐོག་མཚན་སྔགས་དང་། །དེ་འོག་ཡི་དམ་དེ་འོག་ཆོས་སྐྱོང་དེའི། །འབོད་རྦད་བསད་གསུམ་གོ་རིམ་བཞིན་དུ་བཙུག །གསེར་གཡུ་རིན་ཆེན་འབྲུ་སྣ་ཟས་ཕུད་བླུག །དབེན་པའི་ཕྱོགས་སུ་གསོ་བྲན་ལེགས་བྱས་ཏེ། །ནམ་ཡང་མི་བསྒུལ་དར་ནག་དཀྱིལ་བཏུམ་བཞག །གཏོར་མ་ཆོས་སྐྱོང་དེ་ཡི་ཕོ་བྲང་སྟེ། །འདོད་པའི་ཡོན་ཏན་དུ་མས་ཡོངས་སུ་གང་། །དེ་ལ་ཆགས་ཤིང་རྟག་ཏུ་བཞུགས་པར་དམིགས། །གཏོར་བསྔོས་ཚར་ནས་རྒྱུན་དུ་དེ་ལ་བསྟིམ། །དེ་ལ་མདུན་བསྐྱེད་བྱས་ལ་སྐབས་སུ་བསྙེན། །དགྲ་སོགས་གལ་ལ་ཐུགས་པའི་དུས་བྱུང་ན། །ཆད་བསྐུལ་བྱས་ནས་ཟོར་འཕང་སླར་ཡང་བཅའ། །དེ་རྣམས་ཡོངས་སུ་གྲགས་པའི་རྟེན་ཚེ་གཏོར་ཡིན། །འཕྲལ་དུ་གཏོར་སྒྲུབ་བྱས་པའི་རྟེན་གཏོར་ནི། །ཟངས་ལྕགས་སམ་ནི་བྷནྡྷའི་སྣོད་ནང་དུ། །ཤོག་དྲིལ་མི་དགོས་དབང་གཏོར་འདྲ་བ་ལ། །ཙཀླི་བཙུགས་པ་མདུན་
བསྐྱེད་དམིགས་རྟེན་ཡིན། །།རྒྱུན་དུ་གསོ་བྲན་མི་དགོས་ལྷ་བསྐྱེད་ཡིན། །རྟག་གཏོར་ཕུགས་གཏོར་གཉིས་པོ་དོན་གཅིག་སྟེ། །ཕུགས་གཏོར་ཆ་ཚང་བཅའ་བ་ལོ་རེར་བརྗེ། །ཡང་རྒྱུན་མི་བརྗེ་རྟག་ཏུ་འཇོག་ཀྱང་རུང་། །རྟག་ཏུ་གསོ་བྲན་བྱེད་པ་རྟག་གཏོར་ཡིན། །རྒྱུན་གཏོར་ཞེས་པ་ནུབ་རེ་བཞིན་དུ་ཡང་། །ཕུགས་གཏོར་བསྡུས་པ་བཅའ་ཞིང་དེ་ནུབ་བཀྲོལ། །དེ་འདྲར་མར་ཐང་སྡེ་པར་སྔར་དུས་དར། །གཞན་གྱིས་འཁྱོངས་དཀའ་རྒྱུན་དུ་ཕུགས་གཏོར་ནི། །མཐེབ་སྐྱུ་གསོ་བ་རྒྱུན་གཏོར་གོ་ཆོད་ཡིན། །སྒྲུབ་པ་བྱེད་དུས་ཐུན་བཞིའམ་ཐུན་དྲུག་མཚམས། །གཏོར་ཆུང་འབུལ་བ་དེ་ནི་རྒྱུན་གཏོར་ཡིན། །བསྐང་གསོ་ལ་སོགས་སྐུ་རིམ་བྱེད་པའི་དུས། །དམར་གཏོར་ཆེ་བ་གཅིག་གམ་གཏོར་ཚོམ་གཅིག །ཆོས་སྐྱོང་སྤྱི་ལ་འབུལ་བས་འབུལ་གཏོར་རམ། །གཏོར་འབུལ་ཞེས་བྱ་སྔགས་པ་ཀུན་ལ་གྲགས། །ཐུན་གཏོར་དྲུག་ཀ་དེ་ཡི་གོ་ཆོད་རྩི། །ཉ་མཚམས་དགུ་སོགས་ཆོས་སྐྱོང་རྒྱུ་བའི་དུས། །བསྐང་གསོ་གཏོར་འབུལ་བྱེད་པ་དུས་གཏོར་ཡིན། །མགོ་ཉའམ་ནི་རྒྱལ་ཉའི་མར་ངོས་སྐབས། །མདོས་བཟློག་ལ་སོགས་བསྐང་གསོ་གྱེར་བྱེད་པ། །དེང་སང་ལོ་རིམ་དགུ་གཏོར་ཞེས་
གྲགས་ཏེ། །གཞུང་ནས་ལོ་དུས་ངར་བཏབ་ཆེན་པོ་ཟེར། །དེ་དག་ཆོས་སྐྱོང་སྤྱི་ཡི་ཁོག་ཁྲོལ་བའི། །རག་རིམ་ཙམ་སྟེ་ཞིབ་པར་རང་རང་གི །སྒྲུབ་གཞུང་རྣམས་ནས་གཟིགས་པས་གསལ་བ་ཡིན། །འདི་དག་སྤྱི་ཡིན་སྤྱི་དང་མི་མཚུངས་པའི། །ཁྱད་ཆོས་འགའ་རེ་རང་རང་གཞུང་དུ་གསལ། །རིག་སྔགས་འཆང་བ་རྒྱ་མཚོའི་མཚན་ཅན་གྱིས། །མཎྜལ་བཟང་པོ་དང་བཅས་བསྐུལ་ན་ཡང་། །རྣམ་གཡེང་དབང་གིས་མ་སྐབས་ཡུན་རིང་ལུས། །བྱ་ལོ་མཆུ་ཟླའི་ཉི་ཤུ་བདུན་གྱི་ཉིན། །རཱ་ག་ཨ་སྱས་གང་དྲན་འཕྲལ་དུ་སྨྲས། །དགེ་སློང་བརྩོན་འགྲུས་ཞེས་བྱས་ཡི་གེར་བཀོད། །སྔགས་པ་ཀུན་གྱིས་ཤེས་ཕྱིར་མི་མཁོ་ཡང་། །མདོ་ལུགས་དགེ་བཤེས་མཁས་ཀྱང་མཁོ་བ་སྲིད། །འཁྲུལ་བ་མེད་ཕྱིར་བཤིགས་བྱ་མ་མཆིས་ཀྱང་། དོན་ཆུང་དགེ་བ་འགྲོ་དོན་དཔག་མེད་ཤོག ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།