རྙིང་མའི་བཀའ་སྲུང་སྤྱིའི་ལས་བྱང་གསོལ་ཁ་བསྡུས་པ།
རྙིང་མའི་བཀའ་སྲུང་སྤྱིའི་ལས་བྱང་གསོལ་ཁ་བསྡུས་པ་བཞུགས་སོ།།
ན་མོ་ཤྲཱི་མ་ཧཱ་ཀཱ་ལ་ཡེ། བྱང་ཆུབ་དོན་གཉེར་དྲག་སྔགས་མི་སྒྲུབ་ཀྱང་། །ཞི་ཁྲོ་བཀའ་བརྒྱད་རྫོགས་ཆེན་ལ་སོགས་པའི། །འབྲེལ་པ་འཇོག་ཅིང་ཉམས་ལེན་འདོད་པའི་མིས། །བཀའ་སྲུང་རྣམས་ལ་གཏོར་མ་མ་བསྔོས་ན། །ཕྱག་མཛོད་པ་ལ་ཞལ་འདྲིས་ཅུང་མེད་པར། །མཛོད་ཀྱི་ནང་དུ་ཞུགས་ཤིང་ལོངས་སྤྱོད་པར། །བཀའ་སྲུང་རྣམས་ཀྱི་ཀོ་ལོང་འབྱུང་སྲིད་ཅིང་། །ཆས་དེ་ལོངས་སྤྱོད་བཀའ་སྲུང་མཆོད་པ་ནི། །མ་ཆད་ནི་ཡང་བརྣག་པའི་དགྲ་བགེགས་སྒྲོལ། །སྡོང་གྲོགས་ཁ་འཛིན་བྱེད་པ་དམ་ཚིག་ལ། །ཟངས་ལྕགས་ལ་སོགས་གཙང་མའི་སྣོད་ནང་དུ། །དམར་གཏོར་གཅིག་ལ་ཆོག་གསུམ་གཏོར་ཕྲན་གསུམ། །དེ་རྒྱབ་སྡེ་བརྒྱད་སྤྱི་ལ་གཏོར་ཆུང་བརྒྱད། །གཞི་འགྲམ་བཤམས་ལ་བདུད་རྩིས་བྲན་བྱས་ཏེ། །ཡི་དམ་
ཆོས་སྐྱོང་ལྷ་གཞུང་ཚར་རྗེས་སམ། །ཡང་ན་དྲན་རྫོགས་ཡི་དམ་བསྐྱེད་ཀྱང་རུང་། །གཏོར་མ་ཡེ་ཤེས་བདུད་རྩི་རྒྱ་མཚོ་ལས། །རླངས་པ་འདོད་ཡོན་སྣ་ཚོགས་སྤྲིན་འཁྲིགས་བསམ། །ཨོཾ་ཨཱཿཧཱུྃ་ཧ་ཧོ་ཧྲཱིཿ རང་མདུན་པད་ཉི་དགྲ་བགེགས་བསྣོལ་བའི་སྟེང་། །དཔལ་མགོན་མ་ནིང་ཕོ་རྒྱུད་ཀུན་འདུས་སྐུ། །མཐིང་ནག་གཡས་གཡོན་རུ་མཚོན་སྙིང་ཞགས་བསྣམས། །དར་ནག་བེར་གསོལ་སྙིང་སྦྲུལ་ཐོད་ཕྲེང་བརྒྱན། །ཙནྡན་བེང་ཆེན་སྐད་བཙུགས་ལྷ་དམག་སྡུད། །སྲོག་བདུད་དཔལ་འབར་ཡང་འཁོར་སྡེ་བརྒྱད་དང་། །མ་གཟའ་དམ་གསུམ་དམ་ཅན་རྒྱ་མཚོའི་ཚོགས། །བཀའ་བརྒྱད་ཕོ་ཉ་ཡོངས་
རྫོགས་འཁོར་བཅས་གསལ། །ཧཱུྃ། གཏེར་བདག་དཔལ་མགོན་གཙོ་འཁོར་གཡོག་དང་བཅས། །ཨེ་ཀ་ཛཱ་ཊི་གཟའ་མཆོག་རཱ་ཧུ་ལ། །རྡོ་རྗེ་ལེགས་པ་སྡེ་དཔོན་སུམ་ཅུ་དང་། །བཀའ་བརྒྱད་ཕོ་ཉ་ཡོངས་རྫོགས་དྲེགས་པའི་ཚོགས། །སོ་སོའི་རིགས་དང་འཁོར་གཡོག་དཔུང་དང་བཅས། །བསྟན་པ་བསྲུང་ཕྱིར་གནས་འདིར་གཤེགས་སུ་གསོལ། དུར་ཁྲོད་རོལ་པའི་དཀྱིལ་འཁོར་ཆེན་པོ་འདིར། །ཉི་ཟླ་པདྨའི་གདན་ལ་བཞུགས་སུ་གསོལ། །ལུས་ངག་ཡིད་གསུམ་གུས་པས་ཕྱག་འཚལ་ལོ། །བཛྲ་ས་མ་ཡ་ཛཿ ཛཿཧཱུྃ་བོ་ཧོ༔ ཏིཥྛ་ལྷན། ཨ་ཏི་པཱུ་ཧོ༔ པྲ་ཏིཙྪ་ཧོ༔ ཧཱུྃ། དཔལ་མགོན་མ་ནིང་ནག་པོ་དང་། །སྲོག་བདུད་དཔལ་འབར་ཡང་འཁོར་བརྒྱད། །ཨེ་ཀ་ཛཱ་ཊི་རཱ་ཧུ་ལ། །དམ་ཅན་སྐྱེས་བུ་ཐིག་ལེ་རྩལ། །སྡེ་དཔོན་སུམ་ཅུ་དྲེགས་པ་བཅོ་བརྒྱད་དང་། །དགེ་བསྙེན་ཉེར་གཅིག་བརྟན་མའི་ཚོགས། །དམ་ཅན་རྒྱ་མཚོ་འཁོར་བཅས་ལ། །མེ་ཏོག་བདུག་སྤོས་མར་མེ་དྲི། །ཞལ་ཟས་སིལ་སྙན་རོལ་མོའི་ཚོགས། །སྨན་རཀ་གཏོར་གསུམ་གསང་བའི་རྫས། །དངོས་འབྱོར་ཡིད་སྤྲུལ་མཆོད་པའི་ཚོགས། །ཐུགས་དམ་གཉན་པོ་བསྐང་
ཕྱིར་འབུལ། །དགྱེས་པར་བཞེས་ལ་དངོས་གྲུབ་སྩོལ། །ཨོཾ་ཤྲཱི་མ་ཧཱ་ཀཱ་ལ་གྷ་ན་གུ་བྱ་རཾ་སིདྡྷི་ཧཱུྃ་ཕཊ༔ ས་པཱ་རི་ཝཱ་ར་ཨ་མྲྀ་ཏ་རཀྟ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། །ཨེ་ཀ་ཙ་ཊི་རཱ་ཧུ་ལ་བཛྲ་སཱ་དྷ་ཨ་ཡ་མ་དུ་རུ་ཙ་ཤ་ན་སརྦ་དྷརྨ་པ་ལ་ས་པཱ་རི་ཝ་ར་ཨ་མྲྀ་ཏ་རཀྟ་བ་ལིཾ་ཏ་ཁཱ་ཧི། མ་ཧཱ་སརྦ་པཱུ་ཙ་ཧོ༔ ཧཱུྃ། འཇིག་རྟེན་འདས་པའི་དུས་ན་སྔོན་བྱུང་བའི། །ཆེ་མཆོག་ཧེ་རུ་ཀ་དཔལ་སྐུ་གསུམ་རྫོགས། །སྲིད་རྩེའི་བདག་འཛིན་རུ་ཏྲ་སྡེ་གསུམ་བསྒྲལ། །རྩལ་ཆེན་ཕྲིན་ལས་བདག་ལ་ཕྱག་འཚལ་བསྟོད། །སྲོག་བདག་དཔལ་འབར་ཡང་འཁོར་སྡེ་བརྒྱད་སོགས། །མ་བསྐུལ་པར་ཡང་མནག་པའི་དགྲ་བགེགས་སྒྲོལ། །བཟློག་པས་མི་ཟློག་སྔགས་བཟློག་མཁན་གྱི་གཤེད། །དཔལ་མགོན་འཁོར་དང་བཅས་ལ་ཕྱག་འཚལ་བསྟོད། །བྷྱོ༔ སྨུག་ནག་ཁྲོས་མ་ཞལ་གཅིག་ཕྱག་གཉིས་མ། །རལ་པ་གཅིག་འཕྱང་མིག་གཅིག་སྟོང་ཁམས་གཟིགས། །ཚེམས་གཅིག་ནུ་གཅིག་ཞིང་དབྱུག་སྙིང་ཞགས་འཛིན། །སྔགས་བདག་སྲུང་མ་ཁྱོད་ལ་ཕྱག་འཚལ་བསྟོད། །བྷྱོ༔ དྲང་སྲོང་ཆེན་པོ་གཟའ་མཆོག་རཱ་ཧུ་ལ། །སྐུ་མདོག་དུད་ཁ་དབུ་དགུ་སྤྱན་སྟོང་
འབར། །ཕྱག་བཞི་རལ་གྲི་མདའ་གཞུ་ཆུ་སྲིན་ཞགས། །བསྐལ་པའི་མེ་འབར་ཁྱོད་ལ་ཕྱག་འཚལ་བསྟོད། ། ཧཱུྃ། དབང་རྟག་རྡོ་རྗེ་དགྲ་བོའི་ཙིཏྟ་བསྣམས། །སེང་གེ་དང་ནི་ར་སྐྱེས་ཆིབས་ནས་ཀྱང་། །དར་དམར་གསོལ་ཞིང་རྫུ་འཕྲུལ་སྣ་ཚོགས་འགྱེད། །སྐྱེས་བུ་ཐིག་ལེ་རྩལ་ལ་ཕྱག་འཚལ་བསྟོད། །ཧཱུྃ། སྔོན་ཚེ་སློབ་དཔོན་པདྨའི་སྤྱན་སྔ་རུ། །ཁས་བླངས་དམ་བཅས་རིན་ཆེན་གཏེར་གྱི་བདག །བཀའ་བརྒྱད་ཕོ་ཉ་ཡོངས་རྫོགས་ཐུགས་དམ་ཅན། །བོད་ཁམས་སྐྱོང་བའི་ལྷ་རབ་བརྟན་མར་བཅས། །གཞི་བདག་སྲུང་མ་འཁོར་དང་བཅས་ལ་བསྟོད། །སྲུང་མ་དམ་ཅན་ཁྱེད་རྣམས་ཀྱིས། །ཐུགས་དང་འགལ་བ་གང་གྱུར་པ། །དོ་ནུབ་བསྐང་ཞིང་བཤགས་པར་བགྱི། །མཐོལ་བཤགས་དང་དུ་བཞེས་ནས་ཀྱང་། །རྣལ་འབྱོར་བདག་ཅག་འཁོར་བཅས་ཀྱི། །ཆག་ཆེན་ཉམ་ང་ཐམས་ཅད་ཟློག །མཐུ་དང་རྫུ་འཕྲུལ་རྒྱས་པ་དང་། །ཕྲིན་ལས་རྣམ་བཞི་འགྲུབ་པར་མཛོད། །ཚེ་དང་བསོད་ནམས་རྒྱས་པ་དང་། །འཁོར་དང་གདུལ་བྱ་ཕྲིན་ལས་དང་། །བཀྲ་ཤིས་བདེ་ལེགས་འགྲུབ་པར་མཛོད། །དེ་ཡིས་ལས་བྱང་བསྐང་བ་བཅས་པ་
ཚང་། །ཞག་མང་བཞག་ལ་གསོ་ཞིང་འདོན་ཡང་ཆོག །རྫོགས་ཆེན་ཁྲིད་སོགས་དབང་ལུང་བཀའ་གཉེན་དུས། །གྲྭ་པ་འགའ་ལ་བརྒྱ་ཚར་བསོགས་བཅོལ་ལེགས། །ཚེས་བཅུ་དགུ་གཏོར་དུས་སུ་ཚར་རེས་ཆོག །དེ་ནས་སླར་ཡང་གསོ་ཞིང་བྲན་བྱས་ལ། །གནོད་བྱེད་དགྲ་བགེགས་བཀུག་གཞུག་གང་དགོས་བྱ། །དགྲ་བགེགས་ཤ་ཁྲག་བདུད་རྩི་རང་བཞིན་བསམ། །གོང་གི་གཏོར་བསྔོས་སྔགས་དེ་ལན་གསུམ་འབུལ། །དེ་ནས་དཔལ་འབར་འཛོམ་ན་བཙུགས་བྱས་ལ། །མཆོད་གཡོག་པ་ཉིད་ཁ་ཕྱིར་རྒྱུ་སྟེ་བཏེག བྷྱོ༔ མ་ནིང་ནག་པོ་ཡང་འཁོར་བརྒྱད། །ཕོ་རྒྱུད་ཐམས་ཅད་དགྲ་ལ་བྷོ། །ཨེ་ཀ་ཙ་ཏི་མ་མོའི་ཚོགས། །མོ་རྒྱུད་ཐམས་ཅད་དགྲ་ལ་བློ། །གཟའ་རྒོད་ཁྱབ་འཇུག་གདོང་མོ་བཞི། །གཟའ་སྐར་དམག་ཚོགས་དགྲ་ལ་བློ། །རྡོ་རྗེ་ལེགས་པ་བརྟན་མར་བཅས། །བཙན་རྒོད་དམག་ཚོགས་་ལ་བྷོ། །དྲེགས་ཆེན་བཅོ་བརྒྱད་སྡེ་དཔོན་ཚོགས། །སྡེ་བརྒྱད་དམག་ཚོགས་དགྲ་ལ་བྷོ། །བཀའ་བརྒྱུད་ཕོ་ཉ་ཡོངས་རྫོགས་སོགས། །བཀའ་སྲུང་དམག་ཚོགས་དགྲ་ལ། །བསྟན་སྲུང་དམ་ཅན་རྒྱ་མཚོ་རྣམས། །སོ་སོའི་འཁོར་གཡོག་བསམ་མི་ཁྱབ། །དམར་གྱི་གཏོར་མ་འདི་བཞེས་ལ། །དགྲ་བོའི་ཡུལ་དུ་དམག་དཔུང་ཆོས། །བསྟན་པ་
གཉེན་ལ་དགྲ་བྱུང་ན། །བསྟན་དང་བདག་གི་ར་མདར་རྒྱུགས། །ལྟས་ངན་ཆོ་འཕྲུལ་དགྲ་ལ་ཐོངས། །དགྲ་དཔུང་བདུན་རྒྱུད་རྩད་ནས་ཆོད། །བགེགས་དཔུང་ཐལ་བ་རྡུལ་དུ་རློགས། །བཅོལ་བའི་ཕྲིན་ལས་འགྲུབ་པར་མཛོད། །ཏྲི་ཡཾ་རུ་ཏྲ་ཧཱུྃ་བྷྱོ༔ མུན་བྲི་བྷྱོ༔ མུན་ནག་ཤྲི་བྷྱོ་རུ་ཏྲ་ནག་པོ་དགྲ་བོའི་སྙིང་ལ་སུ་ཏྲི་ཙིཏྟ་རྦད་བྷྱོ༔ ཞེས་བརྗོད་དགྲ་ཕྱོགས་གཙང་སར་འབུལ། །འབྲུག་གློག་ཐོག་སེར་རླུང་འཚུབ་འུར་སྒྲ་བཅས། །སེར་རྒོད་བཞིན་དུ་དགྲ་ཡུལ་སོང་བར་དམིགས། །དེ་ནས་རྗེས་ཆོག་གཤེགས་གསོལ་མི་དགོས་སོ། །ཆོས་སྤྱོད་ཆོས་སྒོར་ཞུགས་པས་ཀྱང་། །ཡུལ་འདིར་གནས་པའི་གཞི་བདག་དང་། །ལྷ་སྲིན་སྡེ་བརྒྱད་ཐམས་ཅད་ལ། །གསོལ་ཀ་མཆོད་པ་བྱས་ན་ཤིས། །དེ་སྐད་ཨོ་རྒྱན་ཆེན་པོ་ཡིས། །དྲེགས་པའི་སྲོག་དབང་ནང་ན་གསུངས། །མ་ནིང་རྒྱུད་གཞུང་རྣམས་ནས་ཀྱང་། མདོར་ན་འདི་ཉིད་གསོལ་ཁས་འགྲུབ། །མ་ནིང་ཡིན་ཕྱིར་བཟློག་ཐབས་མེད། །བཀྲ་ཤིས་མཐུ་ཆེ་མི་ནོར་འཕེལ། །གསུངས་ཕྱིར་བསྙེན་སྒྲུབ་མ་བྱས་ཀྱང་། །འདི་ཉིད་བརྩོན་པར་བྱས་ན་ནི། །མ་བསྐུལ་པ་ཡང་དགྲ་བགེགས་བསྒྲལ། །རྒྱལ་པོའི་མཚན་ཅན་གྱིས་བསྐུལ་ནས། །རང་གིས་བརྩམ་པ་མ་ཡིན་པར། །ཀརྨ་གླིང་པའི་གཏེར་གཞུང་དང་། །རཏྣའི་སྡེ་དགུ་ལ་སོགས་ནས། །རྡོ་རྗེའི་གསུངས་རྣམས་བསྡུས་ཏེ་བསྒྲིགས། །སྔགས་ནག་རཱ་ག་ཨ་སྱ་ཡིས། །ངག་ནས་
ཇི་ལྟར་སྨྲས་པ་བཞིན། །སྔགས་འཆང་ཡང་དག་མིང་གིས་བྲིས། །ཉེས་འགལ་སྲུང་མ་རྣམས་ལ་བཤགས། །དགེ་བས་བསྟན་པ་མཐར་རྒྱས་ཤོག །བཀྲ་ཤིས། དགེའོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།