ཚོགས་བདག་གསོལ་ཀ
དེ་ནས་ཚོགས་བདག་གསོལ་ཀ་བྱེད་འདོད་ན། བསྡུ་ན་གཏོར་མ་གསོ་བྲན་བྱས་པས་འཐུས། རྒྱས་པར་གསེར་སྐྱེམས་ཇ་ཕུད་འོ་ཕུད་སོགས། འབྲུ་སྣ་བཏབ་པ་ཕུད་ཕོར་ནང་བཏེག །ཚིག་མཚམས་རྣམས་སུ་ནམ་མཁར་གཏོར་བཅུག་གོ །ཧཱུྃ། འཕགས་མཆོག་ཐུགས་རྗེ་ཆེན་པོ་ཡི། །གདུལ་ཀའི་བགེགས་རིགས་འདུལ་བ་དང་། །འགྲོ་ལ་ཕན་ཕྱིར་སྐུར་སྤྲུལ་པ། །སྐུ་མདོག་སྣ་ཚོགས་ཅིར་ཡང་སྟོན། །སྤྱན་གསུམ་རལ་པའི་ཅོད་པན་ཅན། །ཟླ་ཕྱེད་ནོར་བུ་དར་གྱིས་བརྒྱན། །རིན་ཆེན་རྒྱན་ལྡན་དར་ཟབ་ཀླུབས། །ཕྱག་བཞི་ལ་ཕུད་དགྲ་སྟ་དང་། གཡོན་གཉིས་ནོར་བུ་ཁ་ཊཾ་བསྣམས། །སྦོམ་ཐུང་གསུས་འཕྱང་གཟི་བརྗིད་འབར། །ཕྲིན་ལས་རབ་འབྱམས་སྒྲུབ་པའི་ལྷ། །མཆོད་གཏོར་འདི་བཞེས་དངོས་གྲུབ་སྩོལ། །ཆོས་སྲིད་དབང་ཐང་འཕེལ་བར་མཛོད། །མཆོད་དོ་གཙང་མའི་ཕུད་ཀྱིས་མཆོད། །དཔལ་ལྡན་ཚོགས་ཀྱི་བདག་པོ་ནི། །དངོས་གྲུབ་སྒྲུབ་པའི་དབང་ཕྱུག་སྟེ། །འཇིག་རྟེན་ཀུན་ལ་ཕན་པའི་ལྷ། །ཐུགས་རྗེས་འགྲོ་བའི་དབུ་ཕོངས་སྐྱོབས། །བཀྲ་ཤིས་སྩོལ་མཛད་ནོར་ལྷ་ཆེ། །ཇོ་བོ་ཚོགས་བདག་རིགས་ལྔ་དང་། །སྤྲུལ་པ་མྱུར་མགྱོགས་སྤྲེའུ་གཟུགས།
མཆོད་གཏོར་འདི་བཞེས་དངོས་གྲུབ་སྩོལ། །ལོངས་སྤྱོད་ཕུན་སུམ་ཚོགས་པར་མཛོད། །མཆོད་དོ་གཙང་མའི་ཕུད་ཀྱིས་མཆོད། །ཡིད་ལ་ཅི་འདོད་སྦྱིན་པའི་ལྷ། །རྒོལ་བ་བཟློག་པའི་སྟོབས་པོ་ཆེ། །བགེགས་ཚོགས་ཀུན་གྱི་རྗེ་བོ་སྟེ། །དགྲ་བགེགས་རྩོད་ནས་བརླག་མཛད་པ། །སྟེང་འོག་བར་གསུམ་དབང་སྡུད་ཅིང་། །རྒྱལ་སྲིད་འབྱོར་པ་སྩོལ་མཛད་པ། །དཔལ་ལྡན་ཚོགས་བདག་རིགས་ལྔ་དང་། །ལས་མཁན་སྤྲེའུ་གཟུགས་ཅན་གྱིས། །མཆོད་གཏོར་འདི་བཞེས་དངོས་གྲུབ་སྩོལ། །ལོངས་སྤྱོད་ཕུན་སུམ་ཚོགས་པར་མཛོད། །མཆོད་དོ་གཙང་མའི་ཕུད་ཀྱིས་མཆོད། །རྒྱུད་དང་རྟོགས་བརྗོད་དོན་བསྡུས་ནས་ཨ་རཱ་གས་སོ།། །།