གནམ་ཆོས་ཐུགས་ཀྱི་གཏེར་ཁ་ལས་ཇོ་བོ་ཚོགས་བདག་དང་ཇོ་མོ་བཀྲ་ཤིས་ཚེ་རིང་མའི་སྦྲག་སྒྲུབ་ཀྱི་ཟིན་བྲིས་འདོན་ཆ་རྒྱས་པ་དངོས་གྲུབ་རྒྱ་མཚོ།
གནམ་ཆོས་ཐུགས་ཀྱི་གཏེར་ཁ་ལས་ཇོ་བོ་ཚོགས་བདག་དང་ཇོ་མོ་བཀྲ་ཤིས་ཚེ་རིང་མའི་སྦྲག་སྒྲུབ་ཀྱི་ཟིན་བྲིས་འདོན་ཆ་རྒྱས་པ་དངོས་གྲུབ་རྒྱ་མཚོ་བཞུགས་སོ། །
འཕགས་པ་འཇིག་རྟེན་དབང་ཕྱུག་ལ་ཕྱག་འཚལ་ལོ༔ ཇོ་བོ་ཚོགས་བདག་སྒྲུབ་པ་ནི༔ གནམ་ཆོས་ཐུགས་ཀྱི་གཏེར་ཁ་ལས༔ རྒྱས་བསྡུས་གཉིས་སུ་གསུངས་པ་དང་༔ ཚེ་རིང་མཆེད་ལྔའི་སྒྲུབ་ཐབས་གསུམ༔ སོ་སོར་གསུངས་ཀྱང་མན་ངག་ལུགས་ཡབ་སྲས་སྤྲུག་སྒྲུབ་ཟབ་པ་དང་༔ གསར་མའི་རྒྱུད་གཞུང་ལས་གསུངས་ཕྱིར༔ རིགས་བཞི་ལྷ་མགྲོན་ཚུལ་དུ་བཀོད༔ དྷམཱ་ཤྭ་རས་མཛད་པ་ཡི༔ ཆོ་གར་ཁོག་ཕུབ་བྲི་བ་ལ༔ ཚོགས་བདག་རིགས་ལྔ་ཡབ་ཡུམ་གྱི༔ བཀའ་གནང་བྱིན་གྱིས་བརླབ་ཏུ་གསོལ༔ སྐར་མ་རྒྱལ་ལ་བཞེངས་པ་ཡི༔ ཡབ་ཀྱི་བྲིས་སྐུ་འབུར་སྐུ་དང་༔ མདའ་དར་མེ་ལོང་སོར་གདུབ་རྣམས༔ ཡུམ་གྱི་རྟེན་རྫས་ཡིན་པས་བཤམས༔ གཞི་སྟེང་འབྲུ་ཡི་འདབ་བརྒྱད་དབུས༔ ཟླ་གམ་
བྲིས་སྟེང་གཏོར་མ་ནི༔ རྒྱས་བསྡུས་གང་མོས་དཔེའུ་རིས་བྲིས་པ་ལྟར༔ དེ་ལ་ཟན་ནམ་ལ་ཕུད་དང་༔ ཁྱད་པར་མཐུན་རྫས་ལ་དུ་ནི༔ མངར་གསུམ་དང་ནི་འབྲས་བུ་གསུམ༔ འུ་སུ་གོ་སྙོད་འབྲས་བུ་དང་༔ ལྷ་སྐྱ་ལན་ཚ་རྒོག་སྐྱ་བཏུལ༔ བག་ཟན་བསྲེས་པའི་རིལ་བུ་ནི༔ མར་ཁུ་འམ་ནི་འོ་མར་སྦོས༔ ཤིན་ཏུ་མཉེས་པའི་དམ་རྫས་སོ༔ ཙན་དན་དཀར་དམར་དུ་རུ་ཀ༔ སི་ལ་ག་པུར་སྤོས་དཀར་རྣམས༔ སྦྱར་བའི་བདུག་སྤོས་ཡོད་ན་ལེགས༔ རང་ཉིད་ཡི་དམ་གཞུང་བསྲང་སྟེ༔ སྐད་ཅིག་རང་ཉིད་གནས་འགྱུར་ནས༔ གནམ་ཆོས་ལུགས་ལ་པད་འབྱུང་བསྒོམ༔ དེ་ཡང་ཡུམ་ཉི་ད་གཙོར་སྒྲུབ་ན༔ རང་ཉིད་མི་ལ་རས་པ་ནི༔ སྐུ་མདོག་སྨུག་པོ་གྲུབ་ཐོབ་གཟུགས༔ ཚོགས་བདག་རྒྱུད་དང་རྟོགས་པ་ནས༔ གསུངས་པའི་
ལུགས་ལྟར་སྒྲུབ་པ་ནི༔ རང་ཉིད་འགྲོ་འདུལ་ཕྱག་བཞི་པ༔ མགོན་པོའི་རྒྱུད་ལྟར་སྒྲུབ་ན་ནི༔ རང་ཉིད་བདེ་མཆོག་ལྷན་སྐྱེས་བསྒོམ༔ དམར་པོ་ཕྱག་མང་སྒྲུབ་པ་ན༔ རང་ཉིད་ཧཱུྃ་མཛད་སྐུ་མདོག་མཐིང་༔ ཞལ་གཅིག་ཕྱག་བཞི་ཁྲོ་ཆས་རྫོགས༔ དང་པོས་ཐུགས་ཀར་རྡོ་རྗེ་ཐོད༔ འོག་གཉིས་རྒྱབ་མར་མདའ་གཞུ་འགེང་༔ གཡོན་རྐྱང་པད་ཉི་རོ་གདན་བཞུགས༔ དེ་ནས་སྒྲུབ་པའི་དུས་ཡིན་ནི༔ རྒྱུན་དུ་ཡི་དམ་གང་རུང་བསྒོམ༔ ཨོཾ་སྭ་བྷ་ཝ༴ སྟོང་པའི་ངང་ལས་རང་ཉིད་སྐད་ཅིག་གིས༔ མ་ཧཱ་གུ་རུ་པདྨ་ཐོད་ཕྲེང་རྩལ་མདུན་འདིར་རིན་ཆེན་གཞལ་ཡས་ཁང་༔ དེ་དབུས་འདབ་བརྒྱད་འདབ་བཞི་དང་༔ ཟླ་བའི་དབུས་སུ་རིན་ཆེན་ཁྲིར༔ པད་ཟླའི་སྟེང་དུ་ཧཱུྃ་ཡིག་ལས༔ ཇོ་བོ་ཚོགས་བདག་ཞལ་གཅིག་པ༔ གླང་ཆེན་སྣ་དང་རྣ་བ་ཅན༔ ཐོར་ཚུགས་ཟླ་ཚེས་ནོར་བུས་བརྒྱན༔ ཡན་ལག་རགས་ཤིང་གསུས་ཁྱིམ་ཆེ༔ སྐུ་མདོག་སྣ་ཚོགས་ཅིར་ཡང་བསྒྱུར༔ ཕྱག་བཞི་ཕྱག་མཚན་འདི་ལྟར་རོ༔ ལྕགས་ཀྱུ་ཞགས་པ་ནོར་བུ་དང་༔ ནེའུ་ལེ་འཛིན་པ་དར་རཉྫས༔ རྒྱན་ཅིང་བྱི་བའི་སྟེང་ན་བཞུགས༔ དེ་ཡི་གཡོན་དུ་ཚེ་རིང་མ༔ དཀར་མོ་ཞལ་གཅིག་ཕྱག་གཉིས་མ༔ དར་དཀར་ན་བཟའ་རིན་ཆེན་བརྒྱན༔ གཡས་པས་རྡོ་རྗེ་གཡོན་བུམ་
པ༔ ཆིབས་སུ་སེངྒེ་དཀར་མོ་ཆིབས༔ འཇའ་འོད་སྣ་ལྔའི་ཀློང་ན་བཞུགས༔ གཡས་སུ་ཇོ་བོ་ཚོགས་བདག་ནི༔ སྐུ་མདོག་དམར་པོ་ཞལ་གཉིས་པ༔ ཁྲོ་ཞལ་ཕྲག་པ་གཡོན་སྟེང་ལོག༔ གཡས་ཞལ་གླང་ཞལ་མཆེ་གཡས་ཆག༔ མཆེ་བ་གཡོན་པར་ཤུབས་བཀོན་པ༔ ཕྱག་དྲུག་དང་པོ་གཉིས་ཀྱིས་གཡས༔ ལ་ཕུད་ལོ་མ་བཟུང་ནས་ཕྱིར༔ གཡོན་པས་ལྕགས་ཀྱུའི་ཕྱག་རྒྱ་མཛད༔ བར་པའི་གཡས་པས་དགྲ་སྟ་འཛིན༔ གཡོན་པས་ཟངས་གཞོང་རིན་ཆེན་བཀང་༔ ཐ་གཡས་ཞགས་པ་གཡོན་ནེའུ་ལེ༔ རི་བོང་ལ་ཞོན་གླིང་བཞིར་རྒྱུག༔ ཤར་དུ་མཐིང་གི་ཞལ་བཟང་མ༔ སྐུ་མདོག་སྔོན་མོ་ཞལ་གཅིག་མ༔ ཕྱག་གཉིས་མེ་ལོང་ནོར་བུ་འཛིན༔ རྐྱང་བུ་ཁ་གར་ལ་ཆིབས་པ༔ འཇའ་འོད་སྣ་ལྔའི་ཀློང་ན་བཞུགས༔ ལྷོ་རུ་མི་གཡོ་བློ་བཟང་མ༔ མདའ་དར་ནེའུ་ལེ་ཕྱག་ན་འཛིན༔ རྒྱ་སྟག་ཁྲ་བོ་ཆིབས་སུ་ཆིབས༔ འཇའ་འོད་སྣ་ལྔའི་ཀློང་ན་བཞུགས༔ ནུབ་ཏུ་ཅོན་པན་མགྲིན་བཟང་མ༔ ཞལ་གཅིག་ཕྱག་གཉིས་མཆོད་རྟེན་དང་༔ ཟས་ཀྱིས་བཀང་བའི་སྒྲོམ་བུ་འཛིན༔ ཆིབས་སུ་ཤ་བ་ཡུ་མོ་ཆིབས༔ འཇའ་ཚོན་
སྣ་ལྔའི་ཀློང་ན་བཞུགས༔ བྱང་དུ་གཏད་དཀར་འགྲོ་བཟང་མ༔ ཞལ་གཅིག་ཕྱག་བཞི་དུརྦ་ཡི༔ སྟེང་དུ་ནོར་བུ་ཞགས་པ་དང་༔ སྦྲུལ་ཞགས་གཡོན་པས་འཛིན་པའོ༔ ཆིབས་སུ་གཡུ་འབྲུག་ལྗང་གུ་ཆིབས༔ འཇའ་འོད་སྣ་ལྔའི་ཀློང་ན་བཞུགས༔ བཞི་ཀ་དར་ཟབ་རིན་ཆེན་བརྒྱན༔ ཤར་ལྷོར་ཚོགས་བདག་དུང་གི་མདོག༔ གླང་ཆེན་དབུ་ལ་སྤྱན་གསུམ་པ༔ མཆེ་བ་ཡ་གཅིག་ཆོག་པ་སྟེ༔ ཟླ་ཕྱེད་ནོར་བུའི་དབུ་རྒྱན་ཅན༔ ཕྱག་བཞི་དང་པོ་གཉིས་ན་ནི༔ ལ་ཕུད་ནོར་བུའམ་ནེའུ་ལེ་འཛིན༔ འོག་གཉིས་དགྲ་སྣ་ཁ་ཊཾ་བསྣམས༔ གསུས་འཕྱང་དར་དང་རིན་ཆེན་བརྒྱན༔ པད་ཟླ་བྱི་བའི་གདན་ལ་བཞུགས༔ ལྷོ་ནུབ་ཚོགས་བདག་སྤྲེའུ་དཀར༔ གདོང་སྨུག་ལིང་ག་གྱེན་དུ་བསྒྲེངས༔ ཕྱག་གཉིས་ཐལ་སྦྱར་སྤོས་རེང་འཛིན༔ ནུབ་བྱང་འདབ་བརྒྱད་དམར་པོའི་དབུས༔ བྲག་རི་མེ་རི་བྱི་སྔོན་སྟེང་༔ གྷ་ལས་ཚོགས་བདག་རཱ་གའི་མདོག༔ གླང་བུ་ཐོར་ཚུགས་གཡོན་དུ་ཕྱོགས༔ སྤྱན་གསུམ་ཕྱག་ནི་བཅུ་གཉིས་ཀྱི༔ གཡས་དྲུག་དགྲ་སྟ་མདའ་ལྕགས་ཀྱུ༔ རྡོ་རྗེ་རལ་གྲི་འཕང་མདུང་སྟེ༔ གཡོན་དྲུག་གཏུན་ཤིང་གཞུ་ཁ་ཊཾ༔ ཐོད་ཁྲག་ཐོད་
པ་ཤ་ཆེན་བཀང་༔ ཕུབ་དང་བ་དན་རྩེ་གསུམ་བཏགས༔ སྣ་ཚོགས་རྒྱན་ལྡན་གར་ཐབས་བཞུགས༔ བྱང་ཤར་ཚོགས་བདག་ཆུ་ཤེལ་མདོག༔ གླང་པོའི་གདོང་ཅན་ཕྱག་བཞི་པ༔ གཡས་གཉིས་རྩེ་གསུམ་ལ་དུ་དང་༔ གཡོན་གཉིས་དགྲ་སྟ་ལ་ཕུད་འཛིན༔ སྦྲུལ་ནི་མཆོད་ཕྱིར་ཐོགས་པ་སྟེ༔ བྱི་བའི་གདན་ལ་བཞུགས་པར་གྱུར༔ ཀུན་གྱི་གནས་གསུམ་འབྲུ་གསུམ་དང་༔ ཐུགས་སྲོག་ས་བོན་འོད་ཟེར་གྱིས༔ བྱང་ཤར་ཕྱོགས་ནས་སྤྱན་དྲངས་སོ༔ ལག་གཡོན་ཁུ་ཚུར་བཅང་པ་ནི༔ གུང་མོ་བརྐྱང་བའི་ཚིགས་ལ་ནི༔ མཛུབ་མོ་བརྐྱང་པ་ཅུང་ཟད་འགུག༔ ཚོགས་བདག་ཕྱག་རྒྱའི་དངོས་གྲུབ་ཀུན༔ སྤོས་སྲེགས་རོལ་མོ་དབྱངས་དང་བཅས༔ ཧཱུྃ༔ ཇོ་བོ་ཚོགས་ཀྱི་བདག་པོ་ནི༔ བདག་གིས་མཆོད་ཅིང་བསྒྲུབ་པའི་ཕྱིར༔ གནས་འདིར་སྤྱན་འདྲེན་གཤེགས་སུ་གསོལ༔ ཕྱོགས་བཅུ་འཇིག་རྟེན་སྐྱོང་བའི་ཚེ༔ དཔའ་བོ་ཆེན་པོ་གླང་ཆེན་ཞལ༔ བྱང་ཤར་ཕྱོགས་ནས་གཤེགས་སུ་གསོལ༔ ལྷ་ཡི་གཙོ་བོ་མཛད་པའི་ཚེ༔ སྲིད་པའི་ལྷ་ཆེན་ཚོགས་ཀྱི་བདག༔ སུམ་རྩེན་གནས་ནས་གཤེགས་སུ་གསོལ༔ བགེགས་རིགས་དེད་དཔོན་མཛད་པའི་ཚེ༔ བྱི་ན་ཡ་ཀ་གླང་ཆེན་
གདོང་༔ སོ་ས་གླིང་ནས་གཤེགས་སུ་གསོལ༔ དུར་ཁྲོད་ཆེན་པོ་སྲུང་བའི་ཚེ༔ ཞིང་སྐྱོང་ཆེན་པོ་གླང་ཆེན་གདོང་༔ བདེ་བྱེད་དབྱིངས་ནས་གཤེགས་སུ་གསོལ༔ ལྷ་མིན་གཡུལ་ངོ་བཟློག་པའི་ཚེ༔ རྩལ་མཁན་ཚོགས་བདག་གླང་སྣར་གྲགས༔ རི་རབ་རྩེ་ནས་གཤེགས་སུ་གསོལ༔ གཙུག་ལག་སྲུང་མ་མཛད་པའི་ཚེ༔ བྱང་ཆུབ་ཤིང་ལ་མཆོད་མཁན་མ༔ རྡོ་རྗེ་གདན་ནས་གཤེགས་སུ་གསོལ༔ ཀླུ་ཡི་རྒྱལ་པོ་མཛད་པའི་ཚེ༔ ཀླུ་རྒྱལ་ཆེན་པོ་གླང་ཆེན་མགོ༔ གངྒཱའི་འགྲམ་ནས་གཤེགས་སུ་གསོལ༔ ཐུགས་རྗེ་ཆེན་པོའི་ལས་བསྒྲུབ་ཕྱིར༔ སྤྱན་རས་གཟིགས་དབང་ཕྲག་ཏུ་ཁུར༔ པོ་ཊ་ལ་ནས་གཤེགས་སུ་གསོལ༔ མཁྲའ་འགྲོའི་ཚོགས་དཔོན་མཛད་པའི་ཚེ༔ སྲེ་ཏ་པུ་རའི་གནས་ཀྱི་ཏི་སེའི་འདབས་ནས་གཤེགས་སུ་གསོལ་དད་ཅིང་གདུང་བས་སྤྱན་འདྲེན་ན༔ གློག་ལྟར་མྱུར་བའི་རྫུ་འཕྲུལ་གྱིས༔ སྐད་ཅིག་ཙམ་གྱིས་གཤེགས་སུ་གསོལ༔ བྷྱོ༔ རྡོ་རྗེ་གདན་གྱི་བྱང་ཕྱོགས་ནས༔ བལ་བོད་གཉིས་ཀྱི་ས་མཚམས་ནས༔ གངས་དཀར་ཤེལ་གྱི་ཅོད་པན་ཅན༔ ཕུ་ཆུ་སྙན་པའི་རྒྱུན་སྒྲ་ཅན༔ ནགས་མ་མེ་ཏོག་
ཤམ་བུ་ཅན༔ གཡའ་སྤང་གཡུ་ཡི་སྐེ་རགས་ཅན༔ སྨན་ལྗོངས་བྲག་གི་ར་བ་ཅན༔ གནས་མཆོག་དེ་འདྲའི་གཡོན་མགུལ་དུ༔ དར་དཀར་གུར་གྱི་ནང་ཤེད་ན༔ རིན་ཆེན་སྣ་ལྔའི་ཁྲི་སྟེང་ན༔ བཀྲ་ཤིས་ཚེ་ཡི་དབང་ཕྱུག་མ༔ དྲག་པོའི་གདུང་བས་ཁྱོད་འབོད་ན༔ དེ་རིང་སྒྲུབ་པའི་གནས་མཆོག་འདིར༔ ལྷབ་ལྷུབ་ན་བཟའི་རྒྱན་དང་ལྡན༔ སིལ་སྙན་རོལ་མོའི་སྒྲ་དང་བཅས༔ ནམ་མཁའི་ཁམས་ནས་སྤྱན་འདྲེན་ན༔ འཁོར་དང་བཅས་པ་གཤེགས་སུ་གསོལ༔ ཨོཾ་ཨེ་ཧྱ་ཧི་མ་ཧ་གྷ་ན་པ་ཏི༔ ཨཉྫ་དྷ་རི་པཉྩ་ཌཱཀི་ནཱི་ས་པཱ་རི་བཱ་ར་བཛྲ་ས་མཱ་ཛཿ ཛཿཧཱུྃ་བཾ་ཧོཿགཉིས་སུ་མེད་པར་གྱུར༔ ཡིད་སྤྲུལ་རིན་ཆེན་གཞལ་ཡས་ཁང་༔ ཉི་ཟླ་པདྨའི་གདན་སྟེང་དུ༔ ལྷ་ཆེན་ཚོགས་ཀྱི་བདག་པོ་དང་༔ ལྷ་སྨན་འཁོར་བཅས་བཞུགས་སུ་གསོལ༔ བར་ཆད་སོལ་ལ་དངོས་གྲུབ་ཞུ༔ ཇོ་བོ་ཚོགས་ཀྱི་བདག་པོ་དང་༔ ཇོ་མོ་བཀྲ་ཤིས་ཚེ་རིང་མ༔ མཁའ་འགྲོ་ལྔ་འཁོར་རྒྱ་མཚོ་དང་བཅས་པ༔ སྟོན་མཆོག་ཤཱཀྱ་ཐུབ་པ༔ གསང་བདག་ཕྱག་ན་རྡོ་རྗེ༔ སློབ་དཔོན་པདྨ་འབྱུང་གནས༔ གྲུབ་ཆེན་ནག་པོ་པ༔ དཔལ་བཞད་པ་རྡོ་རྗེ༔ རྗེ་
བཙུན་གྲགས་པ་རྒྱལ་མཚན༔ གྲུབ་ཐོབ་ཨོ་རྒྱན་པ༔ གསེར་གླིང་པ༔ ཇོ་བོ་ཨ་ཏི་ཤ༔ བྱ་ཡུལ་བ༔ ལུས་མེད་རྡོ་རྗེ༔ ཏྲེ་བོ་ཆོས་ཀྱི་རྒྱལ་མཚན་ལ་སོགས་པ་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་དང་དམ་ལ་མ་འདའ་བར༔ སངས་རྒྱས་ཀྱི་བསྟན་པ་སྲུང་༔ དཀོན་མཆོག་གི་དབུ་འཕང་བསྟོད༔ བསྟན་འཛིན་གྱི་བུ་སློབ་སྐྱོང་༔ རྣལ་འབྱོར་པ་བདག་ལ་སྡང་བར་བྱེད་པའི་དགྲ༔ གནོད་པར་བྱེད་པའི་བགེགས༔ ལོག་འདྲེན་གདུག་པ་ཅན་རྣམས་ཀྱི་བསམ་པ་ངན་པ་དང་སྦྱོར་བ་རྩུབ་པ་ཐམས་ཅད་ཐལ་བ་རྡུལ་བཞིན་དུ་བརླག་པ་དང་༔ བདག་ཅག་གི་བསམ་དོན་ཐམས་ཅད་ཡིད་བཞིན་དུ་བསྒྲུབ་ཅིང་ཆོས་ལྡན་གྱི་བྱ་བ་མཐར་ཕྱིན་པ་དང་མཆོག་དང་ཐུན་མོང་གི་དངོས་གྲུབ་ཐོབ་པའི་ཕྲིན་ལས་མཛོད་ཅིག༔ ལྷ་བཅུ་གཅིག་གི་སོ་སོར་སྤྱི་བོར་རྡོ་རྗེ་བཞག༔ ལྕེར་བདུད་རྩིར་བྱིན་དམ་ལ་བཞག་པར་མོས་ལ༔ ཨོ་གྷ་ན་པ་ཏི༔ ཨཉྫདྷ་རི་པཉྩ་ཌཀི་ནི་ས་པཱ་རི་བཱ་ར་ས་མ་ཡ་མཱ་ཏི་ཀྲ་མཱ་ཏི་ས་མ་ཡ་རཀནྟ༔ ཞེས་བརྗོད། ཕྱག་འཚལ་བའི་ཚིག་རྒྱུད་ཀྱི་ཚིག༔ ཨོཾ༔ དངོས་གྲུབ་འབྱུང་བའི་དབང་ཕྱུག་ཅན༔ གདུལ་བྱའི་དབང་གིས་སྐུར་སྤྲུལ་པ༔ ལྷ་ཆེན་ཚོགས་
བདག་ཆེན་པོ་བྱ༔ དངོས་གྲུབ་དམ་པ་མཆོག་བསྒྲུབ་ནི༔ མཐུ་སྟོབས་དམ་པ་མཆོག་ལྡན་ཞིང་༔ ལོངས་སྤྱོད་ཡིད་བཞིན་འཕེལ་བར་བྱ༔ འཇིག་རྟེན་ཕན་མཛད་ལྷ་ཡི་ལྷ༔ གང་གིས་མཆོད་པ་དངོས་གྲུབ་བདག༔ ཕྱག་འཚལ་དཔལ་ལྡན་ཚོགས་བདག་དགྱེས༔ ཕྱག་འཚལ་དཔལ་ལྡན་ཚོགས་བདག་ཆེ༔ ཕྱག་འཚལ་དཔལ་ལྡན་ཞི་བ་ཆེ༔ ཕྱག་འཚལ་དཔལ་ལྡན་ཁྲོ་བོ་ཆེ༔ ཨོ༔ ཉི་མ་ནུབ་ཕྱོགས་ཕ་ཀི་ན༔ གངས་དཀར་དགུང་དུ་རྩེ་མཐོ་བ༔ མཐོ་ལ་གཉེན་ནོ་ཚེ་རིང་མ༔ རྡོ་རྗེ་མི་འགྱུར་དཔལ་གྱི་ཡུམ༔ ན་བཟའ་དཀར་མོ་ཚེ་ཡི་ལྷ༔ ལྷན་སྐྱེས་ཡུམ་ལ་ཕྱག་འཚལ་བསྟོད༔ ལྷ་མོ་མཐིང་གི་ཞལ་བཟང་མ༔ མཆོག་གི་དངོས་གྲུབ་གནང་མཛད་རྡོ་རྗེ་ཁྲོས་མ་ཞེས་སུ་གྲགས༔ རྡོ་རྗེ་མཁའ་འགྲོར་ཕྱག་འཚལ་བསྟོད༔ ལྷ་མོ་མི་གཡོ་བློ་བཟང་མ༔ དགོས་འདོད་ཆར་བཞིན་འབེབས་མཛད་མ༔ རྡོ་རྗེ་བཞད་མ་ཞེས་སུ་གྲགས༔ རིན་ཆེན་མཁའ་འགྲོར་ཕྱག་འཚལ་བསྟོད༔ ལྷ་མོ་ཅོད་པན་མགྲིན་བཟང་མ༔ ཚེ་ཡི་དངོས་གྲུབ་གནང་མཛད་མ༔ རྡོ་རྗེ་དཔལ་མོ་ཞེས་སུ་གྲགས༔ པདྨ་མཁའ་འགྲོར་ཕྱག་འཚལ་
བསྟོད༔ ལྷ་མོ་གཏད་དཀར་འགྲོ་བཟང་མ༔ དྲག་པོའི་དངོས་གྲུབ་གནང་མཛད་མ༔ རྡོ་རྗེ་གར་མཁན་ཞེས་སུ་གྲགས༔ ལས་ཀྱི་མཁའ་འགྲོར་ཕྱག་འཚལ་བསྟོད༔ གཟི་བརྗིད་དཔལ་དང་འོད་དུ་འབར༔ རྫུ་འཕྲུལ་མཐུ་སྟོབས་བདག་མོ་སྟེ༔ རྡོ་རྗེ་མི་འགྱུར་དཔལ་གྱི་ཡུམ༔ གཙོ་མོ་ལྔ་པོ་འཁོར་དང་བཅས༔ ཚེ་བདག་རིགས་ལྔ་ཡབ་དང་རོལ༔ མ་མོ་སྨན་མོ་འབུམ་གྱིས་བསྐོར༔ མཆོད་གཏོར་བཟང་པོ་འདི་བཞེས་ལ༔ རྡོ་རྗེ་འཆང་དང་ཐོད་ཕྲེང་རྩལ༔ བཞད་པ་རྡོ་རྗེའི་ཐུགས་རྗེ་ཡི༔ སྤྱན་སྔར་ཁས་བླངས་དམ་བཅས་བཞིན༔ བཅོལ་བའི་ཕྲིན་ལས་འགྲུབ་པར་མཛོད༔ བླ་མའི་སྐུ་ཚེ་ཁྱེད་ཀྱིས་སྲིངས༔ སངས་རྒྱས་བསྟན་པ་ཁྱོད་ཀྱིས་སྲུངས༔ སྒྲུབ་པའི་བར་ཆད་ཁྱོད་ཀྱིས་སོལ༔ བདུད་དང་མུ་སྟེགས་ཁྱོད་ཀྱིས་ཐུལ༔ ཡོན་བདག་རྐྱེན་ངན་ཁྱོད་ཀྱིས་བསྲུང་༔ ཡུལ་ཕྱོགས་ཀུན་ཏུ་བདེ་ལེགས་སྤེལ༔ ཨོཾ་ཧཱུྃ་ཧཱུྃ་ཧཱུྃ་ཧཱུྃ་ཧཱ་ཧ་ཧོ་ཧོ་ཕོ་ཕོ་ཕཊ་ཕཊ་སྭཱ་ཧཱ༔ མཆོད་རྫས་རྣམས་བིགྷཱན་གྱིས་བསང་། སྭ་བྷཱ་ཝས་སྦྱངས། སྟོང་པའི་ངང་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ་ཧཱུྃ་ཡིག་གི་ཚོགས་དཔག་ཏུ་མེད་པ་འོད་དུ་ཞུ་བ་ལས་བྱུང་བའི་ལྷ་
རྫས་ལས་གྲུབ་པའི་རྡོ་རྗེའི་མཆོད་ཡོན། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ། གཏོར་ཚོགས་རྟེན་རྫ་ས་ལ་སོགས་པ་མཆོད་པའི་སྤྲིན་གྱི་ཕུང་པོ་དྭངས་ཤིང་ཐོག་པ་མེད་པ་ས་དང་བར་སྣང་གང་བ་ཟག་པ་མེད་པ་བདེ་བ་ཁྱད་པར་ཅན་བསྐྱེད་པའི་རང་བཞིན་དུ་གྱུར༔ པར་བསམ་ལ་སོ་སོའི་ཕྱག་རྒྱ་དང་བཅས་ལ༔ ཨོཾ་བཛྲ་ཨརྒྷཾ་ཨཱཿཧཱུྃ་སྭ་ཧཱཿ ཐོག་མཐའ་འདྲ་བ། པུཥྛ་ནས་ཤབྲ༔ ཞེས་བྱིན་གྱིས་བརླབས་ལ༔ ལྷ་རྫས་ཡིད་དུ་འོང་བ་ཡི༔ མཆོད་ཡོན་ཞབས་བསིལ་མེ་ཏོག་དང་༔ བདུག་སྤོས་སྣང་གསལ་དྲི་ཆབ་དང་༔ ཞལ་ཟས་རོལ་མོ་ལ་སོགས་པ༔ དངོས་གྲུབ་རྣམ་གཉིས་སྩལ་བྱའི་ཕྱིར༔ ལྷ་ཆེན་ཚོགས་ཀྱི་བདག་པོ་དང་༔ ལྷ་སྨན་འཁོར་དང་བཅས་ལ་འབུལ༔ དགྱེས་པར་བཞེས་ལ་བདག་ལ་དགོངས༔ ཨོ་ག་ན་པ་ཏི༔ པཉྩ་ཊཱཀི་ནཱི་ས་པཱ་རི་བཱ་ར་ཨབྷཾ་པཱཧུཾ་ནས་ཤཔྟ་པྲ་ཏིཙྪ་པཱུ་ཛ་མེ་གྷ་ས་མུ་དྲ་སྤ་ར་ས་མ་ཡེ་ཨཱཿཧཱུྃ༔ འཁོར་ལོ་ཡིད་བཞིན་ནོར་བུ་དང་༔ རབ་མཛེས་བཙུན་མོ་མི་བདག་དང་༔ དཔལ་གྱི་གླང་པོ་ཅང་ཤེས་རྟ༔ དམག་དཔོན་རིན་ཆེན་སྣ་བདུན་པོ༔ དངོས་གྲུབ་རྣམ་གཉིས་སྩོལ་བྱའི་ཕྱིར༔ ལྷ་ཆེན་ཚོགས་
ཀྱི་བདག་པོ་དང་༔ ལྷ་སྨན་འཁོར་དང་བཅས་ལ་འབུལ༔ དགྱེས་པར་བཞེས་ལ་བདག་ལ་དགོངས༔ སྔགས་ཐོག་མཐའ་ལ་འདྲ་བ་དང་། སབྟ་རཏྣ༔ རིན་ཆེན་གདུགས་དང་གསེར་ཉེ་དང་༔ གཏེར་ཆེན་བུམ་པ་པདྨ་བཟང་༔ དུང་དཀར་གཡས་འཁྱིལ་དཔལ་བེའུ༔ མཆོག་གི་རྒྱལ་མཚན་འཁོར་ལོ་བཟང་༔ དངོས་གྲུབ་རྣམ་གཉིས་སྩོལ་བྱའི་ཕྱིར༔ ལྷ་ཆེན་ཚོགས་ཀྱི་བདག་པོ་དང་ལྷ་སྨན་འཁོར་དང་བཅས་ལ་འབུལ༔ དགྱེས་པར་བཞེས་ལ་བདག་ལ་དགོངས༔ སྔགས་གོང་བཞིན། ཨཏྟཱ་མངྒ་ལཾ་ཧེ་ཏུ༴ ཡུངས་ཀར་དུདྨ་བིལ་བ་དང་༔ གི་ཝཾ་ལི་ཁྲི་ཞོ་མཆོག་དང་༔ མེ་ལོང་རྣམ་དག་དུང་དཀར་རྣམས༔ ལྷ་མོ་བརྒྱད་ཀྱིས་ཕུལ་བ་ལྟར༔ དངོས་གྲུབ་རྣམ་གཉིས་སྩོལ་བྱའི་ཕྱིར༔ ལྷ་ཆེན་ཚོགས་ཀྱི་བདག་པོ་དང་༔ ལྷ་སྨན་འཁོར་དང་བཅས་ལ་འབུལ༔ དགྱེས་པར་བཞེས་ལ་བདག་ལ་དགོངས༔ སྔགས་གོང་བཞིན། ཨཉྫ་མངྒ་ལ་དྲ་བྱ་ཞེས་ཕྱི་མཆོད་དང་། ཨ་ལས་བདེ་སྐྱོང་ཀ་པཱ་ལར༔ ཤ་ལྔ་བདུད་རྩི་ལྔས་གཏམས་པ༔ ཡི་གེ་འབྲུ་ལྔས་བྱིན་བརླབས་ནས༔ དམ་རྫས་བདུད་རྩི་མཆོག་སྦྱར་བ༔ དངོས་གྲུབ་རྣམ་གཉིས་སྩོལ་བྱའི་ཕྱིར༔ ལྷ་ཆེན་
ཚོགས་ཀྱི་བདག་པོ་དང་༔ ལྷ་སྨན་འཁོར་དང་བཅས་ལ་འབུལ༔ བདེ་བ་མཆོག་གིས་མཉེས་གྱུར་ཅིག༔ སྔགས་གོང་བཞིན་ལ། པཉྩ་ཨ་མྲྀ་ཏ་ལ་ཁ་རཾ་ཁཱ་ཧྲཱི༔ ཞེས་ནང་མཆོད། ཡབ་ཡུམ་དབྱེར་མེད་མཁའ་རྡོ་རྗེ༔ སྙོམས་འཇུག་དགའ་བ་བཞི་ཡི་དངོས༔ དཀར་དམར་བྱང་ཆུབ་སེམས་ཀྱི་རྫ་ས༔ རོ་མཉམ་བདེ་ཆེན་མཆོད་པ་འདི༔ དངོས་གྲུབ་རྣམ་གཉིས་སྩོལ་བྱའི་ཕྱིར༔ ལྷ་ཆེན་ཚོགས་ཀྱི་བདག་པོ་དང་༔ ལྷ་སྨན་འཁོར་དང་བཅས་ལ་འབུལ༔ སྐུ་ལུས་རྒྱས་ཕྱིར་བཞེས་སུ་གསོལ༔ སྔགས་ཐོག་མ་གོང་ལྟར་ལ། ཨོཾ་བཛྲ་མ་ཏཾ་གི་ཨཱཧཱུྃ་སྭཱ་ཧཱ༔ ཞེས་གསང་མཆོད་དང་༔ སྣོད་ཀྱི་འཇིག་རྟེན་བས་ཀྱང་རྒྱ་ཆེ་ཞིང་༔ རི་རབ་ལྷུན་པོ་བས་ཀྱང་བརྗིད་གསལ་བ༔ ཉི་ཟླ་ཟུང་ཅིག་ལས་ཀྱང་འོད་འབར་བའི༔ བདུད་རྩིའི་རྒྱ་མཚོར་གྱུར་པའི་གཏོར་མ་འདི༔ ཚོགས་བདག་རིགས་ལྔ་ཚོགས་བདག་སྤྲེལ་ཐོད་དང་༔ ལྷ་སྨན་འཁོར་བཅས་ལྗགས་ཀྱི་པདྨ་ནས༔ རྡོ་རྗེ་རྩེ་གསུམ་སྦུ་གུས་དགྱེས་པར་དྲངས༔ ཨོཾ་ཨ་ཀཱ་རོ་སོགས་དང་། ཨོཾ་ཤྲཱི་མ་ཧཱ་ཀཱ་ལ་ག་ཎ་པ་ཏི་སརྦ་པཉྩཌཀི་ནཱི་ཨི་དཾ་བྷ་ལིང་ཏ་ཤྲཱི་ཧ་ན་ཁ་ཁ་ཁཱ་ཧི་ཁཱ་ཧི་མ་མ་སརྦ་སིདྡྷི་མྨེ་པྲ་ཡཙྪ་ཧཱུྃ༔ ན་མོ་
སྡུད་ཏེ་མ་ཧཱ་ག་ཎ་པ་ཏི་ཡེ་བྷ་ལིང་གཱི་ཧ་ན་ཁ་རཾ་ཁཱ་ཧི་ཁཱ་ཧྲཱི༔ སྤྲོ་ན་ཡབ་ཡུམ་སོ་སོའི་སྔགས་ལ་ཁཱ་ཧི་བཏགས་སྔགས་ལན་གསུམ་གྱིས་གཏོར་མ་ཕུལ་ནས། འདོད་གསོལ་ནི། ཡབ་གཅིག་ཇོ་བོ་ཚེ༔ རིགས་ལྔ་དང་༔ ཡུམ་ནི་ཇོ་མོ་ཚེ་རིང་མཆེད་ལྔ་དང་༔ ལས་མཁན་ཚོགས་བདག་སྤྲེའུ་གཟུགས་ཅན་གྱིས༔ དམ་རྫས་བརྒྱན་པའི་མཆོད་པ་འདི་བཞེས་ལ༔ སངས་རྒྱས་བསྟན་སྲུང་དཀོན་མཆོག་དབུ་འཕང་བསྟོད༔ དགེ་འདུན་སྡེ་སྐྱོང་རྣལ་འབྱོར་ཚེ་དཔལ་སྤེལ༔ སྙན་པའི་དར་ལྕོར་གྲགས་པའི་དུས་བོས་ལ༔ འཁོར་དང་ལོངས་སྤྱོད་རྒྱས་པ་ཉིད་དུ་མཛོད༔ ཞི་རྒྱས་དབང་དྲག་ལས་རྣམས་མ་ལུས་པ༔ འབད་མེད་ལྷུན་གྱིས་གྲུབ་པར་མཛད་དུ་གསོལ༔ དེ་ནས་བསྟོད་པ་ནི༔ ཧཱུྃ༔ ཇོ་བོ་ཚོགས་བདག་སྐུ་མདོག་དམར༔ ཞལ་གཅིག་ཕྱག་བཞི་གླང་ཆེན་དབུ༔ གཡས་གཉིས་ནོར་བུ་ལྕགས་ཀྱུ་སྟེ༔ གཡོན་གཉིས་ཞགས་པ་ནེའུ་ལེ་འཛིན༔ ནེའུ་ལེ་བྱི་བའི་གདན་སྟེང་དུ༔ ཞབས་གཉིས་ཕྱེད་པའི་སྐྱིལ་མོ་བཞུགས༔ ཁྱོད་ལ་གུས་པས་བདག་གིས་བསྟོད༔ ཇོ་བོ་ཚོགས་བདག་དམར་པོ་ནི༔ ཞལ་གཅིག་ཕྱག་ནི་དམར་པོ་སྟེ༔ དང་པོ་ལ་ཕུད་ཕྱར་བ་སྟེ༔ ལ་ཕུད་ཐལ་བ་ཕྱི་བའི་
བརྡ༔ གཡས་པས་ལྕགས་ཀྱུའི་ཕྱག་རྒྱ་དེ༔ སྣང་སྲིད་དབང་དུ་བསྡུ་བའི་བརྡ༔ བར་པས་དགྲ་སྟ་འཛིན་པ་སྟེ༔ དགྲ་བགེགས་མགོ་བོ་འགེམ་པའི་བརྡ༔ ཟངས་གཞོང་རིན་ཆེན་འཛིན་པ་སྟེ༔ བདག་ལ་དངོས་གྲུབ་སྟེར་བའི་བརྡ༔ ཐ་མས་ཞགས་པ་འཛིན་པ་དེ༔ དགྲ་དང་བགེགས་ཀྱི་སྐེ་འཆིང་བརྡ༔ རང་རྟགས་ནེའུ་ལེ་འཛིན་པ་སྟེ༔ བདག་ལ་དངོས་གྲུབ་མྱུར་བའི་བརྡ༔ ཁྲོ་ཞལ་གཡོན་དུ་འཁྱིལ་བ་དེ༔ ཚོགས་བདག་མགོ་བོ་བཅད་པ་དེ༔ མཆེ་བ་གཡས་པ་བཅག་པ་དེ༔ ལེགས་ལྡན་བུ་ཡིས་བཅག་པའི་བརྡ༔ མཆེ་བ་གཡོན་པར་ཤུབས་བཀོན་པ༔ ད་རུང་མཆེ་བ་བཅག་དོག་བ༔ རི་ཝང་ཆིབས་ནས་འབྱོན་པ་དེ༔ གླིང་བཞི་མ་ལུས་བསྐོར་བའི་བརྡ༔ བརྡ་དོན་སྟོན་པའི་ཆ་ལུགས་འཆང་༔ ཁམས་གསུམ་དབང་དུ་སྡུད་པའི་བརྡ༔ མ་ཧཱ་ག་ཎ་པ་ཏི་ལ༔ རབ་ཏུ་གུས་པས་བདག་གིས་བསྟོད༔ དམར་པོ་རིགས་གཉིས་ཀྱི་བསྟོད་པ་གནམ་ཆོས་རང་གཞུང་ནས་སོ༔ ཧཱུྃ༔ འཇིག་རྟེན་ལྷ་ཆེན་ཀུན་གྱི་དབང་ཕྱུག་གཙོ༔ སྐུ་མདོག་རབ་དང་ཟླ་བ་བྱང་སེམས་མཚུངས༔ མཆེ་བ་ཕ་རོལ་ཕྱིན་དྲུག་སྐུ་ལ་རྫོགས༔ སྣ་ནི་རབ་དམར་དབང་གི་
ལས་མཛད་པ༔ ལྕགས་ཀྱུ་ལྟ་བུར་འགུགས་པའི་ལས་མྱུར་མཛད༔ སྣ་ཚོགས་པདྨ་རིན་ཆེན་བྱི་བའི་ཁྲིར༔ ནོར་བུ་བསྐྱུགས་པས་གདན་མཛད་མ་རུངས་གནོན༔ རིན་ཆེན་དབུ་རྒྱན་སྤྱི་གཙུག་རིན་ཆེན་ནོར༔ ཨིནྡྲ་ནཱི་ལ་བེ་ཌཱུར་སྣ་ཚོགས་མཛོད༔ རིན་ཆེན་ཆར་རྒྱུན་སྒྲུབ་པ་པོ་ལ་འབེབས༔ སྤྱན་གཉིས་གཟིགས་པ་བདེན་གཉིས་དགེ་བའི་ལམ༔ ཕྱག་བཞི་བསྡུ་དངོས་མི་ཐུང་སྒེག་པ་ཆེ༔ ཕྱག་གཡས་དང་པོ་དངོས་གྲུབ་གསོལ་བ་ནི༔ ལྷ་ཡི་ལ་ཕུག་རོ་མཆོག་བཅུད་ལྡན་རྟགས༔ བཀྲ་ཤིས་བགྲང་ཕྲེང་རིག་སྔགས་འཆང་བ་པོ༔ གཡོན་པར་པད་གཞོང་ལ་ཕུད་འབྲུ་སྣ་བསྣམས༔ སྒྲུབ་པ་པོ་ལ་ཟས་དང་འབྱོར་པ་སྤེལ༔ དགྲ་སྟས་ཕས་ཀྱི་རྒོལ་བ་ཚར་བཅད་ཅིང་༔ སྣ་ཚོགས་དོན་ཀུན་འགྲུབ་སྟེང་ཚོགས་ཀྱི་བདག༔ གསུས་ཁྱིམ་ལོངས་སྤྱོད་མཐའ་ཡས་གཏེར་མངའ་བ༔ ཅོད་པན་རྒྱན་མཛེས་ཁྱོད་ལ་བདག་བསྟོད་དོ༔ མཁའ་འགྲོ་རྣམ་བཞིའི་ཕྱོགས་བཞིར་རིགས་བཞིའི་གནས༔ གཏེར་མཛོད་བསྲུང་ཞིང་བར་ཆད་མི་མཐུན་ཟློག༔ མྱུར་འགྲུབ་དཔལ་འབར་གཟི་ལྡན་འདོད་ཡོན་ཚོགས༔ ཁྱེད་ཀྱི་ཐུབ་པའི་བསྟན་པ་བསྲུང་མཛོད་ལ༔ ལྷ་སྲིན་སྡེ་
བརྒྱད་དབང་དུ་བསྡུས་ནས་ཀྱང་༔ སྒྲུབ་ལ་དངོས་གྲུབ་སྣ་ཚོགས་མྱུར་དུ་སྩོལ༔ ཅེས་པ་ཆོས་སྐྱོང་སྤྱིའི་རྒྱུད་ཁྲག་མཚོ་ཁོལ་ཆེན་ནས་གསུངས་པའོ༔ ཧཱུྃ༔ སྐུ་མདོག་རབ་དཀར་ཟླ་བ་ཀུནྡྷར་མཚུངས༔ མཆེ་བ་གཙིགས་ཤིང་སྣ་ཞགས་རབ་དམར་བ༔ རིན་ཆེན་རྒྱན་བཟུང་ཟུར་ཕུད་ལྔ་ཡི་རྩེར༔ མཐོན་ཀ་བཻཌཱུརྱ་ཡིས་རབ་བརྒྱན་པ༔ ནོར་བུའི་བྲག་སྟེང་བྱི་བའི་གདན་ཁ་ན༔ མིའུ་ཐུང་གར་བའི་སྟབས་ཅན་སྦོམ་ལ་ཐུང་༔ ཕྱག་བཞི་གཡས་ཕུག་བགྲང་ཕྲེང་སྟེ༔ གཡོན་པས་ཟངས་གཞོང་དགྲ་སྟ་ཕྱར་ལ་བསྟོད༔ ཅེས་པ་མགོན་མང་ནས་བྱུང་བསྟོད་རྙིང་སྟེ་རྒྱ་གཞུང་གཅིག་འདྲེས་སོ༔ ཧཱུྃ༔ ཐུགས་རྗེ་ཆེན་པོའི་ཡང་སྤྲུལ་པ༔ འཇིག་རྟེན་ལྷ་ཆེན་ཀུན་གྱི་རྗེ༔ བགེགས་རིགས་ཀུན་གྱི་དེད་དཔོན་པོ༔ ཚོགས་ཀྱི་བདག་པོར་བདག་བསྟོད་དོ༔ ཁྱོད་ཉིད་སྒྲུབ་པའི་སྔགས་པ་སྟེ༔ སུས་མཐོང་དགའ་ཞིང་ཡིད་དུ་འོང་༔ རྒྱལ་པོས་ར་ཛ་ལྟར་དུ་མཆོད༔ དགྲ་རྣམས་ལན་ཚར་ཆུར་བཅུག་བཞིན༔ བགེགས་ཀྱི་གནོད་པ་ཐམས་ཅད་བསྲུང་༔ གང་སྨྲས་མི་ཀུན་ཡིད་ཆེས་བྱེད༔ ལས་རྣམས་ཀུན་གྲུབ་ལོངས་སྤྱོད་འཕེལ༔ དེ་ལྟར་འདོད་པ་ཀུན་འགྲུབ་པའི༔
ཚོགས་བདག་ཆེ་ལ་བདག་བསྟོད་དོ༔ བདག་གི་བསམ་པ་འགྲུབ་པར་མཛོད༔ རྡོ་རྗེ་མཁའ་འགྲོའི་རྒྱུད་དོན་ནག་པོའི་རྒྱ་གཞུང་དང་༔ གྲགས་པ་རྒྱལ་མཚན་གྱིས་མཛད་པའི་སྒྲུབ་ཐབས་ཀྱི་དོན་བསྡུས་དམར་པོ་ཕྱག་མང་གི་བསྟོད་པ་རཱ་ག་ཨ་སྱས་སོ༔ ཧཱུྃ༔ ལྷ་ཆེན་ཚོགས་ཀྱི་བདག་པོ་ཡི༔ ཡོན་ཏན་སྤྲུལ་པ་སྤྲེའུ་གཟུགས༔ ལྷ་མིན་གཡུལ་ངོ་བཟློག་པའི་ཚེ༔ རི་བྲན་ཀུན་ཀྱང་ཚོགས་པོར་འཕེན༔ ཉམས་རྩལ་ཧ་ལུ་མ་དྷར་གྲགས༔ གནམ་ས་གཉིས་ཀྱི་བར་ཤེད་ན༔ ཁྱོད་ལས་གཉན་པ་གཞན་མེད་ཕྱིར༔ བར་གཉན་གསེར་སྤྲེལ་སེར་པོར་གྲགས༔ དུས་གསུམ་སངས་རྒྱས་མཆོད་པའི་ཕྱིར༔ ཐལ་སྦྱར་སྤོས་རེང་སྡོང་བུ་ཐོགས༔ འདོད་པ་ཁམས་ཀྱི་དབང་ཕྱུག་ཕྱིར་དབང་རྟགས་དམར་པོ་གྱེན་དུ་བསྒྲེངས༔ ཁྱེད་མཆོད་རིག་སྔགས་བཟླས་པ་ན༔ དེ་མ་ཐག་ཏུ་ནོར་རྣམས་འཕེལ༔ བགེགས་རྣམས་ཀུན་གྱིས་ནོར་སྟེར་ཞིང་༔ མིས་ནི་རྒྱལ་པོ་བཞིན་དུ་མཆོད༔ གནོད་སྦྱིན་རྣམས་ཀྱིས་གཏེར་ཁ་འབྱེད༔ གང་གིས་ཁྱེད་ཀྱི་མཚན་འཛིན་པ༔ དེ་ལ་ནོར་གྱི་ཆར་པ་འབེབས༔ གཏེར་རྣམས་རྙེད་འགྱུར་དོན་རྣམས་འགྲུབ༔ འཛམ་གླིང་ནོར་རྣམས་ལག་ཏུ་འོང་༔ སྐྱེ་བ་
འདི་དང་ཕྱི་མར་ཡང་༔ འཛད་མེད་ནོར་གྱི་གཏེར་ཆེན་སྩོལ༔ སྤྲེའུ་ག་ཎ་པ་ཏི་ལ༔ རབ་ཏུ་གུས་པས་བདག་གིས་བསྟོད༔ ཅེས་པ་རྟ་མཆོག་རོལ་པའི་རྒྱུད་དང་༔ སྤྱན་འདྲེན་གཞུང་གི་དོན་བསྡུས་རཱ་ག་ཨ་སྱས་སོ༔ དེ་ནས་ཡུམ་གྱི་བསྟོད་པ་ནི༔ ཧཱུྃ༔ ལྷ་སྨན་བཀྲ་ཤིས་ཚེ་རིང་མ༔ ཁྱོད་ཀྱི་ཁྱོ་དང་འབྲང་སྨོས་པ༔ ཡབ་ནི་ལྷོ་ལྷ་དེ་བ་ཡིན༔ ཡུམ་ནི་འབྲང་ཡུམ་སྨན་གཅིག་མ༔ མིང་པོ་བདུན་ལ་སྲིང་མོ་ལྔ༔ ལྔ་ཚིག་དབུས་ཀྱི་གཙོ་མོ་སྟེ༔ ཁྱོད་ནི་གཙང་རིགས་ལྷ་ཡི་སྲས༔ མཚར་སྡུག་འོད་དུ་ཆི་ལི་ལི༔ ཞལ་བཟང་ཟླ་ཉ་བ་འདྲ༔ ལྷ་མོ་རྣམས་ཀྱང་ཟིལ་གྱིས་གནོན༔ མགྲིན་པ་གཅིག་ལ་གླུ་སྒྲ་སྟོང་༔ ཚངས་པའི་དབྱངས་ཀྱང་ཟིལ་གྱིས་གནོན༔ དབུ་སྐྲ་ཉག་མ་རེ་རེ་ལ༔ གསེར་གཡུའི་ལན་ཚར་སྟོང་སྟོང་ལྡན༔ ན་བཟའ་དར་དཀར་གོ་ཟུ་གསོལ༔ རིན་ཆེན་དུ་མས་སྐུ་ལུས་བརྒྱན༔ ཉིན་གསུམ་གངས་དཀར་སྟོད་ལ་བཞུགས༔ སྨན་མོ་རྣམས་དང་ལྷན་ཅིག་རོལ༔ མཚན་གསུམ་རྒྱ་གར་ཡུལ་དུ་བཞུགས༔ རབ་ཏུ་འཇིགས་པའི་དུར་ཁྲོད་ན༔ མཁའ་འགྲོ་རྣམས་དང་ཚོགས་འཁོར་རོལ༔ བཀའ་ཉན་སྤྲུལ་པའི་ཕོ་ཉ་སོགས༔ མ་
ལུས་འཁོར་དང་བཅས་པ་ལ༔ རབ་ཏུ་གུས་པས་བདག་གིས་བསྟོད༔ ཆོས་དབྱིངས་སྐྱེ་བ་མེད་པ་ལ༔ ཐུགས་རྗེའི་གཟུགས་ཀྱི་སྐུར་སྤྲུལ་ནས༔ འགྲོ་བའི་དོན་དུ་བྱོན་པ་ཡི༔ རྫུ་འཕྲུལ་སྣ་ཚོགས་སྟོན་མཛད་མ༔ གཙོ་མོ་བཀྲ་ཤིས་ཚེ་རིང་མ༔ མཁའ་འགྲོ་དབང་ཕྱུག་ལྔ་ལ་བསྟོད༔ མཁའ་འགྲོ་ཡུམ་ཆེན་ལྔ་པོ་ནི༔ རེས་འགའ་གངས་དཀར་རྩེ་ལ་བཞུགས༔ ལྷ་སྨན་མང་པོའི་འཁོར་གྱིས་བསྐོར༔ དཀར་གསུམ་མངར་གསུམ་ཕུད་ལ་རོལ༔ དངོས་གྲུབ་ལྔ་པོ་སྟེར་མཛད་མ༔ ལྷ་སྨན་རྒྱལ་མོ་ལྔ་ལ་བསྟོད༔ མཁའ་འགྲོ་ཆེན་མོ་ལྔ་པོ་ནི༔ རེས་འགའ་དུར་ཁྲོད་བརྒྱད་ན་བཞུགས༔ ཞིང་སྐྱོང་མཁའ་འགྲོའི་འཁོར་གྱིས་བསྐོར༔ མ་ཧཱ་མཱ་སའི་མཆོད་པ་བཞེས༔ མཆོག་དང་ཐུན་མོང་དངོས་གྲུབ་སྟེར༔ ཞིང་སྐྱོང་མཁའ་འགྲོ་ལྔ་ལ་བསྟོད༔ མཁའ་འགྲོ་ཆེན་མོ་ལྔ་པོ་ནི༔ རེས་འགའ་སྒྲུབ་གནས་རྣམས་ལ་བཞུགས༔ བསྟན་མ་བཅུ་གཉིས་འཁོར་གྱིས་བསྐོར༔ ཤ་དང་ཆང་གི་ཚོགས་ལ་རོལ༔ རྣལ་འབྱོར་སྒྲུབ་པའི་སྡོང་གྲོགས་མཛོད༔ དམ་ཚིག་ཆེན་མོ་ལྔ་ལ་བསྟོད༔ མཁའ་འགྲོ་ཆེན་མོ་ལྔ་པོ་ནི༔ རེས་འགའ་ཆོས་མཛད་གར་གནས་
བཞུགས༔ དམ་ཅན་སྲུང་མའི་ཚོགས་ཀྱིས་བསྐོར༔ ཞལ་ཟས་གཙང་མའི་ཕུད་ལ་རོལ༔ སངས་རྒྱས་བསྟན་པའི་བྱ་ར་མཛད༔ བསྟན་སྲུང་ཆེན་མོ་ལྔ་ལ་བསྟོད༔ མཁའ་འགྲོ་ཆེན་མོ་ལྔ་པོ་ནི༔ ཕྱི་ལྟར་ལྷ་སྨན་ཆེན་མོ་ལྔ༔ ནང་ལྟར་ཞིང་སྐྱོང་ཆེན་མོ་ལྔ༔ གསང་བར་རིགས་ཀྱི་ཡུམ་ཆེན་ལྔ༔ དུས་གསུམ་སངས་རྒྱས་བསྐྱེད་པའི་ཡུམ༔ མཁའ་འགྲོའི་དབང་ཕྱུག་ལྔ་ལ་བསྟོད༔ འདིར་གཤེགས་གཏོར་མ་འདི་བཞེས་ཤིག༔ དཀར་གསུམ་མངར་གསུམ་གཙང་མའི་ཕུད༔ ཤ་ཆང་དམ་ཚིག་ཅན་གྱི་རྫ་ས་མ་ཧ་མཱ་སའི་མཆོད་པ་བཞེས༔ སྔར་བཅོལ་སྒྲུབ་པའི་གཏང་རག་དང་༔ ད་བཅོལ་ཕྲིན་ལས་མ་ལུས་པ༔ བསྒྲུབ་པའི་གསོལ་འདེབས་སྙན་གསོན་འབུལ༔ རྣལ་འབྱོར་བཅོལ་བའི་ཕྲིན་ལས་མཛོད༔ ཨོ་རྒྱན་པདྨ་འབྱུང་གནས་དང་༔ བཞད་པ་རྡོ་རྗེའི་སྤྱན་སྔ་རུ༔ ཐུགས་དམ་ཞལ་བཞེས་ད་དགོངས་ལ༔ རྣལ་འབྱོར་བཅོལ་བའི་ཕྲིན་ལས་ཀུན༔ ད་ལྟ་ཉིད་དུ་འགྲུབ་པར་མཛོད༔ སངས་རྒྱས་བསྟན་པ་རིན་ཆེན་དང་༔ རྣལ་འབྱོར་བདག་ཅག་འཁོར་བཅས་ལ༔ སྡང་བའི་དགྲ་དང་གནོད་པའི་བགེགས༔ ཐར་པའི་བར་དུ་
གཅོད་པའི་བདུད༔ རྡུལ་ཕྲན་བཞིན་དུ་བརླག་པར་མཛོད༔ སངས་རྒྱས་བསྟན་པ་དར་བ་དང་༔ རྣལ་འབྱོར་བདག་ཅག་ཚེ་རིང་ཞིང་༔ ནད་མེད་འབྱོར་པ་རྒྱས་པ་དང་། སྒྲུབ་པ་མཐའ་རུ་ཕྱིན་པར་མཛོད༔ དེ་ནས་ཇོ་བོ་ཚོགས་བདག་རིགས་ལྔ་ཡི༔ ཐུགས་ཀར་ཟླ་སྟེང་གི་ཡིག་རང་མདོག་མཐར༔ སྔགས་ཕྲེང་རང་མདོག་གཡས་སུ་འཁོར་བར་བསྒོམ༔ རང་ཉིད་ཡི་དམ་ཐུགས་ཀའི་འོད་ཕོག་པས༔ སྔགས་ཕྲེང་དྲག་ཏུ་འཁོར་བས་ཐུགས་རྒྱུད་བསྐུལ༔ འོད་ཟེར་སྣ་ཚོགས་འཇིག་རྟེན་ཁྱབ་པར་འཕྲོས༔ ལྷ་ཀླུ་མི་ཡི་ཚེ་བསོད་དཔལ་འབྱོར་དང་༔ ཉི་ཟླ་ནོར་བུ་འབྱུང་བའི་བཅུད་རྣམས་ཀུན༔ འོད་ཟེར་དེས་བསྡུས་བདག་དང་བསྲུང་བྱར་ཐིམ༔ ཚེ་བསོད་དཔལ་འབྱོར་མངའ་ཐང་འཕེལ་བར་གྱུར༔ ཕྱག་མཚན་ནེའུ་ལེའི་ཁ་དང་ནོར་བུ་ལས༔ རིན་ཆེན་སྣ་ཚོགས་ཆར་པ་སིལ་སིལ་བབ༔ ས་ཕྱོགས་གནས་ཁང་ལྡེམ་ལྡེམ་གང་བར་བསྒོམ༔ དམིགས་པ་དེ་རྣམས་འོག་མ་ཀུན་ལ་འགྲེས༔ ཨོཾ་གྷ་ན་པ་ཏི་བ་ར་ཏ་ཀ་ཧཱུྃ་ཧཱུྃ་སྭཱ་ཧཱ༔ དེ་ཉིད་མང་དུ་བཟླ་བ་བསྙེན་སྒྲུབ་སྟེ༔ དེ་ནས་དེ་ཡི་ལས་ཚོགས་བསྒྲུབ་འདོད་ན༔ སྐུ་མདོག་དང་ནི་སྔགས་ཀྱི་ཤམ་བུ་བསྒྱུར༔ ས་བོན་བཻ་ཡིག་རྒྱབ་ཏུ་གི་ཡིག་ཁུར༔ ཧཱུྃ་དང་སྭཱ་ཧཱའི་བར་དུ་ཤམ་བུ་སྦྱར༔ དེ་ནི་གནམ་ཆོས་རང་གཞུང་ལུགས༔ ༈ ཡང་ནི་གཙོ་བོ་སྐུ་མདོག་དམར་པོ་ལ༔ ཞབས་གཡས་ཅུང་ཟད་བརྐྱང་ཞིང་གཡོན་བསྐུམ་པ༔ རྒྱལ་པོ་རོལ་པའི་ཆ་ལུགས་བཞུགས་པར་
བསམ༔ ཨོཾ་གྷ་ན་པ་ཏི་ཡ་སྭཱ་ཧཱ༔ བཟླས་པ་བདེ་མཆོག་ནམ་མཁའ་མཉམ་རྒྱུད་ནས༔ གསུངས་པ་ཚོགས་ཀྱི་བདག་པོའི་སྒྲུབ་པའོ༔ ཡང་ནི་གཙོ་བོ་དམར་པོའམ་དཀར་པོ་ལ༔ གཡས་གཉིས་ལ་ཕུད་དང་ནི་བགྲང་ཕྲེང་སྟེ༔ གཡོན་པས་རིན་ཆེན་སྣོད་དུ་ལ་དུ་བསྐང་༔ འོག་མས་དགྲ་ལྟ་རིན་ཆེན་མཚན་པ་བསྣམས༔ འཁོར་གྱི་ལྷ་མོ་བཞིར་བཅས་གསལ་བཏབ་ལ༔ ཨོཾ་བ་ར་ཏ་ཀ་སྭཱ་ཧཱ༔ ཞེས་པ་ཉེ་སྙིང་དང་༔ ཨོ་ཧཱུྃ་གྷ་ན་པ་ཏི་ཡེ་སྭཱ་ཧཱ༔ ཞེས་པའི་སྙིང་པོ་བཟླས་བསྙེན་པ་ཡིན༔ ཨོ་ཧྥི་གྷ་ན་པ་ཏི་པ་ཏི་ཡེ་སྭཱ་ཧཱ༔ ཞེས་རྩ་སྔགས་དེ་ཉིད་བཟླ་བ་སྒྲུབ་པ་ཡིན༔ དེ་ནས་གོང་གི་སྔགས་གསུམ་སྦྲེལ་བའི་མཇུག༔ ན་མོ་སྟུད་ཏེ་མ་ཧ་གྷ་ན་པ་ཏི་ཡེ་པ་ཤཾ་པུཊྛི་ཙཎཱ་པ་ཏི་ཤནི་ཀུ་རུ་ཡེ་སྭཱ་ཧཱ༔ ལས་སྦྱོར་སྔགས་དེས་ཕྲིན་ལས་རྣམ་བཞི་འགྲུབ༔ ཧེ་རུ་ཀ་དང་མགོན་པོ་ལྕམ་དྲལ་གྱིས༔ ལས་མཁན་ནོར་ལྷ་ཚོགས་བདག་བསྒྲུབ་པའི་རྫས༔ ཁྲག་མཚོ་ཁོལ་མའི་རྒྱུད་ནས་གསུངས་པ་ཡིན༔ ༈ ལས་ཀྱི་ཚོགས་བདག་ཕྱག་དྲུག་པ་ལ་དམིགས༔ ཨོཾ་བ་ར་ཏ་ཀ་ཧཱུྃ་ཧཱུྃ༔ འདི་ནི་གནམ་ཆོས་རླུང་སྒྲུབ་ཡིན་པས་མྱུར༔ ༈ དེ་ནས་ཡུམ་ལྔའི་མདུན་དུ་ནོར་བུ་ནི༔ བལ་ལེ་སྤུངས་པའི་ཕུང་པོ་རེ་རེ་བསམ༔ གཙོ་མོའི་ཐུགས་ཀར་ཆོས་འབྱུང་བསྣོལ་མའི་སྟེང་༔ ༀདཀར་མཐའ་ལ་སྔགས་ཕྲེང་གཡོན་དུ་འཁོར༔ འཁོར་བཞིའི་ཐུགས་ཀར་ཆོས་འབྱུང་བརྐྱང་པའི་སྟེང་༔ རང་མདོག་ཧ་རི་ནི་སའི་ཡིག་འབྲུ་རེ༔ རང་རང་
མདོག་མཚུངས་འོད་ཟེར་འཕྲོས་པ་ཡིས༔ འཆི་མེད་ཚེ་དང་རིགས་རྒྱུད་ཆོས་བརྒྱུད་གཡང་༔ མངོན་ཤེས་ཟས་གཡང་འབྲུ་གཡང་ནོར་གྱི་གཡང་༔ ཐམས་ཅད་བསྡུས་ནས་བདག་དང་བསྲུང་བྱར་ཐིམ༔ ཨོཾ་བཛྲ་པྲ་མོ་ཧ་རི་ནི་ས་མ་མ་སརྦ་སིདྡྷི་ཕ་ལ་ཧཱུྃ༔ མཆེད་ལྔའི་དྲིལ་སྒྲུབ་གནམ་ཆོས་ལུགས་དེ་ཟབ༔ དེ་ནས་ཤར་ལྷོའི་ཚོགས་བདག་དཀར་པོར་དམིགས༔ ཨོཾ་བ་ར་ཏུ་ཀ་སྭ་ཧྭ་ཉིན་རེ་བཞིན་དུ་དུས་དྲུག་བརྒྱ་རྩ་བཟླས༔ དུས་དྲུག་མཆོད་བསྟོད་བྱ་བ་བསྙེན་པ་ཡིན༔ ཨོཾ་ཧཱུྃ་ག་ན་པ་ཏི་ཡེ་སྭ་ཧྭ་དེ་ཉིད་བཟླ་བ་སྒྲུབ་པ་ཡིན་པ་སྟེ༔ ཨོ་བྷཾ་ག་ཎ་པ་ཏི་ཡ་རཏཱ་སིདྡྷི་ཧཱུྃ༔ འབུམ་ཕྲག་གཅིག་བཟླ་ལས་སྦྱོར་ཡིན་པ་སྟེ༔ ཚོགས་གསུམ་རྒྱུད་དང་རྟོགས་པ་ནས་གསུངས་སོ༔ རང་ཉིད་ཁྲོ་བོ་ཧཱུྃ་མཛད་ང་རྒྱལ་གྱིས༔ སུམ་བྷ་ནི་ཡི་སྔགས་ནི་ཅུང་ཞིག་བཟླས༔ ཚོགས་བདག་དམར་པོ་ཕྱག་མང་ལ་དམིགས་ནས༔ ཨོཾ་ཨཱཿཧཱུྃ་སྭ་ཧཱཿ འབུམ་ཕྲག་གཅིག་བཟླ་བསྙེན་པ་ཡིན་པ་སྟེ། ཚར་དུས་སྔགས་མཆིལ་དཔྲལ་བར་ཐིག་ལེ་བྱ༔ ཨོཾ་ཨཱག་ཧཱུྃསྭཱ་ཧཱ༔ ཨོཾ་ག་ག་ན་སིདྡྷི་སརྦ་ཨརྦ་མེ་པྲ་ས་དྷ་ཡེ་ཧཱུྃ་ཧཱུྃ་ཛ་ཛ་སྭ་ཧཱཿ འབུམ་ཕྲག་གཅིག་བཟླ་འདི་ཡི་སྒྲུབ་པའོ༔ དེ་ནས་ལས་ཚོགས་གང་དང་གང་སྒྲུབ་ཀྱང་༔ ཐོག་མར་བསྙེན་སྔགས་སྟོང་བཟླས་ལས་སྦྱོར་བྱ༔ ལས་སྦྱོར་གཙོ་བོ་དབང་གི་སྦྱིན་སྲེག་ཡིན༔ གལ་ཏེ་ལན་མང་བསྒྲུབས་ཀྱང་མ་འགྲུབ་ན༔ རང་ཉིད་ཧཱུྃ་མཛད་ཁྲོས་པའི་ཞབས་འོག་ཏུ༔ ཚོགས་བདག་མནན་པར་བསམ་ལ་
སྔགས་བཟླས་ཏེ༔ སུམ་བྷ་ནི་ལ་ཚོགས་བདག་བསྙེན་སྒྲུབ་བཏགས༔ འདི་ནི་གནད་འབེབས་ཡིན་པས་མང་མི་རུང་༔ ༈ ཡང་ནི་བྱང་ཤར་ཚོགས་བདག་དཀར་པོར་དམིགས༔ ཨོ་གྷ་སྭ་ཧཱཿ འབུམ་ཕྲག་བཞི་བཟླས་སྦྱོང་རྒྱུད་ལུགས་ཡིན་ནོ༔ གསེར་སོགས་རིན་ཆེན་ལས་གྲུབ་སྤྲེའུ་གཟུགས༔ ཡོད་ན་ལེགས་སྐྱེས་མེད་ན་ལྷོ་ནུབ་ཀྱི༔ ཚོགས་བདག་སྤྲེའུ་གཟུགས་ཅན་ལ་དམིགས་ཤིང་༔ དུས་སུ་ཨ་གར་ནག་པོའི་བདུག་སྤོས་འབུལ༔ ཨོཾ་བྷ་ར་ཏ་ཀ་སྭཱ་ཧཱ༔ ཞེས་པ་གསེར་གླིང་པ་ཡི་ལུགས༔ ༈ གཟུངས་འདི་དགོངས་པ་སྔགས་འདིའོ༔ ཨོཾ་ན་ག་ལ་སྐུ་ལ་ན་ཛ་ཡེ་སྭཱ་ཧཱཿ ཞེས་བཟླས་སྤྲེའུ་གཟུངས་ཀྱི་དགོངས་པ་ཡིན༔ འདི་དག་གང་རུང་གཅིག་ཚོས་ལས་མི་འགྲུབ་ཀྱང་༔ ཆོ་ག་འདི་ཉིད་ཚང་བ་བསྙེན་པ་ཡིན༔ ཚོགས་བདག་རིགས་ཀུན་མཆོད་བསྟོད་ཚང་བར་ཆོག༔ རྩེ་གཅིག་བསྒྲུབས་ན་དུས་བཞི་དུས་གསུམ་མམ༔ ཐ་ན་ནངས་ནུབ་དུས་གཉིས་ལས་བྱང་བཏང་༔ ཞག་བདུན་བཅུ་བཞི་ཉེར་གཅིག་ལ་སོགས་བསྒྲུབ༔ རྟགས་ནི་ཉམས་དང་རྨི་ལམ་ལ་སོགས་ལ༔ སྔགས་པ་བརྗིད་ལྡན་དཔོན་རིགས་ཆས་བཟང་དང་༔ བུད་མེད་མཛེས་མས་དཀར་གསུམ་རིན་ཆེན་འབྲུ༔ ལ་ཕུད་ལ་སོགས་དངོས་གྲུབ་རྫས་རྣམས་སྟེར། །འབྲུ་དང་རྩ་སོགས་ཤིང་དང་ལྕི་ལུད་སྤུངས༔ ལོ་ལེགས་རྟ་ཕྱུགས་མང་པོ་བདག་བྱེད་དང་༔ དར་ཕྱར་དུང་བུས་ཁྲོམ་ཆེན་འདུ་བ་དང་༔ ཁྲི་ལ་འདུག་དང་རྒྱན་བཏགས་གོས་བཟང་གྱོན༔ ཉི་ཟླ་ཤར་དང་འདུ་ཚོགས་ཆེ་བ་
འབྱུང་༔ རིན་ཆེན་ཆར་འབེབས་རི་བསྐོས་གཏེར་ཁ་རྙེད༔ འབྲུ་ཡི་ཆར་དང་ལོངས་སྤྱོད་ཕུལ༔ དངོས་སུ་ཚིག་ཆོམ་འུར་སྒྲ་འཁྱུགས་པ་སོགས༔ ཆོ་འཕྲུལ་འདྲ་བ་བྱུང་ཡང་གྲུབ་རྟགས་ཡིན༔ སྤྲེའུ་འོད་དཀར་མི་རིང་མཐོང་༔ གཉིད་ཀྱང་དྭངས་དཀའ་མེ་རེ་བ༔ ནོར་བུ་རྙེད་དང་ཟས་བཟང་ཟོས༔ རྟགས་བྱུང་དུས་སུ་གཏང་རག་མཆོད་པ་བྱ༔ ༈ དེ་ནས་གསོལ་ཁ་བྱ་བར་འདོད་པ་ན༔ བསྡུ་ན་གཏོར་མ་གསོ་བྲན་བྱས་པས་འཐུས༔ རྒྱས་པར་གསེར་སྐྱེམས་ཇ་ཕུད་འོ་ཕུད་སོགས༔ འབྲུ་སྣ་བཏབ་པ་ཕུད་རྐང་ནང་དུ་བཀྱག༔ ཚིག་མཚམས་རྣམས་སུ་ནམ་མཁར་གཏོར་བཅུག་གོ༔ ཧཱུྃ༔ འཕགས་མཆོག་ཐུགས་རྗེ་ཆེན་པོ་ཡི༔ འདུལ་དཀའི་བགེགས་རིགས་འདུལ་བ་དང་༔ འགྲོ་ལ་ཕན་ཕྱིར་སྐུ་སྤྲུལ་པ༔ སྐུ་མདོག་སྣ་ཚོགས་ཅིར་ཡང་སྟོན༔ སྤྱན་གསུམ་རལ་པའི་ཅོད་པན་ཅན༔ ཟླ་ཕྱེད་ནོར་བུ་དར་གྱིས་བརྒྱན༔ རིན་ཆེན་རྒྱན་ལྡན་དར་ཟབ་བཀླུབས༔ ཕྱག་བཞི་ལ་ཕུད་དགྲ་སྟ་དང་༔ གཡོན་པ་ནོར་བུ་ཁ་ཊཾ་བསྣམས༔ སྦོམ་ཐུང་གསུས་འཕྱང་གཟི་བརྗིད་འབར༔ ཕྲིན་ལས་རབ་འབྱམས་བསྒྲུབ་པའི་ལྷ༔ མཆོད་གཏོར་འདི་བཞེས་དངོས་གྲུབ་སྩོལ༔ ཆོས་སྲིད་དབང་ཐང་འཕེལ་པའི་དངོས་གྲུབ་སྩོལ༔ མཆོད་གཏོར་གཙང་མ་ཕུད་ཀྱིས་མཆོད༔ དཔལ་ལྡན་ཚོགས་ཀྱི་བདག་པོ་སྟེ༔
དངོས་གྲུབ་སྒྲུབ་པའི་དབང་ཕྱུག་སྟེ༔ འཇིག་རྟེན་ཀུན་ལ་ཕན་པའི་ལྷ༔ ཐུགས་རྗེས་འགྲོ་བའི་དབུལ་ཕོངས་སྐྱོབས༔ བཀྲ་ཤིས་རྩོལ་མཛད་ནོར་ལྷ་ཆེ༔ ཇོ་བོ་ཚོགས་བདག་རིགས་ལྔ་དང་༔ སྤྲུལ་པ་མྱུར་འགྱོགས་སྤྲེའུའི་གཟུགས༔ མཆོད་གཏོར་འདི་བཞེས་དངོས་གྲུབ་སྩོལ༔ ལོངས་སྤྱོད་ཕུན་སུམ་ཚོགས་པའི་དངོས་གྲུབ་སྩོལ་ཡིད་ལ་ཅི་འདོད་སྦྱིན་པའི་ལྷ༔ རྒོལ་བ་ཟློག་པའི་སྟོབས་པོ་ཆེ༔ བགེགས་ཚོགས་ཀུན་གྱི་རྗེ་བོ་སྟེ༔ དགྲ་བགེགས་རྩད་ནས་བརླག་མཛད་པ༔ སྟེང་འོག་བར་གསུམ་དབང་སྡུད་ཅིང་༔ རྒྱལ་སྲིད་འབྱོར་པ་སྩོལ་མཛད་པ༔ དཔལ་ལྡན་ཚོགས་བདག་རིགས་ལྔ་དང་༔ ལས་མཁན་སྤྲེའུ་གཟུགས་ཅན་གྱི༔ མཆོད་གཏོར་འདི་བཞེས་དངོས་གྲུབ་སྩོལ༔ ཕུན་སུམ་ཚོགས་པའི་དངོས་གྲུབ་སྩོལ༔ མཆོད་དོ་གཙང་མ་ཕུད་ཀྱིས་མཆོད༔ རྒྱུད་དང་རྟོགས་པ་ལ་སོགས་པའི་དོན་བསྡུས་རཱ་ག་ཨ་སྱས་སོ༔ ཧཱུྃ༔ རྡོ་རྗེ་མི་འགྱུར་དཔལ་གྱི་ཡུམ༔ སྐུ་མདོག་དཀར་མོ་གཞོན་ཚུལ་ཅན༔ ཕྱག་གཡས་གསེར་གྱི་རྡོ་རྗེ་བསྣམས༔ ཕྱག་གཡོན་ཚེ་ཡི་བུམ་པ་འཛིན༔ བུམ་པའི་སྟེང་ན་དཔལ་བེའུ་དང་༔ གཡུང་དྲུང་རིན་ཆེན་འཁྱིལ་པས་
བརྒྱན༔ ལྷབ་ལྷུབ་ན་བཟའི་རྒྱན་དང་ལྡན༔ སིལ་སྙན་རོལ་མོའི་སྒྲ་དང་བཅས༔ རིན་ཆེན་དུ་མས་མཛེས་པར་བརྒྱན༔ བཀྲ་ཤིས་ཚེ་ཡི་གཙོ་མོ་སྟེ༔ ཆིབས་སུ་སེང་གེ་དཀར་མོ་ཆིབས༔གངས་དཀར་སྟེང་ན་བཞུགས་པ་མོ༔ མཆོད་གཏོར་འདི་བཞེས་དངོས་གྲུབ་སྩོལ༔ སྲིད་སྲུང་རིགས་རྒྱུད་འཕེལ་བའི་དངོས་གྲུབ་སྩོལ༔ མཆོད་དོ་གཙང་མ་ཕུད་ཀྱིས་མཆོད༔ ལྷ་མོ་མཐིང་གི་ཞལ་བཟང་མ༔ རྡོ་རྗེ་ཁྲོས་མ་ཞེས་སུ་གྲགས༔ སྐུ་མདོག་སྔོ་སངས་འཚེར་བག་ཅན༔ ཆིབས་སུ་རྐྱང་བུ་ཁ་དཀར་ཆིབས༔ ཕྱག་གཡས་དངུལ་དཀར་མེ་ལོང་བསྣམས༔ གཡོན་པས་ལྷ་ཡི་བ་དན་ཕྱར༔ སྐུ་ལ་དར་དཀར་ན་བཟའ་གསོལ༔ སིལ་སྙན་རོལ་མོའི་སྒྲ་དང་བཅས༔ མཆོད་གཏོར་འདི་བཞེས་དངོས་གྲུབ་སྩོལ༔ སྣང་སྲིད་ཕྲ་ཡི་དངོས་གྲུབ་སྩོལ༔ མཆོད་གཏོར་འདི་བཞེས་དངོས་གྲུབ་སྩོལ༔ ལྷ་མོ་མི་གཡོ་བློ་བཟང་མ༔ གསང་མཚན་རྡོ་རྗེ་བཞད་པ་མོ༔ སྐུ་མདོག་སེར་མོ་གསེར་གྱི་མདོག༔ ཆིབས་སུ་རྒྱ་སྟག་ཁྲ་བོ་ཆིབས༔ ཕྱག་གཡས་རིན་ཆེན་སྡེར་བཟང་བསྣམས༔ ལྷ་ཡི་ཞལ་ཟས་སྣ་ཚོགས་འཛིན༔ གཡོན་ན་ནེའུ་ལེའི་རྐྱལ་པ་འཛིན༔
སྒྲུབ་པ་པོ་ཡི་གྲོགས་མཛོད་ཅིག༔ མཆོད་གཏོར་འདི་བཞེས་དངོས་གྲུབ་སྩོལ༔ རྨ་གཡང་རོ་མཆོག་ཟས་ཀྱི་དངོས་གྲུབ་སྩོལ༔ མཆོད་དོ་གཙང་མ་ཕུད་ཀྱིས་མཆོད༔ ལྷ་མོ་ཅོད་པན་མགྲིན་བཟང་མ༔ རྡོ་རྗེ་དཔལ་མོ་ལོངས་སྤྱོད་ཡུམ༔ སྐུ་མདོག་དམར་མོ་མདངས་དང་ལྡན༔ ཆིབས་སུ་ཤ་བ་ཡུ་མོ་ཆིབས༔ ཕྱག་གཡས་ཡིད་བཞིན་ནོར་བུ་དང་༔ ཕྱག་གཡོན་རིན་ཆེན་སྒྲོམ་བུ་བསྣམས༔ སྣང་སྲིད་ཐམས་ཅད་དབང་དུ་སྡུས༔ རྣལ་འབྱོར་བདག་གི་ཕྲིན་ལས་སྒྲུབས༔ མཆོད་གཏོར་འདིར་བཞེས་དངོས་གྲུབ་སྩོལ༔ བང་མཛོད་འབྲུ་ནོར་འཕེལ་བའི་དངོས་གྲུབ་སྩོལ༔ མཆོད་དོ་གཙང་མ་ཕུད་ཀྱིས་མཆོད༔ ལྷ་མོ་གཏད་དཀར་འགྲོ་བཟང་མ༔ གསང་མཚན་རྡོ་རྗེ་གར་མཁན་མ༔ སྐུ་མདོག་སྔོ་ལྗང་མདངས་དང་ལྡན༔ ཆིབས་སུ་གཡུ་འབྲུག་སྔོན་མོ་ཆིབས༔ ཕྱག་གཡས་རྩ་མཆོག་དཱར་བ་དང་༔ གཡོན་པས་སྦྲུལ་གྱི་ཞགས་པ་བསྣམས༔ ཕྲིན་ལས་ཐོག་པ་སྒྱུ་མེད་པ་ཡི༔ མཐུ་དང་ནུས་པ་འདིར་སྟོན་ཅིག༔ མཆོད་གཏོར་འདིར་བཞེས་དངོས་གྲུབ་སྩོལ༔ རྐང་བཞི་རྟ་ཕྱུགས་འཕེལ་བའི་དངོས་གྲུབ་སྩོལ༔ མཆོད་དོ་གཙང་མ་ཕུད་ཀྱིས་
མཆོད༔ དེ་ནས་བསྐང་བ་བྱེད་པར་འདོད་ན༔ ལོགས་སུ་བཅའ་མི་དགོས་ཏེ་གཏོར་མཆོད་རྣམས་ཁ་གསོས་ལ༔ ཧཱུྃ༔ ཐུགས་རྗེ་ཆེན་པོའི་འགྲོ་བའི་དོན་སྤྲུལ་པ༔ སངས་རྒྱས་ཐུགས་ལ་དུད་འགྲོ་གླང་ཆེན་དབུ༔ ཕྲིན་ལས་བཞི་བསྒྲུབ་སྐུ་མདོག་ཅིར་ཡང་སྟོན༔ ཕྱག་ནི་གཉིས་བཞི་དྲུག་དང་བཅུ་གཉིས་སོགས༔ གཅིག་ཏུ་མ་ངེས་ཕྱག་མཚན་སྣ་ཚོགས་མཛིན༔ སྤྲུལ་པ་སྤྲེའུའི་གཟུགས་ཅན་རྣོ་མྱུར་ལྡན༔ ཡབ་ཡུམ་སྤྲུལ་པར་བཅས་པའི་ཐུགས་དམ་བསྐང་༔ ཙན་དན་དཀར་པོའི་སྐུ་གཟུགས་མཐེ་བོང་ཙམ༔ གསེར་དངུལ་ཤེལ་དང་དུང་ལས་བྱས་པའི་སྐུ༔ ཟངས་དང་མཁར་བ་རུས་པ་ལས་གྲུབ་སྐུ༔ བྲིས་པའི་སྐུ་དང་གསེར་གྱི་སྤེལ་གཟུགས་ཀྱིས༔ ཚོགས་ཀྱི་བདག་པོའི་སྐུ་ཡི་ཐུགས་དམ་བསྐང་༔ བསྐང་ནས་རྟེན་པའི་རྫས་ལ་བརྟན་པར་བཞུགས༔ སྙིང་པོ་ཉེ་སྙིང་རྩ་སྔགས་གཟུངས་སྔགས་དང་༔ སྤྱན་འདྲེན་མཆོད་སྟོད་དབྱངས་དང་རོལ་མོ་ཡིས༔ ཚོགས་བདག་གསུང་གི་ཐུགས་དམ་བསྐང་གྱུར་ཅིག༔ བསྐངས་ནས་གང་བཅོལ་ཕྲིན་ལས་མྱུར་དུ་སྒྲུབས༔ བྱམས་དང་སྙིང་རྗེ་ལྟ་བ་གྱད་ཀྱི་ལྷ༔ གཉེན་པོ་ཡེ་ཤེས་ལྔ་དང་བཀའ་སྡོད་ཀྱི༔ ཏིང་འཛིན་རྩེ་གཅིག་དམིགས་
པའི་འཕྲོ་འདུ་ཡིས༔ ཚོགས་བདག་ཐུགས་ཀྱི་ཐུགས་དམ་བསྐང་བསྐང་གྱུར་ཅིག༔ བསྐངས་ནས་ཡིད་ལ་གང་བསམ་འགྲུབ་པར་མཛོད༔ མེ་ཏོག་དཀར་དང་དམར་པོ་སེར་པོའི་ཚོགས༔ ཙན་དན་སི་ལ་ག་པུར་ཨ་ག་རུ༔ མར་མེ་སྤོས་ཆབ་ཞལ་ཟས་རོལ་མོའི་ཚོགས༔ རྒྱ་ཆེན་ཟས་སྣའི་མཆོད་པས་ཐུགས་དམ་བསྐང་༔ རོ་བརྒྱ་ལྡན་པའི་ཟས་མཆོག་ལ་ཕུད་དང་༔ དཀར་གསུམ་མངར་གསུམ་མར་དང་ཁུར་བ་དང་༔ འབྲས་གསུམ་སྤྱོད་ཀྱིས་བྲན་པའི་ལ་དུ་དང་༔ དངོས་བྱོར་ཡིད་སྤྲུལ་མཆོད་པ་རྒྱ་མཚོ་ཡིས༔ ཇོ་བོ་ཚོགས་བདག་རིགས་ལྔའི་ཐུགས་དམ་བསྐང་༔ སྤྲུལ་པ་སྤྲེའུའི་གཟུགས་ཅན་ཐུགས་དམ་བསྐང་༔ ཁྱེད་ཀྱི་ཐུགས་དམ་གཉེན་པོ་བསྐངས་གྱུར་ནས༔ བགེགས་དང་རྒྱལ་པོ་དགྲ་ཡི་གནོད་པ་དང་༔ མི་མཐུན་གནོད་པའི་ཕྱོགས་རྣམས་ཞི་བ་དང་༔ ཚེ་དང་བསོད་ནམས་ལོང་སྤྱོད་རྒྱས་པ་དང་༔ རྒྱལ་བློན་ཡུལ་ཁམས་དབང་དུ་བསྡུ་བ་དང་༔ བར་ཆད་དགྲ་བགེགས་བསྒྲལ་བའི་ཕྲིན་ལས་མཛོད༔ བགེགས་ཀྱི་ཡོངས་རྗེ་ཚོགས་བདག་གླང་སྣ་ཅན༔ དེ་ཡི་སྦྱོར་ཡུམ་སྲིད་པའི་རྗེ་མོ་ནི༔ དཀར་མོ་ཆེན་མོ་ཉི་ཟླའི་
ཐོད་ཕྲེང་ཅན༔ འབྲོག་ཆེན་བགེགས་འདུལ་རྡོ་རྗེ་བགེགས་ཀྱི་རྒྱལ༔ ཇོ་མོ་བཀྲ་ཤིས་ཚེ་ཡི་དབང་ཕྱུག་མ༔ མཆེད་ལྔ་འཁོར་བཅས་ཐུགས་དམ་བསྐང་བ་ནི༔ རང་རང་རི་ཡི་གཟུགས་ཅན་གཏོར་མ་དང་༔ དཀར་གསུམ་མངར་གསུམ་འབྲུ་སྨ་སྨན་སྣ་དང་༔ ཕྱེ་མར་ལུག་ཤ་ལག་གཡས་ཐུགས་དམ་བསྐང་༔ དངུལ་གྱི་སོར་གདུབ་རྡོ་རྗེ་རྩེ་ལྔ་དང་༔ ཚེ་ཡི་བུམ་པ་བདུད་རྩི་ཨ་མྲྀ་ཏས༔ བཀྲ་ཤིས་ཚེ་སྲིང་མ་ཡི་ཐུགས་དམ་བསྐང་༔ འཇིག་རྟེན་ལྷ་མོ་རོལ་མའི་ཐུགས་དམ་བསྐང་༔ མདའ་མོ་རྒོད་སྒྲོ་དར་སྣ་ལྔ་ཡིས་བརྒྱན༔ དངུལ་དཀར་མེ་ལོང་འབྲས་དཀར་གཡུང་དྲུང་གིས༔ མཐིང་གི་ཞལ་བཟང་མ་ཡི་ཐུགས་དམ་བསྐང་༔ ལྷ་མོ་ཞི་བ་མ་ཡི་ཐུགས་དམ་བསྐང་༔ རིན་ཆེན་སྣོད་དུ་ཟས་སྣའི་ཕུད་ཀྱིས་བཀང་༔ སྲེ་མོང་ལྤགས་པར་འབྲུ་སྣ་རིན་ཆེན་བླུགས༔ མི་གཡོ་བློ་བཟང་མ་ཡི་ཐུགས་དམ་བསྐང་༔ ལྷ་མོ་འབར་བྱེད་མ་ཡི་ཐུགས་དམ་བསྐང་༔ ནོར་བུ་གཟུགས་དང་རིན་ཆེན་སྒྲོམ་བུས་ནང་༔ སྣ་ཚོགས་འབྲུ་སྣའི་ཚོགས་ཀྱིས་བསྐང་བ་འདིས༔ ཅོད་པན་མགྲིན་བཟང་མ་ཡི་ཐུགས་དམ་བསྐང་༔ འཇིག་རྟེན་ལྷ་མོ་དབང་མོའི་ཐུགས་དམ་བསྐང་༔
སྦྲུལ་གྱི་ཞགས་པས་གཟུགས་བརྙན་བྲིས་སམ་བཟོས༔ རྩ་མཆོག་དུརྦའི་ཀུ་ཤའི་ཆུན་པོ་ཡིས༔ གཏད་དཀར་འགྲོ་བཟང་མ་ཡི་ཐུགས་དམ་བསྐང་༔ ལྷ་མོ་རྣམ་པར་རྒོད་མའི་ཐུགས་དམ་བསྐང་༔ བསྐངས་ནས་རང་རང་ལས་ཀྱི་དངོས་གྲུབ་སྩོལ༔ བདག་ཅག་འཁོར་བཅས་མ་རིག་དབང་གྱུར་པས༔ ཉམས་ཆག་ཉེས་ལྟུང་འགལ་འཁྲུལ་གང་བྱུང་བ༔ ཚོགས་བདག་ཡབ་ཡུམ་འཁོར་དང་བཅས་ལ་བཤགས༔ མི་སྒྲིབ་ཚངས་པའི་དངོས་གྲུབ་བསྩལ་དུ་གསོལ༔ ཨོ་ས་མ་ཡཱ༔ ས་མ་ཡ༔ ཧཱུྃ་ས་མ་ཡཱ༔ གྷ་ན་པ་ཏི༔ ཨོཾ་ཧ་རི་ནི་ས༔ བཛྲ་སཏཱ་ས་མ་ཡ༔ སོགས་ཡིག་བརྒྱ་བཟླ༔ ཉམས་ཆག་བཤགས་པའི་སྔགས་སྡེབ་ཟབ་མོ་དང་བཅས་རཱ་ག་ཨ་སྱས་སོ༔ དེ་ནས་དགུ་གཏོར་གྱི་དུས་སམ༔ གློ་བུར་ལས་བཅོལ་གྱི་དུས་དམར་གཏོར་ཤ་ཁྲག་གིས་རྒྱན་པ་བཤམས་ལ༔ ངོ་བོ་དགྲ་བགེགས་ཀྱི་ཤ་ཁྲག་ལ༔ རྣམ་པ་སོ་སོའི་ཡིད་མཐུན་གྱི་ལོངས་སྤྱོད་དུ་བསམ་ལ༔ ཨ་ཀཱ་རོ་ལན་གསུམ་གྱིས་བྱིན་བརླབས་ལ༔ ཧཱུྃ༔ སྲིད་པའི་ལྷ་ཆེན་བགེགས་ཀྱི་ཡོངས་རྗེ་སྟེ༔ ཁྱོད་ལས་མཐུ་རྩལ་ཆེ་བ་གཞན་མེད་ཕྱིར༔ རྩལ་ཆེན་ཚོགས་བདག་གླང་སྣ་ཞེས་སུ་གྲགས༔ སྐུ་མདོག་ནག་པོ་ཞལ་གཅིག་ཕྱག་བཞི་པ༔ གཡས་གཉིས་མཆེ་
བ་དཀར་པོ་ཞགས་པ་དང་༔ གཡོན་གཉིས་དགྲ་སྟ་དང་ནི་ཁ་ཊཾ་བསྣམས༔ འཁོར་ནི་རྒྱལ་ཆེན་བཞི་དང་ཀླུ་ཆེན་བརྒྱད༔ བྱི་ན་ཡ་ཀ་གླང་པོ་ཆེ་ཡི་གདོང་༔ སྟོང་གསུམ་བདག་པོ་སྤྲིན་གྱི་སྒྲོན་མེ་ཅན༔ རྡོ་རྗེ་མཆུ་སོགས་དེད་དཔོན་ཆེན་པོ་བརྒྱད༔ སྟོང་ཕྲག་བརྒྱད་ཅུ་རྩ་བཞིའི་དཔུང་ཚོགས་བཅས༔ དམ་རྫས་བརྒྱན་པའི་གཏོར་མ་འདི་བཞེས་ལ། འཁོར་གྱི་དམག་ཚོགས་བཀའ་ནན་མ་ཆུང་བར༔ བདག་དང་བསྲུང་བྱ་རྣམས་ལ་གནོད་མ་འཇུག༔ བྱང་ཆུབ་བསྒྲུབ་ལ་བར་ཆད་མེད་པ་དང་༔ རྐྱེན་ངན་བར་ཆད་ཆག་ཆེན་ཉམ་ང་ཟློག༔ ཞིང་བཅུ་ཚང་བ་བསྟན་པའི་སྤྱི་དགྲ་ལ༔ འཁོར་གྱི་ཚོགས་ཀྱི་ཟ་ཁ་དེ་རུ་སྟོན༔ རྡོ་རྗེ་མཆུ་སོགས་དམག་དཔོན་ཆེན་པོ་བཞི༔ སྟོང་ཕྲག་བརྒྱད་ཅུའི་དམག་ཚོགས་དགྲ་ལ་བྷྱོ༔ སྡང་དགྲའི་ཡུལ་དུ་གནས་མོལ་ཕོ་བྲང་ཐོབ༔ བསྟན་དགྲའི་ཁ་རྗེ་དབང་ཐང་ལོངས་སྤྱོད་རྣམས༔ ཕྱག་ན་རྡོ་རྗེའི་གནང་བའི་ཟས་ཡིན་པས༔ རྟག་ཏུ་ཁྱེད་རྣམས་ལོངས་སྤྱོད་དེ་ལ་མཛོད༔ བདག་དང་བསྲུང་བྱའི་མི་ནོར་འཁོར་བཅས་ལ༔ དཔག་ཚད་གཅིག་ལས་ཚུན་དུ་མ་ཉེ་ཞིག༔ ཇོ་བོ་ཚོགས་ཀྱི་བདག་པོའི་བཀའ་མ་བཅག༔
གསང་བདག་རྡོ་རྗེ་འཛིན་པའི་དམ་མ་བཀྲལ༔ རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད༔ བྷྱོ༔ ཆོས་ཀྱི་དབྱིངས་ཀྱི་ཡེ་ཤེས་ངང་ཉིད་ལས༔ ཐབས་མཁས་ཐུགས་རྗེས་ལྷ་མོའི་ཚུར་བཟུང་ནས༔ སངས་རྒྱས་བསྟན་པ་བསྲུང་ཞིང་སྤེལ་མཛད་མ༔ མཁའ་འགྲོ་ཆེན་མོ་བཀྲ་ཤིས་ཚེ་རིང་མ༔ དཔོན་གཡོག་ལྔ་བཅས་ཞིང་སྐྱོང་མཁའ་འགྲོ་དང་༔ ཡབ་གཅིག་ཚོགས་བདག་རིགས་ལྔ་ལ་སོགས་པ༔ འཁོར་གྱི་ཚོགས་དང་བཅས་ལ་ཕྱག་འཚལ་སྟོད༔ འདིར་གཤེགས་ཤ་ཁྲག་བརྒྱན་པའི་གཏོར་མ་བཞེས༔ ཛ་གད་སྨན་ཕུད་མཆོད་པ་འདིར་བཞེས་ལ༔ སྔར་བཅོལ་ལས་རྣམས་སྒྲུབ་པའི་གཏང་རག་དང་༔ ད་བཅོལ་བསྒྲུབ་ཕྱིར་གཏོར་མ་སྨན་ཕུད་བཞེས༔ རྣལ་འབྱོར་བདག་དང་བདག་གི་འཁོར་རྣམས་ཀྱི༔ ཚེ་དང་དཔལ་འབྱོར་བསམ་པའི་དོན་རྣམས་ཀྱི༔ བར་དུ་གཅོད་པའི་བྱད་ནད་གདོན་བགེགས་དང་༔ མི་དང་འབྱུང་པོའི་བར་ཆད་བཟློག་ཏུ་གསོལ༔ དེང་ནས་བཟུང་སྟེ་བྱང་ཆུབ་མ་ཐོབ་བར༔ ས་དང་ལམ་གྱི་ཡོན་ཏན་བསྒྲུབ་པ་ལ༔ བར་དུ་གཅོད་བྱེད་འགལ་རྐྱེན་ཞི་བ་དང་༔ མཐུན་རྐྱེན་མ་ལུས་འདོད་དགུ་
འགྲུབ་པར་མཛོད༔ བསྟན་དང་བསྟན་པའི་ཁུར་འཛིན་སྐྱེས་བུ་དང་༔ རྣལ་འབྱོར་འགྲོ་དོན་ཕྱོགས་བཅུར་འཕེལ་བ་དང་༔ གང་ལ་གང་འདུལ་ཕྲིན་ལས་རྣམ་བཞི་པ༔ འགྲོ་ལ་ཕན་བདེ་སྒྲུབ་པའི་སྡོང་གྲོགས་མཛོད༔ བྷྱོ༔ མཁའ་འགྲོ་ཆེན་མོ་བཀྲ་ཤིས་ཚེ་རིང་མ༔ དཔོན་གཡོག་ལྔར་བཅས་ཞིང་སྐྱོང་མཁའ་འགྲོ་དང་༔ དགྱེས་པའི་ཡབ་ནི་ཇོ་བོ་ཚོགས་ཀྱི་བདག༔ མིང་པོ་བཙན་རྒོད་རོལ་པ་མཆེད་བདུན་དང་༔ སྡེ་བརྒྱད་ལ་སོགས་བྲན་གཡོག་ཕོ་ཉའི་ཚོགས༔ ཁྱེད་རྣམས་དོ་ནུབ་མཐུ་དང་དཔུང་བསྐྱེད་ལ༔ རྣལ་འབྱོར་བདག་ཅག་འཁོར་དང་བཅས་པ་ཡི༔ སྔོན་གྱི་ལས་དང་འཕྲལ་རྐྱེན་ལས་བྱུང་བའི༔ བྱང་ཆུབ་བསྒྲུབ་པའི་ལམ་གྱི་མི་མཐུན་སོགས༔ འགལ་རྐྱེན་མ་ལུས་ཞི་བར་མཛད་དུ་གསོལ༔ མཁའ་འགྲོ་ཆེན་མོ་མཐིང་གི་ཞལ་བཟང་མ༔ ཞི་བའི་ལས་མཛད་ཚོགས་བདག་དཀར་པོ་དང་༔ ཁྱེད་རྣམས་དེ་རིང་མཐུ་དང་དཔུང་བསྐྱེད་ལ༔ རྣལ་འབྱོར་བདག་ཅག་འཁོར་དང་བཅས་པ་ཡི༔ ནད་རིགས་བཞི་བརྒྱ་རྩ་བཞི་ཞི་བ་དང་༔ སྟོང་ཕྲག་བརྒྱད་ཅུའི་བགེགས་ཀྱི་གནོད་པ་ཟློག༔ གཏད་ཁྲམ་ངན་སྔགས་དམོད་མོ་རྦོད་གཏོང་
ཟློག༔ འཇིགས་པ་བརྒྱད་དང་འཐབ་རྩོད་མེད་པར་མཛོད༔ ཚེ་དང་ཐར་པའི་ལམ་ལ་བར་གཅོད་པའི༔ བདུད་དང་གཤིན་རྗེའི་འཇིགས་པ་བཟློག་ཏུ་གསོལ༔ ལས་དང་ཉོན་མོངས་བཅས་པའི་སྡིག་པ་དང་༔ བདག་ཅག་འཁོར་བའི་སྡུག་བསྔལ་སྦྱང་དུ་གསོལ༔ མཁའ་འགྲོ་ཆེན་མོ་མི་གཡོ་བློ་བཟང་མ༔ ཚོགས་བདག་སེར་པོ་ཚོགས་བདག་སྤྲེལ་ཐོད་དང་༔ ཁྱེད་རྣམས་དེ་རིང་མཐུ་དང་དཔུང་བསྐྱེད་ལ༔ རྣལ་འབྱོར་བདག་ཅག་འཁོར་དང་བཅས་པ་ཡི༔ ཚེ་རིང་ནད་མེད་བདེ་སྐྱིད་ཕུན་སུམ་ཚོགས། འཇིག་རྟེན་འཇིག་རྟེན་འདས་པའི་དངོས་གྲུབ་སྩོལ༔ ཡིད་ལ་འདོད་དགུ་དར་ཞིང་རྒྱས་པར་མཛོད༔ མཁའ་འགྲོ་ཆེན་མོ་ཅོད་པན་མགྲིན་བཟང་མ༔ ཚོགས་བདག་དམར་པོ་རིགས་གསུམ་དང་བཅས་པ༔ ཁྱེད་རྣམས་དེ་རིང་མཐུ་དང་དཔུང་བསྐྱེད་ལ༔ རྣལ་འབྱོར་བདག་ཅག་འཁོར་དང་བཅས་པ་ལ༔ འགྲོ་བ་ཀུན་གྱི་དཔལ་དང་འབྱོར་པ་ལ་འཇིག་རྟེན་ཁམས་ཀྱི་འདོད་ཡོན་མ་ལུས་པ༔ ཁུག་ཅིག་སྡུས་ཤིག་རྣལ་འབྱོར་བདག་ཅག་གི༔ ད་ལྟ་ཉིད་དུ་འགྲུབ་པར་མཛད་དུ་གསོལ༔ མཁའ་འགྲོ་ཆེན་མོ་གཏད་དཀར་འགྲོ་
བཟང་མ༔ དྲག་པོའི་ལས་མཛད་ཚོགས་བདག་ནག་པོར་བཅས༔ ཁྱེད་རྣམས་དེ་རིང་མཐུ་དང་དཔུང་བསྐྱེད་ལ༔ བླ་མའི་སྐུ་དགྲ་བསྟན་པ་བཤིག་པ་དང་༔ སེམས་ཅན་འཚེ་དང་རྣལ་འབྱོར་བདག་ཅག་གི༔ སྡང་བའི་དགྲ་དང་གནོད་པའི་བགེགས་ཀྱི་ཚོགས༔ སོད་ཅིག་སྐྱོད་ཅིག་རྨུགས་ཤིང་རེང་བར་མཛོད༔ ཟུངས་ཤིག་གཏུབ་ཅིག་མྱོས་དང་རྨོངས་བར་མཛོད༔ ཤིག་ཅིག་ཆོམ་ཞིག་རྡུལ་ཙམ་མེད་པར་མཛོད༔ ཟོ་ཞིག་འཐུང་ཞིག་ཤ་ཁྲག་ཚོགས་ལ་རོལ༔ དམ་ཉམས་དགྲ་བོ་ཕ་རོལ་གནས་སུ་སྒྲོལ༔ སངས་རྒྱས་བསྟན་པ་དར་ཞིང་རྒྱས་པ་དང་༔ བསྟན་འཛིན་སྐྱེས་བུའི་འགྲོ་དོན་འཕེལ་བ་དང་༔ རྒྱལ་ཁམས་བདེ་ཞིང་བཀྲ་ཤིས་ཆོས་འཕེལ་དང་༔ རྣལ་འབྱོར་བྱང་ཆུང་བསྒྲུབ་པའི་ཕྲིན་ལས་མཛོད༔ ཧཱུྃ་གྷ་ན་པ་ཏི་བུདྡྷ་ཌཱཀི་ནཱི་ཙཀྲ་བཱ་ཧྲཱི༔ བཛྲ་ཌཱཀི་ནཱི༔ རཏྣ་ཊཱཀི་ནི༔ པདྨ་ཊཱཀི་ནཱི༔ ཀརྨ་ཊཱཀི་ནཱི༔ ཙཀྲ་ཁཱ་ཧྲཱི༔ ཞེས་བརྗོད་ལ་ཕྱོགས་གཙང་སའམ་དམིགས་པའི་ཕྱོགས་སུ་ཕུལ་ལོ༔ དེ་ནས་སྒྲུབ་པ་ཚར་པའི་དུས་སམ་ཆོ་ག་ཚར་རྗེས༔ རྗེས་ཆོག་ནི༔ ལྷ་རྣམས་ནོངས་པ་གང་མཆིས་བཟོད་པར་བཞེས༔ རང་གནས་གཤེགས་སམ་རྟེན་ལ་ཅི་བདེར་བཞུགས༔ འཇིག་རྟེན་
འཇིག་རྟེན་འདས་པའི་དགེ་ལེགས་ཚོགས༔ གོང་ནས་གོང་དུ་འཕེལ་བའི་བཀྲ་ཤིས་ཤོག༔ ཅེས་བརྗོད་ནས་སྐུ་དང་རྟེན་རྫས་རྣམས་རྒྱུན་དུ་འཆང་༔ མཆོད་གཏོར་རྣམས་ཕྱི་མི་ལ་མི་སྦྱིན༔ དངོས་གྲུབ་ཏུ་རོལ༔ འདི་ཡི་ཕན་ཡོན་དགོས་ཆེད་ནི༔ ཚོགས་བདག་དངོས་གྲུབ་འབྱུང་བའི་རྒྱུད༔ ཧེ་རམ་པ་ཡི་རྟོགས་པ་ལས༔ ཤིན་ཏུ་བསྐྱེད་པ་བདག་ཉིད་ལས༔ དཔལ་ལྡན་ཚོགས་བདག་ཐུགས་རྗེ་ཆེ༔ ཐུགས་རྗེ་ཆེན་པོས་དབུལ་བ་སྐྱོབ༔ ནོར་ལྷ་ཆེན་པོ་བདག་ཉིད་ཀྱི༔ དངོས་གྲུབ་འབྱུང་བའི་དབང་ཕྱུག་ཅན༔ གདུལ་བྱའི་དབང་གིས་སྐུ་སྤྲུལ་པ༔ ལྷ་ཆེན་ཚོགས་བདག་ཆེན་པོ་ཡི༔ དངོས་གྲུབ་དམ་པ་མཆོག་བསྒྲུབས་ན༔ མཐུ་སྟོབས་དམ་པ་མཆོག་ལྡན་ཞིང་༔ ལོངས་སྤྱོད་ཡིད་བཞིན་འཕེལ་བར་བྱེད༔ འཇིག་རྟེན་ཕན་བྱེད་ལྷ་ཡི་ལྷ༔ གང་ཡིན་མཆོད་ན་དངོས་གྲུབ་ལགས༔ ལྷ་ཡི་འཁོར་ལོས་སྒྱུར་བ་དང་༔ ཚེ་འདི་ཉིད་ལ་སྐལ་པ་མཉམ༔ བསོད་ནམས་ཆེན་པོ་ཐོབ་པར་འགྱུར༔ ལོངས་སྤྱོད་ལྷ་དང་མཉམ་པ་དང་༔ ཚེ་ཡང་རིང་པོ་མཆོག་ཏུ་འགྱུར༔ མི་ལ་སོགས་པ་དབང་དུ་འགྱུར༔ ཞེས་ཟླ་བ་བཅུ་དྲུག་མཆོད་གཏོར་མ་ཆག་པའི་ཕན་དང་༔ ཉེ་སྙིང་བྷ་ར་ཧ་ཏ་དང་ཉིན་རེ་དུས་དྲུག་ཏུ་བརྒྱ་རྩ་རེ་བཟླས༔ སྤྱན་འདྲེན་མཆོད་བསྟོད་རེ་བྱས་ན༔ ཡིད་ལ་རེ་བ་ཐམས་ཅད་རྫོགས་ཤིང་བསམ་པ་ཐམས་ཅད་འགྲུབ་པར་གསུངས༔ སྐུའི་མདུན་དུ་ཚོགས་བདག་ཚར་གཅིག་བཏང་༔ སྤོས་དང་མར་མེ་ཕུལ་ན༔ དེང་ཕྱིན་ཆད་བགེགས་ཀྱི་
གནོད་པ་བྱེད་པར་མི་ནུས་གསུངས་པས་རིམ་གྲོའི་མཆོག་ཡིན༔ སྔགས་གྲངས་ནི་རྒྱུད་ལས༔ འདི་ཡི་ནང་ནས་བསོད་ནམས་ཆུང་བ་ཡིན་ན་ཡང་བཟླས་བརྗོད་འབུམ་བྱ༔ ལ་ཕུད་ལ་སྔགས་ཀྱིས་བཏབ་སྟེ་ཚོགས་ཀྱི་བདག་པོ་མཆོད་ན་ཚེ་འདི་ལ་འཁོར་ལོའི་བསྒྱུར་བའི་རྒྱལ་པོ་དང་བསོད་ནམས་མཉམ་པར་འགྱུར་རོ༔ མེ་ཏོག་དཀར་པོའི་མཆོད་ན་རྒྱལ་པོ་ལ་སོགས་པས་ཕམ་པར་མི་འགྱུར་རོ༔ རྒྱལ་པོ་ལ་སོགས་པར་འགྲུབ་པར་འགྱུར་རོ༔ རྒྱལ་པོ་དང་བློན་པོ་དང་བཅས་པ་བདག་གིས་དབང་དུ་འདུས་པར་འགྱུར་རོ༔ ཞེས་གསུངས་པའི་ཕྱིར་ནོར་སྒྲུབ་དང་དབང་སྡུད་ཀྱི་མཆོག་ཡིན་ལ་ཚེ་རིང་མཆེད་ལྔས་དངོས་གྲུབ་འབྱུང་ཚུལ་གཞུང་དུ་གསལ་ལྟར་ཀུན་གྱིས་ཤེས༔ ཚོགས་བདག་ཚེ་རིང་མ་ཞལ་སྦྱོར་བའི་སྒྲུབ་ཐབས༔ སྔར་ནས་གྲགས་ཆེ་ཞིང་མགོན་མང་ནང་དུ་ཡང་ཡོད༔ དེ་ཟབ་པའི་གནད་སྲིད་པ་གཏེར་ཁྱིམ་ནས་ཉང་གི་གཏེར་མ་ལས༔ ཕོ་དང་མ་སྦྲེལ་མོ་སྒྲུབ་ན༔ ནང་འཛིན་བྱེད་པའི་ཁྱི་མོ་འདྲ༔ འཁོར་ལ་འཆའ་ཞིང་གནོད་མི་ཚུགས༔ མོ་དང་མ་སྦྲེལ་ཕོ་སྒྲུབ་ན༔ སྐྱེས་པ་བུད་མེད་མེད་པ་འདྲ༔ དབང་དུ་མི་འདུས་ལས་མི་བྱེད༔ ཕོ་ནི་ཐབ་ཀྱི་རང་བཞིན་ཡིན༔ མོ་ནི་ཤེས་རབ་རང་བཞིན་ཡིན༔ ཐབས་དང་ཤེས་རབ་གཉིས་མེད་ཡིན༔ གང་ལ་བསམ་པ་འགྲུབ་པ་ཡིན༔ ཕོ་ཞེ་སྡང་ཆེ་བས་དགྲ་ལ་མྱུར༔ མོ་འདོད་ཆགས་ཆེ་བས་ལས་ཚན་ཆེ༔ མོ་ཡི་སྔགས་ཤམ་ཕོ་ལ་བཏགས་ན་ལས་ལ་མྱུར༔ ཏིལ་མར་རལ་གྲི་ངར་བཏབ་འདྲ༔ གང་ལ་བཏབ་ཀྱང་ཐོགས་པ་མེད༔ ཕོ་ཤམ་མོ་ལ་
བཏགས་ན་ལས་ཀྱིམཐུ་བཙན་ཆེ༔ ཅིས་ཀྱང་མི་བཟློག་ཐོག་དང་འདྲ༔ ཕོ་མོ་སྦྲེལ་མར་བསྒྲུབ་པ་འདི༔ རྣོ་ལ་ངར་གྱིས་བཏབ་པ་ཡིན༔ གདུག་པ་དབར་དང་བཅས་པ་ཡིན༔ གང་ལ་བཏབ་ཀྱང་ཐོག་པ་མེད༔ ཅེས་གསུངས་སོ༔ ཚོགས་བདག་ལས་བྱང་སྒྲུབ་ཐབས་ཆ་ཚང་འདི༔ ཚོགས་ཀྱི་བདག་པོའི་ལྷ་བདག་བཀའ་བབས་ཅན༔ སྤྲུལ་པའི་ཆོས་རྒྱལ་རཏྣའི་མཚན་ཅན་གྱི༔ གསུང་གིས་བསྐུལ་ནས་ཕན་ཐོག་ཆེ་སྙམ་ཡང་༔ ཆོས་བདག་ཊཱཀྐིའི་བཀའ་རྒྱ་ཆེ་རྟགས་མཐོང་༔ གསར་རྙིང་གཏེར་ཁ་ཀུན་ནས་བསྡུ་དགོས་ཕྱིར༔ བསྐང་ཐུང་བརྒྱ་རྩ་མཎྜལ་བརྒྱ་རྩ་དང་༔ མཆོད་བསྟོད་ཕུལ་ནས་ཕྱག་འཚལ་གསོལ་བཏབ་ཚེ༔ གནང་བ་ཐོབ་རྟགས་ཉམས་དང་རྨི་ལམ་མཚམས༔ ཕྲིན་ལས་དར་རྒྱས་ཆེ་བའི་ལུང་བསྟན་བྱུང་༔ བཀའ་གཏེར་གཉིས་ཀའི་དབང་རྒྱུན་ཐོབ་པའི་ཕྱིར༔ གསར་རྙིང་ཀུན་གྱི་དོན་བསྡུས་ཟབ་པར་བྱས༔ ཚེ་རིང་མ་ཡི་སྤྱན་འདྲེན་བསྟོད་བསྐུལ་སོགས༔ ར་ཤག་གཏེར་སྟོན་གཏེར་ལས་འབྱུང་བ་ལྟར༔ རྗེ་བཙུན་མི་ལའི་གསུང་རྒྱུན་ལ་བརྟེན་ནས༔ ཞི་བ་འོད་དང་ངན་རྫོང་རས་པས་མཛད༔ ཚིག་ཟུར་ཅུང་ཟད་བསྒྱུར་འོས་མ་གཏོགས་པ༔ གཞུང་ཚིག་རྙིང་པ་ཡིན་པས་བྱིན་རླབས་ཆེ༔ གནམ་ཆོས་གཙོར་བྱས་བསྒྲིགས་ཆོག་གསར་བའི་ཕྱིར༔ གཏེར་གསར་རྣམས་ལ་གཏེར་སྒྲུབ་དགོས་པ་ལྟར༔ ཉེར་གཅིག་འགྲུབ་སྦྱོར་ཉིན་པར་དབུ་བརྩམས་ནས༔ ཞག་དགུའི་བར་དུ་གསོལ་མཆོད་བསྙེན་པ་བྱས༔ དེ་ཚེ་ཉམས་དང་རྨི་ལམ་རྟགས་མཚན་གསལ༔ གནམ་
ཆོས་ཚོགས་བདག་སྒྲུབ་ཐབས་རྒྱས་བསྡུས་གཉིས༔ བདག་གི་ཐུན་མོང་མིན་པའི་ཆོས་སྐལ་ཏེ༔ ཆོས་བདག་རཱ་ག་ཨ་སྱ་ཡིན་གསུངས་ཕྱིར༔ བསྟན་དང་འགྲོ་ལ་ཕན་པའི་བསམས་པས་བྲིས༔ འོན་ཀྱང་འགལ་འཁྲུལ་ཉེས་པའི་ཆ་མཆིས་ན༔ ཚོགས་བདག་ཡབ་ཡུམ་འཁོར་དང་བཅས་ལ་བཤགས༔ དགེ་བས་འདི་ཡི་ཆོ་ག་སུས་བཏོན་པ༔ བཀྲ་ཤིས་བདེ་ལེགས་ཕུན་སུམ་ཚོགས་པར་ཤོག༔ ཞལ་དྲོ༔ ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།