གནམ་ཆོས་སྲིན་མགོན་ཐོད་ཕྲེང་པའི་གསོལ་ཁ།
གནམ་ཆོས་སྲིན་མགོན་ཐོད་ཕྲེང་པའི་གསོལ་ཁ། དམར་གཏོར་ཤ་ཁྲག་གིས་བརྒྱན་པ་འབྲུ་གསུམ་གྱིས་བྱིན་རླབས་ཏེ། ཨོཾ་ཨཱཿཧཱུྃ། ཧཱུྃ། རྡོ་རྗེ་སྲིན་མགོན་སྐུ་མདོག་ནག །ཞལ་གཅིག་ཕྱག་གཉིས་གཅེར་བུ་ལ། །མི་ལྤགས་བེར་ནག་སྐུ་ལ་གསོལ། །ཞལ་གདངས་ལྗགས་འདྲིལ་མཆེ་བ་གཙིགས། །གཡས་པས་ཐོད་དབྱུག་གཡོན་བྷནྡྷ། །ཞབས་གཉིས་པད་ཉིར་བསྒྲད་དེ་བཞུགས། །དེ་ཡི་གཡོན་དུ་ཡུམ་དམར་མོ། །ཞལ་གཅིག་ཕྱག་གཉིས་གཅེར་བུ་ལ། །མི་ལྤགས་དྲོན་མོ་སྐུ་ལ་གསོལ། །གཡས་པས་རལ་གྲི་ཤང་ལང་སྟེ། །།གཡོན་པས་བྷན་དམར་ཞལ་དུ་བསྟབ། །པདྨ་ཉི་མའི་གདན་ལ་ནི། །བཻ་རོའི་སྟེང་དུ་དགྱེས་པར་བཞུགས། །སྲིན་མགོན་ཐོད་ཕྲེང་ཡབ་ཡུམ་ནི། །སྲིན་ཡུལ་ལང་ཀ་སྤུ་རི་དང་། །འཕྲུལ་སྣང་ར་མོ་ཆེ་སོགས་ནས། །འདིར་གཤེགས་དགྲ་བགེགས་གདན་ལ་བཞུགས། །སྲོང་བཙན་པདྨའི་བཀའ་བཞིན་དུ། །ཕྲིན་ལས་གང་བཅོལ་མྱུར་དུ་སྒྲུབས། །དམ་རྫས་སྨན་གཏོར་རཀྟ་དང་། །ཕྱི་ནང་གསང་བའི་མཆོད་པ་བཞེས། །དགྲ་དང་བགེགས་ཀྱི་བར་ཆད་ཟློག །ལྟས་ངན་ཆོ་འཕྲུལ་དགྲ་ལ་ཐོངས། །ཕ་རོལ་
དགྲ་སྡེའི་སྟོབས་དཔུང་ནོན། །མཚོན་ཆའི་ཆར་གྱིས་བསྟན་དགྲ་སྒྲོལ། །དགྲ་བོའི་མི་ནོར་ཚེ་བསོད་ནམས། །སྲིན་པོ་བྱེ་བའི་ཟ་སྐལ་མཛོད། །བྷ་ག་ཝ་ཏེ་ཏིཥཱ་རཀྟ་རཀ་མོ་ས་མ་ཡ་ཧཱུྃ་ཛཿཛཿ ཨི་དཾ་བ་ལིཾ་ཏ་ཁཱ་ཧྲཱི༔ ཞེས་པ་སྒྲུབ་གཞུང་ནས་བཏོན་རཱ་ག་ཨ་སྱས་བཀོད་པ་ལ་འགལ་བར་གྱུར་ན་ཡབ་ཡུམ་གཉིས་ལ་བཤགས། དགེ་བས་བསྟན་པ་རིན་པོ་ཆེ་འཕེལ་བའི་རྒྱུར་གྱུར་ཅིག། །།