ནོར་ལྷ་སྤྱི་གཏོར་བཅའ་བའི་ཕྱག་ལེན།
འཕགས་པ་ཛཾ་ལྷའི་ཚོགས་ལ་ཕྱག་འཚལ་ནས། །ནོར་ལྷ་སྤྱི་གཏོར་བཅའ་བའི་ཕྱག་ལེན་བྲི། །ཡེ་ཤེས་པ་ལ་བདུད་རྩི་ཆོས་སྨན་དང་། །གསེར་སྐྱེམས་བསྲེ་བ་མཆོག་ཏུ་ཟབ་པར་གསུངས། །གྲུབ་བཞི་སུམ་བརྩེགས་རི་རབ་གཟུགས་ལ་ནི། །རྒྱས་པར་འདོད་ན་མར་སྐུད་དུང་ཕྲེང་འཐེན། །དེ་སྟེང་ཟླུམ་སྐོར་སྤྲོ་ན་མར་སྐུད་ཀྱིས། །དྲ་བ་རིས་བྱ་དེ་སྟེང་གཏོར་མ་ནི། །ནོར་བུའི་དབྱིབས་ལ་ཟུར་གཉིས་ཟུར་མི་རྣོ། །གཏོར་མདོག་དམར་པོ་བྱ་ཞིང་ཟུར་གཉིས་ནས། །ནང་མར་མར་སྐུད་ཕྱི་མར་མེ་རི་བྱ། །མདུན་རྒྱབ་གཉིས་་ལ་ནོར་བུས་བརྒྱན་བྱ་ཞིང་། །པད་འདབ་བཞི་ལ་མར་གྱི་མེ་ཏོག་ནི། །འདབ་མ་བཞི་རེ་བརྒྱབས་པས་དཀྱིལ་འཁོར་ཚང་། །རྩི་ཤིང་ནོར་བུ་ཉི་ཟླ་མེ་ཏོག་དང་། །ཟུར་ཤིང་རྣམས་ལ་ནོར་བུ་མེ་ཏོག་བརྒྱན། །ཟུར་གཉིས་མར་རྒྱན་མེ་ཏོག་ཕྲེང་བ་དང་། །མར་ཐུད་རིལ་བུ་གྲངས་མེད་བཙུགས་པ་རྣམས། །འབྲུ་དང་ནོར་བུའི་ཆར་པ་འབེབས་པའི་ཚུལ། །ཛཾ་ལྷ་རིགས་དགུ་ནོར་རྒྱུན་མ་ལ་སོགས། །ནོར་ལྷའི་རིགས་སུ་གྱུར་པ་ཐམས་ཅད་དང་། །འཇའ་ཚོན་ལུགས་དང་གནམ་ཆོས་ལུགས་ལ་སོགས། །གཏོར་བསྔོས་གཡང་སྐྱབས་འདི་ལ་
འདོན་པས་ཆོག །རང་ལ་མཁོ་དང་གཞན་ལ་ཕན་པའི་ཕྱིར། །རཱ་གས་མཛད་ལྟར་ཚིག་རྣམས་བསྡེབས་པ་དགེ །སརྦ་མངྒ་ལཾ།།