ནོར་ལྷ་སྤྱི་ཡི་གཏོར་མ།
དེ་ནས་ནོར་ལྷ་སྤྱི་ཡི་གཏོར་མ་ནི། །ཟླུམ་ལེབ་དཀར་པོའི་སྟེང་དུ་ནོར་བུའི་དབྱིབས། །དེ་ཉིད་པད་འདབ་ཀྱིས་ནི་བསྐོར་བར་བྱ། །དབང་སྡུད་ཡིན་ཕྱིར་གཏོར་མའི་མདོག་ནི་དམར། །མདུན་དུ་མེ་ཏོག་པད་འདབ་བཅུ་དྲུག་པ། །ནོར་ལྷ་ཕོ་བརྒྱད་མོ་བརྒྱད་དཀྱིལ་འཁོར་ཚང། །ནང་རིམ་མར་སྐུད་ཟུར་གཉིས་མར་གྱིས་ཤན། །སེན་མོས་བཤད་པ་ནོར་བུ་མེ་རི་མཚོན། །ཟུར་གཉིས་མར་རྒྱུན་མང་དུ་བཙུགས་པ་ལ། །མར་ཐུད་རིལ་བུ་མེ་ཏོག་ཕྲེང་བས་བརྒྱན། །རིལ་བུ་རྣམས་ནི་ནོར་བུའི་ཆར་འབེབས་ཚུལ། །མེ་ཏོག །དཔག་བསམ་ཤིང་དང་སྐྱེད་མོས་ཚལ། །འདི་ལ་ཤ་རྒྱན་རུང་དང་མི་རུང་བའི། །ལྷ་གྲངས་མང་ཕྱིར་ཤ་རྒྱན་མི་བྱའོ། །འདི་ནི་སྔོན་གྱི་སྔགས་རྒན་ཐམས་ཅད་ཀྱིས། །གཡང་སྐྱབས་གཏོར་མའི་ཕྱག་ལེན་རྙིང་པ་ཡིན། །འདི་ལ་ཛཾ་ལྷ་རིགས་དགུ་ནོར་རྒྱུན་མ། །དེ་སོགས་ནོར་ལྷའི་རིགས་གྱུར་ཀུན་ལ་བསྔོ། །འཇའ་ཚོན་ལུགས་དང་གནམ་ཆོས་ལུགས་ལ་སོགས། །འགྲུབ་སྦྱོར་ཡོད་དུས་གཡང་སྐྱབས་འདོན་པ་ན། །འདིས་ཆོག་ལོགས་སུ་བཅའ་སོགས་མི་དགོས་སོ། །ད་ནི་བཞི་བཅུ་ཁ་རལ་སུམ་ཅུར་ཉེ། །སུམ་ཅུ་པ་ལ་མུ་གེའི་བསྐལ་པ་འབྱུང་། །
གསུངས་ཕྱིར་འདི་ཉིད་ཤིན་ཏུ་གལ་ཆེན་ཡིན། །ཞེས་པ་རཱ་ག་ཨ་སྱས་མཛད་པའོ།། །།སརྦ་མངྒ་ལཾ།། །།