རྣམ་སྲས་དམར་པོའི་མངའ་གསོལ།
རྣམ་སྲས་དམར་པོའི་མངའ་གསོལ་བཞུགས། བཻ། རི་རབ་བྱང་ཕྱོགས་ལྕང་ལོ་ཅན་གྱི་གནས། །རིན་ཆེན་སྣ་བདུན་བརྩེགས་པའི་གཞལ་ཡས་ན། །ཆོས་ཀྱི་སྲུང་མ་མགོན་པོ་རྣམ་ཐོས་སྲས། །འཁོར་བཅས་འདིར་གཤེགས་མངའ་གསོལ་མཆོད་པ་བཞེས། །ཉེར་སྤྱོད་བདུན་དང་འདོད་པའི་ཡོན་ཏན་ལྔ། །བཀྲ་ཤིས་རྫ་ས་རྟགས་བརྒྱད་དང་རིན་ཆེན་བདུན། །མཆོད་པའི་ལྷ་མོ་རིག་མ་བཅུ་དྲུག་དང་། །སྨན་གཏོར་རཀྟའི་མཆོད་པས་མངའ་གསོལ་ལོ། །རྟ་སྔོན་གསེར་གྱི་ཁྲབ་རྨོག་གདུགས་དང་བེར། །སྐུ་གཟུགས་མདའ་དར་གསེར་གཡུ་མན་ཤེལ་དང་། །གྲི་སྙིང་སྲོག་འཁོར་མདུང་དམར་རིན་ཆེན་འབྲུ། །དངོས་འབྱོར་ཡིད་སྤྲུལ་མཆོད་པས་མངའ་གསོལ་ལོ། །དཀར་གསུམ་མངར་གསུམ་ཞུན་མར་ཇ་ཆང་ཕུད། །དར་ཟབ་སྤྱན་གཟིགས་སྣ་ཚོགས་ཟས་ཀྱི་ཕུད། །སྤོས་དཀར་དྲི་བཟང་ཞུན་མར་དུད་སྤྲིན་གྱིས། །རྣམ་སྲས་འཁོར་བཅས་མཆོད་ཅིང་མངའ་གསོལ་ལོ། །འདས་པའི་སངས་རྒྱས་བཅོམ་ལྡན་རིན་ཆེན་མང་། །མ་འོངས་དུས་ན་བདེ་གཤེགས་རིན་ཆེན་གདུགས། །རྣམ་སྣང་ཐུགས་སྤྲུལ་དོན་ལ་སངས་རྒྱས་པ། །བསླུ་མེད་རྟེན་
གྱི་བསྐྱབ་ཏུ་མངའ་གསོལ་ལོ། །ས་བཅུའི་དབང་ཕྱུག་སེམས་དཔའ་རིན་ཆེན་མང་། །འཇིག་རྟེན་སྐྱོང་བའི་ཚུལ་བཟུང་རྣམ་ཐོས་སྲས། །འགྲོ་བའི་མགོན་གྱུར་འགྲོ་ལ་བུ་ལྟར་སྐྱོང་། །རྣལ་འབྱོར་བདག་གི་མགོན་དུ་མངའ་གསོལ་ལོ། །རྡོ་རྗེ་འཆང་དང་ཤཱཀྱའི་རྒྱལ་པོ་ཡིས། །དབང་བསྐུར་དམ་བཞག་བསྟན་པའི་གཉེར་གཏད་པའི། །ཆོས་ཀྱི་སྲུང་མ་མགོན་པོ་རྣམ་ཐོས་སྲས། །རྣལ་འབྱོར་བདག་གི་སྲུང་མར་མངའ་གསོལ་ལོ། །ལྷ་མིའི་རྒུད་པ་སེལ་བར་དམ་བཅས་ཕྱིར། །ཐུབ་བསྟན་གཙུག་ལག་དགེ་འདུན་ཐམས་ཅད་ཀྱི། །སྦྱིན་བདག་དཀོར་གྱི་མཛོད་འཆང་རྣམ་ཐོས་སྲས། །བདག་གི་དཀོར་བདག་མཆོག་ཏུ་མངའ་གསོལ་ལོ། །ཡབ་ནི་ལྷ་ཆེན་ཡུམ་ནི་ལྷ་མོ་དཔལ། །སྲས་མཆོག་ལྔ་བརྒྱ་བཙུན་མོ་ལྔ་བརྒྱ་དང་། །ཛཾ་ལྷ་རིགས་ལྔ་མཆོག་གྱུར་གར་མཁན་མཆོག །ཡབ་ཡུམ་སྲས་དང་བཅས་ལ་མངའ་གསོལ་ལོ། །གནོད་སྦྱིན་ཕོ་བརྒྱད་མོ་བརྒྱད་ཀླུ་ཆེན་བརྒྱུད། །གནོད་སྦྱིན་སྡེ་དཔོན་ཆེན་པོ་ཉི་ཤུ་བརྒྱད། །རྒྱལ་པོ་དམག་དཔོན་ཆོས་སྤྱན་སོ་གཉིས་སོགས། །བཀའ་ཡི་བློན་པོར་བཅས་ལ་མངའ་གསོལ་ལོ། །ལྗོངས་ཆེན་གནས་པའི་གནོད་
སྦྱིན་བཅུ་དྲུག་དང་། །ཡུལ་འཁོར་སྐྱོང་བ་ལྔ་བརྒྱ་སྲིན་མོ་བརྒྱད། །འཕྲོག་མ་བུར་བཅས་གནོད་སྦྱིན་བྱེ་བ་འབུམ། །འཁོར་གྱི་ཚོགས་དང་བཅས་ལ་མངའ་གསོལ་ལོ། །རྣལ་འབྱོར་བདག་དང་བརྒྱུད་པར་བཅས་པ་ཡི། །ཚེ་དང་བསོད་ནམས་ལོངས་སྤྱོད་མངའ་ཐང་བཅས། །དར་ཞིང་རྒྱས་པའི་གཉེར་ཁ་ཁྱོད་ལ་གཏད། །མ་གཡེལ་ལས་མཛོད་རྒྱལ་ཆེན་རྣམ་ཐོས་སྲས། །སྔོན་གྱི་ཐུགས་བསྐྱེད་དམ་ཚིག་རྗེས་དགོངས་ལ། །ཚེ་དང་བསོད་ནམས་ལོངས་སྤྱོད་སྙན་དང་གྲགས། །ཡར་ངོའི་ཟླ་བཞིན་འཕེལ་བའི་ཕྲིན་ལས་མཛོད། །མཆོད་པ་འཐོར་ཞིང་། གསོལ་ལོ་མཆོད་དོ་གནོད་སྦྱིན་གྱི་རྒྱལ་པོ་ཆེན་པོ་རྣམ་ཐོས་སྲས། །ཡབ་ལྷ་ཆེན་དབང་ཕྱུག་ཆེན་པོ།། ཡུམ་མ་གཅིག་དཔལ་གྱི་ལྷ་མོ། སྲས་མཆོག་ལྔ་བརྒྱ། བཙུན་མོ་ལྔ་བརྒྱ། སྲས་ཛཾ་ལྷ་རིགས་ལྔ། སྲས་མཆོག་གར་མཁན་མཆོག །བློན་པོ་ཆེན་པོ་རྟ་བདག་ཡབ་ཡུམ་བརྒྱད། ཀླུ་ཆེན་པོ་བརྒྱད། སྡེ་དཔོན་ཉི་ཤུ་རྩ་བརྒྱད། དམག་དཔོན་ཆོས་སྤྱན་སོ་གཉིས། ལྗོངས་ཆེན་གནས་པ་བཅུ་དྲུག །ཡུལ་འཁོར་སྐྱོང་བ་ལྔ་བརྒྱ། སྲིན་མོ་ཆེན་པོ་བརྒྱད། འཕྲོག་མ་
མ་བུ་ལྔ་བརྒྱ། གནོད་སྦྱིན་བྱེ་བ་དྲུག་ཅུ་འཁོར་དང་བཅས་པ་ཁྱེད་རྣམས་ལ་གསོལ་ལོ་མཆོད་དོ། །གསོལ་ཞིང་མཆོད་པ་ལ་བརྟེན་ནས། རྣལ་འབྱོར་པ་བདག་དང་བསྲུང་བྱ་རྣམས་ཀྱི་ཚེ་དང་བསོད་ནམས་སྤེལ་ཅིག །དཔལ་དང་གྲགས་པ་སྒྲུབས་ཤིག །མངའ་ཐང་དང་བསོད་ནམས་སྐྱེད་ཅིག །ཁམས་གསུམ་དབང་དུ་སྡུས་ཤིག །སྲིད་གསུམ་བྲན་དུ་ཁོལ་ཅིག །འདོད་དོན་སྣ་ཚོགས་ཀྱི་ཆར་ཕོབ་ཅིག །ཡིད་ལ་རེ་བ་ཐམས་ཅད་སྐོངས་ཤིག །བང་མཛོད་འབྲུའི་དངོས་གྲུབ་སྩོལ་ཅིག །རྐང་བཞི་ཕྱུགས་ཀྱི་དངོས་གྲུབ་སྩོལ་ཅིག །རྨ་གཡང་ཟས་ཀྱི་དངོས་གྲུབ་སྩོལ་ཅིག །འཆི་མེད་ཚེ་ཡི་དངོས་གྲུབ་སྩོལ་ཅིག །དར་ཟབ་གོས་ཀྱི་དངོས་གྲུབ་སྩོལ་ཅིག །རིན་ཆེན་གསེར་གཡུའི་དངོས་གྲུབ་སྩོལ་ཅིག །བརྒྱུད་འཛིན་དར་ཞིང་རྒྱས་པའི་དངོས་གྲུབ་སྩོལ་ཅིག །ཡུལ་འཁོར་འབངས་ཀྱི་དངོས་གྲུབ་སྩོལ་ཅིག །གནས་གཞི་དགོན་གནས་ཀྱི་དངོས་གྲུབ་སྩོལ་ཅིག །རྟེན་གསུམ་ལྷ་ཆའི་དངོས་གྲུབ་སྩོལ་ཅིག །ཀྱེ། རྒྱལ་པོ་ཆེན་པོ་རྣམ་ཐོས་སྲས། །ཅི་རེ་ཁྱོད་ལ་རེའོ། །རྒྱལ་མཚན་དུ་ཁྱོད་ཕྱིར་རོ། །མགོན་དུ་ཁྱོད་བརྟེན་ནོ། །ལྷ་རུ་ཁྱོད་
མཆོད་དོ། །དཔུང་དུ་ཁྱོད་ཁུར་རོ། །ར་མདར་ཁྱོད་སྦྱིན་ནོ། །རྒྱལ་པོ་ཆེན་པོ་རྣམ་ཐོས་སྲས་སྐུ་མ་གཡེལ་ཅིག །གསུང་མ་གཡེལ་ཅིག །ཐུགས་མ་གཡེལ་ཅིག །ལེ་ལོ་སྙོམས་ལས་མ་མཛད་ཅིག །བཀའ་དང་དམ་ལས་མ་འདའ་བར། ད་ལྟ་ཉིད་དུ་ཕྲིན་ལས་རྒྱ་ཆེན་པོ་མཛོད་ཅིག །ཅེས་ལས་བྱང་ནས་མངའ་གསོལ་གྱི་ཚིག་ཟུར་དུ་ཕྱུང་བ་ལ་བརྟེན་ནས་བཅོ་ལྔའི་རྒྱལ་ཕུར་འཛོམ་དུས་སྔགས་འཆང་ཀརྨ་ཨ་རཱ་གས་ལེགས་པར་སྦྱར་བའོ། །མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།