རྣམ་སྲས་མངའ་གསོལ།
བཻ། འདས་པའི་སངས་རྒྱས་བདེ་གཤེགས་རིན་ཆེན་མང་། །མ་འོངས་སངས་རྒྱས་བཅོམ་ལྡན་རིན་ཆེན་གདུགས། །ད་ལྟ་རྣམ་པར་སྣང་མཛད་ཐུགས་ལས་སྤྲུལ། །བསླུ་མེད་སྐྱབས་ཀྱི་དམ་པའི་ཐུགས་དམ་བསྐང་། །གྲངས་མེད་གོང་ནས་མངོན་པར་སངས་རྒྱས་ཀྱང་། །འགྲོ་བའི་དོན་དུ་ས་བརྒྱད་སེམས་དཔའི་ཚུལ། །ཤཱཀ་ཐུབ་བྱེ་བ་ཕྲག་བརྒྱའི་བསྟན་པ་སྲུང། །མགོན་པོ་ངལ་བསོས་པོ་ཡི་ཐུགས་དམ་བསྐང་། །ལྷ་ཡི་གནས་སྲུང་ལྷ་མིན་གཡུལ་ངོ་ཟློག །གླིང་བཞི་གླིང་ཕྲན་ཀུན་གྱི་བདག་པོ་སྟེ། །གཏེར་ཆེན་བྱེ་བ་བརྒྱ་སྟོང་མངའ་བདག་པོ། །གཏེར་བདག་ལུས་ངན་པོ་ཡི་ཐུགས་དམ་བསྐང་། །རྒྱ་ནག་མ་ཧཱ་རཱ་ཛའི་དཀོར་སྲུང་མཛད། །བོད་དུ་གྲུ་གུའི་རྒྱལ་པོས་ཁྱོད་མཆོད་པས། །བོད་དང་གྲུ་གུའི་མ་དར་ལྷ་རུ་དར། །དཀོར་བདག་གནས་སྲུང་ཆེན་པོའི་ཐུགས་དམ་བསྐང་། །ཡབ་ནི་དབང་ཕྱུག་ཡུམ་ནི་ལྷ་མོ་དཔལ། །གར་མཁན་མཆོག་དང་འཛམ་ལྷ་སེར་ནག་སོགས། །སྲས་དང་སྲས་མོ་ལྔ་བརྒྱ་ལྔ་བརྒྱ་རེ། །ཡབ་ཡུམ་སྲས་དང་བཅས་པའི་ཐུགས་དམ་བསྐང་། །མ་ཏྲག་བཞི་དང་པདྨའི་གཙུག་ཕུད་མ། །གནོད་
སྦྱིན་མོ་བརྒྱད་ལྷ་མོ་ཆེན་མོ་བརྒྱད། །ཟས་གོས་ནོར་གྱི་ལྷ་མོ་མཆེད་གསུམ་སོགས། །གཏེར་བདག་གནོད་སྦྱིན་མ་ཚོགས་ཐུགས་དམ་བསྐང་། །ནོར་ལྷ་མཆེད་བརྒྱད་ཀླུ་བརྒྱད་ཡུམ་དང་བཅས། །སྡེ་དཔོན་ཉེར་བརྒྱད་མཐུ་ཆེན་སུམ་ཅུ་གཉིས། །ལྗོངས་གནས་བཅུ་དྲུག་ཡུལ་སྐྱོང་ལྔ་བརྒྱའི་ཚོགས། །བློན་པོ་ཚོགས་དང་བཅས་པའི་ཐུགས་དམ་བསྐང་། །གནོད་སྦྱིན་འཁོར་ཚོགས་བྱེ་བ་བདུན་འབུམ་དང་། །ལྷ་ཀླུ་ལྷ་མིན་དྲི་ཟ་མིའམ་ཅི། །གཞན་གྱིས་མི་ཐུབ་དྲག་ཤུལ་སྟོབས་ལྡན་པའི། །སྡེ་ཆེན་དཔུང་དང་བཅས་པའི་ཐུགས་དམ་བསྐང་། །མགོན་པོ་འཁོར་བཅས་ཐུགས་དམ་བསྐང་བའི་རྫས། །གླིང་བཞི་རི་རབ་ལྷ་མིའི་ལོངས་སྤྱོད་ཚོགས། །བཀྲ་ཤིས་རྫས་རྟགས་རྒྱལ་སྲིད་རིན་ཆེན་བདུན། །བློ་ཡིས་བླངས་དང་ཡིད་ཀྱིས་སྤྲུལ་ཏེ་འབུལ། །ཕྱི་ནང་གསང་བའི་རྟེན་སྒྲུབ་བསྐང་བའི་རྫས། །དཀར་གསུམ་མངར་གསུམ་འབྲུ་སྣ་རིན་པོ་ཆེ། །དམ་རྫས་དཔལ་གྱི་གཏོར་ཆེན་འབར་བ་སོགས། །མཐུན་པའི་དམ་རྫས་དུ་མས་ཐུགས་དམ་བསྐང་། །འགལ་འཁྲུལ་ཉམས་ཆག་གང་མཆིས་འགྱོད་པས་བཤགས། །ཁྱེད་ཀྱི་ཐུགས་དམ་གཉན་པོ་བསྐངས་གྱུར་
ནས། །བདག་སོགས་འགྲོ་ཀུན་བསོད་ནམས་ཚོགས་རྫོགས་ཏེ། །འཛད་མེད་རིན་ཆེན་གཏེར་ལ་མངའ་བརྙེས་ནས། །འཕགས་པ་མཆོག་དང་འགྲོ་བ་སྐྱོབ་པ་ལ། །བདེ་གཤེགས་རིན་ཆེན་མང་དང་མཉམ་པར་ཤོག །ཅེས་པ་འདི་བླ་མ་རིན་པོ་ཆེ་རི་པ་བག་ཡོད་པས་རྟ་བཟང་པོའི་མགོ་གཏད་འབུལ་བ་མང་པོ་དང་བཅས་རྐང་གཏད་མཇལ་དུ་བྱུང་བས་རྣམ་སྲས་ཀྱི་བསྐང་ཐུང་གཏོར་ཆོག་ལ་སྦྱར་རྒྱུ་གཅིག་མཛོད་ལ་འགྲིམས་སུ་བྱུང་བ་ལ་གལ་ཆེ་ཞེས་ནན་ཏན་མཛད་པ་བཞིན་ཨ་རྭགས་བྲིས་ཏེ་ཕུལ་བའོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།