རྟ་ཕག་ཡིད་བཞིན་ནོར་བུ་ལས་གནོད་སྦྱིན་ཕག་གདོང་མཆེད་ལྔའི་ལས་བྱང་།
རྟ་ཕག་ཡིད་བཞིན་ནོར་བུ་ལས༔ གནོད་སྦྱིན་ཕག་གདོང་མཆེད་ལྔའི་ལས་བྱང་བཞུགས་སོ༔
ན་མོ་རྒྱ་གྲི་ཝ་ཡེ༔ རྟ་མཆོག་ཡིད་བཞིན་ནོར་བུ་ལ༔ ཕྱག་འཚལ་བཀའ་གནང་བྱིན་གྱིས་རློབས༔ གནོད་སྦྱིན་ཕག་གདོང་སྒྲུབ་པའི་ཐབས༔ དཀྱིལ་འཁོར་རྫས་སོགས་མ་འཛོམས་ན༔ གཏོར་མ་ལ་བརྟེན་སྒྲུབ་པ་ནི༔ ཟངས་སོགས་རིན་ཆེན་སྣོད་ནང་དུ༔ ཟན་རིགས་གྲུ་བཞི་སྒྲོམ་བུའི་དབྱིབས༔ ནང་དུ་འབྲུ་སྣ་ཟས་ཕུད་བླུགས༔ དེ་སྟེང་ཟན་ལེབ་གྲུ་བཞི་དང་༔ ཟླུམ་པོ་ཟླ་གམ་གྲུ་གསུམ་བརྩེགས༔ དེ་ཡི་སྟེང་དུ་ཕྱོགས་བཞི་རུ༔ སྨན་ཏིང་སྟེང་དུ་ནོར་བུ་བཞག༔ ཕྱོགས་བཞི་དབུས་ལྔའི་མར་རྒྱན་ནི༔ རྡོ་རྗེ་རིན་ཆེན་པདྨ་དང་༔ རྒྱ་གྲམ་འཁོར་ལོའི་གཟུགས་སུ་བྱ༔ གཏོར་མ་དབང་རྫས་འབྲི་མོག་བྱུག༔ ཟུར་བཞིར་ཤ་ཕུད་གཙང་མས་བརྒྱན༔ ཐུད་དང་ཆུར་བ་ཟས་ཕུད་དང་༔
ཀླུམ་མམ་ཡང་ན་ཆང་ཕུད་བྲན༔ སྒྲུབ་རྫས་དཀྱིལ་འཁོར་མཆོད་པ་ཚང་༔ རྒྱུན་ཁྱེར་གཏོར་ཆོག་འདོན་པ་ལ༔ གཏོར་མ་ནོར་བུའི་དབྱིབས་འདྲས་ཆོག༔ བདག་ཉིད་མོས་པའི་ལྷར་གསལ་ཏེ༔ འདི་ལྟར་གྱེར་བསྒོམས་བྱས་པས་འཐུས༔ འགྲོ་ཀུན་བདེ་དང་ལྡན་གྱུར་ཅིག༔ སྡུག་བསྔལ་དག་དང་བྲལ་བར་ཤོག༔ བདེ་དང་རྟག་ཏུ་མི་འབྲལ་ཞིང་༔ ཆོས་ཀུན་མཉམ་ཉིད་རྟོགས་པར་ཤོག༔ འགྲོ་བའི་དབུལ་ཕོངས་བསལ་བ་དང་༔ བླ་མེད་བྱང་ཆུབ་ཐོབ་པའི་ཕྱིར༔ བདག་གིས་ལྷ་མོ་བསྒྲུབ་པར་བྱ༔ མདུན་དུ་བྷྱ་སེར་ཡོངས་གྱུར་ལས༔ རིན་ཆེན་ཁང་པ་ཤིན་ཏུ་མཛེས༔ འདོད་པའི་རྒྱལ་པོས་གང་བར་གྱུར༔
དེ་སྟེང་ཨ་ལས་ཟླ་བའོ༔ དེ་ཡི་སྟེང་དུ་ཡི་གེ་བཾ༔ དམར་པོ་གུར་གུམ་ལྟ་བུའོ༔ དེ་ལས་གྱུར་པའི་གནོད་སྦྱིན་མོ༔ གསེར་གྱི་མདོག་འདྲ་གཡས་གྲི་གུག༔ གཡོན་པས་ཐོད་ཁྲག་ལེགས་བསྣམས་ཤིང་༔ ཁ་ཊཾ་ག་ལ་རབ་ཏུ་འཁྱུད༔ ཕག་གི་གདོང་ཅན་མུ་ཏིག་བརྒྱན༔ རིན་ཆེན་སྣ་ཚོགས་རྒྱན་གྱིས་སྤྲས༔ རང་འདྲ་མཆེད་བཞི་དང་བཅས་གསལ༔ ཐུགས་ཀའི་ཛཾ་ཡིག་འོད་ཟེར་གྱིས༔ ཡེ་ཤེས་སེམས་དཔའ་སྤྱན་དྲངས་ཏེ༔ མདུན་གྱི་ལྷ་ལ་ཐིམ་པར་གྱུར༔ ཧཱུྃ༔ བྱང་ཕྱོགས་རིན་ཆེན་བཀོད་པའི་ཞིང་སྟོབས་ཆེན་༧ གྱད་རྣམས་འདུ་བའི་གནས༔ རིན་ཆེན་བཀོད་པ་ཞེས་བྱའི་གླིང་༔ དེར་གནས་རིན་ཆེན་གཏེར་གྱི་བདག༔ གནོད་སྦྱིན་བུ་མོ་ཕག་གདོང་ཅན༔ མཆེད་ལྔ་དད་པས་སྤྱན་འདྲེན་ན༔ ད་ལྟ་ཉིད་དུ་འདིར་བྱོན་ཅིག༔ པཾ་ལས་གྱུར་པའི་སྒྲོམ་བུའི་ནང་༔ རིན་ཆེན་སྣ་ལྔས་ཁེངས་པའི་སྟེང་༔ པདྨ་ཟླ་བའི་གདན་ལ་བཞུགས༔ སྔོན་ཚེ་བཅོམ་ལྡན་ཤཱཀ་ཐུབ་ཀྱིས༔ སེམས་ཅན་དབུལ་དང་ཉོན་མོངས་པ༔ དམ་ཆོས་དྲན་ཀྱང་མཐུན་རྐྱེན་དཀོན༔ དེ་ལ་ལོངས་སྤྱོད་བྱིན་ཅིག་གསུངས༔ དེ་ཚེ་ཁྱེད་ལྔས་ཞལ་བཞེས་པ༔ ཆོས་ཀྱི་
མཐུན་རྐྱེན་དཀོན་རྣམས་ལ་འདོད་པའི་ཡོན་ཏན་སྦྱིན་པར་བྱ༔ བྱམས་དང་སྙིང་རྗེ་ལྡན་པ་ལ༔ གསེར་དང་མུ་ཏིག་སྦྱིན་པར་བྱ༔ དགའ་བ་བཏང་སྙོམས། ལྡན་པ་ལ༔ དངུལ་དང་རིན་ཆེན་སྣ་ཚོགས་སྦྱིན༔ ཐུབ་པའི་རྗེས་སུ་འཇུག་རྣམས་ལ༔ འདོད་ཡོན་ཅི་འདོད་སྦྱིན་པར་བྱ༔ དེ་སྐད་དམ་བཅས་དྲན་མཛོད་ལ༔ བདག་གི་ལོངས་སྤྱོད་ཕུན་ཚོགས་མཛོད༔ ཨོཾ་བཛྲ་ཡཀཾ་དྷ་རི་ནི་བཛྲ་ས་མ་ཡ་ཛཿ ཛཿཧཱུྃ་བཾ་ཧོཿ ཏིཥྛ་ལྷན༔ ས་མ་ཡ་ཧོ༔ ཧཱུྃ༔ གཏེར་བདག་གནོད་སྦྱིན་ཕག་གདོང་མ༔ འཇིག་རྟེན་སེམས་ཅན་གྲངས་འདས་པར༔ ཚེ་ཐུང་ནད་མང་དབུལ་ཕོངས་དང་༔ དམ་ཆོས་མཐུན་རྐྱེན་དཀོན་པ་རྣམས༔ སྐྱོབ་མཛད་མཆེད་ལྔར་ཕྱག་འཚལ་ལོ༔ དངོས་འབྱོར་ཡིད་ཀྱིས་རྣམ་སྤྲུལ་པའི༔ མེ་ཏོག་བདུག་སྤོས་མར་མེ་དྲི༔ ཞལ་ཟས་རོལ་མོ་རིན་ཆེན་ལྔ༔ གཏེར་སྒྲོམ་གསེར་དངུལ་བུམ་པ་དང་༔ བསེ་ཟངས་ར་ཡི་གའུ་དང་༔ གསེར་དང་ཙན་དན་བྱང་བུ་དང་༔ མཚལ་དཀར་དྲི་བཟང་ཙན་དན་དམར༔ འབྲུ་སྣ་ཟས་ཕུད་མཐུན་རྫས་འབུལ༔ ཧཱུྃ་ལས་རིན་ཆེན་སྣོད་ནང་དུ༔ གཏོར་མ་དཀར་གསུམ་ཤ་དང་
ཆང་༔ ཁཾ་ལས་བདུད་རྩིའི་རྒྱ་མཚོར་གྱུར༔ ཨོཾ་ཨཱཿཧཱུྃ་གིས་བྱིན་བརླབས་པས༔ ཤིན་ཏུ་མདངས་ལྡན་ཁ་དོག་གསལ༔ གནོད་སྦྱིན་མོ་ཡིས་གསོལ་བར་གྱུར༔ གཏོར་མས་མཉེས་ནས་འདོད་པའི་དོན༔ ཆར་རྒྱུན་ལྟ་བུར་སྟེར་བར་གྱུར་ཨོ་ཨཱཧཱུྃ༔ བཛྲ་ཡཀཾ་དྷ་རི་ནི་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧྲཱི༔ གསུམ་མམ་བདུན། ཨབྷཾ་སོགས། ཧཱུྃ༔ བྱང་ཆུབ་སེམས་མ་ཕག་གདོང་མ༔ ཡིད་བཞིན་ནོར་བུའི་ཕྲེང་བ་ལ༔ རང་འདྲ་མཆེད་བཞིས་བསྐོར་བ་མ༔ བྱང་གི་ཕྱོགས་ན་གནས་པ་མ༔ རིན་ཆེན་བཀོད་པའི་ཡུལ་བདག་ཟླུམ༔ རིན་ཆེན་གཏེར་ལ་མངའ་མཛད་མ༔ དམ་ཆོས་སྒྲུབ་པའི་སྦྱིན་བདག་མ༔ བྱང་སེམས་ལྡན་ལ་གསེར་སྦྱིན་མ༔ སྙིང་རྗེ་མུ་ཏིག་སྦྱིན་མཛད་མ༔ དགའ་བ་ལྡན་ལ་དངུལ་སྦྱིན་མ༔ བཏང་སྙོམས་རིན་ཆེན་ཀུན་སྦྱིན་མ༔ བཙུན་པར་ཅི་འདོད་ཀུན་སྦྱིན་མ༔ ལོ་ལེགས་འབྲུ་རྣམས་འཕེལ་མཛད་མི་ལུས་གསེར་དུ་བསྒྱུར་མཛད་མ༔ ཆུང་མ་ལྟ་བུར་གྲོགས་བྱེད་མ༔ གླིང་བཞིར་རྒྱལ་སྲིད་སྟེར་བྱེད་མ༔ འགྲོ་བའི་དབུལ་ཕོངས་སེལ་བྱེད་གསེར་མདོག་མུ་ཏིག་རྒྱན་ལྡན་མ༔ རབ་འཇིགས་ཕག་གི་ཞལ་མངའ་
མ༔ རིན་ཆེན་སྣ་ཚོགས་རྒྱན་ལྡན་མ༔ གྲི་གུག་ཐོད་པའི་ཕྱག་མཚན་མ༔ ཁ་ཊཾ་ག་ལ་འཁྱུད་པ་མ༔ ཟླ་བའི་སྟེང་ན་གར་མཛད་མ༔ གཟི་བརྗིད་ཉི་མ་འབུམ་ལྡན་མ༔ མྱུར་མགྱོགས་གློག་དང་མཚུངས་པ་མ༔ དགོས་འདོད་ཆར་ལྟར་འབེབས་མཛད་མ༔ ནོར་བདག་ལྷ་མོ་མཆེད་ལྔ་ལ༔ རབ་ཏུ་གུས་པས་ཕྱག་འཚལ་བསྟོད༔ མཆོད་སྦྱིན་གཏོར་མ་འདི་བཞེས་ལ༔ མི་ནད་ཡམས་ནད་ཞི་བ་དང་༔ སྐྲ་དཀར་གཉེར་མ་མེད་པ་རུ༔ ཚེ་ལོ་སྟོང་ཡང་ཐུབ་པར་མཛོད༔ གསེར་དངུལ་མུ་ཏིག་བྱི་རུ་གཡུ༔ བང་མཛོད་མྱུར་དུ་ཁེངས་པ་དང་༔ བསོད་ནམས་བསམ་མི་ཁྱབ་པ་དང་༔ འདོད་ཁམས་ལྷ་ཡི་དབང་པོ་དང་༔ མཉམ་པར་འགྱུར་བའི་ཕྲིན་ལས་མཛོད༔ འདོད་པ་ཐམས་ཅད་འགྲུབ་པ་དང་༔ ཡུལ་མི་ཐམས་ཅད་དད་ཅིང་བྱམས༔ གནོད་སྦྱིན་རྣམས་དང་ལྷ་མ་ཡིན༔ ནོར་གྱི་ཆར་པ་འབེབས་པར་མཛོད༔ སྒོ་ནོར་ཐམས་ཅད་ལེགས་སྐྱེས་ནས༔ འོ་མ་མེ་ཏོག་ལྟ་བུར་འབབ༔ ཤིན་ཏུ་མདངས་ལྡན་ཁ་དོག་མཚར༔ མི་དང་རྟ་ལ་གཡང་སྐྱེ་ཞིང་༔ འོད་མདངས་སྐར་མ་ལྟ་བུར་འཚེར༔ ལྷ་མི་གཉིས་ཀྱིས་བཀུར་བར་
མཛོད༔ རྟག་ཏུ་ལོ་ལེགས་འབྲུ་འཕེལ་ཞིང་༔ ཟས་ལ་ག་ཡང་ཆགས་ཟད་མེད་པར༔ འདོད་པའི་དོན་ཀུན་འགྲུབ་པར་མཛོད༔ བསྟན་དང་བདག་ལ་སྡང་བའི་དགྲ༔ འོན་ལོང་ལྐུགས་ཤིང་རེངས་བ་དང་མཛེ་ཡི་ནད་ཀྱིས་ཚར་གཅོད་མཛོད༔ དམ་བཅས་དམ་ཚིག་དྲན་མཛོད་ལ༔ བཅོལ་བའི་ཕྲིན་ལས་མ་གཡེལ་ཅིག༔ ཨོཾ་ཨཱཿཧཱུྃ་བཛྲ་ཡཀཾ་དྷ་རི་ནི་ཧཱུྃ་ཛཿ རཏྣ་སིདྡྷི་སྭཱ་ཧཱ༔ ལྷ་མོའི་ཐུགས་ཀར་ཟླ་བའི་སྟེང་༔ བཾ་མཐར་སྔགས་ཕྲེང་གཡོན་དུ་འཁོར༔ དེ་ཡི་ཐུགས་ཀའི་འོད་ཟེར་གྱིས༔ གཏེར་བདག་དབང་བའི་གནོད་སྦྱིན་རྣམས༔ བཀུག་སྟེ་ཁང་པ་དེ་ལ་བསྟིམ༔ ས་འོག་གཏེར་དང་འཕྲུལ་འཁོར་རྣམས༔ བར་ཆད་མེད་པར་སྟེར་བ་དང་༔ དགོས་འདོད་ཆར་ལྟར་འབེབས་པར་མཛོད༔ སྔགས་དེ་བརྒྱ་རྩ་ལ་སོགས་བཟླ༔ དེ་ནས་ལྷ་མོ་འོད་དུ་ཞུ༔ གཏེར་གྱི་ཕུང་པོའི་གནས་ཁང་བསྒོམ༔ བསྒྲུབ་པ་བྱ་ཚུལ་རྒྱུད་ལས་གསལ༔ འོན་ཀྱང་འདོན་ཆ་མི་གསལ་བས༔ བྲི་བར་རུང་ངམ་བརྟགས་པའི་ཚེ༔ ལྟས་བཟང་བྱུང་ཞིང་རྒྱུད་ལས་བསྡུས༔ རཱ་ག་ཨ་སྱས་སྨྲས་པ་ལྟར༔ ཉེ་གནས་ཀུན་དགས་ཡི་གེར་བཀོད༔ ཉེས་པ་མཆིས་བཤགས་དགེ་བ་དེས༔ ཆོས་མཐུན་གྲོགས་ལ་ཕན་པར་ཤོག༔ མངྒ་ལཾ།། །།