ནོར་ལྷ་འགའ་ཞིག་གསོལ་ཁ་གནམ་ཆོས་ནས་ཁོལ་དུ་ཕྱུང་བ།
ནོར་ལྷ་འགའ་ཞིག་གསོལ་ཁ་གནམ་ཆོས་ནས་ཁོལ་དུ་ཕྱུང་བ་བཞུགས་སོ༔
རང་ཉིད་ཡི་དམ་གང་རུང་བསྒོམ༔ གཏོར་མ༔ ཨ་ཀཱ་རོ་མུ་ཁཾ་སརྦ་དྷརྨ་ཎཾ་ཨ་དྱ་ནུཏྤནྣ་ཏྭཱཏ་ཨོཾ་ཨཱཧཱུྃ་ཕཊ་སྭཱ་ཧཱས་བྱིན་གྱིས་བརླབས༔ ཧཱུྃ༔ གནོད་སྦྱིན་རྡོ་རྗེ་འབར་བ་ནི༔ སྐུ་མདོག་ནག་པོ་ཞལ་གཅིག་པ༔ ཕྱག་གཉིས་སྐུ་ལ་བེར་ནག་གསོལ༔ གཡས་གཡོན་བེང་དང་ལྕགས་སྤར་བསྣམས༔ ཞབས་གཉིས་ཕྱེད་པའི་སྐྱིལ་མོས་བཞུགས༔ ཡུམ་དང་འཁོར་དང་བཅས་པ་རྣམས༔ ལྕང་ལོ་ཅན་ནས་སྤྱན་དྲངས་ནས༔ འདིར་གཤེགས་དགྱེས་པར་བཞུགས་ནས་ཀྱང་༔ དངོས་འབྱོར་ཡིད་སྤྲུལ་མཆོད་གཏོར་བཞེས་ཧཱུྃ༔ གནོད་སྦྱིན་རྡོ་རྗེ་བདུད་འདུལ་ནི༔ སྐུ་
མདོག་ནག་པོ་ཞལ་གཅིག་པ་ཕྱག་གཉིས་གཡས་པས་རུ་མཚོན་ཏེ༔ གཡོན་པས་ལྕགས་པར་རྟ་ནག་བཅིབས༔ སྐུ་ལ་བེར་ནག་བརྗིད་པ་གསོལ༔ དེ་ཡི་མདུན་དུ་ཀུན་སྡུག་མ༔ དམར་མོ་ཞལ་གཅིག་ཕྱག་གཉིས་མ༔ གཡས་པས་གྲི་གུག་གཡོན་ཐོད་ཁྲག༔ དེ་རྒྱབ་ལྷ་སྲིན་སྡེ་བརྒྱད་ཀྱང་༔ ལྷ་རྒྱལ་གཡག་གི་མགོ་ཅན་སོགས༔ མགོ་ཅན་བརྒྱད་ཀྱི་འཁོར་དང་བཅས༔ འདིར་གཤེགས་བརྒྱན་པའི་གཏོར་མ་བཞེས༔ འབྲུ་སྨན་རིན་ཆེན་སྐྱེམས་ཕུད་འབུལ༔ ལོངས་སྤྱོད་ནོར་གྱི་དངོས་གྲུབ་སྩོལ༔ ཁམས་གསུམ་དབང་དུ་འདུ་བ་དང་༔ ཚོང་
ལས་རྒྱལ་བའི་ཕྲིན་ལས་མཛོད༔ སྡང་བའི་དགྲ་བོ་མྱུར་དུ་སྒྲོལ༔ བཅོལ་བའི་ཕྲིན་ལས་འགྲུབ་པར་མཛོད༔ ཨོཾ་མ་ཧཱ་ཀཱ་ལ་བཛྲ་ཙིཏྟ་རཱ་ག་ཧཱུྃ་ཕཊ༔ ས་པཱ་རི་ཝཱ་ར་ཨི་དཾ་བ་ལི་ཏ་ཁཱ་ཧྲཱི༔ ཨ་མྲྀ་ཏ་སརྦ་པུཙྪ་ཁཱ་ཧྲཱི༔ བསྙེན་སྔགས་འབྲུ་མ་བཅུ་གསུམ་མོ༔ ནཾ༔ རང་ཉིད་གཤིན་རྗེའི་གཤེད་དུ་བསྒོམ༔ གཏོར་མ་ཨ་ཀཱ་རོ་བརྗོད་དོ༔ དགེ་བསྙེན་ཆེན་པོ་ཡེ་ཤེས་གྲགས༔ དཀར་པོ་ཞལ་གཅིག་ཕྱག་བཞི་པ༔ གཡས་པས་པི་ཝང་ནོར་བུ་འཛིན༔ གཡོན་པས་རྔ་ཆུང་མདུང་དར་བསྣམས༔ མཛེས་སྡུག་དར་དང་རིན་ཆེན་བརྒྱན༔ འབོད་དོ་གདུང་བའི་དབྱངས་ཀྱིས་འབོད༔ འདིར་བྱོན་བཞུགས་ལ་སྡོང་གྲོགས་མཛོད༔ དམ་རྫ་ས་གཙང་མའི་ཕུད་ཀྱིས་མཆོད༔ ནང་ལྟར་སྤྲུལ་པ་འགྱེད་ཙམ་ན༔ སྔོ་སྐྱ་ཞལ་གཅིག་ཕྱག་བཞི་པ༔ དང་པོ་ལྕགས་ཀྱུ་ནེ་འུ་ལེ༔ འོག་མས་མདུང་དར་བསེ་ཕུབ་འཛིན༔ ནེའུ་ལེའི་གདན་ལ་འདོར་ཐབས་བཞུགས༔ སྲིད་གསུམ་གསལ་བའི་མངོན་ཤེས་ཅན༔ འདིར་གཤེགས་དཀར་གསུམ་གཏོར་མ་བཞེས༔ ལེགས་ཉེས་ཅི་འོང་བདག་ལ་སྨོས༔ ལོངས་སྤྱོད་ནོར་གྱི་དངོས་གྲུབ་སྩོལ༔ གསང་བའི་སྤྲུལ་པ་འགྱེད་ཙམ་ན༔ ཞལ་གཅིག་ཕྱག་
གཉིས་བཞེངས་ཐབས་ཅན༔ ཕྱག་གཡས་བུམ་པས་དངོས་གྲུབ་སྩོལ༔ གཡོན་པས་ནེའུ་ལེས་དགོས་འདོད་འབེབས༔ སྐུ་མདོག་ནག་པོ་ཞི་མ་ཁྲོ༔ པདྨ་ཉི་མའི་གདན་ལ་བཞུགས༔ འདིར་གཤེགས་དམ་རྫས་གཏོར་མ་བཞེས༔ ལེགས་ཉེས་བྱ་བ་ཅི་བྱུང་ཀུན༔ རྒྱུན་དུ་བདག་ལ་བསྟན་དུ་གསོལ༔ ལོངས་སྤྱོད་འདོད་དགུའི་དངོས་གྲུབ་སྩོལ༔ ཡང་གསང་སྤྲུལ་པ་འགྱེད་ཙམ་ན༔ སྐུ་མདོག་མཐིང་ནག་ཞལ་གཅིག་པ༔ ཕྱག་གཡས་ལྕགས་ཀྱུས་དངོས་གྲུབ་འགུགས༔ གཡོན་པས་ནེའུ་ལེས་དབུལ་ཕོངས་སེལ༔ ཁྲོ་འཛུམ་དར་དང་རིན་ཆེན་བརྒྱན༔ སེམས་དཔའི་སྐྱིལ་མོ་ཀྲུང་གིས་བཞུགས༔ དངོས་གྲུབ་སྣ་ཚོགས་ཆར་བཞིན་འབེབས༔ འདིར་གཤེགས་དམ་རྫས་གཏོར་མ་བཞེས༔ ལེགས་ཉེས་བཟང་ངན་ཐམས་ཅད་ཤོད༔ ཅི་འདོད་དངོས་གྲུབ་ཐམས་ཅད་སྩོལ༔ ཡང་ཅིག་ཡང་གསང་སྤྲུལ་པ་ནི༔ ལྗང་སེར་ཞལ་གཅིག་ཕྱག་གཉིས་པ༔ ཕྱག་ཧྥིགཉིས་ཐལ་མོ་སྦྱར་བའི་བར༔ ཡིད་བཞིན་ནོར་བུ་རིན་ཆེན་བསྣམས༔ ཞབས་གཉིས་བགྲད་པའི་སྟབས་ཀྱིས་བཞུགས༔ འདིར་གཤེགས་སྣ་ཚོགས་ཟས་ཕུད་བཞེས༔
དངོས་གྲུབ་སྩོལ་ལ་ལེགས་ཉེས་སྟོན༔ རྟག་ཏུ་འཁོར་ཞིང་ཕྲིན་ལས་སྒྲུབས༔ སྟོང་གསུམ་ཁ་ལོ་སྒྱུར་མཛད་པའི༔ ནོར་ལྷ་ཀུན་གྱི་ཁོལ་པོ་ཁྱོད༔ རྣོ་མྱུར་གློག་དང་འདྲ་བ་ཡིས༔ བདག་གི་ཕྲིན་ལས་སྒྲུབ་པར་མཛོད༔ ཨོཾ་མ་ཧཱ་ཀ་ལ་ཛྙཱ་ན་ཀཱིརྟི་ཙིཏྟ་ཧྲིང་ཛཧཱུྃ་བཾ་ཧོ༔ མ་མ་སརྦ་སིདྡྷི་ཕ་ལ་ཧཱུྃ་ཨཱཿ ཨི་དཾ་བ་ལིང་ཁཱ་ཧྲཱི༔ སརྦ་པུཙྪ་ཁཱ་ཧྲཱི༔ ཞེས་པ་གནམ་ཆོས་དོན་བསྡུས་སོ༔ ཨཾ༔ དེ་ནས་མཁའ་རི་ལྕམ་དྲལ་ནི༔ རང་ཉིད་པདྨ་འབྱུང་གནས་བསྐྱེད༔ ཨ་ཀཱ་རོ་ཡིས་བྱིན་གྱིས་བརླབས༔ ཧཱུྃ༔ དགེ་བསྙེན་ཤེལ་ཕྲུག་མཁའ་རི་ནི༔ སྐུ་མདོག་དཀར་པོ་ཞལ་གཅིག་པ༔ ཕྱག་གཉིས་སྐུ་ལ་དུང་ཁྲབ་གསོལ༔ གཡས་པས་ཤེལ་མདུང་དཀར་པོ་དང་༔ གཡོན་པས་སྤྱང་ཐོད་ཐུན་བཀང་བསྣམས༔ ཆིབས་སུ་རྟ་དཀར་འཕུར་ཤེས་བཅིབས༔ གཡོན་དུ་ལྕམ་མོ་སྐུ་མདོག་དཀར༔ གཡས་པས་ནོར་བུ་གཡོན་རྫ་འཕང་༔ ཆིབས་སུ་མཛོ་མོ་དཀར་མོ་བཅིབས༔ ཤ་བ་ཡུ་མོ་རྗེས་སུ་ཁྲིད༔ བསྟན་སྲུང་དམ་ལྡན་མཁའ་རི་ནི༔ ལྕམ་དང་འཁོར་དུ་བཅས་པ་རྣམས༔ ལྷོ་སྟོད་གངས་རིའི་ཤེལ་མཁར་ནས༔ སྤྱན་འདྲེན་འདིར་བྱོན་མཆོད་གཏོར་བཞེས༔ གཙང་མའི་ཕུད་དང་
གསེར་སྐྱེམས་མཆོད༔ ཀྱེ་མ་ཤེའུ་མཁའ་རིའི་སྐུ༔ ཕྱག་འཚལ་བསྟོད་དོ་མཆོད་པ་འབུལ༔ ཁྱོད་ལ་ཕྲིན་ལས་བཅོལ་བ་ནི༔ བདག་དང་སློབ་དཔོན་པདྨ་གཉིས༔ མངོན་སུམ་མྱུར་དུ་སྤྱད་དུ་གསོལ༔ འོན་ཏེ་མངོན་སུམ་མཇལ་བ་ཡི༔ ལས་འཕྲོ་དག་དང་མི་ལྡན་ན༔ ཉམས་ལ་གསལ་བར་མཇལ་བར་མཛོད༔ ས་གཏེར་རི་བྲག་མི་སྒྲིབ་པར༔ མིག་གིས་གསལ་བར་མཐོང་བ་དང་༔ ལོངས་སྤྱོད་རྒྱས་པའི་དངོས་གྲུབ་སྩོལ༔ བཅོལ་བའི་ཕྲིན་ལས་འགྲུབ་པར་མཛོད༔ བཛྲ་ཏྲིག་ན་ཏྲིག་ཛ་ཏྲིག་སྨན་རུ་རུ་ཙོ་ཙོ་ཧཱུྃ༔ ཨི་དཾ་བ་ལིང་ཏ་ཁ་ཁ་ཁཱ་ཧི་ཁཱ་ཧྲཱི༔ ཨ་མྲྀ་ཏ་པུཙྪ་ཁཱ་ཧྲཱི༔ བཛྲ་ཏྲིག་ན་ཏྲིག་པ༔ ཏྲིག་སྨན་རུ་རུ་ཙམ་ཙམ་ཧཱུྃ༔ མ་ཧཱ་གུ་རུ་པྲ་བ་ཀ་ར་མ་མ་མཇལ་བར་མཛོད༔ མྱུར་དུ་མཇལ་བར་མཛོད་ཅིག༔ ཅེས་པ་རྣམ་ཆོས་ལས་བཀོལ་བའོ༔ ཨོཾ༔ དེ་ནས་ཨ་ཀཱ་རོས་བྱིན་གྱིས་བརླབས་ལ། ཧཱུྃ༔ དགེ་བསྙེན་ཇོ་བོ་སྤྲག་བཙན་ནི༔ སྐུ་མདོག་དཀར་པོ་ཞལ་གཅིག་པ༔ ཕྱག་གཉིས་མདའ་དང་གཞུ་འགེངས་པ༔ ཆིབས་སུ་རྟ་དཀར་འཕུར་ཤེས་བཅིབས༔ རྒྱབ་ན་ཁྱི་ནི་དཀར་དམར་ཁྲིད༔ རྒྱལ་སྒོང་སེང་གླིང་གླང་རྡུལ་བྲག༔ སྤུག་
གི་ལུང་ནས་སྤྱན་འདྲེན་ན༔ འདིར་གཤེགས་མཆོད་གཏོར་སྐྱེམས་ཕུད་བཞེས༔ གོད་ཁ་བཙན་གྱི་གནོད་པ་ཟློག༔ དོན་ཀུན་འགྲུབ་ཅིང་ཚོང་ལས་རྒྱལ༔ བཙན་དྲགས་ལོངས་སྤྱོད་ཆེ་བ་སོགས༔ ཅི་བསམ་དོན་རྣམས་འགྲུབ་པར་མཛོད༔ སྡང་བའི་དགྲ་ལ་ཇག་སྣ་རྒྱུག༔ བཅོལ་བའི་ཕྲིན་ལས་འགྲུབ་པར་མཛོད༔ ཙན་པྲ་མ་ནི་དྷ་ར་དྷ་ར་ཛཿཛཿ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧྲཱི༔ སརྦ་པཱཙྪ་ཁཱ་ཧྲཱི༔ བསྙེན་སྔགས་འབྲུ་བཅུ་གཅིག་པ་དེ་ཁོ་ན་ཡིན་ནོ༔ གཞུང་ནས་མངོན་རྟོགས་མཇུག་ཏུ་ཁཱ་ཧི་བཏགས་གསུངས་པའི་དོན་ཨ་རཱ་གས་ཁོལ་དུ་གནམ་ཆོས་ནས་ཕྱུང་བའོ༔ ཉེས་པ་མཆིས་ན་བཤགས་ཤི་ང་དགེ་བས་གསང་སྔགས་དར་རྒྱས་སུ་གྱུར་ཅིག༔ མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།