གནམ་ཆོས་གཞུང་ནས་བྱུང་བའི་ནོར་ལྷ་མོ་རིགས་འགའ་ཡི་གསོལ་ཁ་ཟུར་དུ་ཕྱུང་བ།
གནམ་ཆོས་གཞུང་ནས་བྱུང་བའི་ནོར་ལྷ་མོ་རིགས་འགའ་ཡི་གསོལ་ཁ་ཟུར་དུ་ཕྱུང་བ་ཡོད༔
གཏོར་མ་སོ་སོའི་དཀར་གཏོར་ཅོག་ཟླུམ་གཅིག་ལ་ཨ་ཀཱ་རོས་བྱི་ན་གྱིས་བརླབས་ནས༔ རང་ཡི་དམ་དུ་གསལ་བས་སྐད་ཅིག་སྤྱན་དྲངས་ཏེ༔ ཧཱུྃ༔ བཅོམ་ལྡན་ལྷ་མོ་ནོར་རྒྱུན་མ༔ སེར་མོ་ཞལ་གཅིག་ཕྱག་བཞི་མ༔ གཡས་པ་དང་པོས་ནོར་བུ་དང་༔ གཡོན་པས་འབྲས་ཀྱི་སྙེ་མ་འཛིན༔ འོག་གཉིས་ལྕགས་ཀྱུ་ནེའུ་ལེ་བསྣམས༔ པདྨ་ཉི་སྟེང་གསལ་བར་བཞུགས༔ ཞལ་ནི་ཞི་འཛུམ་རིན་ཆེན་བརྒྱན༔ ཕྱེད་སྐྱིལ་དར་གྱི་ན་བཟའ་གསོལ༔ འོད་ཟེར་དཔག་ཏུ་མེད་པ་འཕྲོས༔ དབུ་སྐྲ་ཐོར་ཚུགས་དབུ་རྒྱན་གསོལ༔ འདི་གཤེགས་བརྟན་པར་བཞུགས་སུ་གསོལ༔ མཆོད་གཏོར་པུཥྤེ་
པུཙྪ་བཞེས༔ གླིང་བཞི་རིན་ཆེན་བཀང་སྟེ་འབུལ༔ ཕྱག་འཚལ་གུས་ཤིང་གདུང་བས་བསྟོད༔ ལྷ་མོ་ནོར་རྒྱུན་སེར་མོ་ཡིས༔ ནོར་གྱི་རྒྱུན་ཅིག་བདག་ལ་སྩོལ༔ ཨོ་བྷ་སུ་དྷ་རི་བཱ་སུ་ཧཱུྃ༔ ཨི་ད་བ་ལི་ཏ་ཁ་ཁ་ཁཱ་ཧྲཱི༔ པུཎྜེ་སརྦ་པུཙྪ་ཧོ༔ སྔགས་འབྲུ་བརྒྱད་པོ་བསྙེན་སྔགས་སོ༔ དམ་མེད་རྣམས་ལ་འདི་གསང་ཞིག༔ ཅེས་གསུངས་སོ༔ རང་ཉིད་པདྨ་འབྱུང་གནས་བསམ༔ ཧཱུྃ༔ ཡུམ་གཅིག་ཨ་ཕྱི་ཆོས་སྒྲོན་མ༔ སྐུ་མདོག་དཀར་མོ་མཛེས་པའི་གཟུགས༔ གཡས་པས་མདའ་དར་གཡོན་མེ་ལོང་༔ སྐུ་ལ་དར་དཀར་བེར་ཆེན་གསོལ༔ རྟ་དཀར་འཕུར་ཤེས་ཆིབས་སུ་ཆིབས༔ འཁོར་
དུ་ལྷ་མོ་བཞི་ཡིས་བསྐོར༔ སྐུ་མདོག་སྔོ་སེར་དམར་ལྗང་བཞི༔ རྐང་ཐང་ཕྱག་མཚན་གཙོ་དང་མཚུངས༔ མ་གཅིག་ཨ་ཕྱི་མཆེད་ལྔ་པོ༔ ཨོ་རྒྱན་ཡུལ་དང་ཏི་གྲོ་བྲག༔ འདན་གྱི་བྲག་རྩ་འབྲི་ཁུང་མཐིལ༔ བཞུགས་གནས་རྣམས་ནས་འདིར་བྱོན་ལ༔ དམ་རྫས་བདུད་རྩི་གཏོར་མ་དང་༔ ཡིད་སྤྲུལ་མཆོད་པ་འབུལ་གྱིས་བཞེས༔ བདག་ཅག་འཁོར་དང་བཅས་པ་ལ༔ རིམས་ནད་ཡམས་ནད་མེད་པ་དང་༔ རིགས་རྒྱུད་ཆོས་བརྒྱུད་དར་ཞིང་རྒྱས༔ ལོངས་སྤྱོད་མངའ་ཐང་འཕེལ་བ་དང་༔ སྣང་སྲིད་དབང་དུ་འདུ་བ་དང་༔ གནོད་བྱེད་དགྲ་བགེགས་བསྒྲལ་བར་མཛོད༔ མཆེད་ལྔ་མ་ཡེངས་ལས་མཛོད་ཅིག༔ ཨོཾ་ཡ་མ་ར་ཙ་སྭཱ་ཧཱ༔ མ་མ་འདུས༔ སརྦ་འདུས༔ ཏ་ཙ་འདུས༔ མ་མ་འདུས་སྲ་ཧཱ༔ ཨི་དཾ་བ་ལིཾ་ཏ་ཁ་ཁ་ཁཱ་ཧྲཱི༔ པཉྩ་ཨ་མྲྀ་ཏ་ཁཱ་ཧྲཱི༔ སརྦ་པུ་ཙྪ་ཧོ༔ རྩ་སྔགས་ཀྱང་གོང་གི་སྔགས་དེ་ལགས༔ འབྲུ་ལྔ་ཁོ་ན་གཙོ་བོ་ཡིན༔ ཨོྃ༔ གནམ་ཆོས་ཚེ་རིང་མཆེད་ལྔ་ནི༔ རང་ཉིད་མི་ལ་རས་པ་ནི༔ སྐུ་མདོག་སྨུག་པོ་གྲུབ་ཐོབ་གཟུགས༔ རང་གི་ཐུགས་ནས་འོད་ཟེར་འཕྲོས༔ ཚེ་རིང་མཆེད་ལྔ་སྤྱན་དྲངས་གྱུར༔ ཧཱུྃ༔ ལྷ་སྨན་བཀྲ་ཤིས་ཚེ་རིང་མ༔
དཀར་མོ་ཞལ་གཅིག་ཕྱག་གཉིས་མ༔ གཡས་པས་རྡོ་རྗེ་གཡོན་བུམ་པ༔ བུམ་པའི་སྟེང་ན་རིན་ཆེན་སྤངས༔ ཆིབས་སུ་སེང་གེ་དཀར་མོ་ཆིབས༔ འཇའ་ཚོན་སྣ་ལྔའི་ཀློང་ན་བཞུགས༔ ལྷབ་ལྷུབ་ན་བཟའི་རྒྱན་དང་བཅས༔ སིལ་སྙན་རོལ་མོའི་སྒྲ་དང་བཅས༔ བྲན་གཡོག་མང་པོ་འཁོར་དང་བཅས༔ འདིར་བྱོན་གཙང་མའི་མཆོད་གཏོར་བཞེས༔ རིགས་རྒྱུད་ཆོས་བརྒྱུད་འཕེལ་བ་དང་༔ བཀྲ་ཤིས་ཚེ་ཡི་དངོས་གྲུབ་སྩོལ༔ ཤར་དུ་མཐིང་གི་ཞལ་བཟང་མ༔ སྐུ་མདོག་སྔོན་མོ་ཞལ་གཅིག་མ༔ ཕྱག་གཉིས་མེ་ལོང་ནོར་བུ་འཛིན༔ རྐྱང་བུ་ཁ་དཀར་ལ་ཆིབས་པ༔ འཇའ་འོད་སྣ་ལྔའི་ཀློང་ན་བཞུགས༔ ལྷབ་ལྷུབ་ན་བཟའི་རྒྱན་དང་བཅས༔ སིལ་སྙན་རོལ་མོའི་སྒྲ་དང་བཅས༔ བྲན་གཡོག་མང་པོ་འཁོར་དང་བཅས༔ འདིར་བྱོན་གཙང་མའི་མཆོད་གཏོར་བཞེས༔ ནད་དང་གནོད་པ་ཞི་བ་དང་༔ སྣང་གསལ་པྲ་ཡི་དངོས་གྲུབ་སྩོལ༔ ལྷོ་རུ་མི་གཡོ་བློ་བཟང་སེར༔ མདའ་དར་མེ་ལོང་ཕྱག་ན་འཛིན༔ རྒྱ་སྟག་ཁྲ་བོ་ཆིབས་སུ་ཆིབས༔ འཇའ་ཚོན་སྣ་ལྔའི་ཀློང་ན་བཞུགས༔ ལྷབ་ལྷུབ་ན་བཟའི་རྒྱན་དང་བཅས༔
སིལ་སྙན་རོལ་མོའི་སྒྲ་དང་བཅས་བྲན་གཡོག་མང་པོ་འཁོར་དང་བཅས༔ འདིར་བྱོན་གཙང་མའི་མཆོད་གཏོར་བཞེས༔ དཔལ་དང་འབྱོར་བ་རྒྱས་པ་དང་༔ རྨ་གཡང་ཟས་ཀྱི་དངོས་གྲུབ་སྩོལ་༔ ནུབ་ཏུ་ཅོད་པན་མགྲིན་བཟང་དམར༔ ཞལ་གཅིག་ཕྱག་གཉིས་མཆོད་རྟེན་དང་༔ ཟས་ཀྱིས་བཀང་བའི་ནོར་བུ་འཛིན༔ ཆིབས་སུ་ཤ་བ་ཡུ་མོ་ཆིབས༔ འཇའ་ཚོན་སྣ་ལྔའི་ཀློང་ན་བཞུགས༔ ལྷབ་ལྷུབ་ན་བཟའི་རྒྱན་དང་བཅས༔ སིལ་སྙན་རོལ་མོའི་སྒྲ་དང་བཅས༔ བྲན་གཡོག་མང་པོ་འཁོར་དང་བཅས༔ འདིར་བྱོན་གཙང་མའི་མཆོད་གཏོར་བཞེས༔ སྣང་སྲིད་དབང་དུ་འདུ་བ་དང་༔ བང་མཛོད་འབྲུ་ཡི་དངོས་གྲུབ་སྩོལ༔ བྱང་དུ་གཏད་དཀར་འགྲོ་བཟང་ལྗང་༔ ཞལ་གཅིག་ཕྱག་གཉིས་དཱར་བ་ཡི༔ སྟེང་ན་ནོར་བུ་བཞག་པ་དང་༔ སྦྲུལ་ཞགས་གཡོན་པས་འཛིན་པའོ༔ ཆིབས་སུ་གཡུ་འབྲུག་ལྗང་གུ་ཆིབས༔ འཇའ་ཚོན་སྣ་ལྔའི་ཀློང་ན་བཞུགས་ལྷབ་ལྷུབ་ན་བཟའི་རྒྱན་དང་བཅས༔ སིལ་སྙན་རོལ་མོའི་སྒྲ་དང་བཅས༔ བྲན་གཡོག་མང་པོ་འཁོར་དང་བཅས༔ འདིར་བྱོན་གཙང་མའི་མཆོད་གཏོར་བཞེས༔ བསྟན་དགྲ་
གནོད་བྱེད་ཚར་གཅོད་ཅིག༔ རྐང་བཞི་ཕྱུགས་ཀྱི་དངོས་གྲུབ་སྩོལ༔ མཆེད་ལྔ་འཁོར་བཅས་མཆོད་བསྟོད་མཐུས༔ སྒྲུབ་པ་མཐའ་རུ་ཕྱིན་པ་དང་༔ གསང་སྔགས་བསྟན་པ་དར་བར་ཤོག༔ བཅོལ་བའི་ཕྲིན་ལས་འགྲུབ་པར་མཛོད༔ ཨོཾ་བཛྲ་ཧ་རི་ནི་ས་མ་མ་སརྦ་སི་ཏི་ཕ་ལ་ཧཱུྃ༔ ཨི་དཾ་ལཾ་ཏ་ཁ་ཁ་ཁཱ་ཧྲཱི༔ པཉྩ་ཨ་མྲྀ་ཏ་སརྦ་པུ་ཙཱ་ལཱ་ཧྲཱི༔ འཁོར་བཞིའི་ཐུགས་ཀར་ཆོས་འབྱུང་རྐྱང་བ་དང་༔ གཙོ་བོའི་ཐུགས་ཀར་བསྣོལ་བའི་དབུས་སུ་ཨོཾ་དང་ཧ་རི་ནི་ས་བསྒོམ་ལ༔ འབྲུ་བཅོ་ལྔ་པ་བཟླ་སྟེ་ཞིབ་པར་གཞུང་ལས་ཤེས་སོ༔ འདི་ནི་གནམ་ཆོས་འདོན་ཆ་བསྡུས་པ་ལགས་སོ༔ དེ་ནས་ངེ་ནེ་མའི་མཆོད་གཏོར་ནི༔ བྷྱོ༔ དུར་ཁྲོད་མཁའ་འགྲོ་ངེ་ནེ་མ༔ ཤིན་ཏུ་ཞི་ཞིང་རབ་ཏུ་ཞི༔ སྐུ་མདོག་དཀར་མོ་གཡས་གྲི་ཁུག༔ གཡོན་པས་ཐོད་པ་བདུད་རྩི་འཛིན༔ དབུ་སྐྲ་ཐོར་ཅོག་རིན་ཆེན་བརྒྱན༔ མ་ཡི་ནང་ནས་མ་གཅིག་མ༔ སྲིང་གི་ནང་ནས་སྙིང་ཉེ་མ༔ ཁྱོད་ལ་འབོད་པ་བརྒྱ་ཡོད་ཀྱང་༔ དམ་ཚིག་བསྲུང་མི་ང་བས་མེད༔ རླུང་དམར་སྐར་མདའི་བང་དང་བཅས༔ མུན་པ་ཅན་གྱི་དུར་ཁྲོད་དང་༔ ཉེ་བའི་ཚནོ་ཧ་ནས་བྱོན༔ ཀ་ཆ་དཀོར་ལ་བརྟན་པར་བཞུགས༔ དམ་རྫས་མཆོད་
གཏོར་འདི་བཞེས་་ལ༔ འཁོར་རྣམས་བསྲུང་ཞིང་སྤེལ་བར་མཛོད༔ དཀོར་བདག་ཆེན་མོ་ཞི་བའི་སྐུ༔ སྐུ་མདོག་དཀར་ལ་ནག་མདངས་ཅན༔ དེ་ཡི་གཡས་པས་གྲི་ཁུག་འཛིན༔ གཡོན་པས་བྷནྡའི་ནང་དུ་ནི༔ ཁྲག་དང་བདུད་རྩི་བསྲེས་པ་འཛིན༔ ཞབས་གཉིས་འདོར་ཐབས་བྱས་ནས་ནི༔ ཐོར་ཅོག་རིན་པོ་ཆེ་ཡིས་བརྒྱན༔ མཐའ་གཡོན་མཚོན་གྱི་གྲུ་གུ་བཅུག༔ ཞལ་ནི་ཞི་ལ་སྤྱན་ནི་ཁྲོ༔ བརྒྱན་པའི་གཏོར་མ་འདི་བཞེས་ལ༔ ཀ་ཆ་དཀོར་ནོར་ཐུབ་པར་སྲུངས༔ ཀ་ཆ་མ་བྱིན་ཁྱེར་བའི་ཚེ་ལྷ་མོ་ཅུང་ཞིག་ཁྲོས་པ་ནི༔ ཞལ་གཅིག་ཕྱག་བཞི་རིན་ཆེན་བརྒྱན༔ དང་པོ་གཉིས་ཀྱིས་གྲི་གུག་དང་༔ ཐོད་ཁྲག་འཛིན་ཏེ་དེ་འོག་གཉིས༔ ལྕགས་དྲྭ་དང་ནི་ནད་རྐྱལ་འཛིན༔ ཞབས་བསྒྲད་འོག་ན་མི་རོ་མནན༔ ཞལ་ནི་ཞི་བ་ཁྲོས་པའི་ཞལ༔ སྟོད་གཡོགས་སྔོན་པོ་སྐུ་མདོག་སྔོ༔ བརྒྱན་པའི་གཏོར་མ་འདི་བཞེས་ལ༔ རྒྱ་མཚོའི་སྟེང་དུ་ཁྱེར་ན་ཡང་རྐུས་པའི་ཀ་ཆ་ཚུར་ལོངས་ཤིག༔ དགྲ་དང་ཇག་པ་བྱུང་ཙ་ན༔ ལྷ་མོ་ཤིན་ཏུ་ཁྲོས་པ་ནི༔ ཞལ་གཅིག་ཕྱག་ནི་དྲུག་པ་སྟེ། དང་པོ་གཉིས་ཀྱིས་གྲི་གུག་དང་༔ བྷནྡའི་ཀླད་
ཁྲག་བཀང་བ་གསོལ༔ དེ་འོག་གཉིས་ཀྱིས་ནད་རྐྱལ་དང་༔ མཚོན་གྱི་གྲུ་གུ་འཛིན་པའོ༔ འོག་མ་གཉིས་ཀྱིས་ལྕགས་དྲྭ་དང་༔ ཁྲམ་ཤིང་འཛིན་པ་དྲེའུ་དམར་ཞུར༔ ལ་ཆིབས་ཁྲག་གི་རལ་པ་བསིགས༔ སེན་མོ་ཐམས་ཅད་ཁྲག་གི་མདོག༔ ཉིན་ལམ་གཅིག་འཕྱང་གནོད་བྱེད་འགུགས༔ ཞལ་ཁུག་གཉིས་ནས་ཁྲག་རྣག་འབབ༔ གཡས་ཀྱི་མཆན་ཁུང་གཉིས་པོ་ན༔ མཚོན་གྱི་གྲུ་གུ་ཁྲ་གསུམ་བཅུག༔ མཆན་ཁུང་གཡོན་གྱི་གཉིས་པོ་ན༔ ནད་ཀྱི་རྐྱལ་པ་རེ་རེ་བཅུག༔ སྤྱན་ནི་དམར་པོ་ཁྲག་གི་མདོག༔ ནུ་མའི་རྩེ་ནས་ཁྲག་རྒོད་འབབ༔ ཞལ་ནི་སྲིན་མོ་ཁྲོས་པའི་གཟུགས༔ སྡང་བའི་དགྲ་བོ་ལས་ངན་གྱི༔ ཤ་ཁྲག་སྲོག་དབུགས་ཁྱོད་ཀྱིས་ཟོ༔ ཆོ་འཕྲུལ་མི་རུངས་སྣ་ཚོགས་ཐོངས༔ རྟག་ཏུ་ཕྲིན་ལས་མཛད་པའི་ཚེ༔ དཀར་མོ་འཛུམ་མདངས་གཟིག་ཤམ་ཅན༔ དུང་གི་རྣ་ཆ་རིན་ཆེན་བརྒྱན༔ གཟིག་ཤམ་གསོལ་ཞིང་བོང་དམར་ཆིབས༔ ཕྱག་ན་གྲི་གུག་ཐོད་པ་འཛིན༔ མཆོད་གཏོར་བདུད་རྩི་འདི་གསོལ་ལ༔ དེང་ནས་བདག་གི་དཀོར་དང་ནོར༔ ལྷ་མོ་ཁྱོད་ཀྱིས་བདག་ཏུ་ཟུངས༔ དགྲ་རྐུན་ལག་ཏུ་
མ་ཤོར་ཞིག༔ བདག་དང་ཞལ་ད་པ་རྣམས་ཀྱིས༔ བྱིན་དང་ཚོང་ལ་ཕྲག་མ་དོག༔ བཅོལ་བའི་ཕྲིན་ལས་འགྲུབ་པར་མཛོད༔ ཨོ་ར་ལི་པྲ་མ་ཡ་ཛཿ ཨི་དཾ་བ་ལིཾ་ཏ་ཁ་ཁ་ཁཱ་ཧྲཱི༔ པཉྩ་ཨ་མྲྀ་ཏ་ཁཱ་ཧྲཱི༔ སརྦ་པུཙྪ་ཁཱ་ཧྲཱི༔ ཨོ་ར་ལི་པྲ་མ་ཡ་ཛཿ མ་ཧཱ་པདྨ་ཧུར་ཧུར་བྷྱོ་བྷྱོ་རྦད་རྦད༔ ཨི་དཾ་བ་ལིཾ་ཏ་ཁ་ཁ་ཁཱ་ཧྲཱི༔ འདི་ལ་ཡང་ཞི་སྒྲུབ་དཀར་གཏོར་འོ་མས་བྲན་ན་ལེགས་པ་ཡིན་ནོ༔ དཀོར་སྲུང་འདི་ཟབ་ཅིང་རྣོ་བས་སྔགས་གཞུང་དུ་ཤེས་སོ༔ ཨོཾ༔ ཀོང་བཙུན་དེ་མོའི་གསོལ་ཁ་ནི༔ བྷྱོ༔ བོད་སྐྱོང་ཀོང་བཙུན་དེ་མོ་ནི༔ ཞལ་གཅིག་ཕྱག་གཉིས་བེར་ཆེན་གསོལ༔ གཡས་པས་མདའ་དར་གཡོན་མེ་ལོང་༔ ཆིབས་སུ་རྟ་ནག་འཕུར་ཤེས་ཆིབས༔ དར་ཟབ་རིན་ཆེན་རྒྱན་གྱིས་བརྒྱན༔ ཀོང་ཡུལ་མཐིལ་ནས་སྤྱན་འདྲེན་ནོ༔ འདིར་བྱོན་དམ་རྫས་མཆོད་གཏོར་བཞེས༔ རྟ་ནད་ལུག་ནད་མི་ནད་སོལ༔ མངའ་ཐང་སྙན་གྲགས་རྒྱས་པ་དང་༔ ཁམས་གསུམ་དབང་དུ་བསྡུ་བ་དང་༔ དགྲ་དཔུང་ཐུལ་ལ་རྐྱེན་ངན་ཟློག༔ སྔོན་གྱི་དམ་བཅའ་མ་གཡེལ་བར༔ བཅོལ་བའི་ཕྲིན་ལས་འགྲུབ་པར་མཛོད༔ ཨོཾ་བཛྲ་ལི་ལ་མ་མ་ཧཱུྃ་བྷྱོ་ཛ་ཕཊ༔ ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ པཉྩ་
ཨ་མྲྀ་ཏ་ལ་ཁཱ་ཧྲཱི༔ སརྦ་པུ་ཙྪ་ཁཱ་ཧྲཱི༔ སྔགས་དེ་ཉིད་ཡིན་ནོ༔ མངྒ་ལཾ༔ ཨོཾ༔ དེ་ནས་འཕགས་མ་སྒྲོལ་མའི་བཀའ་སྲུང་ནི༔ བྷྱོ༔ ལྷ་མོ་ཐང་ནག་དཔལ་མོ་ནི༔ སྐུ་མདོག་དམར་ནག་ཞལ་གཅིག་མ༔ ཕྱག་གཉིས་གཡས་པས་གྲི་གུག་ལ༔ གཡོན་པས་པཎ་འཛིན་ཞབས་གཉིས་གར་དབུ་སྐྲ་དམར་སེར་ཐོར་ཅོག་ལ༔ རིན་པོ་ཆེ་ཡི་དབུ་རྒྱན་ཅན༔ གཟིག་གི་པགས་པའི་ཤམ་ཐབས་ཅན༔ རྒྱན་མེད་བདེ་སྙན་འཁྱུད་པ་མོ༔ རྒྱ་གར་ཡུལ་སོགས་རང་གནས་ནས༔ འདིར་གཤེགས་དམ་རྫས་མཆོད་གཏོར་བཞེས༔ སྔོན་གྱི་ཐུགས་དམ་དམ་ཚིག་ལྟར༔ འཕགས་མ་སྒྲོལ་མའི་བསྟན་པ་སྲུངས༔ བསྟན་འཛིན་སྐྱེས་བུའི་སྐུ་ཚེ་སྲིངས༔ བདག་གི་ལས་ནི་གང་བསྒྲུབ་ཀྱང་༔ དེ་ལ་ཁྱོད་ཀྱིས་སྡོང་གྲོགས་མཛོད༔ ཨོཾ་ཤྲཱི་ཀཱ་ལ་གྲི་སྭཱ་ཧཱ༔ ཨི་དཾ་བ་ལིཾ་ཏ་ཁ་ཁ་ཁཱ་ཧྲཱི༔ པཉྩ་ཨ་མྲྀ་ཏ་ཁཱ་ཧྲཱི༔ སརྦ་པུ་ཙྪ་ཁཱ་ཧྲཱི༔ དེ་ནས་གསར་དུ་བཤམས་པའི་གཏོར་མ་ཡིན་ན་ཕུལ༔ རྒྱུན་གཏོར་ལ་བསྔོས་པ་ཡིན་ན་བཞག་གོ༔ འདི་དག་ཚིག་མཚམས་སྦྱར་བ་ཅུང་ཟད་ཙམ་མ་གཏོགས་གནམ་ཆོས་གཞུང་ལས་བྱུང་ལྟར༔ ལག་ཏུ་བླངས་ཏེ་རཱ་ག་ཨ་སྱས་བསྒྲིགས་པ་ལ༔ འགལ་བ་མཆིས་ན་ལྷ་མོའི་ཚོགས་ལ་བཤགས་ཤིང་༔
དགེ་བས་གནམ་ཆོས་ཐུགས་གཏེར་གྱི་བསྟན་པ་རྒྱས་ཤིང་བསྟན་འཛིན་རྣམས་སྐུ་ཚེ་བརྟན་པར་གྱུར་ཅིག། མངྒ་ལཾ༔ ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།