ལམ་གཏོར་དངོས་གྲུབ་ཀུན་འབྱུང་།
ལམ་གཏོར་དངོས་གྲུབ་ཀུན་འབྱུང་བཞུགས་སོ།
ཨོཾ་ཨ་ཀཱ་རོ་སོགས། ཨོཾ་མ་ཧཱ་རཱ་ཛ་ཡཀྵ་ས་མ་ཡ་བེ་ཤ་མ་ཎ་ཡ་སརྦ་ཙིཏྟ་རཏྣ་ཧྲིང་ཧྲིང་ཛཿཛཿ མ་ཧཱ་བ་ལིཾ་ཏ་ཁཱ་ཧི། ཧཱུྃ། རི་རབ་ལྷུན་པོའི་བྱང་ཕྱོགས་ནས། །ལྕང་ལོ་ཅན་གྱི་གནས་མཆོག་ནས། །རིན་ཆེན་འབར་བའི་ཕོ་བྲང་དབུས། །རྣམ་སྲས་འཁོར་བཅས་གཤེགས་སུ་གསོལ། །རྒྱལ་པོ་ཆེན་པོ་རྣམ་ཐོས་སྲས། །སྟོང་གསུམ་རིན་ཆེན་གཏེར་གྱི་བདག །གླིང་བཞི་བྱང་ཕྱོགས་སྐྱོང་ཙམ་ན། །ཕྲིན་ལས་བཞི་ལ་མངའ་བརྙེས་པས། །ཨིནྡྲ་ནཱི་ལའི་མདངས་དང་ལྡན། །ས་བརྒྱད་སེམས་དཔའ་བཞུགས་པ་པོ། །གནོད་སྦྱིན་ཕོ་མོ་མང་པོ་
དང་། །ཀླུ་ཡི་དེད་དཔོན་མཛད་ཙམ་ན། །རིན་ཆེན་གསེར་གྱི་ཁ་དོག་ཅན། །ཌཱ་ཀི་མ་དང་ཀླུ་མོ་དང་། །བདུད་མོའི་དེད་དཔོན་མཛད་ཙམ་ན། །བཻཌཱུར་སྔོན་པོའི་སྐུ་མདོག་ཅན། །སྣང་སྲིད་དབང་དུ་བསྡུ་བ་དང་། །འགྲོ་བའི་རྣམ་ཤེས་བཀུག་པའི་ཚེ། །པདྨ་རཱ་གའི་མདོག་འདྲ་ཞིང་། །མིའུ་ཐུང་བཞེངས་པའི་ཆ་ལུགས་ཅན། །ལེ་བརྒན་དར་གྱི་ཅོད་པན་ཅན། །སྐུ་ལ་བསེ་ཁྲབ་དམར་པོ་གསོལ། །དབུ་ལ་བསེ་རྨོག་རྒྱ་ཞྭ་གསོལ། །ཕྱག་གཡས་མདུང་དར་རྒྱལ་མཚན་བསྣམས། །ཁམས་གསུམ་ཟིལ་གྱིས་གནོན་པར་མཛད། །ཕྱག་གཡོན་
ནེའུ་ལེ་ལྕགས་ཀྱུ་འཛིན། །འགྲོ་བའི་རྣམ་ཤེས་དབང་དུ་སྡུད། །སྐུ་ལས་འོད་ཟེར་དམར་པོ་འཕྲོས། །སྲིད་པ་གསུམ་ཡང་དབང་དུ་སྡུད། །འགྲོ་བ་མི་ཡི་རྣམ་ཤེས་བཀུག །སྦྱིན་བདག་ཕོ་མོའི་སྙིང་ལག་བསྐུལ། །གཡང་ཆེན་ནོར་དང་བརྗིད་ཅན་གོས། །བཅུད་ཆེན་ཟས་ལ་སོགས་པ་ཡི། །བདག་ལ་ཟས་ནོར་ལོངས་སྤྱོད་ཀྱི། །དངོས་གྲུབ་མ་ལུས་བདག་ལ་སྩོལ། །ནོར་བདག་རྒྱལ་པོ་ཆེན་པོ་ཡི། །ཐུགས་དམ་གནད་ནས་བསྐུལ་པའི་ཚེ། །ཁྱོད་ཀྱི་སྤྲུལ་པའི་རྒྱལ་ཕྲན་ནི། །འགྲོ་བ་མི་ཡི་སྙིང་ལ་ཞུགས། །རྣམ་ཤེས་བསྒྱུར་ལ་དབང་དུ་སྡུད། །འཇིག་རྟེན་ཁམས་ཀྱི་ལོངས་སྤྱོད་རྣམས། །མ་ལུས་ཐམས་ཅད་དབང་དུ་སྡུས། །སྒྲུབ་པ་པོ་ལ་དངོས་གྲུབ་སྩོལ། །ཀྱེ། ཉི་མ་ནུབ་ཕྱོགས་ཕ་ཀི་ཐོན། །ཕ་ནི་བདུད་ལ་མ་ནི་དམུ། །དམུ་བདུད་གཤོས་པའི་མཐུ་རྩལ་ཅན། །སྐྱེས་བུ་དགེ་བསྙེན་ཆེན་པོ་སྟེ། །ཞྭ་ཡི་མགོན་པོ་ར་རྟ་ཅན། །གནོད་སྦྱིན་ནོར་བདག་མཐུ་རྩལ་ཅན། །གཏེར་བདག་མཐུ་སྟོབས་རྫུ་འཕྲུལ་ཅན། །ཞལ་གཅིག་ཕྱག་གཉིས་སྐུ་མདོག་དམར། །ཕྱག་གཡས་ལྕགས་ཀྱུས་མི་ནོར་འགུགས། །ཕྱག་གཡོན་ནེའུ་ལེས་དབུལ་
ཕོངས་སེལ། །ཕྱེད་བསྐུམ་རིན་ཆེན་སྣ་ལྔས་བརྒྱན། ཀོང་བཙུན་མོ་དང་གཉིས་སུ་མེད། །བརྟན་མ་བཅུ་གཉིས་འཁོར་གྱིས་བསྐོར། །སྐུ་མཆེད་སུམ་བརྒྱ་དྲུག་ཅུ་བཅས། །ཐེའུ་རང་དམག་དཔོན་རྫུ་འཕྲུལ་ཅན། །རྫུ་འཕྲུལ་སྐད་ཅིག་སྟོང་གསུམ་བསྐོར། །འཇིག་རྟེན་ཁམས་ཀྱི་ནོར་གྱི་བདག །ཁྱོད་ཀྱི་ཐུགས་དམ་དུས་ལ་བབ། །མི་ནོར་ཟས་གསུམ་དབང་དུ་སྡུས། །རྣལ་འབྱོར་བདག་ལ་དངོས་གྲུབ་སྩོལ། །ཨོཾ་བཛྲ་སཱ་དྷུ་ས་མ་ཡ་སྲོག་ཏྲིའུ་ཛཛཿ བཛྲ་ལི་ལ་མ་ཧཱུྃ་ཛཿ བ་ལི་ཏ་ཁཱ་ཧི་ཁཱ་ཧི། ཀྱེ༔ དམ་ཅན་སྐྱེས་བུ་ཆེན་པོ་མཐུ་དང་རྫུ་འཕྲུལ་གྱི་བདག་པོ། བདག་ལ་བྱང་ཆུབ་སྒྲུབ་པའི་མཐུན་རྐྱེན། ཁྱེད་སྒྲུབ་ཅིང་མཆོད་པའི་ཡོ་བྱད་དང་མི་ལྡན་པས། མི་སྙིང་སྐུལ་ཅིག །མི་སེམས་གཡོས་ཤིག །སྣང་བ་སྒྱུར་ཅིག །བདག་ལ་གཡང་ཅན་གྱི་ནོར་སྩོལ་ཞིག །བརྗིད་ཅན་གྱི་གོས་བཀོན་ཅིག །བཅུད་ཅན་གྱི་ཟས་སྩོལ་ཅིག །མི་ནོར་ཟས་གསུམ་དབང་དུ་སྡུས་ཤིག །འབྲུ་དང་ནོར་གྱི་ཆར་ཕོབ་ཅིག །སྐྱེས་བུ་ཆེན་པོ་རེམ་ཅིག །མཐུ་དང་རྫུ་འཕྲུལ་རྩལ་དང་ནུས་པ་ཅི་འདུག་ལྟའོ། །ཨོྃ་ཨཱ༔ཧཱུྃ་གིས་གཏོར་མ་
ལྷའི་ཞལ་ཟས་སུ་གྱུར། ༀ་བཛྲ་པྲ་མོ་ཧ་ཧྲིང་ཧྲིང་ཛཿཛཿ རྡོ་རྗེ་གཡུ་སྒྲོན་མ་འཁོར་དང་བཅས་པའི་ཞལ་དུ་ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། བདག་གི་འདོད་པའི་དོན་ཐམས་ཅད་སྒྲུབ་པར་མཛད་དུ་གསོལ། ཧཱུྃ། སྟེང་ཕྱོགས་དག་པ་འཕྲུལ་གྱི་གཞལ་ཡས་སུ། །རིན་ཆེན་སྤྲིན་དཀར་བརྩེགས་པའི་གུར་ཁང་ནས། །རྡོ་རྗེ་གཡུ་སྒྲོན་སྨན་བཙུན་འཁོར་དང་བཅས། །འདིར་གཤེགས་བརྒྱན་པའི་གཏོར་མ་བཞེས་སུ་གསོལ། །བཅོལ་བའི་ཕྲིན་ལས་མ་ལུས་བསྒྲུབ་པར་མཛོད། ། ཧཱུྃ། རྒྱལ་བའི་ཡུམ་མཆོག་རྡོ་རྗེ་གཡུ་སྒྲོན་མ། །ཆོས་སྐུ་དབྱིངས་ལས་སྤྲོས་པ་མི་མངའ་ཡང་། །ལོངས་སྐུ་རིགས་ལྔ་མ་དང་མཁའ་འགྲོ་སྟོན། །སྤྲུལ་སྐུ་སྨན་མོ་འགྲོ་དོན་མཛད་ལ་བསྟོད། །སྤྲུལ་པའི་གནས་ལ་ངེས་པ་མ་མཆིས་ཀྱང་། །རི་རབ་གླིང་དང་ནགས་ཚལ་མཚོ་གླིང་དང་། །ལྷོ་མོན་བོད་དང་རྒྱ་གར་ལ་སོགས་པ། །ཡུལ་རྣམས་ཀུན་ཏུ་དངོས་གྲུབ་སྟེར་ལ་བསྟོད། །ཨོཾ་བཛྲ་པྲ་མོ་ཧ་ཧཱུྃ་ཧཱུྃ་ཛཿཛཿ མ་མ་ལ་ལ་ལི་ལི་སྲིང་འགྲོ་མ་ཧཱུྃ། སིདྡྷི་པུཊྚི་ཀུ་རུ་ཡེ་སྭཱ་ཧཱ། མི་ནོར་ཟས་གསུམ་པུཏྟིཾ་ཀུ་རུ་ཡེ་སྭ་ཧཱ། ཞེས་པ་འདི་གཏེར་གཞུང་ཁོ་ནར་བསྒྲིགས་པའོ། །གཏོར་མ་གསུམ་སོ་སོར་ཡོད་ན་
རབ། འབྲིང་ཟུར་གསུམ་གཅིག་ལ་བསྡུ། ཐ་མ་མར་ཐུད་སོགས་ལ་བསྔོས་ཀྱང་ཆོག །འགྲོ་ན་འགྲོ་ཕྱོགས་སུ་ཕུལ། བྱ་ཁྱི་དང་མི་ལ་མི་སྦྱིན་དངོས་གྲུབ་ཏུ་རོལ་པར་བྱ། ཞེས་ཨ་རཱ་གས་བསྒྲིགས་པའོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།