གཡུ་སྒྲོན་མའི་སྐོང་བ།
དེ་ནས་སྐོང་བ་བྱ་བར་སྤྲོན། ཧྲཱི༔ སྲིང་གཅིག་རྡོ་རྗེ་གཡུ་སྒྲོན་མའི། །ཐུགས་དམ་གཉན་པོ་བདག་གིས་བསྐང་། །དམ་ཚིག་ཉམས་པ་ཐམས་ཅད་བཤགས། །གང་བཅོལ་ལས་རྣམས་ཁྱོད་ཀྱིས་སྒྲུབས། །མཆོད་ཡོན་ཞབས་བསིལ་མེ་ཏོག་སྤོས། །མར་མེ་དྲི་དང་ཞལ་ཟས་དང་། །རོལ་མོ་སྒྲ་དབྱངས་ཐམས་ཅད་ཀྱིས། །གཡུ་སྒྲོན་འཁོར་བཅས་ཐུགས་དམ་བསྐང་། །འདོད་ཡོན་ལྔ་དང་རིན་ཆེན་བདུན། །བཀྲ་ཤིས་རྟགས་བརྒྱད་ལ་སོགས་པའི། །ཕྱི་ནང་གསང་བའི་མཆོད་རྫས་ཀྱིས། །གཡུ་སྒྲོན་འཁོར་བཅས་ལྟ་ཐུགས་དམ་བསྐང་། །གཡག་ལུག་ར་གསུམ་ལྷ་འབྲི་དང་། །དཀོར་ནོར་རི་དྭགས་གཡུང་དྭགས་སོགས། །མཐུན་རྫས་རྣམ་པ་སྣ་ཚོགས་ཀྱིས། །གཡུ་སྒྲོན་འཁོར་བཅས་ཐུགས་དམ་བསྐང་། །བདག་ཅག་བག་མེད་དབང་གྱུར་པས། །སྡོམ་པ་གསུམ་དང་འགལ་བ་ཡི། །ཉམས་པ་ཐམས་ཅད་མཐོལ་ཞིང་བཤགས། །བཟོད་པར་བཞེས་ནས་དགྱེས་པར་མཛོད། །ཁྱེད་ལ་ཕྲིན་ལས་བཅོལ་བ་ནི། །དཔལ་ལྡན་བླ་མའི་སྐུ་ཚེ་སྲིངས། །བདག་ཅག་དཔོན་སློབ་འཁོར་བཅས་ཀྱི། །མི་མཐུན་རྐྱེན་དང་བར་ཆད་སོལ། །
ཕ་རོལ་བྱད་དང་རྦོད་གཏོང་དང་། །ཀག་དང་སྲི་དང་ལྟས་ངན་དང་། །རྨི་ལམ་མཚན་ལྟས་ངན་པ་སོགས། །མི་མཐུན་ཕྱོགས་རྣམས་ཐམས་ཅད་ཟློག །བདག་དང་བདག་ལ་སྡང་བ་ཡི། །དམ་ཉམས་སྡིག་ཅན་དགྲ་བགེགས་འདི། །ལོ་ཟླ་ཞག་ཏུ་མ་བཞག་པར། །ད་ལྟ་ཉིད་དུ་མྱུར་དུ་སྒྲོལ། །ཁྱོད་ནི་སྲུང་མ་ཐུགས་དམ་ཅན། །བདག་ནི་རྣལ་འབྱོར་དམ་ཚིག་ཅན། །ཁྱེད་དང་དམ་ཚིག་གཅིག་པའི་ཕྱིར། །བཅོལ་བའི་ཕྲིན་ལས་འགྲུབ་པར་མཛོད།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།