གཡུ་སྒྲོན་མའི་འཕྲིན་བཅོལ།
དེ་ནས་གཡུ་སྒྲོན་མའི་གསོལ་ཁ་ཡོད་ན་བྱིན་རླབས་བསྔོ་དབྱངས་བྱས་ནས་བཀྱགས་ལ༔ ཧོ༔ དམ་རྫས་བརྒྱན་པའི་གཏོར་མ་རྒྱ་ཆེན་པོ་འདི་ཡང་༔ ལྷ་སྨན་ཆེན་མོ་རྡོ་རྗེ་གཡུ་སྒྲོན་མ་ལ་གསོལ་ལོ༔ མཆོད་དོ༔ བསྟོད་དོ༔ འདྲེན་ནོ༔ འབུལ་ལོ༔ རིགས་བཞིའི་སྨན་བཙུན་མཆེད་བཞི་འཁོར་དང་བཅས་པ་ལ་གསོལ་ལོ༔ མཆོད་དོ༔ བསྟོད་དོ། འདྲེན་ནོ༔ འབུལ་ལོ༔ རྡོ་རྗེ་བརྟན་མ་བཅུ་གཉིས་སོ་སོའི་འཁོར་དང་གཡོག་དང་བཅས་པ་ལ་གསོལ་ལོ༔ མཆོད་དོ༔ བསྟོད་དོ༔ འདྲེན་ནོ༔ འབུལ་ལོ༔ གཞན་ཡང་འཁོར་དང་ཡང་འཁོར་སྤྲུལ་པ་ཡང་སྤྲུལ་གྱི་སྨན་མོ་འབུམ་ཕྲག་དང་ཡུལ་ལྷ་གནས་བདག་ཟ་ལྷ་ཟོ་དོར་དཀོར་བདག་བཀའ་སྲུང་དམ་ཅན་གྱི་ཚོགས་དང་བཅས་པ་ལ་གསོལ་ལོ༔ མཆོད་དོ༔ བསྟོད་དོ༔ འདྲེན་ནོ༔ འབུལ་ལོ༔ མཉེས་ཤིང་ཚིམས་དགའ་ཞིང་མགུ་ནས་སྤྱིར་སངས་རྒྱས་ཀྱི་བསྟན་པ་སྲུངས་ཤིག༔ དཀོན་མཆོག་གི་དབུ་འཕང་བསྟོད་ཅིག༔ རྣལ་འབྱོར་པའི་སྐུ་ཚེ་སྲིངས་ཤིག༔ དགེ་འདུན་གྱི་ཆེ་བ་ཐོན་ཅིག༔ འཇིག་རྟེན་ཁམས་ཀྱི་བདེ་སྐྱིད་སྤེལ་ཅིག༔ ཆར་ཆུ་དུས་སུ་འབེབས་པར་མཛོད་ཅིག༔ རྩྭ་ཁ་ལོ་
ཐོག་ལེགས་པར་མཛོད་ཅིག༔ མི་ནད་ཕྱུགས་ནད་གཅན་གཟན་གྱི་གནོད་འཚེ་མེད་པར་མཛོད་ཅིག༔ ཕྱི་ནང་གི་འཁྲུག་རྩོད་དང་འཐབ་འཁོན་མེད་པར་མཛོད་ཅིག༔ རྣལ་འབྱོར་པ་བདག་ཅག་ཡོན་མཆོད་ཐམས་ཅད་ཀྱི་མི་ལ་ན་ཚ་མ་བཏང་ཅིག་ཕྱུགས་ལ་གོད་ཀ་གཅན་སྤྱང་མ་བཏང་ཅིག༔ སད་སེར་མུ་གེ་མ་བཏང་ཅིག༔ དགྲ་རྐུན་དང་གོད་ཁ་མ་བཏང་ཅིག༔ སྡོད་པའི་རྟེན་ས་མཛོད་ཅིག༔ འགྲོ་ན་ལམ་ཆོས་ཤིག༔ ཚེ་དང་བསོད་ནམས་སྤེལ་ཅིག༔ དཔལ་དང་གྲགས་པ་སྒྲུབས་ཤིག༔ འཁོར་དང་བསྟན་པ་སྲུངས་ཤིག༔ ཉིན་གསུམ་གྱི་བྱ་ར་མཛོད་ཅིག༔ མཚན་གསུམ་གྱི་མེལ་ཆེ་མཛོད་ཅིག༔ དགྲ་བྱུང་ན་བྱ་ཐོངས་ཤིག༔ དུག་བྱུང་ན་སྨན་ཐོངས་ཤིག༔ མཉམ་གཉིས་ཀྱི་གཡུལ་འགྱེད་ན་དམག་དཔོན་ལ་རེའོ༔ རྒྱལ་ཁ་རླུང་ཁ་བདག་ལ་བྱིན་ཞིག༔ ཇག་ལ་འགྲོ་ན་ཇག་དཔོན་ལ་རེའོ༔ བུ་རྟ་སྲུང་ལ་དགྲ་ནོར་ལོངས་ཤིག༔ མཉམ་གཉིས་ཀྱི་མི་དང་ཕྱུགས་ནི་འགྲན་ན༔ བེའུ་ལུག་གི་འཕེལ་ཁ་རེའོ༔ བདག་ལ་རྐང་བཞི་ནོར་ཕྱུགས་ཀྱི་དངོས་གྲུབ་སྩོལ་ཅིག༔ མཉམ་གཉིས་ཀྱི་མི་དང་བུ་ནི་འགྲན་ན༔ རིགས་རྒྱུད་བཙན་
དར་དཔའ་རྩལ་རེའོ༔ མི་འཕེན་རྟ་ཧྲག་དཔའ་རྩལ་སྟོབས་ཀྱི་དངོས་གྲུབ་སྩོལ་ཅིག༔ རྨ་གཡང་ཟས་ཀྱི་དངོས་གྲུབ་སྩོལ་ཅིག༔ བང་མཛོད་ནོར་གྱི་དངོས་གྲུབ་སྩོལ་ཅིག༔ རྐང་བཞི་ཕྱུགས་ཀྱི་དངོས་གྲུབ་སྩོལ་ཅིག༔ ལྷབ་ལྷུབ་གོས་ཀྱི་དངོས་གྲུབ་སྩོལ་ཅིག༔ སྲ་བརྟན་གོ་ཆའི་དངོས་གྲུབ་སྩོལ་ཅིག༔ གསེར་དངུལ་རིན་ཆེན་གྱི་དངོས་གྲུབ་སྩོལ་ཅིག༔ ཇ་དར་ལོངས་སྤྱོད་ཀྱི་དངོས་གྲུབ་སྩོལ་ཅིག༔ འཛད་མེད་གཏེར་གྱི་དངོས་གྲུབ་སྩོལ་ཅིག་འཆི་མེད་ཚེའི་དངོས་གྲུབ་སྩོལ་ཅིག༔ ནད་མེད་བདེ་བའི་དངོས་གྲུབ་སྩོལ་ཅིག༔ མ་གཅིག་ལྟར་དུ་བྱམས་པས་སྐྱོངས་ཤིག༔ སྲིང་གཅིག་ལྟར་དུ་གདུང་སེམས་བསྐྱེད་ཅིག༔ གྲོགས་གཅིག་ལྟར་དུ་འབྲལ་མེད་སྐྱོངས་ཤིག༔ བྲན་མོ་ལྟར་དུ་འཕྲིན་ལས་སྒྲུབས་ཤིག༔ མཐུ་དང་ནུས་པ་བསྐྱེད་ཅིག༔ རྟགས་དང་མཚན་མ་སྟོན་ཅིག༔ བཀའ་དང་དམ་ལ་མ་འདའ་ཞིག༔ རྫུན་དང་གཡོ་སྒྱུ་མ་མཛད་ཅིག༔ ལེ་ལོ་དང་བཏང་སྙོམས་མ་མཛད་ཅིག༔ ཁྱད་པར་གསང་སྔགས་བླ་ན་མེད་པའི་བསྟན་པ་དར་ཞིང་རྒྱས་པར་མཛོད་ཅིག༔ བསྟན་འཛིན་གྱི་སྐྱེས་བུ་དམ་པ་གང་ཡིན་པ་རྣམས་ཀྱི་སྐུ་ཚེ་དང་
བསྟན་པ་མཛད་པ་ཕྲིན་ལས་ཐམས་ཅད་དར་ཞིང་རྒྱས་པར་མཛོད་ཅིག༔ བསྟན་པ་ལ་ཕན་པའི་སྦྱིན་བདག་རྣམས་ཆོས་སྲིད་དབང་ཐང་རྒྱས་པར་མཛོད་ཅིག༔ སློབ་དཔོན་ཆེན་པོ་པདྨ་འབྱུང་གནས་ཀྱིས་བོད་ཁ་བ་ཅན་གྱི་བསྟན་པ་སྐྱོང་བར་ཁྱེད་རྣམས་བསྐོས་པའི་དམ་ཚིག་དྲན་པར་མཛོད་ཅིག༔ ཁྱད་པར་རྣལ་འབྱོར་པ་བདག་ཅག་མི་ནོར་ཐམས་ཅད་ཀྱི་བསམ་པ་སྒྲུབས༔ རེ་བ་སྐོངས༔ མཐུན་རྐྱེན་ཐམས་ཅད་སྒྲུབས༔ འགལ་རྐྱེན་ཐམས་ཅད་སོལ༔ ཡག་དང་སྤྲོད༔ ཉེས་པ་སྟོང་དང་བསྣོལ༔ ཡོ་བ་ཡོད་ན་བསྲང་༔ གས་པ་ཡོད་ན་བསྲུབ༔ ཆག་པ་ཡོད་ན་སྦྱོར༔ ཆད་པ་ཡོད་ན་མཐུད༔ ཅི་བསམ་གྱི་དོན་ཐམས་ཅད་མྱུར་དུ་སྒྲུབས༔ སྡང་བྱེད་ཀྱི་དགྲ་སོད༔ གནོད་བྱེད་ཀྱི་བགེགས་ཐུལ༔ འཆི་བདག་གི་བདུད་བསྒྱུར༔ བར་ཆད་གློ་བུར་གྱི་རྐྱེན་མི་མཐུན་པ་ཐམས་ཅད་ཟློག༔ དམུ་གཡང་གི་ཟས་ནོར་ལོངས་སྤྱོད་ཐམས་ཅད་སྤེལ༔ བདག་གི་ཚེ་བསོད་ནམས་ཁ་རྗེ་དབང་ཐང་སྙན་གྲགས་དཔལ་འབྱོར་མངའ་ཐང་སྲོག་ལུས་རླུང་རྟ་བླ་གཟའ་གདུལ་བྱ་ཕྲིན་ལས་ཐམས་ཅད་དར་ཞིང་རྒྱས་ལ་ཡུན་རིང་དུ་གནས་ཤིང་བརྟན་པའི་ཕྲིན་ལས་སྡོང་གྲོགས་རྒྱ་ཆེན་པོ་
མྱུར་དུ་མཛོད་ཅིག༔ བདག་གི་ལས་དང་བྱ་བ་ཅི་བྱེད་ཐམས་ཅད་དཀར་པོ་ཆོས་དང་མཐུན་པའི་སྡོང་གྲོགས་རྒྱ་ཆེན་པོ་མཛོད་ཅིག༔ བཀྲ་ཤིས་བདེ་སྐྱིད་བསོད་ནམས་ཟས་ནོར་ཐམས་ཅད་ཕུན་སུམ་ཚོགས་པར་གྱུར་ཅིག༔ ཨོཾ་བཛྲ་མ་མཱ༔ ལ་ལཱ༔ ལི་ལཱི༔ ས་པཱ་རི་ཝཱ་ར་ཨི་དམ་སོགས། སརྦ་པཱུ་ཙ་ཧོ༔ ཨོཾ་བཛྲ་པྲ་མོ་ཧཱ་བ་སུ་སིདྡྷི་ན་ན་ཁ་དྷེ་སིདྡྷི་ཧཱུྃ་ཛཿཧཱུྃ༔ ཞེས་བཤོས་བུ་རིའི་ཕྱོགས་སུ་ཕུལ། བསང་དང་འབྲེལ་ན་བསང་ནང་དུ་ཕུལ་ལོ། །ཡང་ན་དངོས་གྲུབ་ཏུ་རོལ་ལོ། །སྔགས་འཆང་རཱ་ག་ཨ་སྱས་སྦྱར་བའོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།