རྡོ་རྗེ་གཡུ་སྒྲོན་མའི་བསྐང་གསོལ་བསང་མཆོད་མངའ་གསོལ་སྦྲགས་མ།
རྡོ་རྗེ་གཡུ་སྒྲོན་མའི་བསྐང་གསོལ། བསང་མཆོད་མངའ་གསོལ་སྦྲགས་མ་བཞུགས་སོ།།
ན་མོ་ལོ་ཀ་ཌཱ་ཀི་ནཱི་ཡེ། རྡོ་རྗེ་གཡུ་སྒྲོན་མ་ཡི་ནི། །བསྐང་གསོལ་བསང་མཆོད་མངའ་གསོལ་རྣམས། །སྦྲགས་མའི་རིམ་པ་འདི་ལྟར་ཏེ། །མཆོད་གཏོར་རྒྱས་བསྡུས་ཅི་འབྱོར་བཤམས། །རང་ཉིད་ཡི་དམ་ལྷར་གསལ་བས། །ཨོཾ་སྭ་བྷ་ཝ་སོགས། སྟོང་པའི་ངང་ལས་མདུན་གྱི་གཞིར། །ཤེལ་གུར་དབུས་སུ་པད་ཟླའི་སྟེང་། །ཧཱིཝཡིག་དཀར་པོའི་འཕྲོ་འདུས་ལས། །ལྷ་སྨན་གཡུ་སྒྲོན་སྐུ་མདོག་དཀར། །ཤ་བ་ཡུ་མོ་ལ་ཆིབས་ནས། །ནེའུ་སེང་ནང་ནས་མེ་ཏོག་འཐུ། །དར་དང་རིན་ཆེན་རྒྱན་གྱིས་བརྒྱན། །གཡས་པས་མདའ་དར་གཡོན་མེ་ལོང་། །བཤུད་གླུ་ཀྱུར་ཀྱུར་དགའ་བའི་ཚུལ། །
མཆེད་བཞི་མཁའ་འགྲོ་དར་ཐོགས་བརྒྱད། །བརྟན་སྐྱོང་ཡ་མ་སྨན་ཕྲན་འབུམ། །དཀར་མོ་ཉེར་བཞི་ཁྱུང་དྲག་རྩལ། གཟུངས་བརྗོད་ཞེ་བརྒྱད་དམག་དཔོན་སོགས། །འཁོར་བཅས་ཁྲོམ་ཚོགས་ལྟ་བུར་གསལ། །གནས་གསུམ་འབྲུ་གསུམ་ས་བོན་ལས། །འོད་ཟེར་འཕྲོས་པས་སྤྱན་དྲངས་གྱུར། །བྷྱོ༔ ཀུན་ཏུ་བཟང་མོའི་ཐུགས་ཀྱི་ཆོ་འཕྲུལ་ལས། །ཡེ་ཤེས་མཁའ་འགྲོ་རྡོ་རྗེ་གཡུ་སྒྲོན་མ། །འཇིག་རྟེན་འདས་ཀྱང་འཁོར་བའི་ཆ་ལུགས་འཛིན། །བཞུགས་པའི་གནས་དང་མཛད་པ་བསམ་མི་ཁྱབ། །ལྷ་མོ་འཇིག་རྟེན་གསུམ་དབང་མཛེས་པ་
མོ། །ཚངས་རིགས་ལྷ་ཡི་གནས་ནས་གཤེགས་སུ་གསོལ། །བརྒྱ་བྱིན་སྲས་མོ་མེ་ཏོག་མནྡ་ར། །རི་རབ་རི་ཡི་རྩེ་ནས་གཤེགས་སུ་གསོལ། །ནམ་མཁའ་གཡུ་ཡི་ལྡིང་ཁང་ན་བཞུགས་ཚེ། །ཉི་འོད་འབར་བའི་སྨན་གཅིག་གཤེགས་སུ་གསོལ། །གཉན་ཆེན་ཐང་ལྷའི་བཙུན་མོ་མཛད་པའི་ཚེ། །གནམ་མཚོ་ཕྱུག་མོའི་ནང་ནས་གཤེགས་སུ་གསོལ། །རྡོ་རྗེ་ལེགས་པའི་དགྱེས་སྡེ་མཛད་པའི་ཚེ། །ཤ་མེད་གངས་དཀར་རྩེ་ནས་གཤེགས་སུ་གསོལ། །སྐྱེས་བུ་ལུང་བཙན་སྲིང་གཅིག་མཛད་ཙམ་ན། །སྨན་ལུང་གཡུ་མཚོའི་ནང་ནས་གཤེགས་སུ་གསོལ། །དབུས་གཙང་རུ་བཞིའི་སྲུང་མ་མཛད་པའི་ཚེ། །དབུས་རུ་སྙིང་ཚལ་གནས་ནས་གཤེགས་སུ་གསོལ། །རང་བྱུང་མཆོད་རྟེན་སྲུང་མ་མཛད་པའི་ཚེ། །ཙཱ་རི་གཡུ་མཚོའི་འགྲམ་ནས་གཤེགས་སུ་གསོལ། །བཀྲ་ཤིས་ལྗོངས་ཀྱི་སྲུང་མ་མཛད་པའི་ཚེ། །ཙཱ་རི་མཚོ་དཀར་གནས་ནས་གཤེགས་སུ་གསོལ། །ཙཱ་རི་ཏྲ་ཡི་ཞིང་སྐྱོང་མཛད་པའི་ཚེ། །གཅིག་ཆར་རྡོ་ཡི་ཕུག་ནས་གཤེགས་སུ་གསོལ། །འབྲས་མོ་ལྗོངས་ཀྱི་སྒོ་སྲུང་མཛད་པའི་ཚེ། །ཕོ་བྲང་སྨྱུག་རིའི་རྩེ་ནས་གཤེགས་སུ་གསོལ། །རྒྱ་གར་ཡུལ་གྱི་སྲུང་
མ་མཛད་པའི་ཚེ། །གསེར་མཚོ་དངུལ་མཚོའི་གནས་ནས་གཤེགས་སུ་གསོལ། །གསང་སྔགས་རྒྱུད་ཀྱི་སྲུང་མ་མཛད་པའི་ཚེ། །ཨོ་རྒྱན་མཁའ་འགྲོའི་གླིང་ནས་གཤེགས་སུ་གསོལ། །གཙུག་ལག་ཁང་གི་སྲུང་མ་མཛད་པའི་ཚེ། །སྐར་ཆུང་རྡོ་རྗེ་དབྱིངས་ཀྱི་ལྷ་ཁང་དང་། །བསམ་ཡས་སྒོ་ཁང་གནས་ནས་གཤེགས་སུ་གསོལ། །བཀའ་གདམས་གླེགས་བམ་སྲུང་མ་མཛད་པའི་ཚེ། །བོད་ཡུལ་དགོན་སྡེ་ཀུན་ནས་གཤེགས་སུ་གསོལ། །རྡོ་རྗེ་ཕུར་པའི་སྲུང་མ་མཛད་པའི་ཚེ། །བལ་མོ་ཚ་བ་རོང་ནས་གཤེགས་སུ་གསོལ། །མདོ་ཁམས་སྒང་གི་ཡུལ་ལྷ་མཛད་པའི་ཚེ། །དབ་ལུང་དེབ་རྒྱས་གནས་ནས་གཤེགས་སུ་གསོལ། །ཚ་བ་སྒང་གི་ཡུལ་ལྷ་མཛད་པའི་ཚེ། །ཁེ་ཤོད་ཤེལ། གུར་ནང་ནས་གཤེགས་སུ་གསོལ། །མཆེད་ལྔ་དཀར་མོ་བརྒྱ་དང་བརྟན་སྐྱོང་ཚོགས། །དཀར་མོ་ཉེར་བཞི་གཟུངས་བརྗོད་བཞི་བཅུ་བརྒྱད། །སྨན་ཕྲན་འབུམ་དང་བཅས་ཏེ་གཤེགས་སུ་གསོལ། །མིང་པོ་དམག་དཔོན་ལ་སོགས་འཁོར་གྱི་ཚོགས། །བཀའ་དང་དམ་ལ་གནས་པའི་དགེ་བསྙེན་རྣམས། །དམ་ཚིག་དབང་གིས་དཔུང་དང་གྲོགས་ལ་
བྱོན། །འཁོར་དུ་གཏོགས་ཀྱང་དམ་ལ་མི་གནས་པ། །ཆོས་ལ་མི་དགའ་ནག་ཕྱོགས་འབྱུང་པོ་རྣམས། །གནས་འདིར་མ་འོངས་མ་འཚེ་རང་སར་སྡོད། །གལ་ཏེ་རྗེས་སུ་འབྲངས་ནས་གནོད་བྱེད་ན། །ཁྲོ་ཆེན་བདུད་རྩི་འཁྱིལ་པས་ཚར་ཆོད་ཅིག །ཨོཾ་ཨ་མྲྀ་ཏེ་ཧཱུྃ་ཕཊ། གནོད་བྱེད་འབྱུང་པོ་ཨུ་ཙ་ཏ་ཡ་ཕཊ༔ ཨོཾ་བཛྲ་པྲ་མོ་ཧཱ་ས་པ་རི་ཝཱ་ར་བཛྲ་ས་མ་ཡ་ཛཿཛཿ བྷོ། ཡིད་ལས་སྤྲུལ་པའི་རིན་ཆེན་ཤེལ་གུར་དབུས། །སྣ་ཚོགས་པདྨ་ཟླ་བ་རིན་ཆེན་ཁྲི། །གཙོ་དང་འཁོར་དུ་འཚམས་པའི་གདན་ཁྲི་ལ། །ཇི་སྲིད་མཆོད་པ་འབུལ་བ་དེ་སྲིད་དུ། །དགྱེས་ཤིང་བརྟན་པའི་ཚུལ་གྱིས་བཞུགས་སུ་གསོལ། །སྔོན་ཚེ་ཆེ་མཆོག་རྟ་མགྲིན་གསང་བའི་བདག །ཤཱཀ་ཐུབ་པད་འབྱུང་དྷ་ཀི་སེང་གདོང་མ། །གཏུམ་མོ་སྔོ་བསངས་མ་དང་བི་ན་མོ། །ནག་པོ་སྤྱོད་པ་ཕྱོགས་ཀྱི་གོ་ཆ་དང་། །ཨ་ཏི་ཤ་དང་བཞད་པ་རྡོ་རྗེ་དང་། །ཀརྨ་པཀྴི་རང་བྱུང་རྡོ་རྗེ་དང་། །དྲི་མེད་འོད་ཟེར་དབྱངས་ཅན་བཞད་པ་དང་། །དབང་ཕྱུག་རྡོ་རྗེ་ངག་གི་དབང་ཕྱུག་སོགས། །རིག་འཛིན་རྣམས་ཀྱི་སྤྱན་སྔར་ཁས་བླངས་པའི། །སྔོན་གྱི་དམ་ཚིག་གཉན་པོ་དྲན་མཛོད་ལ། །བདག་
གིས་གང་བཅོལ་ཕྲིན་ལས་འགྲུབ་པར་མཛོད། །ཨོཾ་བཛྲ་པྲ་མོ་ཧཱ་ས་པ་རི་ཝཱ་ར་ཛཿཧཱུྃ་བཾ་ཧོཿ པདྨ་ཀ་མ་ལཱ་ཡེ་སྟེ། ས་མ་ཡ་ཧཱུྃ། ས་མ་ཡ་ཧོ། ཨཱི། དངོས་སུ་འབྱོར་དང་ཡིད་ཀྱིས་རྣམ་སྤྲུལ་པའི། །མཆོད་ཡོན་མེ་ཏོག་བདུག་སྤོས་མར་མེ་དྲི། །ཞལ་ཟས་རོལ་མོ་གཟུགས་སྒྲ་དྲི་རོ་རེག །བཀྲ་ཤིས་རྫས་རྟགས་བརྒྱད་དང་རིན་ཆེན་བདུན། །གཡག་ལུག་བྱ་ར་རི་དྭགས་ཆུ་གནས་གཟུགས། །མདའ་དར་མེ་ལོང་སྦ་གླིང་ཟས་སྣའི་ཕུད། །ཕྱེ་མར་སྤོས་དཀར་བསངས་ཤིང་དུད་པའི་སྤྲིན། །ཕྱར་དར་གཡབ་དར་མཆོད་བསྒྲུབ་བསྐང་བའི་རྫས། །འབྲུ་སྣ་སྨན་སྣ་གོ་ཁྲབ་སྤྱན་གཟིགས་ཚོགས། །གསེར་སྐྱེམས་འོ་ཞོ་ཇ་ཆང་ཕུད་རྒོད་ཚོགས། །ཤིང་ཐོག་དར་ཟབ་བལ་ཚོན་ཤུག་ཏེལ་སོགས། །མཐུན་རྫ་ས་དཔག་མེད་གཡུ་སྒྲོན་འཁོར་བཅས་མཆོད། །ཤ་སྣ་སྙིང་སྣ་ཁྲག་སྣ་ཨ་མྲྀ་ཏ། །ཤ་ལྔ་བདུད་རྩི་ལྔ་དང་ཡེ་ཤེས་ལྔ། །ཞུ་ཞིང་ཁོལ་བ་ཟག་མེད་བདུད་རྩིའི་མཚོ། །ག་ཎ་ཙཀྲ་ཚོགས་ཀྱི་ལོངས་སྤྱོད་འདི། །གསང་སྔགས་སྲུང་མ་དྷ་ཀི་གཡུ་སྒྲོན་མ། །མ་མོ་མཁའ་འགྲོའི་ཚོགས་དང་བཅས་ལ་འབུལ། །འཁོར་དང་བཅས་པའི་
ཐུགས་དམ་བསྐང་གྱུར་ཅིག །ཨོཾ་བཛྲ་པྲ་མོ་ཧ་ས་པ་རི་ཝཱ་ར་ཨགྷོ་པཱཏྱཾ་པུཔྤེ་དྷཱུ་པེ་ཨཱ་ལོ་ཀེ་གནྡྷེ་ནི་ཝི་ཏྱཱ་ཤབྟ་རཱུ་པ་ཤབྟ་གནྡྷེ་ར་ས་སྤ། ཨཥཱ་མངྒ་ལཾ་དྲ་བྱ་སརྦ་པཱུ་ཛ་པྲ་ཏཱི་ཛ་ཧོ༔ པཉྩ་ཨ་མྲྀ་ཏ་བ་ལིཾ་ཏ་རཀྟ་ག་ཎ་ཙཀྲ་ཁ་ཁ་ཁཱ་ཧི་ཁཱ་ཧི། ཧཱུྃ། སྣང་སྲིད་ཐམཾས་ཅད་ཀུན་བཟང་ཡུམ་གྱི་ཀློང་། །ཀུན་ཏུ་བཟང་མོའི་རིག་པའི་རང་རྩལ་ལས། །རྒྱལ་བའི་བསྐྱེད་ཡུམ་རྡོ་རྗེ་གཡུ་སྒྲོན་མ། །ཆོས་ཉིད་ཞི་བའི་ངང་ལས་མ་གཡོས་ཀྱང་། །སྣ་ཚོགས་སྤྲུལ་པའི་ཆོ་འཕྲུལ་ཅིར་ཡང་སྟོན། །བཅོམ་ལྡན་འཁོར་ལོ་སྡོམ་པའི་དཀྱིལ་འཁོར་གྱི། །མཚམས་མ་དཔའ་མོ་གཤིན་རྗེ་མཆེ་བ་མ། །གཡུ་སྒྲོན་མཆེ་བ་ཅན་མའི་ཐུགས་དམ་བསྐང་། །བདེ་མཆོག་རྡོ་རྗེ་མཁའ་འགྲོའི་རྒྱུད་ཆེན་ལས། །ཡུལ་ཆེན་ཉེར་བཞིའི་ནང་ནས་ཙཱ་རི་ཏྲའི། །ལྷ་མོ་བྲག་གི་ཁྱིམ་ལ་བརྟེན་བཅས་པའི། །བོད་སྐྱོང་ལྷན་ཅིག་སྐྱེས་མའི་ཐུགས་དམ་བསྐང་། །ཁྱོད་ནི་ཕ་མ་མེད་པའི་སྔོན་ནས་བྱུང་། །སངས་རྒྱས་རྣམས་ལས་ཤིན་ཏུ་སྔ་བ་སྟེ། །སྲིད་པ་ཆགས་བྱེད་སྲིད་པའི་རྒྱལ་མོ་སྟེ། །རལ་གཅིག་གཡུ་ཡི་སྒྲོན་མའི་ཐུགས་དམ་བསྐང་། །མགོན་པོ་ཁྲག་མཚོ་ཁོལ་ཆེན་རྒྱུད་ལས་ནི། །པར་པ་ཏ་ཡི་
རང་བྱུང་མཆོད་རྟེན་བསྲུང་། །གཡུ་མཚོའི་འགྲམས་ནས་དྷཱ་ཀི་ཟ་བྱེད་གདོང་། །དམར་ནག་དབུ་དགུ་ཕྱག་བརྒྱད་ལྕགས་སྤྱང་ཆིབས། །སྲིད་གསུམ་ཟ་བྱེད་ཤ་ཟ་ཁ་མོ་ཆེ། །མ་མོ་གཡུ་སྒྲོན་མ་ཡི་ཐུགས་དམ་བསྐང་། །གཟའ་བདུད་མིག་དམར་ལྕམ་སྲིང་ཚུལ་དུ་སྟོན། །གཡུ་ཡི་རྡོ་རྗེ་ཐོད་བཅིངས་གཡུ་ཕུར་འདྲིལ། །བེར་སྔོན་གསོལ་ཞིང་ཆུ་རྟ་སྔོན་པོ་བཅིབས། །རྡོ་རྗེ་གཞོན་ནུའི་བཀའ་སྲུང་ཆེན་མོ་སྟེ། །བསྲེ་མོ་རྡོ་རྗེ་ཕག་བྱིན་ཞེས་སུ་གྲགས། །གཡུ་སྒྲོན་བསྲེ་ཡི་ལྷ་མོའི་ཐུགས་དམ་བསྐང་། །ཁྱོད་ནི་གཡུང་དྲུང་བོན་གྱི་དགྲ་བླ་མོ། །པདྨ་ཐོད་ཕྲེང་རྩལ་ལ་རྫུ་འཕྲུལ་འགྲན། །དེ་ཚེ་དམ་ལ་བཏགས་ནས་སྲོག་སྙིང་ཕུལ། །ཤ་མེད་གངས་དཀར་རྡོ་རྗེ་གཡུ་སྒྲོན་མ། །བརྟན་སྐྱོང་ཀུན་གྱི་གཙོ་མོའི་ཐུགས་དམ་བསྐང་། །འཇམ་དཔལ་རྩ་བའི་རྒྱུད་ལས་བཀའ་སྩལ་པ། །པོ་ཊ་ལ་ཡི་གནས་ན་སྒྲོལ་མ་བཞུགས། །སྤྲུལ་པས་འཛམ་གླིང་ཆུ་བཞིའི་རྒྱུད་ཀུན་ཁྱབ། །བྱང་ཆུབ་སེམས་ལྡན་ཀུན་གྱི་རྗེས་སུ་འབྲངས། །གསུངས་ལྟར་རྒྱ་གར་གསེར་མཚོ་དངུལ་མཚོ་ནས། །ཇོ་བོ་རྗེ་ཡི་རྗེས་སུ་ཁྱོད་འབྲངས་ནས། །ཇོ་བོས་བཀའ་
གདམས་གླེགས་བམ་སྲུང་མར་བསྐོས། །ད་ལྟ་དགོན་སྡེ་ཀུན་གྱི་དཀོར་བདག་མཛད། །དཀོར་བདག་གཡུ་ཡི་སྒྲོན་མའི་ཐུགས་དམ་བསྐང་། །ཁྲི་སྲོང་སྲས་པོ་སད་ན་ལེགས་ཞེས་པས། །ཀར་ཆུང་རྡོ་རྗེ་དབྱིངས་ཀྱི་ལྷ་ཁང་བཞེངས། །དེ་ཡི་གཙུག་ལག་ཁང་གི་སྲུང་མ་དང་། །བསམ་ཡས་སྒོ་སྲུང་ཉིད་དུ་ཨོ་རྒྱན་གྱིས། །བཀའ་བསྒོས་སད་ན་ལེགས་ཀྱི་སྲུང་མར་གྱུར། །གཙུག་ལག་སྲུང་མ་གཡུ་སྒྲོན་ཐུགས་དམ་བསྐང་། །གཡུ་སྒྲོན་ལ་སོགས་བརྟན་མ་བཅུ་གཉིས་ནི། །ཉིན་གསུམ་གངས་དཀར་རྩེ་ལ་བཞུགས་མཛད་ཅིང་། །མཚན་གསུམ་རྒྱ་གར་དུར་ཁྲོད་ཀུན་ཏུ་རྒྱུ། །དེ་ཚེ་མཁའ་འགྲོ་སེང་གེའི་གདོང་ཅན་དང་། །ནག་པོ་པ་སོགས་གྲུབ་ཆེན་ཐམས་ཅད་ཀྱིས། །བཀའ་བསྒོས་དམ་བཞག་གསང་སྔགས་སྲུང་མར་བསྐོས། །བཀའ་སྲུང་གཡུ་སྒྲོན་མ་ཡི་ཐུགས་དམ་བསྐང་། །སྔོན་ཚེ་བརྒྱ་བྱིན་སྲས་མོར་ཁྱོད་སྤྲུལ་ཚེ། །དྲི་ཟ་ཟུར་ཕུད་ལྔ་ཡི་བཙུན་མོར་བྱིན། །ལྷ་ཡི་ཡུལ་ནས་མི་ཡི་ཡུལ་དུ་བྱོན། །དེ་ཚེ་ཤཱཀ་ཐུབ་ཞལ་མཐོང་དམ་ཆོས་ཐོབ། །དེང་སང་བྱང་གི་གནམ་མཚོ་ཕྱུག་མོར་གྲགས། །མཚོ་སྨན་གཡུ་སྒྲོན་མ་ཡི་ཐུགས་དམ་བསྐང་། །མེ་ལྕེ་
འབར་བའི་རྒྱུད་ལས་གསུངས་པ་ནི། །ཁྱོད་ནི་རེ་ལྡེ་མགོ་ཉག་བུ་མོར་སྤྲུལ། །བདུད་ཀྱི་ཁྲམ་ཤིང་མཚོན་གྲུ་ལག་ན་ཐོགས། །དྲེའུ་རྟ་ཆིབས་ནས་སྟོང་གསུམ་ཁྱབ་པར་ཉུལ། །དམག་དང་ཟོར་སོགས་ཕྲིན་ལས་དྲག་པོའི་བདག །འཇིག་རྟེན་ལས་ཀྱི་ལྷ་མོ་རེ་མ་ཏི། །བརྟན་མ་དམག་གི་རྒྱལ་མོར་ཞེས་སུ་གྲགས། །གཡུ་སྒྲོན་དམག་ཟོར་རྒྱལ་མོའི་ཐུགས་དམ་བསྐང་། །རེས་འགའ་ནམ་མཁའ་གཡུ་ཡི་ལྡིང་ཁང་ནས། །གནམ་ལྷ་དཀར་པོའི་དགྱེས་སྡེ་མཛད་པའི་ཚེ། །ཉི་འོད་འབར་བའི་སྨན་གཅིག་གསང་བའི་མཚན། །དཀར་མོ་འོད་ལྡན་མ་ཡི་ཐུགས་དམ་བསྐང་། །བཙན་རིགས་སུམ་བརྒྱ་དྲུག་ཅུའི་ཡོབ་རྒན་ཏེ། །བཙན་རྒྱལ་སྐྱེས་བུ་ལུང་བཙན་ལྕམ་སྲིང་ཚུལ། །བཙན་རིགས་ཡོངས་ཀྱི་ཨ་ཞེ་ཆེན་མོ་སྟེ། །ཆེ་ཞེ་གཡུ་སྒྲོན་མ་ཡི་ཐུགས་དམ་བསྐང་། །ཁྱོད་ནི་སྒྲོལ་མ་སྔོན་མོའི་དངོས་སྤྲུལ་ཏེ། །འཕགས་པ་སྤྱན་རས་གཟིགས་ཀྱི་ལྕམ་སྲིང་ཚུལ། །བྱང་ཆུབ་སེམས་ལྡན་ཀུན་གྱི་རྗེས་སུ་འབྲངས། །སེམས་མ་གཡུ་སྒྲོན་མ་ཡི་ཐུགས་དམ་བསྐང་། །མོན་པ་མོན་མོ་གཉིས་ཀྱི་སྲས་མོར་སྤྲུལ། །དམ་ཅན་རྡོ་རྗེ་ལེགས་པའི་ལྕམ་གཅིག་
སྟེ། །ལྕམ་མོ་གཡུ་སྒྲོན་མ་ཡི་ཐུགས་དམ་བསྐང་། །ལྷོ་མོན་མཚམས་སུ་འབྲས་མོའི་གནས་སྒོ་སྲུང་། །ཕོ་བྲང་སྨྱུག་རིའི་གཉན་ལ་བརྟེན་བཅས་ཏེ། །ལྷོ་ཡི་སྐྱེ་འཐིང་ཡ་མ་སྐྱོང་ཞེས་གྲགས། །སྐྱི་འཐིང་གཡུ་སྒྲོན་མ་ཡི་ཐུགས་དམ་བསྐང་། །བརྟན་མ་སྐྱོང་མ་ཀུན་དང་དམ་ཚིག་གཅིག །རྡོ་རྗེ་བགེགས་གཙོ་བཀྲ་ཤིས་ཚེ་རིང་མས། །ཁྱེད་ཅག་དམག་བསྡུས་མི་ལ་རས་ཆེན་ལ། །ཆོ་འཕྲུལ་བསྟན་དུས་ཁྱེད་ཅིག་དམ་ལ་བཏགས། །ཁྱེད་ཅག་བརྟན་མ་བདུན་ལ་ཕྱག་རྒྱ་བསྟེན། །དེ་ཚེ་ཁྱོད་མཚན་མཐིང་གི་ཞལ་བཟང་མ། །ཆོས་བརྒྱུད་འཕེལ་ཞིང་རྒྱས་པའི་གཡར་དམ་བཅས། །སྒྲུབ་བརྒྱུད་སྲུང་མ་གཡུ་སྒྲོན་ཐུགས་དམ་བསྐང་། །གྲུབ་ཐོབ་ཆེན་པོ་ཀརྨ་པཀཱི་ལ། །གངས་དཀར་ཤ་མེད་རྡོ་རྗེ་གཡུ་སྒྲོན་སོགས། །བརྟན་མ་ཀུན་གྱིས་ཕྱག་དང་བསྐོར་བ་བྱས། །བསྟན་པ་བསྲུང་བར་ཁས་བླངས་གཡར་དམ་བཅས། །གྲུབ་ཆེན་སྐུ་གཤེགས་བར་དོར་བཞུགས་པའི་ཚེ། །ཁྱེད་ཅག་རྣམས་ཀྱིས་སྤྲུལ་སྐུ་འབྱོན་པར་ཞུས། །བྱོན་ན་བསྟན་པ་བསྲུང་བའི་གཡར་དམ་བཅས། །ཙཱ་རི་མཚོ་དཀར་གནས་བདག་ཁྱོད་ཡིན་ཕྱིར། །རང་བྱུང་རོལ་པའི་རྡོ་རྗེ་མི་
བསྐྱོད་ཞབས། །དབང་ཕྱུག་རྡོ་རྗེ་དྷརྨེ་ཤྭ་རི་སོགས། །ན་རིམ་ཀུན་གྱིས་བཀའ་བསྒོས་གསོལ་མཆོད་བརྩམས། །ན་རིམ་ཀུན་གྱིས་ལྕམ་དུ་མངའ་གསོལ་ལོ། །སྒྲུབ་བརྒྱུད་སྲུང་མ་གཡུ་སྒྲོན་ཐུགས་དམ་བསྐང་། །དྲི་མེད་འོད་ཟེར་པད་གླིང་རཏྣ་གླིང་། །ཉང་སོགས་གཏེར་སྟོན་རིག་འཛིན་ཕལ་ཆེར་གྱིས། །ཁྱོད་ཀྱི་སྒྲུབ་གཞུང་མན་ངག་གཏེར་ནས་བཏོན། །གནས་སྒོ་གཏེར་སྒོ་མང་པོ་ཁྱོད་ཀྱིས་བསྟན། །གཏེར་སྲུང་གཡུ་སྒྲོན་མ་ཡི་ཐུགས་དམ་བསྐང་། །ཁྱོད་ནི་སེར་ཆགས་ཡོངས་ཀྱི་དགྲ་བླ་མོ། །བན་བོན་སྐྱ་སེར་ཀུན་གྱིས་མཆོད་ཅིང་བརྟེན། །ཡེ་ཤེས་ལྷ་མོ་དཔོན་གཡོག་ཐམས་ཅད་ཀྱི། །ཕྲིན་ལས་བསྒྲུབ་པའི་ལས་མཁན་ཁྱོད་གཅིག་པོ། །ལྷ་མོ་གཡུ་སྒྲོན་མ་ཡི་ཐུགས་དམ་བསྐང་། །ཁྱོད་ནི་འཇིག་རྟེན་འདས་ཀྱང་འཇིག་རྟེན་ཚུལ། །མཆོག་དང་ཐུན་མོང་དངོས་གྲུབ་ཀུན་སྩོལ་ནུས། །ཟས་ནོར་ལོངས་སྤྱོད་མངའ་ཐང་ཐམས་ཅད་སྤེལ། །ཁམས་གསུམ་དབང་སྡུད་སྲིད་གསུམ་ཟིལ་གནོན་པ། །ཡིད་བཞིན་ནོར་བུ་དབང་གི་རྒྱལ་པོ་འདྲ། །གཏེར་བདག་གཡུ་སྒྲོན་མ་ཡི་ཐུགས་དམ་བསྐང་། །ཁྱད་པར་བཞུགས་
གནས་མདོ་ཁམས་ཚ་བའི་སྒང་། །ཕྱི་ལྟར་བྲག་ནག་རྩེ་དགུ་གངས་ཀྱི་རི། །གཡུ་མཚོ་ཁྲག་མཚོ་བདུད་མཚོ་ན་བུན་གཏིབས། །ནང་ལྟར་གསེར་ཏིང་ཞེས་བྱ་དྲི་ཟའི་ཡུལ། །བདུད་མཁར་རྩེ་དགུ་ལྕགས་རི་ཁྲག་གི་མཚོ། །གསང་བ་བདེ་མཆོག་དམ་ཚིག་འཁོར་ལོའི་གནས། །དཔའ་བོ་མཁའ་འགྲོའི་ཚོགས་རྣམས་སྤྲིན་ལྟར་འདུ། །དེ་འདྲའི་མངའ་བདག་རྡོ་རྗེ་གཡུ་སྒྲོན་མ། །ཕྱི་ལྟར་བརྟེན་མ་སྨན་དང་ཡུལ་ལྷས་བསྐོར། །བོད་ཁམས་སྐྱོང་མ་རྡོ་རྗེ་གཡུ་སྒྲོན་མ། །གསོལ་ལོ་མཆོད་དོ་ཐུགས་དམ་བསྐང་གྱུར་ཅིག །ནང་ལྟར་བདུད་ཀྱི་བུ་མོ་རེ་མ་ཏི། །དམག་དང་ཟོར་གྱི་ལས་ལ་མངའ་མཛད་པ། །བརྟན་མ་དམག་གི་རྒྱལ་མོ་གཡུ་སྒྲོན་མ། །གསོལ་ལོ་མཆོད་དོ་ཐུགས་དམ་བསྐང་གྱུར་ཅིག །གསང་བ་དཔལ་མོ་གཤིན་རྗེ་མཆེ་བ་མ། །གཡུ་སྒྲོན་མཆེ་བ་ཅན་མ་མཁའ་འགྲོའི་ཚོགས། །གསོལ་ལོ་མཆོད་དོ་ཐུགས་དམ་བསྐང་གྱུར་ཅིག །ཡང་གསང་ཁྲོས་མ་ནག་མོའི་ཐུགས་སྤྲུལ་ཏེ། །མཐིང་ནག་ཁྲོ་མོ་ཕག་ཞལ་མཆེད་ལྔ་མ། །ཡེ་ཤེས་མཁའ་འགྲོ་རྡོ་རྗེ་གཡུ་སྒྲོན་ལ། །གསོལ་ལོ་མཆོད་དོ་ཐུགས་དམ་བསྐང་གྱུར་ཅིག །མ་མོ་རྦོད་གཏོང་
རྒྱུད་ཀྱི་བྲེ་བྲག་སྟེ། །སྲིད་པ་མ་མོ་འབུམ་གྱི་རྒྱུད་ལུང་ལས། །དཔལ་ལྡན་ལྷ་མོ་ཡེ་ཤེས་རེ་མ་ཏི། །མི་མངོན་ནམ་མཁའི་དབྱིངས་སུ་བཞུགས་པ་སྟེ། །སྤྲུལ་པ་ལྷ་མོ་སྟོང་དང་རྩ་བརྒྱད་དེ། །གནས་ཀྱང་མི་གཅིག་མཚན་ཡང་མི་གཅིག་སྟེ། །སྔགས་ཀྱང་མི་གཅིག་སོ་སོ་ཐ་དད་དེ། །ཇི་ལྟར་བྱས་ཀྱང་ངོ་བོ་གཅིག་པ་དང་། །ཇི་ལྟར་བྱས་ཀྱང་ཕྲིན་ལས་འགྲུབ་གསུངས་ལྟར། །སྤྲུལ་པ་སྟོང་རྩ་བརྒྱད་ཀྱི་ཡ་གྱལ་གཅིག །བོད་ཁམས་བརྟན་མའི་ཚུལ་དུ་བཞུགས་པ་སྟེ། །འཇིག་རྟེན་ཚུལ་དུ་སྟོན་ཀྱང་ཡེ་ཤེས་པ། །དབྱངས་ཅན་མ་དང་རྡོ་རྗེ་རོ་ལངས་མ། །ངོ་བོ་ཐུགས་རྒྱུད་དབྱེར་མེད་གཅིག་པ་སྟེ། །སྤྲུལ་པའི་ལྷ་མོ་རྡོ་རྗེ་གཡུ་སྒྲོན་མ། །གསོལ་ལོ་མཆོད་དོ་ཐུགས་དམ་བསྐང་གྱུར་ཅིག །དཔལ་ལྡན་ལྷ་མོའི་མཚན་གྱི་བརྒྱ་རྩ་ལས། །ལྷ་མོའི་མཚན་ནི་རྡོ་རྗེ་གཡུ་སྒྲོན་མ། །དཔལ་ལྡན་ལྷ་མོ་རྡོ་རྗེ་གཡུ་སྒྲོན་མ། །གསོལ་ལོ་མཆོད་དོ་ཐུགས་དམ་བསྐང་གྱུར་ཅིག །བཅོམ་ལྡན་རྡོ་རྗེ་སེམས་དང་ཕྱག་རྡོར་གྱིས། །ན་རཀ་དོང་ནས་སྤྲུགས་པའི་རྒྱུད་སྡེ་ལས། །སྲིད་པའི་སྨན་མོ་རྡོ་རྗེ་གཡུ་སྒྲོན་མར། །ཕྱག་འཚལ་ཞེས་གསུངས་
རྒྱལ་བས་ཕྱག་མཛད་པ། །།འགྲོ་བ་འདྲེན་མཛད་རྡོ་རྗེ་གཡུ་སྒྲོན་མ། །གསོལ་ལོ་མཆོད་དོ་ཐུགས་དམ་བསྐང་གྱུར་ཅིག །དམ་ཅན་སྐྱེས་བུ་རྡོ་རྗེ་ལེགས་པ་ཡི། །ཐོ་རངས་དགྱེས་སྡེ་གངས་དཀར་ཤ་མེད་མ། །ཁྱོད་ཀྱི་བྲན་མོ་ཁ་རག་དཔལ་མོ་སྟེ། །ཁྱོད་ཀྱི་ཡབ་ནི་གཉན་ཆེན་ཐང་ལྷ་ཉིད། །བརྟན་མའི་གཙོ་མོ་རྡོ་རྗེ་གཡུ་སྒྲོན་ལ། །གསོལ་ལོ་མཆོད་དོ་ཐུགས་དམ་བསྐང་གྱུར་ཅིག །ཁྱོད་ཀྱི་མིང་པོ་རྡོ་རྗེ་ཁྱུང་དྲག་རྩལ། །འཛིན་གིང་བཞི་བཅུ་རྩ་གཉིས་གཙོ་བོ་སྟེ། །བྲ་ནག་རྟིང་དཀར་ཆིབས་ཤིང་གཡག་ཐུལ་གསོལ། །དམ་ཅན་སྐྱེས་བུ་རྡོ་རྗེ་ཁྱུང་དྲག་ལ། །གསོལ་ལོ་མཆོད་དོ་ཐུགས་དམ་བསྐང་གྱུར་ཅིག །རྡོ་རྗེ་གཡུ་ཡི་སྒྲོན་མའི་དམག་དཔོན་ནི། །ཡབ་གཅིག་ལེགས་ལྡན་ནག་པོའི་ཐུགས་ལས་སྤྲུལ། །འཇིག་རྟེན་ལས་ཀྱི་མ་ཧཱ་ཀཱ་ལ་སྟེ། །སྐུ་མདོག་མཐིང་ནག་དར་ནག་བེར་ཆེན་གསོལ། །དབུ་སྐྲ་གྱེན་འབར་རྟ་ནག་རྟིང་དཀར་ཆིབས། །སྡིགས་མཛུབ་དང་བཅས་སྦ་ལྕག་མེ་དཔུང་བསྣམས། །སྟག་རལ་གཟིག་ཤུབས་དཔའ་བོའི་ཆས་དང་ལྡན། །འཁོར་དང་སྤྲུལ་པ་དམག་དཔོན་ཆེན་པོ་བརྒྱད། །སེང་སྟག་གཟིག་དང་དོམ་གྱི་གདོང་པ་
ཅན། །སྤྲེའུ་དྲེད་དང་ལྕེ་སྤྱང་ཆུ་སྲིན་གདོང་། །ཁེར་ནག་བེང་དང་དྲག་པོའི་ཆ་ལུགས་ཅན། །འཁོར་ཚོགས་ཁྲབ་ཆེན་བྱེ་བ་འབུམ་དང་བཅས། །གསང་མཚན་འབྱུང་པོ་སེར་པོ་སྣ་ཡོན་ཏེ། །ཕུར་པའི་སྲུང་མ་ལྕགས་ཀྱི་སྐྱེས་བུ་ཞེས། །མ་ཧཱ་ཀཱ་ལ་ཏ་ཀི་ནག་པོ་ཆེ། །དམག་དཔོན་དགྲ་འདུལ་དབང་ཕྱུག་འཁོར་བཅས་ལ། །གསོལ་ལོ་མཆོད་དོ་ཐུགས་དམ་བསྐང་གྱུར་ཅིག །གཡུ་བུན་གཡུ་ཞགས་གཡུ་ཕྲེང་གཡུ་སྐྱིད་མ། །མཛེས་འཛུམ་དར་དང་རིན་ཆེན་རྒྱན་དང་ལྡན། །མདའ་དར་མེ་ལོང་བསྣམས་ནས་ཕྱེད་སྐྱིལ་བཞུགས། །སྲིད་པ་ཆགས་བྱེད་མ་མོ་བདུན་རྣམས་དང་། །བརྟན་མ་བཅུ་གཉིས་ཡ་མ་བཅུ་གཉིས་དང་། །སྐྱོང་མ་བཅུ་གཉིས་སྨན་ཕྲན་འབུམ་གྱི་ཚོགས། །ལྷབ་ལྷུབ་དར་ཟབ་མང་པོའི་རྒྱན་དང་བཅས། །སིལ་སྙན་གླུ་དབྱངས་རོལ་མོའི་སྒྲ་དང་བཅས། །སྨན་སྤོས་དྲི་ཞིམ་མང་པོའི་ངད་དང་བཅས། །བྲན་གཡོག་ཡུལ་ལྷ་མང་པོའི་འཁོར་དང་བཅས། །འཇའ་སྤྲིན་ན་བུན་སྦྲང་ཆར་ཟིམ་བུར་བཅས། །གཡུ་སྒྲོན་འཁོར་དང་ཡང་འཁོར་བཅས་པ་ལ། །གསོལ་ལོ་མཆོད་དོ་ཐུགས་དམ་བསྐང་གྱུར་ཅིག །ཕྱ་རྗེ་
དགུ་སྒྲིལ་རྡོ་རྗེ་དྲེལ་དཀར་དང་། །ཆུ་དྲག་རྟ་མགྲིན་སྐུ་ལྷ་ངང་ཡག་དང་། །སྨུག་རི་མོ་ནམ་ཐོག་ལྷ་རྨོག་ཞུ་སོགས། །ཚ་བ་རྫ་རྒང་རིང་མོའི་གཞི་བདག་རྣམས། །མ་ལུས་གཡུ་སྒྲོན་ཁྱོད་ཀྱི་འབངས་ལགས་པས། །གསོལ་ལོ་མཆོད་དོ་མཉེས་ཤིང་ཚིམ་གྱུར་ཅིག །བདག་ཅག་སློབ་དཔོན་ཡོན་མཆོད་འཁོར་བཅས་ཀྱིས། །ཐོག་མེད་དུས་ནས་ད་ལྟ་ཡན་ཆད་དུ། །བཅས་དང་རང་བཞིན་ཁ་ན་མ་ཐོ་བའི། །སྡིག་ལྟུང་འགལ་འཁྲུལ་ནོངས་པ་ཅི་མཆིས་པ། །རྡོ་རྗེ་གཡུ་སྒྲོན་འཁོར་དང་བཅས་ལ་བཤགས། །ཚེ་འདིའི་རྐྱེན་དང་ཡུན་ཚེགྱི་སྒྲིབ་པ་རུ། །མི་འགྱུར་ཆོས་དབྱིངས་ཀློང་དུ་སོར་ཆུད་ཤོག །ཨོ་ས་མ་ཡ། ཨཱས་མ་ཡ། ཧཱུྃ་ས་མ་ཡ། ཨོཾ་བཛྲ་པྲ་མོ་ཧ་ཧཱུྃ་ཧཱུྃ་སྭཱ་ཧཱ། ས་པ་རི་ཝཱ་ར། ཨོཾ་བཛྲ་སཏཱ་ས་མ་ཡ་ནས། སཏཱ་ཨཱཿ ཞེས་ཡིག་བརྒྱ་བཟླའོ། །དེ་ནས་གསོལ་ཁ་བཀྱགས་ནས། ཧོ༔ དམ་རྫས་བརྒྱན་པའི་མཆོད་པ་རྒྱ་ཆེན་པོ་འདི། སྲིད་པའི་སྨན་མོ་རྡོ་རྗེ་གཡུ་སྒྲོན་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །སྲིད་པ་ཆགས་བྱེད་མ་མོ་གཡུ་སྒྲོན་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཨེ་ཀ་ཙ་ཏི་གཡུ་ཡི་རལ་གཅིག་མ་ལ་གསོལ་ལོ་
མཆོད་དོ་འདྲེན་ནོ་འབུལ་ལོ་སྦྱིན་ནོ། །ཕྱི་ལྟར་སྔགས་སྲུང་ཨེ་ཀ་ཙ་ཏི་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ནང་ལྟར་དཔལ་ལྡན་ལྷ་མོ་རེ་མ་ཏི་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །གསང་བ་ཤན་པ་སྲོག་སྒྲུབ་ནག་མོ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཡང་གསང་ཀུན་ཏུ་བཟང་མོ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །བོད་སྐྱོང་མཁའ་འགྲོ་ལྷན་ཅིག་སྐྱེས་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཞི་མཛད་དཀར་མོ་འོད་ལྡན་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །དྲག་མོར་བཞེངས་ཚེ་དམག་ཟོར་རྒྱལ་མོ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །སྲིད་གསུམ་ཤ་ཟ་ཁ་མོ་ཆེ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །དྷ་ཀི་ཟ་བྱེད་གདོང་ཅན་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །གནས་མཆོག་ཙཱ་རིའི་བཀའ་སྲུང་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །མཚོ་དཀར་གནས་ཀྱི་བདག་མོ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །གཅིག་ཆར་རྡོ་རྗེ་ཕུག་བདག་མོ་ལ་གསོལ་ལོ་མཆོད་དོ་
འདྲེན་ནོ་འབུལ་ལོ་སྦྱིན་ནོ། །རྡོ་རྗེ་ཕུར་པའི་བཀའ་སྲུང་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །བསྲེ་མོ་རྡོ་རྗེ་ཕག་བྱིན་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཤ་མེད་གངས་དཀར་རྡོ་རྗེ་གཡུ་སྒྲོན་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །གནམ་མཚོ་ཕྱུག་མོའི་མཚོ་སྨན་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །འབྲས་མོ་ལྗོངས་ཀྱི་སྒོ་སྲུང་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །བརྟན་མ་སྐྱི་འཐིང་ཡ་མ་སྐྱོང་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །གཡུ་བུན་མཐིང་གི་ཞལ་བཟང་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །གཡུ་ཡི་དྲིལ་བུ་སི་ལེ་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཉི་འོད་འབར་བའི་སྨན་གཅིག་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །བརྟན་མ་དམག་གི་རྒྱལ་མོ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །སྲིང་གཅིག་གངས་དཀར་ཤ་མེད་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །སྐྱེས་བུ་ལུང་བཙན་གྱི་སྲིང་གཅིག་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །མགར་བ་ནག་པོའི་
དགྱེས་སྡེ་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །གངས་དཀར་རྡོ་རྗེ་དཔལ་གྱི་ཡུམ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །སྒྲུབ་བརྒྱུད་བཀའ་ཡི་སྲུང་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །མཆེད་ཟ་སྲིད་པ་ཆགས་བྱེད་ཀྱི་མ་མོ་བདུན་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །རྡོ་རྗེ་གཡུ་བུན་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །རྡོ་རྗེ་གཡུ་ཞགས་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །རྡོ་རྗེ་གཡུ་ཕྲེང་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །རྡོ་རྗེ་གཡུ་སྐྱེད་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །རྡོ་རྗེ་མུ་ལེ་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །རྡོ་རྗེ་སྨན་མཆོག་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །རྡོ་རྗེ་གཡུ་སྨན་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །རྡོ་རྗེ་ལྷ་སྨན་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །དར་འཛིན་ནག་མོ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཀར་ཀ་ནག་མོ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཀ་དྷ་
ཀ་ལན་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཧ་ཁ་ལ་ཁ་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཕུར་བུ་ཀཱ་ལ་མ་ལ་གསོལ་ལོ་མཆོད་དོ་འདྲེན་ནོ་ལྟའབུལ་ལོ་སྦྱིན་ནོ། །རྡོ་རྗེ་བི་ལ་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །རྐྱང་མཚོ་ཧ་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཁྲག་འཛག་སྤྱང་གདོང་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །སྐྱེ་འཐིང་རྡོ་རྗེ་གཡུ་བུན་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །སྨན་བཙུན་རྡོ་རྗེ་སྨན་གཅིག་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །སྨན་གཅིག་རྡོ་རྗེ་ཡ་མ་སྐྱོང་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །བདག་ཉིད་རྡོ་རྗེ་ཀུན་གྲགས་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །སྨན་བཙུན་རྡོ་གཟུང་ལེགས་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །སྨན་མོ་རྡོ་རྗེ་ཀུན་གྲགས་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །སྨན་བཙུན་རྡོ་རྗེ་དྲག་མོ་རྒྱལ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །གསེར་ཆེན་རྡོ་རྗེ་གཡུ་སྐྱོང་མ་ལ་གསོལ་ལོ་མཆོད་དོ་འདྲེན་ནོ་
འབུལ་ལོ་སྦྱིན་ནོ། །རྡོ་རྗེ་ཀོང་བཙུན་དེ་མོ་སྐྱོང་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །འབྲོག་སྨན་རྡོ་རྗེ་གདུག་པའི་གཙོ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཨུག་ཆོས་རྡོ་རྗེ་གཡར་མོ་བསིལ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །དཔལ་ཡུམ་རྡོ་རྗེ་ཁ་རག་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །བོད་ཁམས་བརྟན་མ་བཅུ་གཉིས་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །བོད་སྐྱོང་མ་བཅུ་གཉིས་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །བོད་ཁམས་ཡ་མ་བཅུ་གཉིས་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །དཀར་མོ་བདེ་ལེགས་མེ་ཕྲེང་ཅན་གསུམ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །བདུད་མོ་པུག་ཤུད་པ་ར་སོང་གསུམ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །སྨན་བཙུན་སྤྱང་མོ་ཀུན་ལས་རྒྱལ་གསུམ་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཤ་མེད་མེ་ཏོག་གཟུགས་མཛེས་མ་གསུམ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཀུན་སྙིང་དགའ་བོ་ནད་ཀྱི་བདག་གསུམ་ལ་གསོལ་ལོ་མཆོད་དོ་འདྲེན་
ནོ་འབུལ་ལོ་སྦྱིན་ནོ། །མཛེས་མ་ཡ་བདག་འཕྲུལ་བསྒྱུར་མ་གསུམ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཀྲ་ཧ་ཁུག་རྒྱལ་དཀར་དགའ་མ་གསུམ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཀུན་དགའ་ཡུམ་ཆེན་དཔལ་ལྗང་མ་གསུམ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །དཀར་མོ་ཉི་ཤུ་རྩ་བཞི་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །གཟུངས་བརྗོད་མཚོ་མོ་རང་དགའ་མགུ་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཁ་ནག་གཟུགས་མཛེས་མི་སྙིང་བསྒུལ་མ་གསུམ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །མིག་གསུམ་སྨན་མོ་རྣལ་འབྱོར་བསླུ་མ་གསུམ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །རིགས་བདག་སྨན་བཙུན་ཀུན་གྱི་ཡུམ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །གཡུ་མཚོ་ལྡིང་མཚོ་ནམ་མཁའ་མཚོ་གསུམ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །སྙིང་མེད་ཀླད་ཆེན་རྣལ་འབྱོར་གྲོགས་གསུམ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །གཟུགས་མཛེས་སྒྲ་སྙན་དྲི་ཞིམ་མ་གསུམ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་
ནོ། །སྣ་ཚུལ་རྗེས་ཉུལ་ཀླད་ལྡག་མ་གསུམ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཤ་ཟ་ཁྲག་འཐུང་རྣམ་རྒྱལ་མ་གསུམ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཀུན་སྨན་དཔལ་ཡུམ་ཀུན་ཐུབ་མ་གསུམ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །མཚོ་གནས་སྦལ་ཟན་སྦྲུལ་གྱི་གདན་མ་གསུམ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཀུན་དགའ་ཀུན་བསྲུ་ཕོ་ཞིག་བསྒྱུར་གསུམ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །མངའ་བདག་སྲོག་བདག་ལྕགས་ཀྱི་བདག་གསུམ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཕྲེང་བསྒྲངས་མཛེས་མ་ཟིར་མ་གསུམ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །བག་མ་ཀུན་མགུ་ནག་གྱོང་མ་གསུམ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཀུན་རྒྱལ་ཆེན་མོ་མེ་ཏོག་རྒྱལ་གཉིས་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཕྱི་ལྟར་རྒྱལ་པོ་སྟག་ཞུ་ཅན་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ནང་ལྟར་བདུད་རེ་ལྡེ་མགོ་ཉག་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །གསང་བ་ལྟར་ན་ཕ་
མོན་པ་ནག་པོ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཕྱི་ལྟར་ཡུམ་གངས་སྨན་ཉི་མ་འཕྲུལ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ནང་ལྟར་ན་བདུད་མོ་དྲན་པ་དབང་མེད་མ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །གསང་བ་ལྟར་ན་ཡུམ་མོན་མོ་ནག་མོ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཕྱི་ལྟར་ན་མིང་པོ་རྡོ་རྗེ་ཁྱུང་དྲག་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ནང་ལྟར་སྲས་རྡོ་རྗེ་ལེགས་པ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །གསང་བ་དམ་ཅན་མགར་བ་ནག་པོ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །འཛིན་གིང་བཞི་ཅུ་རྩ་གཉིས་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །མཆེད་ཟླ་སུམ་བརྒྱ་དྲུག་ཅུ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ལྕམ་མོ་སུམ་བརྒྱ་དྲུག་ཅུ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཕྱི་ལྟར་དམག་དཔོན་དགྲ་འདུལ་དབང་ཕྱུག་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ནང་ལྟར་ཕུར་སྲུང་ལྕགས་ཀྱི་སྐྱེས་བུ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །གསང་བ་མགོན་པོ་ཏ་ཀི་ནག་མོ་ལ་
གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །སྤྲུལ་པ་དམག་དཔོན་མཆེད་བརྒྱད་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཁྲབ་ཆེན་བྱེ་བ་འབུམ་རྒྱུག་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ཤར་གྱི་ཡུལ་སྲུངས་ཕྲུ་རྒྱལ་རྒྱལ་བ་དགུ་སྦྲེལ་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ལྷོ་ཡི་ཡུལ་སྲུངས་རྡོ་རྗེ་དྲེལ་དཀར་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །ནུབ་ཀྱི་ཡུལ་སྲུངས་ཆུ་དྲག་ཁྲོ་བོ་རྟ་མགྲིན་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །བྱང་གི་ཡུལ་སྲུངས་སྐུ་ལྷ་ངང་ཡག་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །འཁོར་དང་ཡང་འཁོར་ཐམས་ཅད་ལ་གསོལ་ལོ་མཆོད་དོ་འདྲེན་ནོ་འབུལ་ལོ་སྦྱིན་ནོ། །མཉེས་ཤིང་ཚིམས་དགའ་ཞིང་མགུ་ནས། སྤྱིར་སངས་རྒྱས་ཀྱི་བསྟན་པ་སྲུངས་ཤིག །དཀོན་མཆོག་གསུམ་གྱི་དབུ་འཕང་བསྟོད་ཅིག །རྣལ་འབྱོར་པའི་སྐུ་ཚེ་སྲིངས་ཤིག །དགེ་འདུན་གྱི་ཆེ་བ་ཐོན་ཅིག །འཇིག་རྟེན་ཁམས་གྱི་བདེ་སྐྱིད་སྤེལ་ཅིག །ཆར་ཆུ་དུས་སུ་འབེབས་པར་མཛོད་ཅིག །རྩྭ་ཁ་ལོ་ཐོག་རྟག་ཏུ་ལེགས་པར་མཛོད་ཅིག །མི་ནད་དང་ཕྱུགས་ནད་
མེད་པར་མཛོད་ཅིག །ཕྱི་ནང་གི་འཁྲུག་རྩོད་ཐམས་ཅད་ཞི་བར་མཛོད་ཅིག །རྣལ་འབྱོར་པ་བདག་ཅག་དཔོན་སློབ་ཡོན་ཆོད་ཐམས་ཅད་ཀྱི་མི་ལ་ན་ཚ་མ་བཏང་ཞིག །ཕྱུགས་ལ་གོད་ཁ་མ་བཏང་ཞིག །སད་སེར་དང་མུ་གེ་མ་བཏང་ཞིག །དགྲ་རྐུན་དང་གོད་ཁ་མ་བཏང་ཞཅིག །སྡོད་ན་རྟེན་ས་མཛོད་ཅིག །འགྲོ་ན་ལམ་ཆོས་ཤིག །ཚེ་དང་བསོད་ནམས་སྤེལ་ཅིག །དཔལ་དང་གྲགས་པ་སྒྲུབས་ཤིག །འཁོར་དང་བསྟན་པ་སྲུངས་ཤིག །ཉིན་གསུམ་གྱི་བྱ་ར་མཛོད་ཅིག །མཚན་གསུམ་གྱི་མེལ་ཚེ་མཛོད་ཅིག །དགྲ་བྱུང་ན་བྱ་ཐོངས་ཤིག །དུག་བྱུང་ན་སྨན་ཐོངས་ཤིག །མཉམ་གཉིས་གཡུལ་འགྱེད་ནི་དམག་དཔོན་ཁྱེད་ལ་རེའོ། །རྒྱལ་ཁ་རླུང་ཁ་བྱིན་ཅིག །ཇག་ལ་འགྲོ་ན་ཇག་དཔོན་རེའོ། །བུ་རྟ་སྲུངས་ལ་དགྲ་ནོར་ལོངས་ཤིག །མཉམ་གཉིས་མི་དང་ཕྱུགས་འགྲན་ན། བེའུ་ལུག་འཕེལ་ཁ་ཁྱོད་ལ་རེའོ། །རྐང་བཞི་ཕྱུགས་ཀྱི་དངོས་གྲུབ་སྩོལ་ཅིག །མཉམ་གཉིས་མི་དང་བུ་ནི་འགྲན་ན། རིགས་རྒྱུད་བཙན་དར་ཁྱེད་ལ་རེའོ། །མི་འཕེལ་རྟ་ཧྲག་དངོས་གྲུབ་སྩོལ་ཅིག །རྨ་གཡང་ཟས་ཀྱི་དངོས་གྲུབ་སྩོལ་ཅིག །བང་མཛོད་
འབྲུ་ཡི་དངོས་གྲུབ་སྩོལ་ཅིག །རྐང་བཞི་རྟ་ཕྱུགས་དངོས་གྲུབ་སྩོལ་ཅིག །ལྷབ་ལྷུབ་གོས་ཀྱི་དངོས་གྲུབ་སྩོལ་ཅིག །སྲ་བརྟན་གོ་ཆའི་དངོས་གྲུབ་སྩོལ་ཅིག །གསེར་དངུལ་རིན་ཆེན་དངོས་གྲུབ་སྩོལ་ཅིག །ཇ་དར་ལོངས་སྤྱོད་དངོས་གྲུབ་སྩོལ་ཅིག །འཛད་མེད་གཏེར་གྱི་དངོས་གྲུབ་སྩོལ་ཅིག །འཆི་མེད་ཚེ་ཡི་དངོས་གྲུབ་སྩོལ་ཅིག །ནད་མེད་བདེ་བའི་དངོས་གྲུབ་སྩོལ་ཅིག །མ་གཅིག་ལྟར་དུ་བྱམས་པས་སྐྱོངས་ཤིག །སྲིང་གཅིག་ལྟར་དུ་གདུང་སེམས་བསྐྱེད་ཅིག །གྲོགས་གཅིག་ལྟར་དུ་འབྲལ་མེད་སྐྱོངས་ཤིག །བྲན་མོ་ལྟར་དུ་ཕྲིན་ལས་སྒྲུབས་ཤིག །མཐུ་དང་ནུས་པ་སྐྱེད་ཅིག །རྟགས་དང་མཚན་མ་སྟོན་ཅིག །བཀའ་དང་དམ་ལས་མ་འདའ་ཞིག །རྫུན་དང་གཡོ་སྒྱུ་མ་མཛད་ཅིག །ལེ་ལོ་དང་བཏང་སྙོམས་མ་མཛད་ཅིག །ཁྱད་པར་དུ་གསང་སྔགས་བླ་ན་མེད་པའི་བསྟན་པ་དར་ཞིང་རྒྱས་པར་མཛོད་ཅིག །བསྟན་འཛིན་གྱི་སྐྱེས་བུ་དམ་པ་གང་རྒྱུ་ཡིན་པ་རྣམས་ཀྱི་སྐུ་ཚེ་དང་མཛད་ཕྲིན་དར་ཞིང་རྒྱས་པར་མཛོད་ཅིག །བསྟན་པ་ལ་ཕན་པའི་སྦྱིན་བདག་རྣམས་ཀྱི་ཆོས་སྲིད་དབང་ཐང་རྒྱས་པར་མཛོད་ཅིག །སློབ་དཔོན་ཆེན་པོ་
པདྨ་འབྱུང་གནས་ཀྱིས་བོད་ཁ་བ་ཅན་གྱི་བསྟན་པ་སྐྱོང་བར་ཁྱེད་རྣམས་བསྐོས་པའི་དམ་ཚིག་དྲན་པར་མཛོད་ཅིག །ཨོཾ་བཛྲ་མ་མ་ལ་ལ་ལི་ལི་ས་པ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧྲཱི༔ སརྦ་པཱུ་ཛ་ཧོ། སརྦ་སིདྡྷི་ཕ་ལ་ཧོ། ཞེས་བཤོས་བུ་རིའི་ཕྱོགས་སུ་ཕུལ་བའམ། བསང་དང་འབྲེལ་ན་བསང་ནང་དུ་འབུལ་ཡང་རུང་ངོ་། །རྒྱུན་དུ་སྲུང་མར་བརྟེན་ན་གཏོར་མ་དངོས་གྲུབ་ཏུ་རོལ་ལོ། །ཞེས་པ་རྒྱལ་ཕུར་འགྲུབ་སྦྱོར་ཉིན་རྟེན་འབྲེལ་དབུ་བཙུགས་ནས། །རྡོ་རྗེ་གཡུ་སྒྲོན་མ་ཉིད་ཀྱི་ལྷ་ཞོལ་དུ་ཀརྨ་ཨ་རཱ་གས་སྦྱར་བ་སྟེ། གནམ་ཆོས་ཐུགས་ཀྱི་གཏེར་ཁའི་ལྷན་ཐབས་སོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།