བོད་ཁམས་སྐྱོང་བའི་བརྟན་མ་ཆེན་མོ་དབ་ཀྱི་ཇོ་མོ་གཡུ་སྒྲོན་གྱི་གསོལ་ཁ་བོད་ཁམས་སྤྱིའི་རིམ་གྲོ་འདོད་དགུའི་ཆར་འབེབས།
བོད་ཁམས་སྐྱོང་བའི་བརྟན་མ་ཆེན་མོ་དབ་ཀྱི་ཇོ་མོ་གཡུ་སྒྲོན་གྱི་གསོལ་ཁ་བོད་ཁམས་སྤྱིའི་རིམ་གྲོ་འདོད་དགུའི་ཆར་འབེབས་བཞུགས་པ་ལེགས་སོ། །
གུ་རུ་བཛྲ་ཀྲོ་དྷ་བྷིར་ཝ་ཡེ་ན་མ། འཇིག་རྟེན་བོད་ཁམས་བདེ་ཞིང་སྐྱིད་པ་དང་། །རང་རང་གང་འདོད་ཕྲིན་ལས་བསྒྲུབ་པའི་ཕྱིར། །ཇོ་མོ་གཡུ་སྒྲོན་མཆོད་པའི་གོ་ཆ་བྲི། །ཇོ་མོ་འཁོར་བཅས་བཀའ་ཡི་གནང་བ་སྩོལ། །རིན་ཆེན་སྣོད་དུ་བཤོས་བུ་རྩེ་རྒྱལ་ལ། །བཤོས་ཕྲན་བཞིས་བསྐོར་མདུན་དུ་སྨན་ཏིང་བཞིག །མཐེབ་སྐྱུ་བཞིའམ་ཡང་ན་བཅུ་གཉིས་བསྐོར། །རང་ཉིད་པད་འབྱུང་ངམ་ནི་གྲོ་ལོད་བསྒོམ། །དེ་ནས་གྱེར་སྒོམ་སྦྲགས་པ་འདི་ལྟར་རོ། །ཆོས་ཀུན་ཡེ་ནས་ཀ་དག་རྫོགས་པ་ཆེ། །དེ་ཡི་ངང་ལས་མདུན་དུ་སྤང་ལྗོངས་དང་། །ཤེལ་བྲོག་གངས་དཀར་ནེའུ་སེང་མེ་ཏོག་བཀྲ། །ལྷོ་སྤྲིན་འཇའ་ཚོན་སྦྲང་ཆར་འབྲུག་སྒྲ་སྒྲོག །དེ་དབུས་ན་བུན་
ཡོལ་བ་བྲིས་པའི་ནང་། །ཤེལ་གྱི་གུར་ཆེན་མུ་ཏིག་ཆོན་ཐག་དང་། །དུང་གི་ཚུགས་ཤིང་བྱི་རུའི་ཆོན་ཕུར་བཏབ། །འདོད་པའི་ཡོན་ཏན་སྣ་ཚོགས་གཅལ་དུ་བཀྲམ། །དེ་དབུས་སྣ་ཚོགས་པདྨ་འདབ་བཞིའི་དབུས། །ཟླ་བའི་སྟེང་དུ་གཡུ་ཡི་རྡོ་རྗེ་ནི། །ཧྲཱི༔ཡིག་གིས་མཚན་ཡོངས་སུ་གྱུར་པ་ལས། །ཇོ་མོ་གཡུ་སྒྲོན་སྟོན་ཀའི་ཟླ་བའི་མདོག །ཆིབས་སུ་རླུང་གི་ཤུགས་ཅན་ཡུ་མོ་ཆིབས། །གཡས་པས་མདའ་དར་གཡོན་པས་མེ་ལོང་འཛིན། །འདབ་བཞིའི་ཤར་དུ་ཧ་ལས་གཡུ་བུན་སྔོ། །དྲེལ་ལ་ཆིབས་ནས་རྡོ་རྗེ་མེ་ལོང་འཛིན། །ལྷོ་རུ་རི་ལས་རྡོ་རྗེ་
གཡུ་ཞགས་སེར། །རྟ་སྔོན་ལ་ཆིབས་རིན་ཆེན་མེ་ལོང་འཛིན། །ནུབ་ཏུ་ནི་ལས་རྡོ་རྗེ་གཡུ་ཕྲེང་དམར། །རྐྱང་ལ་ཆིབས་ཤིང་པདྨ་མེ་ལོང་འཛིན། །བྱང་དུ་ས་ལས་རྡོ་རྗེ་གཡུ་སྐྱིད་ལྗང་། །འབྲོང་ལ་ཆིབས་ཤིང་རྒྱ་གྲམ་མེ་ལོང་འཛིན། །ལྔ་ཀ་རང་རང་མདོག་མཚུངས་ན་བཟའི་སྟེང་། །དར་དཀར་བེར་གསོལ་རིན་ཆེན་དུ་མས་བརྒྱན། །ཐོར་ཙུགས་དབུ་རྒྱན་མེ་ཏོག་ཕྲེང་བས་བརྒྱན། །དེ་རྒྱབ་བཀའ་ཉན་དཀར་མོ་མཆེད་བརྒྱད་ནི། །སྒེག་མཛེས་བཞེངས་ཐབས་མདའ་དར་མེ་ལོང་འཛིན། །དེ་རྒྱབ་བོད་ཁམས་བརྟན་མ་བཅུ་གཉིས་ནི། །སྣ་ཚོགས་རྒྱན་ལྡན་བཞོན་པ་སྣ་ཚོགས་ཅན། །དེ་རྒྱབ་སྲིད་པའི་སྨན་མོ་འབུམ་ཕྲག་ནི། །གཟུགས་མཛེས་གཞོན་ཚུལ་བྲོ་རྡུང་གར་སྟབས་འཁྱུགས། །ཀུན་གྱི་གནས་གསུམ་ཡིག་འབྲུ་གསུམ་པོ་དང་། །ས་བོན་འོད་ཀྱིས་འཁོར་བཅས་སྤྱན་དྲངས་གྱུར། །ཧཱུྃ་བྷྱོ༔ སྲིད་པའི་སྨན་བཙུན་ཇོ་མོ་གཡུ་སྒྲོན་མ། །མཆེད་ལྔ་བརྟན་སྐྱོང་སྨན་ཕྲན་འབུམ་དང་བཅས། །དད་པ་དམ་ཚིག་དབང་གིས་སྤྱན་འདྲེན་ན། །ཐུགས་རྗེ་ཐུགས་དམ་དབང་གིས་གཤེགས་སུ་གསོལ། །གསང་སྔགས་ཆོས་ཀྱི་སྲུང་མ་མཛད་པའི་
ཚེ། །ཟངས་མདོག་དཔལ་གྱི་རི་དང་ཨོ་རྒྱན་ཡུལ། །ཉི་ཤུ་རྩ་བཞིའི་གནས་ནས་གཤེགས་སུ་གསོལ། །གཙུག་ལག་ཆོས་འཁོར་སྲུང་མ་མཛད་པའི་ཚེ། །རྡོ་རྗེ་གདན་དང་དཀར་ཆུང་གཙུག་ལག་ཁང་། །དཔལ་གྱི་བསམ་ཡས་ཕྱོགས་ནས་གཤེགས་སུ་གསོལ། །རུ་བཞི་བོད་ཁམས་སྐྱོང་མ་མཛད་པའི་ཚེ། །དབུ་རུ་སྙིང་ཚལ་གནས་ནས་གཤེགས་སུ་གསོལ། །ཞིང་སྐྱོང་མཁའ་འགྲོའི་ཚོགས་དཔོན་མཛད་པའི་ཚེ། །དཔལ་གྱི་ཙ་རི་ཏྲ་ནས་གཤེགས་སུ་གསོལ། །གནམ་སྨན་འབུམ་གྱི་གཙོ་མོ་མཛད་པའི་ཚེ། །ཡར་ལྷ་ཤམ་པོའི་མགུལ་ནས་གཤེགས་སུ་གསོལ། །དྲི་ཟ་ཡོངས་ཀྱི་གཙོ་མོ་མཛད་པའི་ཚེ། །གཙང་གི་ཇོ་མོ་གངས་ནས་གཤེགས་སུ་གསོལ། །བརྟན་མ་ཀུན་གྱི་གཙོ་མོ་མཛད་པའི་ཚེ། །ཁ་རག་གངས་རིའི་མགུལ་ནས་གཤེགས་སུ་གསོལ། །བཙན་རིགས་ཀུན་གྱི་གཙོ་མོ་མཛད་པའི་ཚེ། །ལྷོ་བྲག་སྨན་ལུང་གནས་ནས་གཤེགས་སུ་གསོལ། །འབྲས་མོ་ལྗོངས་ཀྱི་གནས་སྲུང་མཛད་པའི་ཚེ། །ཕོ་བྲང་སྨྱུག་རིའི་རྩེ་ནས་གཤེགས་སུ་གསོལ། །རྡོ་རྗེ་ཕུར་པའི་བཀའ་སྲུང་མཛད་པའི་ཚེ། །ཚ་བ་ཁེ་ཤོད་ཡུལ་ནས་གཤེགས་སུ་
གསོལ། །ཡུལ་ལྷ་ཀུན་གྱི་དགྱེས་སྡེ་མཛད་པའི་ཚེ། །ཕོ་བྲང་དབ་ལུང་གནས་ནས་གཤེགས་སུ་གསོལ། །རྣལ་འབྱོར་བདག་གིས་གདུང་བས་ཁྱོད་འབོད་ན། །གློག་ལྟར་མྱུར་བའི་ཤུགས་ཀྱིས་འདིར་བྱོན་ཅིག །ཨོཾ་བཛྲ་པྲ་མོ་ཧ་ས་པཱ་རི་ཝ་ར་བཛྲ་ས་མཱ་ཛཿ བོད་ཁམས་སྐྱོང་མ་གནས་འདིར་བྱོན་པ་ལེགས། །ཤེལ་གྱི་གུར་ཁང་པདྨ་ཟླ་བའི་གདན། །གཙོ་དང་འཁོར་དུ་འཚམས་པའི་ཁྲི་གདན་ལ། །ཇི་སྲིད་མཆོད་པ་འབུལ་བ་དེ་སྲིད་དུ། །བརྟན་པར་བཞུགས་ལ་གང་བཅོལ་ཕྲིན་ལས་སྒྲུབས། །ཨོཾ་བཛྲ་པྲ་མོ་ཧ་ས་པཱ་རི་ཝཱ་ར་ས་མ་ཡ་ཛཧཱུྃ་བཾ་ཧོ༔ ཏིཥྛ་ལྷན། ཧྲཱིཿ བསྟན་སྲུང་ཆེན་མོ་གཡུ་སྒྲོན་འཁོར་དང་བཅས། །སྔོན་ཚེ་དཔལ་ཆེན་ཆེ་མཆོག་ཧེ་རུ་ཀ །གསང་བདག་རྟ་མགྲིན་པདྨ་འབྱུང་གནས་དང་། །རིག་འཛིན་རྣམས་ཀྱི་སྤྱན་སྔར་ཁས་བླངས་པའི། །དམ་ལ་མ་འདའ་བདག་གི་ཕྲིན་ལས་སྒྲུབས། །ཨོཾ་བཛྲ་པྲ་མོ་ཧ་ས་པཱ་རི་ཝཱ་ར་ས་མ་ཡ་ཧ་ན་ཧ་ན་ཧཱུྃ་ཕཊ། ཧྲཱི༔ གཡུ་སྒྲོན་འཁོར་བཅས་མཆོད་པའི་དམ་རྫས་ནི། །རཾ་ཡཾ་ཁཾ་གིས་མི་གཙང་དྲི་མ་སྦྱངས། །བྷྲཱུྃ་ཡིག་ལས་བྱུང་རིན་ཆེན་སྣོད་ནང་དུ། །སྨན་བཤོས་ཁཾ་ཡིག་ལས་བྱུང་བདུད་རྩིའི་
མཚོ། །ཁ་དོག་དྲི་རོ་ནུས་པ་ཕུན་སུམ་ཚོགས། །ཧ་ཧོ་ཧཱུྃཡིས་དྲི་རོ་ངན་པ་བཅོམ། །ཨོཾ་ཨཱཿཧཱུྃ་གིས་ཟག་མེད་བདུད་རྩི་གྱུར། །བདུད་རྩི་རླངས་པ་མཆོད་པའི་སྤྲིན་ཕུང་འཁྲིགས། །སྣ་ཚོགས་རོལ་མོ་སྒྲ་དབྱངས་འབྲུག་སྒྲ་སྒྲོག །རིན་ཆེན་དགོས་འདོད་སྣ་ཚོགས་ཆར་དུ་འབེབས། །དངོས་སུ་འབྱོར་དང་ཡིད་ཀྱིས་སྤྲུལ་པ་ཡི། །ཉེར་སྤྱོད་བདུན་དང་འདོད་པའི་ཡོན་ཏན་ལྔ། །བཀྲ་ཤིས་རྫས་རྟགས་བརྒྱད་དང་རིན་ཆེན་བདུན། །སྣ་ཚོགས་འབྲུ་སྣ་སྨན་སྣ་རིན་ཆེན་ཚོགས། །དར་ཟབ་སྟོད་གཡོགས་སྨད་དཀྲིས་དར་མདུང་དཀར། །མདའ་དར་སྣ་ལྔ་མེ་ལོང་སྐུ་གཟུགས་དང་། །བྱི་རུ་གཡུ་དང་མུ་ཏིག་ཤེལ་གྱི་ཕྲེང་། །ར་དཀར་བ་དཀར་ལུག་དཀར་འབྲི་ཟལ་མོ། །རྟ་ནག་དྲེའུ་དཀར་དོང་སྔོན་པོ་དང་། །ཇ་ཆང་ཕུད་རྒོད་ཟས་ཕུད་ཕྱེ་མར་སོགས། །ཕྱི་ཡི་མཆོད་པ་སྣ་ཚོགས་ཁྱེད་ལ་འབུལ། །རྩ་བརྒྱད་སྟོང་ལ་སྦྱར་བའི་ཨ་མྲྀ་ཏ། །ཚོགས་ཀྱི་མཆོད་པ་ཤ་ལྔ་བདུད་རྩི་ལྔ། །མཁའ་འགྲོ་ལྔ་པོ་འཁོར་དང་བཅས་ལ་འབུལ། །བདེ་སྟོང་ཐབས་ཤེས་དབྱེར་མེད་མཉམ་པར་བཞག །དབབ་བཟུང་ལྡོག་བཀྲམ་དགའ་བཞིའི་ཡེ་ཤེས་
མཆོག །གསང་བ་བླ་ན་མེད་པའི་མཆོད་པ་འབུལ། །རང་སེམས་ལྷན་ཅིག་སྐྱེས་མ་རྒྱལ་བའི་ཡུམ། །གདོད་ནས་རྣམ་དག་ཀུན་ཏུ་བཟང་མོ་སྟེ། །མཆོད་བྱ་མཆོད་བྱེད་བྲལ་བའི་མཆོད་པ་འབུལ། །ཀུན་རྫོབ་རྟེན་འབྲེལ་བཤམས་པའི་མཆོད་གཏོར་ཡང་། །ཤིན་ཏུ་དགྱེས་པའི་ཚུལ་དུ་བཞེས་སུ་གསོལ། །ཨོཾ་བཛྲ་པྲ་མོ་ཧ་ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ་གྱིས་ཕུལ། ཨགྷཾ་སོགས། ཧྲཱི༔ ཀུན་ཏུ་བཟང་མོ་ཡུམ་གྱི་ཆོ་འཕྲུལ་ལས། །སྲིད་པའི་སྨན་བཙུན་ཆེན་མོ་གཡུ་སྒྲོན་མ། །རྒྱུད་སྡེ་འབུམ་ཕྲག་དྲུག་ཅུའི་སྲུང་མ་མཛད། །སྔགས་ཀྱི་སྲུང་མ་ཁྱོད་ལ་བདག་བསྟོད་དོ། །དང་པོ་སྲིད་པ་ཆགས་པའི་ཕྲིན་ལས་བསྒྲུབ། །ཞང་ཞུང་དགྲ་བླ་ཛ་མུན་ཞེས་སུ་གྲགས། །གཡུང་དྲུང་བོན་གྱི་སྲུང་མ་མཐུ་མོ་ཆེ། །སྲིད་པའི་རྒྱལ་མོ་ཁྱོད་ལ་བདག་བསྟོད་དོ། །འཁོར་ལོ་སྡོམ་པའི་དཀྱིལ་འཁོར་མཚམས་སྲུང་མ། །གཤིན་རྗེ་མཆེ་བ་མ་ཞེས་ཁྱོད་ཀྱི་མཚན། །མ་མོ་རྦོད་གཏོང་དཀྱིལ་འཁོར་གྲལ་དུ་བཞུགས། །སྲིད་པའི་སྨན་མོ་གཡུ་སྒྲོན་ཁྱོད་ལ་བསྟོད། །ཡུལ་ཆེན་ཉེར་བཞིའི་ནང་ནས་བོད་ཀྱི་ཡུལ། །སྐྱོང་མཛད་བོད་སྐྱོང་ལྷན་ཅིག་སྐྱེས་མ་
ཞེས། །ཞིང་སྐྱོང་མ་མོའི་གཙོ་མོ་གཡུ་སྒྲོན་མ། །ཤཱཀ་ཐུབ་ལུང་བསྟན་ལྷ་མོ་ཁྱོད་ལ་བསྟོད། །བརྟན་སྐྱོང་ཡ་མ་ཀུན་གྱི་རྗེ་མོ་སྟེ། །བརྟན་མ་དམག་གི་རྒྱལ་མོ་ཞེས་སུ་གྲགས། །པདྨ་འབྱུང་གནས་བཀའ་ཡི་ཕོ་ཉ་མོ། །རྡོ་རྗེ་གཡུ་སྒྲོན་མ་ལ་བདག་བསྟོད་དོ། །ཞི་བའི་ཕྲིན་ལས་མཛད་ཚེ་སྐུ་མདོག་དཀར། །ཞི་མཛད་དཀར་མོ་འོད་ལྡན་ཞེས་སུ་གྲགས། །རྒྱས་པའི་ཕྲིན་ལས་མཛད་ཚེ་སྐུ་མདོག་སེར། །ཉི་འོད་འབར་བའི་སྨན་གཅིག་མ་ཞེས་གྲགས། །དབང་གི་ཕྲིན་ལས་མཛད་ཚེ་སྐུ་མདོག་དམར། །འཇིག་རྟེན་གསུམ་དབང་མཛེས་པ་མོ་ཞེས་གྲགས། །སྣ་ཚོགས་ཕྲིན་ལས་མཛད་ཚེ་སྐུ་མདོག་ལྗང་། །རྡོ་རྗེ་གཡུ་ཡི་སྒྲོན་མ་ཞེས་སུ་གྲགས། །ཕྲིན་ལས་ཀུན་འགྲུབ་ཁྱོད་ལ་བདག་བསྟོད་དོ། །ཞི་བའི་ལས་མཛད་རྡོ་རྗེ་གཡུ་བུན་མ། །རྒྱས་པའི་ལས་མཛད་རྡོ་རྗེ་གཡུ་ཞགས་མ། །དབང་གི་ལས་མཛད་རྡོ་རྗེ་གཡུ་ཕྲེང་མ། །དྲག་པོའི་ལས་མཛད་རྡོ་རྗེ་གཡུ་སྐྱིད་མ། །གཡུ་སྒྲོན་མཆེད་ལྔའི་སྐུ་ལ་བདག་བསྟོད་དོ། །དཀར་མོ་མཆེད་བརྒྱད་བརྟན་མ་བཅུ་གཉིས་དང་། །ཡ་མ་བཅུ་གཉིས་སྐྱོང་མ་བཅུ་གཉིས་དང་། །སྨན་ཕྲན་
འབུམ་དང་སྡེ་བརྒྱད་ཡུལ་ལྷའི་ཚོགས། །ཇོ་མོ་གཡུ་སྒྲོན་འཁོར་དང་བཅས་ལ་བསྟོད། །མཆོད་སྦྱིན་གཏོར་མ་འབུལ་བ་འདི་བཞེས་ལ། །རྣལ་འབྱོར་བདག་ཅག་ཡོན་མཆོད་འཁོར་བཅས་ཀྱི། །ནད་གདོན་བར་ཆད་རྐྱེན་ངན་ཞི་བར་མཛོད། །མི་དང་ཕྱུགས་ལ་གོད་ཁ་མེད་པར་མཛོད། །ཚེ་དང་བསོད་ནམས་དཔལ་འབྱོར་རྒྱས་པར་མཛོད། །ཆོས་སྲིད་དབང་ཐང་བསྟན་པ་དར་བར་མཛོད། །ནང་གི་རླུང་སེམས་ཕྱི་ཡི་སྣང་བ་དང་། །འདོད་དགུའི་ལོངས་སྤྱོད་དབང་དུ་འདུ་བར་མཛོད། །ཡམས་ནད་རིམས་ནད་ཕྱུགས་ནད་འཐབ་རྩོད་དང་། །བྱད་ཁ་དྲོད་གཏོང་གནོད་པ་བཟློག་པར་མཛོད། །ཆག་ཆེན་ཉམ་ང་རྨི་ལམ་མཚན་མ་ངན། །ཀག་དང་སྲི་དང་ལྟས་ངན་བསྒྱུར་བར་མཛོད། །ཉིན་གྱི་བྱ་ར་མཚན་གྱི་མེལ་ཚེ་དང་། །སྐྱེལ་བསུ་རོག་ལྡན་མཐུན་རྐྱེན་བསྒྲུབ་པར་མཛོད། །མདོར་ན་བདག་གི་ཡིད་ལ་གང་འདོད་པའི། །འདོད་དོན་ཐམས་ཅད་ཡིད་བཞིན་འགྲུབ་པར་མཛོད། །མ་ལྟར་བརྟེན་ནོ་མ་གཅིག་ཞེ་མ་སྣང་། །སྲིང་ལྟར་བརྟེན་ནོ་སྲིང་གཅིག་སྙིང་མ་རིང་། །མཛའ་ལྟར་བརྟེན་ནོ་གྲོགས་གཅིག་ཁྲེལ་མ་ཆུང་། །མ་གཡེལ་མ་གཡེལ་
བཅོལ་བའི་ཕྲིན་ལས་མཛོད། །འཁོར་བཞིའི་ཐུགས་ཀར་ཧ་རི་ནི་ས་དང་། གཙོ་མོའི་ཐུགས་ཀར་ཧྲཱི༔ཡིག་དཀར་པོའི་མཐར། །སྔགས་ཕྲེང་གཡོན་དུ་འཁོར་བས་ཐུགས་རྒྱུད་བསྐུལ། །དེ་ལ་རང་ཉིད་པད་འབྱུང་ཐུགས་ཀ་ཡི། །འོད་ཟེར་ཕོག་པས་སྔོན་གྱི་དམ་ཚིག་དྲན། །ཕྲིན་ལས་ཡིད་ལ་གང་བསམ་འགྲུབ་པར་གྱུར། །ཨོཾ་བཛྲ་པྲ་མོ་ཧ་ཧྲིང་ཧྲིང་སྭ་ཧཱ། །ཞི་བའི་ལས་ལ་ཤམ་བུ་འདི་ཉིད་སྦྱར། །ནད་གདོན་བར་ཆད་ཤིནཾ་ཀུ་རུ་སྭཱ་ཧཱ། །རྒྱས་པའི་ལས་ལ་ཤམ་བུ་འདི་བཏགས་སོ། །བ་སུ་པུརྗེ་པུཎྚི་ཀུ་རུ་སྭཱ་ཧཱ། །དབང་གི་ལས་ལ་ཤམ་བུ་འདི་ཡིན་ནོ། །ལོ་ཀཱ་པཱ་ཤང་ཀུ་རུ་སྭཱ་ཧཱ། །ཕྲིན་ལས་གང་འདོད་སྐུ་མདོག་བསྒྱུར་ཁ་བྱ། །དགྲ་ཆད་འདི་ན་ཡོད་པ་འོག་ཏུ་བྲིས་ཡོད་ལགས། །དེ་ཕྱིར་ཤིན་ཏུ་བཅའ་ཤེས་བྱ། །ཞི་བར་བསྒྲུབ་ན་ནད་གདོན་ཞི། །བཀྲ་ཤིས་མི་ནོར་མངའ་ཐང་འཕེལ། །གསོལ་ཁའི་མཇུག་ལ་གཤེགས་གསོལ་ལམ། །རྟེན་ལ་བཞུགས་གསོལ་སྐབས་དང་བསྟུན། །དེ་སྐད་རཱ་ག་ཨ་སྱས་ཡིས། །དབ་ལུང་ཇོ་མོའི་མདུན་ལུང་དུ། །ནུབ་གཅིག་མར་མེའི་ངོགས་ནས་བྲིས། །ཚངས་གསར་སྔགས་འཆང་ལྷ་འབུམ་དང་། །བླ་མ་ཀརྨ་བསྟན་སྐྱོང་གིས། །སྐུ་ངོ་མ་ཆོག་བྲིས་པ་ལ། །ཉེས་པ་ཇོ་མོ་ཉིད་ལ་བཤགས། །དགེ་བས་བོད་ཁམས་བདེ་བ་དང་། །དཀོན་མཆོག་དབུ་འཕང་མཐོ་བར་ཤོག །སརྦ་མངྒ་ལཾ།། །། ༈ དྲག་པོའི་ལས་ལ་དམར་གཏོར་ལིང་གས་བརྒྱན། །འགུགས་
གཞུག་བྱས་ལ་དགྲ་བགེགས་ཤ་ཁྲག་རུས། །གཏོར་མ་དབྱེར་མེད་དམིགས་ལ་སྐད་ཅིག་གིས། །དྲག་པོས་སྐུར་གྱུར་ཧབ་ཐོབ་ཟོས་པར་བསམས་ལ། ཨོཾ་བཛྲ་ཌཱ་ཀི་ནི་བེ་རོ་ཙ་ནི་ཡི་ལོ་ཀ་ཌཱ་ཀི་ནི་རཀྵ་རཀོ་ཛཿཛཿ དགྲ་བགེགས་ཀྱི་མ་ཧཱ་ནཱཾ་ས་ལ་ཁཱ་ཧི། མ་ཧཱ་རཀྟ་ལ་ཁཱ་ཧི། མ་ཧཱ་ཙིཏྟ་ལ་ཁཱ་ཧི། མ་ཧཱ་ཀི་ནི་རི་ཏི་ལ་ཁཱ་ཧི། དགྲ་བགེགས་མཱ་ར་ཡ་ཧཱུྃ་ཕཊ༔ བྷོ། སྲིད་པའི་མ་མོ་གཡུ་སྒྲོན་མ། །ཤ་ཟ་ཌཱ་ཀི་ཟ་བྱེད་གདོང་། །མགོ་དགུ་འཇིགས་པའི་མཆེ་བ་གཙིགས། །ཁ་དགུ་ནད་ཀྱི་རླངས་པ་འཐུལ། །ཉེར་བདུན་མིག་ནས་ཁྲག་ཆར་འབེབས། །ཕྱག་བརྒྱད་མཚོན་ཆའི་བུ་ཡུག་འཚུབ། །ལྕགས་ཀྱི་སྤྱང་མོ་མགོ་དགུ་ཆིབས། །ནམ་གྱི་གུང་ལ་སྟོང་གསུམ་ཉུལ། །དགྲ་བོའི་བླ་འཁྱམས་ཁྱེར་ལ་ཤོག །ནད་ཀྱི་ཁ་རླངས་དགྲ་ལ་ཐོངས། །ཁྲག་གི་ཆར་པ་དགྲ་ལ་ཕོབ། །མཚོན་གྱི་བུ་ཡུག་དགྲ་ལ་ཕོབ། །བསྟན་དང་བདག་ལ་སྡང་བ་ཡི། །སྡིག་ཅན་དགྲ་བོ་ཟས་སུ་ཟོ། །ཤ་ལ་དགའ་བའི་མ་མོ་རྣམས། །དགྲ་ཤ་ཚོགས་སུ་ད་རོལ་ཅིག །ཁྲག་ལ་རྔམ་པའི་མ་མོ་རྣམས། །དགྲ་ཁྲག་སྐམ་དུ་ད་འཐུང་ཞིག །བྷྱོ། སྲིད་པའི་སྨན་མོ་གཡུ་སྒྲོན་མ། །ཤིན་ཏུ་དྲག་ཏུ་ཁྲོས་ཙ་ན། །སྐུ་
མདོག་མཐིང་ནག་མུན་པའི་མདོག །ཞལ་གསུམ་མཐིང་ནག་སྤྱན་དགུ་བརྒྱད། །ཡ་མཆེ་བྲང་གི་དཀྱིལ་དུ་སླེབས། །མ་མཆེ་སྨིན་མའི་རྩ་བར་སླེབས། །སྲིད་པ་གསུམ་གྱི་ཤ་ཁྲག་གིས། །མི་ངོམས་ཤ་ཟ་ཁ་མོ་ཆེ། །དགྲ་བོའི་ཤ་ལ་ད་ཟོ་ཞིག །ཕྱག་གཡས་བདུད་ཀྱི་ཁྲམ་ཤིང་ཕྱིར། །དགྲ་བོ་ཁྲམ་ལ་ད་ཐོབ་ཅིག །བདུད་ཀྱི་བུ་མོའི་དུས་ལ་བབ། །ཕྱག་གཡོན་ནད་ཀྱི་རྐྱལ་པ་འཛིན། །དལ་ཡམས་རོ་ལིང་དགྲ་ལ་ཕོབ། །ནད་བདག་ཆེན་མོ་ད་རྒྱུག་ཅིག །མཚོན་གྱི་གྲི་གུ་མཆན་དུ་བཅུག །ནང་འཁྲུག་གི་རྒོད་དགྲ་ལ་ཐོངས། །སྲིད་པའི་སྨན་མོ་ལས་ལ་ཡ། །ཆིབས་སུ་དྲེལ་ནག་རྐང་གསུམ་ཆིབས། །སྐད་ཅིག་ཉིད་ལ་གླིང་བཞི་བསྐོར། །དགྲ་བོ་མ་བཏང་ཤྭ་ར་རེ། །ལས་མཁན་མ་མོའི་དུས་ལ་བབ། །ཡབ་ནི་རྒྱལ་པོ་སྟག་ཞུ་ཅན། །སྡང་བའི་དགྲ་ལ་སྨྱོ་འབོག་ཐོངས། །ཡུམ་ནི་གངས་དཀར་ཉི་མ་འཕྲུལ། །རི་བྱིའུ་དགྲ་བོའི་སྙིང་ལ་ཆུག །མིང་པོ་རྡོ་རྗེ་ལེགས་པ་སྐྱོང་། །ཐེའུ་རང་ཆོ་འཕྲུལ་དགྲ་ལ་ཐོངས། །སྲིང་མོ་མི་རྐུན་ཐོད་རྒྱལ་གྱིས། །དགྲ་བོའི་མི་ནོར་རྐུས་ལ་ཤོག །ལས་མཁན་དུར་ཁྲོད་འདྲེ་
མོའི་ཚོགས། །དགྲ་ལ་མི་རུངས་སྣ་དགུ་ཐོངས། །ཕོ་ཉ་མགྱོགས་བྱེད་སྐད་ཅིག་གིས། །ད་ལྟ་ཉིད་དུ་རྒྱུག་འདྲལ་གྱིས། །འཁོར་གྱི་སྡེ་བརྒྱད་དྲེགས་པའི་ཚོགས། །དགྲ་བོ་ཁ་ཕུང་རྗེས་མེད་ཐོངས། །བཅོལ་བའི་ཕྲིན་ལས་འགྲུབ་པར་མཛོད། །ཅེས་བརྗོད་གཏོར་མ་ཟོར་དུ་འཕངས། །དེ་རྗེས་སྐུ་འདྲའི་དར་དཔྱངས་བརྡབ། །གལ་ཆེན་འགའ་ལ་མ་ཐུག་བར། །དུས་མིན་རྙེད་ཆུང་ཙམ་ལ་ནི། །བྱས་ན་སྲིད་པའི་མ་མོ་འཁྲུགས། །རང་ལ་དལ་ཡམས་ནད་འཁྲུགས་འབྱུང་། །དེ་ཕྱིར་ཀུན་གྱི་བཅོལ་ཤེས་བྱ།། །། ༈ གླེགས་བམ་འདི་ཉིད་བཞེངས་པ་དང་། །འཆང་དང་ཀློག་པའི་དགེ་བའི་མཐུས། །བདག་ཅག་མཆེད་གཉིས་འཁོར་བཅས་དང་། །འཚོ་བ་སྦྱོར་བའི་ཡོན་བདག་རྣམས། །ཚེ་འདིར་བཀྲ་ཤིས་ཚེ་རིང་ཞིང་། །བདེ་སྐྱིད་ཕུན་སུམ་ཚོགས་པ་དང་། །ནམ་ཞིག་འདི་ནས་འཕོས་མ་ཐག །བདེ་བ་ཅན་དུ་སྐྱེ་ཕྱིར་བསྔོ། །ཞེས་པ་༧ ཨ་རཱ་གས་སོ།། །།