དུར་བདག་ཀ་བསྟོད།
ཀ་ཡེ་ཀེང་རུས་གཟུགས་ཅན་ཡབ་དང་ཡུམ། །ཁ་དོག་ཁ་བ་དུང་དང་ཟླ་བའི་མདངས། །ག་ཤལ་ཐོད་རློན་རིན་ཆེན་རྒྱན་ཕྲེང་འཕྱང་། །ང་རོས་རང་སྔགས་ཎི་ཛ་བྷན་དང་། །ཅ་ཅོ་བཤུད་པའི་སྒྲ་ཡིས་གཅན་གཟན་བསྐད། །ཆ་ལུགས་མགོན་དཀར་ཀེང་རུས་ཁྲོས་པ་ལ། །ཇ་ཆང་ཕུད་དང་གཏོར་མའི་མཆོད་པ་འབུལ། །ཉ་རྒྱས་ཟླ་བ་ལྟ་བུའི་སྤྱན་མིག་གིས། །རྟ་དྲེལ་ནོར་ཕྱུགས་ཀ་ཆ་ཐམས་ཅད་དང་། །ཐ་ན་སྒོ་ཁྱི་ཡན་ཆད་ཐམས་ཅད་ལ། །ད་ནི་རྟག་ཏུ་གཟིགས་ལ་སྲུང་བར་མཛོད། །ན་ར་ཀན་སོགས་སྔོན་གྱི་དམ་བཅའ་དགོངས། །པ་དེ་པུ་དེ་ཁ་མཆུ་གླེང་གཞི་དང་། །ཕ་རོལ་གནོད་བྱེད་དགྲ་ཇག་ཆོམ་རྐུན་ཚོགས། །བ་མོར་ཉི་ཟེར་ཕོག་ལྟར་མེད་པར་མཛོད། །མ་གཡེལ་མ་གཡེལ་ཕྲིན་ལས་དུས་ལ་བབ། །ཙ་ན་དགྲ་རྐུན་འཇམ་དང་ཚ་བྱུང་ཆེ། །ཚ་ཟེར་ལྡན་པས་མེ་ཞགས་གློག་འོད་སོགས། །ཛ་ཛ་རཾ་རཾ་མེལ་ཚེ་མ་གཡེལ་བར། །ཝ་ལྟར་ཇག་རྐུན་བྲོས་པའི་ལས་མཛོད་ཅིག །ཞ་ལྟར་རྣལ་འབྱོར་གཙུག་ཏུ་བཀུར་མཛད་པའི། །ཟ་བྱེད་ཤ་ཟ་དུར་བདག་ཡབ་དང་ཡུམ། ། འ་འུར 
་ལ་ཆེན་གཡོ་བའི་ཆོ་འཕྲུལ་དང་། །ཡ་
མ་ར་ཛ་ལྟ་བུ་རྔོམ་གྲགས་ཅན། །ར་ཆེན་འབུམ་ཕྲག་རང་འདྲ་མང་པོར་བཅས། །ལ་ཆེན་མགོན་དཀར་ཡབ་ཡུམ་འཁོར་བཅས་ལ། །ཤ་ཁྲག་དམར་གྱི་གཏོར་མ་འབུལ་གྱི་བཞེས། །ས་ཆ་གར་འགྲོ་གར་འདུག་ཐམས་ཅད་ལ། །ཧ་ཧི་གད་རྒྱང་དང་བཅས་སྲུང་སྐྱོབ་མཛོད། །ཨ་ལ་ལ་ཧོ་འདོད་དགུ་དངོས་གྲུབ་སྩོལ། །ཅེས་གྲུ་པ་སྟོད་དང་སྤྱི་དང་བཅས་དགྲ་ཇག་རྐུན་གྱི་འཇིགས་པ་ཆེན་པོའི་སྐབས་སུ་རཱ་ག་ཨ་སྱས་སྦྱར་བའོ།། །།