ཡེ་བརྫུའི་དགྲ་ཆོས།
ཡེ་བརྫུའི་དགྲ་ཆོས་ཤིན་ཏུ་གཉེན་པའི་བཀའ་རྒྱ་གཞན་ལ་མི་སྤེལ་དམ་ཚིག་གོ། །།
སློབ་དཔོན་པདྨ་འབྱུང་གནས་ལ་ཕྱག་འཚལ་ལོ། །སྒྲུབ་པ་མི་དགོས་ཤིང་དགྲ་བོ་བསད་པའི་མན་ངག་ནི། གར་ཐོད་ཐོད་དུ་བྱ་མི་རུང་སྟེ། སྔོན་སློབ་དཔོན་པདྨའི་སྤྱན་སྔར་དམ་བཅས་པ་ཡིན་ཏེ། དགྲ་བདུད་གཡག་གསུམ་མ་ཐུབ་ན་ང་ལ་བོས། ནད་པ་ཚབ་ཆེ་ན་ང་ལ་བོས། ཆུ་ཆེན་བསྒྲལ་ན་ང་ལ་བོས། འདོད་པའི་དོན་ཐམས་ཅད་སྒྲུབ་ན་ང་ལ་བོས། ངས་བསྟན་པ་གཉེན་པོ་བསྲུང་བར་བྱའོ། །ཞེས་དམ་བཅས་ཞལ་གྱིས་བཞེས་པ་སྟེ། དེ་མིན་གར་ཐོད་ཐོད་དུ་ང་ལ་མ་འབོད་གསུངས་སྐད་དོ། །དཀོན་མཆོག་གི་སྤྱི་དགྲ་བྱུང་བའམ། མི་དཔོན་གྱི་ཆོས་དགྲ་ཆེན་པོ་བྱུང་བའམ། རྣལ་འབྱོར་པ་ལ་སྒོས་དགྲ་ཐུ་མོ་བྱུང་ན་བྱའོ། །དེ་ལྕགས་སྣོད་གཙང་མ་ཆེ་ཆུང་འབྱོར་པ་དང་བསྟུན་པའི་ནང་དུ། ཟན་ནམ་འཇིམ་པ་ལ་
གྲུ་གསུམ་བྱ། དེ་ནང་གྲུ་གསུམ་བྲིས་ཁྲག་བྱུག་པའི་ནང་དུ་ལིངྒ་གཅིག་བཅུག །དེའི་སྟེང་དུ་དམར་གཏོར་རབ་གྲུ་གང་། འབྲིང་རྐང་གང་། ཐ་མ་མཐོ་གང་བཞག ། དེའི་རྒྱབ་ཏུ་དམར་གཏོར་གཙོ་བོ་སུམ་གཉིས་སླེབ་པ་ལྔ་བཞག་པའི་གཙོ་བོ་དྲུག །དེ་རྒྱབ་འཁོར་སྡེ་བརྒྱད་མཐེབ་སྐྱུ་ཁ་ཕྱིར་བསྟན་པ་བརྒྱད། གཏོར་མ་དྲུག་ལ་སྙིང་གཟུགས་རེ་ལིང་ག་རེ་མགོ་ཐུར་དུ་བསྟན། ཅང་ཐུང་ངུ་བདུན་རེ་དང་། ཤ་རྒྱན་གསུམ་རེ་བཙུགས། ཡོད་ན་ཡུངས་ཀར་གོང་བུ་དང་། ཚེ་དང་སྨྱུག་བཙུགས། གྲུ་གསུམ་གྱི་ཟུར་གསུམ་ལ། ཁྲམ་ཤིང་རེ་ཚེར་མ་ཅན་གྱི་ཤིང་ལ་བྱས་ཏེ་བཙུགས། །མར་རྒྱན་མི་བྱའོ། །དེའི་མདུན་དེར་ཟན་ལིང་ཆེ་བ་གཅིག་ཐོད་པའམ་ལྕགས་སྣོད་དུ་བཞག །གཏོར་ཆུང་ཤ་ཁྲག་གིས་སྦག་པ་མང་དུ་བཤམ། ཁྲག་གི་
ཡོན་ཆབ། ར་གསུར་གྱི་དུད་པ། རྡོ་རོལ་མོ་བྱ། གཏོར་ཆེན་གཞི་ནག་པོའི་སྟེང་དུ་བཤམས། ཕྱོགས་བཞིར་དགྲ་མཁར་དུ་དམིགས་པའི་ཐོ་ཆུང་བཞི་དང་། དེའི་རྩར་དགྲ་ཡས། ཤིང་ནག་གི་མདའ་གྲི་མདུང་གསུམ་ཆུང་ཆུང་བཙག་བྱུག་པ་བཞག །རྒྱས་པར་བྱེད་ན་ལིང་ག་བརྡ་རོ་དྲུད་རྒྱུ། སུར་ནག་བཅིངས་པའི་མི་གཟུགས་འཇིམས་པས་བྱུག་པ་བྱ། གོ་ཁྲབ་གྱོན། མདའ་གཞུ་སྒྲོ་ཤུབས་ཕུད་པ་སོགས་དམག་ཆས་བྱ། མདུང་དར་དང་འཕྲུ་རྣམས་སྒྲོན། དེ་ནས་མངོན་རྟོགས་ལས་བྱང་བསྐང་གསོལ་དང་། སྙིང་པོ་ཕྲེང་སྐོར་ཙམ་བཟླ། རང་མདུན་དུ་ལིངྒ་ཁྲག་གིས་བྲན། ཕུར་པ་རལ་གྲི་ཐོ་བ་སོགས་དང་། ཡུངས་ཀར། རྡོ་ཐུན་སོགས་བཞག་ལ། རང་ཉིད་དྲག་པོའི་སྐུར་སྐད་ཅིག་ཚོགིས་གནས་གྱུར་ནས་ཐུགས་ཀའི་འོད་ཟེར་དགྲ་ལྷ་འཁོར་བཅས་ལ་ཕོག་པས། ཁྲོས་འཁྲུགས་རྔམ་རྔམ་རྫིག་རྫིག་བྱེད་པར་བསྒོམས་ལ། ཕཊ། སྐད་ཅིག་གིས་མདུན་དུ་ལྕགས་ཁང་གྲུ་གསུམ་ཁ་དོག་ཅིང་མཐིལ་ཡངས་པ་ཟིན་ནས་ཐར་ས་མེད་པ། སྟེང་ན་ནད་མཚོན་ཐོག་སེར་གྱི་ཆར་འབེབས་པ། འོག་ཏུ་ནད་ཡམས་དུག་གི་མཚོ་འཁྱིལ་བའི་ནང་དུ། ནཱིའམ་ཏྲི་ལས་གནོད་བྱེད་དམིགས་ཡུལ་རིད་པ་སྐེམ་པ། མགོན་སྐྱབས་ལྷ་དང་བྲལ་བ། ཡན་ལག་ལྕགས་སྒྲོག་དང་དུག་སྦྲུལ་གྱིས་བསྡམས་པ། བུ་ག་དགུ་ནས་ཁྲག་འཛག་པ། འདར་
ཕྲི་ལི་ལི་བྱེད་པར་གྱུར། ན་མོ། དྲིན་ཆེན་པདྨ་འབྱུང་གནས་རིག་འཛིན་གྲུབ་ཐོབ་རྒྱ་མཚོའི་བདེན་པ་དང་། དཀོན་མཆོག་རིན་པོ་ཆེ་གསུམ་གྱི་བདེན་པ་དང་། ཡི་དམ་རྡོ་རྗེ་གཞོན་ནུ་བཀའ་སྲུང་དམ་ཅན་རྒྱ་མཚོའི་བདེན་པ་དང་བདེན་པ་ཆེན་པོའི་མཐུས། སྤྱིར་སངས་རྒྱས་བསྟན་པའི་སྤྱི་དགྲ། བླ་མ་དམ་པའི་སྐུ་དགྲ། ཁྱད་པར་དུ་བདག་ཅག་ཡོན་མཆོད་ལ་གནོད་པའི་གདོན་བགེགས་དམ་སྲི་ནད་འདྲེ་ཆུང་སྲི། རྣལ་འབྱོར་པའི་སྒོས་དགྲ། གཟུགས་ལིངྒ་ལ་བྲིས་པ། མིང་བྱང་བུ་ལ་བཀོད་པ། ཡིད་ལ་དམིགས་པའི་དགྲ་བོ་འདི་ཉིད་ཀྱི་བླ་སྲོག་རྣམ་པར་ཤེས་པ་སྲིད་པ་གསུམ་གར་གནས་ཀྱང་སྐད་ཅིག་རང་དབང་མེད་པར་ལིངྒ་འདི་ལ་ཁུག་ཅིག །བཛྲ་ཨངྐུ་ཤ་ཛ་ཛ༔ བཛྲ་པཱ་ཤ་ཧཱུྃ་ཧཱུྃ། བཛྲ་སྤོ་ཊ་ཐཾ་ཐཾ། བཛྲ་གནྡྷེ་ཧོ་ཧོ། ཞེས་ལན་གསུམ། ཧཱུྃ། དགྲ་ལྷ་གཙོ་འཁོར་བཅས་པ་རྣམས། །ཡུད་ཙམ་བདག་ལ་སྙན་གསོན་དང་། །བདག་ནི་སྙིང་རྗེ་ཡུས་ཆེ་བས། །སྡུག་བསྔལ་ཚིག་གསུམ་ཞུ་བ་ལ། །དགྲ་ལྷའི་ཐུགས་ཀྱིས་དགོངས་མཛོད་དང་། །སྡང་བྱེད་དགྲ་བགེགས་ལས་ངན་འདིས། །མ་ཉེས་བཞག་པའི་བྱས་ནོར་
འཕྲོག །བདག་ལ་དོ་བསྡོས་ཡ་བོ་བཟུང་། །སྲུང་མ་ཁྱེད་ལ་ཁ་ངན་བཏང་། །རྣལ་འབྱོར་ང་ལ་མཐོ་ནོན་བྱས། །སངས་རྒྱས་བསྟན་པ་གཉན་པོ་བཤིགས། །དཀོན་མཆོག་གསུམ་གྱི་དབུ་འཕང་སྨད། །རྡོ་རྗེ་སློབ་དཔོན་སྐུ་ལ་བསྡོས། །གསང་སྔགས་ཆོས་ལ་སྐུར་པ་བཏབ། །རྒྱུ་འབྲས་དམ་ཆོས་མི་བདེན་ཟེར། །བྱང་ཆུབ་སེམས་དཔའ་ཐུགས་རྒྱུད་དཀྲུགས། །དབེན་གནས་གཉན་པོའི་དཀོར་ལ་བརྐུས། །དགེ་བཅུ་སྤངས་ཤིང་མི་དགེ་སྤྱད། །མཚམས་མེད་ལྔ་པོ་དང་དུ་བླངས། །འདི་ནི་བསྟན་དགྲ་ངེས་པ་དང་། །རྣལ་འབྱོར་ང་ཡི་སྒོས་དགྲ་ཡིན། །མྱུར་དུ་བསད་ཅིང་བསྒྲལ་བའི་ཕྱིར། །རྡོ་རྗེ་གུར་མགོན་ཆེན་པོ་ལ། །བཤོས་བུ་སྙིང་དང་གཏོར་མ་དང་། །རིན་ཆེན་གསེར་སྐྱེམས་མ་འདི། །དགྲ་བསད་པ་ཡི་ཡོན་དུ་འབུལ། །འབྲུ་སྣ་གཏོར་མར་ཕུལ། ཆང་ཕུད་ནམ་མཁར་གཏོར་བཅུག །དགྲ་ལྷ་ཁྱེད་ལ་མཐུ་ཡོད་ན། །དགྲ་བོ་འདི་ཡི་ཚེ་སྲོག་ཁྱེར། །དགྲ་ལ་རྩལ་ཡོད་ན། །དགྲ་བོ་འདི་ཡི་གློ་སྙིང་དྲོངས། །དགྲ་ལྷ་ཁྱོད་ལ་སྟོབས་ཡོད་ན། །སྡང་དགྲ་འདི་ཡི་སྙིང་ཁྲག་འཐུང་། །བཀའ་དང་དམ་ལ་དགོངས་མཛོད་ལ། །དགྲ་བོ་
བསྒྲལ་བའི་ལས་མཛོད་ཅིག །སྡང་དགྲ་བསྒྲལ་བའི་དུས་ལ་བབ། །དོ་གལ་ཆེ་འོ་ཁྱེད་ལ་འབོད། །ར་མདའ་ཟློག་གོ་ཁྱོད་ལ་འབོད། །མཐུ་དཔུང་བཅོལ་ལོ་ཁྱོད་ལ་འབོད། །སྡོང་གྲོགས་བཅོལ་ལོ་ཁྱོད་ལ་འབོད། །དགྲ་ལྷར་བསྐོས་ཕྱིར་ཁྱོད་ལ་འབོད། །བདག་ལ་དགྲ་བྱུང་ཁྱོད་ལ་འབོད། །འཛམ་གླིང་མི་ཡུལ་འཇིག་རྟེན་ན། །དགྲ་ལྷ་ཟོ་དོར་གྲངས་མང་ཡང་། །ང་རེ་ལྟོས་གཞན་དུ་མ་བྱས་སོ། །ཕ་སྐུ་ཤུགས་མཐུ་རྩལ་མ་ཆུང་ཞིག །སྤྲུལ་པ་རྫུ་འཕྲུལ་མ་ཞེན་ཅིག །རྟགས་ཕྱུང་མཚན་མ་དངོས་སུ་སྟོན་། །བཀྲ་ཤིས་བདུད་འདུལ་མ་གཡེལ་ཅིག །མ་གཡེལ་སྲུང་མ་དམ་ཚིག་ཅན། །ཞང་བློན་བདུད་འདུལ་མ་གཡེལ་ཅིག །མ་གཡེལ་མ་གཡེལ་མཐུ་རྩལ་ཅན། །རོག་སྣལ་བདུད་འདུལ་མ་གཡེལ་ཅིག །མ་གཡེལ་མ་གཡེལ་སྤྲུལ་པའི་འཁོར། །དགེ་བསྙེན་ལ་དཀར་མ་གཡེལ་ཅིག །དགྲ་ལྷ་ཆེན་པོ་མ་གཡེལ་ཅིག །ལྷ་རྣམས་ཀུན་འདུལ་མ་གཡེལ་ཅིག །མ་གཡེལ་སྡང་བའི་དགྲ་ལ་རྒྱུགས། །ཤེལ་ར་ཁམ་པ་ཆིབས་པའི་ཚེ། །ཨ་བརྩེ་ཞང་བློན་དགྲ་ལ་རྒྱུགས། །རྫུ་འཕྲུལ་སྨུག་རྟ་ཆིབས་པའི་ཚེ། །དགྲ་ལྷ་རོག་
སྣལ་དགྲ་ལ་རྒྱུགས། །ངང་སེར་གཡུ་རྔོག་ཆིབས་པའི་ཚེ། །དགྲ་ལྷ་འོད་ཕྲོམ་དགྲ་ལ་རྒྱུགས། །མཚལ་བུ་རྟིང་དཀར་ཆིབས་པའི་ཚེ། །དགྲ་ལྷ་འོར་ལྡང་དགྲ་ལ་རྒྱུགས། །དུང་གི་ར་སྐྱེས་ཆིབས་པ་ཡི། །སྐྱེས་བུ་ཆེན་པོ་དགྲ་ལ་རྒྱུགས། །སྦྲུལ་ནག་མགོ་དགུ་ཆིབས་པ་ཡི། །རོག་སྣལ་ཆེན་པོ་དགྲ་ལ་རྒྱུགས། །མཚལ་བུ་རྟིང་དཀར་ཆིབས་པ་ཡི། གཡས་སུ་འགྲོ་བའི་ཕོ་ཉ་པོ། །སྐུ་བླ་ཆེན་པོ་སང་གུ་ར། །མ་གཡེལ་མྱུར་བར་དགྲ་ལ་རྒྱུགས། །དྲེལ་ནག་རྐང་གསུམ་ཆིབས་པ་ཡི། །སྐུ་བླ་རྒྱལ་བཟང་དགྲ་ལ་རྒྱུགས། །སྤྲུལ་པ་གཡུ་རྟ་ཆིབས་པ་ཡི། །འཇམ་ཞུ་ཆུང་བ་དགྲ་ལ་རྒྱུགས། རྐྱང་བུ་ཁ་དཀར་ཆིབས་པ་ཡི། །སྤྱི་བཞེར་ཆེན་པོ་དགྲ་ལ་རྒྱུགས། །ལྕགས་སྤྱང་སྔོན་པོ་ཆིབས་པ་ཡི། །དགེ་བསྙེན་འོད་འཛེར་དགྲ་ལ་རྒྱུགས། །ཤ་ལྤགས་ཧྲཱིལ་མ་མནབས་པ་ཡི། །སྒོ་སྲུང་ཕུར་བུ་དགྲ་ལ་རྒྱུགས། །སྣ་ཁྲིད་བྷྱོ་འཛེར་དགྲ་ལ་རྒྱུགས། །སྡང་དགྲའི་སྟེང་དུ་སྣ་ཁྲིད་གྱིས། །བཙན་གྱི་དམག་སྣ་དགྲ་ལ་རྒྱུགས། །བདུད་ཀྱི་དམག་སྣ་དགྲ་ལ་ཁྲིད། །དགྲ་ལ་རོག་པ་རྩེ་རྒྱལ་གྱིས། །སྤྲུལ་པ་སྐུ་ཡི་ཕོ་ཉ་བ། །ལྷ་གཡག་དཀར་པོ་དགྲ་ལ་
རྒྱུགས། །ལྕགས་ཀྱི་བྱ་ཁྲ་དགྲ་ལ་རྒྱུགས། །གཡུ་འབྲུག་སྔོན་པོ་དགྲ་ལ་རྒྱུགས། །དུང་གི་སེང་གེ་དགྲྭ་ལ་རྒྱུགས། །རྒྱ་སྟག་དམར་པོ་དགྲ་ལ་རྒྱུགས། །ལྕགས་སྤྱང་སྔོན་པོ་དགྲ་ལ་རྒྱུགས། །དགེ་བསྙེན་ཀླུ་དགེ་དགྲ་ལ་རྒྱུགས། །རིམས་ཤིག་དགྲ་ལྷ་མཐུ་རྩལ་ཅན། །ཐུབ་པའི་དཔུང་དང་དགྲ་ལ་རྒྱུགས། །བཙན་པའི་གོ་དང་དགྲ་ལ་རྒྱུགས། །རྣོ་བའི་མཚོན་དང་དགྲ་ལ་རྒྱུགས། །མགྱོགས་པའི་རྟ་དང་དགྲ་ལ་རྒྱུགས། །རེམས་ཤིག་དགྲ་ལྷ་མྱུར་མགྱོགས་ཅན། །དུས་ངན་བསྐལ་པའི་སྙིགས་མ་ལ། །ཡེ་ཤེས་ལྷ་ནི་འགྲུབ་ཐག་རིང་། །གྲོང་ཁྱེར་ནང་འཁྲུག་མཐུ་འདྲེན་ན། །ཁྱེད་ནི་འཇིག་རྟེན་མྱུར་མགྱོགས་ལྷ། །ཁྱོད་ནི་དྲག་ཤུལ་མཐུ་རྩལ་ཅན། །དཔའ་བའི་སེམས་དང་དགྲ་ལ་རྒྱུགས། །གདུག་པའི་སེམས་དང་དགྲ་ལ་རྒྱུགས། །སྡང་བའི་སེམས་དང་དགྲ་ལ་རྒྱུགས། །ཞེ་སྡང་སྐྱེད་ལོ་དགྲ་ལ་རྒྱུགས། །ང་རྒྱལ་སྐྱེད་ལ་དགྲ་ལ་རྒྱུགས། །སྡང་བའི་དགྲ་ཁམས་ཆམ་ལ་ཕོབ། །རེམས་ཤིག་དགྲ་ལྷ་སྤྲུལ་པ་ཅན། །དགྲ་མགོ་ཆོད་ལ་དགྲ་སྙིང་དྲོངས། །དགྲ་ལྷ་ཆེན་པོ་མ་གཡེལ་ཅིག །མཐུ་ཆེན་སྲུང་མ་
མ་གཡེལ་ཅིག །དགྲ་ལྷ་ཆེན་པོ་འཁོར་བཅས་ལ། །བདག་གིས་བརྔན་ཡོན་འབུལ་བ་ནི། །བཤོས་བུ་སྙིང་དང་གཏོར་མ་དང་། །གཡུ་ཤུག་བལ་བུ་རྟིང་དཀར་དང་། །སྦ་རྒོད་སྨྱུག་རྒོད་ལྡེམ་པ་བཙུགས། །དུང་དཀར་འཕང་ལོ་ཟླུམ་དཀར་དང་། །སྤྲུལ་པའི་མེ་ལོང་གསལ་བ་དང་། །དར་ཟབ་ཟ་འོག་མཛེས་པ་དང་། །སྟག་རས་གཟིག་རིས་ཁྲ་བོ་དང་། །གཡག་ལུག་བྱ་ཁྲ་གཟུགས་འགྲོས་འདི། །སྔགས་དང་ཕྱག་རྒྱས་བྱིན་གྱིས་བརླབས། །བསམ་གཏན་ལྷ་ཡི་དཀོར་བས་ལྷག །གཉན་པོ་ལྷ་སྲུང་འཁོར་བཅས་ལ། །དགྲ་བོ་བསད་པའི་ཡོན་དུ་འབུལ། །དགྲ་བསད་ཡོན་དུ་བཞེས་མཛོད་ལ། །སྡང་བའི་དགྲ་ལ་མཐུ་མ་ཆུང་། །དགྲ་ལྷ་གཙོ་འཁོར་བཅས་པ་ལ། །རྟ་མཆོག་སྔོན་པོ་སག་སྒྲ་ཅན། །མཐུར་མདའ་སྐྱེས་བུའི་ཕྱག་ཏུ་འབུལ། །དགྲ་བོ་བསད་པའི་ཡོན་དུ་བཞེས། །སྦྱ་རྒོད་སྨྱུག་རྒོད་ལྡེམ་པ་དེ། །དགྲ་བོ་བསད་པའི་ཡོན་དུ་འབུལ། །རིན་ཆེན་གསེར་རྒོད་གཡུ་རྒོད་དེ། །དགྲ་བོ་བསད་པའི་ཡོན་དུ་འབུལ། །གཡག་ལུག་དར་མའི་ཤ་ཁྲག་དེ། །དགྲ་བོ་བསད་པའི་ཡོན་དུ་འབུལ། །ར་ཡི་དབང་པོ་གསར་པ་འདི། །
དགྲ་བོ་བསད་པའི་ཡོན་དུ་འབུལ། །སྟག་རས་གཟིག་རིས་ཁྲ་བོ་འདི། །དགྲ་བོ་བསད་པའི་ཡོན་དུ་འབུལ། །མཛེས་པའི་དར་ཚོན་སྣ་ལྔ་འདི། །དགྲ་བོ་བསད་པའི་ཡོན་དུ་འབུལ། །དགྲ་བསད་ཡོན་དུ་བཞེས་མཛོད་ལ། །ངན་སེམས་འཆང་བའི་དགྲ་བོ་ཡི། །སྙིང་ཁྲག་ཕྱུང་ལ་གློ་སྙིང་དྲོངས། །དགྲ་བོ་སོད་ལ་བང་མགྱོགས་བསྐྱེལ་། །གོ་ཁྲབ་ཤུས་ལ་རྣོ་ཚོན་འཕྲོག །དགྲ་བོ་ཕོ་འཕྱོར་མོ་སྒེག་གིས། །རྩ་དཀར་སྡོམ་ལ་སྐྱེ་རྒྱུད་ཆོད། །དགྲ་བོ་མི་ནོར་འཁོར་བཅས་ནི། །རླུང་ལ་བསྐུར་ལ་ཆུ་ལ་སྐུར་། །མིང་ཡང་མེད་པར་རྡུལ་དུ་རློགས། །དགྲ་ལྷ་དགྲ་ལ་རྒྱུག་ཙམ་ན། །གནམ་ལྕགས་ཐོག་གི་མདའ་ཕྱུང་ལ། །སྡང་བའི་དགྲ་བོ་ཐོག་གིས་སོད། །སྦྲུལ་ནག་མགོ་དགུའི་སྟོབས་ཕྱུང་ལ། །སྡང་བའི་དགྲ་བོ་ཐོག་གིས་སོད། །སྡང་བའི་དགྲ་ལ་སྤྱི་ལིང་ཐོབ། །ནད་ཀྱི་རྐྱལ་པ་ཁ་ཕྱེས་ལ། །སྡང་བའི་དགྲ་ལ་ནད་ཀྱིས་ཐོབ། །དགྲ་མགོ་དགྲ་མཁར་ཐོག་གིས་ཆོམས། །དགྲ་སྲོག་དམར་པོ་ཚོན་གྱིས་བྲེག །དགྲ་བོའི་དོན་སྙིང་ལྕགས་ཀྱུས་དྲོངས། །དགྲ་ཁམས་མྱ་ངན་ཟུག་རོལ་ནོན། །དགྲ་ཤ་དགྲ་ཁྲག་དགྲ་
ལྷས་འཐུང་། །དགྲ་བོའི་སྙིང་ནོར་དཀར་ནག་དེ། །རང་གི་བུ་རྟས་ཐུབ་པར་གྱིས། །བཅོལ་བའི་ལས་འདི་མ་བྱས་ན། །དགྲ་ལྷ་གཞན་གྱིས་ཐུགས་ཀྱིས་ཁྲེལ། །བདག་་ཅག་རྣལ་འབྱོར་ཡི་ཡང་ཆད། །དེ་ཕྱིར་བཅོལ་བའི་ལས་འདི་བདག །མྱུར་དུ་འགྲུབ་པའི་ཕྲིན་ལས་མཛོད། །བྷྱོ། དཔའ་རྩལ་ཅན་རྣམས་དགྲ་ལ་རྒྱུགས། །ཡང་ཟེར་ཅན་རྣམས་དགྲ་ལ་རྒྱུགས། །མྱུར་མགྱོགས་ཅན་རྣམས་དགྲ་ལ་རྒྱུགས། །བརྟུལ་ཞུགས་ཅན་རྣམས་དགྲ་ལ་རྒྱུགས། །དེ་ནས་ཡོད་ན་མཚོན་ཆ་སོ་སོ་ཚད། མེད་ན་ལྕགས་ཀྱུ་སོགས་ཕྱག་རྒྱ་བྱས་ཤིང་། །བྷྱོ། ཡེ་བརྫུའི་གཉན་པོའི་ཕོ་ཉ་རྣམས། །བང་ནི་སྐར་མདའ་རླུང་བས་མགྱོགས། །ལ་ལས་འགུགས་བྱེད་ལྕགས་ཀྱུ་བསྣམས། །ལྕགས་ཀྱུ་ཅན་རྣམས་དགྲ་བོ་ཁུག ཁུག་ཅིག་བཛྲ་ཨཾ་ཀུ་ཤ་ཛ༔ །ཞང་བློན་མཐུ་ཆེན་ཕོ་ཉའི་ཚོགས། །ལ་ལས་ལག་ན་ཞགས་པ་ཐོགས། །སྦྲུལ་ནག་ཞགས་པ་གློག་ལྟར་འཁྱུག །ཞགས་པ་ཅན་གྱིས་དགྲ་བོ་ཆིངས། །ཆིངས་ཤིག་བཛྲ་པ་ཤ་ཧཱུྃ། །སྐུ་ལྷ་གཉན་པོ་ཕོ་ཉ་རྣམས། །ལ་ལས་ཕྱག་ན་ལྕགས་སྒྲོག་ཐོགས། །གང་ལ་དམིགས་པ་མགུལ་མི་ཤེས། །ལྕགས་སྒྲོག་ཅན་
རྣམས་དགྲ་བོ་སྡོམས། །སྡོམས་ཤིག་བཛྲ་སྤོ་ཊ་བི། །རྡོ་རྗེ་གུར་མགོན་ཕོ་ཉ་རྣམས། །ལ་ལས་ལག་ན་དྲིལ་བུ་ཐོགས། །དྲིལ་བུ་ཐོགས་པ་འབྲུག་ལྟར་ལྡིར། །དྲིལ་བུ་ཅན་གྱིས་མྱོས་སུ་ཆུག །མྱོས་པར་གྱིས་ཤིག་བཛྲ་གྷནྡྷེ་ཧོ༔ །རྡོ་རྗེ་ཕུར་པའི་བཀའ་སྲུང་བ། །ཕུར་སྲུང་རྡོ་རྗེ་གུར་གྱི་མགོན། །སྒྲོལ་བྱེད་གནམ་ལྕགས་ཕུར་བུ་འདྲིལ། །སྒྲོལ་ཅིག་བཛྲ་ཀཱི་ལ་ཡ། །དགེ་བསྙེན་རོག་སྣལ་མཐུ་ཆེན་ནི། །ཕྱག་གཡས་གནམ་ལྕགས་ཐོག་རྒོད་འཕེན། །གཡོན་པས་ཁྲོ་ཐེལ་རྩེ་བརྒྱད་བསྣམས། །རྒྱབ་ཅིག་བཛྲ་ཀིང་ཀ་པ། །གུ་རུ་སྔགས་ཀྱི་དགྲ་ལྷ་ནི། །ཕྱག་ན་མདུང་དར་དཀར་པོ་བསྣམས། །བསྟན་དགྲ་དམ་ཉམས་དགྲ་བོ་ལ། །རྒྱོབ་ཅིག་བཛྲ་ཏྲི་ཤུ་ལ། །དགྲ་ལྷ་འོད་ཕྲོམ་མཐུ་ཆེན་ནི། །ཕྱག་ན་མདུང་དར་སྔོན་པོ་ཕྱར། །སྡིག་ཅན་དགྲ་བོ་ལས་ངན་འདི། །རྒྱོབ་ཅིག་བཛྲ་ཏྲི་ཤུ་ལ། །སྐུ་ལྷ་ཝར་གདོང་ཆེན་པོ་ནི། །ཕྱག་གཡས་རལ་གྲི་མེ་འབར་ཕྱིར། །དམ་ཉམས་དགྲ་བོ་མགོ་ལུས་སྙིང་། །གཏུབས་ཤིག་བཛྲ་ཏིཀ་ན་པ། །དགེ་བསྙེན་འར་ཆེན་ཤོ་ཙ་ནི། །ཕྱག་ན་མཁར་ཐེལ་རྩེ་དགུ་བསྣམས། །རྡུངས་ཤིག་
བཛྲ་ཨ་ཀོད་ཏ། །ཡུངས་ཀར་ཡུངས་ནག་ཟངས་ལྕགས་ཕྱེ། །སྣ་ཚོགས་མཐུན་རྫས་དྲག་པོའི་ཆར། །ཟངས་ལྕགས་ཐོད་རྒོད་ཆེམས་སེ་ཆེམ། །གང་ལ་རྒྱབ་ཀྱང་ཐོགས་པ་མེད། །ཕོབ་ཅིག་བཛྲ་སི་རི་རཾ། །ལས་མཁན་ཤན་པ་ཕོ་མོའི་ཚོགས། །སྤུ་གྲི་ཆུ་གྲིས་དགྲ་བོ་ཤོས། །གནམ་ལྕགས་འཁོར་ལོས་དགྲ་བོ་གཏུབས། །བསྟན་དགྲ་དམ་ཉམས་ཚེ་སྲོག་ཆོད། །ལོ་དང་ཟླ་བར་མ་བཞག་ལ། །ཞག་དང་ཟ་མར་མཱ་ར་ཡ། །ཞེས་རྩ་སྔགས་མན་ངག་ལྟར་བཟླ་ཞིང་ལིང་ག་གཏུབས། ཁྲག་གིས་བྲན་ལ་བཀྱག་བཅུག་ལ། ཧཱུྃ་བྷྱོ། འཇིག་རྟེན་ཁམས་ཀྱི་དྲེགས་པ་ཅན། །ཤ་ལ་དགའ་ཞིང་ཁྲག་ལ་དགྱེས། །ཞང་བློན་ལྷ་སྲིན་དྲེགས་པའི་ཚོགས། །བསྟན་དགྲ་དམ་ཉམས་སྡིག་ཅན་འདི། །རྣམ་ཤེས་ལོང་ལ་ཤ་ཁྲག་ཟ། །སྙིང་ཁྲག་འཐུང་ལ་ཁོང་ཁྲག་འཇིབས། །རུས་པ་མུར་ལ་སླ་བ་འཇིབས། །ཤ་ལ་ཆེམ་ཆེམ་དགྱེས་པར་རོལ། །ཁྲག་ལ་ལྡིབ་ལྗིབ་དགྱེས་པར་རོལ། །རུས་ལ་ཀྲུམ་ཀྲུམ་དགྱེས་པར་རོལ། །སྣང་སྲིད་ལྷ་སྲིན་སྡེ་བརྒྱད་ཚོགས། །ཤ་དང་ཁྲག་ལ་དགྱེས་ལགས་ན། །དགྲ་བོའི་ཤ་ཁྲག་འདི་བཞེས་ཤིག །གློ་སྙིང་གྱུར་མིད་ད་གྱིས་ཤིག །
ཞལ་དུ་བསྟབ་བོ་ཁ་རཾ་ཁཱ་ཧི། །མགུལ་དུ་བསྟིམ་མོ་ཨ་ར་ལི། །གསོལ་ཞིག་བཞེས་ཤིག་ཨ་ལ་ལ། །ཞེས་བརྗོད་ལིང་རོ་འབྲུ་སྣ་ཕུད་གང་ཡོད་བསྡུས་ལ་གཏོར་མའི་ནང་དུ་བླུག་གསེར་སྐྱེམས་ཡང་བླུགས་ལ་བྲན་ནོ། །གལ་ཆེ་ན་དེ་ཡན་ཚར་གསུམ་བདུན་སོགས་བྱ། དེ་ནས་ཕུལ་རན་པ་དང་། གོ་མཚོན་གང་ཡོད་གསོལ། སྤྲོས་པ་ལ་དགའ་ན་ཁྲབ་ཅན་སོགས་དང་། བརྡ་རོ་བུད་པའི་ཆས་བྱས་རྔ་དང་དར་ཕྱར། བསྲོ་སྒྲ་དང་མེ་ཕག་སོགས་འཇིགས་རྔམ་བྱས་ལ། གཟའ་དང་མཁའ་འགྲོ་རྒྱུ་ལྡོག་ཞིབ་ཏུ་བརྩིས་ལ་གདོང་མ་ཐུག་པར་བྱས། དགྲ་ཕྱོགས་དང་འགྲིགས་ན་རབ། དམག་གི་རིམ་གྲོ་ཡིན། རྒྱུ་ལྡོག་དང་མི་འགལ་བར་འགྲོ་ཕྱོགས་སུ་ཕུལ་ཤོམ་བྱས་ལ། གཏོར་མདོས་གོམ་པ་བདུན་ཅུའམ། བདུན་ནམ་དགུ་ཙམ་དཔག །གཞི་བདག་ལ་བསྔོས་པའི་དཀར་གཏོར་སྔོན་དུ་ཁྱེར་རྒྱུ་བཞག །དེ་རྒྱབ་དགྲ་ཆོས། དེ་རྒྱབ་ལྷ་ཡེ་ཤེས་པའི་ཡི་དམ་ཆོས་སྐྱོང་གི་དམར་གཏོར་གཅིག་རྒྱབ་རྟེན་དུ་བཤམས་ལ། དེ་དག་སོ་སོར་བསྔོ། བེར་ཆེན་སོགས་གཞན་གང་རུང་ལྟར་གསེར་སྐྱེམས་གཏོར། དེ་ནས་རྔ་དྲག་རྡུང་དང་བཅས་པས་འདི་སྐད་དོ།། ཧཱུྃ། གཉན་པོ་རྡོ་རྗེ་གུར་མགོན་ནི། །ཆ་ལུགས་གཅིག་ཏུ་མ་ངེས་ཏེ། །གང་ལ་གང་འདུལ་སྤྲུལ་པ་མཛད། །དགྲ་ལྷའི་ཆས་སུ་ཞུགས་པ་སྟེ། །མྱུར་མགྱོགས་སྤྲུལ་པ་གཡུ་རྟ་ཆིབས། །ཀླད་ན་ལྕགས་ཀྱི་བྱ་ཁྲ་
ལྡིང་། །འབྲུག་དང་སེང་གེ་སྔོན་དུ་མཆོངས། །སྟག་དང་སྤྱང་ཀི་རོལ་དུ་ཁྲིད། །དུང་གཡག་དབལ་དུ་དགྲ་ལ་འཕེན། །ཐོག་དང་ཞགས་པ་ཕྱག་ན་བསྣམས། །འཁོར་ནི་སྤྲུལ་པ་མྱུར་མགྱོགས་ཅན། །དཔའ་ཁྲོ་མང་པོས་འཁོར་གྱིས་བསྐོར། །ལྷ་དམག་ཀླུ་དམག་གཉན་དམག་དང་། །བདུད་དམག་བཙན་གྱི་དམག་ཚོགས་རྣམས། །རྒྱབ་ནས་མདུན་དུ་ཀྱི་ལི་ལི། །གཡས་དང་གཡོན་དུ་ཤ་ར་ར། །གོ་གྱོན་མཚོན་ཐོག་སི་ལི་ལི། །མདུན་དུ་རུ་མཚོན་ལྷབས་སེ་ལྷབ། །ཀུ་སྒྲ་ཆ་སྒྲ་དི་རི་རི། །མགྱོགས་པའི་རྟ་རྒྱུག་ཚེསྲིངས་སེ་སྲིང་། །དགྲ་ལ་དམག་ཚོགས་ཤིགས་སེ་ཤིག །བསྟན་དགྲ་དམ་ཉམས་ལས་ངན་འདིས། །དགྲ་ལྷ་གཉན་པོར་མ་བརྩེས་ན། །བསྟན་དང་བདག་ལ་དགྲ་བྱུང་ན། །ཁྱེད་ཀྱི་ཀོ་ལོང་དོམ་པོ་མཛོད། །སེམས་ངན་འཆང་བའི་དགྲ་བོ་ལ། །ཤོར་མེད་བདུད་ཀྱི་ཞགས་པ་ཐོབ། །རྒྱུག་མེད་ཐོག་མདའ་དམར་པོས་སོད། །གདུག་པའི་ཆོ་འཕྲུལ་དགྲ་ལ་ཐོངས། །དགྲ་ལྷའི་གཙོ་འཁོར་ཁྱེད་རྣམས་ཀྱིས། །དམ་ཉམས་དགྲ་བོ་ལས་ངན་འདི། །ཤར་ལྷོ་ནུབ་བྱང་གར་སོང་ཡང་། །གཏོར་མ་འདི་དང་མཉམ་པོར་བཞེས། །
སྦྲུལ་ནག་མགོ་དགུས་དགྲ་སྲོག་ཆོད། །ཨ་ཇོ་ཞང་བློན་ཆེན་པོ་ཆོས། །གནོད་ཅིང་འཚེ་བའི་དགྲ་བོ་འདི། །གཏོར་མ་འདི་དང་མཉམ་དུ་བཞེས། །འབྲུ་ཡི་དགྲ་ལྷ་ཆེན་པོ་ཁྱོད། །བསྟན་དགྲ་ལས་ངན་སྡིག་ཅན་འདི། །གཏོར་མ་འདི་དང་མཉམ་དུ་བཞེས། །རོག་སྣལ་བདུད་འདུལ་དགྲ་ལ་ཆོས། །བསྟན་དགྲ་ལས་ངན་སྡིག་ཅན་འདི་། །གཏོར་མ་འདི་དང་མཉམ་དུ་བཞེས། །དགྲ་ལྷ་འོད་ཕྲོམ་དགྲ་ལ་ཆོས། །བསྟན་དགྲ་ལས་ངན་སྡིག་ཅན་འདི། །གཏོར་མ་འདི་དང་མཉམ་དུ་བཞེས། །དགྲ་ལྷ་ཝར་ལྡང་སྟོབས་ཆེན་ཆོས། །སྡིག་ཆེན་བསྟན་དགྲ་ལས་ངན་འདི། །གཏོར་མ་འདི་དང་མཉམ་དུ་བཞེས། །དགེ་བསྙེན་འོར་ཆེན་ཤ་ཙ་ཁྱོད། །སྡིག་ཆེན་ཉེས་བྱེད་བསྟན་དགྲ་འདི། །གཏོར་མ་འདི་དང་མཉམ་དུ་བཞེས། །ཞང་བློན་བདུད་འདུལ་ནག་པོ་ཆོས། །སྡིག་ཆེན་དགྲ་བོ་ལས་ངན་འདི། །གཏོར་མ་འདི་དང་མཉམ་དུ་བཞེས། །དགྲ་ལྷ་གཡས་ཀྱི་ཕོ་ཉ་བ། །སྐུ་བླ་ཆེན་པོ་སོ་འགུ་རེ། །འཁོར་དང་བཅས་པ་ཐམས་ཅད་ཀྱིས། །སྡིག་ཅན་ལས་ངན་བསྟན་དགྲ་འདི། །གཏོར་མ་འདི་དང་མཉམ་དུ་བཞེས། །
དགྲ་ལྷ་རྒྱལ་བཟང་འཁོར་བཅས་ཀྱིས། །སྡིག་ཆེན་བསྟན་བཤིག་དགྲ་བོ་འདི། །གཏོར་མ་འདི་དང་མཉམ་དུ་བཞེས། །འཇམ་ཞུ་ཆུང་བ་འཁོར་བཅས་ཀྱིས། །སྡིག་ཆེན་བསྟན་ལ་གནོད་བྱེད་པའི། །གཏོར་མ་འདི་དང་མཉམ་དུ་བཞེས། །གཡས་ཀྱི་སྒོ་སྲུང་སྤྱི་བཞེར་དང་། །གཡོན་གྱི་སྒོ་སྲུང་འོ་འཛོར་གྱིས། །སྡིག་ཅན་བསྟན་པའི་དགྲ་བོ་འདི། །གཏོར་མ་འདི་དང་མཉམ་དུ་བཞེས། །ཤ་ལྤགས་ཧྲཱིལ་ལེ་མནབས་པ་ཡི། །སྒོ་སྲུང་ཕུར་བུ་འཁོར་བཅས་ཀྱིས། །དམ་ཉམས་སྡིག་ཅན་དགྲ་བོ་འདི། །གཏོར་མ་འདི་དང་མཉམ་དུ་བཞེས། །རྒྱལ་བ་ཀླུ་དགེ་ལ་སོགས་པའི། །གཡས་སུ་འགྲོ་བའི་ཕོ་ཉ་དང་། །གཡོན་དུ་འགྲོ་བའི་ཕོ་ཉ་དང་། །མདའ་ར་བ་དང་མདུང་ར་བ། །མཆན་ཁེབས་པ་དང་སྣ་ཁྲིད་པ། །འཁོར་དང་བཅས་པ་ཐམས་ཅད་ཀྱིས། །དམ་ཉམས་བསྟན་དགྲ་སྡིག་ཆེན་འདི། །གཏོར་མ་འདི་དང་མཉམ་དུ་བཞེས། །སྡིག་ཅན་བསྟན་དགྲ་ཉེས་བྱེད་ལ། །གྱོད་ཁ་ཕྱེས་ལ་ས་དང་བསྲེས། །ཤི་ཁ་ཕྱེས་ལ་སྐྱེ་རྒྱུད་ཆོད། །དལ་ཁ་སྡང་བའི་དགྲ་ལ་སྒྱུར། །གྱོད་སྣ་སྡང་བའི་དགྲ་ལ་སྒྱུར། །ནད་སྣ་སྡང་བའི་དགྲ་ལ་སྒྱུར། །
བྱུར་སྣ་སྡང་བའི་དགྲ་ལ་སྒྱུར། །ཐན་སྣ་སྡང་བའི་དགྲ་ལ་སྒྱུར། །མཚོན་སྣ་སྡང་བའི་དགྲ་ལ་སྒྱུར། །དགྲ་བོའི་སྟེང་ན་ནད་ཡམས་ཕོབ། །མཚོན་གྱི་ཆར་པ་དགྲ་ལ་ཕོབ། །དགྲ་ལ་བློ་ཉེས་གཡུལ་ཉེས་ཐོངས། །དགྲ་ལ་མི་ཤི་རྟ་འགྱེལ་ཐོངས། །དགྲ་བོའི་ཤ་ཁྲག་སོ་མ་དང་། །དགྲ་བོའི་གློ་སྙིང་དྲོན་མོ་དེ། །དགྲ་ལྷ་ཆེན་པོའི་ཞལ་དུ་གསོལ། །ཞལ་དུ་གསོལ་ཞིང་ཐིམ་པར་མཛོད། །ཞལ་དུ་གསོལ་ཞིང་དགྱེས་པར་མཛོད། །དམ་ཉམས་བསྟན་དགྲ་སྡིག་ཆེན་འདི། །ཉི་མ་དེ་རིང་ཕན་ཆད་ནས། །གནམ་གྱི་འཇུ་ཐག་དཀར་པོ་ཆོད། །ས་ཡི་རྟེན་ཕུར་དམར་པོ་ཕུད། །ལས་ཀྱི་རླུང་གིས་རྒྱབ་ནས་དེད། །འཇིགས་པའི་མུན་པས་སྔོན་ནས་སུས། །ལོ་དང་ཟླ་བར་མ་བཞག་ལ། །ཞག་དང་ཟ་མར་མ་བཞག་ཅིག །ལོ་དང་ཟླ་བའི་ནང་དུ་མ་ཤོར་ཅིག །ད་ལྟ་ཉིད་དུ་བསྒྲལ་བར་མཛོད། །ཏྲི་ཏྲི་ར་ཙ་ས་མ་ཡ་བྷྱོ་བྷྱོ་ཐུན་ཐུན་དགྲ་ལ་བྷྱོ། རྦད་རྦད་ཐུན་ཐུན་དགྲ་ལ་རྦད། མཱ་ར་ཡ་བྷྱོ་བྷྱོ་ཆད། ཅེས་འབུལ་བའི་ཕྱོགས་སུ་གོ་འཁྱམས་དང་བཅས་ཏེ་ཁྱེར་ལ་གོམ་པ་བདུན་ཅུ་བས་ཉེ་མི་རུང་། ཁང་གཞིས་ཐག་བསྲིང་བར་ཁྱེར། ལམ་དུ་ལིང་ག་བརྡ་རོ་དྲུད་ཅིང་མདའ་གྲི་
སོགས་མཚོན་གྱིས་གཏུབ། གཏོར་མདོས་དེ་སྔགས་པ་བསྙེན་སྒྲུབ་ཐེམས་པའམ། མེད་ན་བླ་དྲག་ཅིང་ལག་དམེ་མང་དུ་ཡོད་པ་གཅིག་གིས་བཀྱག །དམག་མི་རྣམས་རལ་གྲི་ཕྱར་ཏེ་ཁ་ཕྱོགས་གཅིག་ཏུ་རྒྱུ།། འཛོམས་ན་སྔགས་པས་ཕུར་པ་ཕྱར། བུད་མེད་དུར་མོ་རྡོབ། བཙུན་པས་ཟབ་མདོ་འདོན། སྐྱེས་པས་མདའ་བཀང་། གོ་ཁྲབ་ཅན་རྣམས་འཛོམས་ན་བཟང་། བསོ་སྒྲ་དྲག་པོ་ལན་གསུམ་བྱས་ལ་འདི་སྐད་དོ།། བསྭོ་བསྭོ། སངས་རྒྱས་ཆོས་ལ་བསྲོ་མེད་ཀྱང་། །དཔལ་ལྡན་མགོན་པོ་བསྲོ་ལ་དགྱེས། །ཆ་ལ་དགའ་ཞིང་བསྲོ་ལ་དགྱེས། །དར་ལ་འདུ་བ་དགྲ་ལྷའི་ལུགས། །སངས་རྒྱས་ཆོས་ཀྱི་དགྲ་ལྷ་ཆེ། །ལེགས་ལྡན་ནག་པོ་དགྲ་ལྷ་མཛོད། །ཡེ་བརྫུ་གཉན་པོ་ལ་སོགས་པའི། །དགྲ་ལྷ་སུམ་བརྒྱ་དྲུག་ཅུ་རྒྱུགས། །བུ་རྟ་འཚོས་ལ་དགྲ་དཔུང་ཆོམས། །སེང་ཞོན་སྟག་ཞོན་ར་ཞོན་ཚོགས། །ཝེར་མ་སུམ་བརྒྱ་དྲུག་ཅུ་རྒྱུགས། །རྒྱལ་ཁ་རླུང་ཁ་བདག་ལ་བྱིན། །ནམ་མཁའི་ཁམས་ནས་ལྷ་དམག་རྒྱུགས། །བར་སྣང་ཁམས་ནས་གཉན་དམག་རྒྱུགས། །ས་གཞིའི་ཁམས་ནས་ཀླུ་དམག་རྒྱུགས། །རྒྱལ་པོ་ཉི་མའི་ཟེར་ལ་རྒྱུགས། །བདུད་དམག་ནམ་གྱི་གུང་ལ་རྒྱུགས། །བཙན་དམག་སྐྱ་རེངས་ཟེར་ལ་རྒྱུགས། །དཔལ་རབ་
འཆང་གིས་སོ་པ་གྱིས། །རེ་མན་ཡིས་རྟ་རྣམས་འཚོས། །བྲག་ལྷ་མགོན་པོས་མགྲོན་ལམ་ཕྱེས། །རཱ་ཧུ་ལ་ཡིས་ཤན་པ་གྱིས། །རྒྱལ་ཆེན་སྡེ་བཞིས་དམག་ཀྱིས། །ཕྱོགས་སྐྱོང་བཅུ་ཡིས་སོ་མཚམས་སྲུང་། །རྡོ་རྗེ་ལེགས་པས་སྣ་ཁྲིད་གྱིས། །རྒྱུག་སྐྱེན་བེ་དཀར་དགྲ་ལ་རྒྱུགས། །འཐབ་སྐྱེན་ཚོགས་བདག་གླང་སྣ་རྒྱུགས། མདའ་སྐྱེན་བྱི་ནུ་རཱ་ཙ་རྒྱུགས། །ཤ་ཟ་ཤན་པ་དམར་པོ་རྒྱུགས། །ཁྲག་འཐུང་འཕར་བ་དྲེད་མགོ་རྒྱུགས། །མྱུར་མགྱོགས་ལྷ་སྲིན་སྡེ་བརྒྱད་རྒྱུགས། །མཐུ་རྩལ་ཅི་གདའ་ད་ལྟའོ། །དུས་ལ་བབ་བོ་ས་མ་ཡ། །བཅོལ་བའི་ཕྲིན་ལས་འགྲུབ་པར་མཛོད།། ༈ ཧོཿ དགོངས་སུ་གསོལ་ལོ། དགྲ་ལྷ་ཞང་བློན་མཐུ་ཆེན། སྣ་ཁྲིད་ལྷ་སྲིན་སྡེ་བརྒྱད་མཐུ་བོ་ཆེ་ཁྱེད་རྣམས་ཀྱིས། སངས་རྒྱས་བསྟན་པའི་སྤྱི་དགྲ། རྣལ་འབྱོར་བདག་གི་སྒོས་དགྲ། ཡིད་ལ་མནག་པའི་དགྲ་བོ་འདི། ད་ལྟ་ཉིད་དུ་བཞེས་ཤིག །ཅེས་ཐམས་ཅད་ཀྱིས་བཞེས་སྒྲ་དང་གྲི་མཚོན་དར་ནག་རྡེབ་པ་དང་མཉམ་དུ་གཏོར་མ་འཕེན། དེ་ནས་གཏོར་སྣོད་སྦུབ་ལ། ཕཊ༔ སྐད་ཅིག་གིས་ས་གཞི་གས་པའི་ནང་ནས་ཀླུ་བདུད་དགེ་བསྙེན་ཆུ་སྲིན་གྱི་མགོ་ཅན་ཁ་
གདངས་བའི་ནང་དུ་དགྲ་བོའི་བླ་སྲོག་ལྷ་སྲུང་དང་བཅས་པ་ཚུད། དེ་སྟེང་སུ་ལས་གཏོར་སྣོད་རི་རབ་གླིང་བཞིས་མནན་ནས་ཐར་ས་མེད་པར་གྱུར། ཧཱུྃ། གུ་རུ་རྡོ་རྗེ་གྲོ་བོ་ལོད། །སྲིད་པའི་དགྲ་ལྷ་མང་པོས་བསྐོར། །སྡང་དགྲའི་གཡུལ་ལས་རྒྱལ་བའི་ཕྱིར། །བྲོ་རྡུང་གར་བྱེད་ཧ་ཧ་སྒྲོག །དགྲ་བོའི་བླ་གཤེད་དབང་དང་གསུམ། །དགྲ་བོའི་ལྷ་སྲུང་མགོན་བྱེད་བཅས། །ཆུ་སྲིན་འབར་བའི་གྲེ་བར་བྲུབ། །གླིང་བཞི་རི་རབ་ལྗིད་ཀྱིས་མནན། །བྱམས་པ་མགོན་པོ་མ་བྱོན་བར། །ནམ་ཡང་ལྡང་བར་མ་བྱེད་ཅིག ། བྱམས་པའི་བསྟན་ལ་ཆོས་ཉོན་ཅིག །ཨོཾ་ལཾ་ཧཱུྃ་ལཾ་སྟོ་བྷ་ཡ་ནན། ཞེས་གོ་འཆམས་དང་བཅས་བྲོ་བརྡུངས། དེ་ནས་མཚམས་སྐྱིལ་ལ་ཁ་ཡར་གྱུ། ཕྱི་མིག་མི་བལྟ་བར། ཧཱུྃ། རྒྱལ་ལོ་རྒྱལ་ལོ་ལྷ་རྒྱལ་ལོ། །སངས་རྒྱས་བདུད་བཞིའི་གཡུལ་ལས་རྒྱལ། །ཁྲོ་བོ་བགེགས་ཀྱི་གཡུལ་ལས་རྒྱལ། །པད་འབྱུང་ལྷ་འདྲེའི་གཡུལ་ལས་རྒྱལ། །བསྟན་སྲུང་བསྟན་དགྲའི་གཡུལ་ལས་རྒྱལ། །དགྲ་ལྷ་དགྲ་ཡི་གཡུལ་ལས་རྒྱལ། །བདག་ཅག་འཐབ་མོའི་གཡུལ་ལས་རྒྱལ། །རྒྱལ་ཁ་རླུང་ཁ་ཐོབ་པ་ཡི། །བཀྲ་ཤིས་ཕྱོགས་དང་གཡང་དུ་ཁུག །མངྒ་ལཾ་
ཨ་ལ་ལ་ཧོཿ སིདྡྷི་ཕ་ལ་ཧཱུྃ། ཞེས་ནང་དུ་འོང་ངོ་། །རྗེས་ཆོག་ཆོ་ག་གཞུང་དུ་གསལ། །ཐུབ་པའི་བསྟན་པ་མཚོན་གྱིས་འཇིགས་གསུང་ལྟར། །སྙིགས་མའི་དུས་འདིར་བདུད་མི་ལོག་ལྟ་ཅན། །ཆོས་སྲིད་མཐོ་ན་སངས་རྒྱས་བསྟན་པ་བཤིགས། །བླ་མའི་སྐུ་བསྡོ་དཀོན་མཆོག་དབུ་འཕང་སྨད། །དད་ལྡན་ཆོས་ལ་དགའ་བའི་དཔོན་རིས་རྣམས། །སྐུ་ཆོས་མཐོ་ན་སངས་རྒྱས་བསྟན་ལ་ཕན། །རྒྱལ་བློན་བྱང་ཆུབ་སེམས་དཔའི་རྣམ་ཐར་སྐྱོངས། །དེ་ཕྱིར་སྔོན་གྱི་ཡིག་རྙིང་ལས་གསུངས་པའི། །དགྲ་བླ་ཆེན་པོ་ཡེ་བརྫུ་དགྲ་ཆོས་ཀྱི། །གབ་འཁྲུགས་བསལ་ཏེ་བལྟས་ཆོག་ཁྱེར་བདེ་བར། །སྔགས་ནག་རཱ་ག་ཨ་སྱ་ཞེས་བྱ་བས། །ཨོ་རྒྱན་ཆེན་པོ་སྤྱི་བོར་བཀོད་དེ་བྲིས། །འོན་ཀྱང་སྔ་འོས་བསལ་བཀོད་ཉེས་པ་དང་། །སྨིག་མ་མཁན་དང་གཞུ་མཁན་ཇི་བཞིན་དུ། །ཤེས་རབ་འཆལ་པས་བརྩེ་བ་བྲལ་བ་ཡི། །བསྟན་བཅོས་བརྩམས་པའི་ཉེས་པ་གྱུར་སྲིད་ན། །རིག་འཛིན་པདྨ་རྗེ་འབངས་བཅས་ལ་བཤགས། །འདི་ཕྱི་ཀུན་ཏུ་སྒྲིབ་པར་མ་གྱུར་ཅིག །ཞང་བློན་འཁོར་བཅས་མངོན་ཤེས་སྤྱན་ལྡན་པས། །བསྟན་ལ་དགའ་དང་བསྟན་ལ་ཕན་པ་ཡི། །གང་བཅོལ་ཕྲིན་ལས་སྒྲུབ་ལ་ཐོགས་མེད་མཛོད། །བསྟན་ལ་གནོད་ཅིང་མི་དགེ་ལྷུར་ལེན་པའི། །གཏོར་མ་མ་ལེན་ཕྲིན་ལས་མ་སྒྲུབས་ཤིག །པདྨའི་དམ་ཚིག་མ་བརྗེད་ས་མཱ་ཡ། །དཔེ་འདི་བསྟན་ལ་དད་ཅིང་ཕན་ངེས་པར། །ཆིག་བརྒྱུད་ཙམ་ལས་མང་དུ་འཆལ་བྱེད་ན། །ཞང་བློན་ཆེན་པོས་བཀའ་ཡི་ཆད་
པ་ཆོད། །དད་ལྡན་ཆོས་ལ་དགའ་བའི་དཔོན་རིས་ལ། །སྲུང་སྐྱོབ་མེལ་ཚེ་སྡོང་གྲོགས་མ་གཡེལ་ཅིག །མངྒ་ལཾ།། །། ༧ །ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།