རྒྱལ་བ་རྒྱ་མཚོ་དང་ཚེ་རིང་མའི་རྒྱུན་བསྙེན།
རྒྱལ་བ་རྒྱ་མཚོ་དང་ཚེ་རིང་མའི་རྒྱུན་བསྙེན། གུ་རུ་ཌཱ་ཀི་ནཱི་ཡེ། ཐུགས་རྗེ་ཆེན་པོ་རྒྱལ་བ་རྒྱ་མཚོའི་བསྙེན་པ་སྔོན་དུ་སོང་ནས། རྒྱུན་དུ་ཚེ་རིང་མའི་དབང་སྡུད་བྱ་འདོད་ན། ད་ནངས་རྒྱལ་བ་རྒྱ་མཚོའི་བདག་བསྐྱེད་སོགས་ཐམས་ཅད་རིམ་པར་བྱས་རྗེས། ནུབ་མོའི་དུས་སུ་སྐད་ཅིག་ལ་རང་གསང་བ་ཡེ་ཤེས་དམར་མོ་ཕྱག་བཞི་པ་དང་ཐུགས་ཀར་ཐུགས་རྗེ་ཆེན་པོ་དམར་པོ་ཕྱག་གཉིས་ཕྲེང་བ་དང་པདྨ་འཛིན་པ་ཐུགས་ཀར་ཧྲཱིལ་ཡབ་ཡུམ་གྱི་སྔགས་ཀྱིས་བསྐོར་བར་བསྒོམས་ལ། རང་ཉིད་པདྨ་ཉི་མ་རོའི་གདན་ལ་གར་ཐབས་སུ་བཞུགས་པའི། མཐའ་སྐོར་དུ་ཚེ་རིང་མཆེད་ལྔ་ཕྱི་སྒྲུབ་ལྟར་རང་རང་གི་ཆིབས་པ་ལ་ཞོན་ནས་སྐོར་བ་གཡོན་དུ་བྱེད་པར་བསྒོམ། རང་གི་སྤྱི་བོར་བླ་མ་དང་དབྱེར་མེད་མི་ལ་རས་ཆེན་དང་དེའི་སྤྱི་བོར་རིགས་བདག་ཚེ་དཔག་མེད་བསྒོམ་སྟེ། ཨོཾ་བཛྲ་ཨཱ་ཡུ་ཥེ་ས་ར་ཧ་ཀ་ར་རེ་ཤྭ་ར་རེ་ཧཱུྃ་ཕཊ༔ ལན་གསུམ་གྱིས་གསོལ་བ་བཏབ་པས་ཚེ་དཔག་མེད་ཀྱི་ཐུགས་ཀའི་འོད་ཟེར་གྱིས་འཁོར་འདས་ཀྱི་ཚེ་བཅུད་ཐམས་ཅད་བསྡུས་ཏེ། བུམ་པར་ཐིམ་པས་བུམ་པ་ནས་བདུད་རྩིའི་རྒྱུན་བབས་པ་མི་ལའི་ཚངས་བུག་ནས་ཞུགས་སྐུ་གང་ཞིང་། ཞབས་གཡས་པའི་མཐེ་
བོང་ནས་བདུད་རྩིའི་རྒྱུན་ངང་རྒྱང་རྒྱང་བབ། རང་གི་ཚངས་བུག་ཏུ་ཞུགས་ལུས་ཐམས་ཅད་གང་། སླར་རང་གི་ཐུགས་ཀའི་ཐུགས་རྗེ་ཆེན་པོ་ལས་འོད་ཟེར་འཕྲོས་པ་གསང་བ་ཡེ་ཤེས་མཁའ་འགྲོའི་བྷ་ག་ནས་ཐོན་ཏེ། གཙོ་མོ་བཀྲ་ཤིས་ཚེ་རིང་མ་ལ་ཕོག །ཚེ་རིང་མ་ལས་འོད་ཟེར་འཕྲོས་པས་འཇིག་རྟེན་ཁམས་ཀྱི་ཚེའི་དངོས་གྲུབ་ཐམས་ཅད་དང་འབྱུང་བའི་བཅུད་ཐམས་ཅད་འོད་ཟེར་གྱི་རྣམ་པར་བསྡུས་ཏེ་བདག་ལ་ཐིམ་པས་འཆི་མེད་ཚེའི་དངོས་གྲུབ་ཐོབ་པར་བསྒོམས་ལ། ཨོཾ་མ་ཎི་པདྨེ་ཧཱུྃ། དྷུ་མ་གྷ་ཡེ་ན་མ་སྭཱ་ཧཱ། ཧ་རི་ནི་ས་ཧཱུྃ། ཨོཾ་ཨ་ཀ་ནི་ཙ་ལི་སོགས། གཙོ་བོའི་སྔགས་གསུམ་སྦྲེལ་བཟླ་བ་ནི་ཚེ་སྒྲུབ་དང་། ཡང་ཐུགས་རྗེ་ཆེན་པོའི་སྐུ་ལས་འོད་ཟེར་མཐིང་ཁ་འཕྲོས་ཏེ་བྷ་ག་ནས་ཐོན་མཐིང་གི་ཞལ་བཟང་མ་ལ་ཕོག་དེ་ལས་འོད་ཟེར་འཕྲོས་པས་དཔའ་བོ་ཌཱ་ཀི་དང་ལྷ་འདྲེ་མངོན་ཤེས་ཅན་རྣམས་ལ་ཕོག་ནས་དེ་དག་གི་མངོན་པར་ཤེས་པ་ཐམས་ཅད་འོད་མཐིང་གསལ་གྱི་རྣམ་པར་བསྡུས་ནས་རང་ལ་ཐིམ་པས་སྣང་གསལ་པྲའི་དངོས་གྲུབ་ཐོབ་པར་བསྒོམ། གོང་གི་ཡབ་ཡུམ་སྔགས་དེ་ལ་ཨོ་ན་ཏྲི་མ་ཏྲིའི་སྔགས་བཏགས་ལ་བཟླ། ཡང་ཐུགས་རྗེ་ཆེན་པོའི་འོད་ཟེར་ཡུམ་གྱི་བྷ་ག་ནས་ཐོན་མི་
གཡོ་བློ་བཟང་མ་ལ་ཕོག་པས། དེ་ལས་འོད་འཕྲོས་འཇིག་རྟེན་ཁམས་ཀྱི་རྨ་གཡང་ཟས་ཀྱི་དངོས་གྲུབ་ཐམས་ཅད་འོད་ཟེར་སེར་པོའི་རྣམ་པར་བསྡུས་ནས་རང་ལ་བསྟིམ་ཞིང་། ཡབ་ཡུམ་སྔགས་ལ་ཌཱ་ཀི་ནཱི་ས་པ་རི་སོགས། སྔགས་བཟླ། ཡང་ཐུགས་རྗེ་ཆེན་པོའི་འོད་ཟེར་དམར་པོ་ཡུམ་གྱི་བྷ་ག་ནས་ཐོན་ཅོད་པན་མགྲིན་བཟང་མ་ལ་ཕོག་པས། །དེ་ལས་ཀྱང་འོད་ཟེར་དམར་པོ་འཕྲོས་པས་འཇིག་རྟེན་ཁམས་ཀྱི་བང་མཛོད་འབྲུའི་དངོས་གྲུབ་ཐམས་ཅད་འོད་དམར་པོར་བསྡུས་ནས་རང་ལ་ཐིམ་པར་བསྒོམ་ཞིང་། ཡབ་ཡུམ་སྔགས་ལ། ཨོཾ་ཌཱ་ཀི་ནཱི་ཀན་པ་ནི་སོགས། བཏགས་ལ་བཟླ། ཡང་ཐུགས་རྗེ་ཆེན་པོའི་འོད་ཟེར་ལྗང་ཁུ་བྷ་ག་ནས་ཐོན་ཏེ། གཏད་དཀར་འགྲོ་བཟང་ལ་ཐིམ་དེ་ལས་འོད་ཟེར་ལྗང་ཁུ་འཕྲོས་ཏེ། རྐང་བཞི་རྟ་ནོར་འཕེལ་བའི་དངོས་གྲུབ་ཐམས་ཅད་འོད་ཟེར་ལྗང་ཁུར་བསྡུས་ཏེ་རང་ལ་བསྟིམ་ཞིང་ཡབ་ཡུམ་སྔགས་ལ་ཨོ་ཨ་ནི་ནི་སོགས། བཏགས་ལ་བཟླ་བ་ནི་ཕྱི་སྒྲུབ་རྒྱུན་ཁྱེར་ཡིན་ལ། རང་གསང་བ་ཡེ་ཤེས་སྔར་ལྟར་བསྒོམ་པའི་མཐའ་སྐོར་དུ་ཚེ་རིང་མཆེད་ལྔ་ནང་སྒྲུབ་ལྟར་རྐང་ཐང་བཞེངས་ཐབས་སུ་ཐལ་མོ་སྦྱར་ནས་གཡོན་བསྐོར་དུ་སྐོར་བ་བྱེད་པ་ལ་རང་གི་
ཐུགས་ཀའི་ཐུགས་རྗེ་ཆེན་པོ་ལས་འོད་ཟེར་དམར་པོ་འཕྲོས་གསང་བ་ཡེ་ཤེས་ཀྱི་བྷ་ག་ནས་ཐོན། ཌཱ་ཀི་ལྔའི་ལྟེ་བར་ཕོག །ཌཱ་ཀི་ལྔ་ལས་འོད་ཟེར་འཕྲོས་པས། འཇིག་རྟེན་ཁམས་ཀྱི་ཚེ་བསོད་ནམས་ལོངས་སྤྱོད་ཅི་འདོད་པའི་དངོས་གྲུབ་ཐམས་ཅད་འོད་ཟེར་གྱི་རྣམ་པར་བསྡུས་ཏེ་བདག་ལ་ཐིམ་པས། མཁོ་དགུའི་ལོངས་སྤྱོད་སྣ་ཚོགས་ཆར་ལྟར་འབེབས་པར་བསྒོམས་ལ། ཐུགས་རྗེ་ཆེན་པོ་ཡབ་ཡུམ་གྱི་སྔགས་ལ། ཨོཾ་ཨ་ཎི་ཛ་དྷ་ར་སརྦ་བིག་ནཱན་སོགས། ནང་སྒྲུབ་ཀྱི་སྔགས་ཅི་ནུས་བཟླ་བ་ནང་སྒྲུབ་རྒྱུན་ཁྱེར་དང་། ཡང་རང་ཉིད་གསང་བ་ཡེ་ཤེས་ཌཱ་ཀིའི་མཐའ་སྐོར་དུ། ཚེ་རིང་མཆེད་ལྔ། དམར་མོ་གཅེར་བུ་སྐུ་གྲོལ་བ། རུས་པའི་རྒྱན་ཅན་ཌ་མ་རུ་ཐོད་པ་བདུད་རྩིས་བཀང་བ་འཛིན་ཅིང་། གར་སྟབས་དང་བཅས་ཏེ་རང་ལ་གཡོན་སྐོར་བྱེད་པ་ལ། རང་གི་ཐུགས་ཀའི་ཐུགས་རྗེ་ཆེན་པོའི་འོད་ཟེར་གསང་བ་ཡེ་ཤེས་ཀྱི་བྷ་ག་ནས་ཐོན། ཌཱ་ཀི་ལྔའི་གསང་གནས་སུ་ཕོག །ཌཱ་ཀི་ལྔ་ལས་འོད་ཟེར་ལྕགས་ཀྱུའི་དབྱིབས་གློག་གི་ཞགས་པ་ལྟར་ཕྱོགས་བཅུར་འཕྲོས་པས་ལྷ་འདྲེ་མི་གསུམ་ཟས་ནོར་ལོངས་སྤྱོད་ཐམས་ཅད་རང་དབང་མེད་པར་དབང་དུ་བསྡུས་ཏེ་བཅུད་དང་དངོས་གྲུབ་ཐམས་
ཅད་འོད་ཟེར་གྱི་རྣམ་པར་རང་ལ་ཐིམ་པར་བསྒོམས་ལ། ཐུགས་རྗེ་ཆེན་པོའི་ཡབ་ཡུམ་སྔགས་ལ། ཨོཾ་ཨཉྫི་དྷ་རི་ཌཱ་ཀི་ནི་དྷ་ར་སོགས། གསང་སྒྲུབ་ཀྱི་སྔགས་བཟླ་བ་གསང་སྒྲུབ་རྒྱུན་ཁྱེར་རོ། །འདི་ལྟར་རྒྱུན་ཁྱེར་ཚེ་ཆོ་ག་རྒྱས་འབྲིང་བསྡུས་པ་སོགས་མ་ལྕོགས་ན་ཡང་། དང་པོ་སྤྱན་འདྲེན་ཤོ་ལོ་ཀ་གཅིག་སྟེ། སྔགས་མཆོད་གཏོར་མ་སྔགས་བསྔོས་། བསྟོད་པ་ཤོ་ལོ་ཀ་གཅིག་ཙམ་གྱིས་ཆོག་གོ །ཕྱི་ནང་གསུམ་ཀའི་རྒྱུན་བསྙེན་འདོད་ན་ཡང་སྔགས་བདུན་རེ་ཙམ་བྱས་ལ། ཕྱི་ནང་གསུམ་ཀ་ལ་སྔགས་ཕྲེང་སྐོར་ཙམ་བྱས་པས་འཐུས་སོ། །ཆོ་ག་བསྡུས་པ་རྗེ་ཐམས་ཅད་མཁྱེན་པ་དྲུག་པས་བྱས་པ་ལྟར། རྡོར་གདན་མ་དང་། ཧཱུྃ། ལྷ་སྨན་བཀྲ་ཤིས་ཚེ་རིང་མ། ཞེས་པ་གཉིས་པོས་ཆོག །དེ་ལས་བསྡུ་ན་འོག་མ། ཧཱུྃ། ལྷ་སྨན་ཞེས་སོགས་དེས་ཀྱང་ཆོག་ལགས། ཡང་ཤིན་ཏུ་བསྡུ་ན། ཨཉྫི་དྷ་རི་རིགས་ཀྱི་ཊཱ་ཀི་ནཱི། ཞེས་སོགས་སྤྱན་འདྲེན་ཤོ་ལོ་ཀ་གཅིག་སྔགས་དང་བཅས་པ་དང་། ཨནྡྷཾ་སོགས་དང་། སྣོད་ཀྱི་འཇིག་རྟེན་བས་ཀྱང་སོགས་གཏོར་བསྔོས་ཤོ་ལོ་ཀ་སྔགས་དང་བཅས་པ་དང་། ཧཱུྃ། ཆོས་དབྱིང་སྐྱེ་བ་སོགས་བསྟོད་པ་ཤོ་ལོ་ཀ་གཅིག་གིས་
ཆོག དེ་ཙམ་ཞིག་རྒྱུན་ཁྱེར་དུ་བྱ་བ་ཡང་གལ་ཆེའོ། །འདི་ནི་ཟབ་ཅིང་སྟབས་བདེ་སྒྲུབ་རྫས་སོགས་ཀྱང་མི་དགོས་པས། རྒྱལ་བ་རྒྱ་མཚོ་རྩེ་གཅིག་ཉམས་སུ་ལེན་མཁན་མིན་པ་ལ་བསྟན་པར་མི་བྱའོ། །ཨེ་མ་རྒྱལ་བ་དྲུག་པས་མཛད་པའི་ཆོ་ག་འདི། །ཁུངས་བཙུན་དབྱངས་སོགས་ཆོ་ག་ངོ་མཚར་ཡང་། །སྒྲུབ་ཐབས་མི་གསལ་གཞན་ལ་ཕན་དཀའ་བས། །རྒྱལ་བ་དེ་ཡི་དགོངས་པ་རྫོགས་ཕྱིར་དང་། །ཕྱག་ཆེན་ཆོས་དྲུག་བཀའ་སྲུང་ལ་དམིགས་ནས། །དབང་ཆོག་ལོ་རྒྱུས་སྒྲུབ་ཐབས་བྲིས་པའི་ཚེ། །སྔགས་རྣམས་གབ་འཁྲུགས་ཆེ་བས་ཡིད་མ་ཆེས། །ད་ནི་མི་འབྲི་སྐྱུར་རམ་སྙམ་པའི་ཚེ། །ཉམས་དང་རྨི་ལམ་འདྲེས་པའི་མཚམས་ཤེད་ན། །རང་མདུན་བུད་མེད་དཀར་མཛེས་ཡིད་འོང་བ། །བཙུན་མའི་ཆ་ལུགས་འཛུམ་ཞིང་ཟུར་མིག་བལྟ། །ཕྱི་ནང་སྔགས་ཀྱི་གནད་འཁྲུགས་གནད་ཀུན་གོ །དེ་ཡོང་ཅུང་ཟད་བྱིན་གྱིས་བརླབས་པར་སེམས། །བདུན་གཉིས་ཙམ་ལ་དེ་སྐོར་རྒྱུན་བསྙེན་བྱས། །ཆུ་ཤིང་སྤང་ལྗོངས་ཡིད་འོང་ཚལ་ཆེན་ནས། །བུད་མེད་མཛེས་སྡུག་རས་གོས་སྔོན་པོ་ཅན། །ལྔ་ནི་གྲལ་སྒྲིགས་རང་གི་ཕྱོགས་སུ་བྱུང་། །རྟེན་འབྲེལ་ལོ་རྒྱུས་དགའ་བ་སྐྱེས་པ་
རྨིས། །དེ་སོགས་རྟགས་དང་མཚན་མ་ཅུང་ཟད་བྱུང་། །དེ་ཕྱིར་འདི་སྒྲུབ་མི་ལ་བྱིན་རླབས་འཇུག །ཅེས་ཨ་རཱ་གས་སོ།། །། ༧ །ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།