མ་གཟའ་དམ་གསུམ་གྱི་ཆོ་འཕྲུལ་གྱི་བསྐུལ་བསྡུས་པ།
མ་གཟའ་དམ་གསུམ་གྱི་ཆོ་འཕྲུལ་གྱི་བསྐུལ་བསྡུས་པ་བཞུགས་སོ།། ཧཱུྃ༔ མ་མོ་ནག་མོ་མཐུ་རྩལ་ཅན༔ མུ་སྟེགས་ལྷ་མོ་རྫུ་འཕྲུལ་བདག༔ ནོར་སྲང་གཅིག་གི་རྗེས་གཅོད་མ༔ ནས་བྲེ་གང་གི་ཕྱིར་འབྲང་མ༔ དུར་ཁྲོད་བདག་མོ་ངེ་ནེ་མ༔ འདིར་གཤེགས་བརྒྱན་པའི་གཏོར་མ་བཞེས༔ ང་ཡི་ནོར་སྟོར་ལ་འུར་རྒྱུག༔ དཀོར་བདག་ཆེན་མོ་ཁྱོད་སོང་ལ༔ དགྲ་ཇག་རྐུན་པོའི་མིང་ནས་བོས༔ ལྟས་ངན་ཆོ་འཕྲུལ་སྣ་ཚོགས་ཕོབ༔ ང་ཡི་ཀ་ཆ་ཁྱེར་ལ་ཤོག༔ མ་ཧཱ་པདྨ་ཧུར་ཐུམ་བྷྱོ༔ ཧཱུྃ༔ སངས་རྒྱས་བསྟན་པ་སྲུང་བྱེད་པའི༔ ལེགས་ཉེས་ཀུན་གྱི་ཤན་འབྱེད་པ༔ བླ་མེད་བཀའ་ཡི་བྱ་ར་བ་དྲང་སྲོང་འཁོར་བཅས་གཤེགས་སུ་གསོལ༔ འབར་བའི་གདན་ལ་བཞུགས་ནས་ཀྱང་༔ མཐུན་པའི་དམ་རྫས་མཆོད་གཏོར་བཞེས༔ ཧཱུྃ༔ གཟའ་བདུད་ཆེན་པོ་རཱ་ཧུ་ལ༔ སྐུ་མདོག་དུད་ཁ་འཇིགས་པའི་གཟུགས༔ དབུ་དགུ་སྡང་མིག་མཆེ་བ་གཙིགས༔ ཕྱག་བཞི་དང་པོ་གཉིས་ཀྱིས་ནི༔ ཆུ་སྲིན་སྦྲུལ་གྱི་ཞགས་པ་བསྣམས༔ འོག་མ་གཉིས་ནི་མདའ་གཞུ་བསྣམས༔ མགོ་ལུས་མེད་པར་མིག་གིས་གང་༔ ལྟེ་བ་མན་ཆད་སྦྲུལ་དུ་འཁྱིལ༔ ཀླུ་
སྲིན་འཚོགས་པའི་མཐུ་རྩལ་ཅན༔ སྤྲུལ་པ་གཟའ་བརྒྱད་ཕྱོགས་བཅུར་འགྱེད༔ ལྷ་སྲིན་སྡེ་བརྒྱད་འཁོར་གྱིས་བསྐོར༔ སྡང་བའི་དགྲ་ལ་ཆོ་འཕྲུལ་ཕོབ༔ གཟའ་བདུད་ཆེན་པོ་འཁོར་དང་བཅས༔ བྷ་ལིང་མཆོད་པ་འདི་བཞེས་ལ༔ གནོད་བྱེད་དགྲ་བོ་ཆོམ་རྐུན་ལ༔ ལྟས་ངན་ཕུང་ཐལ་སྣ་ཚོགས་ཕོབ༔ གཟའ་ནད་ཐོག་སེར་ད་ཕོབ་ཅིག༔ ལུས་སེམས་སྨྱོ་རུ་ད་ཆུག་ཅིག༔ ཕ་ཚན་ནང་དབྱེ་ད་ཐོངས་ཤིག༔ གཟའ་རྒོད་གདུག་པའི་ཆོ་འཕྲུལ་གྱིས༔ འགྱོད་ཚངས་བསྐྱེད་པའི་ལས་མཛོད་ཅིག༔ བྷྱོ༔ ཁྲག་འཐུང་མ་མོ་རྫུ་འཕྲུལ་ཅན༔ སྲིད་གསུམ་མ་མོའི་འཁོར་གྱིས་བསྐོར༔ དྲེའུ་ཆིབས་ཤིང་བསྟན་པ་སྲུངས༔ འདིར་གཤེགས་བརྒྱན་པའི་གཏོར་མ་བཞེས༔ བདུད་མོ་ཆེན་མོ་རེ་མ་ཏི༔ དྲག་ཤུལ་སྤྱོད་པའི་ལས་མཁན་མ༔ སྐུ་མདོག་ནག་མོ་འཇིགས་པའི་གཟུགས༔ ཕྱག་ན་ཆོ་འཕྲུལ་སྣ་ཚོགས་འགྱེད༔ སྤྱན་གསུམ་གཡུ་ཡི་སྨིན་མ་ཅན༔ གཅེར་བུ་ཟངས་ཀྱི་མཆེ་བ་གཙིགས༔ རལ་པ་ཁམས་ནག་གྱེན་ཐུལ་གྲོལ༔ མི་ལྤགས་གཡང་གཞི་ཐོད་ཕྲེང་གསོལ༔ ཆིབས་སུ་དྲེལ་རྟ་རྐང་གསུམ་ཆིབས༔ སྲིད་པའི་རླུང་བཞིན་ཀུན་ཏུ་རྒྱུ༔ ཤ་ཟ་མ་
མོ་བྱེ་བས་བསྐོར༔ གནོད་བྱེད་དགྲ་ཇག་ཆོམ་རྐུན་ལ༔ ལྟས་ངན་ཆོ་འཕྲུལ་སྔངས་སྐྲག་ཕོབ༔ ཁྱེད་ཀྱི་ཐུགས་དམ་དུས་ལ་བབ༔ བ་ལིང་མཆོད་གཏོར་འདི་བཞེས་ལ༔ འགྱོད་ཚངས་བསྐྱེད་པའི་ལས་མཛོད་ཅིག༔ བདག་གིས་བཅོལ་བའི་ཕྲིན་ལས་མཛོད༔ དེ་ནས་གལ་ཆེ་ན་དམ་ཅན་བསྐུལ་ཏེ༔ བྷྱོ༔ མོན་པ་ནག་པོའི་དུས་ལ་བབ༔ སྒོ་གཅོག་ནག་པོའི་དུས་ལ་བབ༔ ཚངས་པ་ནག་པོའི་དུས་ལ་བབ༔ སྐུ་འཐེན་ནག་པོའི་དུས་ལ་བབ༔ ཟུ་རྭ་ར་སྐྱེས་དུས་ལ་བབ༔ དགྲ་ཇག་རྐུན་མའི་ཁྱིམ་དུ་རྒྱུགས༔ དགྲ་བོའི་ཁྱིམ་ཕུག་བསྟིབ་ལ་ཤོག༔ སྒོ་ཆོག་སྐ་འཐེན་རང་ཐག་བསྐོར༔ གཤིན་པོ་ཐམས་ཅད་དུར་ནས་བསློང་༔ མགོ་ནོན་སྔས་བསྒྱུར་སྤྲེའུ་ཐོངས༔ གོང་མོ་སྲག་པ་ལ་སོགས་པའི༔ བྱ་ནག་སྡེར་འཛིངས་སྣ་ཚོགས་ཐོངས༔ ཤཱ་བ་དགོ་བ་རྣ་བ་དང་༔ གླ་བ་དྲེད་མོང་རྒོད་ལ་སོགས༔ ཡིད་དུ་མི་འོང་སྣ་ཚོགས་ཐོངས༔ གཟའ་འཐབ་རྩོད་འཛིང་བྱེ་དབྱེ་ཐོངས༔ དམ་ཉམས་དགྲ་ཇག་རྐུན་པོ་ཡིས༔ གལ་ཏེ་རང་ནོར་མ་གཏད་ན༔ སྙིང་ཕྱུང་སྨོར་ཆུག་སྲོག་རྩ་ཆོད༔ དུས་ལ་བབ་བོ་མ་གཡེལ་ཅིག༔ བརྒྱན་པའི་གཏོར་མ་
འདི་བཞེས་ལ༔ འགྱོད་ཚངས་བསྐྱེད་པའི་ལས་མཛོད་ཅིག༔ བཅོལ་བའི་ཕྲིན་ལས་འགྲུབ་པར་མཛོད༔ ཅེས་ར་ཐོད་མའི་བསྐུལ་པའོ༔ ཧཱུྃ༔ རྣོ་དུག་བྱ་རོག་གདོང་པ་ཅན༔ ཐན་དང་ལྟས་ངན་བདག་པོ་སྟེ༔ དགྲ་བོའི་ནོར་རྐུན་རྗེས་ལ་རྒྱུགས༔ ཐན་རྐྱལ་ནག་པོ་ཁ་ཕྱེས་ལ༔ དགྲ་བོའི་སྟེང་དུ་ལྟས་ངན་ཕོབ༔ བདུད་མོ་ནག་མོ་རེ་མ་ཏི༔ ཐན་དང་ལྟས་ངན་བདག་མོ་སྟེ༔ དགྲ་བོའི་ནོར་རྐུན་རྗེས་ལ་རྒྱུག༔ ཐན་རྐྱལ་ནག་པོ་ཁ་ཕྱེས་ལ༔ དགྲ་བོའི་སྟེང་དུ་ལྟས་ངན་ཕོབ༔ དམ་ཅན་རྡོ་རྗེ་ལེགས་པ་ཁྱོད༔ གཟའ་མཆོག་ཆེན་པོ་རཱ་ཧུ་ལ༔ གསེར་གྱི་གླང་རྒོད་ཞོན་པ་ཡི༔ དགེ་སློང་གསེག་ཤང་ཐོགས་པ་བརྒྱ༔ ཁྲོ་ཞིང་ནག་ལ་འཇིགས་པ་ཡི༔ བནྡེ་ནག་པོ་མདུང་ཙམ་གྱིས༔ དམ་ཉམས་དེ་ཡི་ཁྱིམ་ལོངས་ཤིག༔ ཧོ་ཤུ་སྔགས་འཆང་ཧོ་བསྐོར་གྱིས༔ གཡུ་ཡི་སྤང་མོ་ཞོན་པ་ཡི༔ ཨ་ཙ་ར་ནི་ཉི་ཤུ་བཞིས༔ དམ་ཉམས་དེ་ཡི་ཁྱིམ་ཁེངས་ཤིག༔ ར་ཞོན་ཐོ་བ་ཐོགས་པ་ཡི༔ མགར་བ་ནག་པོ་བརྒྱ་རྩ་བརྒྱད༔ རྒྱལ་པོ་བེ་གར་དགྲ་ལ་ཆོས༔ དུས་མཚན་ལྷ་མོ་བྱ་མགོ་ཅན༔ དུར་ཁྲོད་འདྲེ་མོ་ངེ་ནེ་མ༔ ཐན་ཁྱི་ནག་པོ་ཁྱེད་རྣམས་ཀྱིས༔ ཤ་
ཁྲག་གཏོར་མ་འདི་བཞེས་ལ༔ བཅོལ་བའི་ཕྲིན་ལས་འགྲུབ་པར་མཛོད༔ དེ་ནས་རྔ་འུར་རྡུང་བྱེད་ཅིང་། ཧོཿ དགོངས་སུ་གསོལ་ལོ༔ འཇིག་རྟེན་ལས་ཀྱི་མགོན་པོ་བྱ་རོག་གདོང་ཅན༔ ལྷ་མོ་ནག་མོ་འཇིག་རྟེན་ལས་ཀྱི་རེ་མ་ཏི་གཟའ་བདུད་རྒྱལ་པོ་རཱ་ཧུ་ལ་གཟའ་བརྒྱད་གདོང་མོ་བཞི༔ ཤར་ཕྱོགས་དཀར་པོ་ནོར་བསྙག༔ བདུད་པོ་ཟུ་ར་ར་སྐྱེས༔ མོན་པ་ནག་པོ་སྐྲ་འཐེན༔ བཙན་དམར་ཤན་པ་ཀུས་འདེབས༔ ཐེའུ་རང་སྟོང་སྡེའི་དམག་དཔོན༔ དུར་ཁྲོད་ཀྱི་འདྲེ་མོ་ངེ་ནེ་མ༔ བདུད་བཙན་རྒྱལ་པོ་སྡེ་བརྒྱད་མ་རུངས་པ་ཁྱེད་རྣམས་ལ༔ དམ་ཉམས་དགྲ་རྐུན་འདིས་ཕོད་བཙུགས༔ དོ་བསྡོས་འགྲས་བཙལ་བ་ཡིན་པས༔ གནོད་བྱེད་དགྲ་རྐུན་གྱི་མིང་ནས་འབོད་ལ་ཐོངས་ཤིག༔ རྗེས་སུ་རྒྱུགས་ཤིག༔ ཁ་སྣ་ནས་ཁྲག་སྐྱུག་ཏུ་ཆུག་ཅིག༔ སྒོ་ཁྱི་ངུ་ཟུག་རང་ལ་རྨུག་ཏུ་ཆུག་ཅིག༔ ཁྱེར་བའི་དུད་འགྲོ་དང་ཀ་ཆ་ལ་མེ་ཆེན་འབར་དུ་ཆུག་ཅིག༔ ར་མདའ་ལ་འོང་བ་ཡིན་ནོ་ཞེས་མི་བཟོད་པའི་འོ་དོད་འབོད་པར་གྱིས་ཤིག༔ སྐྱག་ཅིང་དངངས་ཏེ་ལག་གཉིས་བྲང་རྡུང་དུ་ཆུག་ཅིག༔ ཐན་དང་ལྟས་ངན་གྱི་རྒྱལ་པོ་ས་གཞི་བར་སྣང་
གང་བ་དུས་གཅིག་ཏུ་དགྲ་བོའི་ཁང་ཁྱིམ་ཁེངས་ཤིག༔ མི་ནག་ཆར་ལྟར་འབེབས་པའི་ལྟས་ངན་ཐོངས་ཤིག༔ བདུད་ཁྱི་ནག་པོ་སྤྲིན་ལྟར་གཏིབས་པས་ལྟས་ངན་ཐོངས་ཤིག༔ ཁྱིམ་དུ་བྱ་ཐན་སྣ་ཚོགས་བྱ་ནག་སྡེར་འཛིང་བྱེད་པའི་ལྟས་ངན་ཐོངས་ཤིག༔ སྤྲེལ་གྱིས་ཡོས་བཏག་པའི་ལྟས་ངན་ཐོངས་ཤིག༔ གཟའ་བདུད་མངོན་དུ་རྒྱུག་པའི་ལྟས་ངན་ཐོངས་ཤིག༔ ཕ་བུ་སྤུན་ཟླ་གསོན་བྱེ་འོང་བའི་ལྟས་ངན་ཐོངས་ཤིག༔ གདོང་ཐུག་འུར་ཆོམ་སྨྱོ་འབོག་ཐོངས་ཤིག༔ ང་ཡི་ཀ་ཆ་དང་དུད་འགྲོ་བོར་བ་ཁྱེར་ལ་ཤོག༔ གལ་ཏེ་མ་གཏད་ན་དགྲ་བོ་མི་ནོར་ཐམས་ཅད་ཐར་བ་རླུང་གིས་ཁྱེར་བ་ལྟར་ཐོངས་ཤིག༔ མ་གཟའ་དམ་གསུམ་སྡེ་བརྒྱད་དྲེགས་པ་ཅན་ཁྱེད་རྣམས་ལ་མཐུ་དང་ནུས་པ་ཅི་འདུག་ལྟའོ༔ བཀའ་དང་དམ་ལ་མ་འདའ་ས་མ་ཡ༔ ཞེས་གཞུང་གི་ཟད་སྔགས་བཟླ་ཞིང་གཏོར་མ་དགྲ་ཕྱོགས་སམ༔ ཕྱོགས་གཙང་གཟའ་དང་མཁའ་འགྲོ་རྒྱུ་ལྡོག་བསྟུན་ལ་འཕེན་པར་བྱ༔ ཡང་རྒྱུ་ལྡོག་མ་འགྲིགས་ན་ཕུལ་བཅུག་པར་བྱ༔ ཞེས་པ་འདི་རཱ་ག་ཨ་སྱས་སྦྱར་བའོ༔ བྷ་ཝནྟུ༔