བསྟན་སྲུང་རཱ་ཧུ་ལའི་སྒྲུབ་པ་མུ་སྟེགས་ཀྱི་ལོག་མཐུ་གློ་བུར་གྱི་ཐན་འགྱེད་དགྲ་ལ་ཆོ་འཕྲུལ་ལྟས་ངན་གཏོང་ཐབས་རྣོ་མྱུར་ཐོག་རྒོད་འདྲ་བ་བཻ་རོ་ཙ་ནའི་སྙིང་དང་འདྲ་བའི་མན་ངག
བསྟན་སྲུང་རཱ་ཧུ་ལའི་སྒྲུབ་པ་མུ་སྟེགས་ཀྱི་ལོག་མཐུ་གློ་བུར་གྱི་ཐན་འགྱེད་དགྲ་ལ་ཆོ་འཕྲུལ་ལྟས་ངན་གཏོང་ཐབས་རྣོ་མྱུར་ཐོག་རྒོད་འདྲ་བ་བཻ་རོ་ཙ་ནའི་སྙིང་དང་འདྲ་བའི་མན་ངག་གོ །འདིའི་ལག་ལེན་བཅའ་ཐབས་འདོན་འགྲིགས་གསལ་ཆ་འདི་རཱ་ག་ཨ་སྱས་སྦྱར་བ་འདི་གཞན་ལ་ཡོན་གསེར་སྲང་རེ་མ་གཏོགས་སྤེལ་ན་དམ་ཚིག་ས་མ་ཡ་ཨྠྀི༔
བཛྲ་པཱ་ཎི་ལ་ན་མོ། རྗེ་བེ་རོ་ཙ་ནའི་ལུགས་ཀྱི་ལོག་མཐུ། གློ་བུར་གྱི་ཐན་འགྱེད་རཱ་ཧུ་ལའི་གཅིག་སྒྲུབ་སློབ་དཔོན་བཻ་རོ་ཙ་ནའི་ཐུགས་དང་འདྲ་བའི་མན་ངག་འདིའི་ལག་ལེན་དང་བཅའ་ཐབས་ལ། གནས་དབེན་པར་བཀྲ་མི་ཤིས་པའི་ས་སྣ་རྣམས་དང་། རི་སྣ་ཐུར་རྒྱུག་གཉེན་ངེས་པ་གསུམ་གྱི་ས། གནམ་ས་གྲུ་གསུམ་དོད་པའི་ས་ནས་བླངས་ལ་གཞན་ས་སྤྲིན་ལེགས་པ་དང་བསྲེས་ལ་མཎྜལ་གྲུ་བཞི་མཐོ་བཞི་པ་གཅིག་བྱས་ལ། ལྷ་ཁང་མཆོད་རྟེན་སཱཙྪ་ཞིག་པའི་ས་ལ་ར་ཁྲག་དང་བསྲེས་ལ་འདམ་པ་སྦྱིན་པོ་བྱས་ལ་གྲུ་གསུམ་མཐོ་དམའ་རྐྱང་ཁྲུ་གང་ཞེང་དུ་བསྐུམ་ཁྲུ་གང་། ནང་ཟབ་ཁྲུ་ཕྱེད། ནང་བང་རིམ་གསུམ་པ་བྱ། ཕྱི་དུར་སོལ་གྱིས་བྱུགས་ལ་ནག་པོ་བྱ། ནང་གྲི་ཁྲག་དང་ར་ཁྲག་གིས་བྱུགས་ལ་དམར་པོ་བྱ། གྲུ་གསུམ་
ནང་དུ་རི་རབ་བང་རིམ་གསུམ་པ་གཅིག་བྱས་ལ་བཞག །དེའི་སྟེང་དུ་ལིངྒ། དེའི་སྟེང་དུ་གོང་གི་ས་སྤྱིན་ལ་བཟོས་པའི་རཱ་ཧུ་ལའི་གཟུགས་ཁྲུ་གང་ཞིག་བཅའ་ལ། ཞལ་གཅིག་ཕྱག་གཉིས་བྱ་རོག་དབུ་ཡོད་པ། ཕྱག་གཡས་པས་ཆུ་སྲིན་གྱི་ཞགས་པ། གཡོན་རྭའི་མདའ་གཞུ་བསྣམས་པ། ལུས་ལ་མིག་གིས་གང་བ། སྐུ་སྨད་སྦྲུལ་དུ་འཁྱིལ་བ་དེ་འདྲ་བ་གཅིག་བཟོས། སྟག་པའམ་ཤུག་པའམ་ཐང་བུ་གཅིག་སྐྱེས་ཀྱི་གསོམ་པ་འདི་གསུམ་མདོས་བྱང་བཞིན་རྩ་རྩེ་མ་ནོར་བར་གཞོག་ལ། ངོས་གཅིག་ལ་ཤིང་རྩེ་ཡར་བསྟན་ལ་གྲི་ཁྲག་དང་ར་ཁྲག་གིས་ལིངྒ་བྲི། ངོས་གཅིག་ལ་རང་གི་སྤྱད་ཆའམ་སེམས་ཅན་རིགས་གང་ཤོར་གྱི་གཟུགས་མགོ་ཐུར་དུ་བསྟན་པ་བྲི། གཉིས་ཀའི་མཐར་སྔགས་འབོད་རྦད་བསད་གསུམ་ཀ་གཡོན་བསྐོར་ལ། ཡི་གེ་མགོ་
ཕྱིར་བསྟན་ལ་བྲི། མཐའ་མར་དམོད་པ་རྣམས་ཀྱིས་བསྐོར། ལྡེར་སོའི་གཡས་སུ་སྟག་པ། གཡོན་དུ་ཤུག་པ། རྒྱབ་ཏུ་ཐང་ཤིང་གཅིག་སྐྱེས་བཙུགས། སྔགས་རྣམས་མཐར་ནོར་སྲུང་ར་མདའ་ལ་བྱོན་ཛ་ཛ༔ འབོད་པ་གཡས་སུ་བསྐོར། རྗོད་པ་གཡོན་དུ་བསྐོར། དེའི་མཐའ་མར་འདོད་དོན་བྲིས་ལ། གྲུ་གསུམ་ནང་གི་བང་རིམ་ལ་ཐན་གཟུགས་སྣ་ཚོགས་ཀྱིས་བསྐོར། ཤིང་བྱང་གི་དམིགས་པའི་རྟེན་ལ་གཟབ་ཡིག་ཏྲིགཅིག་བྲི། འདི་རླུང་སྒྲུབ་ཡིན་པས་རཱ་ཧུ་ལ་མ་བཟོས་ཀྱང་ཉན་གསུངས་སོ། །གྲུ་གསུམ་གྱི་མཐའ་མ་ལ་རྩང་ཉེར་གཅིག་སྲིན་མོ་འགྲོས་སུ་བཙུགས། རྩང་གི་རྩེར་ཤ་དུམ་དང་ལིས་བརྒྱན། རྩང་སྟོད་གྲི་ཁྲག་དང་ར་ཁྲག་གིས་བྱུགས། སྨད་དུ་རོ་སོལ་གྱིས་བྱུགས། གྲུ་གསུམ་སྟེང་དུ་རྐང་གསུམ་བཙུགས་ལ་རིན་པོ་ཆེའི་སྣོད་དུ་རྟེན་གཏོར་ཟུར་གསུམ་མམ་མཁར་ཐབས་གཅིག་བྱས་ལ། ར་ཤ་དང་དབང་པོ་རྣམ་ལྔས་བརྒྱན། མར་ཐུད་ཤ་ཆང་ལ་སོགས་ཀྱིས་བརྒྱན་བྱས་ནས་རྟེན་སྐུ་གཟུགས་བཙུགས། འཇུག་པ་ནི་སངས་རྒྱས་ཀྱི་བསྟན་པ་བསྲུང་བའི་ཆེད་དུ་བསྟན་དགྲ་བསྒྲལ་ཞིང་ལྟས་ངན་གཏོང་ཨང་བསམས་ལ་སེམས་བསྐྱེད། མཁྱེན་དཔང་གསོལ། ཁོ་ཉེས་པའི་སྒོས་བསྒྲག་བྱ། དེ་ནས་རང་ཕྱག་ན་རྡོ་རྗེར་བསྒོམ། རྫུས་སྐྱེས་སུ་བསྐྱེད་གསུངས། ཕྱག་རྡོར་བསྙེན་པ་ཅི་འགྲུབ་ཏུ་བྱེད་མཆོད་བསྟོད་བྱས་ན་བཟང་། དེ་ནས་རཱ་ཧུ་ལའི་འགུགས་འདྲེན་ནི། ལྡེར་སོའམ་ཤིང་བྱང་རྩེའི་ཏྲིརཱཧུ་ལར་བསྐྱེད་ལ། རང་གི་ཐུགས་ཀའི་ཧཱུྃ་ལས་འོད་འཕྲོས་ནས་ཤིང་བྱང་རྩེའི་
ཏྲིཿབསྐུལ་ནས། དེ་ལས་འོད་ཟེར་འཕྲོས་འཇིག་རྟེན་ཁམས་ཀྱི་དྲེགས་བྱེད་རཱ་ཧུ་ལས་གཙོར་བྱས་པའི་སྡེ་བརྒྱད་དྲེགས་པའི་རིགས་རྣམས་སྤྲིན་གཏིབས་པའམ་ན་བུན་རླུང་གིས་དེད་པ་ལྟར་མཎྜལ་གྲུ་གསུམ་ཟབ་པའི་ནང་དུ་བྱོན་ནས། བདག་ལ་སྲོག་སྙིང་ཕུལ་ནས་གུས་པའི་ཚུལ་དུ་ཅི་གསུངས་བཀའ་ཉན་པར་བསམས་ལ། ཐུགས་ཀ་ནས་འོད་ཟེར་དམར་ནག་འཕྲོས་པས་རཱ་ཧུ་ལ་འཁོར་སྡེ་བརྒྱད་དང་བཅས་པ་བསྐུལ་ནས། དགྲ་བོའི་མི་ནོར་འཁོར་དང་བཅས་པ་ལ་ཆོ་འཕྲུལ་ཐན་སྣ་ཚོགས་བཏང་བར་བསམས་ལ་སྔགས་འདི་བགྲང་། རཱ་ཧུ་ལ་ར་མ་ནི་ཏྲཿ འུར་འུར་ཏྲིག །ཨ་ཏྲོ་ཐར་ལིང་ཛ་ཛཿ ངའི་ཟས་ནོར་ཁྱེར་མི་ལ་འཇུས་འཇུས། ཤིང་ཀ་ར་ཀྲོག་ཀྲོག །མ་མོ་ཁོ་རང་ད་རྒྱུགས་ད་རྒྱུགས། ངའི་ཟས་ནོར་ཁྱེར་མིའི་ལུས་ལ་མེ་སྦྱོར་མེ་སྦྱོར། མུ་ཁ་ད་རས་ཡབ་ཡབ། ར་ར་ཨན་ཏྲིག་ཧྲཱིག །མྱུར་དུ་རྒྱུགས་རྒྱུགས། གིང་ཀ་ར་གིང་ཀ་རའི་ཟས་ནོར་ཁྱེར་མི་རྣམས་ལ་ཆོ་འཕྲུལ་ཐོངས་ཐོངས། འདི་སྒྲུབ་སྔགས་ཡིན་པས་དེ་ལྟར་ཞག་གསུམ་བདུན་གང་རུང་བཟླའོ། །རྟགས་འདི་དངོས་སུའམ་ཉམས་སམ་རྨི་ལམ་ལ་མི་མང་པོའི་ཤ་སྣ་དང་། མི་རོ་ཁུར་བ་དང་། སྐད་ངན་འདོན་པ། འཁུན་པ་དང་། འོད་འཁྱིལ་བ་དང་། རླུང་ཆེན་འཚུབ་པ་དང་། སྦྲུལ་འཁྱིལ་བ་དང་། འཆར་བ་དང་། འདེག་པ། ཁང་པ་འཚག་པ་དང་། རང་ཐག་འཁོར་བ་དང་། བྲང་
འུ་རུ་རུ་བརྡུང་བ་དང་། རྐན་སྒྲ་ཆེན་པོ་འདེབས་པ་དང་། སྤྱད་པ་གང་ཤོར་ལ་མེ་འབར་བ་དང་། སྔགས་པ་འདི་ཞེས་བྱ་བས་ཁྱོད་ཀྱི་རྩ་ན་སྤྱད་ཅིག་བླངས་པ་ལ་མངག་པ་ཡིན་ཟེར་བ་དང་། སེམས་ཅན་མི་སྐད་སྨྲ་བ་དང་། དེ་ལ་སོགས་ཤིང་བྱང་ལ་སྦྲུལ་དང་བྲ་བྱི་སོགས་ཆོ་འཕྲུལ་སྣ་ཚོགས་བྱུང་ཡང་སྐྲག་མི་དགོས། རྟགས་འགྱང་ནི་བར་བར་ཐན་སྐུལ་བྱེད། རི་གསུར་རྒྱུན་དུ་བྱས་ལ་སྔགས་འདི་བཟླ། རཱ་ཧུ་ལ་རྦ་ཛཁུག་ཛ་ཛཿ ཞེས་ཤམ་བུར་བཏགས་སོ། །འདིའང་བཏགས་སོ། །ཆོ་འཕྲུལ་འུར་འུར། ཆོ་འཕྲུལ་ཅི་བྱུང་ཡང་སེམས་ཀྱིས་ཐུབ་པར་གྱིས། སྐབས་སྐབས་སུ་ཐུན་གཏོར་བཏང་བ་ནི། གཏོར་མ་ཡིག་འབྲུ་གསུམ་དང་། ཨ་ཀཱ་རོས་བྱིན་གྱིས་ཟློབརླབས་ལ། ཨོཾ་བྷིཥྛ་ལ་རིག་འགྲིག །འཛམ་བུ་ལ་རག་ཧྲཱིང་། ཛཾ་བུ་ལ་ཨི་དཾ་བ་ལིཾ་ཏ་ཁ་རཾ་ཁཱ་ཧི། ཨོཾ་ཡོ་གི་ཤྭ་རི་ཨི་དཾ་བ་ལིཾ་ཏ་ཁ་རཾ་ཁཱ་ཧི། ཨོཾ་པི་ཏྲི་ས་ལ་ཨི་དཾ་བ་ལིཾ་ཏ་ཁ་རཾ་ཁཱ་ཧི། ཨོཾ་ཙི་ཏྲི་པ་ལ་ཨི་དཾ་བ་ལིཾ་ཏ་ཁ་རཾ་ཁཱ་ཧི། ཨོཾ་བཛྲ་རེ་མ་ཊི་ཨི་དཾ་བ་ལིཾ་ཏ་ཁ་རཾ་ཁཱ་ཧི། ཨོཾ་བཛྲ་རེ་མ་ཛམཨི་དཾ་བ་ལིཾ་ཏ་ཁ་རཾ་ཁཱ་ཧི། ཨོཾ་བཛྲ་རེ་མ་ཛུ་ཨི་དཾ་བ་ལིཾ་ཏ་ཁ་རཾ་ཁཱ་ཧི། དྲང་སྲོང་ཆེན་པོ་འཁོར་དང་བཅས་པའི་ཞལ་དུ་ཨི་དཾ་བ་ལིཾ་ཏ་ཁཱ་རཾ་ཁཱ་ཧི། ཧཱུྃ། གཟའ་མཆོག་ཆེན་པོ་རཱ་ཧུ་ལ། །སྐུ་མདོག་དུད་ཁ་འཇིགས་པ་ལ། །དབུ་དགུ་ཞལ་
གདངས་མཆེ་བ་གཙིགས། །བྱ་རོག་མགོ་ཡི་དབུ་བརྙན་ཅན། །རོ་སྟོད་མི་ལ་རོ་སྨད་སྦྲུལ། །མགོ་ལུས་མེད་པར་མིག་གིས་གང་། །གཡས་ན་ཆུ་སྲིན་ཞགས་པ་བསྣམས། །དམ་ཉམས་དགྲ་བོ་བཅིངས་ཤིང་བསྡམས། །གཡོན་ན་རྭ་ཡི་མདའ་གཞུ་བསྣམས། །དགྲ་བོའི་སྙིང་གི་དཀྱིལ་དུ་གཟིར། །སྤྲིན་དང་ན་བུན་དབུས་ན་བཞུགས། །གླིང་བཞི་ཡུད་ཙམ་ཞིག་གིས་བསྐོར། །མཐུ་སྟོབས་རྫུ་འཕྲུལ་བསམ་མི་ཁྱབ། །བཀའ་འཁོར་གཟའ་རྒོད་རྣམས་ཀྱིས་བསྐོར། །མིག་དམར་སྤེན་པ་ཕུར་བུ་ལག །པི་ཏྲི་པ་ཏྲ་ཉི་ཟླ་ལྗང་། །སྔོ་ལྗང་ལ་སོགས་བརྒྱད་ཀྱིས་བསྐོར། །རང་རང་སྤྲུལ་པའི་ཚོགས་དང་བཅས། །ཡང་འཁོར་ལྷ་སྲིན་སྡེ་བརྒྱད་རྣམས། །སྒྲུབ་པའི་གནས་འདིར་སྤྱན་འདྲེན་ན། །མ་ཐོགས་མྱུར་དུ་གནས་འདིར་བྱོན། །དམ་རྫ་ས་གཏོར་མ་འདི་བཞེས་ལ། །བཅོལ་བའི་ཕྲིན་ལས་འགྲུབ་པར་མཛོད། །དམ་ཉམས་དགྲ་བོ་འཁོར་བཅས་ལ། །ལྟས་ངན་སྣ་ཚོགས་མྱུར་དུ་ཐོངས། །གཞན་ཡང་དམོད་མོ་གང་ཤེས་བརྗོད། །དེ་ནི་བསྙེན་པའི་རིམ་པའོ། །དེ་ནས་དམ་ལ་བཞག་པ་ནི། །རང་ཉིད་ཡི་དམ་དུ་བསྒོམས་ལ། རང་གི་སྙིང་གར་ཕྱག་ན་རྡོ་
རྗེ་ཚོན་གང་བ་གཅིག་བསྒོམ། དེའི་སྤྱི་བོར་རྟ་མགྲིན་གཅིག་བསྒོམ་ལ། དེ་ནས་མདུན་བསྐྱེད་རཱ་ཧུ་ལ་གོང་བཞིན་བསྐྱེད་ལ་འགུགས་གཞུག་བྱེད། རང་གི་སྙིང་གི་དབུས་ཀྱི་ཕྱག་ན་རྡོ་རྗེ་རྟ་མགྲིན་དང་བཅས་པ་ཁོའི་སྟེང་དུ་བསམ་མོ། །དེ་ནས་ཁོས་མ་བཟོད་ནས་ཁྱོད་ཀྱི་གང་འདོད་ངས་སྒྲུབ། འཁོར་སྲུང་རྐྱེན་ཟློག་ངས་བྱེད། ཅེས་དམ་བཅས་པར་བསམ། དེ་ནི་དམ་ལ་བཞག་པའོ། །དེ་ལྟར་ཆོ་འཕྲུལ་དང་རྟགས་རྣམས་རྫོགས་ནས། དགྲ་ལ་ཟད་པ་འདི་ལྟར་བྱ། རཱ་ཧུ་ལའི་གཟུགས་ཤིང་བྱང་གཟུགས་འགྲོས་ཐུན་ཆུང་དང་བཅས་པ་ཁ་ཕར་གཡོན་བསྐོར་དུ་ཕྱིར་བསྒྱུར་ལ། གཏོར་མའི་གཡོན་ཟུར་ཡང་ཕྱིར་བལྟ་བར་བྱས་ལ། ལིངྒ་ཡང་ཁ་ཐུར་དུ་སྦུབ། དེའི་དམིགས་པ་ནི། གཙོ་བོ་མིག་དམར་ལ་སོགས་པའི་གཟའ་ཆེན་བརྒྱད་ཀྱིས་བསྐོར་བ་ལ། ཡང་འཁོར་ལྷ་སྲིན་སྡེ་བརྒྱད་དང་། འཇིག་རྟེན་གྱི་དྲེགས་བྱེད་སྙིང་རྗེ་མེད་པ་ཁྲོ་གཏུམ་ཆེ་བ། སྐད་ཅིག་ཙམ་གྱིས་འགྲོ་བ་ཐམས་ཅད་ཀྱི་སྲོག་དབུགས་ལེན་པ། དམ་ཅན་གྱི་དམག་ཚོགས་བསམ་གྱིས་མི་ཁྱབ་པ་རེ་རེའི་སྤྲུལ་པ་ཡང་སྤྲུལ་གྱི་ཐན་གཟུགས་བསམ་གྱིས་མི་ཁྱབ་པ་སྤྲིན་གཏིབས་པ་ལྟ་བུའམ། ཚར་ཆེན་པོ་བཞིན་ཁོའི་སྟེང་དུ་བབ་པར་བསམ། དེ་ནས་རང་ཉིད་ཡི་དམ་བསྒོམ། སྙིང་གའི་ལྷ་གཅིག་བརྩེགས་
དང་བཅས་པ་བསྒོམས་ལ། འོད་ཟེར་འཕྲོས་པས་རཱ་ཧུ་ལས་གཙོར་བྱས་པའི་འཇིག་རྟེན་གྱི་དྲེགས་བྱེད་ཐམས་ཅད་ལ་ཕོག་པས། དེ་དག་ཐམས་ཅད་རབ་ཏུ་། ཁྲོས། དགྲ་བོའི་ཡུལ་དུ་སྡེ་བརྒྱད་ཀྱི་དམག་དྲངས་པར་བསམས་ལ། སྔགས་འདི་བཏགས་ལ་ཐུན་རྫས་གྱིས་བྲབ་པ་ནི། རྒྱ་ཐང་ཕྲོམ་ཁྱི་ནག་དང་གཅན་གཟན་ཁྲག །ར་ནག་དང་རྟ་ནག་ཁྲག །རྡོ་དཀར་ནག །ཐོག་རྡོ་ལ་སོགས་ཐུན་རྫས་སྣ་ཚོགས་བསགས། དེ་ནས་བསྙེན་སྔགས་ཀྱི་ཤམ་བུར་འདི་བཏགས་ལ་ཐུན་གྱིས་བྲབ། ཨོཾ་ཨེ་ཀ་ར་ར་ཡ་ཡ། །ཧྲང་ཧྲང་། ཧྲཱིང་ཧྲཱིང་། ཧཱུྃ་ཧཱུྃ། རྒྱུག་རྒྱུག །སྲིང་སྲིང་། ཐུ་བྷཾ། ཡ་ཡ། ཁས་ཁས། ཕོབ་ཕོབ། ཅེས་ཟད་སྔགས་ཐན་གྱིས་བྲབ་ལ་བཞག །བཞག་ཁ་དམོད་མོ་སྣ་ཚོགས་བྱའོ། །རང་གི་ཐུགས་ཀ་ནས་མཚོན་ཆའི་ཆར་ཕབ་པར་བསམས་ལ། ཐུན་གྱིས་གཟུགས་ལ་བྲབ་ལ་དམིགས་པ་གོང་བཞིན་དུ་བྱའོ། །དེའི་དུས་སུ་རཱ་ཧུ་ལའི་སྟེང་གི་ལྷ་རང་ལ་བསྡུའོ། །འདིའི་དུས་དུ་གཟའ་ལྡོག་བརྩི་ལ་རྒྱུ་དུས་ཟོར་འཕང་ཞིང་བཞེས་འབོད་དང་། དམོད་མོ་གང་ཤེས་བྱའོ། །དམིགས་པ་གོང་དང་འདྲ་། དེ་ནས་བསྟོད་བསྐུལ་ནི། བྷྱོ༔ སྲིན་པོ་ཡཀྵ་གློག་ཕྲེང་དང་། །ཀླུ་མོ་སྦལ་མགོ་ཁྲག་མིག་མ། །དེ་གཉིས་རོལ་པ་སྤྲུལ་པའི་སྲས། །གཟའ་བདུད་ཆེན་པོ་རཱ་ཧུ་ལ། །
འཇིགས་བྱེད་ཆེན་པོ་སྤྲུལ་པའི་སྐུ། །ལུས་པོ་གཅིག་ལ་མགོ་བོ་དགུ། །མགོ་ལུས་མེད་པར་མིག་གིས་གང་། །གཡས་ན་ཆུ་སྲིན་ཞགས་པ་བསྣམས། །གཡོན་ན་རྭ་ཡི་མདའ་གཞུ་གསོར། །རི་རབ་རྩེ་ན་གནས་པའི་ཚེ། །ཉི་མ་ཟླ་བ་ཁོང་དུ་མིད། །བར་སྣང་ཁམས་ན་གནས་པའི་ཚེ། །འཇིག་རྟེན་ཁམས་ཀུན་སྐྲག་ཅིང་ཟློག །དུས་ཚོད་ཚེས་གྲངས་ཀུན་གྱི་བདག །ལྷ་སྲིན་སྡེ་བརྒྱད་དམག་དཔོན་བྱེད། །འཇིགས་བྱེད་དེ་ནི་མི་བཟད་པ། །གཟི་མདངས་གློག་འཁྱུགས་ལམས་སེ་ལམ། །ང་རོ་འབྲུག་སྒྲ་ཆེམས་སེ་ཆེམ། སྤྱན་ནས་ཁྲག་གི་བུ་ཡུག་འཚུབ། །ཤངས་ནས་རླུང་དམར་འཚུབ་མ་ལྡང་། །ཞལ་ནས་གནམ་ལྕགས་སེར་བ་འབེབས། །འཇིག་རྟེན་འགྲོ་བ་མི་ཡི་ཡུལ། །ཐོག་དང་སེར་བའི་་བསྐལ་པ་དང་། །ནད་ཀྱི་ཀིང་ཀང་དྲག་པོ་རྣམས། །བསྟན་པ་བཤིགས་པའི་དགྲ་ལ་ཕོབ། །གཟའ་བདུད་ཆེན་པོའི་དུས་ལ་བབ། །འཇིགས་བྱེད་ཆེན་པོའི་དུས་ལ་བབ། །དམག་དཔོན་ཆེན་པོའི་དུས་ལ་བབ། །རཱ་ཧུ་ལ་ཡི་དུས་ལ་བབ། །རྭ་ཙ་ཀ་ཡི་དུས་ལ་བབ། །རོག་ཏི་ནག་པོའི་དུས་ལ་བབ། །དུ་བ་འཇུག་རིང་དུས་ལ་བབ། །ཁྲོམ་གྱི་
གཟའ་བརྒྱད་དུས་ལ་བབ། །སྒྲ་གཅན་འཛིན་གྱི་དུས་ལ་བབ། །དགྲ་སྲོག་གཅོད་པའི་དུས་ལ་བབ། །དགྲ་ཤ་ཟ་བའི་དུས་ལ་བབ། །དགྲ་ཁྲག་འཐུང་བའི་དུས་ལ་བབ། །བརྣག་པའི་དགྲ་བོ་མྱུར་དུ་སྒྲོལ། །བཅོལ་བའི་ཕྲིན་ལས་འགྲུབ་པར་མཛོད། །དེ་ནི་ཟད་ཅིང་བསྟོད་པའོ། །ར་གསུར་བཅད། དེ་ནས་རྟགས་ནི། དམག་ལ་འགྲོ་དང་ཛག་ལ་ཆས། །རྟ་དང་རྒྱ་ཡི་གོ་ཁྲབ་ཅན། །རྒྱུགས་ལ་སྐྱས་དང་ཐལ་བ་དང་། །བཙུན་པ་དགེ་བཤེས་དཔོན་ཆེན་རྣམས། །འགྲོ་དང་ལས་ལ་ཆས་པ་དང་། །ཁྱི་དང་གཅན་གཟན་ལ་སོགས་འགྱེད། །རྔོན་པ་བྱ་ཁྲ་ལ་སོགས་པ། །གཅན་གཟན་དངོས་སུ་ཚུར་འོང་དང་། །ཐ་མ་རྨི་ལམ་དག་ལ་འོང་། །དེ་སོགས་རྟགས་ཉམས་བྱུང་བ་དང་། །དེ་ཚེ་དགྲ་ལ་རྟགས་ཀྱི་རིམ། །སྔགས་པ་འདི་ཞེས་བྱ་བ་ཡིས། །ཁྱོད་ཀྱི་རྩ་ན་འདི་ཞེས་པའི། །ནོར་སྤྱད་ར་མདའ་འོང་ཞེས་སོགས། །གཞན་ཡང་ནོར་རྫས་མེ་འབར་དང་། །ལྟས་ངན་མི་རུངས་སྣ་ཚོགས་འོང་། །བསད་མི་འདོད་ན་དེ་ཙམ་ཞིག་གིས་ཆོག །དེ་ནས་མནན་པ་བསྐྱལ་རན་པ་དང་། དགྲ་བོའི་ཕྱོགས་སུ་གཟའ་ཤིང་ལ་སྤྲུལ་ནས་རྒྱུ་བའི་དུས། ཕྱི་དྲོའི་དུས་སུ་མཆོད་གཏོར་རཱ་ཧུ་ལ་འཁོར་དང་བཅས་པ་ལ་འབུལ། གསེར་སྐྱེམས་མཁྱེན་གསོལ་བྱས་ལ། བྱང་ལིང་བཞར་ལ་སྲེག །ཐལ་བ་ཐན་གཟུགས་ཐུན་ཁུང་དང་བཅས་པ་བཟུང་། འགྲོ་བའི་དུས་སུ་རང་གི་སྔོན་དུ་རཱ་ཧུ་ལ་ལ་ལྷ་
འདྲེའི་དམག་ཚོགས་གང་བཙན་ཆས་པར་བསམས་ལ། རང་ཡང་དེའི་རྗེས་ལ་ཡི་དམ་ཆོས་སྐྱོང་དམག་དཔུང་དང་བཅས་པ་དགྲ་བོའི་ཡུལ་དུ་ཐན་སྣ་ཚོགས་དེ་ནས་བསྐྱལ་བར་བསམ། རོལ་མོ་སྙན་པོས་བསྟོད་དོ། །རྦད་བསད་སྔགས་འདོན་ལ་སྒྲུབ་ཁང་གི་སྒོ་ཐེམ་རྒྱབ། སྒྲུབ་ཁང་མི་མཐོང་བའི་སར་འགྲོ་ལ་འདིར་བཞག་བསམ་པ་དར་ཐོག་གཅིག་བརྩིགས། དེ་ནས་གོམ་པ་གསུམ་སར་བཞག །ཡང་གསེར་སྐྱེམས་བྱ། ལམ་ཕྱེ་དམོད་བཅོལ་བྱ། རོལ་མོ་སྣ་ཚོགས་འུར་བརྡུང་བྱ། མནན་པའི་མཆོད་རྟེན། ལྷ་ཁང་ལམ་རྒྱ་གྲམ། ས་གཉན། ཤིང་གཉན་རྩ་བ། ཡང་ན་སྒྲུབ་ཁང་གི་སྒོ་ཐེམ་རྒྱབ་ཏུ་མནན། གཟའ་རྒྱུ་དུས་དང་ཐེབས་དུས་ལ་བྱའོ། །སློབ་དཔོན་བཻ་རོ་ཙ་ནའི་མན་ངག་མུ་སྟེགས་ལོག་མཐུ་ནས་བྱུང་བའི་འདོན་འགྲིགས་དང་གསལ་ཆ་འདི་རཱ་ག་ཨ་སྱས་སྦྱར་བའོ། །གཞན་ལ་ཡོན་གསེར་སྲང་རེ་མ་གཏོགས་སྤེལ་ན་དམ་ཚིག་ས་མ་ཡ་ཤྲཱི། འདི་བྲིས་དགེ་བས་བསྟན་དགྲ་དམ་ཉམས་མ་ལུས་བསྒྲལ་བས་བཀྲ་ཤིས་ཤོག། ། ༧ །ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས། །