གཉན་ཆེན་ཐོང་ལྷའི་སྒྲུབ་ཐབས།
གཉན་ཆེན་ཐོང་ལྷའི་སྒྲུབ་ཐབས་བཞུགས་པའི་དབུ་ཕྱོགས་སོ༔
ན་མོ་པདྨ་བཛྲ་ཡེ༔ གཉན་ཆེན་ཐང་ལྷ་སྒྲུབ་པ་ནི༔ རས་དཀར་པོ་དྲི་མ་མེད་པ་ལ༔ དྲི་ཞིམ་སྨན་གྱིས་བྱུགས་ལ་དཀྱིལ་འཁོར་བྲི༔ དེ་སྟེང་དཀར་གསུམ་སྦྱར་བའི་གཏོར་མ་བཤམས༔ རང་གི་མདུན་དུ་ཐང་ལྷ་སྐུ་མདོག་དཀར་པོ་རྟ་ངང་དཀར་ལ་ཆིབས་པ༔ སྐུ་ལ་བེར་དཀར་ལྷུབ་གྱོན་བྱས་པ༔ དབུ་སྐྲ་རལ་པའི་སྟེང་ན་རིན་པོ་ཆེ་དང་རྡོ་རྗེ་ཕྱེད་པས་བརྒྱན་པ༔ གཡས་སྦ་ལྕག་དང་གཡོན་ཤེལ་ཕྲེང་འདྲེན་པ༔ འཁོར་སྣང་སྲིད་ཀྱི་ལྷ་འདྲེས་བསྐོར་བར་གྱུར༔ སྤྱན་འདྲེན་ནི༔ ཀྱཻ༔ དེ་ལྟར་དམ་ཚིག་གསལ་བའི་གནས་གསུམ་ལས༔ འོད་འཕྲོས་སྟོང་གསལ་ཆོས་དབྱིངས་ཆེན་པོ་ནས༔ ལྷུན་
གྲུབ་འཇའ་གུར་འཁྱིལ་བའི་སྒྱུ་འཕྲུལ་གར༔ སྣང་སྲིད་དྲེགས་པ་ལྷ་སྲིན་དབང་ཕྱུག་གཙོ༔ མཐུ་ལྡན་དགྲ་བགེགས་ཡོངས་ཀྱི་གཤེད་མ་རུ༔ རིག་འཛིན་ཆེན་པོ་པདྨ་འབྱུང་གནས་ཀྱིས༔ མངའ་གསོལ་དམ་ལ་བཏགས་པའི་དགེ་བསྙེན་ཁྱོད༔ གཉན་ཆེན་ཐང་ལྷ་གནས་འདིར་གཤེགས་སུ་གསོལ༔ ཧཱུྃ༔ ཡེ་ཤེས་གཞལ་ཡས་བསྐྱེད་ཀྱི་རྒྱ་མ་ཆུང་༔ སེང་གེ་གླང་ཆེན་ཁྲི་བཤམས་འཕང་མ་དམའ༔ ཉི་ཟླ་པདྨའི་གདན་བཏིང་བཀྲག་མ་ཞན༔ ཡེ་ཤེས་ལྷ་མཆོག་བརྟེན་ཅིང་རྒྱང་མ་རིང་༔ འཇིག་རྟེན་སྲུང་མ་བསྒྲུབ་ཅིང་མཐུ་མ་ཆུང་༔ སེམས་དཔའ་ནམ་
མཁའི་སྙིང་པོའི་སྤྲུལ་པ་སྟེ༔ རྡོ་རྗེ་དབྱིངས་ཕྱུག་འབར་བ་གཤེགས་སུ་གསོལ༔ དམ་ཅན་ཤེལ་གིང་རྡོ་རྗེ་མཆོག་རབ་རྩལ༔ གནམ་ལྷ་བྱང་ཆུབ་སེམས་དཔའ་གནམ་ཐིལ་དཀར༔ ཚངས་པའི་རྒྱལ་པོ་དུང་གི་ཐོར་ཚུགས་ཅན༔ དྲི་ཟ་ཟུར་ཕུད་ལྔ་པ་གཤེགས་སུ་གསོལ༔ ཁྱབ་འཇུག་གནམ་མཚོའི་རྒྱལ་པོ་མགུར་ལྷའི་གཙོ༔ ཀླུ་ཡི་རྒྱལ་པོ་མེ་ལོང་ཐོད་དཀར་ཞེས༔ སྨྱོ་འདྲེ་རྒྱལ་འགོང་འདུལ་བའི་གཉན་པོ་སྟེ༔ དམ་ཉམས་རྣམས་ཀྱི་སྲོག་བདུད་གཤེད་མ་ཆེ༔ གྲིབ་གནོན་མ་རབ་རྣམས་ཀྱི་གཉའ་གནོན་པོ༔ སྨྱོ་འདྲེ་རྒྱལ་བློའགོང་མངོན་སུམ་འདུལ་བའི་ལྷ༔ གཉན་ཆེན་ཐང་ལྷ་གནས་འདིར་མྱུར་དུ་བྱོན༔ རྡོ་རྗེ་འབར་བ་རྩལ་ས་མ་ཡ་ཛ་ཛ༔ དེ་ནས་རྟེན་རྫས་ལ་ཕོ་བྲང་གསལ་གདབ་ཅིང་བཞུགས་སུ་གསོལ་བ་ནི༔ ཀྱཻ༔ འོད་གསལ་ཆོས་དབྱིངས་ནམ་མཁའ་ཡངས་པའི་ཁམས༔ ལྷུན་གྲུབ་སྐུ་གསུམ་ཞིང་གི་མཛེས་པའི་དཔྱིད༔ མདུན་དུ་སྤང་ལྗོངས་གངས་རིའི་འཁོར་ཡུག་དབུས༔ གཞི་བདག་ཆེན་པོ་གཉན་ཆེན་ཐང་ལྷ་ནི༔ སྲིད་པར་སྤྲིན་བཅུད་འཁོར་ལོ་གདུགས་རྩིབས་པའི༔ བ་གམ་བཀོད་རབ་འབར་བ་རྡོ་རྗེའི་གཞི༔ རྙོག་བྲལ་དྭངས་མའི་ཆུ་ཤེལ་མདངས་
འཚེར་བའི༔ ལྟ་ན་སྡུག་པའི་ཕོ་བྲང་གཞལ་མེད་འདིར༔ ཕྱི་ནང་ཟག་བྲལ་ལྷུན་འབྱམས་དག་པའི་ཞིང་༔ རྒྱལ་བ་ཀུན་གྱི་བཀོད་མཛེས་གཞལ་ཡས་ཀྱི༔ ངོ་མཚར་ཆེན་པོ་ལྷུན་གྱིས་གྲུབ་པའི་དབུས༔ དར་ཟབ་རིན་ཆེན་པདྨ་ཉི་ཟླ་དང་༔ ནོར་བུ་བ་གམ་བརྩེགས་པའི་ཁྲི་ཆེན་པོར༔ འདིར་གཤེགས་ཉི་ཟླའི་གདན་ལ་བཞུགས་སུ་གསོལ༔ བཛྲ་འབར་བ་རྩལ་ཛཿཧཱུྃ་བཾ་ཧོ༔ ཏིཥྛ་ལྷན༔ ཧཱུྃ༔ ཕྱི་ལྟར་དགེ་བསྙེན་ནང་ལྟར་ཀླུ་བཙན་དང་༔ གསང་བ་སྲིད་པའི་ལྷ་ཆེན་ཁྱོད་ཀྱི་སྐུ༔ སྣང་སྟོང་རྒྱུ་མ་མཛེས་སྡུག་ལྷུན་ཆགས་པའི༔ དར་དང་རིན་ཆེན་ལྷབ་ལྷུབ་གོས་བཟང་ཅན༔ དབུ་ལ་རིན་ཆེན་འབར་བའི་སྲོག་ཞུ་དང་༔ སྙན་རྒྱན་ནོར་བུ་ཏོག་གི་གཟི་འབར་ཞིང་༔ ཕྱག་གཡས་སྦ་ལྕག་གཡོན་པས་བ་དན་ཕྱར༔ རིན་ཆེན་ཁྲི་ལ་འཇའ་འོད་སྤོས་སྤྲིན་ཀློང་༔ སྣང་སྲིད་ཕྱི་ནང་གསང་བ་དེ་ཁོ་ནའི༔ གང་འདུལ་ཕྲིན་ལས་བསྒྱུར་མཛད་ཕྱག་མཚན་དང་༔ གསང་གསུམ་སྤྲུལ་པ་མི་བཟད་ནམ་མཁའི་རྒྱན༔ ཐབས་མཁས་ཐུགས་རྗེས་འགྲོ་འདུལ་ཆ་ལུགས་ཅན༔ བསིལ་ལྡན་འཁོར་ཡུག་ཨ་ཏི་སྒྲུབ་བརྒྱུད་ཀྱི༔ མི་ནུབ་བསྟན་པའི་ལང་ཚོ་
སྤེལ་ཕྱག་འཚལ༔ བཛྲ་འབར་བ་རྩལ་ཨ་ཏི་པཱུ་ཧོ༔ པྲ་ཏི་ཛ་ཧོ༔ དམ་བཞག་ནི༔ ཧཱུྃ༔ རྡོ་རྗེ་འབར་བ་རྩལ༔ དམ་ཅན་ཀུན་གྱི་ལྷ༔ དམ་མེད་ཀུན་གྱི་གཤེད༔ མནའ་ཟན་ཀུན་གྱི་བདུད༔ རྣལ་འབྱོར་བདག་གི་དཔལ༔ སྒྲུབ་མཆོག་བདག་གི་གྲོགས༔ ཕྲིན་ལས་སྐལ་ཕོག་པ༔ སྨྱོ་བའི་འདྲེ་འདུལ་ཞིང་༔ སྡང་བའི་དགྲ་སྲོག་ཆོད༔ མགྱོགས་སུ་རྟ་སྟོད་ཀྱི༔ རྨིག་ཐོག་ཟོར་མ་ལྗི༔ རྣོ་རུ་མཚོན་བརྡར་ཞིང་༔ རྩེ་མོ་དབལ་མ་ཞན༔ ཅི་དང་དོ་བསྡོ་ན༔ དོ་ཐག་ཆད་ད་རེ༔ མགྱོགས་སུ་ཀྱུས་མགྱོགས་ན༔ དཀྱུས་ཐོག་ཤོ་ར་རེ༔ སྡང་དགྲའི་ཁྱེར་ར་རེ༔ བྱམས་ཀྱིས་སྐྱོངས་ར་རེ༔ དུས་ལ་བབ་བོ་སཱ་མ་ཡཱ༔ དམ་ཚིག་རྗེས་སུ་དྲན་པར་གྱིས༔ ལས་ལ་བབ་བོ་བགེགས་ཀྱི་རྒྱལ༔ བཅོལ་བའི་ཕྲིན་ལས་འགྲུབ་པར་མཛོད༔ དབུས་གཙང་རུ་བཞིའི་ཡུལ་ལྷ་ཁྱོད༔ ཆོས་སྐྱོང་རྒྱལ་པོ་ལྷ་ཡི་སྲས༔ ཁྲི་སྲོང་ལྡེའུ་བཙན་སྐུ་ལྷ་ཡིན༔ ཨོ་རྒྱན་པདྨ་འབྱུང་གནས་ཀྱིས་དམ་ལ་བཏགས་པའི་དམ་ཚིག་ཅན་ད་ལྟ་ཅི་མནོའི་ལས་རྣམས་ཉོན༔ ཕྱི་རབས་བསྟན་པའི་ཐ་མ་ལ༔ ཨོ་རྒྱན་པདྨ་འབྱུང་གནས་ཀྱིས༔ རྗེས་སུ་འཇུག་
པའི་སྔགས་འཆང་དང་༔ ཆོས་རྒྱལ་ཁྲི་སྲོང་ལྡེའུ་བཙན་གྱི༔ ལྷ་བརྒྱུད་ཆགས་པའི་གདུང་རྒྱུད་རྣམས༔ མངའ་ཐང་དགུང་ལ་རེག་པ་དང་༔ དམའ་བ་བུ་བཞིན་སྐྱོང་བར་གྱིས༔ བོད་ཁམས་ཐམས་ཅད་ཆོས་བཞིན་སྐྱོངས༔ བདག་གི་མཆོད་ཁང་དཀོར་བཞིན་སྲུངས༔ བསྐལ་པ་ཐ་མར་བདག་ཅག་རྣམས༔ ཁྱོད་ཀྱིས་སྲུང་སྐྱོབ་མི་བྱེད་ན༔ དང་པོ་བྱང་ལམ་བར་པ་རུ༔ གསང་བདག་ཕྱག་ན་རྡོ་རྗེ་ཡིས༔ སྲོག་སྙིང་གཟིར་བ་མི་དྲན་ནམ༔ བར་དུ་བསམ་ཡས་ཧས་པོ་རིར༔ དབང་ཆེན་པདྨ་ཧེ་རུ་ཀས༔ དབང་དུ་བསྡུས་པ་མི་དྲན་ནམ༔ ཐ་མ་རི་རྒྱལ་བཀྲག་བཟང་གི༔ རྩེ་མོར་ལྷ་སྲིན་ཀུན་བསགས་ནས༔ དཔལ་ཆེན་རྡོ་རྗེ་གཞོན་ནུ་ཡིས༔ དམ་ཚིག་ཕོག་པ་མི་དྲན་ནམ༔ སྨྱོ་འདྲེ་རྒྱལ་འགོང་གཉན་པོ་རུ༔ རང་གི་ཞལ་བཞེས་མི་དྲན་ནམ༔ བདག་ཅག་འཁོར་དང་བཅས་པ་ཡི༔ ལྷ་ཁྱོད་མཆོད་ཅིང་བརྟེན་ལགས་ཀྱིས༔ གནོད་བྱེད་སྨྱོ་འདྲེ་རྒྱལ་འགོང་རྣམས༔ བསྐད་གཟིར་ཚར་གཅོད་ལས་མཛོད་ཅིག༔ ཨོཾ་བཛྲ་ཐང་ཀ་ར་མུན་ཉིད་ཁུ་ཤ་ལི་ཛ་ཛ༔ ས་མ་ཡ་ཧཱུྃ་ཕཊ༔ རྡོ་རྗེ་འབར་བ་རྩལ་ཨ་ཛ་ཛ༔ དེ་ནས་མཆོད་པ་ནི༔
ཨོཾ༔ ཕྱི་མཆོད་ནམ་མཁའི་སྣོད་དུ་སྲིད་གསུམ་བཤམས༔ ཨཱཿ ནང་མཆོད་ཐབས་ཤེས་དྭངས་མ་འཁོར་འདས་བསྟིམ༔ ཧཱུྃ༔ གསང་མཆོད་བདེ་སྟོང་སྦུབས་སུ་འཇའ་གུར་། སྦ༔ མ་ལུས་ཞེན་འཛིན་དག་པའི་རྫོགས་པ་ཆེ༔ འཁོར་གསུམ་དམིགས་མཐའ་བྲལ་བའི་མཆོད་པ་འབུལ༔ ཀྱཻ༔ གནས་སྐབས་ལྷ་ཆེན་བརྟེན་པའི་བླ་རྡོ་དང་༔ སྲིད་པ་ཡིད་འོང་འདུས་པའི་སྤྱན་གཟིགས་སོགས༔ ནོར་བུ་རིན་ཆེན་རྒྱན་མཆོག་དྲི་གཡེར་གླིང་༔ གསང་བའི་ལྷ་དར་དཀར་པོ་བདུག་སྤོས་ཀྱི༔ རིལ་སྦལ་གཏོར་མཆོད་མདོས་སྟན་སྨན་དཀར་དང་༔ དཀར་མངར་རོ་བརྒྱའི་མཆོད་སྤྲིན་འདིར་བཤམས་པ༔ སྤོས་དཀར་རོལ་མོ་གདུང་བའི་དབྱངས་སྙན་གྱིས༔ གསོལ་ལོ་མཆོད་དོ་ཐང་ལྷ་གཉན་པོ་མཆོད་སྔོན་ཚེ་རྡོ་རྗེ་འཆང་ཆེན་གསང་བའི་བདག༔ རིག་འཛིན་པདྨའི་སྤྱན་སྔར་དམ་མནོས་བཞིན༔ ཞི་བའི་མགོན་མཛད་རྒྱས་པའི་སྟོབས་འབྱོར་སྤེལ༔ དབང་གི་སྲིད་གསུམ་ཁ་ལོ་ཆོས་སུ་བསྒྱུར༔ དྲག་པོའི་རྒྱལ་འགོང་མིང་ཙམ་མཐར་བསྐད་ནས༔ འོད་གསལ་སྙིང་པོ་བཀའ་གཏེར་ཟུང་འཇུག་པ༔ པདྨའི་བཀའ་དང་རིག་འཛིན་སྲོག་བཅུད་མཐིལ༔ ཌཱ་
ཀིའི་ཐུགས་བཅུད་ཆོས་དབྱིངས་བླ་རྡོ་འདི༔ ཉི་འོག་ཆོས་དབྱིངས་འཁོར་ལོ་ཁྱབ་པར་སྤེལ༔ སྐལ་མེད་ལོག་ལྟ་བསྟན་བཤིག་བསྟན་འཇོམས་པ༔ བསྟན་དགྲའི་རྒྱལ་འགོང་དམ་སྲིའི་སྙིང་ཁྲག་རོལ༔ ཕྱག་རྫོགས་བདག་པོ་བསྟན་འཛིན་སྐྱེས་མཆོག་རྣམས༔ སྲིད་ཞི་བདེ་སྐྱིད་ལང་ཚོ་སྟོབས་འབར་ཞིང་༔ མཆོག་གི་སྲིད་རྩེར་འོད་ཕུང་འཇའ་ཟེར་གྱིས༔ ཟག་བཅས་དྭངས་མ་སྨིན་པར་ལྷ་ཆོས་མཛོད༔ ཨོཾ༔ དྲི་ཟའི་རྒྱལ་པོ་ས་བརྒྱད་གནས་པའི་མཆོག༔ སྟོང་གསུམ་གཞི་བདག་ཀུན་གྱི་རྗེ་བོར་གྱུར། འཁོར་ཚོགས་དང་བཅས་བརྒྱ་བྱིན་སྲས་མོ་ནི༔ མཚོ་སྨན་ཕྱུག་མོར་བཅས་པས་གཏོར་མ་བཞེས༔ བདག་གི་བསམ་པ་ཐམས་ཅད་འགྲུབ་པ་དང་༔ བསྟན་པ་འཕེལ་ཞིང་འདོད་དགུ་རྒྱ་ཆེར་ལྡན༔ གདུག་འདྲེའི་ནད་དང་གནོད་པ་ཞི་བ་དང་༔ ཐམས་ཅད་བདེ་གར་སྤྱོད་པའི་བཀྲ་ཤིས་སྩོལ༔ ཨོཾ་ཨཱམ་ནུ་ཥ་ནཱ་ག་ར་ཛ་ས་པཱ་རི་ཝཱ་ར་ཨི་དཾ་བ་ལིཾ་ཏ་ཁཱ་ཧི་ཁཱ་ཧི༔ ཨོཾ་བཛྲ་ཐང་ཀ་ར་མུན་ཉིད་ཁུ་ཤ་ལི་ཨ་མྲྀ་ཏ་ཁཱ་ཧི་ཁཱ་ཧི་སྭཱ་ཧཱ༔ བཛྲ་འབར་བ་རྩ་ལ་ཨརྒྷཾ་པཱདྷཾ་ནས། ཤཔྟ་པྲ་ཏཱིཙྪ་ཨཱཿཧཱུྃ་མ་ཧཱ་པཉྩརཀྟ་ཚྭ་ས་བ་ལིཾ་ཏ་ཁ་ཁ་ཁཱ་ཧི༔ དེ་ནས་མཆོད་
རྗེས་བསྟོད་པ་ནི༔ ཧཱུྃ༔ སྐུ་ལྷའི་ཡབ་སྨོས་པ༔ འོ་དེ་གུང་རྒྱལ་ལགས༔ སྐུ་ལྷའི་ཡུམ་སྨོས་པ༔ གཡུ་བྱ་གཤོག་གཅིག་ལགས༔ སྐུ་ལྷ་ཉིད་སྨོས་པ༔ ཡར་བཞུད་གཉན་གྱི་ལྷ༔ བཞུགས་ཡུལ་མཚན་གསོལ་བ༔ འདམ་ཤོད་སྣར་མོ་ལགས༔ ཁྲི་རྒོད་གཡུ་ལྗང་འཁྲིལ༔ དབྱར་སྔོ་དགུན་ཡང་སྔོ༔ བཞུགས་ཡུལ་ཉམས་རེ་དགའ༔ དགྱེས་སོ་ལྷ་ཡི་ཡུལ༔ མི་ཆོས་མཚན་གསོལ་བ༔ ཐང་ལྷ་ཡར་བཞུད་ལ༔ ལྷ་ཆོས་མཚན་གསོལ་བ༔ དྲི་ཟའི་རྒྱལ་པོ་ནི༔ ཟུར་ཕུད་ལྔ་པ་ལ༔ གསང་བའི་མཚན་གསོལ་བ། རྗེ་འབར་བ་རྩལ༔ སྐུ་ལ་ཅི་གསོལ་བ༔ དར་དཀར་རལ་ག་གསོལ༔ ཆིབས་སུ་ཅི་ཆིབས་ན༔ ལྷ་རྟ་ངང་དཀར་ཆིབས༔ ཁམས་གསུམ་ཀུན་ཏུ་རྒྱུགས༔ མདོག་དཀར་འོད་ཟེར་འབར༔ གཡས་པས་སྦ་ལྕག་ཕྱིར༔ མ་བདུན་ལས་ལ་འགྱེད༔ གཡོན་ན་ཤེལ་འཕྲེང་འདྲེན༔ ཐུགས་དམ་དབྱིངས་སུ་ཟློས༔ སྤྲུལ་པ་ཅི་འགྱེད་ན༔ ལྷ་དམག་འབུམ་སྡེ་འགྱེད༔ བྲན་གཡོག་འཁོར་དང་བཅས༔ གུས་པས་མཆོད་ཅིང་བསྟོད༔ བཅོལ་བའི་ཕྲིན་ལས་མཛོད༔ ཧཱུྃ༔ ང་ནི་པདྨ་འབྱུང་གནས་ཀྱི༔ རྗེས་སུ་འཇུག་པའི་
སྔགས་འཆང་ཡིན༔ ཁྱེད་ནི་གཉན་ཆེན་ཐང་ལྷ་ཡིན༔ ཡུལ་ནི་གངས་ཅན་བོད་ཡུལ་ཡིན༔ བྱིན་རླབས་སྤྲིན་ལྟར་ཐིབས་སེ་ཐེབ༔ ཐུགས་རྗེའི་ཆར་ལྟར་ཤ་ར་ར༔ དམ་ཚིག་མདངས་ལྡན་ཡ་ལ་ལ༔ ཐང་ལྷ་གཉན་པོ་ཡུམ་དང་བཅས༔ སྐུ་ལྷ་གཉན་པོ་འཁོར་བཅས་ལ༔ བརྗིད་ལྡན་བཟང་རིང་བཤོས་ཀྱིས་མཆོད༔ གངས་ཆུ་གཡའ་ཆུ་གཙང་མས་མཆོད༔ དྲི་ཞིམ་སྤོས་དཀར་དུད་པས་མཆོད༔ གསེར་དངུལ་རིན་ཆེན་སྣ་ལྔས་མཆོད༔ སྔོན་ཆ་དར་དང་ཟ་འོག་མཆོད༔ གཙང་ལུག་འབྲས་དཀར་གཙང་མས་མཆོད༔ ལྷ་ཆེན་པོ་ཐང་ལྷ་ལ་གསོལ་ལོ་མཆོད་དོ་མངའ་གསོལ་ལོ༔ རྡོ་རྗེ་འབར་བ་རྩལ་ལ་གསོལ་ལོ་མཆོད་དོ་མངའ་གསོལ་ལོ༔ རྡོ་རྗེ་མཆོག་རབ་རྩལ་ལ་གསོལ་ལོ༔ མཆོད་དོ་མངའ་གསོལ་ལོ༔ དྲི་ཟ་ཟུར་ཕུད་ལྔ་པ་ལ་གསོལ་ལོ་མཆོད་དོ་མངའ་གསོལ་ལོ༔ ཡུམ་བརྒྱ་བྱིན་སྲས་མོ་ལ་གསོལ་ལོ་མཆོད་དོ་མངའ་གསོལ་ལོ༔ སྲས་ཐང་སྲས་འཕྱོ་བ་ལ་གསོལ་ལོ་མཆོད་དོ་མངའ་གསོལ་ལོ༔ གཅུང་པོ་ཐང་འབྲི་ངུར་པོ་ལ་གསོལ་ལོ་མཆོད་དོ་མངའ་གསོལ་ལོ༔ འཁོར་དང་སྤྲུལ་པར་བཅས་པ་ལ་གསོལ་ལོ་མཆོད་དོ་མངའ་
གསོལ་ལོ༔ བེ་དཀར་རྒྱལ་འགོང་དམ་སྲིའི་གནོད་པ་ཐམས་ཅད་ཞི་བ་དང་ཟློག་པ་དང་ཚར་གཅོད་པའི་ཕྲིན་ལས་མཛོད་ཅིག༔ བརྒྱལ་ནད་སྨྱོ་འབོག་སྙིང་རླུང་སྟོད་འཚང་སྨུག་འཆལ་རྒྱལ་གཟེར་འཁྲུག་ལོང་གི་གནོད་པ་ཐམས་ཅད་ཞི་བའི་ཕྲིན་ལས་མཛོད་ཅིག༔ རྣལ་འབྱོར་པ་བདག་ཅག་མི་ནོར་འཁོར་དང་བཅས་པ་ལ་རྒྱལ་འགོང་དམ་སྲིའི་གནོད་པས་མི་ཚུགས་པར་སྲུངས་ཤིག༔ ཉིན་གྱི་བྱ་ར་དང་མཚན་གྱི་མེལ་ཚེ་མ་གཡེལ་ཅིག༔ ཨོཾ་བཛྲ་ཐང་ཀ་ར་མུན་ཉིད་ཁུ་ཤ་ལི་ཨ་མྲྀ་ཏ་ཁཱ་ཧི་ཁཱ་ཧི་སྭཱ་ཧཱ༔ ཞེས་ཕུད་རྒོད་དང་འབྲུ་སྣ་གཏོར༔ མེད་ན་ཆུ་གཙང་ལ་འབྲུ་སྣ་བཏབ་ལ་དགུང་སྔོན་པོའི་མཐོངས་སུ་མཆོད༔ དེ་ནས་བསྐུལ་པ་གཏོར་འབུལ་ལ་དཀར་གཏོར་དུས་བཏོན་ཀྱང་རུང་༔ ཀྱཻ༔ དྲག་པོའི་ལས་ལ་མྱུར་དུ་བསྐུལ་བའི་ཚེ༔ རྟ་མཆོག་ངང་ཞུར་རླུང་གི་ཤུགས་ཅན་ཞོན༔ སྤྲུལ་པའི་ཞོན་པ་འབུམ་གྱི་སྟེང་དག་ན༔ སྐྱ་བཙན་ཡ་མེད་འཇིགས་མེད་གཞན་རྒོལ་གྱི༔ དཔུང་འཇོམས་མཚོན་ཆའི་རི་བོ་བསྙིལ་བའི་སྒྲ༔ ནད་མུག་མཚོན་གྱི་བསྐལ་པ་སྟོང་པ་དང་༔ གཟུགས་ཅན་གཟུགས་མེད་འཚེ་བའི་གནོད་པ་ཟློག༔ གཞན་ཡང་གང་བརྩམ་ཅི་བཅོལ་ལས་ཀུན་སྒྲུབས༔ ཞེས་བསྐུལ་ལོ༔ རྒྱལ་འགོང་གི་
གནོད་པས་འཚུབ་ཆ་ཆེ་ན་འདི་འདོན༔ ཧཱུྃ་ཧཱུྃ་ཧཱུྃ༔ བཞུགས་ཡུལ་འདམ་ཤོད་སྣེ་མོ་ནས༔ ཡར་བཞུད་གཉན་པོ་སྐུ་བཞེངས་ཤིག༔ བླ་མཚོ་འཁྱིལ་བའི་ནང་ཤེད་ནས༔ གཉན་ཆེན་ཐང་ལྷ་སྐུ་བཞེངས་ཤིག༔ བྲག་དཀར་གཉན་པོའི་རྩེ་མོ་ནས༔ དྲི་ཟའི་རྒྱལ་པོ་སྐུ་བཞེངས་ཤིག༔ གངས་དཀར་མཐོན་པོའི་རྩེ་མོ་ནས༔ ཡུལ་ལྷ་གཉན་པོ་སྐུ་བཞེངས་ཤིག༔ སྤྲིན་དང་ན་བུན་གསེབ་ཤེད་ནས༔ ཟུར་ཕུད་ལྔ་པ་སྐུ་བཞེངས་ཤིག༔ སྡང་བའི་དགྲ་འདུལ་སྐུ་བཞེངས་ཤིག༔ གནོད་པའི་བགེགས་འདུལ་སྐུ་བཞེངས་ཤིག༔ སྨྱོ་བའི་འདྲེ་འདུལ་སྐུ་བཞེངས་ཤིག༔ སྤྲུལ་པའི་ཚུལ་དུ་སྐུ་བཞེངས་ཤིག༔ སྤྲུལ་པ་འཇིགས་པའི་ལུས་པོ་དེ༔ ལྷ་གཡག་དཀར་པོ་གཅིག༔ དུང་རུ་གནམ་དུ་གཡུག༔ དུང་རུ་དཀར་པོ་གཅིག༔ གནམ་གྱི་བདུད་ལ་སྒྱུར༔ རྨིག་བཞི་ས་ལ་འཁྲབ༔ དུང་རྨིག་དཀར་པོ་ཡིས༔ ལྷ་སྲིན་དམྱལ་ཐག་གཅོད༔ རྔ་མ་ནམ་མཁར་གཡུགས༔ རྔ་དཀར་སྤྲུག་པ་ཡིས༔ ལྷ་བཙན་བྲན་དུ་འཁོར༔ ངར་སྐད་ཐང་གསུམ་ངར༔ ཁམས་གསུམ་དབང་དུ་སྡུད༔ རུ་གསིགས་ལན་གསུམ་སྤྲུགས༔ སྲིད་གསུམ་དབང་དུ་སྡུས༔
མཐོན་པོ་གངས་གསུམ་ནས༔ དུང་ཁྲ་མེལ་ཚེ་བཞིན༔ དུང་ཁྲ་དཀར་པོ་གཅིག༔ ཉ་ལེ་ཁྲི་ལི་ལི༔ ར་དང་ཕྲག་མགོ་ནས༔ དུང་རྐྱང་དཀར་པོ་གཅིག༔ དགྲ་བགེགས་བླ་ལ་རྒྱུགས༔ དྲག་ཏུ་བསྐུལ་བའི་ཚེ༔ སྡང་བའི་དགྲ་བོ་སོད༔ གནོད་པའི་བགེགས་རྣམས་ཐུལ༔ རྒྱལ་འགོང་དམ་སྲི་ཐུལ༔ གདུག་འདྲེ་འགོང་པོ་ཐུལ༔ སྨྱོ་འབོག་བརྒྱལ་ནད་ཐུལ༔ བཅོལ་བའི་ཕྲིན་ལས་མཛོད༔ ཨོཾ་བཛྲ་ཀྲོ་ཏ་ན་ཤི་ལི་མི་ལི༔ དུ་དགྲ་བགེགས་མཱ་ར་ཡ་ཕཊ༔ ཅེས་སྔགས་ལན་བདུན་དང་༔ ཨོཾ་ཨཱཿཧཱུྃ་ཧྲཱིབཛྲ་འབར་བ་རྩལ་བིག་ནན་རཱ་ཛ་མཱ་ར་ཡ་ཕཊ༔ ཅི་ནུས་བཟླའོ༔ སྐུ་དང་རྟེན་རྫས་ལ་བསྟིམ་མམ༔ གཤེགས་པ་གང་འདོད་དམིགས༔ དགོངས་གཏེར་སྒྲུབ་ཐབས་ལ་གཞི་བྱས༔ བྱང་གཏེར་དང་ནམ་མཁའ་འཇིགས་མེད་གནམ་ཆོས་དང་༔ ཞྭ་དམར་དྲུག་པས་མཛད་པ་སོགས་གོ་བསྟུན་ཏེ༔ ཤིང་སྤྲུལ་སྔོན་ཟླ་བའི་ཡར་ཚེས་བཅུའི་ཉིན་ལ་དམ་སྲིས་གནོད་པས་གྲྭ་སློབ་རྣམས་ལ་སྙིང་རླུང་ལྡང་བ་མང་པོ་དུས་གཅིག་བྱུང་དུས་བྲིས་པ་ལ༔ ཉེས་འགལ་སྡེ་བརྒྱད་ཤན་པ་དམར་པོར་བཤགས་ཤིང་༔ དགེ་བས་སེམས་ཅན་ཐམས་ཅད་སྨྱོ་འབོག་གི་གནོད་པ་ཞི་བར་གྱུར་ཅིག༔ ཅེས་སྔགས་འཆང་ ༧ རཱ་ག་ཨ་སྱས་བསྒྲིགས་པ་མངྒ་ལཾ།།