དགོངས་གཏེར་ཐུགས་ཀྱི་ཀློང་གསལ་ལས་བྱང་ཆུབ་སེམས་དཔའ་ནམ་མཁའི་སྙིང་པོའི་སྤྲུལ་པ་ལྷ་ཆེན་ཐང་ལྷའི་སྒྲུབ་ཐབས།
དགོངས་གཏེར་ཐུགས་ཀྱི་ཀློང་གསལ་ལས་བྱང་ཆུབ་སེམས་དཔའ་ནམ་མཁའི་སྙིང་པོའི་སྤྲུལ་པ་ལྷ་ཆེན་ཐང་ལྷའི་སྒྲུབ་ཐབས༔ ན་མོ་པདྨ་བཛྲ་ཡེ༔ གཉན་ཆེན་ཐང་ལྷ་སྒྲུབ་ན༔ རས་དཀར་པོ་དྲི་མ་མེད་པ་ལ༔ དྲི་ཞིམ་སྨན་གྱིས་བྱུགས་ལ༔ དཀྱིལ་འཁོར་བྲི༔ དེའི་སྟེང་དུ་དཀར་གསུམ་དང་སྦྱར་བའི་གཏོར་མ་བཤམས༔ རང་གི་མདུན་དུ་ཐང་ལྷ་སྐུ་མདོག་དཀར་པོ་རྟ་ངང་དཀར་ལ་ཆིབས་པ༔ སྐུ་ལ་བེར་དཀར་ལྷུབ་གྱོན་བྱས་པ༔ དབུ་སྐྲ་རལ་བུའི་སྟེང་ན་རིན་པོ་ཆེ་དང་རྡོ་རྗེ་ཕྱེད་པས་བརྒྱན་པ༔ གཡས་སྦ་ལྕག་དང་གཡོན་ཤེལ་ཕྲེང་འདྲེན་པ༔ འཁོར་སྣང་སྲིད་ཀྱི་ལྷ་འདྲེས་བསྐོར་བར་བསྒོམས་ལ༔ སྲོག་སྙིང་བཟླ་བ་ནི༔ ཨོཾ་བཛྲ་ཐང་ཀ་ར་མུན་ཀ་ར་མུན་ཉིད་ཁུ་ཤ་ལི་ཛ་ཛ༔ ས་མ་ཡ་ཧཱུྃ་ཕཊ༔ མཚན་སྔགས་བཟླས་ཀྱང་རུང་སྟེ༔ ཨོཾ་ཨཱཿཧཱུྃ་ཧཿ བཛྲ་འབར་བ་རྩལ་སརྦ་སིདྡྷི་ཧཱུྃ༔ དེས་འགྲུབ་བོ༔ བཀའ་གཏད་ནི་གནམ་ཆོས་དྲེགས་པའི་སྲོག་དབང་ལུགས་སུ་བྱའོ༔ ལྕགས་ཕུར་གཅིག་གི་མགུལ་དུ་ཉུང་དཀར་ཐུམ་བུ་གཅིག་རྩ་སྔགས་ཀྱིས་སྔགས་ལ་བཏགས༔ གཡག་གཅིག་བཅའ་ལ་བཞག༔ དེ་ནས་དུས་བཞི་ཕུར་པ་ཀླད་ལ་བསྐོར་བས་གཉན་ཆེན་གྲངས་མེད་བཀུག་གཡག་ལ་བསྟིམས་པས་གཡག་དེ་ངུར་བར་བསྒོམ༔ དེ་ནས་འདྲིལ་བས་ཕུར་པ་དེ་ལས་ལྕགས་སྡིག་གྲངས་མེད་འཕྲོས་ཤིང་གཡག་དེས་གནམ་ས་གང་བ་ཁ་
རླངས་སྤྲིན་ང་རོ་འབྲུག་ཏུ་ངུར་ཞིང་རྒྱལ་འགོང་དམ་སྲི་ཐམས་ཅད་བདས་ནས་བསད་པར་བསྒོམ༔ ཨོཾ་བཛྲ་མུན་ཀ་ར་ཉིད་ཁུ་ཤ་ལི་རཱ་ཛ་མཱ་ར་ཡ༔ ཞེས་བཟླས་དམ་སྲི་རྒྱུན་ལམ་བཅད་དོ༔ ཨྠྀི། དགོངས་གཏེར་རམ༔ སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅོ་བརྒྱད་ངོ་མཐོང་བར་དགོངས་གཏེར་རྫོགས་སྐབས་ཡིན་ཡང་བདག་རཱ་ག་ཨ་སྱས་ནན་དུ་གསོལ་བ་བཏབ་པས་དགོངས་གཏེར་ལས༔ ཕབ་ཐུབ་ཙམ་བྱུང་ཞིང་༔ འདི་ལ་ལས་ཚོགས་མང་པོ་གཅིག་ཡོད་པར་གདའ་སྟེ་ཕབ་ནི་མི་ཐུབ་པར་འདུག་གསུངས་སོ༔ འདིར་རྒྱལ་འགོང་གི་བར་ཆད་ཞི་བའི་རྟེན་འབྲེལ་དུ་གྱུར་ཅིག༔