གཉན་ཆེན་པོ་ཐང་ལྷའི་བཀའ་གཏད་སྨྱོ་འདུལ་རྒོད་ཀྱི་འགྲིམ་ཤུལ།
གཉན་ཆེན་པོ་ཐང་ལྷའི་བཀའ་གཏད་སྨྱོ་འདུལ་རྒོད་ཀྱི་འགྲིམ་ཤུལ་ཞེས་བྱ་བ་བཞུགས་སོ།།
གུ་རུ་རིན་པོ་ཆེ་ལ་ཕྱག་འཚལ་ལོ། །དུས་སྙིགས་མའི་སྐབས་སུ་རྒྱལ་འགོང་དམ་སྲིའི་གནོད་པས། སྲོག་རླུང་སོགས་བརྒྱལ་གཟེར་བྱུང་བ་ལ། སྨྱོན་པ་སོགས་འདུལ་བའི་ཕྱིར་གཉན་ཆེན་ཐང་ལྷའི་བཀའ་གཏད་བྱ་བ་ནི། སློབ་དཔོན་པདྨ་འབྱུང་གནས་ཀྱིས་བསམ་ཡས་དཀོར་བདག་འདུལ་བའི་དོན་དུ་མཛད། སྨྱོ་འདུལ་རྒོད་ཀྱི་འགྲིམ་ཤུལ་ཞེས་བྱ་བའི་ཕྱག་ལེན་ནི། གཞི་དཀར་པོའི་སྟེང་དུ་འབྲུ་ཡི་ཚོམ་བུ་བཀོད། རིན་པོ་ཆེའི་སྣོད་དུ་གཏོར་མ་གྲུ་གང་ངམ་རྐང་གང་མཐོ་གང་གྲུ་བཞི་རྩེ་རྒྱལ་ཉི་ཟླ་ནོར་བུས་མཚན་པ་བཞག །ཕུད་ཕོར་དུ་ཆང་ཕུད་དམ་ཇ་ཕུད་གཙང་མ་བཤམས། རང་ཉིད་ཕྱག་རྡོར་དུ་བསྐྱེད་ལ། རྒྱས་པར་ན་སྔོན་དུ་གསོལ་ཀ་རྒྱས་པར་བཏང་ཞིང་། ཨོ། དྲི་ཟའི་རྒྱལ་པོ། སོགས་ལ་བརྒྱ་ཚར་
སོགས་ཅི་མང་བསོག་ཅིང་། འདིའི་བསྙེན་པ་ཅི་མང་བཟླས་ན་བྱིན་རླབས་ཆེ། དེ་ཙམ་ལོང་མེད་ན་དབང་སྒྲུབ་མི་དགོས་ཏེ། མདུན་དུ་སློབ་མ་འདུག་ཁྲུས་བྱས་མཎྜལ་ཕུལ་ནས། བདག་ཉིད་སྐད་ཅིག་གིས་ངོ་བོ་པདྨ་འབྱུང་གནས་ལ་རྣམ་པ་ཕྱག་ན་རྡོ་རྗེ་དྲེགས་པ་ཀུན་འདུལ་སྐུ་མདོག་མཐིང་ནག་ཞལ་གཅིག་ཕྱག་གཉིས་སྤྱན་གསུམ་མཆེ་བ་རྣམ་པར་གཙིགས་པ། ཕྱག་གཡས་གནམ་ལྕགས་ཀྱི་རྡོ་རྗེ་ཕྱར་ཞིང་གཡོན་སྡིགས་མཛུབ་མཛད་པ། ཁྲོ་བོའི་ཆས་ཐམས་ཅད་དང་ལྡན་པ། དེ་ལྟ་བུར་བསྒོམས་ལ་དེའི་དྲུང་དུ་གསོལ་བ་འདེབས་པ་འདིའི་རྗེས་ཟློས་མཛོད། རྡོ་རྗེ་འཛིན་པ་དགོངས་སུ་གསོལ། །སངས་
རྒྱས་བསྟན་པ་བསྲུང་བ་དང་། །རྒྱལ་འགོང་གནོད་པ་ཞི་བའི་ཕྱིར། །ཇོ་བོ་གཉན་ཆེན་ཐང་ལྷ་ཡི། །སྨྱོ་འདུལ་རྒོད་ཀྱི་འགྲིམ་ཤུལ་གྱི། །བཀའ་གཏད་བདག་ལ་བསྩལ་དུ་གསོལ། །ལན་གསུམ་བརྗོད། འོ་ན་འདིའི་ལོ་རྒྱུས་ཟུར་ཙམ་ཞུ་ན། ཨོ་རྒྱན་ཆེན་པོ་བོད་དུ་བྱོན་དུས་ཐང་ལྷས་ཁ་བ་ཕབ། བུ་ཡུག་འཚུབ། སྨུག་པས་ལམ་དགགས་པས་སློབ་དཔོན་ཕྱག་ན་རྡོ་རྗེའི་སྐུར་བཞེངས་པས་ཐང་ལྷ་བཏུལ་བས་སྲོག་སྙིང་དང་གསང་མཚན་ཕུལ་ལོ། །དེ་ནས་བསམ་ཡས་ཧས་པོ་རིར་བྱོན་དུས་ཐང་ལྷས་གཡག་དཀར་པོ་ར་ནམ་མཁའི་མཐོངས་ལ་ཡེ་རེ་བ་གཅིག་བཞིས་རུ་བཞིས་ས་བདུད་གནོན་པ་ཞིག་བྱས་ནས་སློབ་དཔོན་གྱི་རྗེས་ནས་ཚུར་བྱུང་བ། ཁྲི་སྲོང་ལྡེའུ་བཙན་མཐོང་བ་དང་། སྐྱེས་བུ་བཞིན་བཟང་ཟུར་ཕུད་ལྔས་བརྒྱན་པ་གཅིག་བྱས་ནས་རྒྱལ་པོ་ལ་ཕྱག་དང་ཞེ་ས་ཕུལ་ནས་ཁྲི་སྲོང་ལ་དགའ་ཚུལ་སྨྲས། བདག་དམ་ཚིག་ཉམས་པའི་སྲོག་བདུད་དམ་ཚིག་ཉམས་པའི་གཤེད་མ། གྲིབ་གནོན་མ་རབ་རྣམས་ཀྱི་གཉའ་ནོན། སྨྱོ་འདྲེ་རྒྱལ་འགོང་གི་གཉན་པོ་ཞེས་དང་། བདག་གི་ཕྲིན་ལས་སྨྱོ་འདྲེ་འདུལ་ཞིང་སྡང་བའི་དགྲ་བོ་གསོད་པ་ལགས་སོ། །ཞེས་སོགས་
ཞུས་སོ། །དེ་ནས་རྒྱལ་པོས་ཀྱི་སློབ་དཔོན་བདག་རིགས་མཐོ་བས་རྗེས་སུ་མི་འབྲངས་ཤིང་གཞན་ལ་མི་གནོད་པ། དོན་ཡེ་ཤེས་པ་ཡིན་པས་ཕྱི་མ་བདེ་གནས་སུ་འདྲེན་ནུས་པ། ཚུལ་འཇིག་རྟེན་པ་དང་མཐུན་པས་ཕྲིན་ལས་རྣམ་པ་བཞི་ཐོགས་པ་མེད་པར་སྒྲུབ་ནུས་པ། སྙིང་ཉེ་ཞིང་དམ་ཚིག་ལ་གནས་པས་བདག་གི་རྗེ་འབངས་བརྒྱུད་པ་དང་བཅས་པ་འབྲལ་མེད་བུ་བཞིན་སྐྱོང་བ། མཐུ་རྩལ་ཐོགས་པ་མེད་པས་སྨྱོ་འདྲེ་དང་རྒྱལ་འགོང་མངོན་སུམ་དུ་འདུལ་བ། བདག་ཆོས་སྐྱོང་བའི་སྲོག་ལྷ་བཅངས་ཐུབ་པ་གཅིག་བརྩེ་བས་གནང་བ་ཞུ་ཞུས་པས། སློབ་དཔོན་ཆེན་པོའི་ཞལ་ནས། སྤྱིར་བོད་ཀྱི་ལྷ་སྲིན་ཕལ་ཆེ་བ་ནི། སྡེ་བརྒྱད་གནོད་སྦྱིན་གདུག་པ་ཅན་གྱི་རིགས་ཡིན་པས། རྒྱལ་པོའི་སྐུ་༔ ལྷ་མི་ཉན་ཡང་། ལྷ་ཆེན་པོ་ཐང་ལྷ་ནི། སྔོན་སངས་རྒྱས་མང་པོས་བྱིན་གྱིས་བརླབས་ཤིང་ས་ལ་གནས་ཤིང་བདེན་པ་མཐོང་བའི་དྲི་ཟའི་རྒྱལ་པོ་ཆེན་པོར་མདོ་ལས་གསུངས་པ་དེ་ཡིན་པས། གོང་གི་ཡོན་ཏན་མ་ལུས་པ་དང་ལྡན་པས། དེ་ཉིད་རྒྱལ་པོའི་སྲོག་ལྷར་བཀོལ་བར་བྱ་གསུངས་ནས། སློབ་དཔོན་རྟ་མགྲིན་གྱི་སྐུར་བཞེངས་ནས། རྒྱལ་པོ་དང་
ཐང་ལྷ་གཉིས་རྟ་མགྲིན་གྱི་དཀྱིལ་འཁོར་དུ་དབང་བསྐུར་དམ་བསྲེས་ནས་འོད་གསལ་ལྷའི་གདུང་རྒྱུད་ཐ་མ་དགུང་ལ་མ་གཤེགས་ཀྱི་བར་དུ་སྐུ་ལྷ་གྱིས་ཤིག །རྒྱལ་པོས་མཆོད་ཅིག་གསུངས༔ དེ་ཡང་བྱང་ཆུབ་སེམས་དཔའ་ནམ་མཁའི་སྙིང་པོའི་རྣམ་པར་འཕྲུལ་པ། དམ་ཅན་ཤེལ་གིང་དཀར་པོའམ་གནམ་ལྷ་བྱང་ཆུབ་སེམས་དཔའམ། ཚངས་པའི་རྒྱལ་པོ་དུང་གི་ཐོར་ཚུགས་ཅན་དྲི་ཟ་ཟུར་ཕུད་ལྔ་པའམ། ཁྱབ་འཇུག་གནམ་མཚོའི་བདག་པོ་སོགས་མིང་དང་རྟེན་གནས་སྐུ་དུ་མར་སྤྲུལ་ནས། སངས་རྒྱས་ཀྱི་བསྟན་པ་སྐྱོང་ཞིང་ཁྱད་པར་སྙིགས་མའི་དུས་སུ་ནད་དང་སྡེ་བརྒྱད་ཀུན་གྱི་སྣ་འདྲེན་རྒྱབ་རྟེན་རྒྱལ་པོ་བེ་དཀར་གྱིས་བྱས་ནས། དང་པོ་ཕོ་ལྷར་བསྟེན་ནས་ཕྱིས་རྒྱུད་སྒྲུབ་འདྲེར་འབྲངས། ཐ་མ་དབུགས་ལེན་སྲོག་བདུད་ཀྱི་འཁྱོར་འདྲེ་བྱེད་ཅིང་མི་རབས་ཚུན་ཆད་ཕུང་བར་བྱེད་ཅིང་། དེ་ནི་རུ་ང་ཕྲག་དོག་ཆོ་འཕྲུལ་ཆེ། ཁྱད་པར་སྐྱེ་བོ་ཀུན་གྱི་སྙིང་ལ་ཞུགས་ནས། བརྒྱལ་ནད་སྙིང་གཟེར་སྨྱོ་འབོག་སྙིང་རླུང་སྟོད་འཚང་སྨུག་འཆལ་བརྒྱལ་གཟེར་འཁྲུག་ལོང་སོགས་ཀྱིས་བོད་ཁམས་ཕུང་བར་བྱེད་པའི་དུས་སུ། དེ་ཡི་གཉེན་པོར་ངོ་བོ་ཡེ་ཤེས་ཀྱི་ལྷ་ལ་རྣམ་པ་
འཇིག་རྟེན་པའི་ཚུལ་འཛིན་པ་དེ་དང་མཐུན་པ་གཅིག་གིས་འདུལ་དགོས་པའི་ཕྱིར། ཨོ་རྒྱན་བདག་གིས་ལྷ་ཆེན་འདི་ཡི་སྒྲུབ་སྐོར་བསྟན། འདི་མཆོད་ན་རྣལ་འབྱོར་པའི་མགོན་དང་སྲུང་མ་བྱེད། སྡེ་པ་ཆོས་ལ་དཀར་བ་རྣམས་ཀྱི་མགོན་སྐྱབས་དགྲ་བླར་འགྱུར་རོ། །ལྷག་པར་ཡང་རྗེ་དཔོན་རིགས་མཐོ་བ་ཀུན་གྱི་དགྲ་ལྷར་བསྟེན་ན་བཀྲ་ཤིས་རྟགས་མཚན་ཆེ། ལུས་དང་གྲིབ་མ་བཞིན་དུ་འགྲོགས་ནས། ཕྲིན་ལས་དགོས་འདོད་ཡིན་བཞིན་དུ་བསྒྲུབ་བོ། །བསྒྲུབ་ན་མི་འགྲུབ་མི་སྲིད་དོ། །འདི་ནི་སྲིད་པ་གསུམ་གྱི་བདག་པོ་ཡིན་པས་གབ་ཅིང་སྦས་ནས་གསང་བའི་ཆོས་སྐྱོང་དུ་བསྟེན་ན་གཞན་གྱི་ཆོས་སྐྱོང་དམ་ཅན་ཕོ་མོ་ཀུན་གྱི་ནུས་པ་ཚུར་འཕྲོག་ཅིང་། དམ་ཅན་དྲེགས་པ་ཐམས་ཅད་འདི་ཡི་བཀའ་འོག་ན་ཡོད་པས། རྒྱལ་པོ་དམ་ལ་ཐོགས་ནས་བློན་འབངས་ཞོར་ལ་འདུ་བ་དང་འདྲའོ། །འོན་ཀྱང་འདི་ཤིན་ཏུ་གཉན་པས་གཞན་ལ་མིང་ཙམ་མི་སྨྲ་བར་ཤིན་ཏུ་གསང་ཞིང་རབ་ཏུ་སྦས་ནས་བསྟེན་པ་དང་། བླ་མ་དང་དམ་ཚིག་མི་ཉམས་པ་རྣམས་ནི་འདི་ཡི་བཀའ་རྒྱ་དམ་ཚིག་ཡིན་ནོ། ཁྱད་པར་དམ་ཚིག་ཏུ་མཛེ་ཕོ་ནལ་ཕྲུག་སོགས་གྲིབ་ཆེན་ལ་
འཛེམ། འདི་ཞུ་སའི་བླ་མ་དམ་ཚིག་སེལ་མེད་ཅིང་། ལྷ་ཆེན་གནད་གཟིར་ཡིན་པས་དམ་ལྡན་རེ་རེ་ལའང་གཅིག་བརྒྱུད་བྱེད། དེས་ཀྱང་ཚུལ་བཞིན་བསྟེན་པ་ལས། ཀུན་ལ་འཆོལ་བར་སྤེལ་ན་འཁུ་ལྡོག་མངོན་སུམ་དུ་བྱེད་དོ། །དེ་ལྟ་བུའི་བཀའ་གཏད་གཉན་པོ་ཞུ་བའི་ཕྱིར་མཎྜལ་ཕུལ། དེ་ནས་གཞུང་གི་གཏོར་མ་བྲན་ལ་གསོལ་མཆོད་བསྟོད་པ་བསྐུལ་ཐུང་ཡན་ཆོད་བྱས་ལ། རྔ་རོལ་མོ་གསེར་སྐྱེམས་ནམ་མཁའ་ལ་གཏོར། དེ་ནས་རྔ་རོལ་མོ་སྒྱུར་ལ། དེ་ནས་ངེད་རང་གསང་བདག་དྲེགས་པ་ཀུན་འདུལ་དུ་གསལ། མདུན་གྱི་ཐང་ལྷ་འོད་དུ་ཞུ་ནས་གཏོར་མ་དང་དབྱེར་མེད་པ་ལ། སྐད་ཅིག་གིས་གཏོར་མ་ལྷ་ཆེན་ཐང་ལྷའི་ངོ་བོ་ལ། རྣམ་པ་འབྲོང་གཡག་ཞོལ་ཅན་དཀར། །ལུས་ནི་རི་ཙམ་རྭ་གཉིས་ནི། །ཐང་ཤིང་བརྐྱང་ཙམ་ཤིན་ཏུ་རྣོ། །ཁ་རླངས་ན་བུན་ལྟར་འཐིབས་ཤིང་། །ངུར་སྒྲ་འབྲུག་ལྟར་སྒྲོག་པ་ལ། །གནམ་ལྕགས་འཆོལ་པོ་མེ་ལྟར་འབར། །འཇིགས་ཤིང་ཡ་ངའི་སྐུར་གྱུར་པ། །ཁྱེད་རང་རྣམས་ལ་གནོད་པ་ཡི། །དཀོར་བདག་རྒྱལ་པོ་གནོད་བྱེད་དེ། །མི་རིང་སྐྱ་བོ་སྤྲེའུ་ཆུང་། །ཤ་དང་རུས་པའི་གཟུགས་གྱུར་པའི། །སྟེང་དུ་འཁྲབ་བརྫིས་ནང་གྲོལ་རྣམས། །
དམར་དང་ལྡིར་ལྡིར་ཕྱིར་དོན་པ། །གློག་འདྲའི་ལྕེས་ལྡག་ཤ་ལྤགས་ཟུལ། །རུས་པ་དཀར་དང་ལྷང་ངེ་དེ། །གཞོབ་དང་ཐུལ་ཐུལ་ཚིག་པར་བསམ། །དེ་ནས་རང་ཉིད་གསང་བདག་གི་ང་རྒྱལ་དྲག་པོ་བྱས། ལག་པ་གཡོན་པས་ནད་པའི་སྲིན་ལག་ནས་བཟུང་། གཡས་པས་རྡོ་རྗེ་དང་བཅས་ཏེ་ཐང་ལྷའི་གཏོར་མ་མགོ་བོར་བཞག་ནས་འདོན་རྒྱུ་ཡིན་ཏེ། སྨྱོ་རྒོད་རེད་ན་ཡུན་རིང་པོ་འདུག་མི་ཐུབ་ན་བསྐུལ་པ་བཏོན་ནས་སྔགས་བརྗོད་ཚེ་སྲིན་མཛུབ་ནས་འཇུ་བ་དང་། གཏོར་མ་མགོར་བཞག་པས་ཆོག །གང་ལྟར་ཡང་གྲྭ་པ་ཡོད་ན་རམ་བུ་མཉམ་དུ་གྱེར་ཞིང་རྔ་རོལ་མོ་བྱའོ། །སྔགས་བརྗོད་ཚེ་རོལ་མོ་དྲག་ཏུ་བརྡུངས་བྱས་ཤིང་། འདིར་གཏོར་རྒྱག་དང་འདྲ་སྟེ་དོན་ལ་དྲག་ལས་ཡིན། ཧཱུྃ་ཧཱུྃ་ཧཱུྃ༔ བཞུགས་ཡུལ་འདམ་ཤོད་སྣར་མོ་ནས། སོགས་ནས། ཨོཾ་ཀྲོ་ཏ་ན་ཤི་ལི་མི་ལི་དུ་བགེགས་མཱ་ར་ཡ་ཕཊ༔ བདུན་དང་། ཨོཾ་ཨཱཿཧཱུྃ་ཧྲཱིཿབཛྲ་འབར་བ་རྩལ་བིགྷན་རཱ་ཛ་མཱ་ར་ཡ་ཕཊ༔ བདུན་གཉིས་ཙམ་བརྗོད། ཡང་དམིགས་པ་ནི། ཡང་གཏོར་མ་ལྷ་ཆེན་ཐང་ལྷ་ལ། །རྣམ་པ་དུང་ཁྲ་མཁའ་ལྡིང་ཙམ། ནམ་མཁའི་དབྱིངས་ནས་གཟན་ལ་འཇུམ། །རྒྱལ་པོ་བྱ་དཀར་ཕུག་རོན་འདྲ། །ཙིར་གྱིས་བཟུང་ནས་སྤུ་བཏོན་ནོ། །དུང་ཁྲས་བསད་ནས་ཟོས་པར་བསྒོམ། །གོང་ལྟར་བསྐུལ་ཚར་
གཅིག་དང་སྔགས་རྣམས་བརྗོད། ཡང་ནི་གཏོར་མ་ལྕགས་སྡིག་ནི། །ནག་པོ་ལུས་ཀྱིས་ས་གཞི་ཁྱབ། །རྭ་དང་མཇུག་མ་ནམ་མཁར་གདེངས། །ཁ་ནས་འོད་ཟེར་ལྕགས་དྲག་ལྟར། །འཕྲོས་པས་དཀོར་བདག་དེ་ནང་བཙུད། །དེ་ཉིད་འུབ་ཀྱིས་ཚུར་དྲངས་ནས། །སྙིང་ནི་དཀར་ནག་མཚམས་དེ་རུ། །ལྕགས་ཀྱི་མཆེ་བས་བཏབ་བྱས་ནས། །ལུས་ཕྱེད་མན་ཆད་ཁོག་པར་ཚུད། །དེ་ལྟར་རྩེ་གཅིག་སྒོམ་མཛོད་ཅིག །ཡང་བསྐུལ་པ་སྔོན་ལྟར་བསྐུལ་དང་སྔགས་རྣམས་བརྗོད། དེ་ལྟར་ལན་གསུམ་ཚར་ནས། ད་ནི་སློབ་དཔོན་གསང་བདག་ཏུ་གསལ་བས་གཏོར་མ་སྐད་ཅིག་གིས་ཐང་ལྷ་དངོས་སུ་གསལ་བ་ལ་བཀའ་བསྒོས་པས་དེ་ལྟར་བགྱིའོ་ཞེས་ཁས་བླངས་པར་སྒོམས་ཤིག །གཏོར་མ་མགོར་བཞག་ལ། ཧོ་དགོངས་སུ་གསོལ་ལོ། །བྱང་ཆུབ་སེམས་དཔའ་ནམ་མཁའི་སྙིང་པོའི་སྤྲུལ་པ། ས་བརྒྱད་ནོན་པའི་སེམས་དཔའ། ངོ་བོ་ཡེ་ཤེས་ཀྱི་ལྷ་ལ་ཚུལ་འཇིག་རྟེན་པ་དང་མཐུན་པ་གནམ་ལྷ་བྱང་ཆུབ་སེམས་དཔའ། དམ་ཅན་ཤེལ་གིང་དཀར་པོ། གནམ་ཐིལ་དཀར་པོ། ཚངས་པའི་རྒྱལ་པོ་དུང་གི་ཐོར་ཚུགས་ཅན། དྲི་ཟའི་རྒྱལ་པོ་རབ་དགའ། དྲི་ཟ་ཟུར་ཕུད་ལྔ་
པ། ཁྱབ་འཇུག་གནམ་མཚོའི་བདག་པོ། གཉན་ཆེན་ཐང་ལྷ་ཡར་བཞུད་ཁྱོད་ཀྱིས་སྔོན་སློབ་དཔོན་པདྨ་འབྱུང་གནས་ཀྱི་སྤྱན་སྔར་ཕྲིན་ལས་སུ་སྨྱོ་བའི་འདྲེ་འདུལ་བར་ཁས་བླངས། དེའི་ཚེ་སློབ་དཔོན་གྱིས་སྨྱོ་འདྲེ་རྒྱལ་འགོང་གི་ཁ་གནོན་དུ་ཁྱེད་བསྐོས་པའི་དམ་ཚིག་དྲན་པར་གྱིས། བསྲུང་བྱ་ནད་པ་འདི་སློབ་དཔོན་པདྨ་འབྱུང་གནས་བས་ཞུས་ཤིང་ཁྱོད་ལ་བཅོལ་བ་ཡིན་པས། ཉི་མ་དེ་རིང་ཕྱིན་ཆད་ནས་སྨྱོ་འདྲེ་རྒྱལ་འགོང་གིས་གནོད་པས་མི་ཚུགས་པར་སྲུངས་ཤིག་སྐྱོབས་ཤིག །ཨོཾ་ཨཱཿཧཱུྃ་ཧྲཱིབཛྲ་འབར་ཚྭ་ཧཱུྃ་བཛྲ་རཀྵ་རཀྵ་ཀུ་རུ་ཡེ་སྭཱ་ཧཱཿ བགེགས་རིགས་སྟོང་ཕྲག་བརྒྱད་ཅུ་ཞི་བ་དང་། །སོགས་ཤིས་པ་བརྗོད། འོ་དེས་ཐང་ལྷའི་སྨོ་འདུལ་རྒོད་ཀྱི་འགྲིམ་ཤུལ་ཞེས་བྱ་བ་ཐོབ་པ་ཡིན་པས། དེ་རིང་ཕྱིན་ཆད་ཨོ་རྒྱན་པདྨ་བླ་མར་བཟུང་། རྟ་མགྲིན་ཡི་དམ་དུ་བཟུང་། ཐང་ལྷ་འདི་ཆོས་སྐྱོང་དུ་བཟུང་སྙམ་པས་འདིའི་རྗེས་ཟློས་མཛོད། གཙོ་བོས་ཇི་ལྟར་བཀའ་སྩལ་པ། །སོགས། དེ་ནས་རྟེན་ཕྱིར་དར་སོགས་ཡོད་ན་དེ་ལ་ཐིམ་པར་བསམ། མེད་ན་གཏོར་མ་ཕྱི་རོལ་ལ་འབུལ་རྒྱུ་བསྐུར་ལ། བཛྲ་མུ༔ ཞེས་རང་གནས་སུ་གཤེགས་པར་བསམ། གལ་ཏེ་རང་ལ་རྒྱལ་འགོང་
གི་གནོད་པ་སོགས་བྱུང་ན་གསོལ་ཀ་དང་བསྐུལ་པ་སོགས་ཐོན་ཀྱང་ལེགས། མ་ཐོན་ཀྱང་རུང་སྟེ། རང་ཉིད་སྐད་ཅིག་དྲན་རྫོགས་སུ་ངོ་བོ་ཐང་ལྷ་ཡིན་པ་ལ་རྣམ་པ་གོང་དུ་བཤད་པའི་གཡག་དང་ལྕགས་སྡིག་སོགས་སུ་བསྒོམས་ནས། མཱ་ར་ཡ་ཞེས་པའི་སྔགས་ཅི་འགྲུབ་བཟླས་པས་ཆོག་གོ །འདི་མཆོད་པར་ལྷ་རིགས་དམན་པ་དང་ནག་པོའི་ཕྱོགས་སུ་གཏོགས་པ་རྣམས་གསོལ་མཆོད་མི་བྱེད། དུས་ཀྱི་གཏོར་མ་མི་ཆག་པ་དམ་ཚིག་གོ །ལྷ་མཆོག་སྲིད་གསུམ་བདག་པོ་ཆེ། །སྒྲུབ་ཐབས་ཡང་གསང་སྲོག་སྙིང་འདི། །ནུབ་ཕྱོགས་དབང་གི་སྲུང་མར་སྦས། །གཅིག་བརྒྱུད་མིང་ཙམ་མ་སྨྲ་སྦོས། །ཀུན་ལ་འཆོལ་བར་སྤེལ་བྱེད་ན། །སྡེ་བརྒྱད་ཤན་པ་དམར་པོ་ཡིས། །དམ་མེད་མི་ཤེས་སྲོག་ལུས་ཕྲོལ། །ཞེས་གསུངས་པའི་ཕྱིར། འདི་ཡི་བཀའ་གཏད་སྲོག་དབང་ནི། །རེ་ཟུང་ཙམ་ལས་བསྐུར་འདོག་མེད། །སྒྲུབ་ཐབས་མན་ངག་ཀྱང་དེ་དང་འདྲ། གསོལ་ཁ་དང་གཏོར་བསྔོས་ནི་དེ་ཙམ་མི་དགོས་ཏེ། གཡར་ཁ་ལུང་རྒྱུན་དམ་པར་བྱའོ། །སྨྱོ་འདུལ་གྱི་བཀའ་གཏད་འདི་ནི་བཀའ་རྒྱ་ཡོད་དེ། ནད་པ་སོགས་གལ་ཆེན་མ་གཏོགས་མང་པོ་ལ་མི་བྱ། ཞེས་པ་འདི་ཉིད་སྙིགས་དུས་རྒྱལ་འགོང་དང་། སྲོག་རླུང་གི་ནད་མང་དུ་དར་དུས། དེ་ལ་ཕན་པའི་ཕྱིར། རཱ་ག་ཨ་སྱས་བསྒྲིགས་པའི་ཡི་གེ་པ་ནི་བརྩོན་འགྲུས་ཏེ། ཉེས་འགལ་གང་མཆིས་ལྷ་ཆེན་ཉིད་ལ་བཤགས། དགེ་བས་འདིའི་འབྲེལ་པ་ཐོགས་ཚད་ལུས་སེམས་བདེ་བ་དང་ལྡན་པར་གྱུར་ཅིག །སརྦ་མངྒ་ལཾ། བཀྲ་ཤིས། དགེའོ།། །།