རྡོ་རྗེ་འབར་བ་རྩལ་སྒྲུབ་པའི་ཟིན་བྲིས།
རྡོ་རྗེ་འབར་བ་རྩལ་སྒྲུབ་པའི་ཟིན་བྲིས་སོཿ
ན་མོ་པདྨ་བཛྲ་ཡེ༔ པད་འབྱུང་སྤྲུལ་པར་བཅས་ལ་ཕྱག་འཚལ་ལོ༔ དགོངས་གཏེར་ཐང་ལྷ་སྒྲུབ་པའི་ཟིན་བྲིས་བྲི༔ ཕྱིང་དཀར་སྟེང་དུ་རས་དཀར་དྲི་མེད་ལ༔ དྲི་ཞིམ་སྨན་སྣ་བྱུགས་ཏེ་བཏིང་བའི་སྟེང་༔ དཔེའུ་རིས་བཞིན་དུ་དཀྱིལ་འཁོར་བྲི་བའམ༔ མ་འཛོམས་འབྲུ་ཡིས་དེ་ལྟར་བྲིས་ཀྱང་ཆོག༔ དེ་སྟེང་རིན་ཆེན་སྣོད་གཙང་ནང་དུ་ནི༔ དཔེའུ་རིས་བཞིན་དུ་རྟེན་གཏོར་བཅའ་ལ་བཞག༔ རྟེན་གཏོར་ཚད་ནི་ཁྲུ་གང་རྐང་གང་ངམ༔ མ་འཛོམས་མཐོ་གང་གིས་ཀྱང་ཆོག་པར་བཤད༔ དེ་མདུན་རྒྱུན་གཏོར་ཟུར་གསུམ་མཐོ་གང་པ༔ མེ་ཏོག་པདྨ་དམར་པོས་བརྒྱན་པ་བཤམས༔ གཡག་ལུག་ར་གསུམ་ཕྱེ་མར་ཇ་ཆང་ཕུད༔ ལྕགས་ཕུར་མགུལ་དུ་ཡུངས་ཀར་ཐུམ་བུར་བཏགས༔ བྲིས་པའི་གཡག་གམ་ཡང་ན་
འདག་ལས་བཅའ༔ མདའ་དར་གོ་མཚོན་སྤྱན་གཟིགས་མང་པོ་བཤམས༔ ཤིང་སྣ་སྤོས་དཀར་དུད་པས་རོལ་མོ་བྱ༔ དེ་དག་སྤོས་རུམ་བྱས་ལ་ཆུ་གཙང་བྲན༔ དེ་ནས་རྟ་མགྲིན་བདག་བསྐྱེད་བསྒོམས་པའི་རྗེསཿ སྐུ་གཟུགས་མདུན་བསྐྱེད་དབྱེར་མེད་ཐང་ལྷ་བསྒོམས༔ ལས་བྱང་བཞིན་དུ་བསྐུལ་པ་མ་གཏོགས་འདོན༔ ཁཱ་ཧི་སྭཱ་ཧཱའི་མཇུག་ཏུ་ཕུད་རྒོད་དང་༔ མེད་ན་ཆུ་གཙང་འབྲུ་བཏབ་ནམ་མཁར་གཏོར༔ མཆོད་གཞིའི་མཐའ་རུ་ཡོན་ཆབ་མང་པོ་བཤམས༔ རང་གི་ཐུགས་ལས་འོད་ཟེར་འཕྲོས་པ་ཡིས༔ མདུན་བསྐྱེད་ཐང་ལྷའི་ཐུགས་ཀར་ཕོག་པ་དང་༔ ཐང་ལྷའི་ཐུགས་ཀར་ཟླ་བའི་དཀྱིལ་འཁོར་སྟེང༔ ཨཱཿཡིག་དཀར་པོའི་མཐའ་ལ་སྔགས་གཡས་བསྐོར་དེ་
ལས་འོད་ཟེར་དཀར་པོ་ནུབ་ཕྱོགས་འཕྲོས༔ དབུ་རུ་བྱང་ཕྱོགས་ཐང་ལྷའི་གངས་རི་ནས༔ ཐང་ལྷའི་སྐུ་ནི་ཆེ་ཆུང་སྣ་ཚོགས་པ༔ དམག་ཆེན་གཤར་བཞིན་བར་སྣང་ཁམས་ནས་བྱོན༔ མདུན་བསྐྱེད་ལ་ཐིམ་དབྱེར་མེད་གཅིག་ཏུ་གྱུར༔ རྟེན་གཏོར་འདོད་པའི་ཡོན་ཏན་སྣ་ཚོགས་དང་༔ རྟག་གཏོར་བདུད་རྩིའི་རྒྱ་མཚོ་གསོལ་བས་མཉེས༔ བདག་ལ་དགའ་ཞིང་གུས་འདུད་དང་བཅས་ནས༔ སློབ་དཔོན་པདྨའི་རྗེས་འཇུག་ཁྱེད་ཉིད་ཀྱིས༔ ཅི་གསུངས་བཀའ་ཉན་གསུང་སྡོད་ཕྲིན་ལས་སྒྲུབས༔ ཁྱད་པར་བདག་གིས་སྔོན་ཚེ་ཚེ༔ དམ་བཅས་ལྟར༔ ཁྱེད་ཅག་སློབ་དཔོན་མི་ནོར་འཁོར་བཅས་ལ༔ རྒྱལ་འགོང་དམ་སྲིའི་གནོད་པ་མ་ལུས་བསྲུང་༔ དེ་སྐད་ཡང་ཡང་གསུངས་ཤིང་ཁས་བླངས་བསྒོམ༔ ཨོཾ་ཨཱཿཧཱུྃ་ཧྲཱིབཛྲ་འབར་བ་རྩལ་སརྦ་སིདྡྷི་ཧཱུྃ༔ ཞེས་བཟླ་ཐུན་བཞིར་ལས་བྱང་གསོལ་ཁ་བྱ༔ སྔགས་གྲངས་འབུམ་ཡིན་ཞག་ནི་གསུམ་མམ་ལ༔ རྟགས་ནི་དཔོན་རིགས་སྐྱ་པ་ཆས་བཟང་དང་༔ དམག་དང་ཚོང་དཔོན་ལ་སོགས་འདུ་འཚོགས་མང་༔ གངས་རི་གཡག་དཀར་ལུག་ཁྱུ་ལ་སོགས་རྨིས༔ དེ་ནས་སྒྲུབ་པ་ཞག་པོ་གཅིག་བྱ་སྟེ༔ ཐུན་བཞི་ལྕགས་ཕུར་ཀླད་ལ་གཡུག་བྱས་ཏེ༔ ཐང་ལྷ་གྲངས་མེད་སྤྱན་དྲངས་གཡག་ལ་བསྟིམ༔
གཡག་དེ་ངུར་ཞིང་ཇེ་ཆེ་ཇེ་ཆེར་ཚར༔ གནམ་ས་གང་ཞིང་ཁ་རླངས་སྤྲིན་དུ་འཐིབས༔ ང་རོ་འབྲུག་ལྟར་ངུར་ཞིང་བྲོ་འཁྲབས་པས༔ རྨིག་བཞི་ཐོག་གི་རང་བཞིན་བྲོ་འཁྲབས་པས༔ བདག་ཅག་འཁོར་དང་བཅས་ལ་གནོད་པ་ཡི༔ རྒྱལ་འགོང་དམ་སྲི་སྨྱོ་འདྲེ་ཐམས་ཅད་ནི༔ མི་སྐྱ་བན་གཟུགས་བུ་ཆུང་སྤྲེའུ་རྣམས༔ རོ་ངན་འཆི་ལ་ཁད་དུ་གནས་པའི་སྟེང་༔ གཡག་གིས་བྲོ་འཁྲབ་བརྗེས་པས་ནང་ཁྲོལ་རྣམས༔ དམར་དང་ཇིར་ཇིར་ཕྱི་རུ་བུད་པ་དེ༔ ལྕེ་ནི་མེ་ཡི་རང་བཞིན་གློག་ལྟ་བུས༔ ལྡག་པས་ཤ་དང་པགས་པ་ཀུན་ཟད་ནས༔ རུས་པ་སྐྱ་དང་ལྷག་ལྷག་བྱུང་བར་བསྒོམ༔ མཐར་ནི་གཡག་གི་ཁ་རླངས་མེ་དཔུང་གིས༔ རུས་པའང་གཞོབ་ཏུ་བསྲེགས་ནས་རྗེས་མེད་གྱུར་ཨཱཿཧཱུྃ་ཧཱུྃ༔ བཛྲ་འབར་བ་རྩལ་བིགྷཱན་རཱ་ཛ་མཱ་ར་ཡ་ཕཊ༔ དེ་ལ་འདི་སྐབས་ཞག་གཅིག་བྱ་བ་སྟེ༔ དེ་ནས་དུས་བཞིར་ལྕགས་ཕུར་ཀླད་ལ་གཡུག༔ ལྕགས་ཕུར་དེ་ལས་ཐང་ལྷའི་སྤྲུལ་པ་ནི༔ དུང་ཁྲ་དཀར་པོས་ནམ་མཁའི་བར་སྣང་གང་༔ ལྕགས་ཀྱི་སྡིག་པས་ས་གཞི་ཐམས་ཅད་གང་༔ རང་ལ་གནོད་པའི་རྒྱལ་འགོང་དམ་སྲི་ནི༔ བྱ་དཀར་དེ་ཕོའི་རྣམ་པར་འཕུར་བ་དེ༔
དུང་ཁྲ་དཀར་པོ་ཁྱུང་ཙམ་མང་པོ་ཡིས༔ ཇིར་གྱིས་བཟུང་ནས་སྤུ་བཏོན་ཟ་བར་བསྒོམ༔ ལྕགས་ཀྱི་སྡིག་པའི་ལུས་ཀྱིས་ས་གཞི་ཁྱབ༔ རྭ་དང་མཇུག་མ་ནམ་མཁར་གདེངས་པ། སྟེ༔ ཁ་ནས་འོད་ཟེར་ལྕགས་དྲ་ལྟ་བུར་འཕྲོས༔ རྒྱལ་འགོང་བཙུན་གཟུགས་ཐམས་ཅད་དེ་ནང་བཙུད༔ ཚུར་དྲངས་སྙིང་དཀར་ནག་མཚམས་སུ་མཆེ་བ་བཏབ༔ མགོ་ནས་སྐེད་པ་ཡན་ཆད་སྡིག་པ་ཡིས༔ ཁ་རུ་བཙུད་ནས་འཆའ་ཞིང་ཡོད་པར་བསྒོམ༔ ཨོཾ་བཛྲ་མུན་ཀ་ར་ཉིད་ཁུ་ཤ་ལི་རཱ་ཛ་མཱ་ར་ཡ༔ ཞེས་པ་དེ་ལ་ཉིན་གཅིག་བཟླས་བྱ་སྟེ། །དང་པོ་དེ་ནི་གཞི་བསྙེན་རྩ་བ་ཡིན། །རྗེས་མ་གཉིས་ནི་ལས་སྦྱོར་རྣམ་གཉིས་ཏེ། །གཞན་ཡང་ལས་ཚོགས་མང་སྟེ་འདིར་མ་སྨོས། །རྒྱལ་འགོང་དམ་སྲི་ཐུབ་རྟགས་རྨི་བའམ། །ཡང་ན་བྲོས་པའི་རྟགས་སུ་འཇའ་ཡལ་འགྲོ། །དེ་ཕྱིར་དམ་སྲིའི་རྒྱུན་ལམ་ཆད་པར་གསུངས། །འཇིག་རྟེན་ལྷ་ནི་མཆོད་དང་བསྟོད་པས་འགྲུབ། །རོལ་མོ་གྱེར་དབྱངས་བསང་དུད་བཅས་པ་བྱ། །འདི་ནི་ལྷ་ཆེན་སྲོག་གཟེར་གནད་ཟབ་སྟེ། །མང་དུ་སྤེལ་ན་འཁུ་ལྡོག་མངོན་སུམ་འོང་། །མིང་ཙམ་མི་སྨྲ་གཅིག་བརྒྱུད་བྱ་བ་ལས། །ཀུན་ལ་འཆོར་བར་མང་དུ་སྤེལ་བྱེད་ན། །སྡེ་བརྒྱད་ཤན་པ་དམར་པོས་སྲོག་ཆོད་གསུངས། །དེ་ཕྱིར་འདི་ཡི་བཀའ་གཏད་ཤིན་ཏུ་སྦ། །དེ་བཞིན་ཟིན་བྲིས་འདི་ཉིད་ཤིན་ཏུ་སྦ། །འདོན་ཚོགས་ལུང་ཙམ་བྱས་པ་དེ་
ལ་ཡང་། །སྨྱོན་པའམ་ནི་སྲོག་རླུང་ནད་པ་ལ། །སྨྱོ་འདུལ་དམིགས་པ་བསྐུལ་པ་དང་བཅས་ནས། །གཏོར་མ་མགོར་བཞག་བཀའ་བསྒོ་བྱིན་བརླབས་ལ། །ཧ་ཅང་བཀའ་རྒྱ་ཡོད་པ་མ་ཡིན་ནོ། །ཐུན་བཞིར་ལས་བྱང་འདོན་པའི་སྐབས་སུ་ཡང་། །རྟག་གཏོར་ཟུར་གསུམ་རྒྱུན་དུ་གསོ་བྲན་དང་། །ཐུན་གཏོར་ཟུར་གསུམ་རྩེ་སོར་བཅུ་གཉིས་པ། །ཐུན་བཞིར་འབུལ་ཞིང་རྟེན་འགྲམ་གཞི་སྟེང་བཞག །འོ་ཞོ་ཕྱེ་མར་བསང་མཆོད་དུས་ལྟར་རོ། །སྤྱན་འདྲེན་དུས་སུ་བསང་དུད་ཅུང་ཙམ་བཏང་། །འདི་ནི་འཇམ་པས་མི་ནོར་དོགས་སོགས་མེད། །གལ་ཏེ་འཁོར་ལ་བབ་པར་སྲིད་ན་ཡང་། །དེ་ལ་སྐྲག་པ་ཅི་ཡང་མི་དགོས་སོ། །བརྡེག་རྩོག་སྨྱོ་སྤྱོད་ལ་སོགས་བྱེད་སྲོལ་མེད། །བསྒྲུབས་པ་ཚར་ནས་མདུན་བསྐྱེད་སྐུ་གཟུགས་བསྟིམ། །མེད་ན་རང་གནས་གཤེགས་གསོལ་སྤྱི་ལྟར་བྱ། །ཕྱིར་ནངས་བསང་ཞིག་ཐོན་ན་ལེགས་པ་ཡིན། །འདི་བྲིས་ཉེས་བཤགས་དགེ་བས་འགྲོ་ཕན་ཤོག །ཨ་རཱ་གས་སོ། །མངྒ་མ ༧ །ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།