ཀླུ་རྒྱལ་དགེ་བསྙེན་སྨྱོ་ཁའི་གསོལ་མཆོད།
ཀླུ་རྒྱལ་དགེ་བསྙེན་སྨྱོ་ཁའི་གསོལ་མཆོད་ལགས་སོ།། ཧཱུྃ། རྫོགས་ལྡན་དང་པོར་རྡོ་རྗེ་འཛིན་པ་ཡིས། །ཁྱོད་ལ་དབང་བསྐུར་སེམས་བསྐྱེད་བྱིན་བརླབས་ནས། །མ་འོངས་སྙིགས་མར་བསྟན་པའི་གཉེར་གཏད་ཅིང་། །དམ་ཚིག་སེམས་དཔའ་ཉིད་དུ་མངའ་གསོལ་མཛད། །རྩོད་ལྡན་གཉིས་པ་བར་གྱི་བསྐལ་པ་ལ། །སློབ་དཔོན་ཆེན་པོ་པདྨ་སཾ་བྷ་བས། །དབང་བསྐུར་ཡེ་ཤེས་སེམས་དཔར་མངའ་གསོལ་བས། །དྲེགས་པའི་གཙོ་བོ་གཏེར་གྱི་སྲུང་མར་བསྐོས། །རྩོད་ལྡན་ཐ་མར་སྙིགས་མ་ལྔ་བརྒྱའི་མཐར། །རྒྱལ་བསྟན་རིན་ཆེན་ཁྱོད་ཀྱིས་སྐྱོང་བར་མཛོད། །ཁས་བླངས་དམ་བཅའ་མ་གཡེལ་དྲན་མཛོད་ལ། །སྒྲུབ་མཆོག་བསྟན་པ་སྲུང་བར་མངའ་གསོལ་ལོ། །དབང་དྲག་པདྨས་དམ་ལབཞག་པ་ཡིས། །གནས་བརྒྱུད་དགེ་བསྙེན་གཅིག་དང་ཐ་དད་མེད། །རོལ་མཚོ་བདུན་དང་བླ་མཚོ་ནག་པོའི་བདག །ཀླུ་ཆེན་བརྒྱད་ཀྱི་གཙོ་བོར་མངའ་གསོལ་ལོ། །སྲིད་གསུམ་འདི་ནས་འགྲན་ཟླ་མ་མཆིས་པའི། །སྦྲུལ་ནག་གདེངས་ཀ་སྲིད་པའི་རྩེ་མོར་སླེབས། །མགོ་ལུས་མེད་པར་མིག་གིས་གང་བ་ཁྱོད། །བསྟན་པའི་བྱ་ར་གཟིགས་པར་
མངའ་གསོལ་ལོ། །ཀླུ་བདུད་འབུམ་གྱི་འཁོར་གྱིས་ཡོངས་བསྐོར་བའི། །ལྷ་སྲིན་སྡེ་བརྒྱད་ཀུན་གྱི་གཙོ་བོར་བཞུགས། །ཁྱེད་ལ་བདག་གིས་མངའ་གསོལ་ཞུ་བ་ནི། །དམ་ཉམས་དགྲ་བོའི་གཤེད་མར་མངའ་གསོལ་ལོ། །སྒྲུབ་པའི་འགལ་རྐྱེན་སོལ་ཅིག་མངའ་གསོལ་ལོ། །མཐུན་རྐྱེན་བསམ་པ་སྒྲུབ་ཅིག་མངའ་གསོལ་ལོ། །འདོད་དོན་ཕྲིན་ལས་མཛོད་ཅིག་མངའ་གསོལ་ལོ། །དམིགས་པའི་དགྲ་བགེགས་སྒྲོལ་ཅིག་མངའ་གསོལ་ལོ། །བསྟན་པའི་སྒྲོན་མེ་སྦོར་ཅིག་མངའ་གསོལ་ལོ། །སྔ་བཅོལ་ལས་ཀྱི་གཏང་རག་གཉན་པོ། །ད་བཅོལ་ལས་ཀྱི་ཞུ་སྐྱེམས་དམ་པ། །མེ་ཏོག་བདུག་སྤོས་ཕྱི་ཡི་མཆོད་པ། །འདོད་ཡོན་རྣམ་ལྔ་སྤྱི་ཡི་མཆོད་པ། །རྒྱལ་སྲིད་སྣ་བདུན་རང་གི་མཐུན་རྫས། །བ་ལིང་རྣམ་ལྔ་དགྱེས་པའི་དམ་རྫས། །བདུད་རྩི་སྨན་རཀ་གསང་བའི་དམ་རྫས། །ཚྭ་ས་རྣམ་ལྔ་དབང་པོའི་མེ་ཏོག །དགྲ་བགེགས་བསྒྲལ་བའི་སྲོག་དབུགས་དང་བཅས་པ་འདི་གསོལ་ལོ་མངའ་གསོལ་ལོ་མཆོད་དོ། །སྒྲུབ་པ་པོ་བདག་གི་ཞི་རྒྱས་དབང་དྲག་གི་ཕྲིན་ལས་གང་བཅོལ་བ་དེ་ཐོགས་པ་མེད་པར་སྒྲུབས་ཤིག །ཀླུ་བདུད་ནག་པོ་དགེ་བསྙེན་སྨྱོ་ཁ་ཡི། །
གསོལ་མཆོད་ཚང་མ་བསྡུས་པ་འདི་ཉིད་ནི། །རཱ་གའི་མིང་ཅན་བསམ་གཏན་པ་དེས་སྦྱར། །འདི་ལ་ཉེས་འགལ་གང་མཆིས་ཡོད་པའང་། །གཏེར་སྲུང་གཉན་པོ་འཁོར་དང་བཅས་ལ་བཤགས། །དགེ་བས་གསང་སྔགས་བསྟན་པ་དར་རྒྱས་ཤོག། །།