སྨྱོ་ཁའི་དགྲ་རྦད།
དགེ་བསྙེན་དྲག་པོ་དགྲ་ལ་ཆད་ན་གཏོར་མ་ལ་འགུགས་གཞུག་བྱིན་བརླབས་བྱས་ལ། ཧཱུྃ། ཀླུ་བདུད་ནག་པོ་མཐུ་བོ་ཆེ། །ཤིན་ཏུ་དྲག་ཏུ་ཁྲོས་ཙམ་ན། །སྐུ་མདོག་མཐིང་ནག་མུན་པའི་མདོག །ལུས་ནི་གཞུ་འདོམ་བརྒྱད་ཀྱི་ཚད། །སྦྲུལ་མགོ་དགུ་ཡི་གདེངས་ཀ་ཅན། །དུག་གི་སྤྲིན་ནག་ཐེབས་སེ་ཐེབ། །སྡང་མིག་དམར་པོ་བསྒྲད་པ་ལ། །ཁྲག་གི་ཆར་པ་སི་ལི་ལི། །ཁ་གདངས་མཆེ་བ་གཙིགས་པ་ལ། །ནད་རླངས་དམར་པོ་ཕྱུ་རུ་རུ། །དགྲ་བོ་མ་བརྗེད་ཤྭ་ར་རེ། །བུ་ག་དགུ་ནས་འབྲུག་སྒྲ་སྒྲོག །འུར་སྒྲ་ཐུག་ཆོམ་སྐྱེ་ཆེམས་སེ་ཆེམ། །རྣ་བའི་ཁུང་ནས་ཐོག་རྒོད་འཕྲོ། །འཁྱུགས་དང་ཚྭ་ཚྭ་ཐུ་ལུ་ལུ། །བ་སྤུའི་གསེབས་ནས་ཐོག་རྒོད་འཕྲོ། །གནམ་ལྕགས་ཚྭ་ཚྭ་ཐུ་ལུ་ལུ། །རྐང་ཞབས་ནད་ཀྱི་རླུང་ཆེན་སྡང་། །རླུང་དམར་འཚུབ་མ་ཀྱི་ལི་ལི། །འོག་སྒོ་སྦལ་སྦྲུལ་ཕོ་ཉ་འཕྲོ། །སྦལ་སྦྲུལ་སྡོམ་སྡིག་ཉི་ལི་ལི། །ཕྱག་གཡས་སྦྲུལ་ནག་ཞགས་པ་བསྣམས། །བདུད་ཞགས་ནག་པོ་སྒ་ར་ར། །གཡོན་ན་ནད་ཀྱི་རྐྱལ་པ་བསྣམས། །ནད་རླངས་སྔོ་དམར་ཚུབས་སེ་ཚུབ། །ཆིབས་སུ་བྲ་ནག་རྟིང་དཀར་ཆིབས། །རྔ་རྔོག་སྦལ་སྦྲུལ་ཤིགས་སེ་
ཤིག །བདུད་རྟ་རྒྱུག་འདུར་ཁྲ་ལ་ལ། །འཁོར་དུ་སྡེ་བརྒྱད་དུ་མས་བསྐོར། །ཆོ་འཕྲུལ་སྣ་ཚོགས་ཟིངས་སེ་ཟིང་། །བརྒྱན་པའི་གཏོར་མ་འདི་བཞེས་ལ། བློ་སྦྱོ་སྡང་བའི་དགྲ་ལ་བྷྱོ། །ཆོས་ཆོས་སྡང་བའི་དགྲ་ལ་ཆོས། །མཐུ་དང་རྫུ་འཕྲུལ་ཅི་འདུག་ལྟ། །རྟགས་དང་ཆོ་འཕྲུལ་དུ་མ་སྟོན། །ལྟས་ངན་མི་རུངས་སྣ་ཚོགས་ཐོངས། །ཐོག་དང་སེར་བ་གནམ་རྡོ་རྒྱོབས། །གག་ལྷོག་མཛེ་དང་གཉན་ནད་ཐོངས། །རིམས་དང་འཁྲུགས་པའི་གྲི་རྒོད་ཀྱིས། །སྡང་བའི་དགྲ་བོ་ལས་ངན་འདི། །ཐོགས་མེད་བཙན་ཐབས་ཁ་རུ་སོད། །དགེ་བསྙེན་ཆེན་པོའི་དུས་ལ་བབ། །བཅོལ་བའི་ཕྲིན་ལས་འགྲུབ་པར་མཛོད། །ཅེས་བསྐུལ་ནས་གཏོར་མ་གཟའ་ཀླུ་རྒྱུ་བ་དང་བསྟུན་ནས་དགྲ་ཕྱོགས་སུ་འཕང་ངོ་། །ཤིན་ཏུ་གཉན་པས་སྤེལ་མི་རུང་ཞེས་༧རཱ་ག་ཨ་སྱས་སྦྱར་བའོ། །སངས་རྒྱས་བསྟན་པའི་བྱ་ར་མཛད་དུ་གསོལ། ཨྠྀི། མངྒ་ལཾ།། །།