བཀའ་སྲུང་བེག་རྩེའི་སྒྲུབ་ཐབས།
བཀའ་སྲུང་བེག་རྩེའི་སྒྲུབ་ཐབས་བཞུགས་སོ། །
ན་མོ་རྒྱ་གྷི་ཝ་ཡེ། དབང་ཆེན་རྟ་མགྲིན་གྱི་བཀའ་སྲུང་། གནོད་སྦྱིན་བེག་རྩེ་སྒྲུབ་པའི་ཐབས་ལ་གཉིས་ཏེ། རང་བཞིན་བསྙེན་སྒྲུབ་བྱ་ཐབས་དང་། ལས་སྦྱོར་བྱ་བའི་བསྙེན་སྒྲུབ་གཉིས་ལས། བསད་ལས་སོགས་མི་བྱེད་པར་རང་བཞིན་བསྙེན་སྒྲུབ་བྱ་བའི་ཐབས་ནི། དུར་ཁྲོད་དམ་ཆུ་འགྲམ་བྲག་དམར་པོའམ་བྲག་དང་ཆུ་འཐབ་པའི་དྲུང་ངམ། ཐ་མ་ཡང་དབེན་པའི་གནས་སུ། མཎྜལ་མདའོ་གང་གྲུ་བཞི་པ་ལ། རས་དམར་པོའམ་ཁྱི་དམར་ཁྲག་གིས་བྱུག་པའི་དབུས་སུ། མན་འགྱེལ་སྟེང་དུ་གྲི་ཐོད་དམ་ཟངས་ལྕགས་ཀྱི་སྣོད་འབྲུས་བཀང་བ་བཞག །དེའི་སྟེང་དུ་ཤན་པའི་ལག་ནས་ར་དམར་པོའི་སྙིང་རློན་པ་བླངས་ཏེ། དེའི་དབུས་སུ་གྲི་ཁྲག་གིས་བྲིས་པའི་སྙིང་པོ་བཅུག་ལ། དར་དམར་པོས་དྲིལ་ནས་བཞག །གཞན་
ཡང་བཙན་བཤོས་གསེར་སྐྱེམས། མདའ་འུག་སྒྲོ་མ་ལ་དར་དམར་པོ་བཏགས་པ། རི་དམར་གྱི་སྤུད་པ་འུག་པའི་དང་རུ་སོགས་རྟེན་བཙུགས། དེ་ནས་ཡི་དམ་ཆོས་སྐྱོང་གི་ཆོ་ག་ཚར་ནས། དེའི་ཚུལ་དུ་གནོད་སྦྱིན་བཀའ་སྡོད་གྱི་ཚུལ་དུ་བསྐྱེད་དེ། མདུན་གྱི་ཙིཏྟ་བསངས་སྦྱངས་བྱས་ལ། མེ་དཔུང་གི་དབུས་སུ་ར་དམར་དོང་ཉི་མའི་སྟེང་དུ་པྲ་དམར་པོའི་འཕྲོ་འདུ་ལས། ཡམ་ཤུད་དམར་པོ་ཕྱག་གཡས་ཟངས་གྲི་ཕྱར་ཞིང་གཡོན་དགྲ་བོའི་གློ་སྙིང་དང་བཅས་པའི་ཞགས་པ་འཛིན་པ། བསེ་མདུང་དམར་པོ་ཕྱར་བ། ར་སླག་དམར་པོའི་སྟེང་ན་ཟངས་ཀྱི་རལ་ཁལ་དང་བེག་རྩེ་གསོལ་བ། དབུ་སྐྲ་ལྟག་པར་བཅིངས་ཤིང་སྨ་ར་དང་སྨིན་
མ་ལས་མེ་སྟག་འཕྲོ་བ། སྤྱན་དང་ཤངས་དང་ཞལ་ནས་མེ་འབར་ཞིང་ཁྲོ་ཆུ་ཟངས་ཞུན་ལྟ་བུར་འཐོར་བ། བ་སྤུ་དང་སེན་མོ་གནམ་ལྕགས་འབར་བ་ལས་གྲུབ་པ། སྐན་སྒྲ་དང་གད་རྒྱངས་ཆེན་པོ་བསྒྲགས་པས་སྟོང་གསུམ་འདར་བར་བྱེད་པ། དེའི་གཡོན་དུ་ཁྲག་མཚོའི་དབུས་སུ་ཡཾ་ཡིག་ལས་སྲིད་པའི་བུ་མོ་གདོང་དམར་མ་སྐུ་མདོག་སྔོན་པོ། བསེ་གདོང་དམར་མོ་དུང་སོར་གཡུ་སྨིན་མོའི་རལ་པ་ཅན། དབུ་སྐྲ་མཆོང་དང་མུ་མེན་གྱིས་བརྒྱན་པ་ཕྱག་གཡས་ཟངས་གྲི་དང་གཡོན་ཕུར་པ་ཐོགས་ནས་དྲེད་མོང་ལ་ཞོན་པ། གཡས་སུ་གསུང་ལས་ལས་མཁན་སྲོག་བདག་བསེའི་ཁྲབ་རྨོག་ཅན། མདུང་དར་དམར་པོ་དང་བཙན་ཞགས་དམར་པོ་བསྣམས་ནས། ལྕེ་སྤྱང་སྨྱོན་པ་ལ་ཞོན་ནས་མཚན་མོ་རྒྱུ་བ། གཞན་ཡང་གྲི་ཐོགས་བརྒྱ་ཤན་པ་ཉི་ཤུ་རྩ་གཅིག་ཐམས་ཅད་ཀོ་རློན་དང་ཞིང་ལྤགས་གྱོན་ནས་རལ་གྲི་དང་གློ་སྙིང་རྒྱུ་མ་ཐོགས་པ་དང་། བཙན་དམར་སྟོང་སྡེ་མ་མོ་འབུམ་སྡེ་བདུད་སྲིན་སུམ་སྟོང་ཐེའུ་རང་སྟོང་སྡེ་གནོད་སྦྱིན་མཐའ་ཡས་པས་བསྐོར་བའི། གནས་གསུམ་དང་འབྲུ་གསུམ་ཐུགས་ཀའི་ས་བོན་དང་རང་ཐུགས་ཀའི་འོད་ཟེར་གྱིས། བྱང་ཤར་མཚམས་ཀྱི་
གནས་ཁྲག་མཚོ་དང་བར་འཐབ་པའི་བར་ནས་གནོད་སྦྱིན་འཁོར་བཅས་སྤྱན་དྲངས། ཨོཾ་པྲ་ན་ཨརྨ་ལ་ཀི་རུ་པུ་རུ་ཤ་ཨ་ཀན་ས་མ་ཡ་ཛ༔ ཛཿཧཱུྃ་བཾ་ཧོ༔ ཞེས་བསྟིམས་ནས་རྩ་སྔགས་ལ་པུཊྚེ་སོགས་བཏགས་ནས་མཆོད། ར་གསུར་བཏང་། གཏོར་མ་འབྲུ་གསུམ་གྱིས་བདུད་རྩིར་བྱིན་གྱིས་རླབས་ཏེ་འབུལ། ཨོཾ་པྲ་ན་ཨརྨ་ཀཱི་རུ་པུ་རུ་ཤ་བྷཾ་སྣ་དཾ་བ་ལི་ཏེ་ཤ་ཏྲ་མཱ་ར་ཡ་ཁཱ་ཧི། །ཞེས་སོ། །ཨོཾ་པྲ་ན་ཨརྨ་ལུ་ཧེ་ཏེ་བྷ་ལིང་གྷཾ་ན་ཤ་ཏྲོ་མཱ་ར་ཡ་ཁ་ཁ་ཁཱ་ཧི་ཁཱ་ཧི། ཞེས་པ་གང་རུང་གིས་བསྔོས་ལ། གནོད་སྦྱིན་ཟངས་ཀྱི་བེག་རྩེ་ཅན་ཡུམ་རིག་པའི་ལྷ་མོ་གདོང་དམར་མ་འཁོར་དང་བཅས་པ་ཁྱེད་རྣམས་ཀྱིས། སྔོན་བཅོམ་ལྡན་འདས་གསང་བའི་བདག་པོ་དང་ཁྲོ་བོའི་རྒྱལ་པོ་རྟ་མགྲིན་དང་། སློབ་དཔོན་ཆེན་པོ་པདྨ་འབྱུང་གནས་དང་ཡུམ་ཨེ་ཀ་ཙ་ཏི་དང་ལྷ་ཆེན་དབང་ཕྱུག་ཆེན་པོའི་སྤྱན་སྔར་ཇི་ལྟར་ཞལ་གྱིས་བཞེས་པའི་ཐུགས་དམ་བསྐང་དམ་ཚིག་རྗེས་སུ་དྲན་པར་མཛོད་ལ་སངས་རྒྱས་ཀྱི་བསྟན་པ་དར་ཞིང་རྒྱས་པ་དང་། ཁྱད་པར་དུ་ཡང་རྣལ་འབྱོར་བདག་ཅག་འཁོར་དང་བཅས་པའི་མགོན་སྐྱབས་དང་དཔུང་གཉེན། ཁ་འཛིན་སྡོང་གྲོགས་རྒྱབ་རྟེན་རྒྱ་ཆེན་པོ་མཛོད། ཚེ་དང་བསོད་ནམས་སྤེལ། ཁམས་
གསུམ་དབང་དུ་བསྡུས། སྡང་བའི་དགྲ་སོད། གནོད་པའི་བགེགས་ཐུལ། རྟགས་དང་མཚན་མ་མྱུར་དུ་སྟོན། མཐུ་དང་རྩལ་ཕྱུངས་ཤིག །པྲ་ན་ཨ་མ་བཛྲ་ས་མ་ཡ་ཧཱུྃ། ཞེས་དམ་ལ་བཞག །བདག་གི་ཐུགས་ཀ་ནས་འོད་ཟེར་འཕྲོས་པས་ཁོའི་སྙིང་ཁའི་ས་བོན་པྲ་ལ་ཕོག་པས་དམར་ཞིང་ཆགས་པའི་རང་བཞིན་དུ་གྱུར་ཏེ་བདག་གི་དབང་དུ་གྱུར་ནས་སླར་འདུས་པས་བདག་ལ་དངོས་གྲུབ་བྱིན་པར་བསྒོམ། ཡང་རང་གི་ཐུགས་ཀའི་འོད་ཟེར་འཕྲོས་ནས་ཆོས་སྐྱོང་ལྕམ་དྲལ་གྱི་ཐུགས་ཀར་ཉི་མའི་སྟེང་དུ་སྔགས་ཕྲེང་ལ་ཕོག་ཐུགས་རྒྱུད་བསྐུལ་ནས་རང་དབང་མེད་པར་བཀའ་ཉན་ལས་བྱེད་པར་བསམས་ལ། སྙིང་པོ་འདི་མི་ཚིག་གིས་བར་མ་ཆོད་པར་སུམ་འབུམ་བཟླས་པ་གྲངས་ཀྱི་བསྙེན་པའོ། །ཨོ་པྲ་ན་ཨ་མ་ཀྱི་རུ་པུ་རུ་ཤ་ཧཱུྃ་ཕཊ། ཐུན་རྗེས་མར་མཆོད་བསྟོད་གཏོར་མ་ར་གསུར་ཕུལ་ཞིང་ཕྲིན་ལས་བཅོལ་ལོ། །རྟགས་ནི་ཙིཏྟ་མགུལ་བ་དང་འཚེགས་པ་དང་མེ་འབར་བ་འབྱུང་། རྨི་ལམ་དུ་སྐྱ་ཤར་རྟ་པ་མང་པོ་དང་ཞུབས་ཅན་ཁྱོ་དང་ཆུང་མ་ན་ཆུང་མཛེས་མ་དང། ཆུ་དང་མེ་དང་རྟ་པ་དམར་པོ་རྣམས་བྱུང་ན་འགྲུབ་རྟགས་སོ། །སྙིང་མི་དགའ་བ་དང་བ་སྤུ་གྱེན་དུ་ལང་བ་དང་འགྲོ་སྙིང་འདོད་པ་དང་། རྨི་ལམ་དུ་མཛེ་ཕོ་བྱུང་ན་འཁུ་ལྡོག་རྟགས་ཡིན་པས། ཁོའི་སྤྱི་བོར་རྟ་མགྲིན་ཚོན་གང་བ་སྐུ་སྨད་ཕུར་ཅན་གཅིག་
བསྒོམས་ལ། རྟ་མགྲིན་གྱི་སྔགས་ཤམ་དུ། ཧཱུྃ་ཕཊ་ཧཱུྃ་ཤ་རུ་པུ་རུ་ཀྱི་ཨ་མ་པྲ་ཨོ། ཞེས་སྦྱར་ལ་ཅུང་ཟད་བཟླ་ཞིང་རྟེན་རྫས་ལ་ཐུན་བརྡེག་པའམ། བརྡེག་ཆས་བྱའོ། །རྟེན་གཏོར་ཐུན་གཏོར་ནང་དུ་རང་གི་ཟ་འཕྲོ་བསྲེ། ཚུར་ལ་ཡང་ཅུང་ཟད་ཟ་བས་དམ་བསྲེ་བར་བསྒོམ། འདིའི་དུས་ཀྱི་བསྙེན་པ་ནི། པཎྜི་གྷ་ཡ་དྷ་རའི་ཞལ་ནས་ཞག་ལྔའམ་གསུམ་བསྒྲུབ་དགོས་གསུངས་པས། བསྙེན་པ་རང་བཞིན་བྱེད་པ་ལ་དེས་ཆོག་གོ །འགྲུབ་པའི་རྟགས་ལེགས་པར་བྱུང་ན། མཁུ་ལྡོག་ཆུང་བ་དང་བཀའ་ཉན་པའི་ཕྱིར་གསང་སྒྲུབ་བྱ་ཐབས་ནི། རང་ཡི་དམ་རྟ་མགྲིན་གྱི་སྐུར་གསལ་བར་བསྒོམས་ལ། ཆོས་སྐྱོང་བེག་རྩེ་མདུན་དུ་བསྐྱེད་ནས་སྤྱན་མཆོད་བསྟོད་བྱས་ནས། བེག་རྩེ་རང་གི་ཤ་གཡོན་ནས་རྔུབ་ལ་ལྟེ་འོག་ཏུ་ཆོས་འབྱུང་གྲུ་གསུམ་དམར་པོ་ཡངས་ཤིང་རྒྱ་ཆེ་བའི་དབུས་སུ་གསལ་བཏབ་ལ་རྟ་མགྲིན་གྱིས་དབུ་བརྒྱན་ཏེ། རང་གི་ཐུགས་ཀའི་ས་བོན་གྱིས་འོད་ཟེར་སྟོབས། ལྷ་འདྲེ་མི་གསུམ་གྱི་ཚེ་བསོད་དཔལ་འབྱོར་ཐམས་ཅད་འོད་ཟེར་དམར་པོའི་རྣམ་པར་བསྡུས་ནས་རང་ལ་བསྟིམ་པར་བསམ་ཞིང་བཟླས་པ་བྱ་སྟེ། རྟ་མགྲིན་གྱི་སྔགས་ལ། གནོད་སྦྱིན་གྱི་སྔགས་བཏགས་ལ་བཟླའོ། །དེ་ནས་འཁོར་རྣམས་གཙོ་བོ་ལ་ཐིམ། གཙོ་བོ་སྤྱི་བོའི་རྟ་མགྲིན་ལ། དེ་ཡང་ཧྲཱིཿཡིག་ཏུ་གྱུར་
ཏེ་ཡར་བྱོན་པ་རང་གི་ཐུགས་ཀའི་ཧཱུྃ་ཡིག་གི་ཞབས་ཀྱུའམ། ཧྲཱི༔ཡིག་གི་ར་བཏགས་ལ་ཐིམ། དེ་ནས་སྣོད་བཅུད་ཐམས་ཅད་རང་ལ་ཐིམ། རང་ཧཱུྃ་ངམ་ཧྲུལ་དེ་ཡང་མི་དམིགས་པ་ཆོས་དབྱིངས་སྤྲོས་བྲལ་གྱི་ངང་ལ་བཞག་གོ །ཡང་ན་གནོད་སྦྱིན་ཤངས་བུག་ནས་ཕྱིར་བཏོན་ལ་སྔར་ལྟར་བཀའ་སྡོད་དུ་བསམས་ལ། བཟླས་པ་མཆོད་བསྟོད་བྱ་སྟེ་འདི་གིང་ལྔའི་དབང་ཆོག་ནས་གསུངས་སོ། །དེས་ནི་ལུས་དང་གྲིབ་མ་ལྟར་འགྲོགས་པར་འགྱུར་གསུངས་ཏེ། གསང་སྒྲུབ་འདི་ལྟ་བ་ལེགས་པར་རྟོགས་ན་བྱའམ་གཞན་གྱིས་བྱར་མི་གཏུབ་ཟླུབོ། །ཡང་གལ་ཏེ་སྔགས་སུམ་འབུམ་བཟླས་ཀྱང་རྟགས་མ་བྱུང་ན། ར་དམར་གྱི་ཙིཏྟ་དེ་ར་དམར་པོའི་སྡུད་པུར་བཅུག་ལ། དེར་མེ་རུ་རྩེའི་གྲོང་ཁྱེར་བསེ་མཁར་དང་། །སྦྱིན་འཁོར་བཅས་བསྒོམས་ལ། རང་རྟ་མགྲིན་རབ་ཏུ་འཁྲོས་པར་སྒོམས་ལ་སྨྱུག་མ་ཚིགས་དགུ་པ་དེ། རྡོ་རྗེ་རྩེ་དགུ་པར་བསམ་ལ་རའི་སྦྱད་པུ་བརྡུངས་ཤིང་། རྟ་མགྲིན་སྔགས་ཤམ་དུ་ཁོའི་སྲོག་སྔགས་མགོ་མཇུག་ལྡོག་སྟེ་བཟླའོ། །དེས་ངེས་པར་འགྲུབ་བོ། །ཡང་མི་རུང་ངོ་སླར་བཤགས་པ་དང་གསོལ་ཁ་བྱ་བས་གཟི་བརྗིད་བསྐྱེད་དོ། །ཡིག་
རྙིང་ལས། ཟངས་ཀྱི་བེག་རྩེ་གྱོན་པ་འདིས། །ལས་རྣམས་ཐམས་ཅད་སྒྲུབ་པར་བྱེད། །ཅེས་གསུངས་པས། འགྲུབ་ན་ཕྲིན་ལས་གང་བརྩམས་འགྲུབ་བོ། །བསྒྲུབས་ཚར་ནས་མདའ་དར་དང་རའི་ཙིཏྟ་ར་སྡུད་སོགས་རྟེན་དུ་བཅངས་ཤིང་། རྒྱུན་དུའམ་དུས་སུ་མཆོད་བསྟོད་བྱའོ། །འདི་ནི་ཡབ་ཡུམ་གྱི་རྒྱུད་གཉིས་དང་རྒྱ་གཞུང་གསུམ་དང་། བོད་ཡིག་གཉིས་དང་གཏེར་མ་སོགས་བསྟུན་ནས་ཤིན་ཏུ་གསལ་བར་བཀོད་པ་ལ་ཉེས་པ་གང་མཆིས་ཆོས་སྐྱོང་ཉིད་ལ་བཤགས་ཤིང་། དགེ་བས་སངས་རྒྱས་ཨ་བསྟན་པ་མཐའ་རྒྱས་ཤིང་། བསྟན་འཛིན་སྐྱེས་བུའི་དབུ་འཕང་མཐོ་བར་ཤོག །ཅེས་དགེ་སློང་ཨ་རཱ་གས་བྲིས་པའོ། །མངྒ་ལཾ། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།