བེག་རྩེའི་ཆོ་འཕྲུལ།
བེག་རྩེའི་ཆོ་འཕྲུལ་ཟབ་མོ།། ༈ ན་མོ་རྒྱ་གྷི་ཝ་ཡེ། རྟ་མཆོག་དབང་གི་བཀའ་སྲུང་དང་གནོད་སྦྱིན་བེག་རྩེའི་མན་ངག་ཡིག་ཆུང་ལ། དགྲ་ལ་ཆོ་འཕྲུལ་བཏང་བ་ན་ར་དམར་པོའི་སྤྱད་པུར་སྤྲེའུ་དང་འུག་པ་དང་ཝ་དང་ཁྲ་དང་སྤྱང་ཀི་བྱ་ནག་དང་སྲིན་བྱ་དང་གླ་བ་སོགས་གང་འདོད་ཀྱི་སྤུ་དང་སྒྲོ་དགོས་ལ་སྤྱད་བུ་རུ་བླུགས་ལ། བསྙེན་པ་བྱེད་དུས་གཞུང་ལྟར་མཎྜལ་གྱི་དྲུང་དུ་བཞག་ལ་བསྙེན་པ་ཐོན་པ་དང་སྡུད་བུ་དགྲ་ཕྱོགས་སུ་བརྡབས་པས་ཆོ་འཕྲུལ་འོང་སྟེ། གཏོར་མའི་ནང་དུ་སྤུ་བཏབ་ལ་ཐག་ཉེ་ན་དགྲའི་ཁང་པར་བརྡེག །ཐག་རིང་ན་དགྲའི་ཕྱོགས་སུ་ཟོར་འཕང་དམོད་བཅོལ་བྱ། གཏོར་མ་དང་སྤུ་དགྲའི་ཁང་པའི་འགྲམ་རྩར་ཡང་གཞུག །ཡང་ན་དགྲ་ཡུལ་དུ་སྤུ་གཏོར་རོ། །འདི་ནི་སྲོག་ལས་ཀྱི་ཞོར་ལ་བྱས་ཀྱང་འོང་ལ། ཡང་ཆོ་འཕྲུལ་རྐྱང་པ་བྱེད་ན་དངོས་ནི་གཞུང་ལྟར། དཀྱིལ་འཁོར་དང་སྒྲུབ་པ་ལས་ལིངྒ་ལ་མཱ་ར་ཡ་རྦད། མི་བར་ཆོ་འཕྲུལ་ཐོངས་བྱ་བ་བྲིས་པའམ། བྲུབ་ཁུང་མེད་ཀྱང་ཆོག །མཎྜལ་དབུས་སུ་སྦྱད་བུ་བཞག་ལ་བསྒྲུབ་བོ། །གློ་བུར་དུ་རྫས་སྦྱད་བུ་བརྡབ་ཅིང་རྦད་བསྐུལ་བྱས་ཀྱང་འོང་བ་སེམས་སོ། །གང་
བྱེད་ཀྱང་དུས་བཞིའམ་སྐབས་སྐབས་སུ་བསྐུལ་རིང་ཐུང་གིས་བསྐུལ་ཞིང་གཏོར་ཟོར་འཕང་ངོ་། །ཆོ་འཕྲུལ་གྱི་མན་ངག །ཨྠྀི། ཆོ་འཕྲུལ་གྱི་བསྐུལ་རྒྱུད་ནས་གསུངས་པ་ནི། བྷྱོ། རིག་པའི་ལྷ་མོ་གདོང་དམར་མ། །གཤིན་རྗེའི་གཤེད་ཀྱི་བཀའ་ཉན་མ། །ཨེ་ཀ་ཙ་ཏིའི་གསུང་སྡོད་མ། །ལྷ་མིན་རྣམས་ཀྱི་གཡུལ་ཟློག་མ། །བསེ་ཡི་སྐྱེས་བུའི་སྣ་འདྲེན་མ། །མ་མོ་འབུམ་གྱི་དབང་མོ་ཆེ། །བརྗིད་ཆགས་མ་མོ་མཐུ་མོ་ཆེ། །གསང་བའི་མ་མོ་ཡལ་གམ་ཅན། །ཆོ་འཕྲུལ་ཡོངས་ཀྱི་སྣ་འདྲེན་མ། །སྡང་བའི་དགྲ་ལ་ཆོ་འཕྲུལ་ཐོངས། །ང་ཡི་དམ་ཉམས་དགྲ་བོ་མཆོད་པར་བཞེས། །ཞེས་བཏགས་སོ། །ཡང་ཐོན་འགྱེད་དམ་སྲོག་ལས་སོགས་བྱས་པའི་དགྲ་བོའི་བབ་བཏང་བྱུང་ན། གཏང་རིག་གི་མཆོད་པ་རྒྱ་ཆེན་པོ་བྱས་ལ། བོད་དུས་ཕོ་སྔོན་ལ་རྦད་པ་ཡིན་ན་ཕོ་སྔགས་ནས་གྱེན་དུ་ལྡོག །མོས་སྣ་དྲངས་ནས་རྦད་པ་ཡིན་ན་མོ་སྔགས་ནས་གྱེན་དུ་ལྡོག་ལ་ཅུང་ཟད་བཟླའོ༔ །བབ་ཀྱིས་ཟས་ནོར་བྱུང་བ་རྣམས་ཆ་གསུམ་བྱས་ལ་ཆ་གཅིག་དཀོན་མཆོག་མཆོད་པ་དང་། དགེ་ཕྱོགས་སུ་བཏང་བ། ཆ་གཅིག་ཆོས་སྐྱོང་ལ་གསོལ་མཆོད་མངའ་
ཐང་བསྐྱེད། ཆ་གཅིག་རང་གིས་སྒྲུབ་པའི་ཆ་རྐྱེན་བྱའོ། །དེས་ནི་ཕྱིན་ཆད་རྟགས་མྱུར་བའི་གནད་དམ་པར་གསུངས་སོ། །འདི་ལྟར་མ་བྱས་པ་བྱུང་རྒྱལ་དུ། །དུམ་དུམ་བྱས་ན་རང་ལ་འཁུ་ལྡོག་འོང་བའི་ཉན་ཡོད་དོ། འདི་བྲིས་ཉེས་པ་ཆོས་སྐྱོང་ཉིད་ལ་བཤགས། དགེ་བས་སངས་རྒྱས་བསྟན་པའི་དཔལ་དུ་ཤོག །ཨྠྀི། ཟབ། ཨ་རཱ་གས་སྦྱར་བའོ།། མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།