གནམ་ཆོས་ཇག་པ་མེ་ལེན་བཀའ་གཏད་ཀྱི་ལོ་རྒྱུས།
གནམ་ཆོས་ཇག་པ་མེ་ལེན་བཀའ་གཏད་ཀྱི་ལོ་རྒྱུས་བཞུགས་སོ༔
འོ་ན་ད་ལམ་ཁྱེད་རྣམས་ལ། གནམ་ཆོས་གུ་རུ་དྲག་པོའི་བཀའ་སྲུང་ཇག་པ་མེ་ལེན་གྱི་དབང་ལུང་བཀའ་གཏད་བྱེད་པ་ལ། ལོ་རྒྱུས་ཟུར་ཙམ་ཞིག་ཞུ་ན། ལྷ་འདིའི་ངོ་བོ་ནི་ལས་མགོན་སྲོག་བདུད་ནག་པོའི་སྤྲུལ་པ་ཡིན་ཏེ། མ་ནིང་གི་ལས་རྒྱུད་རྒྱས་འབྲིང་གསུམ་ཀ་ནས། མ་ནིང་ལྷའི་དམག་དཔོན་དུ་མངའ་གསོལ་ནས་ལྷ་མིན་འདུལ་བའི་ཕྱིར་ལས་ལ་ཆས་ཚེ་སྲོག་བདུད་ཀྱི་སྐུར་སྤྲུལ་པའི་ཚེ། ཕྱག་ཞབས་ཀྱི་ལྷུ་ཚིགས་བཞི་ལས་དམག་དཔོན་བཞི་སྤྲུལ་པ་ནི། གཤིན་རྗེའི་དམག་དཔོན་ཡ་མ་རཱ་ཙ། གིང་གི་དམག་དཔོན་པྲ་མ་རཱ་ཙ། སྲིན་པོའི་དམག་དཔོན་དྷ་ཤ་
གྷི་ཝ། བཙན་གྱི་དམག་དཔོན་ཨ་བསེ་རྒྱལ་བ་དང་བཞི་ཡིན། དེ་ལ་སངས་རྒྱས་ཆོས་ཀྱི་སྐད་དུ་ན་སྲོག་ཤན་རྔམས་པ། གཡུང་དྲུང་བོན་གྱི་སྐད་དུ་ན་ཨ་བསེ་རྒྱལ་བ། སྐུ་རྒྱལ་བོད་ཀྱི་སྐད་དུ་ཇག་པ་མེ་ལེན། གསང་མཚན་ནི་རྡོ་རྗེ་དགྲ་འདུལ་ཞེས་བྱའོ། །དེའི་སྐྱེས་རྒྱུད་ནི། ཕ་གནམ་གྱི་ཡ་བསེ་དང་། མ་ས་སྲིན་གཉིས་འཚོགས་པ་ལ། ཟངས་སྒོང་དམར་པོ་གཅིག་བྱུང་བའི་ནང་ནས། སྲས་ཤན་པ་དམར་པོ་འདི་འཁྲུངས་སོ། །དེའི་རྒྱུད་གསུངས་ཚུལ་ནི། མགོན་པོའི་སྤྱི་རྒྱུད་ཁྲག་མཚོ་ཁོལ་ཆེན་ལས། མགོན་པོ་གྲི་གུག་ཁྲོས་པའི་དཀྱིལ་འཁོར་གྱི།
བྱང་ཤར་གྱི་དགྲ་ལ་སྲོག་ཤན་རྔམ་པ་རྟ་རྒོད་མི་ཟན་གྱི་སྟེང་ན། མདོག་སྨུག་ནག་གཡས་འཁོར་ལོ་གཡོན་རྩེ་གསུམ་བསྣམས་པ། སྦྲུལ་གྱིས་བརྒྱན་པ། རླུང་གི་སྤུ་གྲི་ལ་དབང་བྱེད་པ་སྟེ། ཞེས་དེའི་སྔགས་དང་། བསྟོད་བསྐུལ་རྒྱས་པར་གསུངས་སོ། །དེ་ལ་སྔོན་རྒྱ་གར་དུ། མུ་སྟེགས་ཀྱི་མཁན་པོ་དྷརྨ་ཀུ་ནས། འཇིག་རྟེན་ལས་བྱེད་ཀྱི་རྒྱུད་ལེའུ་བརྒྱད་ཅུ་པ་ནས། མངོན་སྤྱོད་ཀྱི་ལེའུ་སུམ་ཅུ་ཕྱུང་། དེའི་ནང་ནས་སྒྲུབ་མི་དགོས་པའི་ངན་སྔགས་མང་དུ་བྱུང་བའི་ནང་ནས། ཇག་མེ་འདི་ཨོ་རྒྱན་རིན་པོ་ཆེས་ཁོལ་དུ་ཕྱུང་བའོ། །དེ་ཡང་ཨོ་རྒྱན་རིན་པོ་ཆེ་བོད་དུ་ཕེབས་ནས། མོན་སྤ་གྲོ་སྟག་ཚང་སེང་གེ་ཕུག་ཏུ། རྡོ་རྗེ་གྲོ་ལོད་ཀྱི་སྐུར་བཞེངས་ནས་ལྷ་འདྲེ་ཐམས་ཅད་དམ་ལ་བཏགས་དུས། ཇིག་མེ་འདི་ཡང་དམ་ལ་བཏགས་ཏེ་གནས་དེའི་བཀའ་སྲུང་དུ་བསྐོས་པས། རྒྱུན་དུ་མོན་ཡུལ་དུ་གནས་པའི་རྫ་རི་དམར་པོ་ཞིག་ཀྱང་ཡོད་སྐད། འདིའི་སྒྲུབ་སྐོར་གཏེར་དུ་སྦས་པ་གུ་རུ་ཆོས་དབང་གིས་བཏོན། དེ་འབྲུག་ལུགས་རྣམས་ཀྱིས་བསྒྲུབས་པས་དངོས་སུ་འགྲུབ་ནས་འབྲུག་པའི་བཙན་རྒོད་ཇག་པ་མེ་ལེན་ཞེས། མཐུ་ཆེ་ཞིང་རྣོ་མྱུར་ཆེ་བའི་གྲགས་པས་ས་སྟེང་ཁྱབ།
ཀར་ལུགས་མགར་ནག་གི་འཁོར་གིང་ཆེན་སྡེ་བཞིའི་གཅིག་ཡིན་ཏེ། གཤིན་རྗེ་སྒྲོལ་གིང་དམར་པོ་སྟེ། །ལྷ་ཡི་དམག་དཔོན་མེ་རུ་རྩེ། །ཞེས་པ་དེ་ཡིན་ནོ། །དགོས་ཆེད་དང་ཕན་ཡོན་ནི། གུ་རུ་ཆོས་དབང་གི་གཏེར་མ་ལས། བདག་འདྲ་པདྨ་ཐོད་ཕྲེང་གིས། །ཤན་པ་དམར་པོའི་སྒྲུབ་ཐབས་འདི། །ཁས་ཞན་མི་གཅིག་རྒྱབ་རྟེན་ཡིན། །སྒྲོལ་ལ་བརྩོན་པའི་མེ་ལེན་ཡིན། །དམ་ཚིག་ལྡན་པ་གལ་དུ་ཆེ། །ཕྱི་རབས་སྐལ་པར་ལྡན་པ་ཡི། །རྣལ་འབྱོར་བརྩོན་འགྲུས་མྱུར་བའི་མཐུ། །མན་ངག་འདི་ཉིད་ཤེས་པར་མཛོད། །བསྐལ་པ་དུས་ཀྱི་ཐ་མ་ལ། །བསྟན་པ་སྲུང་བའི་མཚོན་ཆ་ནི། །ཤན་པ་དམར་པོ་སྒྲུབ་པའི་ཐབས། །སྲོག་གཅོད་མེ་ཡི་སྤུ་གྲི་བྲི། །དེ་ཡང་སྙིགས་མ་ལྔ་བདོའི་དུས། །རྒྱལ་ཁྲིམས་ཆོས་ཁྲིམས་ཐམས་ཅད་ཞིག །འགྲོ་རྣམས་མི་དགེ་བཅུ་ལ་སྤྱོད། །དུས་འཁྲུག་དག་ལ་རྒྱུན་ཆད་མེད། །གཙུག་ལག་ཁང་ལ་འཐབ་ར་འཆའ། །རྟེན་གསུམ་དག་ལ་ཟོང་དུ་འཚོང་། །མི་རྣམས་ཟས་ངན་དུག་གིས་གསོད། །དེ་དུས་བསྟན་པའི་སྲུང་མར་ཤོག །ཅེས་གསུངས་ཤིང་། རྒྱབ་ཏུ་སྨན་མོ་མཛེས་སྡུག་མདའ་དར་མེ་
ལོང་འཛིན་པ། མདུན་དུ་འགུགས་བྱེད་བཙན་གྱི་ཤན་པ་དམར་པོ་ལྕགས་ཀྱུ་དང་ཞགས་པ་འཛིན་པ། གཡས་སུ་སྒྲོལ་བྱེད་བདུད་ཀྱི་ཤན་པ་ནག་པོ་ཟངས་གྲི་འཛིན་པ། གཡོན་དུ་། སྲོག་གཅོད་གཤིན་རྗེའི་ཤན་པ་དམར་ནག་སྙིང་དང་ཟངས་གྲི་གསུམ་ཀ་འཇིགས་གཟུགས་སྤྲུལ་དང་དུར་ཁྲོད་ཀྱི་ཆས་ཅན། བརྐྱང་བསྐུམ་དུ་བགྲད་པ། འཁོར་བཙན་དམག་འབུམ་དང་ལྷ་སྲིན་སྡེ་བརྒྱད། སོགས་འཁོར་མང་གསུངས་པ་ཆོས་དབང་གི་ལུགས་དང་། ཁྲག་མཚོ་ཁོལ་ཆེན་ནས། འཁོར་དུ་བདུད་དང་གིང་གིས་བསྐོར། །ཞེས་གསུངས་ཀྱང་། གནམ་ཆོས་འདི་ལ་འཁོར་མེད་དེ། སྤུ་གྲི་གཅིག་ཤུར་ཤིན་ཏུ་རྣོ་བས། གཏེར་རྙིང་ནས་ས་བོན་ཧྲཱིདམར་པོ་དང་། སྔགས་གྲངས་འབུམ་ཕྲག་གསུངས་ཀྱང་། འདི་ནི་སྔགས་གྲངས་མེད་ཅིང་རྟགས་གལ་ཆེ་བས། རྟགས་ནི་མི་དམར་རྟ་དམར་ཞོན་པ་དང་། རུ་དར་ཕྱར་བ་དང་། དར་དམར་གྱོན་ཞིང་ཐོད་དུ་བཅིངས་པ་དང་། འོད་དམར་པོ་དང་། གློག་འཁྱུག་པ་དང་། བཤུད་པ་རྩེར་བ་དང་། འཇིགས་ཤིང་ཟིལ་ཆེ་བ་དང་། མེ་འབར་བ་དང་། ཚག་སྒྲ་དང་འུར་སྒྲ་ལ་སོགས་པ་བྱུང་ན། གཏོར་མ་ཤ་ཁྲག་གིས་བརྒྱན་པ་བསྐང་བ་
དང་བཅས་ཏེ་མང་དུ་འབུལ་ཞིང་། ཁྲག་སྣ་དང་ཆང་ཕུད་ཀྱིས་ཀྱང་མཆོད་ཅིང་ར་གསུར་ཀྱང་རྒྱུན་དུ་གཏོང་ཞིང་། གང་འདོད་ཀྱི་ཕྲིན་ལས་བཅོལ་བ་ནི་བསྙེན་པའོ། །གནམ་ཆོས་ལ་ནི་གཏོར་མ་མ་གཏོགས་རྟེན་རྫས་སོགས་མི་དགོས་ལ། རྒྱས་པར་སྤྲོ་ན། བཤོས་བུ་ཟུར་གསུམ་སྦྲུལ་དཀྲིས་འཁོར་གསུམ་སྨན་བཤོས་དང་བཅས་པ་སེམས་ཅན་ཆེ་ཆུང་གང་རུང་གི་ལག་པ་གཡས། མདའ་འུག་སྒྲོ་ལྟོང་དམར་གྲི་ལྕགས་ཀྱི་མདེལ་ཅན་ལ། དར་དམར་ལ་འབོད་སྔགས་བྲིས་པ་བཏགས། སྐུ་ཙཀ་ལི་དང་བཅས་པ་རྟེན་རྫས་དང་། མཚལ་དང་ར་ཁྲག་གིས་སྲོག་སྔགས་དང་། བྱི་རུ་ལ་ཧིབྲི་མཆོང་དམར་པོ་དང་བཅས་དར་དམར་གྱིས་དྲིལ་ནས་ར་དམར་གྱི་སྙིང་དུ་བཅུག །རིན་པོ་ཆེ་འབྲུ་སྣ་དང་བཅས་པ་དར་དམར་གྱིས་བཏུམ་པ་ནི་བླ་རྡོའོ། །གནམ་ཆོས་གཞུང་ནས་ལས་ཚོགས་བཞི་གསུངས་པ་ནི་གཞུང་ལྟར་ལས། འདི་ཤིན་ཏུ་རྣོ་བས་གཞན་ལ་གནོད་དོགས་པས་རྦད་བསད་ནི་མ་གསུངས་ལ། ཆོས་དབང་གཏེར་ཁ་ནས་གསུངས་པའི་རྦད་བསད་སྔགས་ནི་ཨོཾ་ཏྲག་ཤར་བཛྲ་ར་ཏྲི་ཧཱུྃ་ཏྲིག་ཏ་ས་མ་ཡ་རྒྱུད་དུལ་དུལ་དགྲ་བོ་ཆེ་གེའི་སྙིང་རྩ་དུམ་བུར་ཧཱུྃ་སེར་ཏ་མཱ་ར་ཡ་
གྱི་བྷྱོ་བྷྱོ་ཧཱུྃ་ཕཊ༔ འདིའི་བྱ་ཚུལ་ནི་ཆོས་སྐྱོང་སྤྱི་དང་མཐུན་པར་འདུག་པས་སྨོས་མ་དགོས། བླ་མ་ཚུལ་ཁྲིམས་རིན་ཆེན་གྱི་དྲུང་ནས། འདིའི་གསོལ་ཁ་རྒྱས་པར་དགྲ་ལས་རྣམ་རྒྱལ་དང་། བསྡུས་པ་ཧཱུྃ་སྒྲ་བཅུ་དྲུག་མ། མགོན་མང་གི་དབང་དང་བཅས་པ་ཐོབ། མགོན་མང་མཇུག་ཏུ་སྡེ་བརྒྱད་སྲོག་དབང་གི་གོ་ཆོད་པ་ལས། འདི་ལ་གུད་དུ་བཀའ་གཏད་ཡོད་པ་མི་འདྲ་བས་ཁོང་གིས་ཀྱང་མ་ཐོབ་གསུངས། དུས་ཕྱིས་སྤྲུལ་སྐུ་མི་འགྱུར་རྡོ་རྗེ་དགུང་ལོ་བཅུ་གསུམ་པ། བྱ་ལོ་ས་ག་ཟླ་བའི་ཚེས་བཅུ་གསུམ་ཉིན་ཕྱེད་ཙམ་ལ་བཙན་ཇག་པ་མེ་ལེན་དེ་དངོས་སུ་བྱུང་ནས་སྒྲུབ་ཐབས་འདི་ཕུལ། འདིའི་བཀའ་གཏད་ཀྱང་ཐོབ་པས། བརྒྱུད་པ་ཉེ་ཞིང་བྱིན་རླབས་ཀྱི་སོ་མ་ཉམས་པ་ཡིན་པས། རྒྱུན་དུ་གཏོར་བསྔོས་ཀྱི་གྲར་ཡང་འཛུད། འགའ་ཞིག་གིས་འདིའི་ལས་ཚོགས་ཚད་པས་ཀྱང་རྣ་བར་འདུག་ཟེར། དེ་ལྟ་བུའི་བཀའ་གཏད་ཞུ་བའི་ཕྱིར་མཎྜལ་ཕུལ། ཞེས་པ་གནམ་ཆོས་ལས་བྱུང་བའི་སྒྲུབ་ཐབས་དང་བཀའ་གཏད་ཀྱི་ཁ་སྐོང་དུ། གཏེར་བློན་རཱ་ག་ཨ་སྱས་སྨྲས་པ་ལྟར། གེ་མོ་དགེ་སློང་གིས་ཡི་གེར་བཀོད་པ་ལ། ཉེས་འགལ་མཆིས་ན་བཀའ་སྲུང་ཉིད་ལ་བཤགས། དགེ་བས་གསང་སྔགས་ཀྱི་བསྟན་པ་གཉེན་པོ་སྲུང་བར་གྱུར་ཅིག། །།