གིང་གི་མགོན་པོའི་བསྐུལ་པ་ཕྱོགས་གཅིག་ཏུ་བསྒྲིགས་པ།
གིང་གི་མགོན་པོའི་བསྐུལ་པ་ཕྱོགས་གཅིག་ཏུ་བསྒྲིགས་པ་བཞུགས་སོ། །གིང་ཆེན་མགོན་པོ་དགྲ་ལ་རྦད་ན། གསོལ་ཁ་ཚར་ནས་གཤེགས་གསོལ་མི་བྱེད། ལིངྒ་ཁྲག་གིས་སྦག་པ་ལ་འགུགས་གཞུག་བྱས་ལ་གྲིས་གཏུབས་ཏེ་གསོལ་ཁར་བླུག༔ ཆང་རྒོད་ཀྱིས་བྲན་ལ༔ དགྲ་བགེགས་ཀྱི་ཤ་ཁྲག་ཏུ་དམིགས་ཏེ༔ རང་ཉིད་གུ་རུ་དྲག་པོའི་ང་རྒྱལ་གྱིས་བསྐུལ་ལོ༔ ཧཱུྃ༔ བླ་མ་དྲག་པོའི་བཀའ་ཉན་ནི༔ ཕ་ནི་སྲིན་བདུད་ཆེན་པོ་ལ༔ མ་ནི་མོ་བདུད་ཆེན་མོ་ལ༔ སྐྱེས་བུ་སྲོག་བདག་ཤེལ་གིང་ཆེ༔ སྐུ་མདོག་འོད་དཀར་ཤེལ་རལ་ཅན༔ དཔྲལ་བར་སྤྱན་གཅིག་ཞལ་ཚེམས་གཅིག༔ གཡས་པས་གྲི་གུག་དགྲ་ལ་འདེབས༔ གཡོན་པའི་ཉི་ཟེར་དགྲ་སྲོག་གཅོད༔ ཚངས་པ་མེ་ལྷ་བྱིན་ན་ཧ་ར་ཆེ༔ ཉིན་འཕང་པད་རྒྱལ་ཟངས་གཡག་རྗེ༔ ཆིབས་སུ་སེང་གེ་དཀར་མོ་ཆིབས༔ དགྲ་བགེགས་སྙིང་དང་མགོ་བོས་བརྒྱན༔ རྒྱལ་འགོང་སྲོག་བདག་འབུམ་གྱིས་བསྐོར༔ ཡབ་སྡེ་ཆེན་པོ་དགྲ་ལ་ཆོས༔ གཏོར་མ་དགྲ་བོའི་ཤ་རུས་བཞེས༔ སྡང་བའི་དགྲ་བོ་སྒྲོལ་བ་དང་༔ མངོན་སྤྱོད་ཕྲིན་ལས་འགྲུབ་པར་མཛོད༔ མགོ་དང་ཡན་ལག་དུམ་བུར་ཕྲོལ༔ གྲི་འཐབ་ལྔ་ཡིས་མྱུར་དུ་སོད༔ རྐང་ཚལ་ཧུར་
ཐུམ་མྱུར་དུ་སོད༔ དགྲ་བོའི་ཀླད་པ་ཞོ་ལྟར་དཀྲུགས༔ བདུན་རྒྱུད་ཡན་ཆད་རྩད་ནས་ཆོད༔ ལྟས་ངན་སྣ་དགུ་ད་ཐོངས་ཤིག༔ ཝ་ལ་སྤྲེལ་ཞོན་ད་ཐོངས་ཤིག༔ སྒོ་ཁྱི་ཕྱེ་འགག་ད་ཐོངས་ཤིག༔ ནུས་རྩལ་ཅི་འདུག་ད་ལྟའོ༔ རྦད་དོ་ད་ལྟ་མྱུར་དུ་མཛོད༔ ཧཱུྃ་བྷྱོ༔ ཉི་མ་ཕྱོགས་ཕྱོགས་ཕ་ཀི་ན༔ ལྷོ་ནུབ་སྲིན་པོའི་ཡུལ་རྩེ་ན༔ ཤེལ་གྱི་སྐུ་མཁར་ལྡེམ་པ་ན༔ སྲོག་བདག་རྒྱལ་པོ་ཡོངས་ཀྱི་རྗེ༔ དགྲ་ལྷའི་རྒྱལ་པོ་པེ་ཧར་ནི༔ སྐུ་མདོག་དཀར་སྨུག་བརྗིད་པའི་ཞལ༔ ངུར་སྨྲིག་ཆོས་གོས་སྐུ་ལ་མནབས༔ གཡས་པས་གསེག་ཤང་བསིལ་ཤིང་འཛིན༔ གསོར་ཞིང་དམ་ཉམས་དགྲ་ལ་འཕང་༔ གཡོན་པས་ལྕགས་ཀྱི་ལྷུང་བཟེད་འཛིན༔ དམ་ཉམས་དགྲ་བོའི་སྙིང་ཁྲག་འཐུང་༔ ཆིབས་སུ་སེང་གེ་དཀར་མོ་ཆིབས༔ འཁོར་དུ་འགོང་པོ་འབུམ་གྱིས་བསྐོར༔ སྨྱོ་འབོག་བཏང་བའི་མཐུ་བོ་ཆེ༔ འདིར་གཤེགས་བརྒྱན་པའི་གཏོར་མ་བཞེས༔ ཁྲོས་ནས་དྲག་ཏུ་རྦད་པའི་ཚེ༔ སེང་གེ་འདུར་དང་ཆེམས་སེ་ཆེམ་རླུང་ནག་མགྱོགས་པའི་མྱུར་བར་རྒྱུགས༔ སྲོད་ལ་དགྲ་བོའི་བླ་ཁུག་ལ༔ ནམ་ཕྱེད་དམ་ཉམས་བརྒྱལ་དུ་ཆུག༔ ཐོ་རངས་
སྲོག་རྩ་དམར་པོ་ཆོད༔ སྙིང་ཁྲག་དྲོན་མོ་ཐང་ལ་ཕོས༔ བསྟན་པ་བཤིག་པའི་དགྲ་བོ་འདི༔ མྱུར་དུ་བསྒྲལ་བའི་དུས་ལ་བབ༔ ཧཱུྃ༔ སྲོག་བདག་རྒྱལ་པོ་པེ་ཧར་མཐུ་རྩལ་ཅན༔ དཀར་གསར་རབ་ཁྲོས་ཞལ་གཅིག་ཕྱག་གཉིས་པ༔ སྤྱན་གསུམ་སྡང་མིག་མཆེ་བཞི་རབ་ཏུ་གཙིགས༔ གཡས་གཡོན་ཤེལ་གྱི་རལ་གྲི་རུ་དར་བསྣམས༔ དར་དཀར་བེར་གྱོན་སེང་གེ་ཆིབས་ལ་བསྟོད༔ ཤ་ཁྲག་དམར་གྱིས་བརྒྱན་པའི་གཏོར་མ་དང་༔ ཁྱོད་དང་མཐུན་པའི་དམ་རྫས་འདི་བཞེས་ལ༔ སྣང་སྲིད་རྒྱལ་པོའི་དམག་ཚོགས་དགྲ་ལ་ཆོས༔ དགྲ་བོ་མི་ནོར་འཁོར་བཅས་བརླག་པར་མཛོད༔ ཧཱུྃ༔ སྟེང་གི་ཚངས་པ་གིང་གི་གཙུག༔ བར་གྱི་ཁུ་ལེ་ལག་དགུ་པ༔ འོག་གི་ས་བདག་དམུ་རྗེ་བཙན༔ ཆོས་འཁོར་སྐྱོང་བའི་པེ་ཧ་རཿ དགྲ་ལྷའི་རྒྱལ་པོ་རྫུ་འཕྲུལ་ཅན༔ སྣ་ཚོགས་སྐུ་ལྔར་བརྫུ་བའི་འཕྲུལ༔ ཤནྟི་རོ་ཟན་མས་དགའ་བ་མོན་བུ་པུ་ཏྲ་བྷ་དྲ་དང་༔ སྲིན་མོ་གནོད་སྦྱིན་ཅི་མ་རཿ རུ་འདྲེན་གར་མཁན་སྐྱོ་བསང་འབག༔ འགོང་པོ་དམ་སྲི་དམུ་ཐེའུ་རང་༔ བཏགས་ཆགས་ལྷ་མ་སྲིན་ཐམས་ཅད༔ ཁྱོད་ཀྱི་འཁོར་དུ་
འདུས་ནས་སུ༔ ཆོས་འཁོར་བཤིག་པའི་དགྲ་ལ་རྦད༔ འགོང་པོ་ཕུང་སྲིའི་ཁ་བཏོད་ལ༔ དབུལ་ཕོངས་འཆོས་ནས་བརླག་པར་གྱིས༔ དོ་ནུབ་བྱད་མ་མཁན་ལ་བོད༔ དམ་སྲི་ཕུག་ནས་བསླངས་ནས་སུ༔ ལུས་ངག་ཡིད་ལ་རང་གཤེད་ཕོབ༔ དོ་ནུབ་དགྲ་བོའི་སྟེང་དུ་རྦད༔ རྒྱལ་པོའི་ཁ་བཏོད་ཕུང་དཀྲུགས་ལ༔ ནང་འཁྲུག་དམེ་འཐབ་ལས་ལ་སྦྱོར༔ ཧཱུྃ༔ མ་གཡེལ་དགྲ་ལྷ་མཐུ་བོ་ཆེ༔ སྐུ་མདོག་སྔོ་ནག་འབར་བ་ལ༔ གཡུ་ཕྲེང་སྔོན་པོའི་རྒྱན་གྱིས་བརྒྱན༔ སྐུ་ལ་དར་ནག་བེར་ཆེན་གསོལ༔ དབུ་ལ་དར་ཞུ་གདུགས་ཐབས་གསོལ༔ ཕྱག་ན་སྤུ་གྲི་ཞགས་པ་ཐོགས༔ ཆིབས་སུ་དྲིལ་ནག་ཁ་སྐྱ་ཆིབས༔ དགྲ་བླ་ཆེན་པོ་དགྲ་ལ་ཆོས༔ བཀའ་སྡོད་གནོད་སྦྱིན་ནག་པོ་བརྒྱད༔ སྤུ་གྲི་ཐོགས་ནས་ཤ་རུས་འབྱེད༔ གནོད་སྦྱིན་དགྲ་བོའི་ཤ་ལ་ལྷན༔ ལས་མཁན་བདུད་པོ་ནག་པོ་བརྒྱ༔ ཐོད་ཁྲག་ཐོགས་ནས་སྲོག་རྩ་འབྱིན༔ བདུད་མོའི་སྲོག་ལ་ལྡིབ་ལྡིབ་འཐུང་༔ བཀའ་ཉན་མོན་པ་ནག་པོ་བརྒྱ༔ རལ་གྲི་ཐོགས་ནས་སྙིང་རྩ་འབྱིན༔ མོན་པ་སྙིང་ལ་ཕྱོ་ཕྱོ་ཡ༔ ཕོ་ཉ་སྟག་ཆས་དཔའ་བོ་བརྒྱ༔ བུད་མེད་དར་ནག་ཐོགས་པ་
བརྒྱ༔ གཅན་གཟན་ཤ་རུས་འཆའ་བ་བརྒྱ༔ ཕོ་ཉའི་རྩལ་ལ་རུབ་རུབ་འདུས༔ དམ་ཉམས་དགྲ་བོ་ལས་ངན་འདི༔ རྒྱལ་པོ་འཁོར་བཅས་ཟ་སྐལ་གྱིས༔ གཏད་དོ་ལས་བཅོལ་མཐུ་མ་ཆུང་༔ བཅོལ་བའི་ཕྲིན་ལས་འགྲུབ་པར་མཛོད༔ ཨོཾ་བཛྲ་སུ་ཏྲི་རཀྟ༔ གནོད་སྦྱིན་དགྲ་ལ་ལྷན་ལྷན༔ བདུད་ཕོ་སྲོག་ལ་ལྕིབ་ལྕིབ༔ མོན་མོ་སྙིང་ལ་ཆོ་ཆོ༔ ཕོ་ཉ་རྩ་ལ་རྔུབ་རྔུབ༔ སུམ་ཏྲི་རཀྟ་ཀི་ལ་ཡ་མཱ་ར་ཡ་ཧཱུྃ་ཧཱུྃ་ཕཊ༔ ཨོཾ་བཛྲ་སུམ་ཏྲི་ས་དུ་མཱ་ར་ཡ་ཛ༔ སྙིང་ལ་རྦད༔ སུ་མཱ་ར་ཡ་ཛ༔ སྲོག་རྩ་རྩ་བོ་ཆེ་ལ་དུན་དུན་རྨུགས༔ རྩ་བྲན་སུམ་བརྒྱ་དྲུག་ཅུ་ལ་རྦད་སུ་མཱ་ར་ཛ་ཛ༔ ཞེས་གཏོར་མ་དགྲ་ཕྱོགས་སུ་བཏེག་པར་བྱ༔ ཆོས་སྐྱོང་མགོན་དཀར་ནག་གི་བསྐུལ་ཕྱོགས་གཅིག་ཏུ་ཀླག་བདེ་བར་བསྒྲིགས་པ་ལ་ཉེས་འགལ་མཆིས་ན་ཆོས་སྐྱོང་ཉིད་ལ་བཤགས་ཤིང་དགེ་བས་སངས་རྒྱས་ཀྱི་བསྟན་པ་དར་ཞིང་རྒྱས་པར་གྱུར་ཅིག༔ གིང་གི་བསྐུལ་པ་ཕྱོགས་གཅིག་ཏུ་བྲིས་པ་སྔགས་ནག་རཱ་གའི་མིང་ཅན་ནོ༔ ཤུ་བྷཾ། ༧ །ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།